Cenisihs 17 - ᐅᒋᐺ ᑭᒋᒪᓯᓇᐃᑲᓐᑭᑭᓇᐙᑕᔕᑫᔓᑰᐎᓐ ᒋᐋᐸᑕᒃ ᒋᑭᑭᓇᐙᓯᓈᑾᒃ ᐊᔓᑕᒫᑫᐎᓐ 1 ᐁᐸᕒᐊᒻ Abram ᔖᑲᓯᒥᑕᓇᔑᔖᑲᓱ 99 ᑮᑕᓱ ᐱᐴᓉ ᑮᓈᑯᓰᑖᑯᒡ ᑳᑎᐯᒋᑫᓂᒡ ᐅᐅ ᐁᑮᐃᑯᒡ, ᓃᓐ ᑳᒫᐗᒋ ᒪᔥᑲᐎᓰᔮᓐ ᑭᔐᒪᓂᑑ; ᐃᔑ ᐱᒫᑎᓯᓐ ᐃᓇᑫ ᐁᔑ ᐊᑕᐌᓂᒥᓈᓐ, ᑫᑯ ᑫᑰᓐ ᐃᔑ ᐊᓈᒣᑖᑯᓯᑫᓐ᙮ 2 ᓂᑲ ᐋᔩᑕᑑᓐ ᐃᑕᔥ ᑳᔑ ᐊᔓᑕᒫᐎᓈᓐ, ᑭᑲ ᐃᔑᐃᓐ ᓴ ᒋᐊᓂ ᐹᑏᓄᔭᓐ, ᐅᑮᐃᑰᓐ᙮ 3 ᐁᐸᕒᐊᒻ ᑮᐅᒋᒌᑾᓇᐲᑖ ᒥᑕᑲᒥᑳᕽ᙮ ᑭᔐᒪᓂᑑᓐ ᐅᑮ ᑲᑲᓅᓂᑰᓐ ᐁᑮᐃᑯᒡ, 4 ᒦᑕᔥ ᓃᓐ ᐅᐅ ᓇᑫ ᐁᔑᐊᔓᑕᒫᐎᓈᓐ, ᑮᓐ ᓴ ᑭᑲ ᐅᑌᑌᒥᑰᒃ ᓃᐱᐗᐞ ᑳᑕᓶᐙᓇᑭᓯᐙᒡ ᐊᐎᔭᒃ ᐯᒫᑎᓯᐙᒡ᙮ 5 ᑳᐐᓐ ᑕᔥ ᐊᐗᔑᒣ ᐁᐸᕒᐊᒻ ᑭᑲ ᐃᔑᓂᑳᓱᓰ, ᐁᐸᕒᐊᐋᒻ Abraham ᓴ ᑭᑲ ᐃᔑᓂᑳᔅ᙮ ᑮᓐ ᐋᓃᔥ ᑭᑲ ᐅᑌᑌᒥᑰᒃ ᓃᐱᐗᐞ ᑳᑕᓶᐙᓇᑭᓯᐙᒡ ᐊᐎᔭᒃ ᐯᒫᑎᓯᐙᒡ᙮ 6 ᑭᑲ ᐃᔑᐃᓐ ᓴ ᐐᑫ ᒋᓂ ᐹᑏᓄᐙᒡ ᑭᐲᐌᓰᒪᒃ, ᑭᑲ ᐃᔑᐃᓐ ᑲᔦ ᒋᐊᓂ ᐹᑏᓉᐙᓇᑭᓯᔭᓐ᙮ ᑭᐲᐌᓰᒥᕽ ᑕᔥ ᑕᐅᒌᐗᒃ ᑫᓂ ᑭᒋᐅᑭᒫᐎᐙᒡ᙮ 7 ᓂᑲ ᐃᔑᒋᑫ ᑕᔥ ᐃᐃ ᑳᔑ ᐊᔓᑕᒪᐎᓈᓐ, ᐃᑭ ᑲᔦ ᑭᐲᐌᓰᒪᒃ ᑫᓂ ᐊᔮᐙᒡ ᒌᓇᑌᒃ ᐐᑳ ᑫᐴᓂᓭᓯᓄᒃ ᓂᑕᔓᑕᒫᑫᐎᓐ᙮ ᑭᑲ ᐅᑭᔐᒪᓂᑑᒥᒻ ᐃᑕᔥ, ᑭᐲᐌᓰᒪᒃ ᑲᔦ ᓂᑲ ᐅᑭᔐᒪᓂᑑᒥᒥᑰᒃ᙮ 8 ᐅᐅ ᓴ ᑲᑭᓇ ᑫᓇᓐ Canaan ᐊᑭ ᓅᑯᒻ ᑳᔑ ᐲᐎᑌᐌᑖᑯᓯᔭᓐ, ᒦ ᐃᐌ ᑫᒦᓂᓈᓐ ᓀᐱᒡ ᒋᑎᐱᓇᐌᐎᓯᔭᓐ, ᐃᑭ ᑲᔦ ᑭᐲᐌᓰᒪᒃ, ᑫᓂ ᐊᔮᐙᒡ ᑮᐃᔥᒀ ᐊᔮᔭᓐ; ᓃᓐ ᑕᔥ ᓂᑲ ᐅᑭᔐᒪᓂᑑᒥᒥᑰᒃ, ᐅᑮᐃᑰᓐ᙮ 9 ᑭᔐᒪᓂᑑᓐ ᑕᔥ ᐁᐸᕒᐊᐋᒻ ᐅᑮᐃᑰᓐ, ᒦᑕᔥ ᑫᑮᓐ ᓅᑯᒻ ᐁᔑᓈᑾᒃ ᒋᑲᓇᐌᑕᒪᓐ ᓂᑕᔓᑕᒫᑫᐎᓐ, ᐃᑭ ᑲᔦ ᑭᐲᐌᓰᒪᒃ, ᐃᑭ ᑲᔦ ᑫᓂ ᐊᔮᐙᒡ ᑮᐃᔥᒀ ᐊᔮᔭᓐ ᑫᓂ ᐊᔮᓂᑫ ᓂᑖᐎᑭᐙᒡ᙮ 10 ᒦᑕᔥ ᐅᐅ ᓂᑕᔓᑕᒫᑫᐎᓐ ᑫᑲᓇᐌᑕᒪᓐ, ᑳᑮ ᐃᔑ ᐊᔓᑕᒫᐗᒀ ᑲᔦ ᐃᑭ ᑭᐲᐌᓰᒪᒃ ᑫᓂ ᐊᔮᐙᒡ ᑮᐃᔥᒀ ᐊᔮᔭᓐ; ᑲᑭᓇ ᓴ ᐊᐎᔭ ᐁᓂᓃᐎᒡ ᐁᔮᒡ ᑳᔑ ᐊᔮᔦᒃ ᑕᑭᑭᓇᐙᑕᔕᑫᔣ᙮ 11 ᑮᓐ ᑕᔥ ᑭᑲ ᑭᑭᓇᐙᑕᔕᑫᔓᑰ ᑭᑎᓂᓃᐎᐎᓂᕽ; ᒦᑕᔥ ᐃᐃ ᓇᑫ ᐁᔑ ᑭᑭᓇᐙᒋᒋᑳᑌᒃ ᐋᓃᓐ ᑳᔑ ᐊᔓᑕᒫᐎᓈᓐ᙮ 12 ᑭᐲᐌᓰᒪᒃ ᓴ ᑫᓂ ᐊᔮᐙᒡ ᑳᔑ ᐊᔮᔦᒃ, ᑲᑭᓇ ᐊᐎᔭ ᑳᐃᓂᓃᐎᒡ ᓂᔣᓱᑯᓇᑭᓯᒡ 8 ᑕᑭᑭᓇᐙᑕᔕᑫᔣ᙮ ᐃᑭ ᑲᔦ ᐊᓄᑮᐋᑲᓇᒃ ᑳᓂᑖᐎᑭᐙᒡ ᑭᐙᑳᐃᑲᓂᕽ, ᐃᑭ ᑲᔦ ᑳᑮ ᐊᑖᐙᑳᓱᐙᒡ ᔔᓂᔮᓐ ᐁᐋᐸᑎᓯᓂᒡ᙮ 13 ᐊᐊ ᓴ ᑯ ᑭᑖᐎᓂᕽ ᑳᑕᔑ ᓂᑖᐎᑭᒡ, ᑯᒫ ᑲᔦ ᐊᐎᔭ ᑳᐊᑖᐙᓱᒡ ᔔᓂᔮᕽ ᐅᒋ ᐅᒋᑕᑯ ᐃᔑᓈᑾᓂᓂ ᒋᑭᑭᓇᐙᑕᔕᑫᔓᓐᒡ᙮ ᒦᑕᔥ ᐃᐃᒫ ᓂᑕᔓᑕᒫᑫᐎᓐ ᐐᑳ ᑫᐴᓂᓭᓯᓄᒃ ᑫᔑ ᑭᑭᓇᐙᓯᓈᑾᒃ ᑭᐐᔭᐎᐙᕽ᙮ 14 ᐊᐌᓀᓐ ᑕᔥ ᐃᑯ ᐃᓂᓂ ᑫᑭᑭᓇᐙᑕᔕᑫᔣᓯᐎᓐᒡ ᐅᐐᔭᐎᕽ ᐅᑎᓂᓃᐎᐎᓂᕽ, ᒦ ᐃ ᑫᐃᓇᑭᒥᓐᒡ ᐁᐅᒋ ᑎᐯᑖᑯᓯᓯᒃ ᐁᔑᐊᔮᓂᒡ ᓂᐱᒫᑎᓰᒪᐞ, ᐋᓃᔥ ᐅᓵᒻ ᐅᐲᑯᓈᓐ ᓂᑕᔓᑕᒫᑫᐎᓐ, ᐅᑮᐃᑰᓐ᙮ ᐁᑮᐊᔓᑕᒫᑲᓂᐎᒡ ᐋᐃᓯᒃ ᒋᓂᑖᐎᑭᒡ 15 ᑭᔐᒪᓂᑑᓐ ᑕᔥ ᐅᑮ ᐊᓂᐃᑰᓐ, ᐊᐊ ᑕᔥ ᐐᓐ ᑭᐐᐤ ᓭᕒᐊᐄ, ᑳᐐᓐ ᐊᐗᔑᒣ ᓭᕒᐊᐄ ᑭᑲ ᐃᔑᓂᑳᓈᓰ; ᓭᕒᐊ Sarah ᓴ ᑕᐃᔑᓂᑳᓱ᙮ 16 ᓂᑲ ᔕᐌᓂᒫ ᓴ, ᒦᑕᔥ ᐃᐃᒫ ᐐᓐ ᑫᐅᒋ ᒦᓂᓈᓐ ᑭᑯᓯᔅ᙮ ᓂᑲᔑ ᔕᐌᓂᒫ ᑕᔥ ᐐᓐ ᒋᐊᓂ ᐅᒫᒫᒥᑯᒡ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ, ᑕᓂ ᑭᒋᐅᑭᒫᐎᐗᐞ ᓴ ᐅᐲᐌᓰᒪᐞ᙮ 17 ᐁᐸᕒᐊᐋᒻ ᑮᐊᓂᒥᑯᑖ ᒥᑕᑲᒥᒃ᙮ ᒦᑕᔥ ᑳᐃᔑ ᐹᐱᒡ ᐁᑮ ᐃᑭᑐᒡ, ᑰᓂᑫ ᐃᓂᓂ ᓂᑯᑣᒃ 100 ᑕᓱ ᐱᐴᓉᒡ ᐅᑖ ᑲᔥᑭᑑᓐ ᒋᐊᔮᐙᐸᓐ ᐊᐱᓅᒌᔕᓐ? ᑰᓂᑫ ᑲᔦ ᓭᕒᐊ ᔖᑲᓯᒥᑕᓇ 90 ᐁᑕᓱ ᐱᐴᓉᒡ ᐅᑖ ᑲᔥᑭᑑᓐ ᒋᐊᔮᐙᐸᓐ ᐊᐱᓅᒌᔕᓐ? 18 ᐁᐸᕒᐊᐋᒻ ᑕᔥ ᐅᑮ ᐃᔑ ᑲᑴᒋᒫᓐ ᑭᔐᒪᓂᑑᓐ, ᓇᐗᒡ ᐄᑐᒃ ᑕᐅᓂᔑᔑᓐ ᐃᔥᒣᔭᓬ Ishmael ᒋᐊᓂ ᑎᐯᑕᑭᐸᓐ ᓂᑕᔭᐄᒪᓐ᙮ 19 ᑭᔐᒪᓂᑑᓐ ᑕᔥ ᐅᑮ ᐃᔑ ᓇᑴᑖᑰᓐ, ᑳᐐᓐ ᐃᐃ ᑕᐃᔑᓈᑾᓯᓅᓐ᙮ ᑭᐐᐤ ᓭᕒᐊ ᐅᔕ ᐅᑲ ᐊᔮᐙᓐ ᑫᐅᑯᓯᓯᐗᒡ᙮ ᐋᐃᓯᒃ ᓴ ᑭᑲ ᐃᔑᓂᑳᓈ ᑭᑯᓯᔅ᙮ ᒦ ᓴ ᐊᐊ ᐋᐃᓯᒃ ᑫᓀᐱᒋ ᐅᓇᑕᒪᐗᒃ ᓂᑕᔓᑕᒫᑫᐎᓐ, ᐃᐃ ᑲᔦ ᑫᓂ ᐅᐲᐌᓰᒥᒡ᙮ ᑳᐐᓐ ᐐᑳ ᑕᐴᓂᓭᓯᓅᓐ ᐃᐃ ᐊᔓᑕᒫᑫᐎᓐ᙮ 20 ᑭᓅᑕᐎᓐ ᓴ ᐋᓃᓐ ᐁᔑ ᑲᑴᒋᒥᔭᓐ, ᐊᐊ ᐅᒋ ᐃᔥᒣᔭᓬ᙮ ᓂᑲᔑ ᔕᐌᓂᒫ ᓴ ᑲᔦ ᓃᐱᐗᐞ ᒋᐊᔮᐙᒡ ᐊᐱᓅᒌᔕᐞ, ᐋᐱᒋ ᑲᔦ ᑕᐹᑏᓄᐗᐞ ᐅᐲᐌᓰᒪᐞ᙮ ᑕᒥᑖᔑᓃᔑᐗᐞ ᑲᔦ ᑫᐅᑯᓯᓯᒡ ᑫᐊᓂ ᐅᑭᒫᑲᑖᑫᓂᒡ᙮ ᓂᑲ ᐃᔑᐃᒫᐞ ᑲᔦ ᑫᐅᐲᐌᓰᒥᒡ ᒋᐊᓂ ᐹᑏᓄᓂᒡ᙮ 21 ᐊᐊ ᑕᔥ ᐐᓐ ᑫᐅᑯᓯᓯᔭᓐ ᐋᐃᓯᒃ ᓂᑲ ᑲᓇᐌᑕᒧᐙᓐ ᐃᐃ ᓂᑕᔓᑕᒫᑫᐎᓐ ᑫᒦᓇᒃ᙮ ᓭᕒᐊᐗᓐ ᑕᔥ ᐅᑲ ᓂᑖᐎᑭᐃᑰᓐ ᐅᐅ ᐊᐲ ᒦᓇᐙ ᑫᐊᑮᐗᕽ᙮ 22 ᐁᐸᕒᐊᐋᒻ ᑕᔥ ᑳᐃᔥᒀ ᑲᑲᓅᓂᑯᒡ ᑭᔐᒪᓂᑑᓐ, ᒦ ᐃ ᑳᐊᓂᔑ ᓇᑲᓂᑯᒡ᙮ 23 ᒦᑕᔥ ᐃᐃ ᐊᐲ ᐯᔑᑾᓐ ᐁᑮᔑᑲᓂᓂᒃ, ᐁᐸᕒᐊᐋᒻ ᐅᑮ ᑭᑭᓇᐙᑕᔕᑫᔣᓐ ᐅᑯᓯᓴᓐ ᐃᔥᒣᔭᓬᐗᓐ ᐁᑮ ᒪᓂᔕᒪᐙᒡ ᐅᔕᑲᔨᓂ᙮ ᒦ ᑲᔦ ᑳᑑᑕᐙᒡ ᑲᑭᓇ ᐅᑕᓄᑮᐋᑲᓇᐞ, ᐃᐃ ᑲᔦ ᑳᓂᑖᐎᑭᓂᒡ ᐅᐙᑳᐃᑲᓂᕽ, ᐃᐃ ᑲᔦ ᑳᑮ ᐊᑖᐌᒡ ᐅᐸᒦᑖᑫᐞ᙮ ᑲᑭᓇ ᓴ ᑯ ᑳᑮ ᐃᓂᓃᐎᓂᒡ ᐃᐃᒫ ᐅᑖᐎᓂᕽ ᒦ ᐃ ᑳᑑᑕᐙᒡ ᐋᓃᔥ ᑭᔐᒪᓂᑑᓐ ᐅᑮᐃᑰᓐ ᐃᐃ ᒌᔑᒋᑫᒡ᙮ 24 ᐁᐸᕒᐊᐋᒻ ᑕᔥ ᔖᑲᓯᒥᑕᓇᔑᔖᑲᓱ 99 ᑮᑕᓱ ᐱᐴᓉ ᑮᑭᑭᓇᐙᑕᔕᑫᔓᓐᒡ᙮ 25 ᐃᓂ ᑕᔥ ᐅᑯᓯᓴᓐ ᐃᔥᒣᔭᓬᐗᓐ, ᒥᑖᔑᓂᓯᓐ 13 ᑮᑕᓱ ᐱᐴᓉᐗᓐ ᑮᑭᑭᓇᐙᑕᔕᑫᔓᒥᓐᒡ᙮ 26 ᐯᔑᑾᓐ ᑕᔥ ᐁᑮᔑᑲᓂᓂᒃ ᐁᐸᕒᐊᐋᒻ, ᐃᓂ ᑲᔦ ᐅᑯᓯᓴᓐ ᐃᔥᒣᔭᓬᐗᓐ ᑮᑭᑭᓇᐙᑕᔕᑫᔣᐗᒃ᙮ 27 ᑲᑭᓇ ᓴ ᑯ ᑳᑮ ᐃᓂᓃᐎᒡ ᐃᐃᒫ ᐅᐙᑳᐃᑲᓂᕽ, ᐃᐃ ᑲᔦ ᑳᑮ ᓂᑖᐎᑭᓂᒡ ᐅᐙᑳᐃᑲᓂᕽ, ᐃᐃ ᑲᔦ ᑳᑮ ᐊᑖᐌᒡ ᐅᐸᒦᑖᑫᐞ ᒦ ᐃ ᑕᑯ ᑳᑮ ᑭᑭᓇᐙᑕᔕᑫᔓᒥᓐᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society