Caahshowaa 2 - ᐅᒋᐺ ᑭᒋᒪᓯᓇᐃᑲᓐᒑᔓᐙ ᑮᐃᔑᓂᔕᐙᒡ ᐅᑮᒨᓵᐲᐞ ᒋᐊᑕᐙᐸᑕᒥᓂᒡ ᑭᒋᐆᑌᓈᓂ ᒉᕒᐊᑯ 1 ᒑᔓᐙ Joshua ᑕᔥ ᑳᑮ ᐅᑌᑌᒡ ᓇᓇᓐ Nun ᐃᐃᒫ ᐊᑫᔕ Acacia ᐊᔮᐎᓂᕽ ᐁᒋᑳᑌᓂᒃ ᐅᑮ ᐅᒋ ᒫᒋᓂᔕᐙᐞ ᓃᔑᓐ 2 ᐃᓂᓂᐗᐞ ᒋᐊᑕ ᑮᒨᓵᐱᓂᒡ ᐅᐅ ᐁᑮᐃᓈᒡ, ᒫᒑᒃ ᐊᑕ ᐙᐸᑕᒧᒃ ᐃᐃ ᐊᑭ, ᒣᒥᑕᑫ ᑯ ᐃᐃ ᑭᒋ ᐆᑌᓇ ᒉᕒᐊᑯ Jericho᙮ ᒦᑕᔥ ᑳᐃᔑ ᒫᒑᐙᒡ ᐃᑭ ᓃᔑᓐ ᐃᓂᓂᐗᒃ᙮ ᐌᑎ ᑕᔥ ᑮᐃᔑ ᑕᑯᔑᓅᒃ ᐅᐙᑳᐃᑲᓂᓂᕽ ᐃᓂ ᐱᔑᒀᒋᑴᐗᓐ ᐅᕒᐁᐋᑉ Rahab ᐁᔑᓂᑳᓱᓂᒡ᙮ ᒦᑕᔥ ᐃᐃᒫ ᑳᐃᔑ ᑎᐱᑭᔑᐙᒡ᙮ 2 ᐊᐊ ᑕᔥ ᑳᑮ ᑭᒋᐅᑭᒫᐎᒡ ᐃᐃᒫ ᒉᕒᐊᑯ ᑮᓅᑕᒻ ᐁᑮᐃᓂᓐᒡ, ᐃᓇᔥᑫ ᓴ ᐃᓂᓂᐗᒃ ᐃᔅᕒᐃᔭᓬᐃᑳᕽ ᐅᒌᐗᒃ ᑳᐲᔖᐙᒡ ᐅᐅᒫ ᓅᑯᒻ ᑳᐅᓈᑯᔑᓂᓂᒃ, ᐁᐱ ᐊᑕ ᑭᑫᑕᒧᐙᒡ ᐅᐅ ᐊᑮᓂ᙮ 3 ᒦᑕᔥ ᐊᐊ ᑭᒋᐅᑭᒫ ᑳᐃᓈᒡ ᐅᕒᐁᐋᐴᓐ, ᓵᑭᓯᐞ ᓴ ᐃᑭ ᐃᓂᓂᐗᒃ ᑳᑮ ᐅᑎᓯᒀ ᐃᐃᒫ ᑭᐙᑳᐃᑲᓂᕽ᙮ ᑮᐲᔖᐗᒃ ᐅᔕ ᐁᑮ ᐱᐊᑕ ᑭᑫᑕᒧᐙᒡ ᐅᐅ ᐊᑮᓂ, ᑮᐃᑭᑐ᙮ 4 ᐊᐊ ᑕᔥ ᐃᑴ ᑮᐃᔑᒋᑫ ᐁᑮ ᑳᓈᒡ ᐃᐃ ᓃᔑᓐ ᐃᓂᓂᐗᐞ, ᒦᑕᔥ ᑳᐃᑭᑐᒡ, ᐁᔭᐞ, ᑌᐺ ᓴ ᐃᓂᓂᐗᒃ ᓂᑮ ᐱ ᐅᑎᓯᑰᒃ, ᑳᐐᓐ ᓴ ᓂᑭᑫᓂᒫᓰᒃ ᑎᐱ ᑳᐱ ᐅᒌᐙᑴᓐ᙮ 5 ᐊᐲ ᓴ ᑯ ᑮᐊᓂ ᐅᒋᒋᓭᒃ ᒋᑭᐸᐃᑳᑌᒃ ᒫᐗᒡ ᐃᑯ ᑭᒋ ᐃᔥᒀᑌᒻ ᑮᓂ ᑎᐱᑲᒃ, ᒦ ᐃ ᐊᐲ ᑳᒫᒑᐙᒡ, ᑳᐐᓐ ᑕᔥ ᓂᑭᑫᓂᒫᓰᒃ ᑎᐱ ᑳᐃᔖᐙᑴᓐ, ᐃᓇᔥᑫ ᐌᐐᑉ ᐃᑯ ᐱᒥᓂᔕᐅᑾᒃ, ᒋᐊᑎᒣᒀ, ᑮᐃᑭᑐ᙮ 6 ᐊᐊ ᑕᔥ ᐃᑴ ᑮᐃᔑᐎᓈᑯᐸᓐ ᐃᐃ ᐃᓂᓂᐗᐞ ᐗᑭᑕᐸᒃ, ᐁᑮ ᐃᔑ ᑳᓈᑯᐸᓀᓐ ᐃᐃᒫ ᐊᓈᒫᔭᐄ ᑳᑮ ᐃᔑ ᐅᒀᑯᓯᓂᓂᑭᓐ ᒥᑎᑯᓴᓐ ᐃᔒᑭᓐ ᐌᒋ ᐅᔑᒋᑳᑌᓂᒃ᙮ ᐗᑭᑕᐸᒃ ᓴ ᑮᐊᑑᑯᐸᓐ ᐊᐊ ᐃᑴ ᐃᓂ ᒥᑎᑯᓴᓐ᙮ 7 ᑳᐃᔥᒀ ᒫᒑᓂᒡ ᐃᑕᔥ ᐃᐃ ᑭᒋᐅᑭᒫ ᐅᑎᓂᓃᒪᐞ ᐁᐱᒥᓂᔕᐙᓂᒡ ᐅᑮᒨᓵᐲᐞ, ᒦ ᓴ ᐃ ᑳᐃᔑ ᑭᐸᐃᑳᑌᓂᒃ ᐃᐃ ᑭᒋ ᐃᔥᒀᑌᒻ᙮ ᐌᑎ ᑮᐃᔑ ᐊᑐᓀᐃᑫᐗᐞ ᒦᑲᓈᕽ ᐁᓇᒧᓂᓂᒃ ᐃᓇᑫ ᒞᕒᑕᓐ ᓰᐱᕽ᙮ 8 ᒦᔥ ᐄᓴᓐ ᑳᑮ ᐊᑕ ᐙᐸᒫᒡ ᐃᐃ ᐃᓂᓂᐗᐞ ᒋᑆ ᑲᐎᔑᒧᓂᒡ ᐌᑎ ᐗᑭᑕᐸᒃ᙮ 9 ᒦᑕᔥ ᑳᐃᓈᒡ, ᓂᑭᑫᑖᓐ ᓴ ᑳᑎᐯᒋᑫᒡ ᐁᑮ ᒦᓂᓀᒃ ᐅᐅ ᐊᑮᓂ, ᐗᐐᑫ ᑲᔦ ᑭᑯᓯᑰᒻ, ᑲᑭᓇ ᓴ ᑯ ᐯᒫᑎᓯᐙᒡ ᐅᐅᒫ ᐊᑮᕽ ᓂᓂᑳᓂᒥᓯᐗᒃ ᐐᑫ ᐁᑯᑖᒋᐙᒡ᙮ 10 ᓂᑮ ᓅᑖᒥᓐ ᐅᔕ ᐋᓃᓐ ᑳᑎᐯᒋᑫᒡ ᑳᑮ ᐃᔑ ᐹᑾᑲᒥᑭᑑᒡ ᐃᐃ ᒥᔅᑯ ᑭᒋᑲᒦᓂ Red Sea ᑫᔑ ᐱᒧᓭᐌᒃ ᐊᐲ ᐄᒋᐸᑮᕽ Egypt