Aaiseya 66 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐁᓈᑯᓈᒡ ᐯᒫᑎᓯᓂᒡ 1 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᑭᒋᑮᔑᒃ ᓴ ᓂᑑᑭᒫᐗᐱᐎᓐ, ᐃᐃ ᓴ ᐊᑭ ᒦ ᐃᐌ ᓂᑕᐱᓯᑌᐱᐎᓐ᙮ ᐋᓃᑎ ᑕᔥ ᐃᐃ ᐙᑳᐃᑲᓐ ᑳᐐ ᐅᔑᑕᒪᐎᔦᒃ? ᐋᓃᑎ ᑕᔥ ᑫᔑ ᐊᓉᐱᔮᓐ᙮ 2 ᓃᓐ ᐄᑐᒃ ᐃᓈ ᓂᓂᒌᕽ ᐅᓄ ᑲᑭᓇ ᓂᑮ ᐅᒋ ᐅᔑᑑᓇᓐ, ᒦᔥ ᑳᑮ ᐊᔮᑭᓐ᙮ ᒦ ᓴ ᐗᐊ ᑳᐃᔥᐯᓂᒪᒃ, ᐊᐎᔭ ᑳᑕᐸᓭᓂᒧᒡ, ᑳᐲᑯᑌᐁᔦᑕᕽ, ᑳᓂᓂᑭᔥᑳᒡ ᐁᓅᑕᕽ ᓂᑎᑭᑐᐎᓐ᙮ 3 ᐐᓇᐙ ᑕᔥ ᐱᑯ ᐅᑑᓈᐸᑖᓈᐙ ᐋᓃᓐ ᐙᐃᔑᒋᑫᐙᒡ᙮ ᐊᐊ ᓴ ᐊᐎᔭ ᑳᓂᓵᒡ ᐋᐯ ᐱᔑᑭᐗᓐ ᐁᐐ ᐸᑭᑎᓈᔂᑫᒡ, ᒦ ᓴ ᐁᓀᓂᒪᒃ ᑖᐱᔥᑰ ᐊᐎᔭ ᑳᓂᓵᒡ ᐃᓂᓂᐗᓐ᙮ ᐊᐊ ᓴ ᑲᔦ ᑳᐸᑭᑎᓈᔂᑫᒡ ᒫᓇᒑᓂᔐᓴᓐ ᒦ ᓴ ᐁᔑᓈᑯᓯᒡ ᑖᐱᔥᑰ ᐊᐎᔭ ᑳᐴᑯᑴᓈᒡ ᐊᓂᒨᓐ᙮ ᐊᐊ ᓴ ᑲᔦ ᑳᐸᑭᑎᓇᕽ ᐸᑴᔑᑲᓂᒥᓇᓐ ᒦ ᓴ ᐃ ᐁᓀᑖᑾᓂᓂᒃ ᐁᐸᑭᑎᓇᕽ ᑰᑰᔑᐎ ᒥᔅᑸᓂ᙮ ᐊᐊ ᓴ ᑲᔦ ᑳᒥᓈᓯᑫᒡ ᒦ ᓴ ᐃ ᐁᓀᑖᑾᓂᓂᒃ ᐁᔑᒋᑫᒡ ᑖᐱᔥᑰ ᐁᐊᓇᒥᐁᑕᐙᒡ ᒪᓂᑑᑳᓇᓐ᙮ ᐐᑫ ᓴ ᐱᑯ ᒥᓉᑕᒨᒃ ᐁᐃᔑᒋᑫᐙᒡ ᑫᒀᓂᓴᑫᑖᑾᓂᓂᑭᓐ᙮ 4 ᓃᓐ ᐃᑕᔥ ᐃᑯ ᓂᑲ ᐅᓀᑕᒧᐙᓐ ᐋᓃᓐ ᑫᔑ ᓇᓇᐊᓴᒀ, ᒋᐃᔑᓭᐙᒡ ᐃᓂᐌᓂᐗᓐ ᑳᓇᓃᓵᓀᑕᒧᐙᒡ᙮ ᓂᑖᓇᑮ ᑲᓅᓈᒃ ᐋᓃᔥ, ᑳᐐᓐ ᐃᑕᔥ ᐊᐎᔭ ᓂᑮ ᓇᑴᑖᑯᓰ, ᐋᓇᑮ ᑮᑭᑐᔮᐹᓐ, ᑳᐐᓐ ᐊᐎᔭ ᓂᑮ ᐱᓯᑖᑯᓰ᙮ ᒦ ᓴ ᑳᐃᔑ ᒪᒋᐃᔑᒋᑫᐙᒡ ᐁᓈᓴᒦᐗᒃ᙮ ᐅᑮ ᐅᓀᑖᓈᐙ ᐁᐐ ᐃᔑᒋᑫᐙᒡ ᑳᔒᑫᑕᒧᐗᒃ, ᐃᑭᑐ ᑳᑎᐯᒋᑫᒡ᙮ 5 ᓅᑕᒧᐙᒃ ᑳᑎᐯᒋᑫᒡ ᐁᓂᓀᒃ, ᑮᓇᐙ ᑳᑯᑖᓀᑕᒧᐌᒃ ᐅᑎᑭᑐᐎᓐ, ᑮᒋᑭᐌᔨᐙᒃ ᑳᔒᑫᓂᒥᓀᒀ, ᑳᐐᒌᐎᓯᓄᐎᓀᒀ ᑲᔦ ᐋᓃᔥ ᑭᑭᑌᑕᒧᐙᒻ ᑳᑎᐯᒋᑫᒡ ᐅᐐᓱᐎᓐ᙮ ᒦᔥ ᐅᐅ ᐁᓂᓀᒀ, ᑕᑲ ᓴ ᑳᑎᐯᒋᑫᒡ ᑕᑭᒋ ᐃᓀᓂᒫ ᒋᐙᐸᑕᒫᕽ ᑭᒥᓉᑕᒧᐎᓂᐙ! ᐐᓇᐙ ᓴ ᐐᓐ ᑕᐊᑲᒋᐋᐗᒃ᙮ 6 ᐃᓇᔥᑫ ᑕᔥ ᐊᑐᑕᒧᒃ ᐁᓂᑖᑾᒃ ᐌᑎ ᑭᒋ ᐆᑌᓈᕽ, ᑭᒋ ᐊᓇᒥᐁᐎᑲᒥᑯᕽ ᓴ ᑕᓂᑖᑾᓐ! ᒦ ᓴ ᐃᐌ ᑳᐃᓂᑖᑾᒃ ᑳᑎᐯᒋᑫᒡ ᐁᑮᐌ ᑎᐸᐊᒪᐙᒡ ᑳᔒᑫᓂᒥᑯᒡ ᐋᓃᓐ ᐁᔑ ᑲᔥᑭᑕᒫᓱᓂᒡ! 7 ᒉᕒᐆᓴᓬᐊᒻ Jerusalem ᓴ ᒦ ᐃ ᐁᔑᓈᑾᒃ ᑖᐱᔥᑰ ᐃᑴ ᑳᓂᑖᐎᑭᓈᐗᓱᒡ ᒋᑆ ᐐᓴᑫᑕᕽ ᑸᐎᓭᓴᓐ ᑳᐊᔮᐙᒡ᙮ 8 ᐐᑳ ᓇ ᐊᐎᔭ ᐅᓅᑖᓐ ᐅᐅ ᒋᐃᔑᓭᓂᒃ, ᑫᑰᓇᓐ ᑲᔦ ᒋᐙᐸᑕᕽ ᒋᐃᔑᓭᓂᑭᓐ? ᑯᓂᑫ ᓴ ᐯᔑᑴᐙᓐ ᐯᒫᑎᓯᐙᒡ ᐊᑮᕽ ᐁᔮᐙᒡ ᐯᔑᑯ ᑮᔑᒃ ᑕᐅᑯᓂᑖᐎᑭᐗᒃ? ᐃᓇᔥᑫ ᓴ ᐐᓐ ᓵᔭᓐ Zion ᑳᐐᓐ ᑭᓉᔥ ᑕᐐᓴᑫᑕᒨᒪᑲᓯᓅᓐ, ᒦ ᐃ ᐋᔕ ᒋᓂᑖᐎᑭᐋᒡ ᐅᓃᒑᓂᓴᐞ᙮ 9 ᒦ ᓇ ᑕᔥ ᐁᐃᔑᒋᑫᔮᓐ ᐊᐎᔭ ᐁᐅᑎᓵᐸᑕᒧᐊᒃ ᒋᓂᑖᐎᑭᓈᐗᓱᒡ, ᒋᐸᑭᑎᓈᓯᐗᑭᐸᓐ ᐃᑕᔥ ᐱᓵᓐ ᒋᓂᑖᐎᑭᓈᐗᓱᒡ? ᐃᑭᑐ ᑳᑎᐯᒋᑫᒡ᙮ 10 ᐐᒋ ᒥᓉᑕᒨᑕᒧᒃ ᓴ ᒉᕒᐆᓴᓬᐊᒻ ᒋᒌᑫᑕᒣᒃ ᑮᓇᐙ ᑲᑭᓇ ᑳᓵᑭᑑᔦᒃ᙮ ᐐᑫ ᐅᒋ ᒌᑫᑕᒧᒃ ᑮᓇᐙ ᑳᑮ ᒪᐎᑕᒣᒃ᙮ 11 ᒦ ᓴ ᐃ ᑫᐃᓀᑖᑾᒃ ᐃᐃᒫ ᐅᒎᒎᔑᒥᕽ ᐁᐅᒋ ᓅᓂᔦᒃ, ᒋᑌᐱᓇᐌᓯᔦᒃ, ᐐᑫ ᓴ ᐱᑯ ᒋᑌᐱ ᓅᓂᔦᒃ ᑳᔑ ᐌᓅᒋᑑᒡ ᒎᒎᔖᐴᓂ᙮ 12 ᒦ ᓴ ᐅᐅᐌᓂ ᑳᑎᐯᒋᑫᒡ ᐁᑭᑐᒡ, ᑭᑲ ᒦᓂᓂᓂᒻ ᓴ ᐱᓵᓂᓯᐎᓐ ᑖᐱᔥᑰ ᓰᐱ ᐱᓵᓐ ᑳᐱᒥᒋᐗᕽ᙮ ᑳᔑ ᐌᓅᑎᓯᐙᒡ ᑲᔦ ᑯᑕᒃ ᐯᒫᑎᓯᐙᒡ ᑭᑲ ᑌᐱᓈᒻ ᒋᐃᓀᑖᑾᒃ ᑖᐱᔥᑰ ᑳᐲᒋᒋᐗᕽ ᓰᐱ᙮ ᒦ ᓴ ᐃ ᑫᐃᓀᑖᑯᓯᔦᒃ ᑖᐱᔥᑰ ᐊᐱᓅᒌᔥ ᑳᓅᓂᐃᑯᒡ ᐅᒫᒫᓐ, ᑳᐸᐹᒥᐎᓂᓐᒡ ᑲᔦ, ᑳᑕᑕᑯᓂᓐᒡ ᑲᔦ ᐅᒌᑾᓂᒫᕽ᙮ 13 ᑖᐱᔥᑰ ᓴ ᐅᒫᒫᒫ ᑳᓇᐁᑕᒧᐋᒡ ᐅᓃᒑᓂᓴᓐ ᒦ ᓴ ᐃᓇᑫ ᐯᔑᑾᓐ ᑫᔑ ᓇᐁᑕᒥᐃᓇᑰᒃ ᐃᐃᒫ ᒉᕒᐆᓴᓬᐊᒥᕽ᙮ 14 ᐊᐲ ᑕᔥ ᐅᐅ ᐙᐸᑕᒪᓐ ᐃᔑᓭᒃ ᐐᑫ ᓴ ᑭᑲ ᒥᓉᑖᒻ ᑭᑌᐃᐙᕽ, ᒦᔥ ᒋᐊᓂ ᒫᒌᑭᔦᒃ ᑖᐱᔥᑰ ᒪᔥᑯᓰᓐ᙮ ᒦᑕᔥ ᑳᑎᐯᒋᑫᒡ ᒋᑭᑫᑖᑯᓯᒡ ᐁᐐᒋᐋᒡ ᐅᑕᓄᑮᐋᑲᓇᐞ, ᒋᑭᑫᑕᒥᓂᒡ ᑲᔦ ᐃᐃ ᑳᔒᑫᓂᒥᑯᒡ ᐅᓂᔥᑳᑎᓯᐎᓐ᙮ 15 ᑳᑎᐯᒋᑫᒡ ᓴ ᑕᔥ ᐲᔖᒡ ᑕᐃᔥᑯᑌᐌᑖᑯᓯ, ᐅᑑᑖᐹᓈᑾᓐ ᐱᔑᐱᒋᒎᔑᕽ ᐁᓀᑖᑯᓯᓂᒡ ᐁᐐ ᓇᓇᐊᓵᒡ ᐃᐃ ᓀᔥᑭᐃᑯᒡ ᐅᑎᔥᑯᑌᒻ ᐁᐐ ᐋᐸᒋᑑᒡ᙮ 16 ᐃᔥᑯᑌᓂ ᓴ, ᐸᔑᐸᐃᑫᐎᑯᒫᓐ ᑲᔦ ᐅᑲ ᐋᐸᒋᑑᓐ ᐊᐲ ᑳᑎᐯᒋᑫᒡ ᐅᓈᑯᓈᒡ ᑲᑭᓇ ᐯᒫᑎᓯᓂᒡ᙮ ᐋᐱᒋ ᓴ ᑕᐹᑏᓄᐗᐞ ᑫᓂᓵᒡ᙮ 17 ᒦ ᐅᐌ ᐁᑭᑐᒡ ᑳᑎᐯᒋᑫᒡ, ᒦ ᐅᔕ ᐃ ᐋᔕ ᐁᐅᒋᒋᓭᓂᒃ ᐃᑭ ᑳᐯᑭᐃᑎᓱᐙᒡ ᐁᐐ ᐊᓇᒥᐁᑕᐙᐙᒡ ᐸᑳᓐ ᒪᓂᑑᐞ ᒋᓂᔑᐗᓈᒋᐃᑣ᙮ ᑳᐱᒥᓂᔕᐙᐙᒡ ᐃᐃ ᐁᔖᓂᒡ ᐁᔑ ᑭᑎᑫᐎᓐᒡ ᑳᐊᒸᓂᒡ ᑰᑰᔕᐞ, ᑭᒋ ᐙᐱᑯᔒᔕᐞ ᑲᔦ, ᐃᓂ ᑲᔦ ᑫᑰᓇᓐ ᑳᒪᓈ ᒦᒋᓈᑳᑌᓂᑭᓐ᙮ ᑕᓂᔑᐗᓈᒋᐋᐗᐞ ᓴ ᑲᔦ ᐃᐃ᙮ 18 ᓂᑭᑫᓂᒫᒃ ᐄᑐᒃ ᐋᓃᓐ ᐁᔑᒋᑫᐙᒡ, ᐋᓃᓐ ᑲᔦ ᐁᔑ ᓈᓈᑲᑕᐌᑕᒧᐙᒡ᙮ ᐋᔕ ᐅᔕ ᐅᒋᒋᓭᓂ ᒋᒫᐗᑑᓇᒀ ᑲᑭᓇ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᐁᑕᓱ ᐃᔑᑮᔗᐙᒡ᙮ ᒦᔥ ᒋᐙᐸᑕᒧᐙᒡ ᓂᑭᒋ ᐃᓀᑖᑯᓯᐎᓐ ᐊᐲ ᐲᔖᐙᒡ᙮ 19 ᐋᓂᑕ ᑕᔥ ᓂᑲ ᐱᒫᒋᐋᒃ᙮ ᒦᐗᒃ ᐃᑕᔥ ᐃᑭ ᑫᐃᔑᓂᔕᐗᒀ ᐁᔑᐊᔮᓂᒡ ᑯᑕᒃ ᐯᒫᑎᓯᓂᒡ ᐙᓴ ᑲᔦ ᒥᓂᓯᕽ ᑳᐊᔮᓂᒡ ᒪᔑ ᑳᓅᑕᓯᓂᒃ ᐁᔑ ᑭᑌᑖᑯᓯᐗᒃ, ᒪᔑ ᑲᔦ ᑳᐙᐸᑕᓯᓂᒃ ᓂᑭᒋ ᐃᓀᑖᑯᓯᐎᓐ, ᐁᔑ ᒪᔥᑲᐌᑖᑯᓯᐗᒃ ᑲᔦ᙮ ᒦᑕᔥ ᐌᑎ ᑫᐃᔖᐙᒡ ᑖᕒᔑᔥ Tarshish ᑲᔦ ᓬᐃᐱᔭ Libya ᐊᑮᕽ, ᔑᑾ ᓬᐃᑎᔭ Lydia ᑳᑎᓄᐎᓂᒡ ᑳᓇᑲᒋᐋᓂᒡ ᒥᑎᒀᐲᓐ, ᑲᔦ ᑑᐸᓬ Tubal ᔑᑾ ᑲᕒᐄᔅ Greece ᐊᑮᕽ᙮ ᒦᑕᔥ ᐌᑎ ᑫᔑ ᑕᔑᑕᒧᐙᒡ ᓂᑭᒋ ᐃᓀᑖᑯᓯᐎᓐ ᒣᑴᔭᐄ ᐁᔑᐊᔮᓂᒡ ᑯᑕᒃ ᐯᒫᑎᓯᓂᒡ᙮ 20 ᒦᐗᒃ ᓴ ᐃᑭ ᑫᐱᑮᐌᐎᓈᐙᒡ ᑮᒋᐱᒫᑎᓰᐗᐞ ᒋᐅᒋᐎᓈᐙᒡ ᐁᔑᐊᔮᓂᒡ ᑯᑕᒃ ᐯᒫᑎᓯᓂᒡ᙮ ᒦᐗᐞ ᐃᑕᔥ ᐃᐃ ᑫᐃᓍᓈᐙᒡ ᑫᒦᓂᑰᐗᒃ᙮ ᒥᑕᑎᒨᐞ ᓴ ᐅᑲ ᐋᐸᒋᐋᐙᐞ, ᔔᔔᒥᑕᑎᒨᐞ ᑲᔦ, ᐱᒀᐎᑲᓀ ᒥᑕᑎᒨᐞ ᑲᔦ, ᒦᑳᓱᐎ ᐅᑖᐹᓈᑾᐞ, ᐅᑖᐹᓈᑾᐞ ᐃᑯ ᑲᔦ ᒋᐲᓈᐙᒡ ᐃᐃᒫ ᑳᐃᔑ ᑭᑌᑖᑾᓂᓂᒃ ᐗᒌᕽ ᒉᕒᐆᓴᓬᐊᒥᕽ᙮ ᒦ ᓴ ᐃ ᑫᐃᔑᓈᑯᓯᐙᒡ ᑖᐱᔥᑰ ᑎᓄ ᐃᔅᕒᐃᔭᓬᐊᒃ ᑳᐲᑑᐙᒡ ᐸᑴᔑᑲᓂᒥᓇᓐ ᐃᐃᒫ ᑭᒋ ᐊᓇᒥᐁᐎᑲᒥᑯᕽ ᑳᔑ ᐊᓇᒥᐁ ᐯᑲᑭᑌᓂᑭᓐ ᐊᒋᑲᓂᕽ᙮ 21 ᓂᑲ ᑲᑮᑭᓈᒃ ᓴ ᐋᓂᑕ ᒋᐊᓇᒥᐁᐎᑭᒫᐎᐙᒡ, ᐋᓂᑕ ᑲᔦ ᓬᐄᐹᐃ ᑳᐅᑕᑳᓀᓯᐙᒡ ᒋᐃᓇᑭᓱᐙᒡ, ᐃᑭᑐ ᑳᑎᐯᒋᑫᒡ᙮ 22 ᑖᐱᔥᑰ ᓴ ᐅᔥᑭ ᐊᑭ, ᐅᔥᑭ ᑮᔑᑰᓐ ᑲᔦ ᑫᔑ ᔕᔒᐱᐊᔮᑭᓐ ᓂᒪᔥᑲᐎᓰᐎᓂᕽ ᐁᓈᓴᒦᐗᒃ, ᒦ ᓴ ᐃ ᐯᔑᑾᓐ ᐃᓇᑫ ᑭᐐᓱᐎᓐ, ᐃᑭ ᑲᔦ ᑭᐲᐌᓰᒪᒃ ᑫᔑ ᔕᔒᐱ ᐊᔮᐙᒡ᙮ 23 ᒦ ᓴ ᐅ ᑳᑎᐯᒋᑫᒡ ᐁᑭᑐᒡ, ᐁᑕᓱ ᐅᔥᑲᑰᒋᓂᓂᒡ ᓴ ᑎᐱᑭᑮᓯᓲᓐ, ᐁᑕᓱ ᐊᓉᐲᐎ ᑮᔑᑲᓂᓂᒃ ᑲᔦ ᑲᑭᓇ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᓂᑲᐱ ᓈᓯᑳᑰᒃ ᒋᐊᓂᒥᑯᑖᐙᒡ ᐁᔑᐊᔮᐗᒃ᙮ 24 ᐅᐅᒫ ᑕᔥ ᐊᓂ ᐅᒋ ᒫᒑᐙᒡ ᐅᑲ ᐙᐸᒫᐙᐞ ᑳᓂᐳᓂᒡ ᒋᐱᒥᔑᓂᓂᒡ ᐃᐃ ᑳᑮ ᔕᔒᐱᑕᐎᒥᒡ᙮ ᐅᑴᐞ ᑲᔦ ᑳᐊᒧᑯᓂᒡ ᑳᐐᓐ ᑕᓂᐳᓰᐗᐞ, ᑳᐐᓐ ᑕᐋᑕᐌᓯᓂᓂ ᐃᔥᑯᑌᓂ ᑳᔑ ᒑᑭᓱᓂᒡ᙮ ᐐᑫ ᓴ ᑯ ᐅᑲᒀᓂᓴᑭᓈᑯᓂ ᐃᐃ ᑫᐙᐸᒥᑯᓂᒡ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ, ᐃᑭᑐ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society