Cenisihs 23 - ᐅᒋᐺ ᑭᒋᒪᓯᓇᐃᑲᓐ

ᓭᕒᐊ ᐊᐲ ᑮᐃᔥᒀᐱᒫᑎᓯᒡ

¹ ᓭᕒᐊ Sarah ᓴ ᓂᑯᑣᒃ ᓃᔥᑕᓇᔑᓃᔣᓱ 127 ᐁᑕᓱ ᐱᐴᓉᒡ ᒦ ᓴ ᐃ ᑳᑮ ᐃᔥᒀ ᐱᒫᑎᓯᒡ᙮

² ᐌᑎ ᑕᔥ ᑭᕒᐃᐊᑦ ᐊᕒᐸ Kiriath Arba, ᐄᐸᕒᐊᓐ Hebron ᑲᔦ ᐁᒋᑳᑌᒃ ᑫᓇᓐ Canaan ᐊᑮᕽ ᑮᑕᔑ ᐃᔥᒀ ᐱᒫᑎᓯ᙮ ᐁᐸᕒᐊᐋᒻ Abraham ᓴ ᑮᐃᔖ ᐌᑎ ᐁᑮ ᒪᐎᒫᒡ ᓭᕒᐊᐗᓐ᙮

³ ᑮᐸᓯᑸ ᑕᔥ ᐁᑮ ᐅᒋ ᒫᒑᒡ ᐁᔑ ᐱᒥᔑᓂᓂᒡ ᐃᓂ ᐐᐗᓐ ᐁᑮ ᐃᔖᒡ ᐁᔑᐊᔮᓂᒡ ᐁᑦ Heth ᑳᑎᓄᐎᓂᒡ ᐯᒫᑎᓯᓂᒡ᙮ ᒦᔥ ᐅᐅ ᑳᐃᓈᒡ,

⁴ ᓂᐲᐎᑌᐤ ᐄᑐᒃ ᐅᐅᒫ ᐁᐐᒋᑖᒥᓇᑰᒃ᙮ ᑕᑲ ᑭᑲ ᐊᑖᒥᓂᓂᒻ ᐊᑭ ᑫᔑ ᓇᐃᓇᒀ ᑫᐃᔥᒀ ᐱᒫᑎᓯᐙᒡ᙮

⁵ ᒦᔥ ᐅᐅ ᐁᐸᕒᐊᐋᒻ ᑳᐃᑯᒡ ᐁᑦ ᑳᐃᓂᒥᓐᒡ,

⁶ ᓂᑑᑭᒫᒻ, ᑭᓃᑳᓀᑖᑯᔅ ᐄᑐᒃ ᐅᐅᒫ ᐊᑮᕽ᙮ ᐱᓵᓐ ᐃᓴ ᑰᓈᐸᑕᓐ ᒫᐗᒡ ᐌᓂᔑᔑᑭᓐ ᓇᐃᓂᑏᐎᑲᒥᑰᓐ ᑫᔑ ᓇᐃᔑᒪᑣ ᓀᐳᐙᒡ᙮ ᑳᐐᓐ ᓴ ᐊᐎᔭ ᑳᑕᔑᔮᕽ ᑭᑖ ᐊᓉᑖᑰᓰ ᑳᔑ ᓇᐊᓴᑭᑣ ᓀᐳᐙᒡ, ᐐ ᐃᔑ ᓇᐊᓴᒡ ᑳᑮ ᐃᔥᒀ ᐱᒫᑎᓯᒡ ᑭᐐᐤ᙮

⁷ ᒦᔥ ᐁᐸᕒᐊᐋᒻ ᑳᐃᔑ ᐊᓂᒥᑯᑖᒡ ᐁᓈᓴᒦᓂᒡ ᐁᑦ ᑳᑎᓄᐎᓂᒡ ᐃᐃᒫ ᐅᑕᑮᒥᓂᕽ᙮

⁸ ᒦᔥ ᐅᐅ ᑳᐃᓈᒡ, ᑮᔥᐱᓐ ᓴ ᐃᓀᑕᒣᒃ ᐱᓵᓐ ᒋᓇᐃᔑᒪᒃ ᑳᑮ ᐃᔥᒀ ᐱᒫᑎᓯᒡ, ᑕᑲ ᓴ ᑲᓅᑕᒪᐎᔑᒃ ᒋᐊᐎ ᑲᓅᓀᒃ ᐊᐊ ᐄᐸᕒᐊᓐ Ephron ᐌᑌᑌᒡ ᓲᐋᕒ Zohar ᐁᓂᒥᓐᒡ,

⁹ ᐁᐊᑕᐌᑕᒫᓐ ᒋᐊᑖᒪᒃ ᐃᐃ ᑳᑎᐯᑕᕽ ᐲᑖᐱᒃ ᒫᒃᐱᓬᐊ Machpelah ᐁᔑᓂᑳᑌᒃ ᐁᔮᓂᒃ ᐌᑎ ᐐᑴᔭᐄ ᒥᔕᐗᑲᒥᒃ᙮ ᑲᑴᒋᒥᒃ ᒥᓂᒃ ᐃᑯ ᐁᓇᑭᑕᕽ ᐁᐐ ᒥᓯᐌ ᑎᐸᐊᒪᐗᒃ ᐁᓈᓴᒦᐌᒃ᙮ ᓃᓐ ᐃᑕᔥ ᐁᐐ ᑎᐱᓇᐌᐎᓯᔮᓐ ᐃᐃ ᓇᐃᓂᑏᐎᑲᒥᒃ᙮

¹⁰ ᐊᐊ ᓴ ᐄᐸᕒᐊᓐ ᐅᑮ ᐐᑕᐱᒫᐞ ᐃᐃ ᑯᑕᒃ ᐁᑦ ᑳᑎᓄᐎᓂᒡ ᐌᑎ ᐆᑌᓈᕽ ᐁᐅᓈᑯᓂᑫᐙᒡ᙮ ᒦᔥ ᐅᐅ ᑳᔑ ᓇᑴᑕᕽ ᐁᐸᕒᐊᐋᒪᓐ ᒋᓅᑖᑯᒡ ᑲᑭᓇ ᐁᑦ ᑳᑎᓄᐎᓂᒡ ᐃᐃᒫ ᐁᔮᓂᒡ᙮ ᒦᔥ ᐅᐅ ᑳᐃᑭᑐᒡ:

¹¹ ᓂᑑᑭᒫᒻ, ᑭᑲ ᒦᓂᓐ ᓴ ᑲᑭᓇ ᐃᐃ ᒥᔕᐗᑲᒥᒃ ᐃᐃ ᑲᔦ ᐲᑖᐱᒃ᙮ ᒦ ᓴ ᐱᑯ ᐃ ᐁᒦᓂᓈᓐ ᐁᓈᓴᒦᐙᒡ ᐅᑯ ᑲᑭᓇ ᓂᐱᒫᑎᓰᒪᒃ᙮ ᑭᒦᓂᓐ ᒋᑎᐱᓇᐌᐎᓯᔭᓐ ᑫᔑ ᓇᐃᓇᑣ ᑭᓂᐴᒪᒃ᙮

¹² ᒦᑕᔥ ᒦᓇᐙ ᐁᐸᕒᐊᐋᒻ ᑳᐃᔑ ᐊᓂᒥᑯᑖᒡ ᐁᓈᓴᒦᓂᒡ ᐃᐃ ᐁᑦ ᑳᑎᓄᐎᓂᒡ᙮

¹³ ᒦᔥ ᐅᐅ ᑳᐃᓈᒡ ᐄᐸᕒᐊᓅᓐ ᑲᑭᓇ ᐃᐃᒫ ᐁᔮᓂᒡ ᒋᓅᑖᑯᒡ, ᑕᑲ ᐱᓯᑕᐎᔑᒃ᙮ ᓂᑲ ᒥᓯᐌ ᑎᐸᐋᓐ ᐃᓴ ᐁᓇᑭᑌᒃ ᐃᐃ ᒥᔕᐗᑲᒥᒃ᙮ ᐅᑖᐱᓇᓐ ᐅᐅ ᓂᑎᐸᐃᑫᐎᓐ ᐱᓵᓐ ᐃᑕᔥ ᐗᐊ ᒋᓇᐃᔑᒪᒃ ᑳᑮ ᐃᔥᒀ ᐱᒫᑎᓯᒡ᙮

¹⁴ ᐄᐸᕒᐊᓐ ᓴ ᑕᔥ ᐅᑮᐃᓈᓐ ᐁᐸᕒᐊᐋᒪᓐ,

¹⁵ ᓂᑑᑭᒫᒻ, ᐱᓯᑕᐎᔑᓐ, ᓃᐙᒃ 400 ᒥᓂᒃ ᐙᐹᐱᑯ ᔔᓂᔮᒃ ᓴ ᐊᐲᑌᑖᑾᓐ ᐃᐃ ᒥᔕᐗᑲᒥᒃ᙮ ᑳᐐᓐ ᒫᐐᓐ ᑫᑰᓐ ᑭᑖ ᐃᓀᑕᓰᒥᓐ᙮ ᐱᓵᓐ ᓇᐃᔑᒻ ᑳᑮ ᐃᔥᒀ ᐱᒫᑎᓯᒡ᙮