ᑮᐱᐅᒋ ᓵᑲᐊᒣᒃ᙮ ᓂᑮ ᓅᑖᒥᓐ ᑲᔦ ᐋᓃᓐ ᑳᑑᑕᐌᒀ ᐃᑭ ᓃᔑᓐ ᑭᒋᐅᑭᒫᒃ ᓵᐃᐋᓐ Sihon, ᐊᐊ ᑲᔦ ᐋᒃ Og ᑳᑮ ᐃᔑᓂᑳᓱᐙᒡ ᑳᑮ ᑎᐯᓂᒫᐙᒡ ᐁᒧᕒᐄ ᑳᑎᓄᐎᓂᒡ Amorites ᐌᑎ ᐊᑳᒥᕽ ᒞᕒᑕᓐ ᓰᐱᕽ᙮ 11 ᐊᐲ ᑕᔥ ᑮᓅᑕᒫᕽ ᓂᑮ ᓂᓂᑭᑌᐁᔮᓂᒥᓯᒥᓐ, ᑲᑭᓇ ᓴ ᓂᑮ ᐸᑭᑖᓂᒥᓯᒥᓐ ᑮᓇᐙ ᐅᒋ, ᐋᓃᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᑭᔐᒪᓂᑑᐎ ᐌᑎ ᐃᔥᐱᒥᕽ ᑮᔑᑯᕽ ᐅᐅᒫ ᑲᔦ ᐊᑮᕽ᙮ 12 ᑕᑲ ᑕᔥ ᑳᑎᐯᒋᑫᒡ ᐊᐱᒧᒃ, ᓃᓐ ᐁᑮ ᒥᓄᑑᑕᐎᓇᑰᒃ, ᑫᑮᓇᐙ ᑕᔥ ᒋᒥᓄᑑᑕᐌᒀ ᓂᑌᑌᕽ ᑳᐅᒌᐙᒡ, ᑫᑰᓐ ᓴ ᑭᑭᓇᐙᒋᒋᑫᒃ ᑫᐅᒋ ᑌᐺᔦᓂᒥᓇᑰᒃ᙮ 13 ᐃᐃᐌ ᑕᔥ ᐊᐲ ᐃᔑᓭᒃ ᑫᑯ ᓂᓵᑫᒃ, ᓂᑌᑌ, ᓂᒫᒫ, ᓂᑕᐌᒫᒃ, ᓃᒋᑴᒃ ᑲᔦ, ᐃᐃ ᑲᔦ ᑲᑭᓇ ᑳᑎᐯᓂᒫᐙᒡ, ᑫᑯ ᐸᑭᑎᓂᔑᓈᑳᕽ ᒋᓂᓯᑯᔮᕽ, ᑮᐃᑭᑐ ᐊᐊ ᐃᑴ᙮ 14 ᒦᔥ ᐅᐅ ᐃᑭ ᐃᓂᓂᐗᒃ ᑳᐃᓈᐙᒡ, ᑕᑲ ᓃᓇᐎᓐᑦ ᒣᔥᑾᒡ ᐱᓵᓐ ᓂᑲ ᓂᓯᑰᒥᓐ ᐊᐲᒡ ᑮᓐ ᑮᔥᐱᓐ ᑎᐹᒋᒧᓯᐗᓐ ᐌᑯᓀᓐ ᐌᒋ ᐲᔖᔮᕽ᙮ ᐊᐲ ᑕᔥ ᑳᑎᐯᒋᑫᒡ ᒦᓂᓇᑭᒡ ᐅᐅ ᐊᑮᓂ ᐋᐱᒋ ᓴ ᑭᑲ ᒥᓄᑑᑖᑰ, ᐌᐌᓂ ᑲᔦ ᑭᑲ ᑑᑖᑰ, ᐅᑮᐃᓈᐙᓐ᙮ 15 