ᐃᔑᒋᑫᐎᓇᓐ 9 - ᐅᒋᐺ ᑭᒋᒪᓯᓇᐃᑲᓐᔂᓬ ᑮᑴᑳᑎᓯᒡ (Acts 22.6-16; 26.12-18 ) 1 ᔂᓬ Saul ᑕᔥ ᑫᔮᐱ ᐅᑮ ᐋᒀᑎᓰᑲᑕᐙᐞ ᐁᐊᔓᓈᒡ ᐁᐐᓂᓵᒡ ᐃᐃ ᑳᑎᐯᒋᑫᓂᒡ ᐅᑭᑭᓄᐊᒪᐙᑲᓂᓂ᙮ ᐅᑮᐊᑕ ᐙᐸᒫᓐ ᑕᔥ ᒫᐗᒡ ᑭᒋᐊᓇᒥᐁᐎᑭᒫᓐ, 2 ᐁᑮ ᑲᑴᑗᒡ ᒋᒦᓂᓐᒡ ᒪᓯᓇᐃᑲᓇᓐ ᑫᐅᒋ ᑭᑫᓂᒥᑯᒡ ᑎᒫᔅᑲᔅ Damascus ᐆᑌᓈᕽ ᑳᐊᔮᓂᒡ ᒎᐎᐊᓇᒥᐁᐎᑲᒥᑯᕽ᙮ ᑮᔥᐱᓐ ᑕᔥ ᒥᑲᐙᒡ ᐊᐎᔭᓐ ᐱᑯ ᐯᐱᒥᓂᔕᐊᒥᓂᒡ ᐃᔖᐎᓐ, ᐃᓂᓂᐗᓐ, ᑯᒫ ᑲᔦ ᐃᑴᐗᓐ, ᐁᐐᒪᒫᒋᑾᐱᓈᒡ ᒋᐃᔑᐎᓈᒡ ᒉᕒᐆᓴᓬᐊᒥᕽ Jerusalem᙮ 3 ᐯᔓ ᑕᔥ ᐁᐊᓂ ᐱᒥᐊᔮᒡ ᐆᑌᓈᕽ ᑎᒫᔅᑲᓯᕽ, ᐅᑮ ᑯᔥᑯᐎᓂᑯᓐ ᐁᐙᑌᓭᓂᒃ ᐁᔑ ᐊᔮᒡ, ᑭᒋᑮᔑᑯᕽ ᐁᑮᐅᒋᓭᓂᒃ᙮ 4 ᒥᑕᑲᑲᒥᒃ ᑕᔥ ᑮᐃᔑ ᐸᑭᔑᓐ, ᐊᐌᑴᓇᓐ ᑕᔥ ᐅᑮᓅᑕᐙᓐ ᐁᑲᓅᓂᑯᒡ: ᔂᓬ, ᔂᓬ, ᐌᑯᓀᓐ ᐌᒋ ᑲᒀᑕᑭᐃᔭᓐ? ᐁᑮᐃᑯᒡ᙮ 5 ᒦᔥ ᑳᐃᑭᑐᒡ: ᑌᐯᒋᑫᔭᓐ, ᐊᐌᓀᓐ ᑮᓐ? ᐅᐅ ᑕᔥ ᐅᑮᐃᑰᓐ: ᓃᓐ ᐅᔕ ᐊᐊ ᒋᓴᔅ ᑳᑲᒀᑕᑭᐊᒡ᙮ 6 ᑕᑲ ᑕᔥ, ᐸᓯᑸᓐ᙮ ᐌᑎ ᐆᑌᓈᕽ ᐃᔖᓐ, ᒦᑕᔥ ᐌᑎ ᑫᔑ ᐐᑕᒫᑰᔭᓐ ᐋᓃᓐ ᑫᐃᔑᒋᑫᔭᓐ, ᐅᑮᐃᑰᓐ᙮ 7 ᐃᓂᐌᓂᐗᐞ ᑕᔥ ᐃᓂᓂᐗᐞ ᑳᑮᐐᒌᐎᑯᒡ ᑮᑭᐱᒌᐗᐞ ᑫᑰᓐ ᐁᑮᐃᑭᑐᓯᓂᒃ, ᐁᓅᑕᒥᓂᒡ ᐃᐃ ᑳᑮᐃᑭᑐᐎᓐᒡ᙮ ᑳᐐᓐ ᑕᔥ ᐊᐎᔭᓐ ᐅᑮ ᐙᐸᒫᓰᓂ᙮ 8 ᔂᓬ ᑕᔥ ᒥᑕᑲᒥᒃ ᑮᐅᒋ ᐸᓯᑸ᙮ ᐊᐲ ᑕᔥ ᐁᐃᓈᐱᒡ, ᑳᐐᓐ ᑮᐙᐱᓰ᙮ ᐌᑎ ᑕᔥ ᐆᑌᓈᕽ ᑎᒫᔅᑲᔅ ᑮᐃᔑᐎᒋᑲᓂᐎ ᐁᑮ ᓴᑭᓂᑫᓂᓐᒡ᙮ 9 ᓂᓱᑮᔑᒃ ᑕᔥ ᑳᐐᓐ ᑮᐙᐱᓰ, ᑳᐐᓐ ᒋᑮᐐᓯᓂᒡ, ᑳᐐᓐ ᑲᔦ ᒋᑮᐅᒋ ᒥᓂᑴᒡ᙮ 10 ᐃᐃᒫ ᑕᔥ ᐆᑌᓈᕽ ᑎᒫᔅᑲᓯᕽ ᑮᐊᔮ ᐯᔑᒃ ᐅᑌᐺᑕᒨ, ᐋᓇᓈᔭᔅ Ananias ᐁᔑᓂᑳᓱᒡ᙮ ᐃᔑᓇᒧᐎᓂᕽ ᑕᔥ ᐅᑮᐅᒋ ᑲᓅᓂᑰᓐ ᑳᑎᐯᒋᑫᓂᒡ ᐁᐃᑯᒡ: ᐋᓇᓈᔭᔅ! ᐅᑮᐃᑰᓐ᙮ ᐌᑯᓀᓐ, ᑌᐯᒋᑫᔭᓐ? ᑮᐃᑭᑐ᙮ 11 ᑳᑎᐯᒋᑫᓂᒡ ᑕᔥ ᐅᐅ ᐅᑮᐃᑰᓐ: ᐃᔖᓐ ᐌᑎ ᐱᒧᓭᑲᓈᕽ ᑾᔭᑾᒧᓐ ᐁᒋᑳᑌᒃ᙮ ᒎᑕᔅ Judas ᐅᐙᑳᐃᑲᓂᕽ ᐃᔑᐲᑎᑫᓐ᙮ ᒦᑕᔥ ᐃᐃᒫ ᑫᔑᐊᑑᔥᑲᐗᒡ ᔂᓬ Saul ᐁᔑᓂᑳᓱᒡ ᑖᕒᓴᔅ Tarsus ᑳᐅᒌᒡ᙮ ᒣᒀ ᐅᔕ ᐊᓇᒥᐋ᙮ 12 ᑮᐃᔑᓇᒻ ᓴ ᐁᐙᐸᒫᒡ ᐃᓂᓂᐗᓐ ᐋᓇᓈᔭᔅ Anaanias ᐁᐃᔑᓂᑳᓱᓂᒡ ᐁᐱ ᓈᓯᑳᑯᒡ ᐁᓵᒥᓂᑯᒡ ᒋᑮᐌ ᐙᐱᒡ, ᐅᑮᐃᑰᓐ᙮ 13 ᐋᓇᓈᔭᔅ ᑕᔥ ᑮᐃᔑ ᓇᑴᑕᒻ: ᑌᐯᒋᑫᔭᓐ, ᓃᐱᐗᐞ ᐅᔕ ᓂᓈᓅᑕᒻ ᐁᓈᒋᒥᓐᒡ ᐊᐊ ᐃᓂᓂ, ᐋᓃᓐ ᐁᔑ ᒫᔑ ᑑᑕᐙᒡ ᑳᑎᐯᓂᒥᒪᒡ ᐅᑌᐺᑕᒨᐞ ᐁᔮᓂᒡ ᒉᕒᐆᓴᓬᐊᒥᕽ᙮ 14 ᐅᑮᒦᓂᑰᓐ ᐄᑐᒃ ᑭᒋᐊᓇᒥᐁᐎᑭᒫᓐ ᑲᔥᑭᐁᐎᓯᐎᓐ ᒋᑕᑯᓈᒡ ᑲᑭᓇ ᑳᔑ ᑲᓅᓂᒥᒃ ᑭᐐᓱᐎᓂᓃᕽ, ᐅᑮᐃᓈᓐ᙮ 15 ᒦᔥ ᐅᐅ ᑳᐃᑯᒡ ᑳᑎᐯᒋᑫᓂᒡ: ᒫᒑᓐ, ᐃᔖᓐ! ᐐᓐ ᐅᔕ ᓂᑮᐅᓈᐸᒫ ᐁᐐᐋᐸᒋᐊᒃ ᒋᑭᑫᑕᒨᓈᒡ ᓂᐐᓱᐎᓐ ᑳᒎᐎᐎᓯᓂᒃ Gentiles, ᑭᒋᐅᑭᒫᐞ ᑲᔦ, ᐃᐃ ᑕᔥ ᑲᔦ ᐃᔅᕒᐃᔭᓬᐊᐞ᙮ 16 ᓃᓐ ᐅᔕ ᐱᑯ ᓂᐐᐙᐸᑕᐋ ᐋᓃᓐ ᒥᓂᒃ ᑫᔑᑲᒀᑕᑭᑑᒡ ᓂᐐᓱᐎᓂᕽ ᐅᒋ, ᐅᑮᐃᑰᓐ᙮ 17 ᐋᓇᓈᔭᔅ Ananias ᑕᔥ ᑮᐊᓂ ᒫᒑ ᐁᑮᐊᐎ ᐲᑎᑫᒡ ᐙᑳᐃᑲᓂᕽ ᐁᔑ ᐊᔮᓂᒡ ᔂᓬᐊᓐ᙮ ᐅᑮ ᓵᒥᓈᓐ ᑕᔥ ᐁᑮᐃᓈᒡ: ᓃᒋ ᐅᑌᐺᑕᒧ, ᔂᓬ, ᑳᑎᐯᒋᑫᒡ ᒋᓴᔅ ᑳᑮ ᓈᑯᓰᑕᐎᒃ ᐌᑎ ᒦᑲᓈᕽ, ᓂᑮ ᐲᒋᓂᔕᐅᒃ ᒦᓇᐙ ᒋᐙᐱᔭᓐ, ᒋᒨᔥᑭᓀᔥᑲᐎᒃ ᑕᔥ ᑲᔦ ᑭᔐᒪᓂᑑ ᐅᑕᒑᑾᓐ, ᐅᑮᐃᓈᓐ᙮ 18 ᔐᒫᒃ ᐃᑕᔥ ᐅᔥᑮᔑᑯᕽ ᑫᑰᓇᓐ ᑮᐅᒋ ᐸᑭᓯᓂᓂᐗᓐ ᑖᐱᔥᑰ ᐗᓇᑲᔭᒃ ᐁᐃᔑᓈᑾᓂᓂᑭᓐ᙮ ᔐᒫᒃ ᑕᔥ ᑮᐙᐱ᙮ ᒦᑕᔥ ᑳᐃᔑ ᐸᓯᑸᒡ ᐁᑮ ᓰᑲᐊᑖᓱᒡ᙮ 19 ᑳᐃᔥᒀ ᐐᓯᓂᒡ ᑕᔥ ᒦᓇᐙ ᑮᑮᐌ ᒪᔥᑲᐙᑎᓯ᙮ ᐊᒋᓇ ᑕᔥ ᐅᑮ ᐐᒌᐙᐞ ᐅᑌᐺᑕᒨᐞ ᑎᒫᔅᑲᓯᕽ Damascus ᑳᑮᐊᔮᓂᒡ᙮ ᔂᓬ ᑮᑲᑮᑴᒡ ᑎᒫᔅᑲᓯᕽ 20 ᒦᑕᔥ ᔐᒫᒃ ᒎᐎ ᐊᓇᒥᐁᐎᑲᒥᑯᑳᕽ ᑳᐃᔑ ᐸᐹ ᐐᑕᒫᑫᒡ ᒋᓴᓲᓐ ᐁᐅᑯᓯᓯᒥᑯᓂᒡ ᑭᔐᒪᓂᑑᓐ᙮ 21 ᑲᑭᓇ ᑕᔥ ᑳᑮ ᓅᑖᑯᒡ ᑮᒫᒪᑳᑌᑕᒨᐞ ᐁᑮᐃᑭᑐᓂᒡ: ᑳᐐᓐ ᐃᓇ ᒦ ᐊᐌ ᒉᕒᐆᓴᓬᐊᒥᕽ ᑳᑮ ᑲᒀᑕᑭᐋᒡ ᐃᐃ ᑳᐐᑕᒥᓂᒡ ᒋᓴᓲᓐ ᐅᐐᓱᐎᓂᓂ ᐁᓇᒥᐋᓂᒡ? ᑳᐐᓐ ᐃᓇ ᒦ ᐃ ᑳᐅᒋ ᐲᔖᒡ ᐅᐅᒫ ᐁᐐᑕᑯᓂᐌᒡ ᒋᐃᔑᐎᓈᒡ ᐁᔑ ᐊᔮᓂᒡ ᑭᒋᐊᓇᒥᐁᐎᑭᒫ? ᑮᐃᑭᑐᐗᐞ᙮ 22 ᔂᓬ Saul ᑕᔥ ᐋᒌᑫ ᑮᐊᓂ ᒪᔥᑲᐙᓂ ᐁᔑ ᑲᑮᑴᒡ᙮ ᐅᑮᐗᐙᓀᑕᒥᐋᐞ ᐃᑕᔥ ᒎᐗᐞ ᐁᔑᑖᓂᒡ ᐃᐃᒫ ᑎᒫᔅᑲᓯᕽ ᐁᑮ ᐯᑌᓈᑯᑑᒡ ᒋᓴᓲᓐ ᐁᔮᐎᓂᒡ ᑳᑮ ᐲᒋᓂᔕᐅᑯᓂᒡ ᑭᔐᒪᓂᑑᓐ ᒋᐱᒫᒋᐃᐌᓂᒡ᙮ 23 ᓈᓈᑫ ᑕᔥ ᐁᐊᓂ ᑲᑮᔑᑲᓂᓂᒃ ᒎᐗᐞ ᑮᒫᐗᒋᐃᑎᐗᐞ ᐁᐅᓈᑯᓂᑫᓂᒡ ᐁᐐᓂᓯᑯᒡ ᔂᓬ᙮ 24 ᐅᑮ ᑭᑫᑖᓐ ᑕᔥ ᐋᓃᓐ ᐙᑑᑖᑯᒡ᙮ ᐁᑕᓱᑮᔑᒃ, ᐁᑕᓱ ᑎᐱᒃ ᑲᔦ ᐅᑮᐊᑲᒫᑰᐞ ᐁᔑ ᐊᔨᔥᒀᑌᒥᐗᓂᓂᒃ ᐃᐃ ᐆᑌᓇ ᐁᐐᓂᓯᑯᒡ᙮ 25 ᔂᓬ ᑕᔥ ᑳᑮ ᐱᒥᓂᔕᐅᑯᒡ ᐅᑮᓈᓯᑳᑰᐞ ᒣᒀ ᐁᑎᐱᑲᓂᓂᒃ᙮ ᐁᔑ ᐸᑯᓀᔮᓂᒃ ᑕᔥ ᐙᑳᔮᐱᑭᓂᑲᓐ ᐅᑮᐅᒋ ᓃᓵᐲᑭᓂᑰᐞ ᒪᔥᑯᓰᒪᑲᑯᕽ ᐁᑮᐃᔑ ᓇᒪᑕᐱᒡ᙮ ᔂᓬ ᑮᐃᔖᒡ ᒉᕒᐆᓴᓬᐊᒥᕽ 26 ᔂᓬ ᑕᔥ ᑮᐃᔖ ᒉᕒᐆᓴᓬᐊᒥᕽ Jerusalem, ᐁᑮᑲᑴ ᐐᒌᐙᒡ ᐃᔑᓂᔕᐙᑲᓇᐞ᙮ ᑲᑭᓇ ᑕᔥ ᐅᑮ ᑯᓯᑰᐞ, ᐁᑮ ᑌᐺᑕᓯᓂᒃ ᑫᐐᓐ ᐄᓴᓐ ᐃᔑᓂᔕᐙᑲᓐ ᐁᑎᓄᐎᒡ᙮ 27 ᐹᕒᓇᐸᔅ Barnabas ᓴ ᐅᑮᐐᒋᐋᓐ ᐁᑮᐃᔑᐎᓈᒡ ᐁᔑ ᐊᔮᓂᒡ ᐃᔑᓂᔕᐙᑲᓇᐞ᙮ ᐅᑮᐐᑕᒪᐙᐞ ᒣᒀ ᐁᐱᒥᐊᔮᓂᒡ ᐋᓃᓐ ᑳᐃᔑ ᐙᐸᒫᓂᒡ ᑳᑎᐯᒋᑫᓂᒡ, ᐁᑮᑲᑲᓅᓂᑯᓂᒡ ᐃᑕᔥ ᑲᔦ᙮ ᐅᑮᐐᑕᒪᐙᐞ ᑲᔦ ᐋᓃᓐ ᐌᑎ ᑎᒫᔅᑲᓯᕽ Damascus ᑳᑮᐃᔑ ᓲᑭᑌᐁᓂᒡ ᐁᑲᑮᑴᓂᒡ ᐅᐐᓱᐎᓂᓃᕽ ᒋᓴᓲᓐ᙮ 28 ᔂᓬ ᑕᔥ ᐅᑮ ᐐᒌᐙᐞ ᐃᔑᓂᔕᐙᑲᓇᐞ ᒥᓯᐌ ᐁᑮᐸᐹ ᐃᔖᒡ ᒉᕒᐆᓴᓬᐊᒥᕽ, ᐁᑮ ᓲᑭᑌᐁᒡ ᐁᑲᑮᑴᒡ ᐅᐐᓱᐎᓂᓃᕽ ᑳᑎᐯᒋᑫᓂᒡ᙮ 29 ᐅᑮ ᑲᑲᓅᓈᐞ ᑕᔥ ᐁᑮᑲᑴ ᔖᑰᓱᒫᒡ ᐃᐃ ᑲᕒᐄᒃ Greek ᑳᐃᔑᑮᔗᓂᒡ ᒎᐗᐞ᙮ ᔖᑰᒡ ᐃᑕᔥ ᐅᑮᑲᑴ ᓂᓯᑰᐞ᙮ 30 ᐊᐲ ᑕᔥ ᐅᑌᐺᑕᒨᐞ ᑳᑭᑫᑕᒥᓂᒡ ᐋᓃᓐ ᐙᑑᑕᐎᓐᒡ ᐅᑮᐃᔑ ᐐᒌᐎᑰᐞ ᓭᓴᕒᐄᔭᐃᕽ Caesarea, ᒦᔥ ᐌᑎ ᑳᑮᐃᔑᓂᔕᐅᓐᒡ ᒋᐃᔖᒡ ᑖᕒᓴᔅ Tarsus ᐆᑌᓈᕽ᙮ 31 ᐅᑌᐺᑕᒨᒃ ᑕᔥ ᒥᓯᐌ ᒎᑏᔭᑮᕽ Judah, ᑳᓬᐊᓬᐄᕽ Galilee ᑲᔦ, ᓴᒣᕒᐃᔭᑮᕽ Samaria ᐃᑕᔥ ᑲᔦ ᐱᓵᓐ ᑮᐊᔭᔮᐗᒃ᙮ ᑮᐊᓂ ᒪᔥᑲᐎᓰᐗᒃ ᑲᔦ, ᐯᑭᔥ ᐃᑕᔥ ᑮᐊᓂ ᐹᑏᓄᐗᒃ ᐁᐐᒋᐃᑯᐙᒡ ᑭᔐᒪᓂᑑᓐ ᐅᑕᒑᑯᓂ᙮ ᑮᐃᔑᐱᒫᑎᓯᐗᒃ ᐃᑕᔥ ᑲᔦ ᐁᑮ ᑯᑖᓀᓂᒫᐙᒡ ᑳᑎᐯᒋᑫᓂᒡ᙮ ᐲᑕᕒ ᑮᐃᔖᒡ ᓬᐃᑕ ᑲᐯᔑᐎᓂᕽ, ᒑᐸ ᐆᑌᓈᕽ ᑲᔦ 32 ᑮᐊᓂ ᐊᔨᔑᓭᓂ ᑕᔥ ᐲᑕᕒ Peter ᒥᓯᐌ ᐁᑮᐃᔖᒡ ᐃᐃᒫ ᐊᑮᕽ, ᐁᑮᐊᓂ ᐅᑎᓵᒡ ᐅᑌᐺᑕᒨᐞ ᑭᔐᒪᓂᑑᓐ ᑌᐯᓂᒥᑯᓂᒡ ᓬᐃᑕ Lydda ᑳᐯᔑᐎᓂᕽ ᐁᔮᓂᒡ᙮ 33 ᐅᑮᐅᑎᓵᓐ ᑕᔥ ᐯᔑᒃ ᐃᓂᓂᐗᓐ ᐄᓃᔭᔅ Aeneas ᐁᔑᓂᑳᓱᓂᒡ ᐁᒪᒫᒋᒀᐱᓀᓂᒡ᙮ ᐋᔕ ᓂᔣᓱ ᐱᐴᓐ 8 ᐃᐃ ᑮᔑ ᐊᔮᐗᓐ ᐁᑮᒥᒋ ᐱᒥᔑᓂᓂᒡ ᐁᐱᒧᓭᓯᓂᒃ᙮ 34 ᐲᑕᕒ ᑕᔥ ᐅᑮᐃᓈᓐ: ᐄᓃᔭᔅ, ᒋᓴᔅ X ᑭᒥᓄᐊᔮᐃᒃ᙮ ᐗᓂᔥᑳᓐ, ᒋᓇᐄᑭᓯᑑᔭᓐ ᑭᓂᐯᐎᓐ, ᐅᑮᐃᓈᓐ᙮ ᔐᒫᒃ ᑕᔥ ᑮᐗᓂᔥᑳᐗᓐ᙮ 35 ᑲᑭᓇ ᑕᔥ ᐃᐃᒫ ᐯᒫᑎᓯᓂᒡ ᑳᑮᐃᔑᑖᓂᒡ ᓬᐃᑕ ᑲᐯᔑᐎᓂᕽ, ᐃᐃ ᑲᔦ ᔐᕒᐊᓂᕽ Sharon ᐅᐅ ᐁᐃᔑ ᐙᐸᑕᒥᓂᒡ, ᐅᑮ ᑴᑮᓄᑕᐙᓂ ᑳᑎᐯᒋᑫᓂᒡ᙮ 36 ᐌᑎ ᑕᔥ ᐆᑌᓈᕽ ᒑᐸ ᐁᒋᑳᑌᒃ, ᑮᐊᔮ ᐯᔑᒃ ᐃᑴ ᐅᑌᐺᑕᒨ ᑖᐱᑕ Tabitha ᐁᐃᔑᓂᑳᓱᒡ᙮ ᑲᕒᐄᑲᒃ Greeks ᐅᑎᔑᑮᔗᐎᓂᐙᕽ ᑣᕒᑲᔅ Dorcas ᑮᐃᑭᑐᐗᒃ, ᐙᐙᔥᑫᔑ ᐁᑮᐃᒋᑳᑌᓂᒃ᙮ ᒦ ᐊᐌ ᐃᑴ ᒨᔕᒃ ᑮᓂᑖ ᒥᓄᒋᑫ, ᐁᑮ ᓂᑖ ᐐᒋᐋᒡ ᑲᔦ ᑫᑎᒫᑭᓯᓂᒡ᙮ 37 ᒦᑕᔥ ᐃᐃ ᐊᐲ ᑮᐊᓂ ᐋᑯᓯ ᐊᐊ ᐃᑴ, ᐁᑮᐊᓂ ᓂᐳᒡ᙮ ᐅᐐᔭᐤ ᐃᑕᔥ ᑮᑭᓰᓯᐸᒋᑳᑌᓂ, ᐃᔥᐱᒥᕽ ᐁᔑ ᐸᑫᒋᑳᑌᓂᒃ ᐙᑳᐃᑲᓐ ᐁᑮᐃᔑ ᐊᒋᑳᑌᓂᒃ᙮ 38 ᓬᐃᑕ ᐊᔮᐎᓂᕽ ᐃᑕᔥ ᑮᐅᒋ ᐯᔓᐗᓐ ᐃᐃᒫ ᐅᒋ ᒑᐸ Joppa ᐆᑌᓈᕽ᙮ ᐊᐲ ᓴ ᐅᑌᐺᑕᒨᒃ ᐁᓅᑕᒧᐙᒡ ᐲᑕᕒᐊᓐ Peter