¹⁶ ᐁᐸᕒᐊᐋᒻ ᓴ ᑮᐃᓀᑕᒻ, ᒦᔥ ᑳᐃᔑ ᑎᐸᐊᒪᐙᒡ ᐃᓂ ᐄᐸᕒᐊᓅᓐ ᑳᑮ ᐃᔑ ᐐᑕᒫᑯᒡ ᒥᓂᒃ ᑳᐃᓇᑭᑌᓂᒃ᙮ ᐁᑦ ᑳᑎᓄᐎᐙᒡ ᐄᑐᒃ ᑮᓅᑕᒧᒃ ᒥᓂᒃ ᑳᐃᓇᑭᑌᓂᒃ᙮ ᓃᐙᒃ 400 ᒥᓂᒃ ᐙᐹᐱᑯ ᔔᓂᔮᓐ ᒥᓂᒃ ᓴ ᑮᐃᔑ ᑎᐸᐃᑫ᙮ ᒦ ᓴ ᐃᐌ ᓇᑫ ᐊᑖᐌᐎᑭᒫᒃ ᑳᐋᐸᒋᑑᐙᒡ ᐃᐃ ᑎᓄ ᑎᐸᐃᑫᐎᓐ᙮

¹⁷ ᒦ ᓴ ᑕᔥ ᐅᐅ ᓇᑫ ᐁᐸᕒᐊᐋᒻ ᑳᑮ ᐊᓂ ᐅᒋ ᑎᐯᑕᕽ ᐃᐃ ᐊᑮᓂ ᐙᐸᓄᕽ ᐃᓇᑫ ᐁᔮᓂᒃ ᒪᒻᕒᐃ, ᒌᑲᔭᐄ ᐃᓇᑫ ᑳᔑ ᐊᔮᒃ ᒫᒃᐱᓬᐊ Machpelah ᐁᔑᓂᑳᑌᓂᒃ᙮ ᑲᔦ ᓴ ᒥᔕᐗᑲᒥᒃ, ᐃᐃ ᑲᔦ ᐲᑖᐱᒃ ᑮᑕᑯ ᒦᓈᑲᓂᐎ, ᐃᐃ ᑲᔦ ᑲᑭᓇ ᒥᑎᑰᐞ ᑳᑮ ᐸᑕᑭᓱᓂᒡ ᐃᐃᒫ ᐙᑳᔭᐄ᙮ ᒦ ᓴ ᐅᐌᓂ ᐄᐸᕒᐊᓐ Ephron ᑳᑮ ᑎᐯᑕᑭᐸᓐ ᐊᑮᓂ᙮

¹⁸ ᒦ ᓴ ᑕᔥ ᑳᑮ ᐃᓇᑭᑕᒥᓂᒡ ᑲᑭᓇ ᐁᑦ ᑳᑎᓄᐎᓂᒡ ᐌᓈᑯᓂᑫᓂᒡ ᐄᓴᓐ ᐁᐸᕒᐊᐋᒻ ᐁᑎᐱᓇᐌᐎᓯᒡ ᐃᐃ ᐊᑮᓂ᙮

¹⁹ ᒦᑕᔥ ᐁᐸᕒᐊᐋᒻ ᑳᑮ ᐃᔑ ᓇᐃᓈᒡ ᐐᐗᓐ ᓭᕒᐊᐗᓐ Sarah ᐃᐃᒫ ᐲᑖᐱᒃ ᑫᓇᓐ Canaan ᐊᑮᕽ᙮

²⁰ ᐃᐃ ᓴ ᒥᔕᐗᑲᒥᒃ ᑌᐯᑕᒥᓂᐸᓐ ᐃᐃ ᐁᑦ ᑳᑎᓄᐎᓂᒡ, ᐃᐃ ᑲᔦ ᐲᑖᐱᒃ᙮ ᒦᑕᔥ ᐁᐸᕒᐊᐋᒻ ᑮᑎᐱᓇᐌᐎᓯᒡ ᐃᐃ ᐲᑖᐱᒃ ᐁᐐ ᐃᓈᐸᒋᑑᒡ ᓇᐃᓂᑏᐎᑲᒥᒃ᙮