ᐊᐊ ᑕᔥ ᐃᑴ ᐅᕒᐁᐋᑉ ᐃᐃᒫ ᑳᑮ ᐃᔑ ᐙᑳᔮᐱᑭᓂᑳᑌᓂᒃ ᑭᒋ ᐆᑌᓈᓂ ᑮᐃᔑᑖ᙮ ᒦ ᓴ ᑕᔥ ᑳᐃᔑᒋᑫᒡ, ᐁᑮ ᓃᓵᐲᑭᓈᒡ ᐃᐃ ᐃᓂᓂᐗᐞ ᐅᐙᓭᒋᑲᓂᕽ᙮ 16 ᒦ ᓴ ᑳᐃᓈᒡ, ᐌᑎ ᓴ ᑳᔑ ᐸᐲᑾᑎᓈᒃ ᐊᐸᐃᐌᒃ ᒋᐊᑎᒥᓯᓄᐎᓀᒀ ᐃᑭ ᑫᐱᒥᓂᔕᐅᓀᒀ! ᓂᓱᑮᔑᒃ ᐃᑕᔥ ᐌᑎ ᑳᓲᑫᒃ, ᐹᓂᒫ ᑕᔥ ᑮᑮᐌᐙᒡ ᑫᐱᒥᓂᔕᐅᓀᒀ, ᒦᑕᔥ ᐸᔦᔥ ᐃᔑ ᑮᐌᑫᒃ, ᐅᑮ ᐃᓈᐞ᙮ 17 ᒦᔥ ᐅᐅ ᐅᑮᒨᓵᐲᒃ ᑳᐃᓈᐙᒡ ᐃᓂ ᐃᑴᐗᓐ, ᓂᑲ ᑲᓇᐌᑖᒥᓐ ᓴ ᐃᐃ ᑲᔑ ᐊᐱᒧᔮᕽ ᐁᐃᔑᔮᕽ ᒋᐋᔩᒋ ᐊᔓᑕᒫᑰᔭᓐ, 18 ᐊᐲ ᐱᑲᒋᔥᑭᓇᒫᑫᔮᕽ ᐅᐅ ᐊᑭ᙮ ᑮᔥᐱᓐ ᑯᑕ ᐁᑕ ᑮᐊᑰᑑᔭᓐ ᐅᐅ ᒥᔅᑴᔮᑉ ᐃᐃᒫ ᐙᓭᒋᑲᓂᕽ ᑳᑮ ᐅᒋ ᓃᓵᐲᑭᓂᔮᕽ, ᑮᔥᐱᓐ ᑲᔦ ᐁᑕ ᑮᐲᓇᑣᐸᓐ ᑭᑌᑌ, ᑭᒫᒫ ᑲᔦ, ᑮᒋᔖᓇᒃ ᑲᔦ, ᐃᐃ ᑲᔦ ᑲᑭᓇ ᐁᓇᐌᒫᐙᒡ ᐃᐃᒫ ᑭᐙᑳᐃᑲᓂᕽ᙮ 19 ᑮᔥᐱᓐ ᐃᑕᔥ ᐐᓐ ᐊᐎᔭ ᑭᐙᑳᐃᑲᓂᕽ ᐅᒋ ᓵᑲᐊᕽ ᒦᑲᓈᕽ ᐃᑕᔥ ᐃᔖᒡ, ᐐᓐ ᓴ ᐃᐃ ᐅᑎᔑᒋᑫᐎᓐ, ᑳᐐᓐ ᓃᓇᐎᓐᑦ ᑫᑰᓐ ᓂᑲ ᐃᔑ ᐊᓈᒣᑖᑯᓯᓰᒥᓐ᙮ ᑮᔥᐱᓐ ᐃᑕᔥ ᐐᓐ ᐊᐎᔭ ᑭᐙᑳᐃᑲᓂᕽ ᐁᔮᒡ ᓂᓯᓐᒡ ᐃᑕᔥ, ᓃᓇᐎᓐᑦ ᓴ ᓂᑲ ᐊᓈᒣᑖᑯᓯᒥᓐ ᐋᓃᓐ ᑫᐃᔑᓭᒡ᙮ 20 ᑮᔥᐱᓐ ᐃᑕᔥ ᑲᔦ ᑎᐹᒋᒥᔮᕽ ᐋᓃᓐ ᐁᔑᒋᑫᔮᕽ, ᒦ ᓴ ᐃ ᒋᐸᑭᒋᔥᑳᑯᔮᕽ ᐃᐃ ᑳᑮ ᑑᑕᐎᔮᕽ ᒋᐋᔩᒋ ᐊᔓᑕᒫᑰᔭᓐ, ᐅᑮᐃᓈᐙᓐ᙮ 21 ᒦᔥ ᐅᐅ ᑳᐃᑯᐙᒡ ᐃᓂ ᐃᑴᐗᓐ, ᒦ ᓴ ᐃ ᑫᐃᔑᓈᑾᒃ ᑳᐃᑭᑐᔦᒃ᙮ ᒦᑕᔥ ᑳᐃᔑ ᒫᒋᓂᔕᐅᑯᐙᒡ᙮ ᐅᑮ ᑕᑯᐱᑑᓂ ᑕᔥ ᑲᔦ ᒥᔅᑴᔮᑉ ᐅᐙᓭᒋᑲᓂᓃᕽ᙮ ᒦᑕᔥ ᑳᐃᔑ ᒫᒑᐙᒡ᙮ 22 ᐁᔑ ᐸᐲᑾᑎᓈᓂᒃ ᐃᑕᔥ ᐃᓇᑫ ᑮᐃᔑ ᒫᒑᐗᒃ, ᓂᓱᑮᔑᒃ ᐌᑎ ᐁᑮ ᐊᔮᐙᒡ ᐹᓂᒫ ᓴ ᑳᑮᐌᓂᒡ ᐃᐃ ᑳᑮ ᐱᒥᓂᔕᐅᑯᐙᒡ᙮ ᐃᐃ ᓴ ᑳᑮ ᐱᒥᓂᔕᐅᑯᐙᒡ ᒥᓯᐌ ᒦᑲᓈᕽ ᐅᑮ ᐃᔑ ᓇᓈᑐᓀᐅᑯᐙᐞ, ᑳᐐᓐ ᐃᑕᔥ ᐅᑮ ᒥᑳᑯᓰᐙᐞ᙮ 23 ᒦᔥ ᐃᑭ ᓃᔑᓐ ᐃᓂᓂᐗᒃ ᑮᓃᓵᒪᒋᐌᐗᒃ ᐁᔑ ᐸᐲᑾᑎᓈᓂᒃ, ᓰᐲᓂ ᑲᔦ ᐁᑮ ᐋᔕᐎᔥᑳᐙᒡ ᐁᑮ ᑮᐌᐙᒡ᙮ ᑮᐃᔑ ᑕᑯᔑᓅᒃ ᐃᑕᔥ ᐁᔑᐊᔮᓂᒡ ᒑᔓᐙᓐ ᑳᑮ ᐅᑌᑌᓂᒡ ᓇᓇᓐ᙮ ᒦᔥ ᑳᑮ ᐐᑕᒪᐙᐙᒡ ᑲᑭᓇ ᑳᐃᔑᓭᐙᒡ᙮ 24 ᐅᐅ ᓴ ᐅᑮᐃᓈᐙᓐ ᒑᔓᐙᓐ, ᑳᑎᐯᒋᑫᒡ ᓴ ᑌᐺ ᑭᒦᓂᑯᓈᓐ ᐃᐃ ᒥᓯᐌ ᐊᑮᓂ ᒋᒪᑲᑗᐗᕽ; ᑲᑭᓇ ᑲᔦ ᐯᒫᑎᓯᐙᒡ ᐌᑎ ᐁᔮᐙᒡ ᐃᔑᐊᔮᐗᒃ ᑖᐱᔥᑰ ᐁᓂᓂᑭᔥᑳᐙᒡ ᐁᐲᑖᓂᒥᓯᐙᒡ, ᑮᓇᐎᓐᑦ ᐅᒋ, ᐅᑮᐃᓈᐙᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society