ᐃᔑᒋᑫᐎᓇᓐ 16 - ᐅᒋᐺ ᑭᒋᒪᓯᓇᐃᑲᓐᑎᒪᑎ ᑮᒫᒌᐐᒌᐙᒡ ᑆᓬᐊᓐ, ᓵᐃᓬᐊᓴᓐ ᑲᔦ 1 ᑆᓬ Paul ᓴ ᑮᐱᑕᑯᔑᓐ ᐃᐃᒫ ᐁᔑ ᐆᑌᓈᐗᓂᓂᒃ ᑕᕒᐱ Derbe, ᓬᐃᔅᑕᕒᐊ Lystra ᑲᔦ ᑳᐃᒋᑳᑌᓂᑭᓐ᙮ ᑮᐊᔮᐗᓐ ᐃᑕᔥ ᐃᐃᒫ ᐯᔑᒃ ᐅᑌᐺᑕᒨᓐ ᑎᒪᑎ Timothy ᐁᔑᓂᑳᓱᓂᒡ᙮ ᐅᒫᒫᓂ ᓴ ᒎ ᑮᑎᓄᐎᑴᐎᐗᓐ, ᐅᑌᑌᓂ ᑕᔥ ᐐᓐ ᑲᕒᐄᒃ Greek ᑮᑎᓄᐎᐗᓐ᙮ 2 ᑲᑭᓇ ᓴ ᐅᑌᐺᑕᒨᒃ ᐁᔮᐙᒡ ᐃᐃᒫ ᓬᐃᔅᑕᕒᐊ ᐆᑌᓈᕽ, ᐋᐃᑰᓂᔭᒻ Iconium ᐆᑌᓈᕽ ᑲᔦ ᐅᑮᒥᓄ ᑕᔑᒫᐙᓐ ᑎᒪᑏᓐ᙮ 3 ᒦᐗᓐ ᑕᔥ ᐃᓂ ᑆᓬ ᑳᑮᐊᑕᐌᓂᒫᒡ ᒋᐐᒌᐎᑯᒡ, ᒦᔥ ᑳᑮ ᑭᑭᓇᐙᑕᔕᑫᔣᒡ᙮ ᒦᑕᔥ ᑳᑮᐅᒋ ᑑᑕᐙᒡ ᐋᓃᔥ ᑲᑭᓇ ᒎᐗᐞ ᐃᐃᒫ ᑳᑮᐊᔮᓂᒡ ᐅᑮ ᑭᑫᑕᒥᓂ ᑎᒪᑏᓐ ᐅᑌᑌᓂ ᑲᕒᐄᒃ ᐁᑮ ᑎᓄᐎᓂᒡ᙮ 4 ᑮᐊᓂ ᐊᔨᔖᐗᒃ ᐃᑕᔥ ᐁᔑ ᐗᐆᑌᓈᐗᓂᓂᒃ, ᐁᑮᐐᑕᒫᑫᐙᒡ ᐋᓃᓐ ᑳᑮᐃᔑ ᐅᓀᑕᒥᓂᒡ ᐃᔑᓂᔕᐙᑲᓇᐞ ᑫᐃᔑᒋᑫᓈᐎᐗᓂᓂᒃ, ᑳᓃᑳᓂᓯᓂᒡ ᑲᔦ ᒉᕒᐆᓴᓬᐊᒥᕽ Jerusalem ᑳᐊᔮᓂᒡ᙮ ᒦᑕᔥ ᑳᑮᐃᓈᐙᒡ ᒋᑲᓇᐌᑕᒥᓂᒡ ᐃᓂ ᐃᓈᑯᓂᑫᐎᓇᓐ᙮ 5 ᐅᑌᐺᑕᒨᒃ ᑕᔥ ᐁᑕᔑ ᒫᒫᐗᒋᐃᑎᐙᒡ ᐊᐗᔑᒣ ᑮᐊᓂ ᒪᔥᑲᐎ ᑌᐺᑕᒨᒃ, ᑮᐊᓂ ᐹᑏᓄᐗᒃ ᑲᔦ ᐁᑕᓱᑮᔑᒃ᙮ ᑆᓬ ᑮᐃᔑᓇᕽ ᒋᐃᔖᒡ ᒐᕒᐆᐗᓯᕽ 6 ᒥᓯᐌ ᑕᔥ ᑮᐃᔖᐗᒃ ᐃᐃᒫ ᐸᕒᐃᒋᔭ Phrygia ᐊᑮᕽ, ᐃᐃᒫ ᑲᔦ ᑲᓬᐁᔑᔭ Galatia ᐊᑮᕽ᙮ ᑳᐐᓐ ᑕᔥ ᐅᑮ ᐸᑭᑎᓂᑯᓰᐙᓐ ᑭᔐᒪᓂᑑᓐ ᐅᑕᒑᑯᓂ ᒋᑕᔑᑕᒧᐙᒡ ᑳᑎᐯᒋᑫᓂᒡ ᐅᑎᑭᑐᐎᓂᓂ ᐁᔑᔭ Asia ᑭᒋ ᐊᑮᕽ᙮ 7 ᐊᐲ ᑕᔥ ᑳᒪᔮᔥᑲᒧᐙᒡ ᒥᔑᔭ Mysia ᐊᑮᕽ ᑮᑲᑴ ᐃᔖᐗᒃ ᐱᑎᓂᔭ Bithynia ᐊᑮᕽ᙮ ᑳᐐᓐ ᑕᔥ ᐅᑮ ᐸᑭᑎᓂᑯᓰᐙᓐ ᒋᓴᓲᓐ ᐅᑕᒑᑯᓂ ᐃᐃᒫ ᒋᐃᔖᐙᒡ᙮ 8 ᐅᑮ ᔖᐳᔥᑳᓈᐙ ᑕᔥ ᒥᔑᔭ ᐊᑭ, ᐌᑎ ᑕᔥ ᑮᐃᔑ ᑕᑯᔑᓅᒃ ᒐᕒᐆᐗᔅ Troas ᐆᑌᓈᕽ᙮ 9 ᐊᐲ ᑕᔥ ᐁᑎᐱᑲᓂᓂᒃ ᑆᓬ ᐅᑮᐙᐸᑖᓐ ᐃᔑᓇᒧᐎᓐ᙮ ᐅᑮᐙᐸᒫᓐ ᐃᓂᓂᐗᓐ ᐁᒪᑗ ᓃᐸᐎᓂᒡ ᒫᓯᑑᓂᔭ Macedonia ᐊᑮᕽ ᐁᐸᑯᓭᓂᒥᑯᒡ ᐅᐅ ᐁᑮᒪᑗᐃᑯᒡ ᐄᓴᓐ: ᐲᔖᓐ ᒋᐱ ᔮᔕᐎᔥᑳᔭᓐ ᒋᐐᒋᐃᔮᕽ, ᐅᑮᐃᑰᓐ᙮ 10 ᐊᐲ ᑕᔥ ᑳᐙᐸᑕᕽ ᐃᐃ ᐃᔑᓇᒧᐎᓐ ᔐᒫᒃ ᐃᑯ ᓂᑮᐅᔒᑖᒥᓐ ᐁᐐᐃᔖᔮᕽ ᒫᓯᑑᓂᔮ ᐊᑮᕽ᙮ ᓂᑮ ᑫᒋᓈᐅᒥᓐ ᑕᔥ ᑭᔐᒪᓂᑑ ᐌᑎ ᐁᑮᐃᔑ ᐊᑐᒥᔭᒥᓐᒡ ᒋᐐᑕᒪᐎᒪᑭᒡ ᒥᓍᒋᒧᐎᓐ ᐌᑎ ᐁᔮᓂᒡ᙮ ᐋᓃᓐ ᓬᐃᑎᔭ ᑳᐃᔑᑴᑳᑎᓯᒡ 11 ᒐᕒᐆᐗᔅ Troas ᐆᑌᓈᕽ ᑕᔥ ᓂᑮᐅᒋ ᒫᒌᔮᔑᒥᓐ ᑎᐌᒃ ᐃᑯ ᓵᒧᑖᕒᐁᔅ Samothrace ᒥᓂᓯᕽ ᐁᑮᐃᔑ ᐸᑲᒫᔑᔮᕽ᙮ ᐁᐊᓂ ᐙᐸᕽ ᐃᑕᔥ ᓂᔮᐳᓬᐃᔅ Neapolis ᐆᑌᓈᕽ ᓂᑮᐃᓈᔑᒥᓐ᙮ 12 ᒦᑕᔥ ᐌᑎ ᑳᐅᒋ ᑯᐲᔮᕽ ᐁᑮᐃᔖᔮᕽ ᐆᑌᓈᕽ ᐱᓬᐃᐹᐃ Philippi ᐁᔑᓂᑳᑌᒃ᙮ ᐃᐃ ᓴ ᐆᑌᓇ ᑮᓃᑳᓀᑖᑾᓐ ᑮᐅᒋ ᑎᐯᑖᑾᓐ ᒫᓯᑑᓂᔮ ᐊᑮᕽ, ᐅᕒᐆᒥᕽ Rome ᑳᐅᒌᐙᒡ ᐅᑮᐅᔑᑑᓈᐙᑯᐸᓐ᙮ ᐹᑏᓄ ᑮᔑᒃ ᑕᔥ ᐃᐃᒫ ᓂᑮᐊᔮᒥᓐ᙮ 13 ᐊᐲ ᑕᔥ ᐁᐊᓉᐲᐎ ᑮᔑᑲᒃ ᓂᑮᐃᔖᒥᓐ ᐊᑾᒌᕽ ᑳᔑ ᐃᔥᒀᑌᒥᐗᕽ ᐆᑌᓇ, ᐁᔑ ᓰᐲᐗᕽ ᐃᓇᑫ ᐁᑮᐃᔖᔮᕽ, ᐁᑮᐃᓀᑕᒫᕽ ᑫᒋᓈᒡ ᒫᐐᓐ ᒋᒥᑲᒫᕽ ᒎᐗᒃ ᐁᑕᔑ ᐊᓇᒥᐋᐙᒡ᙮ ᓂᑮᐅᓇᐱᒥᓐ ᑕᔥ ᐁᑮ ᑲᑲᓅᓇᑭᑣ ᐃᑴᐗᒃ ᐃᐃᒫ ᑳᑮ ᒫᐗᒋᐃᑎᐙᒡ᙮ 14 ᐯᔑᒃ ᑕᔥ ᐃᑴ ᑳᑮ ᐱᓯᑕᐎᔭᒥᓐᒡ ᓬᐃᑎᔭ Lydia ᑮᐃᔑᓂᑳᓱ, ᑕᔭᑕᐃᕒᐊ Thyatira ᐆᑌᓈᕽ ᐁᑮᐅᒌᒡ᙮ ᒦ ᓴ ᑳᐃᓇᓄᑮᒡ ᐁᐊᑖᐙᑫᒡ ᒪᑲᑌᒥᔅᑴᑭᓄᓂ, ᑳᐊᓇᒥᐁᑕᐙᒡ ᑭᔐᒪᓂᑑᓐ ᓴ ᑮᑎᓄᐎ᙮ ᒦᑕᔥ ᑳᑮᒦᓂᑰᐎᓯᒡ ᒋᓂᓯᑐᑕᕽ, ᒋᑌᐺᑕᕽ ᑲᔦ ᑲᑭᓇ ᑆᓬᐊᓐ ᑳᑮᐃᑭᑐᓂᒡ᙮ 15 ᐊᐲ ᑕᔥ ᑳᓰᑲᐊᑖᓱᒡ, ᐃᐃ ᑲᔦ ᐅᑖᐎᓂᕽ ᐁᔮᓂᒡ, ᓂᑮ ᑲᑳᓱᒥᑯᓈᓐ ᐁᑮᐃᔑᔭᒥᓐᒡ: ᑮᔥᐱᓐ ᐁᓇᑭᒥᐌᑴᓐ ᑾᔭᒃ ᐁᑌᐺᔦᓂᒪᒃ ᑳᑎᐯᒋᑫᒡ, ᐲᑎᑫᒃ ᓂᑖᐎᓂᕽ, ᒋᐐᒋᐊᔮᒥᔦᒃ, ᓂᑮᐃᑯᓈᓐ᙮ ᓂᑮ ᑲᔥᑭᒥᑯᓈᓐ ᐃᑕᔥ ᒋᐃᔖᐗᑭᒡ᙮ ᑆᓬ, ᓵᐃᓬᐊᔅ ᑲᔦ ᑮᑭᐸᐅᑣ ᐃᐃᒫ ᐱᓬᐃᐹᐃ ᐆᑌᓈᕽ 16 ᐋᐱᑎᕽ ᑕᔥ ᐁᑮᔑᑲᒃ ᐁᐃᔖᔮᕽ ᐁᑕᔕᓇᒥᐋᓂᐗᕽ, ᓂᑮᒣᒀᔥᑲᐙᓈᓐ ᐅᔥᑭᓃᑭᑴ ᑳᐸᒦᑖᑫᒡ ᐁᑭᑭᔥᑳᑯᒡ ᒪᒋᐊᒑᑾᓐ, ᐁᑮᐃᓂᔥᑳᑯᒡ ᒋᑲᔥᑭᑑᒡ ᒋᐐᑕᕽ ᓃᔮᒃ ᑫᓂ ᐃᔑᓭᓂᒃ᙮ ᓃᐱᐗᐞ ᑮᐅᒋ ᔔᓂᔮᑫᐗᐞ ᐅᑑᑭᒫᒪᐞ ᐊᐊ ᐅᔥᑭᓃᑭᑴ ᐁᑮ ᑲᔥᑭᑑᒡ ᒋᓃᑳᓂᐐᑕᕽ ᐋᓃᓐ ᑫᑰᓐ ᑫᓂ ᐃᔑᓭᓂᒃ᙮ 17 ᒦ ᐊᐌ ᑳᑮ ᐱᒥᓂᔕᐙᒡ ᑆᓬᐊᓐ Paul ᐁᐐᒌᐎᒪᑭᒡ ᐅᐅ ᐁᑮᐃᔑ ᔖᔖᑯᐌᒡ: ᒦᐗᒃ ᓴ ᐅᑯ ᐃᓂᓂᐗᒃ ᑳᐊᓄᑮᑕᐙᐙᒡ ᒫᐗᒡ ᐁᔥᐯᑖᑯᓯᓂᒡ ᑭᔐᒪᓂᑑᓐ, ᑫᐐᑕᒪᐎᓀᒀ ᐋᓃᓐ ᐃᓇᑫ ᑫᔑ ᐱᒫᒋᐃᑰᐎᓯᔦᒃ! ᐁᑮᐃᑭᑐᒡ᙮ 18 ᐹᑏᓄ ᑮᔑᒃ ᑕᔥ ᐅᐅ ᑮᐃᔑᒋᑫᐗᓐ᙮ ᑫᑲᐲ ᑕᔥ ᑆᓬ ᐅᑮᒥᑯᔥᑳᑌᑕᒧᐃᑰᓐ, ᒦᔥ ᑳᑮ ᑴᑭᑳᐸᐎᑕᐙᒡ ᐁᑮᐃᓈᒡ ᐃᓂ ᒪᒋᐊᒑᑾᓐ ᑳᑭᑭᔥᑲᐙᓂᒡ ᐅᔥᑭᓃᑭᑴᐗᓐ: ᒋᓴᔅ X ᐅᐐᓱᐎᓂᕽ ᑭᑎᔑ ᑲᓅᓂᓐ ᒋᓇᑲᓇᒡ ᐊᐊ ᐃᑴ, ᐅᑮᐃᓈᓐ᙮ ᔐᒫᒃ ᐃᑕᔥ ᐅᑮᓇᑲᓈᓂ᙮ 19 ᐊᐲ ᑕᔥ ᐅᔥᑭᓃᑭᑴ ᐅᑑᑭᒫᒪᐞ ᐁᑭᑫᑕᒥᓂᒡ ᐁᐗᓂᑑᓂᒡ ᑳᔑᐊᐯᓂᒧᓄᑖᑯᒡ ᑳᓂᑖ ᐅᒋ ᔔᓂᔮᑫᓂᐸᓐ, ᐅᑮᐅᑎᑎᓈᓂ ᑆᓬᐊᓐ, ᓵᐃᓬᐊᓴᓐ ᑲᔦ᙮ ᐅᑮᐃᔑ ᐙᐐᑯᐱᓈᓂ ᑕᔥ ᐃᐃᒫ ᑳᐃᔑ ᓂᑖ ᑕᓇᑖᐌᕽ ᒣᑴ ᐆᑌᓈᕽ ᐁᔑ ᐊᔮᓂᒡ ᐅᑑᓇᔓᐌᐞ᙮ 20 ᐅᑮ ᐲᓈᓂ ᑕᔥ ᐁᔑ ᐊᔮᓂᒡ ᐅᓇᔓᐌᐎᑭᒫᓐ ᐅᕒᐆᒥᕽ Rome ᑳᐅᒋ ᑎᐯᑖᑯᓯᓂᒡ ᐅᐅ ᐁᑮᐃᓈᓂᒡ: ᐅᑯ ᓴ ᐃᓂᓂᐗᒃ ᑳᒎᐎᐎᐙᒡ ᐗᐙᓀᑕᒥᒋᑫᐗᒃ ᑭᑑᑌᓈᒥᓈᓂᕽ, 21 ᐁᑭᑭᓄᐊᒫᑫᐙᒡ ᐃᔑᑣᐎᓇᓐ ᒋᐅᑖᐱᓇᒧᐗᕽ ᒋᑕᑯ ᐃᔑᒋᑫᐗᕽ ᐃᑕᔥ᙮ ᑳᐐᓐ ᑮᓇᐎᓐᑦ ᐄᑐᒃ ᑭᑖ ᐅᑖᐱᓇᒧᐙᓰᒥᓐ ᐁᑭᑐᐙᒡ ᐋᓃᔥ ᐅᕒᐆᒥᕽ ᑭᑑᒋ ᑎᐯᑖᑯᓯᒥᓐ, ᑮᐃᑭᑐᐗᐞ᙮ 22 ᐃᑭᐌᓂᐗᒃ ᑕᔥ ᑳᑮᒫᒪᐎ ᐊᔮᐙᒡ ᐃᐃᒫ ᑮᑕᑸᐗᒃ ᐁᒦᑳᓂᒥᓐᒡ ᑆᓬᐊᓐ, ᓵᐃᓬᐊᓴᓐ ᑲᔦ᙮ ᐅᓇᔓᐌᐎᑭᒫᒃ ᑮᐊᓅᑮᐗᒃ ᒋᑮᒋᑯᓇᔦᐱᒋᑲᓂᐎᓂᒡ ᒋᐸᐸᔕᔐᐅᒥᓐᒡ, ᒋᐸᐸᑭᑌᐅᒥᓐᒡ ᑲᔦ᙮ 23 ᑳᐃᔥᒀ ᑭᒋ ᐸᐸᔕᔐᐙᐙᒡ ᐃᑕᔥ ᐅᑮᐲᒋ ᐌᐱᓈᐙᐞ ᑭᐸᐅᑏᐎᑲᒥᑯᕽ᙮ ᑲᓇᐌᒋᑫᐎ ᔑᒫᑲᓂᔥ ᑕᔥ ᑮᐊᓅᓈ ᒋᔮᔩᒋ ᑭᐸᐙᒡ ᒋᑲᔥᑭᐅᓯᓂᒃ᙮ 24 ᐊᐲ ᑕᔥ ᐊᐊ ᑲᓇᐌᒋᑫᐎ ᔑᒫᑲᓂᔥ ᐃᐃ ᑳᐃᔑ ᐊᓅᓂᓐᒡ ᐅᑮ ᐲᑎᑫ ᐌᐱᓈᐞ ᒫᐗᒡ ᐊᓈᒥᕽ ᑭᐸᐅᑏᐎᑲᒥᑯᕽ, ᐅᓯᑎᓃᕽ ᑲᔦ ᐁᑮᐃᔑ ᑭᒋᐙᑾᐙᒡ᙮ 25 ᓂᑯᒋ ᑯ ᐁᐊᓂ ᐋᐱᑖᑎᐱᑲᓂᓂᒃ ᑆᓬ, ᓵᐃᓬᐊᔅ ᑲᔦ ᑮᐊᓇᒥᐋᐗᒃ, ᐁᑮᐊᓇᒥᐁ ᓂᑲᒨᑕᐙᐙᒡ ᑲᔦ ᑭᔐᒪᓂᑑᓐ᙮ ᑯᑕᒃ ᑕᑯᓂᑲᓇᐞ ᐅᑮ ᐱᓯᑖᑯᐙᐞ᙮ 26 ᒦᑕᔥ ᐃᐃ ᑴᑕᑐ ᑳᑮᑭᒋ ᑯᔥᑯᓭᒃ ᐊᑭ᙮ ᑮᐗᑲᐎᓭ ᑲᔦ ᑳᑮᐃᔑ ᐸᑕᑭᑌᒃ ᑭᐸᐅᑏᐎᑲᒥᒃ᙮ ᐃᔑᔐᒫᒃ ᑕᔥ ᑲᑭᓇ ᑭᐸᐅᑏᐎ ᐃᔥᒀᑌᒪᓐ ᑮᐹᑭᓭᐗᓐ, ᑲᑭᓇ ᑲᔦ ᐅᒪᒫᒋᑾᐱᓱᐎᓂᐙᓐ ᑮᐸᑭᓭᓂᐗᓐ᙮ 27 ᑲᓇᐌᒋᑫᐎ ᔑᒫᑲᓂᔥ ᑕᔥ ᐁᑯᔥᑯᓭᒡ ᐁᑮᐙᐸᑕᕽ ᐃᔥᒀᑌᒪᓐ ᐁᐹᑭᓯᓂᓂᑭᓐ, ᑮᐃᓀᑕᒻ ᑕᑯᓂᑲᓇᐞ ᐁᑮᒫᒌᐸᐃᐌᓂᒡ᙮ ᒦᑕᔥ ᑳᑮ ᑭᒋᐱᑑᒡ ᐅᐸᔑᐸᐃᑫᐎᑯᒫᓐ ᐁᐐᓂᓯᑎᓱᒡ᙮ 28 ᑆᓬ ᑕᔥ ᐅᑮ ᔖᑯᐙᓈᓐ: ᑫᑯ ᑫᑰᓐ ᑑᑖᓱᑫᓐ! ᑲᑭᓇ ᐅᔕ ᐅᒫ ᓂᑕᔮᒥᓐ, ᐅᑮᐃᓈᓐ᙮ 29 ᑮᐊᓅᑮᐗᓐ ᑕᔥ ᒋᐲᒋᑳᑌᓂᑭᓐ ᐙᓴᑯᓀᒋᑲᓇᓐ, ᒦᔥ ᑳᑮ ᐲᑎᑫᐸᑑᓂᒡ ᐁᑮᐊᓂᒥᑯᑖᓂᒡ ᐁᔑ ᐊᔮᐙᒡ ᑆᓬ, ᓵᐃᓬᐊᔅ ᑲᔦ, ᐁᑮᓂᓂᑭᔥᑳᓂᒡ ᐁᐲᒋᓭᑭᓯᓂᒡ᙮ 30 ᐅᑮ ᓵᑭᓯᐃᑯᐙᓐ ᑕᔥ ᐁᑮᐃᑯᐙᒡ: ᐋᓃᓐ ᑫᐃᔑᒋᑫᔮᓐ ᒋᐱᒫᒋᐃᑯᔮᓐ? ᐅᑮᐃᑯᐙᓐ᙮ 31 ᐅᐅ ᑕᔥ ᐅᑮᐃᔑ ᓇᑴᑕᐙᐙᓐ: ᑌᐺᔦᓂᒻ ᑳᑎᐯᒋᑫᒡ ᒋᓴᔅ, ᒦᑕᔥ ᐃᐃ ᒋᐱᒫᒋᐃᑰᔭᓐ, ᐃᑭ ᑲᔦ ᑭᑖᐎᓂᕽ ᐁᔮᐙᒡ, ᐅᑮᐃᓈᓐ᙮ 32 ᐅᑮ ᑲᑲᓅᓈᐙᓐ ᑕᔥ ᐁᑮᐐᑕᒪᐙᐙᒡ ᐅᑎᑭᑐᐎᓂᓂ ᑳᑎᐯᒋᑫᓂᒡ, ᐃᐃ ᑲᔦ ᑲᑭᓇ ᐃᐃᒫ ᐁᔮᓂᒡ ᐅᑖᐎᓂᓃᕽ᙮ 33 ᔐᒫᒃ ᑕᔥ ᐃᑯ ᐃᐃ ᐊᐲ ᐁᑎᐱᑲᓂᓂᒃ ᑲᓇᑴᒋᑫᐎ ᔑᒫᑲᓂᔕᓐ ᐅᑮᐃᔑᐎᓂᑯᐙᓐ ᐁᑮ ᑭᓰᓯᐸᑑᓂᒡ ᑳᑮᐃᔑ ᐊᔦᓇᑲᓈᓱᐙᒡ᙮ ᔐᒫᒃ ᑕᔥ ᑲᔦ ᑮᓰᑲᐊᑖᓱᐗᓐ, ᐃᓂ ᑲᔦ ᑲᑭᓇ ᐅᑖᐎᓂᓃᕽ ᐁᔮᓂᒡ᙮ 34 ᐅᑮᐃᔑᐎᓂᑯᐙᓐ ᑕᔥ ᐁᔑᑖᓂᒡ ᐁᑮ ᐲᑎᑲᓂᑯᐙᒡ ᐁᑮᐊᑕᒫᑯᐙᒡ ᑫᒦᒋᐙᒡ᙮ ᐐᑫ ᑮᑭᒋ ᒥᓉᑕᒨᓐ ᑲᑭᓇ ᑯ ᐁᑕᔑᓂᒡ ᐋᓃᔥ ᐅᑮ ᑌᐺᔦᓂᒫᓂ ᑭᔐᒪᓂᑑᓐ᙮ 35 ᐁᐊᓂ ᐙᐸᓂᓂᒃ ᑕᔥ ᐅᓇᔓᐌᐎᑭᒫᒃ ᐅᑮᐃᔑᓂᔕᐙᐞ ᐋᓂᑫᐎᑭᒫᐞ ᒋᐊᐎ ᑲᓅᓈᓂᒡ ᑲᓇᐌᒋᑫᐎ ᔑᒫᑲᓂᔕᓐ: ᒦ ᐃ ᐃᔑᐸᑭᑎᓐ ᐃᑭ ᐃᓂᓂᐗᒃ, ᒋᐃᓈᓂᒡ᙮ 36 ᑲᓇᐌᒋᑫᐎ ᔑᒫᑲᓂᔥ ᑕᔥ ᐅᑮᐐᑕᒪᐙᓐ ᑆᓬᐊᓐ ᐁᑮᐃᓈᒡ: ᐅᓇᔓᐌᐎᑭᒫᒃ ᑮᐱ ᐃᑭᑐᐗᒃ ᐱᓵᓐ ᒋᐸᑭᑎᓂᑰᔭᓐ, ᐊᐊ ᑲᔦ ᓵᐃᓬᐊᔅ᙮ ᓵᑲᐊᒧᒃ ᑕᔥ ᐌᐌᓂ ᒋᓂ ᒫᒑᔦᒃ, ᑮᐃᑭᑐᐗᓐ᙮ 37 ᑆᓬ ᐅᐅ ᐅᑮᐃᓈᐞ ᐋᓂᑫᐎᑭᒫᐞ: ᐐᑫ ᓴ ᒧᔐᔭᐄ ᓂᑮ ᐸᐸᔕᔐᐅᑯᓈᓂᒃ, ᑳᐐᓐ ᑲᓇᑫ ᓂᑮ ᑎᐹᑯᓂᑯᓰᓈᓂᒃ, ᐅᕒᐆᒥᕽ Rome ᑕᔥ ᐁᐅᒋ ᑎᐯᑖᑯᓯᐗᑭᒡ᙮ ᑳᐐᓐ ᐃᐃ ᓂᑎᓀᑕᓰ ᒋᐃᔑᓭᑭᐸᓐ᙮ ᐐᓇᐙ ᓴ ᐱᑯ ᓂᑲ ᐱᓈᓯᑳᑯᓈᓂᒃ ᒋᓵᑭᒋ ᐐᒌᐎᔭᒥᑣ, ᐅᑮᐃᓈᐞ᙮ 38 ᐊᓂᑫᐎᑭᒫᒃ ᑕᔥ ᐅᑮᐊᐎ ᐐᑕᒪᐙᐙᐞ ᐅᓇᔓᐌᐎᑭᒫᐞ ᐋᓃᓐ ᑆᓬᐊᓐ ᑳᐃᑭᑐᓂᒡ᙮ ᐐᑫ ᑕᔥ ᑮᓭᑭᓯᐗᐞ ᐊᐲ ᐁᓅᑕᒥᓂᒡ ᐅᕒᐆᒥᕽ ᐁᑮᐅᒋ ᑎᐯᑖᑯᓯᓂᒡ ᑆᓬᐊᓐ ᐃᓂ ᑲᔦ ᓵᐃᓬᐊᓴᓐ᙮ 39 ᑮᐲᔖᐗᐞ ᐃᑕᔥ ᐁᑮᐱ ᑲᑴ ᐙᑲᐎᐃᑯᐙᒡ ᐯᑭᔥ ᐁᑮᐱ ᓵᑭᓯᐃᑯᐙᒡ ᑲᔦ᙮ ᒦᔥ ᑳᑮ ᑲᓅᓂᑯᐙᒡ ᓂᑯᒋ ᐃᒫ ᐆᑌᓈᕽ ᒋᐅᒋ ᐃᔖᐙᒡ᙮ 40 ᑭᐸᐅᑏᐎᑲᒥᑯᕽ ᑕᔥ ᑳᐃᔥᒀ ᐅᒋ ᓵᑲᐊᒧᐙᒡ, ᑮᐃᔖᐗᒃ ᓬᐃᑎᔭᐗᓐ Lydia ᐅᐙᑳᐃᑲᓂᓃᕽ᙮ ᒦᔥ ᐌᑎ ᑳᐃᔑ ᐙᐸᒫᐙᒡ ᐅᑌᐺᑕᒨᐞ ᐁᑮ ᑲᓅᓈᐙᒡ ᒋᒪᔥᑲᐌᑕᒥᓂᒡ᙮ ᒦᔥ ᑳᐊᓂᐃᔑᒫᒑᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society