Cenisihs 29 - ᐅᒋᐺ ᑭᒋᒪᓯᓇᐃᑲᓐᒉᑲᑉ ᑮᑕᑯᔑᕽ ᐁᔑᑖᓂᒡ ᓬᐁᐸᓅᓐ ᐅᒥᔔᒣᔕᓐ 1 ᒉᑲᑉ Jacob ᑕᔥ ᐁᐊᓂ ᐸᐱᒥ ᐊᔮᒡ ᐲᓂᔥ ᑮᐊᓂ ᑕᑯᔑᓐ ᐊᑮᕽ ᐙᐸᓄᕽ ᐃᓇᑫ ᑳᑮ ᐃᔑᐊᔮᓂᒡ ᐯᒫᑎᓯᓂᒡ᙮ 2 ᒣᒀ ᑕᔥ ᐁᐱᒧᓭᒡ ᑮᐅᑎᑕᒻ ᒥᔕᐗᔭᐄ ᑳᑮ ᐃᔑᐊᔮᓂᒃ ᐅᑕᐃᐹᓐ᙮ ᓂᓶᐙᓐ ᑕᔥ ᒫᓇᒑᓂᔕᐞ ᑮᐱᒥᔑᓄᐞ ᐙᑳᔭᐄ ᐅᑕᐃᐹᓂᕽ, ᒦ ᐋᓃᔥ ᐃᐃᒫ ᑳᐅᒋ ᒥᓂᑴᓂᒡ᙮ ᑭᒋᐊᓯᓃᓐ ᑕᔥ ᑮᑭᐹᐱᑭᔑᓅᓐ ᐃᐃᒫ ᐅᑕᐃᐹᓂᕽ᙮ 3 ᐊᐲ ᓴ ᑮᒫᒪᐎ ᑕᑯᔑᓄᐙᒡ ᒫᓇᒑᓂᔕᒃ ᐃᐃᒫ ᐅᑕᐃᐹᓂᕽ, ᐱᓇᒫ ᓴ ᑳᑮ ᑲᓇᐌᓂᒫᐙᒡ ᒫᓇᒑᓂᔕᐞ ᓂᑯᒋ ᐅᑮ ᐃᔑ ᑎᑎᐱᓈᐙᓐ ᑭᒋ ᐊᓯᓃᓐ, ᒦᑕᔥ ᐸᔦᔥ ᑳᐃᔑ ᒥᓇᐋᐙᒡ ᐅᒫᓇᒑᓂᔑᒥᐙᐞ, ᒦᓇᐙ ᑕᔥ ᐅᑮ ᑮᐌ ᑭᐹᐱᑭᔑᒫᐙᓐ ᐃᐃᒫ ᐅᑕᐃᐹᓂᕽ᙮ 4 ᒉᑲᑉ ᑕᔥ ᐅᑮ ᐃᔑ ᑲᑴᒋᒫᐞ ᐃᐃ ᑳᑮ ᓈᓈᑲᒋᐋᓂᒡ ᒫᓇᒑᓂᔕᐞ, ᓃᒌᒃ, ᐋᓃᑎ ᑮᓇᐙ ᐌᒌᔦᒃ? ᐅᑮᐃᓈᐞ᙮ ᐅᐅ ᑕᔥ ᐅᑮᐃᑰᐞ, ᐁᕒᐊᓐ Haran ᐆᑌᓈᕽ ᓂᑐᒌᒥᓐ, ᐅᑮ ᐃᔑ ᓇᑴᑖᑰᐞ᙮ 5 ᒦᑕᔥ ᑳᐃᓈᒡ, ᑭᑭᑫᓂᒫᐙ ᓇ ᓬᐁᐸᓐ Laban ᑳᐅᐅᔑᓯᒥᑯᒡ ᓀᐅᕒᐊᓐ Nahor? ᐅᐅ ᑕᔥ ᐅᑮᐃᑰᐞ, ᐁᔭᐞ, ᓂᑭᑫᓂᒫᓈᓐ, ᐅᑮᐃᑰᐞ᙮ 6 ᒥᓄᐊᔮ ᓇ ᓬᐁᐸᓐ? ᑕᔥ ᐅᑮ ᐃᔑ ᑲᑴᒋᒫᐞ᙮ ᐅᐅ ᑕᔥ ᐅᑮᐃᑰᐞ, ᐁᔭᐞ, ᒥᓄᐊᔮ᙮ ᒦᔥ ᑳᐊᓂᐃᑯᒡ, ᐃᓇᔥᑫ ᐃᓈᐱᓐ, ᒦᐅᔕᐊ ᐅᕒᐁᒐᓬ Rachel ᑳᐱᓈᑯᓯᒡ, ᓬᐁᐸᓐ ᐅᑖᓂᓴᓐ, ᑳᐲᓈᓂᒡ ᐅᒫᓇᒑᓂᔑᒪᐞ, ᐅᑮᐃᑰᐞ᙮ 7 ᒉᑲᑉ ᑕᔥ ᑮᐃᑭᑐ, ᑫᔮᐱ ᐄᑐᒃ ᐃᔥᐱᑮᔑᑲᓐ, ᑳᐐᓐ ᒪᔑ ᐅᒋᒋᓭᓯᓅᓐ ᒋᒫᐗᑑᓂᑣᐸᓐ ᒫᓇᒑᓂᔕᒃ᙮ ᐃᓇᔥᑫ ᒥᓇᐃᑾᒃ ᑭᒫᓇᒑᓂᔑᒥᐙᒃ, ᐃᔑᐎᓈᑫᒀᓂᒃ ᑕᔥ ᐌᑎ ᑫᔑ ᒦᒋᐙᒡ ᒪᔥᑯᓰᓐ, ᐅᑮᐃᓈᐞ᙮ 8 ᒦᑕᔥ ᑳᐃᔑ ᓇᑴᑖᑯᒡ, ᑳᐐᓐ ᓂᑖ ᑲᔥᑭᑑᓰᒥᓐ ᐃᐃ ᒌᔑᒋᑫᔮᕽ, ᐹᓂᒫ ᑲᑭᓇ ᒫᓇᒑᓂᔕᒃ ᑮᑕᑯᔑᓄᐙᒡ ᐅᐅᒫ, ᐊᐊ ᑲᔦ ᐊᓯᓐ ᓂᑯᒋ ᐃᔑ ᑎᑎᐱᓂᑲᓂᐎᒡ; ᒦᑕᔥ ᐃᐃ ᐸᔦᔥ ᒋᒥᓇᐊᑭᑣ ᒫᓇᒑᓂᔕᒃ, ᐅᑮᐃᑰᐞ᙮ 9 ᒣᒀ ᑕᔥ ᒉᑲᑉ ᐁᑲᑭᑐᒡ, ᐅᕒᐁᒐᓬᐗᓐ ᑮᐱ ᑕᑯᔑᓅᓐ, ᐁᑮ ᐲᓈᓂᒡ ᐅᑌᑌᓐ ᐅᒫᓇᒑᓂᔑᒥᓂ ᑳᑮ ᐃᔑᐊᔮᐙᒡ᙮ ᐅᕒᐁᒐᓬ ᐄᑐᒃ ᑲᔦ ᐅᑮ ᑲᓇᐌᓂᒫᐞ ᒫᓇᒑᓂᔕᐞ᙮ 10 ᐊᐲ ᑕᔥ ᒉᑲᑉ ᑳᐙᐸᒫᒡ ᐅᕒᐁᒐᓬᐗᓐ ᐁᑮ ᐲᓈᓂᒡ ᐅᒫᓇᒑᓂᔑᒥᓂ ᐅᔑᔐᔕᓐ ᓬᐁᐸᓅᓐ, ᐅᒫᒫᓐ ᐅᑕᐌᒫᓂ, ᑮᐃᔖ ᐅᑕᐃᐹᓂᕽ᙮ ᒦᔥ ᓂᑯᒋ ᑳᐃᔑ ᑎᑎᐱᓈᒡ ᐃᓂ ᑭᒋ ᐊᓯᓃᓐ, ᐁᑮ ᒥᓇᐋᒡ ᐅᒫᓇᒑᓂᔑᒥᓂ᙮ 11 ᒉᑲᑉ ᑕᔥ ᐅᑮ ᐅᒌᒫᓐ ᐅᕒᐁᒐᓬᐗᓐ, ᐁᑮ ᒫᒌ ᒪᐎᒡ ᑳᐊᐲᒋ ᒥᓉᑕᕽ᙮ 12 ᒉᑲᑉ ᑕᔥ ᐅᑮ ᐐᑕᒪᐙᓐ ᐅᕒᐁᒐᓬᐗᓐ ᐁᑮ ᐃᓇᐌᒫᒡ ᐅᑌᑌᓂ, ᐁᑮ ᐅᑯᓯᓯᒥᑯᒡ ᑲᔦ ᐅᕒᐃᐯᑲᐗᓐ Rebekah᙮ ᒦᑕᔥ ᑳᐃᔑ ᒫᒌᐸᑑᒡ ᐅᕒᐁᒐᓬ ᐁᑮ ᐊᐎ ᐐᑕᒪᐙᒡ ᐅᑌᑌᓐ᙮ 13 ᐊᐲ ᑕᔥ ᓬᐁᐸᓐ ᑳᓅᑕᕽ ᐅᑑᔑᒪᓐ ᒉᑲᐴᓐ ᐅᒋ, ᑮᐊᐸᑑ ᐁᑮ ᐊᑕ ᓇᑭᔥᑲᐙᒡ, ᐁᑮ ᑭᑭᒋᑴᐱᓈᒡ ᐁᑮ ᐅᒌᒫᒡ᙮ ᒦᑕᔥ ᑳᐃᔑ ᐃᔑᐎᓈᒡ ᐅᐙᑳᐃᑲᓂᕽ᙮ ᒉᑲᑉ ᑕᔥ ᐅᑮ ᐐᑕᒪᐙᓐ ᓬᐁᐸᓅᓐ ᑲᑭᓇ ᑫᑰᓐ᙮ 14 ᒦᔥ ᐅᐅ ᑳᐃᑭᑐᒡ ᓬᐁᐸᓐ, ᑌᐺ ᓴ ᐄᓴᓐ ᐯᔓ ᑭᑎᓇᐌᑎᒥᓐ, ᑮᐃᑭᑐ᙮ ᒉᑲᑉ ᑕᔥ ᐯᔑᑯ ᑮᓯᔅ ᐃᐃᒫ ᑮᐊᔮ᙮ ᒉᑲᑉ ᑮᐊᓄᑮᑕᐙᒡ ᓬᐁᐸᓅᓐ ᐅᑖᓂᓯᓂ ᐅᒋ 15 ᓬᐁᐸᓐ Laban ᑕᔥ ᐅᑮᐃᓈᓐ ᒉᑲᐴᓐ Jacob, ᑳᐐᓐ ᐄᑐᒃ ᐃᔑᓈᑾᓯᓅᓐ ᐊᓂᔖ ᒋᐊᓄᑮᑕᒪᐎᔭᐸᓐ ᒥᓴᐙ ᑯ ᐁᐃᓇᐌᒥᓈᓐ᙮ ᐋᓃᓐ ᑕᔥ ᒥᓂᒃ ᐁᑕᐌᑕᒪᓐ ᒋᑎᐸᐊᒪᐎᓈᓐ? ᐅᑮᐃᓈᓐ᙮ 16 ᓬᐁᐸᓐ ᑕᔥ ᑮᓃᔑᐗᐞ ᐅᑖᓂᓴᐞ᙮ ᑳᑮ ᐅᒥᓭᓯᒫᐎᓂᒡ ᓬᐄᔭ Leah ᑮᐃᔑᓂᑳᓱᐗᓐ᙮ ᐃᓂ ᑕᔥ ᑳᑮ ᐅᔒᒣᔑᒫᐎᓂᒡ ᐅᕒᐁᒐᓬ Rachel ᑮᐃᔑᓂᑳᓱᐗᓐ᙮ 17 ᓬᐄᔭ ᑕᔥ ᑳᐐᓐ ᐋᐱᒋ ᑮᐙᐱᓰ᙮ ᐊᐊ ᑕᔥ ᐐᓐ ᐅᕒᐁᒐᓬ ᑮᒥᓄᐐᔭᐌ, ᑮᒥᓄᓈᑯᓯ ᑲᔦ᙮ 18 ᒉᑲᑉ ᑕᔥ ᐅᑮ ᓵᑭᐋᓐ ᐅᕒᐁᒐᓬᐗᓐ, ᒦᔥ ᑳᐃᑭᑐᒡ, ᓃᔣᓱ 7 ᐱᐴᓐ ᓴ ᑭᑲ ᐊᓄᑮᑕᐎᓐ ᒣᔥᑾᒡ ᑭᑖᓂᔅ ᐅᕒᐁᒐᓬ, ᐅᑮᐃᓈᓐ᙮ 19 ᓬᐁᐸᓅᓐ ᑕᔥ ᐅᑮ ᐃᔑ ᓇᑴᑖᑰᓐ, ᓇᐗᒡ ᐄᑐᒃ ᑕᐅᓂᔑᔑᓐ ᑮᓐ ᒋᒦᓂᓈᐹᓐ ᐊᐊ ᓂᑖᓂᔅ ᐊᐲᒡ ᐐᓐ ᐸᑳᓐ ᐊᐎᔭ ᐃᓂᓂ ᒋᒦᓇᑭᐸᓐ᙮ ᐱᓵᓐ ᓴ ᐅᐅᒫ ᐊᔮᓐ ᒋᐊᓄᑮᑕᐎᔭᓐ, ᐅᑮᐃᑰᓐ᙮ 20 ᒉᑲᑉ ᑕᔥ ᑮᐊᓄᑮ ᓃᔣᓱ 7 ᐱᐴᓐ ᐁᑮ ᐐ ᐊᔮᐙᒡ ᐅᕒᐁᒐᓬᐗᓐ᙮ ᑖᐱᔥᑰ ᑕᔥ ᐁᑕ ᓃᔓᑯᓐ ᐅᑮ ᐃᓀᑖᓐ ᐃᐃ ᓃᔣᓱ ᐱᐴᓐ, ᑳᐊᐲᒋ ᓵᑭᐋᒡ ᐅᕒᐁᒐᓬᐗᓐ᙮ 21 ᒉᑲᑉ ᑕᔥ ᐅᑮᐃᓈᓐ ᓬᐁᐸᓅᓐ, ᒦᔑᔑᓐ ᑕᔥ ᐊᐊ ᑭᑖᓂᔅ ᑫᐐᐎᔮᓐ, ᒋᓈᓯᑲᐗᒃ ᒋᐐᐯᒪᒃ᙮ ᒦ ᐄᑐᒃ ᑮᐅᒋᒋᓭᒃ ᒥᓂᒃ ᑳᑮᐃᓂᓈᐹᓐ ᐁᐐ ᐊᓄᑮᑕᐎᓈᓐ, ᐅᑮᐃᓈᓐ᙮ 22 ᓬᐁᐸᓐ ᑕᔥ ᑲᑭᓇ ᐊᐎᔭᐞ ᐅᑮ ᐊᑐᒫᐞ, ᐁᑮ ᑾᔮᒋᑖᒡ ᐁᐐ ᑭᒋ ᐐᑎᑫ ᐐᑾᑫᒡ᙮ 23 ᐁᐊᓂ ᐅᓈᑯᔑᓂᓂᒃ ᑕᔥ ᓬᐁᐸᓐ ᐅᑮ ᐃᔑᐎᓈᓐ ᐅᑖᓂᓴᓐ ᓬᐄᔭᐗᓐ ᐁᔑᐊᔮᓂᒡ ᒉᑲᐴᓐ᙮ ᒦᔥ ᒉᑲᑉ ᑳᐃᔑ ᐐᐯᒫᒡ ᐃᓂ ᐃᑴᐗᓐ᙮ 24 ᓬᐁᐸᓐ ᑕᔥ ᑮᒦᑭᐌ ᐃᓂ ᐅᐸᒦᑖᑲᓂᑴᒪᓐ ᓯᓬᐸ Zilpah ᑳᑮ ᐃᔑᓂᑳᓱᓂᒡ, ᐁᑮ ᒦᓈᒡ ᓬᐄᔭᐗᓐ ᒋᐐᒋᐃᑯᓂᒡ᙮ 25 ᐹᓂᒫ ᑕᔥ ᐁᑭᔐᐹᐗᑲᓂᓂᒃ ᒉᑲᑉ ᑳᑮ ᑭᑫᑕᕽ ᓬᐄᔭᐗᓐ ᐃᓇᑾᓇ ᐃᓂ ᑳᑮ ᐐᐯᒫᒡ᙮ ᑮᐃᔖ ᑕᔥ ᓬᐁᐸᓅᓐ ᐁᑮᐃᓈᒡ, ᐁᑕᑕᐌ ᑭᑭᒋ ᑑᑕᐤ ᐅᐅ ᑳᑑᑕᐎᔭᓐ! ᐅᕒᐁᒐᓬ ᐄᑐᒃ ᑳᑮ ᐅᒋ ᐊᓄᑮᑕᐎᓈᓐ᙮ ᐌᑯᓀᓐ ᑕᔥ ᐌᒋ ᑭᒋ ᐗᔦᔑᒥᔭᓐ? ᐅᑮᐃᓈᓐ᙮ 26 ᓬᐁᐸᓅᓐ ᑕᔥ ᐅᑮ ᐃᔑ ᓇᑴᑖᑰᓐ, ᑳᐐᓐ ᐃᐃ ᓂᑎᔑᒋᑫᓰᒥᓐ ᐅᐅᒫ ᓂᑕᒻ ᒋᐐᑎᑫᐊᑭᑎᐸᓐ ᐊᐊ ᑳᐅᔒᒣᔑᒫᐎᒡ ᒋᑆ ᐐᑎᑫᓂᒡ ᐃᓂ ᐅᒥᓭᓴᓐ᙮ 27 ᐱᓇᒫ ᓴ ᐲᐅᓐ ᐯᔑᑯᑕᐗᑌ ᒌᔥᒀ ᐃᔑᓭᒃ ᐅᐅ ᑳᑭᒋ ᐐᑎᑫ ᐐᑾᑎᕽ᙮ ᒦᑕᔥ ᐊᐲ ᑫᒦᓂᓈᓐ ᐅᕒᐁᒐᓬ ᒋᐊᓄᑮᑕᐎᔭᓐ ᒦᓇᐙ ᓃᔣᓱ ᐱᐴᓐ, ᐅᑮᐃᑰᓐ᙮ 28 ᒉᑲᑉ ᑕᔥ ᐱᓵᓂᑯ ᑮᐃᓀᑕᒻ᙮ ᐯᔑᑯᑕᐗᑌ ᑕᔥ ᑳᐃᔥᒀ ᐃᔑᓭᓂᒃ ᐁᑮ ᐃᔥᒀ ᐐᑾᑎᕽ, ᒦᔥ ᑳᑮ ᒦᓂᑯᒡ ᒋᐐᐎᒡ ᐃᓂ ᐅᑖᓂᓯᓂ ᐅᕒᐁᒐᓬᐗᓐ᙮ 29 ᓬᐁᐸᓐ ᑕᔥ ᑮᒦᑭᐌ ᐃᓂ ᐅᐸᒦᑖᑲᓂᑴᒪᓐ ᐱᓬᐊ Bilhah ᑳᑮ ᐃᔑᓂᑳᓱᓂᒡ, ᐁᑮ ᒦᓈᒡ ᐅᕒᐁᒐᓬᐗᓐ ᒋᐐᒋᐃᑯᓂᒡ᙮ 30 ᒉᑲᑉ ᑕᔥ ᑲᔦ ᐅᑮ ᐐᐯᒫᓐ ᐅᕒᐁᒐᓬᐗᓐ᙮ ᐅᕒᐁᒐᓬᐗᓐ ᑕᔥ ᓇᐗᒡ ᐅᑮ ᓵᑭᐋᓐ ᐊᐲᒡ ᐐᓐ ᐃᓂ ᓬᐄᔭᐗᓐ᙮ ᓃᔣᓱ ᐱᐴᓐ ᐃᑕᔥ ᑫᔮᐱ ᐅᑮ ᐊᓄᑮᑕᐙᓐ ᓬᐁᐸᓅᓐ᙮ ᒉᑲᑉ ᐅᓃᒑᓂᓴᐞ ᐁᑕᔑᓱᓂᒡ 31 ᐊᐲ ᑕᔥ ᑳᑎᐯᒋᑫᒡ ᐁᐙᐸᑕᕽ ᓬᐄᔭᐗᓐ Leah ᐁᓵᑭᒋᑲᓂᐎᓯᓂᒃ, ᐅᑮ ᐃᔑᐋᓐ ᒋᑲᑲᔥᑭᑑᓂᒡ ᒋᐅᓃᒑᓂᓯᓂᒡ᙮ ᐅᕒᐁᒐᓬ Rachel ᑕᔥ ᑳᐐᓐ ᑮᐅᑕᐱᓅᒌᔑᒥᓯ᙮ 32 ᓬᐄᔭ ᑕᔥ ᑮᑭᑭᔥᑲᐙᐗᓱ, ᑸᐎᓭᓴᓐ ᐁᑮ ᐊᔮᐙᒡ᙮ ᐅᕒᐆᐱᓐ Reuben ᑕᔥ ᐅᑮ ᐃᔑᓂᑳᓈᓐ᙮ ᐅᐅ ᐄᑐᒃ ᑮᐃᑭᑐ, ᑳᑎᐯᒋᑫᒡ ᐅᔕ ᐅᐙᐸᑖᓐ ᐁᔑ ᑲᒀᑕᑫᑕᒧᐗᒃ; ᑫᒋᓈᒡ ᒫᐐᓐ ᐃᑕᔥ ᓅᑯᒻ ᓂᑲ ᓵᑭᐃᒃ ᓂᓈᐯᒻ, ᑮᐃᑭᑐ᙮ 33 ᒦᓇᐙ ᑕᔥ ᑮᑭᑭᔥᑲᐙᐗᓱ ᑸᐎᓭᓴᓐ ᐁᑮ ᐊᔮᐙᒡ, ᒦᑕᔥ ᑳᐃᑭᑐᒡ, ᑳᑎᐯᒋᑫᒡ ᐋᓃᔥ ᑮᓅᑕᒻ ᐁᓵᑭᐃᑰᐙᓯᐗᒃ, ᒦᑕᔥ ᑳᐅᒋ ᒦᔑᒡ ᐅᓄ ᑫᐅᑯᓯᓯᐗᒃ, ᑮᐃᑭᑐ᙮ ᓯᒥᔭᓐ Simeon ᑕᔥ ᐅᑮ ᐃᔑᓂᑳᓈᓐ᙮ 34 ᒦᓇᐙ ᑕᔥ ᑮᐊᓂ ᑭᑭᔥᑲᐙᐗᓱ, ᑸᐎᓭᓴᓐ ᐁᑮ ᐊᔮᐙᒡ᙮ ᒦᑕᔥ ᑳᐃᑭᑐᒡ, ᒦᒫᐐᓐ ᓇᐗᒡ ᓅᑯᒻ ᓂᓈᐯᒻ ᐯᔓ ᒋᓴᑫᓂᒥᒡ ᐁᔑᐊᔮᐗᒃ, ᐋᓃᔥ ᒦ ᐃ ᓂᓯᓐ 3 ᐁᐊᔮᐎᒪᒃ ᐅᑯᓯᓴᐞ, ᑮᐃᑭᑐ᙮ ᓬᐄᐹᐃ Levi ᑕᔥ ᐅᑮ ᐃᔑᓂᑳᓈᓐ᙮ 35 ᒦᓇᐙ ᑕᔥ ᑮᑭᑭᔥᑲᐙᐗᓱ ᑸᐎᓭᓴᓐ ᐁᑮ ᐊᔮᐙᒡ, ᐅᐅ ᑕᔥ ᑮᐃᑭᑐ, ᑳᑎᐯᒋᑫᒡ ᓴ ᐐᓐ ᓅᑯᒻ ᓂᑲ ᒦᑴᒋᐌᓂᒫ, ᑮᐃᑭᑐ᙮ ᒎᑕ Judah ᑕᔥ ᐅᑮ ᐃᔑᓂᑳᓈᓐ᙮ ᒦᑕᔥ ᑳᐃᔑ ᐴᓅᔐᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society