ᐃᔑᒋᑫᐎᓇᓐ 17 - ᐅᒋᐺ ᑭᒋᒪᓯᓇᐃᑲᓐᑆᓬ ᑮᐃᔖᒡ ᑌᓴᓬᐊᓇᐃᑲ 1 ᑆᓬ Paul, ᐊᐊ ᑕᔥ ᑲᔦ ᓵᐃᓬᐊᔅ Silas ᐁᐱᒥ ᐊᔮᐙᒡ ᑮᔖᐳᔥᑳᐗᒃ ᐆᑌᓇᐗᓐ ᐋᐱᐸᓬᐃᔅ Amphipolis, ᐋᐸᓬᐆᓂᔭ Apollonia ᐁᔑᓂᑳᑌᓂᑭᓐ᙮ ᐃᐃᒫ ᑕᔥ ᐆᑌᓈᕽ ᑌᓴᓬᐊᓇᐃᑲ Thessalonica ᐁᔑᓂᑳᑌᓂᒃ ᑮᐃᔑ ᑕᑯᔑᓅᒃ᙮ ᑮᐊᔮᓂ ᐃᒫ ᒎᐗᒃ ᐅᑕᓇᒥᐁᐎᑲᒥᑯᐙ᙮ 2 ᑆᓬ ᑕᔥ ᑳᑮ ᓂᑖ ᐃᔑᒋᑫᒡ, ᓂᓱ ᐊᓉᐲᐎ ᑮᔑᒃ ᑮᐲᑎᑫ ᒎᐎ ᐊᓇᒥᐁᐎᑲᒥᑯᕽ, ᐁᑮ ᑕᔑᑕᒫᑎᐙᒡ ᑭᒋᒪᓯᓇᐃᑲᓐ, 3 ᐌᐌᓂ ᐁᑮᐐᑕᒪᐙᒡ, ᐁᑮᐙᐸᑕᐋᒡ ᑲᔦ ᐋᓃᓐ ᑳᑮᐅᒋ ᐃᔑᓭᓂᒃ ᒋᑲᒀᑕᑭᐃᒥᑎᐸᓐ ᑭᔐᒪᓂᑑ ᑳᑮᐅᓈᐸᒫᒡ ᒋᑮᐌ ᐱᒫᑎᓯᓂᒡ ᐃᑕᔥ ᐅᒋ ᓂᐳᐎᓂᕽ, ᐅᐅ ᐁᑮᐃᓈᒡ: ᒦ ᓴ ᐗᐊ ᒋᓴᔅ ᑳᑕᔑᑕᒪᐎᓇᑰᒃ, ᑭᔐᒪᓂᑑᓐ ᑳᑮᐅᓈᐸᒥᑯᒡ ᒋᐱᒫᒋᐃᐌᒡ᙮ 4 ᐋᓂᑕ ᑕᔥ ᒎᐗᒃ ᑮᑲᔥᑭᒫᐗᒃ ᒋᑌᐺᑕᒧᐙᒡ, ᒦᔥ ᑳᑮᐐᒌᐙᐙᒡ ᑆᓬᐊᓐ, ᓵᐃᓬᐊᓴᓐ ᑲᔦ᙮ ᒦᔥ ᐯᔑᑾᓐ ᑳᐊᔨᑎᐙᒡ ᑳᑮ ᐹᑏᓄᐙᒡ ᑳᓃᑳᓂᓯᐙᒡ ᐃᑴᐗᒃ᙮ ᐃᑭ ᑲᔦ ᑮᐹᑏᓄᐗᒃ ᑳᑮ ᑯᑖᓀᓂᒫᐙᒡ ᑭᔐᒪᓂᑑᓐ ᑲᕒᐄᑲᒃ Greek ᑌᓄᐎᐙᒡ᙮ 5 ᒎᐗᒃ ᐃᑕᔥ ᑮᐋᔮᔐᑕᒨᒃ᙮ ᑳᑮ ᓂᑖ ᑕᓇᑖᐌᕽ ᑕᔥ ᐅᑮᐃᔑ ᓈᓯᑲᐙᐙᐞ ᐊᐎᔭᐞ ᑫᑰᓐ ᐁᓀᑖᑯᓯᓯᓂᒃ ᐁᑮᐅᑸᓄᐋᐙᒡ, ᒦᔥ ᑳᐃᔑ ᐅᒻᐺᑲᒥᑭᓯᐙᒡ ᐃᐃᒫ ᐆᑌᓈᕽ᙮ ᑮᐃᔑ ᒪᐎᓀᐃᑫᐗᒃ ᑕᔥ ᐅᐙᑳᐃᑲᓂᓃᕽ ᒉᓴᓇᓐ Jason ᐁᑮᐊᑐᓀᐙᐙᒡ ᑆᓬᐊᓐ, ᓵᐃᓬᐊᓴᓐ ᑲᔦ, ᐁᐐᐃᔑᐎᓈᐙᒡ ᐁᔑ ᐹᑏᓄᓂᒡ ᐊᐎᔭᐞ᙮ 6 ᐊᐲ ᑕᔥ ᐁᒥᑲᐙᓯᒀ, ᒉᓴᓇᓐ ᓴ ᐃᐃ ᑲᔦ ᑯᑕᒃ ᐅᑌᐺᑕᒨᐞ ᐅᑮᐃᔑ ᐙᐐᑯᐱᓈᐙᐞ ᐁᔑ ᐊᔮᓂᒡ ᐆᑌᓈᐎᑭᒫᐞ ᐅᐅ ᐁᑮᐃᔑ ᔖᔖᑯᐌᐙᒡ: ᐃᑭ ᓴ ᐃᓂᓂᐗᒃ ᒥᓯᐌ ᐊᑮᕽ ᑳᐸᐹ ᐅᐯᑲᒥᑭᓯᐙᒡ ᑭᑑᑎᓯᑯᓈᓂᒃ᙮ 7 ᐗᐊ ᑕᔥ ᒉᓴᓐ ᐅᑮ ᐲᑎᑲᓈᐞ ᐅᐙᑳᐃᑲᓂᕽ᙮ ᓇᐹᒡ ᐃᓇᑫ ᐃᔑᑭᑭᓄᐃᑫᐗᐞ ᑳᐃᓇᑌᓂᑭᓐ ᒫᐗᒡ ᑭᒋᐅᑭᒫᓐ ᐁᓇᔓᐌᓂᒡ, ᐁᐃᑭᑐᓂᒡ ᑯᑕᒃ ᑭᒋᐅᑭᒫᓐ ᐁᐊᔮᓂᒡ ᒋᓴᔅ ᐁᐃᔑᓂᑳᓱᓂᒡ, ᑮᐃᔑ ᔖᑯᐌᐗᐞ᙮ 8 ᐃᑭ ᑕᔥ ᑳᑮ ᐹᑏᓄᐙᒡ ᐊᐎᔭᒃ, ᐃᑭ ᑲᔦ ᐆᑌᓈᐎᑭᒫᒃ ᐊᐲ ᐁᓅᑕᒧᐙᒡ ᐅᐅ, ᐐᑫ ᑮᓂᔑᐗᓈᑌᑕᒨᒃ᙮ 9 ᐅᑮ ᑎᐸᐃᑫᐋᐙᓐ ᐃᑕᔥ ᒉᓴᓇᓐ ᒥᓂᒃ ᑳᑮᓂᑖ ᑎᐸᐃᑫᐎᓐᒡ, ᐃᐃ ᑲᔦ ᑳᑮᐐᒌᐎᑯᓂᒡ, ᒦᔥ ᐸᔨᔥ ᑳᐃᔑ ᐸᑭᑎᓈᐙᒡ᙮ ᓃᐱᐗᐞ ᑮᑌᐺᑕᒧᐙᒡ ᐃᐃᒫ ᐱᕒᐄᔭ ᐆᑌᓈᕽ 10 ᔐᒫᒃ ᑕᔥ ᐁᑎᐱᑲᓂᓂᒃ ᐅᑌᐺᑕᒨᐞ ᑆᓬ Paul, ᓵᐃᓬᐊᔅ Silas ᑲᔦ ᐅᑮᐃᔑᓂᔕᐅᑯᐙᐞ ᒋᐃᔖᐙᒡ ᐱᕒᐄᔭ Berea ᐆᑌᓈᕽ᙮ ᐊᐲ ᑕᔥ ᑌᑯᔑᓄᐙᒡ ᐌᑎ ᑮᐲᑎᑫᐗᒃ ᒎᐎ ᐊᓇᒥᐁᐎᑲᒥᑯᕽ᙮ 11 ᓇᐗᒡ ᑕᔥ ᐃᐃ ᐱᕒᐄᔭ ᐁᔮᓂᒡ ᑮᐱᓯᑕᒨᐞ, ᐁᑮᒨᒋᑫᑕᒥᓂᒡ ᑲᔦ ᐁᓅᑕᒥᓂᒡ ᐃᐃ ᑎᐹᒋᒧᐎᓐ ᐊᐲᒡ ᐐᓐ ᐃᐃ ᑌᓴᓬᐊᓇᐃᑲ Thessalonica ᐁᔮᓂᒡ᙮ ᐁᑕᓱ ᑮᔑᒃ ᑭᒋᒪᓯᓇᐃᑲᓂᕽ ᐅᑮᐃᔑ ᐊᑕᑭᑫᑕᒥᓂ ᑕᑲ ᒋᑌᐺᐗᓂᓂᑴᓐ ᑆᓬ ᑳᑮᐃᑭᑐᒡ᙮ 12 ᓃᐱᐗᐞ ᑕᔥ ᒎᐗᐞ ᑮᑌᐺᑕᒨᐞ, ᐃᐃ ᑲᔦ ᑳᑮᓃᑳᓀᑖᑯᓯᓂᒡ ᐃᑴᐗᐞ, ᓃᐱᐗᐞ ᑲᔦ ᑳᐃᓂᓃᐎᓂᒡ ᑲᕒᐄᑲᐞ Greek ᑌᓄᐎᓂᒡ᙮ 13 ᒎᐗᒃ ᑕᔥ ᑌᓴᓬᐊᓇᐃᑲ ᑳᑮᐊᔮᐙᒡ ᑮᓅᑕᒨᒃ ᑆᓬᐊᓐ ᐱᕒᐄᔭ ᐆᑌᓈᕽ ᐁᑕᔑᑕᒥᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ᙮ ᑮᐃᔖᐗᒃ ᑕᔥ ᐌᑎ ᐁᑮᐊᐎ ᐅᒻᐺᐋᐙᒡ ᑳᑮ ᐹᑏᓄᓂᒡ ᐊᐎᔭᐞ ᐁᑮ ᒥᑯᔥᑳᑌᑕᒧᐋᐙᒡ᙮ 14 ᔐᒫᒃ ᑕᔥ ᐁᑎᐱᑲᓂᓂᒃ ᐅᑌᐺᑕᒨᐞ ᑆᓬ, ᐅᑮᐃᔑᓂᔕᐅᑯᐞ ᒋᐃᔖᒡ ᑭᒋᑲᒦᕽ ᐃᓇᑫ᙮ ᓵᐃᓬᐊᔅ ᐃᑕᔥ ᐐᓐ ᐊᐊ ᑲᔦ ᑎᒪᑎ Timothy ᑮᐊᐱᐗᒃ ᐃᒫ ᐱᕒᐄᔭ ᐆᑌᓈᕽ᙮ 15 ᐃᓂᓂᐗᐞ ᑕᔥ ᑳᑮᐐᒌᐎᑯᒡ ᑆᓬ ᐅᑮᐃᔑ ᐸᑲᒥᐐᒌᐎᑰᐞ ᐋᑎᓐᔅ Athens ᐆᑌᓈᕽ᙮ ᒦᔥ ᐃᐃᒫ ᑳᐅᒋ ᑮᐌᓂᒡ ᐁᑮᐃᓈᒡ ᒋᐐᑕᒪᐙᓂᒡ ᓵᐃᓬᐊᓴᓐ, ᐃᓂ ᑲᔦ ᑎᒪᑏᓐ ᐐᐸ ᒋᐱ ᓈᓯᑳᑯᒡ᙮ ᑆᓬ ᑮᐊᔮᒡ ᐋᑎᓐᔅ ᐆᑌᓈᕽ 16 ᒣᒀ ᑕᔥ ᑆᓬ Paul ᐁᐸᐲᐅᒡ, ᐋᐱᒋ ᑮᐅᒋ ᒥᑯᔥᑳᑌᑕᒻ ᐁᐙᐸᑕᕽ ᐃᐃ ᐆᑌᓇ ᒥᓯᐌ ᐁᐊᔮᓂᒡ ᒪᓂᑑᑳᓇᐞ᙮ 17 ᒦᑕᔥ ᑳᑮ ᑲᑲᓅᓈᒡ ᒎᐗᐞ ᐅᑕᓇᒥᐁᐎᑲᒥᑯᓃᕽ, ᐃᐃ ᑲᔦ ᑳᒎᐎᐎᓯᓂᒃ ᑴᑖᓀᓂᒫᓂᒡ ᑭᔐᒪᓂᑑᓐ᙮ ᐁᑕᓱ ᑮᔑᒃ ᑕᔥ ᑲᔦ ᐅᑮ ᑲᑲᓅᓈᐞ ᐃᐃ ᑳᑮᒪᔮᔥᑳᓂᒡ ᐃᐃᒫ ᑳᑮ ᑕᓇᑖᐌᕽ᙮ 18 ᐋᓂᑕ ᑕᔥ ᑭᑭᓄᐊᒫᑫᐎᓂᓂᐗᐞ ᑳᑮᐃᓂᒥᓐᒡ ᐁᐱᑯᕒᐄᔭᐗᒃ Epicureans ᐃᐃ ᑲᔦ ᐃᔅᑑᐃᑾᒃ Stoics, ᐅᑮᒫᒌ ᑲᑴ ᔖᑰᓱᒥᑰᐞ᙮ ᐋᓂᑕ ᑕᔥ ᑮᐃᑭᑐᐗᐞ: ᐋᓃᓐ ᑕᔥ ᐃᓈ ᐁᑭᑐᒡ ᐊᐊ ᑳᑭᑫᑕᒨᑳᓱᒡ? ᑮᐃᑭᑐᐗᐞ᙮ ᐋᓂᑕ ᑕᔥ ᑲᔦ ᑮᐃᑭᑐᐗᐞ: ᒦ ᐃ ᐁᓂᑖᑯᓯᒡ ᐁᑕᔑᒫᒡ ᒪᔭᑭ ᒪᓂᑑ, ᑮᐃᑭᑐᐗᐞ᙮ ᒦᑕᔥ ᑳᑮᐅᒋ ᐃᑭᑐᓂᒡ ᐋᓃᔥ ᑆᓬ ᐅᑮ ᑕᔑᒫᓐ ᒋᓴᓲᓐ, ᐅᑮ ᑕᔑᑖᓐ ᑲᔦ ᑮᐌ ᐱᒫᑎᓰᐃᑰᐎᓐ᙮ 19 ᐅᑮᒫᒌ ᐐᔖᒥᑰᐞ ᑕᔥ ᐁᑮᐃᔑᐎᓂᑯᒡ ᐆᑌᓈᐎ ᐅᓇᔓᐌᐎᓂᓂᐗᐞ ᑳᑮᐃᔑ ᓂᑖ ᒫᐗᒋᐃᑎᓂᒡ, ᐁᕒᐃᔮᐸᑲᔅ Areopagus ᐱᑾᑎᓈ ᐁᒋᑳᑌᓂᒃ᙮ ᒦᑕᔥ ᐃᐃᒫ ᑳᐃᔑ ᑲᑴᒋᒥᑯᒡ: ᓂᐐ ᑭᑫᑖᒥᓐ ᐅᐅ ᐅᔥᑭ ᑭᑭᓄᐃᑫᐎᓐ ᑳᐐᑕᒫᑫᔭᓐ᙮ 20 ᐋᓂᑕ ᓴ ᑫᑰᓇᓐ ᑳᐐᑕᒪᓐ ᐸᑳᓐ ᓂᑎᓂᑖᒥᓐ, ᓂᐐ ᑭᑫᑖᒥᓐ ᑕᔥ ᐋᓃᓐ ᐁᑭᑑᒪᑲᓄᑴᓇᓐ, ᐅᑮᐃᑰᐞ᙮ 21 ᑲᑭᓇ ᓴ ᐋᑎᓐᔅ ᐌᒌᐙᒡ, ᐃᑭ ᑕᔥ ᑲᔦ ᐸᑳᓐ ᐌᒌᐙᒡ ᐃᐃᒫ ᑳᑮᐃᔑ ᐆᑌᓈᑫᐙᒡ ᑳᐐᓐ ᑫᑰᓐ ᐅᑮᓅᒋᑑᓰᓈᐙ, ᒦ ᐁᑕ ᑯ ᐁᑮ ᑕᔑᑕᒧᐙᒡ, ᐁᑮ ᐱᓯᑕᒧᐙᒡ ᑲᔦ ᐅᔥᑭ ᑫᑰᓇᓐ᙮ 22 ᒦᔥ ᑆᓬ ᑳᑮ ᐸᓯᑸᒡ ᐁᓈᓴᒪᐱᓂᒡ ᑳᑮᒫᐗᒋᐃᑎᓂᒡ ᐃᐃᒫ ᐁᕒᐃᔮᐸᑲᓯᕽ ᐅᐅ ᐁᑮᐃᑭᑐᒡ: ᑮᓇᐙ ᐋᑎᓐᔅ ᐌᒌᔦᒃ! ᒥᓯᐌ ᓴ ᓇᑫ ᓂᑎᔑᐙᐸᑖᓐ ᐁᐊᓇᒥᐁᐎ ᐃᔑᐊᔮᔦᒃ᙮ 23 ᐁᐸᐹᒧᓭᔮᓐ ᓴ, ᐁᐙᐸᑕᒫᓐ ᑲᔦ ᐃᓂᐌᓂᐗᓐ ᐋᑎ ᐁᑕᔑ ᐊᓇᒥᐋᔦᒃ, ᓂᐙᐸᑖᓐ ᑲᔦ ᑳᔑ ᐸᑭᑎᓈᓱᔦᒃ ᐅᐅ ᐁᐃᔑᐲᐃᑳᑌᒃ: ᑳᐸᑭᑎᓇᒪᐎᓐᒡ ᑫᑫᒋᑲᓂᐎᓯᒃ ᒪᓂᑑ᙮ ᐃᐃ ᓴ ᑕᔥ ᑫᑰᓐ ᑳᐊᓇᒥᐁᑕᒣᒃ ᑫᑫᑕᓯᐌᒃ, ᒦ ᐃᐌ ᑳᐐ ᑕᔑᑕᒪᐎᓇᑰᒃ᙮ 24 ᑭᔐᒪᓂᑑ ᐅᑮᐅᔑᑑᓐ ᐊᑮᓂ, ᑲᑭᓇ ᑲᔦ ᑫᑰᓐ ᐃᐃᒫ ᐁᔮᓂᒃ, ᐅᑎᐯᑖᓐ ᑮᔑᒃ, ᐊᑮᓂ ᑲᔦ᙮ ᑳᐐᓐ ᐃᔑᑖᓰ ᐊᓇᒥᐁᐎᑲᒥᑯᕽ ᐅᓂᒌᒫᕽ ᑳᐅᒋ ᐅᔑᒋᑳᑌᓂᒃ᙮ 25 ᑳᐐᓐ ᐊᐎᔭᓐ ᓅᑌᓭᓰ ᒋᐸᒥᐃᑯᐸᓐ, ᑖᐱᔥᑰ ᑫᑰᓐ ᐁᓅᑌᓭᒡ᙮ ᐐᓐ ᐄᑐᒃ ᑳᒦᓈᒡ ᑲᑭᓇ ᐊᐎᔭᓐ ᐱᒫᑎᓯᐎᓐ, ᐸᑭᑕᓈᒧᐎᓐ ᑲᔦ, ᐐᓐ ᑲᔦ ᑲᑭᓇ ᑫᑰᓐ ᑳᒦᑭᐌᒡ᙮ 26 ᐯᔑᒃ ᑕᔥ ᐃᓂᓃᕽ ᐅᑮᐅᒋ ᐅᔑᐋᐞ ᑲᑭᓇ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ ᒥᓯᐌ ᐅᐅᒫ ᐊᑮᕽ ᒋᑕᔑ ᐱᒫᑎᓯᓂᒡ᙮ ᐐᓐ ᐅᑮᐅᓇᑕᒪᐙᐞ ᐋᓃᓐ ᒪᔮ ᐊᐲ, ᐋᓃᑎ ᑲᔦ ᒪᔮ ᑫᔑ ᑲᐯᔑᓂᒡ᙮ 27 ᒦᑕᔥ ᑳᑮᐅᒋ ᐃᔑᒋᑫᒡ, ᐋᑎ ᐱᑯ ᐁᔑ ᐊᑐᓀᐅᑯᒡ, ᒋᒥᑳᑯᒡ᙮ ᑳᐐᓐ ᐄᑐᒃ ᐙᓴ ᑌᓀᑖᑯᓯᓰ᙮ 28 ᐅᐅ ᓴ ᐊᐎᔭ ᑮᐃᑭᑐᑯᐸᓐ: ᐐᓐ ᐄᑐᒃ ᐅᒋ ᑳᐅᒋ ᐱᒫᑎᓯᔭᕽ, ᑳᐅᒋ ᐗᑲᐐᔭᕽ ᑲᔦ, ᑲᔦ ᑕᔥ ᑳᐅᒋ ᐊᔮᔭᕽ᙮ ᒦᓴᐃ ᑳᐃᑭᑐᐙᑯᐸᓀᓐ ᑭᓂᑲᒨᐎᓂᓃᒥᐙᒃ: ᑮᓇᐎᓐᑦ ᓴ ᑭᑑᓃᒑᓂᓯᒥᑯᓈᓐ, ᑮᑭᑑᐙᑯᐸᓐ᙮ 29 ᑭᔐᒪᓂᑑ ᑕᔥ ᐁᐅᓃᒑᓂᓯᒥᓇᕽ, ᑳᐐᓐ ᑭᑖ ᐃᓀᓂᒫᓯᐙᓈᓐ ᐁᑎᓄᐎᒡ ᐅᓵᐙᐱᑯᕽ, ᑯᒫ ᑲᔦ ᐙᐹᐱᑯᕽ ᑳᐅᒋ ᐅᔑᒋᑲᓂᐎᒡ, ᑯᒫ ᑲᔦ ᐊᓯᓐ ᑳᒪᓯᓈᐱᑲᐅᑯᒡ ᐃᓂᓂᐗᐞ ᐁᔑ ᐗᐐᔒᓂᒡ᙮ 30 ᑳᐐᓐ ᐄᑐᒃ ᑭᔐᒪᓂᑑ ᑮᐸᐹᐱᓯᔅᑫᑕᓰ ᐅᑖᓇᕽ ᐁᑮ ᑭᑫᓂᒫᓯᐎᓐᒡ᙮ ᓅᑯᒻ ᑕᔥ ᐐᓐ ᐅᑲᓅᓈᐞ ᑲᑭᓇ ᐯᒫᑎᓯᓂᒡ ᒥᓯᐌ ᐁᔮᓂᒡ ᒋᑴᑭ ᐱᒫᑎᓯᓂᒡ᙮ 31 ᐋᔕ ᐅᔕ ᐅᑮᐅᓇᑑᓐ ᑮᔑᑲᓐ ᐅᑾᔭᒀᑎᓯᐎᓂᕽ ᐁᐐᐅᒋ ᑎᐹᑯᓈᒡ ᑲᑭᓇ ᐊᐎᔭᐞ ᐁᔮᓂᒡ ᐊᑮᕽ, ᐁᐐ ᔮᐸᒋᐋᒡ ᐃᓂ ᐃᓂᓂᐗᓐ ᑳᑮᐅᓈᐸᒫᒡ᙮ ᐐᑫ ᐅᑮᐯᑖ ᓈᑯᑕᒪᐙᓐ ᑲᑭᓇ ᐊᐎᔭᓐ ᐃᐃ ᐁᐐᐃᔑᒋᑫᒡ, ᒦᔥ ᑳᑮᐅᒋ ᑮᐌ ᐱᒫᑎᓰᐋᒡ ᒋᓴᓲᓐ ᓂᐳᐎᓂᕽ ᐅᒋ, ᐅᑮᐃᔑ ᑲᑲᓅᓈᐞ᙮ 32 ᐋᐲ ᑕᔥ ᑆᓬ ᐁᓅᑖᑯᒡ ᐁᑕᔑᑕᕽ ᑮᐌ ᐱᒫᑎᓯᐎᓐ, ᐋᓂᑕ ᑕᔥ ᐅᑮ ᐹᐱᓄᑖᑰᐞ᙮ ᐋᓂᑕ ᑕᔥ ᐐᓐ ᐅᑮᐃᑰᐞ: ᒦᓇᐙ ᓴ ᑭᐐᓅᑖᑰ ᐅᐅ ᒋᑕᔑᑕᒪᓐ, ᐅᑮᐃᑰᐞ᙮ 33 ᒦᑕᔥ ᐃᐃᒫ ᑆᓬ ᑳᐅᒋ ᒫᒑᒡ᙮ 34 ᐋᓂᑕ ᑕᔥ ᐊᐎᔭᐞ ᐅᑮᐐᒌᐎᑰᐞ, ᐁᑮ ᑌᐺᑕᒥᓂᒡ ᑲᔦ᙮ ᐃᓂ ᑕᔥ ᑲᔦ ᐯᔑᒃ ᑳᑮᐅᒋ ᑎᐯᑖᑯᓯᓂᒡ ᐅᓇᔓᐌᐎᓂᕽ ᐁᕒᐃᔮᐸᑲᔅ Areopagus ᑳᔑ ᒫᐗᒋᐃᑎᓂᒡ, ᐃᓂ ᑲᔦ ᐃᑴᐗᓐ ᑖᒪᕒᐃᔅ Damaris ᐁᔑᓂᑳᓱᓂᒡ, ᑯᑕᒃ ᑲᔦ ᐊᐎᔭᐞ ᐅᑮᐐᒌᐎᑰᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society