Aaiseya 9 - ᐅᒋᐺ ᑭᒋᒪᓯᓇᐃᑲᓐᑫᐊᓂᑭᒋᐅᑭᒫᐎᒡ ᐁᑕᔑᓱᒡ 1 ᑳᐐᓐ ᓴ ᐊᐗᔑᒣ ᑫᔮᐱ ᑕᐲᑭᔅᑳᑌᑕᓰᐗᒃ ᐃᑭ ᑳᐗᓯᑖᐎᓭᐙᒡ᙮ ᐃᑭ ᓴ ᐊᑮᕽ ᓭᐱᔪᓬᐊᓐ Zebulun, ᓈᐱᑕᓬᐋᐃ Naphtali ᑲᔦ ᑳᐅᒌᐙᒡ ᐐᑫ ᐅᑖᓈᕽ ᑮᑕᐸᓭᑖᑯᐋᐗᒃ᙮ ᐱᒌᓇᒃ ᑕᔥ ᐅᑕᑮᒥᐙᓐ ᑕᑭᑌᑖᑯᒋᑳᑌᓂ ᐃᐃᒫ ᐁᔮᓂᑭᓐ ᐃᔑ ᓇᓴᐗᔭᐄ ᑭᒋᑲᒦᕽ, ᐲᓂᔥ ᑕᔥ ᐌᑎ ᐊᑳᒥᓰᐱᕽ ᒞᕒᑕᓐ Jordan ᐁᒋᑳᑌᓂᒃ᙮ ᐃᐃ ᓴ ᑲᔦ ᑳᓬᐊᓬᐃᐎ ᐊᑭ Galilee ᑕᑭᑫᑖᑾᓐ ᐁᔑᐊᔮᐙᒡ ᑳᒎᐎᐎᓯᒀ᙮ 2 ᐯᒫᑎᓯᐙᒡ ᓴ ᑳᔑ ᐱᒧᓭᐙᒡ ᑳᔑ ᑲᔥᑮᑎᐱᑲᓂᓂᒃ ᐅᑲ ᐙᐸᑖᓈᐙ ᑳᑭᒋ ᐙᓭᔮᓂᒃ᙮ ᐃᑭ ᓴ ᑳᐃᔑᑖᐙᒡ ᐊᑮᕽ ᑳᔑ ᑲᔥᑮᑎᐱᑲᓂᓂᒃ, ᑳᐙᓭᔮᓂᒃ ᓴ ᐃᐃᒫ ᑕᔑ ᓵᑳᑌᓂ᙮ 3 ᐯᒫᑎᓯᐙᒡ ᑲᔦ ᑭᑕᓂ ᐹᑏᓄᐋᒃ, ᐁᐊᓂ ᐃᔑᐊᑣ ᐋᒌᑫ ᒋᒥᓉᑕᒧᐙᒡ᙮ ᐅᒋ ᒥᓉᑕᒨᒃ ᓴ ᐃ ᑳᑮ ᐃᔑᒋᑫᐊᑣ ᑖᐱᔥᑰ ᑳᔑ ᒥᓉᑕᒧᓈᓂᐗᕽ ᑮᒪᓂᔑᑫᕽ, ᑖᐱᔥᑰ ᑲᔦ ᐊᐎᔭᒃ ᑳᔑ ᒥᓉᑕᒧᐙᒡ ᑮᓀᓈᐗᐆᓂᑎᐙᒡ ᐅᒪᑲᑗᐎᓂᐙᓐ᙮ 4 ᑭᑮ ᐲᑯᓇᒧᐙᓐ ᑲᔦ ᐃᐃ ᐱᒥᐗᓈᓈᒃ ᑫᔮᐱ ᒋᑯᓯᑯᐗᓀᓯᒀ ᐃᐃ ᑲᔦ ᒥᑎᑯᓂ ᑳᑮ ᐸᐸᑭᑌᐅᑯᐙᒡ ᐅᑎᓂᒫᑲᓂᐙᕽ᙮ ᑭᑮ ᔖᑰᒋᐃᒫᐞ ᓴ ᑲᔦ ᑳᑮ ᑲᒀᑕᑭᐃᑯᐙᒡ, ᑳᑮ ᑰᐹᒋᐃᑯᐙᒡ ᐯᒫᑎᓯᓂᒡ ᑖᐱᔥᑰ ᑳᑮ ᐃᔑ ᔖᑰᒋᐃᒪᒡ ᒥᑎᔭᓐ ᑳᑎᓄᐎᓂᒡ Midianites ᒣᐎᔕ᙮ 5 ᑲᑭᓇ ᓴ ᐅᒪᑭᓯᓂᐙᓐ ᔑᒫᑲᓂᔕᒃ, ᑲᑭᓇ ᑲᔦ ᐅᑭᑭᔥᑭᑲᓂᐙᓐ ᑳᒥᔅᑸᐗᓂᓂᑭᓐ ᑕᐊᒀᑭᓯᑳᑌᓂᐗᓐ ᒥᔑᕽ ᒋᐃᓍᑌᓂᑭᓐ᙮ 6 ᑮᐅᒋ ᓂᑖᐎᑭ ᐊᐱᓅᒌᔥ ᑮᓇᐎᓐᑦ ᐅᒋ᙮ ᐅᑯᓯᓯᒫ ᑭᑮ ᒦᓂᑰᒥᓐ! ᐐᓐ ᓴ ᑭᑲ ᑎᐯᓂᒥᑯᓈᓐ᙮ ᒦ ᓴ ᐃ ᑫᐃᔑᓂᑳᓱᒡ, ᑳᒫᒪᑳᑌᑖᑯᓯᒡ ᐅᐐᒋᐃᐌ, ᑳᒪᔥᑲᐌᑖᑯᓯᒡ ᑭᔐᒪᓂᑑ, ᑳᓀᐱᒋᐊᔮᒡ ᐅᑌᑌᒫ, ᑳᑎᐯᑕᕽ ᐱᓵᓂᓯᐎᓐ᙮ 7 ᐃᐃ ᓴ ᑳᐎ ᐃᔑ ᑎᐯᒋᑫᒡ ᒨᔕᒃ ᐃᑯ ᑕᓂ ᓇᑭᓭᓂ, ᐱᓵᓂᓯᐎᓐ ᑲᔦ ᒨᔕᒃ ᑕᐊᔮᓂ ᑫᔑ ᑎᐯᒋᑫᒡ᙮ ᑌᐱᑑᓐ David ᓴ ᐅᑑᑭᒫᐗᐱᐎᓂᓃᕽ ᑕᔑᐊᐱ ᒋᓈᐱᔥᑲᐙᒡ ᑳᑮ ᐃᔑ ᑎᐯᒋᑫᓂᒡ᙮ ᐅᑲ ᐃᔑᓯᑑᓐ ᓴ ᐅᑎᐯᒋᑫᐎᓐ ᑾᔭᒃ ᒋᔑ ᐊᓄᑮᒪᑲᓂᓂᒃ, ᐌᐌᓂ ᑲᔦ ᒋᐃᓈᑯᓂᐌᒪᑲᓂᓂᒃ, ᐊᐲ ᒫᒋᓭᓂᒃ ᐐᑳ ᒋᐴᓂᓭᓯᓂᓂᒃ᙮ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᐃᔑ ᒪᔥᑲᐌᑕᒻ ᐅᐅ ᐁᐐ ᐃᔑᒋᑫᒡ᙮ ᑳᑎᐯᒋᑫᒡ ᐁᐐᓇᓇᐊᓵᒡ ᐃᔅᕒᐃᔭᓬᐊᐞ 8 ᑳᑎᐯᒋᑫᒡ ᓴ ᑮᐃᑭᑐ ᐁᐐ ᐅᓈᑯᓈᒡ ᒉᑲᐴᓐ Jacob ᐅᐲᐌᓰᒥᓂ, ᐃᔅᕒᐃᔭᓬᐊᒃ ᓴ ᐅᑲ ᐸᑲᒥᔥᑳᑯᓈᐙ᙮ 9 ᑲᑭᓇ ᓴ ᐯᒫᑎᓯᐙᒡ ᐅᑲ ᑭᑫᑖᓈᐙ, ᐃᑭ ᐄᐸᕒᐃᔭᒦᕽ Ephraim, ᓴᒣᕒᐃᔭᕽ Samaria ᑲᔦ ᑳᐅᒌᐙᒡ᙮ ᒦᐗᒃ ᐄᑐᒃ ᐃᑭ ᑫᒋ ᐃᓀᓂᑎᓱᐙᒡ, ᐁᐃᔥᐯᓂᑎᓱᐙᒡ ᑳᐅᒋ ᐃᑭᑐᐙᒡ, 10 ᐊᓯᓃ ᐙᑳᐃᑲᓂᑳᓇᓐ ᓴ ᐐᑫ ᑮᓃᓯᓭᐗᓐ, ᐌᒋᑑ ᑕᔥ ᐃᑯ ᐊᓯᓃᒃ ᓂᑲ ᐋᐸᒋᐋᓈᓂᒃ ᒋᑮᐌ ᐅᔑᑑᔮᕽ ᐃᓂ ᐙᑳᐃᑲᓇᓐ᙮ ᓯᑲᒶᕒ Sycamore ᑎᓄᐙᑎᑰᒃ ᑲᔦ ᐋᔕ ᒑᑭ ᑲᐗᐙᐗᒃ, ᓇᐗᒡ ᐁᒥᓍᑯᓯᐙᒡ ᑮᔥᑳᑎᑰᒃ ᓴ ᒣᔥᑾᒡ ᓂᑲ ᐋᐸᒋᐋᓈᓂᒃ᙮ 11 ᑳᑎᐯᒋᑫᒡ ᑕᔥ ᑲᔦ ᐅᑲ ᐃᓇᓯᑕᒪᐙᐞ ᐃᔅᕒᐃᔭᓬᐊᐞ Israel ᒋᒦᑳᓂᑯᓂᒡ ᑳᔒᑫᓂᒥᑯᓂᒡ ᐅᕒᐁᓯᓇᓐ Rezin ᐅᑎᓂᓃᒥᓂ᙮ 12 ᐙᐸᓄᕽ ᓴ ᐃᓇᑫ ᓰᕒᐃᔭ ᐊᑮᕽ ᑕᐱ ᐅᒌᐗᐞ, ᓂᑳᐲᐊᓄᕽ ᐃᑕᔥ ᐃᓇᑫ ᐱᓬᐃᔅᑏ Philistines ᑳᑎᓄᐎᓂᒡ ᑕᐱ ᐅᒌᐗᐞ ᑫᒦᑳᓂᑯᐙᒡ ᐁᐐ ᒑᑭᐃᑯᐙᒡ᙮ ᔖᑰᒡ ᑕᔥ ᑳᐐᓐ ᒪᔑ ᑳᑎᐯᒋᑫᒡ ᐴᓂᑭᑖᓱᓰ; ᑫᔮᐱ ᐁᔒᐱᓂᑫᑖᒡ ᐁᐐ ᓇᓇᐊᔑᐌᒡ᙮ 13 ᐯᒫᑎᓯᐙᒡ ᑕᔥ ᑳᐐᓐ ᐅᑮ ᑮᐌ ᓈᓯᑲᐙᓯᐙᐙᓐ ᐃᓂ ᑳᑮ ᓇᓇᐊᓯᑯᐙᒡ, ᑳᐐᓐ ᑲᔦ ᐅᓇᓈᑐᓀᐙᓯᐙᐙᓐ ᑳᑎᐯᒋᑫᓂᒡ ᑳᒫᐗᒋ ᒪᔥᑲᐎᓰᓂᒡ᙮ 14 ᒦᑕᔥ ᑳᑎᐯᒋᑫᒡ ᑫᐅᒋ ᓇᓇᐊᓵᒡ ᑳᓃᑳᓂᓯᓂᒡ ᐃᔅᕒᐃᔭᓬᐊᐞ ᐯᔑᑯ ᑮᔑᒃ ᒋᑕᔒᐌᐋᒡ᙮ ᒦ ᓴ ᐃ ᑫᐃᓀᑖᑾᓂᓂᒃ ᑖᐱᔥᑰ ᐁᑮᔥᑭᑴᐙᒡ, ᐁᑮᔥᑳᓄᐌᐙᒡ ᑲᔦ, ᑖᐱᔥᑰ ᑳᐃᔑ ᑲᐗᐅᓐᒡ ᐹᒻ ᑎᓄᐙᑎᒃ ᔑᑾ ᒪᔥᑯᓰᐙᑎᒃ᙮ 15 ᐃᑭ ᓴ ᑳᓃᑳᓂᓯᐙᒡ, ᑫᒋ ᐃᓀᑖᑯᓯᐙᒡ ᑲᔦ, ᒦᐗᒃ ᓴ ᐃᑭ ᑳᐃᓂᑣ ᐅᑎᒀᓂᒫᒃ᙮ ᐃᑭ ᑕᔥ ᐐᓐ ᑳᑲᓅᑕᒫᑫᐙᒡ ᑳᑮᐗᓂᒧᐙᒡ, ᒦᐗᒃ ᓴ ᐃᑭ ᑳᐃᓂᑣ ᐅᓱᐎᒫᒃ᙮ 16 ᐃᑭ ᓴ ᑳᑭᑭᓄᐎᓈᐙᒡ ᐯᒫᑎᓯᓂᒡ ᐅᐗᓂᐎᓈᐙᐞ, ᐃᑭ ᑕᔥ ᑫᑭᓄᐎᓂᑣ ᐗᓂᐎᓈᐗᒃ! 17 ᒦᑕᔥ ᑳᑎᐯᒋᑫᒡ ᑳᐅᒋ ᒥᓍᐸᒫᓯᒃ ᐅᔥᑭᓃᑭᐗᐞ, ᐌᒋ ᑰᐹᑌᓂᒫᓯᒃ ᑲᔦ ᑸᐗᔑᔖᓇᐞ ᑮᐙᒋᑴᐗᐞ ᑲᔦ᙮ ᐅᓵᒻ ᐋᓃᔥ ᐁᑕᓱ ᐯᔑᑯᓂᒡ ᐯᒫᑎᓯᓂᒡ ᒪᒋᐃᔑᐌᐱᓯᐗᐞ, ᑳᐐᓐ ᑲᔦ ᐃᔑ ᐱᒫᑎᓯᓰᐗᐞ ᑭᔐᒪᓂᑑ ᐁᔑ ᒥᓴᐌᑕᕽ, ᓅᒋᑯ ᑲᔦ ᐃᔑᑮᔗᐗᐞ᙮ ᔖᑰᒡ ᐃᑕᔥ ᑳᐐᓐ ᑕᐴᓂᑭᑖᓱᓰ ᑳᑎᐯᒋᑫᒡ, ᐁᓃᒥᓂᑫᓂᒡ ᐁᐊᔛᒡ ᐁᐐ ᓇᓇᐊᔑᐌᒡ᙮ 18 ᑌᐺ ᓴ ᒪᒋᐃᔑᐌᐱᓯᐎᓐ ᐃᔥᑯᑌᕽ ᐃᓀᑖᑾᓐ᙮ ᒦ ᓴ ᐃᐃᒫ ᐌᒋ ᐊᒀᑭᑌᑭᓐ ᐐᑾᐲᓐ, ᑳᐎᒥᓇᑲᔒᒃ ᑲᔦ᙮ ᒦ ᓴ ᑲᔦ ᐃᐃᒫ ᑳᓅᐱᒦᐗᕽ ᐌᒋ ᓴᑭᑌᒃ, ᐃᔥᐱᒥᕽ ᐃᓇᑫ ᑳᓂ ᐅᒋ ᑭᒋ ᐃᓈᐸᑌᒃ᙮ 19 ᑳᑎᐯᒋᑫᒡ ᓴ ᑕᔥ ᐁᓂᔥᑳᑎᓯᒡ, ᑳᔑ ᓇᓇᐊᔑᐌᒡ ᓴ ᐃᔥᑯᑌᕽ ᐃᓀᑖᑾᓂᓂ, ᒥᓯᐌ ᐊᑮᕽ ᐁᐃᔑ ᓴᑭᑌᓂᒃ᙮ ᐯᒫᑎᓯᐙᒡ ᓴ ᒥᔑᕽ ᐃᓀᑖᑯᓯᐗᒃ᙮ ᑳᐐᓐ ᑕᔥ ᐊᐎᔭᓐ ᐅᑲ ᒪᓈᒋᐋᓰᓐ ᑳᑮ ᐐᒋᓂᑖᐎᑮᒫᒡ᙮ 20 ᒥᓯᐌ ᓴ ᑯ ᐃᐃᒫ ᐊᑮᕽ ᐯᒫᑎᓯᐙᒡ ᐋᓃᑎ ᐱᑯ ᐃᔑ ᒪᒪᓂᐱᒋᑫᐗᒃ ᐁᒦᒋᐙᒡ ᐋᓃᓐ ᐃᑯ ᑎᓄ ᒦᒋᒻ ᑫᒥᑲᒧᐙᒡ᙮ ᑳᐐᓐ ᐃᑕᔥ ᔖᑰᒡ ᑌᐐᓯᓂᓰᐗᒃ᙮ ᒦ ᓴ ᐱᑯ ᐱᓵᓐ ᐁᔑ ᐊᒸᐙᒡ ᐅᓃᒑᓂᓯᐙᐞ᙮ 21 ᒪᓈᓴᑳᕽ Manasseh ᓴ ᐌᑕᑳᓀᓯᐙᒡ, ᐄᐸᕒᐃᔭᒻ ᐃᑕᔥ ᐌᑕᑳᓀᓯᐙᒡ ᑕᒫᒪᐎᓀᐅᑎᐗᒃ᙮ ᒦᑕᔥ ᒥᒋᓃᔗᐙᓐ ᑫᔑ ᒦᑳᑕᒧᐙᒡ ᒎᑕ ᐊᑮᓂ᙮ ᔖᑰᒡ ᐃᑕᔥ ᑳᐐᓐ ᑳᑎᐯᒋᑫᒡ ᑕᐴᓂᑭᑖᓱᓰ, ᓃᒥᓂᑫᓂ ᐁᐊᔛᒡ ᐁᐐ ᓇᓇᐊᔑᐌᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society