Cenisihs 25 - ᐅᒋᐺ ᑭᒋᒪᓯᓇᐃᑲᓐᐁᐸᕒᐊᐋᒻ ᑯᑕᒃ ᐅᐲᐌᓰᒪᐞ 1 ᐁᐸᕒᐊᐋᒻ Abraham ᑕᔥ ᑯᑕᒃ ᒦᓇᐙ ᐃᑴᐗᓐ ᑮᐐᐎ, ᑫᑑᕒᐊ Keturah ᐁᑮ ᐃᔑᓂᑳᓱᓂᒡ᙮ 2 ᒦᑕᔥ ᐅᐅ ᑳᐃᔑᓂᑳᓱᓂᒡ ᐊᐱᓅᒌᔕᐞ ᑳᑮ ᐊᔮᐙᐙᒡ ᓯᒻᕒᐊᓐ Zimran, ᒐᒃᔕᓐ Jokshan, ᒦᑕᓐ Medan, ᒥᑎᔭᓐ Midian, ᐃᔥᐸᒃ Ishbak, ᔔᐊ Shuah᙮ 3 ᒐᒃᔕᓐ ᑮᐊᓂ ᐅᑯᓯᓯ ᐅᐅ ᔒᐸᐗᓐ Sheba, ᑏᑕᓇᓐ Dedan ᑲᔦ᙮ ᐊᐊ ᑕᔥ ᑏᑕᓐ Dedan ᐅᑯᓯᓴᐞ ᑮᐃᔑᓂᑳᓱᐗᐞ ᐋᔓᕒᐃᒻ Asshurim, ᓬᐃᑑᔑᒻ Letushim, ᓬᐄᐅᒥᒻ Leummim ᑲᔦ ᑳᑎᓄᐎᓂᒡ᙮ 4 ᒥᑎᔭᓐ ᑕᔥ ᐅᑯᓯᓴᐞ ᐅᐅ ᑮᐃᔑᓂᑳᓱᐗᐞ, ᐄᐸ Ephah, ᐄᐲᕒ Epher, ᐁᓇᒃ Hanoch, ᐊᐹᐃᑕ Abida, ᐁᓬᑌᐊ Eldaah᙮ ᒦᐗᐞ ᓴ ᐅᓄᐌᓂᐗᐞ ᑫᑑᕒᐊ ᐅᐲᐌᓰᒪᐞ᙮ 5 ᐁᐸᕒᐊᐋᒻ ᑕᔥ ᐅᑮ ᒦᓈᓐ ᐋᐃᓯᑰᓐ Isaac ᑲᑭᓇ ᑫᑰᓐ ᑳᑮ ᐊᔮᒡ᙮ 6 ᐃᐃ ᑕᔥ ᐅᑯᓯᓴᐞ ᑳᑮ ᐅᒌᓂᒡ ᐅᑖᓂᑫ ᐐᐎᕽ, ᐁᐸᕒᐊᐋᒻ ᐅᑮ ᒦᓈᐞ ᒥᑭᐙᓇᓐ ᒣᒀ ᑮᐱᒫᑎᓯᒡ᙮ ᐙᐸᓄᕽ ᑕᔥ ᐃᓇᑫ ᐅᑮᐃᓈᐞ ᒌᔖᓂᒡ, ᓂᑯᒋ ᐅᑮ ᐅᒋ ᐃᔑᓂᔕᐙᓐ ᐁᔑᐊᔮᓂᒡ ᐋᐃᓯᑰᓐ᙮ ᐁᐸᕒᐊᐋᒻ ᑮᓂᐳᒡ, ᑮᓇᐃᓂᓐᒡ ᑲᔦ 7 ᒥᓂᒃ ᑕᔥ ᑳᑮ ᐱᒫᑎᓯᒡ, ᓂᑯᑣᒃ ᓃᔣᓯᒥᑕᓇᔑᓈᓇᓐ 175 ᑮᑕᓱ ᐱᐴᓉ᙮ 8 ᒦᑕᔥ ᑳᐃᔑ ᐃᔥᒀ ᐱᒫᑎᓯᒡ ᐁᑮ ᓇᐃ ᑕᓱ ᐱᐴᓉᒡ ᐁᑮ ᐊᑭᐌᓰᐎᒡ᙮ ᐐᑫ ᑮᐊᑭᐌᓰᐎ, ᒦᔥ ᑳᐃᔑ ᓂᐳᒡ ᐁᑮ ᓇᐃᓂᓐᒡ᙮ 9 ᐅᑯᓯᓴᐞ ᐃᑕᔥ ᐋᐃᓯᑰᓐ Isaac, ᐃᔥᒣᔭᓬᐗᓐ Ishmael ᑲᔦ ᐅᑮ ᐃᔑ ᓇᐃᓂᑰᐞ ᐁᔑ ᐐᐹᐱᑳᓂᒃ ᒪᒃᐲᓬᐊ Machpelah ᑳᑮ ᐃᔑᓂᑳᑌᓂᒃ᙮ ᐃᐃ ᓴ ᐐᐹᐱᒃ ᑮᐃᔑᐊᔮᓂ ᐙᐸᓄᕽ ᐃᓇᑫ ᐊᔮᐎᓂᕽ ᒪᒻᕒᐃᑳᕽ Mamre, ᐅᑕᑮᒥᕽ ᐊᐊ ᐄᐸᕒᐊᓐ Ephron ᑮᐃᔑᐊᔮᓂ ᑳᑮ ᐅᑌᑌᒡ ᓲᐋᕒᐊᓐ Zohar ᐁᑦ Hittite ᑳᑮ ᑎᓄᐎᓂᒡ᙮ 10 ᐁᐸᕒᐊᐋᒻ ᐄᑐᒃ ᐅᑮ ᐊᑖᒫᑯᐸᓐ ᐁᑦ ᑳᑎᓄᐎᓂᒡ ᐃᐃ ᐊᑮᓂ᙮ ᒦᑕᔥ ᐃᐃᒫ ᑳᐃᔑ ᓇᐃᓈᑯᐸᓀᓐ ᐐᐗᓐ ᓭᕒᐊ Sarah ᑳᑮ ᐃᔑᓂᑳᓱᓂᒡ᙮ 11 ᐁᐸᕒᐊᐋᒪᓐ ᑕᔥ ᑳᐃᔥᒀ ᐱᒫᑎᓯᓂᒡ ᐋᐃᓯᒃ ᐅᑮ ᔕᐌᓂᒥᑰᓐ ᑭᔐᒪᓂᑑᓐ᙮ ᑮᐃᔑᑖ ᑕᔥ ᐃᐃᒫ ᒌᑲᔭᐄ ᐅᑑᑕᐃᐹᓐ ᑳᐱᒫᑎᓯᒡ ᑳᐙᐸᒥᒡ ᑳᑮ ᐃᒋᑳᑌᓂᒃ᙮ ᐃᔥᒣᔭᓬ ᐅᐲᐌᓰᒪᐞ ᐁᑕᔑᓱᓂᒡ 12 ᒦᐗᐞ ᐃᑕᔥ ᐅᓄ ᐃᔥᒣᔭᓬ Ishmael ᐅᐲᐌᓰᒪᐞ ᐁᐸᕒᐊᐋᒪᓐ ᑳᑮ ᐅᑌᑌᒡ, ᐅᒫᒫᓐ ᐃᑕᔥ ᐁᑳᕒ Hagar ᑮᐃᔑᓂᑳᓱᐗᓐ ᐄᒋᐸᑮᕽ Egypt ᑳᑮ ᐅᒌᓂᒡ᙮ ᐁᑳᕒ ᓴ ᓭᕒᐊᐗᓐ Sarah ᐅᑮ ᐸᒦᑕᐙᓐ᙮ 13 ᒦᔥ ᐅᐅ ᐁᔑᓂᑳᓱᓂᒡ ᐃᔥᒣᔭᓬ ᐅᑯᓯᓴᐞ ᐁᐃᔑ ᐐᓱᓂᒡ ᑳᑮ ᐃᔑ ᓂᑖᐎᑭᓂᒡ᙮ ᓃᐯᔪᑦ Nebaioth ᓭᓰᑭᓯᒡ, ᑮᑕᕒ Kedar, ᐊᑦᐲᔭᓬ Adbeel, ᒥᑉᓴᒻ Mibsam, 14 ᒥᔥᒪ Mishma, ᑑᒪ Dumah, ᒫᓴ Massa, 15 ᐁᑖᑦ Hadad, ᑏᒪ Tema, ᒌᑕᕒ Jetur, ᓀᐱᔥ Naphish ᑲᔦ ᑫᑏᒪ Kedemah᙮ 16 ᒦᑕᔥ ᐃᐃ ᐃᔥᒣᔭᓬ ᐅᑯᓯᓴᐞ, ᐁᐙᐐᓱᓂᒡ ᑳᓃᑳᓂᓯᓂᒡ ᐁᑕᓱ ᐯᐸᑳᓉᐙᓇᑭᓯᓂᒡ, ᐁᔑ ᑲᑲᐯᔑᓂᒡ ᑲᔦ᙮ 17 ᓂᑯᑣᒃ ᓂᓯᒥᑕᓇᔑᓃᔣᓱ 137 ᓴ ᑮᑕᓱ ᐱᐴᓉ ᐃᔥᒣᔭᓬ ᑮᐃᔥᒀ ᐱᒫᑎᓯᒡ᙮ ᐁᔑ ᓇᐃᓂᒥᓐᒡ ᐃᑕᔥ ᐅᑎᓇᐌᒫᑲᓇᐞ ᑮᐃᔑ ᓇᐃᓈ᙮ 18 ᐅᐲᐌᓰᒪᐞ ᐃᓴ ᑕᔥ ᑮᐃᔑ ᑲᐯᔑᐗᐞ ᐋᐱᓬᐊ Havilah ᐊᑮᕽ ᐲᓂᔥ ᐌᑎ ᔔᕒ Shur ᐊᑮᕽ ᒌᑲᔭᐄ ᐄᒋᐸᑮᕽ ᐌᑎ ᐃᓇᑫ ᑳᓂ ᐃᔖᓂᐗᕽ ᐊᓰᕒᐃᔭ ᐊᑮᕽ᙮ ᐸᑳᓐ ᐃᑕᔥ ᑮᐃᔑᑖᐗᒃ ᐁᔑᑖᓂᒡ ᐃᐃ ᐅᑎᓇᐌᒫᑲᓂᐙᐞ᙮ ᑮᓂᑖᐎᑭᐙᒡ ᒉᑲᑉ, ᐊᐊ ᑲᔦ ᐄᔂ 19 ᒦᐗᐞ ᑕᔥ ᐅᐅ ᐋᐃᓯᒃ Isaac ᐅᐲᐌᓰᒪᐞ᙮ ᐋᐃᓯᒃ ᐄᑐᒃ ᑮᐅᑌᑌ ᐁᐸᕒᐊᐋᒪᓐ Abraham᙮ 20 ᐋᐃᓯᒃ ᓃᒥᑕᓇ 40 ᑮᑕᓱ ᐱᐴᓉ ᐊᐲ ᑮᐐᐎᒡ ᐅᕒᐃᐯᑲᐗᓐ Rebekah᙮ ᐅᕒᐃᐯᑲ ᑕᔥ ᐅᑌᑌᓐ ᐯᑦᔪᐁᓬ Bethuel ᑳᑮ ᐃᔑᓂᑳᓱᓂᒡ ᑳᑮ ᓂᑖ ᐸᐹᒥᑯᓯᓂᒡ ᒣᓱᐳᑌᒥᔭ Mesopotamia ᑳᑮ ᐅᒌᓂᒡ᙮ ᓬᐁᐸᓐ Laban ᑮᐃᔑᓂᑳᓱᐗᓐ ᐅᑕᐌᒫᓐ ᐊᐊ ᐃᑴ᙮ 21 ᐋᐃᓯᒃ ᑕᔥ ᐅᑮ ᐊᓇᒥᐁᑕᐙᓐ ᑳᑎᐯᒋᑫᓂᒡ ᐐᐗᓐ ᐅᒋ, ᐋᓃᔥ ᑳᐐᓐ ᐅᑮ ᑲᔥᑭᑑᓰᓂ ᒋᐅᓃᒑᓂᓯᓂᒡ᙮ ᑳᑎᐯᒋᑫᓂᒡ ᑕᔥ ᐅᑮ ᓅᑖᑰᓐ ᐋᐃᓯᒃ ᑳᑮ ᐃᔑ ᐊᓇᒥᐁᑕᐙᒡ᙮ ᒦᑕᔥ ᐃᐃ ᑌᐺ ᐐᐗᓐ ᐅᕒᐃᐯᑲᐗᓐ ᑳᑮ ᑭᑭᔥᑲᐙᐗᓱᓂᒡ᙮ 22 ᒣᒀ ᑕᔥ ᐅᕒᐃᐯᑲ ᐁᑭᑭᔥᑲᐙᐗᓱᒡ, ᐃᐃ ᓃᔑᓐ ᐊᐱᓅᒌᔕᐞ ᑳᑮ ᐱᒥᐎᓈᒡ ᑮᓂᑖ ᓇᐗᑎᓂᑎᐗᐞ᙮ ᒦᑕᔥ ᑳᐃᑭᑐᒡ, ᐌᑯᓀᓐ ᑕᔥ ᐅᐅ ᓃᓐ ᐌᒋ ᐃᔑᓭᔮᓐ? ᑳᑎᐯᒋᑫᓂᒡ ᑕᔥ ᐅᑮ ᓈᓯᑲᐙᓐ ᐁᑮ ᑲᑴᒋᒫᒡ᙮ 23 ᑳᑎᐯᒋᑫᓂᒡ ᑕᔥ ᐅᑮ ᐃᔑ ᓇᑴᑖᑰᓐ, ᓃᔗᐙᓇᑭᓯᐗᒃ ᓴ ᐯᒫᑎᓯᐙᒡ ᑳᐱᒥᐎᓇᑣ ᐅᐅ ᑳᑭᑭᔥᑲᐙᐗᓱᔭᓐ᙮ ᑭᑲ ᓂᑖᐎᑭᐋᒃ ᓴ ᓃᔗᐙᓐ ᐯᒫᑎᓯᐙᒡ ᑫᒫᒦᑳᑎᐙᒡ, ᐯᔑᑴᐙᓐ ᓴ ᐃᑭ ᑕᒪᔥᑲᐌᑖᑯᓯᐗᒃ ᐊᐲᒡ ᐐᓐ ᐃᑭ ᑯᑕᒃ᙮ ᐊᐊ ᑕᔥ ᓂᑕᒻ ᑫᓂᑖᐎᑭᒡ ᐅᑲ ᐸᒦᑕᐙᓐ ᐅᔒᒣᔕᓐ᙮ 24 ᐊᐲ ᑕᔥ ᐁᑮ ᐅᒋᒋᓭᓂᒃ ᒋᓂᑖᐎᑭᓈᐗᓱᒡ, ᑮᑸᐎᓭᓯᐎᐗᐞ ᓴ ᐃᐃ ᐅᓃᔓᐅᑌᒪᐞ᙮ 25 ᐊᐊ ᑕᔥ ᓂᑕᒻ ᑳᑮ ᓂᑖᐎᑭᒡ ᑮᒥᔅᑯᓈᑯᓯ, ᐐᑫ ᑲᔦ ᒥᓯᐌ ᑮᒦᔖᑯᓇᐌ᙮ ᐄᔂ Esau ᑕᔥ ᑮᐃᔑᓂᑳᒋᑲᓂᐎ᙮ 26 ᐊᐊ ᑕᔥ ᐃᔥᒀᒡ ᑳᑮ ᓂᑖᐎᑭᒡ ᐅᑮ ᓴᑭᑑᑕᓀᓈᓐ ᐄᔂᓐ᙮ ᒦᑕᔥ ᑳᑮ ᐃᔑᓂᑳᓂᓐᒡ ᒉᑲᑉ Jacob᙮ ᐋᐃᓯᒃ ᓴ ᓂᑯᑣᓯᒥᑕᓇ 60 ᑮᑕᓱ ᐱᐴᓉ ᑮᓂᑖᐎᑭᓂᒡ ᐅᑯᓯᓴᐞ᙮ ᐄᔂ ᑮᒦᑭᐌᒡ ᑫᑮᑎᐱᓇᐌᐎᓯᐸᓐ 27 ᐊᐲ ᑕᔥ ᑳᑮᔖᐯᐎᐙᒡ, ᐄᔂ Esau ᓴ ᐐᑫ ᑮᓂᑖ ᐊᑕᐌᒋᑫ, ᑮᒥᓉᑕᒻ ᑲᔦ ᐊᑾᒌᕽ ᐁᐊᔮᒡ᙮ ᐊᐊ ᑕᔥ ᐐᓐ ᒉᑲᑉ Jacob ᑮᓂᑆᑳᐙᑎᓯ, ᑮᓂᑖ ᐊᔭᐱ ᑳᑮ ᐃᔑᑖᐙᒡ᙮ 28 ᐋᐃᓯᒃ Isaac ᑕᔥ ᐅᑮ ᓵᑭᐋᓐ ᐄᔂᓐ ᐋᓃᔥ ᑮᐅᒋ ᓂᑖ ᒥᓄ ᐐᓯᓂ ᐁᑮ ᓂᑖ ᓂᓵᓂᒡ ᐊᔭᐋᐎᔕᐞ᙮ ᐅᕒᐃᐯᑲ Rebekah ᑕᔥ ᐐᓐ ᒉᑲᐴᓐ ᐅᑮ ᓵᑭᐋᓐ᙮ 29 ᐋᐱᑎᕽ ᑕᔥ ᐁᑮᔑᑲᓂᓂᒃ ᒣᒀ ᒉᑲᑉ ᐊᐴᐲᑳᓂᓂ ᐁᐅᔑᑑᒡ, ᐄᔂ ᑮᐱᐅᒋ ᑕᑯᔑᓐ ᐱᑾᑕᑲᒥᒃ ᐁᑮ ᐃᔥᒀ ᐊᑕᐌᒋᑫᒡ, ᐐᑫ ᐁᑮ ᓅᑌᔅᑲᑌᒡ᙮ 30 ᒦᑕᔥ ᑳᐃᓈᒡ ᒉᑲᐴᓐ, ᑕᑲ ᐊᔕᒥᔑᓐ ᐃᐃ ᑳᒥᔅᑯᓈᑾᒃ ᑳᐅᔑᑑᔭᓐ, ᐐᑫ ᐅᔕ ᓂᓅᑌᔅᑲᑌ᙮ ᒦ ᐄᑐᒃ ᐄᑕᒻ Edom ᑳᑮ ᐅᒋ ᐃᔑᓂᑳᓱᒡ᙮ 31 ᒉᑲᑉ ᑕᔥ ᐅᑮᐃᓈᓐ ᐄᔂᓐ, ᐱᓇᒫ ᓴ ᐊᔓᑕᒪᐎᔑᓐ ᒋᒦᔑᔭᓐ ᐃᐃ ᑲᑭᓇ ᑫᑰᓐ ᑳᐐ ᑎᐱᓇᐌᐎᓯᔭᓐ ᐁᑎᓄᐎᔭᓐ ᐅᑯᓯᓯᒫ ᓂᑕᒻ ᑳᑮ ᓂᑖᐎᑭᒡ᙮ 32 ᐄᔂ ᑕᔥ ᑮᐃᑭᑐ, ᐱᓵᓂᓴᑯ ᑭᑲ ᒦᓂᓐ ᐃᐃ ᑲᑭᓇ ᑫᑰᓐ ᑳᐐ ᑎᐱᓇᐌᐎᓯᔮᓐ ᓂᑕᒻ ᐁᐅᑯᓯᓯᒫᐎᔮᓐ᙮ ᐋᓃᓐ ᑕᔥ ᒥᓴᐙ ᑫᐃᓍᑕᒫᐹᓐ ᐋᔕ ᑯᑕ ᑫᑳ ᐁᐐ ᓂᐳᔮᓐ᙮ 33 ᒉᑲᑉ ᑕᔥ ᑮᐃᑭᑐ, ᐱᓇᒫ ᓴ ᐊᐱᒧᓐ ᒋᒦᔑᔭᓐ ᐃᐃ ᑳᑎᐱᓇᐌᐎᓯᔭᓐ᙮ ᐄᔂ ᑕᔥ ᑮᐊᐱᒧ, ᒦᑕᔥ ᑳᐃᔑ ᒦᓈᒡ ᒉᑲᐴᓐ ᑲᑭᓇ ᑫᑰᓂᓂ ᑳᑎᐱᓇᐌᐎᓯᒡ ᓂᑕᒻ ᐁᑮ ᐅᑯᓯᓯᒫᐎᒡ᙮ 34 ᒦᑕᔥ ᐸᔦᔥ ᒉᑲᑉ ᑳᐃᔑ ᐊᔕᒫᒡ ᐄᔂᓐ ᒋᐊᒸᓂᒡ ᐸᑴᔑᑲᓇᓐ, ᒋᒦᒋᓂᒡ ᑲᔦ ᐊᐴᐲᑳᓂᓂ᙮ ᐄᔂ ᑕᔥ ᑮᐐᓯᓂ, ᐁᑮ ᒥᓂᑴᒡ ᑲᔦ᙮ ᒦᑕᔥ ᑳᐃᔑ ᐸᓯᑸᒡ ᐁᑮ ᐊᓂ ᒫᒑᒡ᙮ ᑳᐐᓐ ᐄᑐᒃ ᐋᐱᒋ ᐅᑮ ᓵᐯᑕᓰᓐ ᐃᐃ ᑲᑭᓇ ᑫᑰᓂᓂ ᑳᑮ ᑎᐱᓇᐌᐎᓯᒡ ᓂᑕᒻ ᐁᐅᑯᓯᓯᒫᐎᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society