Cenisihs 3 - ᐅᒋᐺ ᑭᒋᒪᓯᓇᐃᑲᓐᐃᓂᓂ ᐅᔕᔒᐱᑕᒧᐎᓐ ᐁᑕᔑᑌᓂᒃ 1 ᐃᓇᔥᑫ ᑕᔥ ᑭᓀᐱᒃ ᓇᐗᒡ ᑮᑲᑮᑖᐌᑕᒧᑯᐸᓐ ᐊᐲᒡ ᐸᑳᓐ ᐊᔭᐋᐎᔕᐞ ᑳᑮ ᐅᔑᐋᒡ ᑳᑎᐯᒋᑫᒡ ᑭᔐᒪᓂᑑ᙮ ᒦ ᐊᐌ ᑳᐃᓈᒡ ᐃᑴᐗᓐ, ᑌᐺ ᓇ ᑯ ᑮᐃᑭᑐ ᑭᔐᒪᓂᑑ, ᑳᐐᓐ ᑭᑲ ᐅᑕᒋᑫᓰᒻ ᐁᑕᔂᑯᓯᐙᒡ ᒥᑎᑰᒃ ᐅᐅᒫ ᑭᑎᑫᐗᑲᒥᑯᕽ ᐁᔮᐙᒡ? 2 ᐊᐊ ᑕᔥ ᐃᑴ ᐅᑮᐃᓈᓐ ᐃᓂ ᑭᓀᐱᑰᓐ, ᐱᓵᓂᓴᑯ ᓂᒦᒋᒥᓐ ᒦᓇᓐ ᑳᐊᑰᑌᑭᓐ ᒥᑎᑯᕽ ᐃᐃᒫ ᑭᑎᑫᐗᑲᒥᑯᕽ᙮ 3 ᐅᐅ ᑕᔥ ᑮᐃᑭᑐ ᑭᔐᒪᓂᑑ, ᑳᐐᓐ ᑭᑲ ᐅᒋ ᐊᒧᒥᓀᓰᒻ ᐊᐊ ᒥᑎᒃ ᒣᑴᔭᐄ ᑭᑎᑫᐗᑲᒥᑯᕽ ᑳᐸᑕᑭᓱᒡ, ᑳᐐᓐ ᑲᔦ ᑭᑲ ᑖᑭᓈᓯᐙᐙ, ᒦ ᓴ ᐃ ᒋᓂᐳᔦᒃ ᑮᔥᐱᓐ᙮ 4 ᐊᐊ ᑕᔥ ᑭᓀᐱᒃ ᐅᑮᐃᓈᓐ ᐃᑴᐗᓐ, ᑳᐐᓐ ᑌᐺ ᑭᑲ ᓂᐳᓰᒻ᙮ 5 ᐃᓇᔥᑫ ᐋᓃᔥ ᑭᔐᒪᓂᑑ ᑭᑭᑫᓂᒥᑯᐙ ᐊᐲ ᐃᐃᒫ ᐅᒋ ᐊᒧᒥᓀᔦᒃ, ᑭᑲ ᐃᔑᐊᔮᒻ ᑖᐱᔥᑰ ᑭᔐᒪᓂᑑ ᒋᑭᑫᑕᒣᒃ ᒥᓄᐃᔑᐌᐱᓯᐎᓐ, ᒪᒋᐃᔑᐌᐱᓯᐎᓐ ᑲᔦ᙮ 6 ᐊᐲ ᑕᔥ ᐃᑴ ᐎᔮᐸᒫᒡ ᐃᓂ ᒥᑎᑰᓐ ᐁᐅᓂᔑᔑᓂᒡ ᒋᐅᑕᒋᑫᐎᓐᒡ, ᐋᐱᒋ ᑲᔦ ᐁᑮ ᒥᓉᑕᒧ ᓈᑯᓯᓂᒡ, ᐁᑮ ᒥᓴᐎᓈᑯᓯᓂᒡ ᑲᔦ ᐃᓂ ᒥᑎᑰᓐ, ᐅᑮ ᐅᑖᐱᓈᓐ ᐊᐊ ᐃᑴ ᐃᐃ ᒦᓐ ᐁᑮ ᒦᒋᒡ᙮ ᒦᑕᔥ ᑲᔦ ᑳᐃᔑ ᐊᔕᒫᒡ ᐅᓈᐯᒪᓐ᙮ 7 ᒦᑕᔥ ᑳᑮ ᒦᓂᑣ ᑭᑫᑕᒧᐎᓐ ᒦ ᐃ ᔐᒫᒃ ᑳᑮ ᑭᑫᑕᒧᐙᒡ ᐁᑭᑭᑯᓇᔦᓯᒀ᙮ ᒦᑕᔥ ᑳᐃᔑ ᒫᒪᐎᒀᑕᒧᐙᒡ ᑭᒋ ᔔᒥᓈᑎᑯᐎ ᐊᓃᐲᔕᓐ ᐁᑮ ᐅᔑᑕᒫᓱᐙᒡ ᐋᓯᔮᓇᓐ᙮ 8 ᐅᑮ ᓅᑕᐙᐙᓐ ᑕᔥ ᑳᑎᐯᒋᑫᓂᒡ ᑭᔐᒪᓂᑑᓐ ᐁᐱᒬᐌᓇᒥᓂᒡ ᑭᑎᑫᐗᑲᒥᑯᕽ ᐁᑕᑭᓈᑯᔑᓂᓂᒃ᙮ ᒦᑕᔥ ᑳᐃᔑ ᑳᓱᑕᐙᐙᒡ ᑳᑎᐯᒋᑫᓂᒡ ᑭᔐᒪᓂᑑᓐ ᐊᐊ ᐃᓂᓂ, ᐊᐊ ᑲᔦ ᐃᑴ, ᒣᑴᔮᑎᒃ ᐁᑮ ᐃᔖᐙᒡ ᑭᑎᑫᐗᑲᒥᑯᕽ᙮ 9 ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮ ᐊᑐᒫᓐ ᐃᓂ ᐃᓂᓂᐗᓐ, ᐋᑎ ᐁᔮᔭᓐ? ᐁᑮᐃᓈᒡ᙮ 10 ᐃᓂᓂ ᑕᔥ ᑮᐃᑭᑐ, ᑭᑮ ᓅᑕᐎᓐ ᐃᐃᒫ ᑭᑎᑫᐗᑲᒥᑯᕽ᙮ ᓂᑮ ᐅᒋ ᓭᑭᔅ ᑫᑰᓐ ᐁᑭᑭᔥᑲᓯᐙᓐ ᑳᑮ ᐅᒋ ᑳᓱᔮᓐ᙮ 11 ᑮᐃᔑ ᓇᑴᑕᐙ ᑕᔥ, ᐊᐌᓀᓐ ᑳᐃᓂᒃ ᑫᑰᓐ ᐁᑭᑭᔥᑲᓯᐗᓐ? ᑭᑮ ᐅᒋ ᐐᓯᓐ ᐃᓇ ᐊᐊ ᒥᑎᒃ ᑳᑮ ᐅᒋᐃᓈᓐ ᒋᐅᒋ ᐐᓯᓂᓯᐗᓐ? 12 ᐊᐊ ᑕᔥ ᐃᓂᓂ ᑮᐃᑭᑐ, ᐊᐊᐌ ᐃᑴ ᑳᑮ ᒦᔑᔭᓐ ᒋᐐᒌᐗᒃ, ᒦ ᐊᐌ ᑳᐅᒋ ᐊᔕᒥᒡ ᐃᐃᒫ ᒥᑎᑯᕽ ᒦᓐ᙮ ᒦᑕᔥ ᑳᐃᔑ ᒦᒋᔮᓐ᙮ 13 ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮᐃᓈᓐ ᐃᑴᐗᓐ, ᐌᑯᓀᓐ ᑕᔥ ᐃᐃ ᑳᐅᒋ ᐃᔑᒋᑫᔭᓐ? ᐅᐅ ᑕᔥ ᑮᐃᔑ ᓇᑴᑕᒻ ᐊᐊ ᐃᑴ, ᑭᓀᐱᒃ ᐅᔕ ᓂᑮ ᐗᔦᔑᒥᒃ ᑳᑮ ᐅᒋ ᐃᔑᒋᑫᔮᓐ᙮ ᑭᔐᒪᓂᑑ ᑮᐐᑕᕽ ᐋᓃᓐ ᑫᐃᔑᐌᐱᓯᓂᒡ 14 ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮᐃᓈᓐ ᐃᓂ ᑭᓀᐱᑰᓐ, ᐋᐱᒋ ᑭᑭᒋ ᐹᑖᒥᑰᐎᔅ ᐅᒋ ᐅᐅ ᑳᑮ ᐃᔑᒋᑫᔭᓐ, ᐊᐲᒡ ᐐᓐ ᐅᑯ ᑲᑭᓇ ᐊᐗᑳᓇᒃ, ᐅᑯ ᑲᔦ ᑲᑭᓇ ᐊᔭᐋᐎᔕᒃ᙮ ᑮᓐ ᑕᔥ ᐐᓐ ᑭᑲ ᒥᒋ ᒥᓴᑌᐅᑌ, ᑭᑲ ᒦᒋᓐ ᐃᐃ ᐹᒀᐗᕽ ᒥᓂᒃ ᑫᐱᒫᑎᓯᔭᓐ᙮ 15 ᑭᑲ ᐃᔑᐃᓂᓂᒻ ᒋᔒᑫᓂᑎᔦᒃ ᐊᐊ ᐃᑴ, ᑭᓃᒑᓂᓯᐙᒃ ᑲᔦ ᑕᔒᑫᓂᑎᐗᒃ᙮ ᐐᓐ ᑕᔥ ᐊᐊ ᐃᑴ ᑫᐅᓃᒑᓂᓯᒡ ᑭᑲ ᔑᑯᑎᒀᓀᔥᑳᑯᐙᓐ, ᑮᓐ ᑕᔥ ᑭᑲ ᐐᓴᑭᔥᑲᐎᒫᓐ ᐅᑑᑕᓂᓃᕽ᙮ 16 ᐃᑴᐗᓐ ᑕᔥ ᐅᑮᐃᓈᓐ, ᓇᐗᒡ ᑭᑲ ᐃᔑᐃᓐ ᐊᐗᔑᒣ ᒋᐐᓴᑫᑕᒪᓐ ᑭᑭᔥᑲᐙᐗᓱᔭᓐ, ᒋᐐᓴᑫᑕᒪᓐ ᑲᔦ ᐙᐸᒫᐗᓱᔭᓐ᙮ ᑭᑲ ᐊᑕᐌᓂᒫ ᑕᔥ ᑭᓈᐯᒻ᙮ ᐐᓐ ᑕᔥ ᑭᑲ ᑎᐯᓂᒥᒃ᙮ 17 ᑭᔐᒪᓂᑑ ᑕᔥ ᐅᑮᐃᓈᓐ ᐋᑕᒨᓐ Adam, ᐁᑮ ᐱᓯᑕᐗᒡ ᑕᔥ ᐊᐊ ᑭᐐᐤ ᐃᐃᒫ ᐁᑮ ᐅᒋ ᐐᓯᓂᔭᓐ ᒥᑎᑯᕽ ᑳᑮ ᐅᒋᐃᓈᐹᓐ ᒋᐅᑕᒋᑫᓯᐗᓐ, ᒦ ᓴ ᐃ ᑮᓐ ᑮᐸᑖᑕᒫᓱᔭᓐ ᐅᐅ ᐊᑭ᙮ ᐁᑕᓱ ᑮᔑᒃ ᑭᑲ ᐊᔮᓐ ᑭᒋ ᐊᓄᑮᐎᓐ ᒋᐅᒋ ᐐᓯᓂᔭᓐ ᒥᓂᒃ ᑫᐱᒫᑎᓯᔭᓐ᙮ 18 ᑭᑲ ᓂᑖᐎᑭᑕᒫᑯᓐ ᑕᔥ ᐊᑭ ᒦᓀᓵᑎᑰᒃ, ᐅᑳᐎᒥᓇᑲᔒᐸᑰᓐ ᑲᔦ᙮ ᐃᓂ ᑕᔥ ᐊᔥᑭᐸᑰᓐ ᑳᓂᑖᐎᑭᑭᓐ ᐊᑮᕽ, ᒦᐗᓐ ᓴ ᐃᓂ ᑫᐅᒦᒋᒥᒥᔭᓐ᙮ 19 ᓇᑲᐌ ᒋᐊᐺᓄᑮᔭᓐ ᒋᑆ ᒦᒋᔭᓐ ᑭᒦᒋᒥᒻ ᐲᓂᔥ ᒋᓂ ᐃᔥᒀ ᐱᒫᑎᓯᔭᓐ ᒋᓂ ᑮᐌᔭᓐ ᐃᐃᒫ ᐊᑮᕽ ᑳᑮ ᐅᒋ ᐅᔑᐃᑰᔭᓐ᙮ ᑭᐹᑾᑖᐗᑭᔅ ᐋᓃᔥ, ᒦᔥ ᐃᐃᒫ ᑫᔑ ᑮᐌᔭᓐ᙮ 20 ᐊᐊ ᑕᔥ ᐃᓂᓂ ᐋᑕᒻ (Adam) ᐅᑮ ᐃᔑᓂᑳᓈᓐ ᐃᓂ ᐃᑴᐗᓐ ᐄᑉ Eve᙮ ᒦ ᐃ ᐋᓃᔥ ᐗᐊ ᑫᓂ ᐅᒫᒫᒥᑯᒡ ᑲᑭᓇ ᑳᐱᒫᑎᓯᓂᒡ᙮ 21 ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮ ᐅᔑᑕᒪᐙᐞ ᐋᑕᒨᓐ, ᐃᓂ ᑲᔦ ᐃᑴᐗᓐ ᑫᑭᑭᔥᑲᒥᓂᒡ ᐁᑮ ᐅᒋ ᐅᔑᑑᒡ ᐊᔭᐋᐎᔑᐗᔮᓃᕽ᙮ ᐋᑕᒻ, ᐄᑉ ᑲᔦ ᑮᓵᑭᒋᓂᔕᐅᑣ ᑭᑎᑫᐎᓂᕽ 22 ᑳᑎᐯᒋᑫᒡ ᑭᔐᒪᓂᑑ ᑕᔥ ᑮᐃᑭᑐ, ᐃᓇᔥᑫ ᐗᐊ ᐃᓂᓂ ᓅᑯᒻ ᐯᔑᒃ ᑮᓇᐎᓐᑦ ᑳᐃᔑᐊᔮᔭᕽ ᐃᔑᐊᔮ, ᐁᑭᑫᑕᕽ ᒥᓄᐃᔑᐌᐱᓯᐎᓐ, ᒪᒋᐃᔑᐌᐱᓯᐎᓐ ᑲᔦ᙮ ᑕᑲ ᓴ ᑫᑯ ᑕᔒᐱᓂᑫᓂᓰ ᐃᐃᒫ ᐱᒫᑎᓯᐎᓈᑎᑰᕽ᙮ ᑮᔥᐱᓐ ᐅᑕᒋᑫᒡ ᐃᐃᒫ ᑕᑳᑭᑫ ᐱᒫᑎᓯ᙮ 23 ᒦᑕᔥ ᑳᐃᔑ ᓵᑭᒋᓂᔕᐙᒡ ᐃᐃᒫ ᑭᑎᑫᐗᑲᒥᑯᕽ ᒥᓄ ᐊᑮᕽ ᐄᑎᓐ Eden ᑳᑮ ᐃᒋᑳᑌᓂᒃ, ᐁᑮ ᐃᔑᓂᔕᐙᒡ ᐌᑎ ᐊᓅᒋᑯ ᒋᐊᑕ ᑭᑎᑫᓂᒡ ᑳᑮ ᐅᒋ ᐅᔑᐋᒡ ᐊᑮᕽ᙮ 24 ᐅᑮ ᓵᑭᒋᑯᑯᓈᓐ ᐃᑕᔥ ᐃᓂ ᐃᓂᓂᐗᓐ᙮ ᐅᑮ ᐊᓵᐞ ᑕᔥ ᒉᕒᐊᐲᑳᓇᐞ Cherubim ᐃᐃᒫ ᓇᑫ ᐙᐸᓄᕽ ᑭᑎᑫᐗᑲᒥᑯᕽ, ᒥᓄ ᐊᑮᕽ ᐄᑎᓐ ᑳᐃᔑᓂᑳᑌᓂᒃ᙮ ᑭᒋ ᒨᑯᒫᓐ ᑲᔦ ᐁᐌᐌᐸᑯᓀᓭᒃ ᑫᑲᑮᐳᓂᑯᒡ ᐊᐎᔭ ᒌᔖᓯᒃ ᐃᐃᒫ ᐱᒫᑎᓯᐎᓈᑎᑯᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society