ᐁᐊᔮᓂᒡ ᐌᑎ ᓬᐃᑕ ᑲᐯᔑᐎᓂᕽ, ᓃᔑᓐ 2 ᐃᓂᓂᐗᐞ ᐅᑮᐃᔑᓂᔕᐙᐙᐞ ᐅᐅ ᒋᐊᐎᐃᓈᓂᒡ: ᑫᑯ ᐊᔪᑕᒦᑫᓐ ᒋᐱ ᓈᓯᑲᐎᔮᕽ, ᒋᐃᓈᓂᒡ᙮ 39 ᔐᒫᒃ ᐃᑕᔥ ᐲᑕᕒ ᑮᐅᔒᑖ ᐁᑮᐊᓂ ᐐᒌᐙᒡ᙮ ᐊᐲ ᑕᔥ ᐁᑕᑯᔑᕽ, ᑮᐃᔑᐎᒋᑲᓂᐎ ᐸᑫᒋᑲᓂᕽ ᐃᔥᐱᒥᕽ᙮ ᑲᑭᓇ ᑕᔥ ᑮᐙᒋᑴᐗᐞ ᐅᑮᐙᑳᔥᑳᑰᐞ ᐁᑭᒋ ᒪᐎᓂᒡ ᐁᐙᐸᑕᐃᑯᒡ ᓈᐱᔥᑭᑲᓇᓐ, ᑭᑭᔥᑭᑲᓇᓐ ᑲᔦ ᑳᑮᐅᔑᑑᓂᐸᓐ ᒣᒀ ᐁᐱᒫᑎᓯᓂᒡ᙮ 40 ᒦᔥ ᐲᑕᕒ ᑳᐃᔑ ᑲᓅᓈᒡ ᑲᑭᓇ ᒋᓵᑲᐊᒥᓂᒡ᙮ ᒦᑕᔥ ᑳᐃᔑ ᐅᒋᒌᑾᓇᐱᑖᒡ ᐁᑮᐊᓇᒥᐋᒡ᙮ ᑮᑴᑮ ᑕᔥ ᐁᔑ ᐊᑌᓂᒃ ᐃᐃ ᐐᔭᐎᒫ ᐁᑮᐃᑭᑐᒡ: ᑖᐱᑕ ᐗᓂᔥᑳᓐ᙮ ᒦᔥ ᑳᐃᔑ ᐹᑳᐱᓂᒡ᙮ ᐁᐙᐸᒥᑯᒡ ᐃᑕᔥ, ᒦ ᐃ ᑳᐃᔑ ᒪᔮᐗᐱᓂᒡ᙮ 41 ᐅᑮ ᓴᑭᓂᑫᓈᓐ ᑕᔥ ᐁᐐᒋᐋᒡ ᐁᑮ ᐸᓯᑸᐋᒡ᙮ ᒦᑕᔥ ᑳᐃᔑ ᐊᑐᒫᒡ ᐅᑌᐺᑕᒨᐞ, ᐃᐃ ᑲᔦ ᑮᐙᒋᑴᐞ ᐁᑮᐙᐸᑕᐋᒡ ᐁᐱᒫᑎᓯᓂᒡ᙮ 42 ᒥᓯᐌ ᑕᔥ ᐃᐃᒫ ᒑᐸ ᐆᑌᓈᕽ ᑮᑭᑫᑖᑾᓐ ᐅᐅ᙮ ᓃᐱᐗᐞ ᑕᔥ ᐯᒫᑎᓯᐙᒡ ᐅᑮ ᑌᐺᑕᐙᐙᓐ ᑳᑎᐯᒋᑫᓂᒡ᙮ 43 ᑭᓉᔒᔥ ᑕᔥ ᐃᑯ ᐃᐃᒫ ᐲᑕᕒ ᑮᐊᔮ ᒑᐸ ᐆᑌᓈᕽ, ᐁᑮᐐᒋᐊᔮᒫᒡ ᑳᐸᔥᑴᑭᓄᑫᓂᒡ ᓵᐃᒪᓐ Simon ᐁᔑᓂᑳᓱᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society