Aaiseya 7 - ᐅᒋᐺ ᑭᒋᒪᓯᓇᐃᑲᓐᐁᑕᔑᑌᓂᒃ ᑳᑮᐃᓈᐎᑎᐸᓀᓐ ᐁᐋᔅ 1 ᐁᐋᔅ Ahaz ᓴ ᑮᑭᒋᐅᑭᒫᐎ ᐃᐃᒫ ᒎᑕ Judah ᐊᑮᕽ, ᑳᑮ ᐅᑌᑌᒡ ᒎᑕᒨᓐ Jotham, ᐅᒥᔔᒥᓴᓐ ᑕᔥ ᔫᓵᔭ Uzziah ᑳᑮ ᐃᔑᓂᑳᓱᓂᒡ᙮ ᒦ ᓴ ᐃ ᐊᐲ ᑳᑮ ᑭᒋᐅᑭᒫᐎᓂᒡ ᓰᕒᐃᔭ Syria ᐊᑮᕽ ᐅᕒᐁᓯᓐ Rezin ᑳᑮ ᐃᔑᓂᑳᓱᓂᒡ, ᐃᓂ ᑲᔦ ᐲᑲ Pekah ᑳᑮ ᐅᑌᑌᓂᒡ ᐅᕒᐁᒪᓬᐋᔭᐗᓐ Remaliah ᑳᑮ ᑭᒋᐅᑭᒫᐎᓂᒡ ᐃᐃᒫ ᐃᔅᕒᐃᔭᓬᐊᑮᕽ, ᒉᕒᐆᓴᓬᐊᒥᕽ ᐁᐱ ᓈᓯᑳᑯᒡ ᐁᐐ ᒦᑳᓂᑯᒡ᙮ ᑳᐐᓐ ᑕᔥ ᐅᑮ ᔖᑰᒋᐃᑯᓰᐞ᙮ 2 ᐊᐲ ᑕᔥ ᒎᑕᐎ ᑭᒋᐅᑭᒫ ᑳᓅᑕᕽ ᔑᒫᑲᓂᔕᐞ ᓰᕒᐃᔭ ᐊᑮᕽ ᐌᒌᓂᒡ ᐁᑮ ᐐᒌᐙᓂᒡ ᐄᐸᕒᐃᔭᒻ Ephraim ᐆᑌᓈᕽ ᑳᑮ ᐅᒌᓂᒡ ᐐᑫ ᓴ ᑮᓭᑭᓯ, ᐃᐃ ᑲᔦ ᐅᐱᒫᑎᓰᒪᐞ᙮ ᑳᐊᐲᑖᓂᒥᓯᐙᒡ ᓴ ᑮᓂᓂᑭᔥᑳᐗᒃ ᑖᐱᔥᑰ ᒥᑎᑰᒃ ᑳᑭᒋ ᐃᔑᐌᐹᔑᐙᒡ᙮ 3 ᐋᐃᓭᔭ Isaiah ᑕᔥ ᐅᑮᐃᑰᓐ ᑳᑎᐯᒋᑫᓂᒡ, ᒫᒑᓐ, ᒫᒌᔥ ᐊᐊ ᑭᑯᓯᔅ ᔑᐋᕒ ᒉᔕᑉ Shear-Jashub ᒋᐊᑕ ᓇᑭᔥᑲᐗᒡ ᐁᐋᔅ ᑭᒋᐅᑭᒫ᙮ ᐌᑎ ᓴ ᑭᑲ ᐃᔑ ᒥᑲᐙ ᒦᑲᓈᕽ ᑳᔑ ᐊᔮᓂᒡ ᑳᐃᔒᑭᓄᑫᓂᒡ, ᑳᔑ ᐴᓂᓭᒃ ᐸᓵᓂᑳᓐ ᑳᐱᒥ ᐃᔑᒋᐙᕽ ᓂᐱ ᐅᑕᐃᐹᓃᕽ ᑳᐅᒋᒋᐙᕽ᙮ 4 ᒦᔥ ᐅᐅ ᑫᐃᓇᒡ, ᐊᔮᒀᒥᓯᓐ, ᑯᔥᒀᐙᑌᑕᓐ, ᑫᑯ ᓭᑭᓯᑫᓐ, ᑫᑯ ᑲᔦ ᒥᑯᔥᑳᑌᑕᑫᓐ᙮ ᐊᐊ ᓴ ᑭᒋᐅᑭᒫ ᐅᕒᐁᓯᓐ ᐃᐃ ᑲᔦ ᐅᔑᒫᑲᓂᔒᒪᐞ ᓰᕒᐃᔭ ᑳᐅᒌᓂᒡ, ᐊᐊ ᑲᔦ ᑭᒋᐅᑭᒫ ᐲᑲ ᐐᑫ ᓂᔥᑳᑎᓯᐗᒃ᙮ ᐃᐃ ᓴ ᑕᔥ ᑳᔑ ᓂᔥᑳᑎᓯᐙᒡ ᑳᐐᓐ ᓇᐗᒡ ᓇᓃᓵᓀᑖᑾᓯᓂᓂ ᐊᐲᒡ ᐐᓐ ᐃᐃ ᑳᐹᔥᑭᓀᔮᐸᑌᒃ ᒥᑎᑯᑳᕽ ᑳᐅᒋ ᓅᓱᑌᓂᒃ᙮ 5 ᐃᑭ ᓴ ᔑᒫᑲᓂᔕᒃ ᓰᕒᐃᔭ ᐌᒌᐙᒡ, ᐃᑭ ᑲᔦ ᐃᔅᕒᐃᔭᓬ ᐌᒌᐙᒡ, ᐃᓂ ᑕᔥ ᑲᔦ ᐃᔅᕒᐃᔭᓬ ᐅᑭᒋᐅᑭᒫᒥᐙᓐ ᑮᐅᓀᑕᒧᒃ ᒪᒋ ᑫᑰᓂᓂ ᐁᐐ ᑑᑕᐎᓀᒀ᙮ ᒦᔥ ᐅᐅ ᐁᑭᑐᐙᒡ, 6 ᑕᑲ ᓴ ᐃᔖᑖ ᒋᐊᐎ ᒦᑳᑕᒪᕽ ᒎᑕ ᐊᑭ, ᐊᐎ ᓭᑭᐋᑖᓂᒃ ᑲᔦ ᐌᑎ ᑳᐊᔮᐙᒡ, ᑮᓇᐎᓐᑦ ᐃᑯ ᒋᓀᓈᐎᓇᒫᑎᔭᕽ᙮ ᑕᑲ ᓴ ᑌᐲᓬ Tabeel ᐅᑯᓯᓴᓐ ᑭᒋᐅᑭᒫᐎᐃᒫᑖᓂᓐ᙮ 7 ᒦᑕᔥ ᐅᐅ ᑳᑎᐯᒋᑫᒡ ᑭᔐᒪᓂᑑ ᐁᑭᑐᒡ, ᑳᐐᓐ ᓴ ᐃ ᑕᐃᔑᓭᓯᓅᓐ, ᑳᐐᓐ ᑲᔦ ᐃᐃ ᑕᐃᔑᐌᐸᓯᓅᓐ, 8 ᐅᓵᒻ ᐋᓃᔥ ᑲᔦ ᓰᕒᐃᔭ ᑳᐐᓐ ᓇᐗᒡ ᓲᑫᑖᑾᓯᓅᓐ ᐊᐲᒡ ᐐᓐ ᐃᐃ ᑎᒫᔅᑲᔅ Damascus ᑳᓃᑳᓀᑖᑾᒃ ᐆᑌᓇ᙮ ᑎᒫᔅᑲᔅ ᐃᑕᔥ ᑲᔦ ᑳᐐᓐ ᐊᐗᔑᒣ ᓲᑫᑖᑾᓯᓅᓐ ᐊᐲᒡ ᐐᓐ ᐊᐊ ᑭᒋᐅᑭᒫ ᐅᕒᐁᓯᓐ Rezin᙮ ᐃᑭ ᑕᔥ ᑲᔦ ᐃᔅᕒᐃᔭᓬᐊᒃ ᓂᑯᑣᓯᒥᑕᓇᔑᓈᓄᐱᐴᓐ 65 ᐃᔑᓭᒃ ᐐᑫ ᑕᐲᑯᓈᑯᓯᐗᒃ, ᑳᐐᓐ ᓴ ᐋᐲᓐᒡ ᐃᑯ ᐊᐎᔭ ᑕᐃᔥᑯᒋᑲᓂᐎᓰ᙮ 9 ᐃᔅᕒᐃᔭᓬ ᓴ ᑲᔦ ᑳᐐᓐ ᓇᐗᒡ ᓲᑫᑖᑾᓯᓅᓐ ᐊᐲᒡ ᐐᓐ ᐃᐃ ᓴᒣᕒᐃᔭ Samaria ᐆᑌᓇ ᑳᓃᑳᓀᑖᑾᓂᓂᒃ, ᓴᒣᕒᐃᔭ ᑕᔥ ᑲᔦ ᑳᐐᓐ ᓇᐗᒡ ᓲᑫᑖᑾᓯᓅᓐ ᐊᐲᒡ ᐐᓐ ᐊᐊ ᑭᒋᐅᑭᒫ ᐲᑲ᙮ ᑮᔥᐱᓐ ᐃᑕᔥ ᑌᐺᔦᑕᓯᐌᒃ, ᑳᐐᓐ ᓴ ᑭᑲ ᓃᐸᐎᓰᒻ᙮ ᐁᑕᔑᒥᓐᒡ ᐃᒫᓂᔪᐁᓬ 10 ᑳᑎᐯᒋᑫᒡ ᑕᔥ ᒦᓇᐙ ᐅᑮ ᑲᓅᓈᓐ ᐁᐋᓴᓐ Ahaz ᐁᑮᐃᓈᒡ, 11 ᑕᑲ ᑲᑴᒋᒻ ᑳᑎᐯᒋᑫᒡ ᑭᑭᔐᒪᓂᑑᒻ ᑫᑰᓂᓂ ᒋᑭᑭᓇᐙᒋᑕᒪᐎᒃ ᒋᐅᒌᓂᒃ ᑭᒋ ᐙᓴ ᐊᓈᒦᕽ ᑳᔑ ᐊᔮᓂᒡ ᓀᐳᓂᒡ, ᑯᒫ ᑲᔦ ᑭᒋ ᐙᓴ ᐃᔥᐱᒥᕽ᙮ 12 ᐁᐋᔅ ᑕᔥ ᑮᐃᔑ ᓇᑴᑕᒻ, ᑳᐐᓐ ᐃᐃ ᓂᐐ ᐃᔑᒋᑫᓰ, ᑳᐐᓐ ᓂᐐ ᑲᑴᒋᐋᓰ ᑳᑎᐯᒋᑫᒡ! 13 ᐋᐃᓭᔭ ᑕᔥ ᐅᐅ ᑮᐃᑭᑐ, ᐱᓯᑕᒧᒃ ᑌᐱᑎᑳᕽ David ᐌᑕᑳᓀᓯᔦᒃ, ᑳᐐᓐ ᐃᓇ ᑌᒥᓂᒃ ᑭᑎᓀᑕᓰᒻ ᐁᑲᑴ ᓅᑌᔑᒣᒀ ᐃᓂᓂᐗᒃ, ᐋᒋᑯ ᑕᔥ ᑲᔦ ᐁᑲᑴ ᓅᑌᔑᒣᒃ ᑭᔐᒪᓂᑑ? 14 ᑳᑎᐯᒋᑫᒡ ᓴ ᐐᓐ ᐃᑯ ᑭᑲ ᐙᐸᑕᐃᒃ ᑫᑭᑭᓇᐙᓵᐸᑕᒧᐗᒡ: ᑳᐯᑭᓯᒡ ᓴ ᐅᔥᑭᓃᑭᑴ ᑕᑭᑭᔥᑲᐙᐙᓱ, ᑸᐎᓭᓴᓐ ᑕᔥ ᐅᑲ ᓂᑖᐎᑭᐋᓐ, ᐃᒫᓂᔪᐁᓬ Immanuel ᐅᑲ ᐃᔑᓂᑳᓈᓐ᙮ 15 ᐊᐊ ᓴ ᑕᔥ ᑸᐎᓭᔅ ᐅᑲ ᒦᒋᓐ ᒎᒎᔖᐳ ᐱᒥᑌᓂ, ᐋᒨᐎ ᓰᓯᐹᑾᑐᓂ ᑲᔦ ᐊᐲ ᑌᐊᐲᑖᑎᓯᒡ ᒋᑭᑫᑕᕽ ᐃᐃ ᑳᐅᓂᔑᔑᓂᓂᒃ, ᐃᐃ ᑲᔦ ᑳᒫᓈᑕᓂᓂᒃ᙮ 16 ᐊᐊ ᓴ ᑸᐎᓭᔅ ᒋᑆ ᑭᑫᑕᕽ ᒋᐋᓇᐌᑕᕽ ᑳᒫᓈᑕᓂᓂᒃ, ᒋᐅᑖᐱᓇᕽ ᑲᔦ ᑳᐅᓂᔑᔑᓂᓂᒃ, ᐃᑭ ᓴ ᓃᔑᓐ ᑭᒋᐅᑭᒫᒃ ᑳᑯᓭᒀ ᐋᔕ ᑕᒪᔕᔥᒀᓂᐗᓐ ᐅᑕᑮᒥᐙᓐ᙮ 17 ᑮᓐ ᓴ, ᐃᑭ ᑲᔦ ᐯᒫᑎᓯᐙᒡ, ᑭᑌᑌ ᑲᔦ ᐅᐙᑳᐃᑲᓂᕽ ᑳᐅᑕᑳᓀᓯᓂᒡ, ᑭᐐ ᑑᑖᑯᐙ ᓴ ᑳᑎᐯᒋᑫᒡ ᐐᑫ ᒋᒫᔑᓭᐌᒃ᙮ ᐊᐗᔑᒣ ᓴ ᑭᑲ ᐃᔑᓭᒻ ᑳᑮ ᐃᔑᓭᓈᓂᐙᑭᐸᓐ ᐃᔅᕒᐃᔭᓬᐃᕽ ᑳᑮ ᐅᒌᐙᒡ ᒎᑕ ᐊᑮᕽ ᑮᐅᒋ ᐸᑫᐙᑯᐸᓀᓐ᙮ ᑭᒋᐅᑭᒫᓐ ᓴ ᐊᓰᕒᐃᔭ Assyria ᑳᐅᒌᓂᒡ ᐅᐅᐌᓂ ᑭᑲᑑᑖᑯᐙ ᑳᔑ ᐊᔮᐌᒃ᙮ 18 ᒦᑕᔥ ᐃᐃ ᐊᐲ ᑮᔑᑲᓂᓂᒃ ᑳᑎᐯᒋᑫᒡ ᒋᑸᔥᑯᔒᒫᒡ ᐄᒋᑉ ᑳᑎᓄᐎᓂᒡ ᒋᐲᔖᓂᒡ᙮ ᐙᓴ ᐃᓴ ᐌᑎ ᐄᒋᐸᑮᕽ ᑳᔑ ᓴᓰᐲᑳᓂᕽ ᑕᐱ ᐅᒌᐗᐞ ᐆᒌᓯᕽ ᒋᐊᐲᒋ ᐹᑏᓄᓂᒡ᙮ ᐃᐃ ᑕᔥ ᑲᔦ ᐊᓰᕒᐃᔭ ᐊᑮᕽ ᑳᐅᒌᓂᒡ ᑖᐱᔥᑰ ᐋᒨᕽ ᑕᐊᐲᒋ ᐹᑏᓄᐗᐞ᙮ 19 ᑲᑭᓇ ᓴ ᑕᔥ ᑕᐲᔖᐗᒃ ᒋᔑ ᑲᐯᔑᐙᒡ ᑳᔑ ᐸᐸᓴᑎᓈᓂᒃ, ᑳᔑ ᑕᑖᔥᑳᐱᑳᓂᒃ, ᑲᔑ ᑲᑲᐎᒥᓇᑭᔒᑳᓂᒃ, ᒥᓯᐌ ᑲᔦ ᑳᔑ ᒪᔥᑯᓰᑳᓂᒃ᙮ 20 ᐃᐃ ᓴ ᐊᐲ ᑮᔑᑲᓂᓂᒃ ᑳᑎᐯᒋᑫᒡ ᐅᑲ ᐃᓍᓈᓐ ᑳᔥᑭᐹᓱᓃᕽ ᐃᓂ ᑭᒋᐅᑭᒫᓐ ᐊᑳᒥᓰᐱ ᐃᔫᐸᕒᐁᑏᔅ Euphrates ᐌᒌᓂᒡ, ᐊᓰᕒᐃᔭ Assyria ᑭᒋᐅᑭᒫᓐ᙮ ᒦᐗᓐ ᑕᔥ ᐃᓂ ᑫᐋᐸᒋᐋᒡ ᒋᑳᔥᑭᐹᑑᓂᒡ ᑮᓂᓯᓯᐙᓐ, ᑭᒦᔖᑯᑳᑖᓂᐙᓐ, ᑭᒦᔑᑑᓈᓂᐙᓐ ᑲᔦ᙮ 21 ᒦᔥ ᐃᐃ ᐊᐲ ᑮᔑᑲᓂᓂᒃ ᐃᓂᓂ ᐅᑲ ᑲᔥᑭᑑᓐ ᒋᑲᓇᐌᓂᒫᒡ ᐯᔑᒃ ᐱᔑᑮᓴᓐ, ᓃᔑᓐ ᑲᔦ ᒫᓇᑎᑾᐞ᙮ 22 ᐃᐃ ᑕᔥ ᑫᐊᐲᒋ ᐌᓅᒋᓭᒡ ᐃᐃ ᒎᒎᔖᐴᓂ ᐐᑫ ᑕᔥ ᐃᑯ ᑕᑌᐱᓭ ᒎᒎᔖᐳ ᐱᒥᑌᓂ᙮ ᐃᑭ ᑕᔥ ᑲᔦ ᑫᐃᔥᑸᐙᒡ ᐃᐃᒫ ᐊᑮᕽ ᑕᑌᐱᓭᐗᒃ ᒋᒦᒋᐙᒡ ᒎᒎᔖᐳ ᐱᒥᑌ ᐃᐃ ᑲᔦ ᐋᒨᐎ ᓰᓯᐹᑾᑦ᙮ 23 ᐃᐃ ᓴ ᑕᔥ ᐊᐲ ᑮᔑᑲᒃ ᑭᑎᑫᐗᑲᒥᑰᓐ ᔔᒥᓇᒃ ᑳᔑ ᑭᑎᑳᓱᐙᒡ, ᒣᒥᑖᔂᒃ ᔔᒥᓈᑎᑰᒃ ᐁᑕᑕᔑᐙᒡ ᒥᑖᔂᒃ ᐙᐹᐱᑯ ᔔᓂᔮᕽ ᐁᐊᐲᑌᑖᑾᑭᓐ᙮ ᐃᓂ ᓴ ᐐᑾᐲᓐ, ᑳᐎᒥᓇᑲᔒᓐ ᑲᔦ ᒣᔥᑾᒡ ᐃᐃᒫ ᑕᑭᐳᑭᓅᓐ ᑭᑎᑫᐗᑲᒥᑯᕽ᙮ 24 ᑫᐊᐲᒋ ᐐᑾᐲᑳᓂᒃ ᑕᔥ ᑲᔦ ᑫᐊᐲᒋ ᑳᐎᒥᓇᑲᔒᑳᓂᒃ, ᐃᐃᒫ ᒥᓯᐌ ᐊᑮᕽ᙮ ᒦᑕᔥ ᐃᒫ ᐃᓂᓂᐗᒃ ᑫᐃᔑᐎᓈᐙᒡ ᐅᒥᑎᒀᐲᐙᐞ, ᐅᐱᒀᑯᐙᓐ ᑲᔦ ᒋᐊᑕᐌᒋᑫᐙᒡ᙮ 25 ᐃᓂᐌᓂᐗᓐ ᑕᔥ ᑲᔦ ᑳᐸᐲᑾᑎᓈᑭᓐ, ᑳᑮ ᐃᔑ ᓂᑖ ᑭᑎᑫᓈᓂᐗᑭᐸᓐ ᑳᐐᓐ ᓴ ᐌᑎ ᑕᐃᔖᓂᐗᓯᓅᓐ ᑫᐊᐲᒋ ᐐᑾᐲᑳᒃ, ᑫᐊᐲᒋ ᑳᐎᒥᓇᑲᔒᑳᒃ ᑲᔦ᙮ ᒦ ᓴ ᐌᑎ ᒣᔥᑾᒡ ᐱᔑᑭᐗᒃ ᑫᐸᐹᑕᓇᒋᑫᐙᒡ, ᒥᓯᐌ ᒫᓇᒑᓂᔕᒃ ᑫᐃᔑ ᐸᐹᒧᓭᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society