Aaiseya 63 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐁᔑᔖᑰᒋᐋᒡ ᑯᑕᒃ ᐯᒫᑎᓯᓂᒡ 1 ᐊᐌᓀᓐ ᓴ ᑕᔥ ᐊᐊ ᑳᐱᐅᒋ ᑕᑯᔑᕽ ᐹᔅᕒᐊ Bozrah ᐆᑌᓈᕽ, ᐄᑕᒻ Edom ᐊᑮᕽ ᑳᒥᔅᑾᑎᑌᓂᑭᓐ ᐅᑭᑭᔥᑭᑲᓇᓐ᙮ ᐊᐌᓀᓐ ᓴ ᐊ ᑳᐱᓈᑯᓯᒡ ᑳᒥᓄᑯᓇᔦᒡ, ᑳᑭᒋ ᒪᔥᑲᐌᑖᑯᓯᒡ ᑲᔦ? ᓃᓐ ᐅᔕ ᐊᐊ ᑳᑾᔭᑯ ᑮᔗᔮᓐ, ᑳᒪᔥᑲᐌᑖᑯᓯᔮᓐ ᒋᐱᒫᒋᐃᐌᔮᓐ᙮ 2 ᐌᑯᓀᓐ ᐃᑕᔥ ᐌᒋ ᒥᔅᒀᑭᓐ ᑭᑭᑭᔥᑭᑲᓇᓐ, ᑖᐱᔥᑰ ᐃᑭ ᑳᔑᑯᔥᑲᐙᐙᒡ ᔔᒥᓇᐞ? 3 ᒦᔥ ᐅᐅ ᑳᑎᐯᒋᑫᒡ ᐁᔑ ᓇᑴᑕᕽ, ᓂᑮ ᔑᑯᔥᑲᐙᒃ ᓴ ᑯᑕᒃ ᐯᒫᑎᓯᐙᒡ ᑖᐱᔥᑰ ᑳᑑᒋᑳᓱᐙᒡ ᔔᒥᓇᒃ, ᑳᐐᓐ ᐃᑕᔥ ᐊᐎᔭ ᓂᑮ ᐐᒋᐃᑯᓰ᙮ ᐁᓂᔥᑳᑎᓯᔮᓐ ᓴ ᓂᑮ ᔑᑯᔥᑲᐙᒃ, ᐅᒥᔅᑸᒥᐙ ᑕᔥ ᓂᑭᑭᔥᑭᑲᓂᕽ ᑮᐃᔑᓯᓶᓭᓂ, ᒦᔥ ᑳᐅᒋ ᒥᔅᑴᑲᑭᓐ ᓂᑭᑭᔥᑭᑲᓇᓐ᙮ 4 ᑮᐃᔑ ᑮᔑᑲᓐ ᓴ ᐁᑮ ᐃᓀᑕᒫᓐ ᐋᔕ ᐁᐅᒋᒋᓭᒃ ᒋᓇᓇᐊᒋᑫᔮᓐ, ᐁᐃᔑ ᑭᑭᓅᓄᐗᕽ ᐋᔕ ᒋᐱᒫᒋᐃᐌᔮᓐ᙮ 5 ᐐᑫ ᓴ ᓂᑮ ᒫᒪᑳᑌᑕᒻ ᐁᑮ ᐙᐸᒫᓯᐗᒃ ᐊᐎᔭ ᐁᑮ ᐊᔮᓯᒃ ᒋᑮ ᐐᒋᐃᐸᓐ᙮ ᓂᒪᔥᑲᐎᓰᐎᓂᕽ ᐁᑮ ᐅᒋ ᔖᑰᒋᑣᔮᓐ, ᓂᓂᔥᑳᑎᓯᐎᓂᕽ ᐁᑮ ᐅᒋ ᓲᑭᓯᔮᓐ᙮ 6 ᒦᔥ ᐁᓂᔥᑳᑎᓯᔮᓐ ᐁᔑ ᔑᑯᔥᑲᐗᒀ ᐯᒫᑎᓯᐙᒡ᙮ ᐁᓂᔥᑭᐃᐙᒡ ᓂᑮ ᒥᓇᐋᒃ ᒋᑭᑫᑕᒧᐙᒡ ᓂᓂᔥᑳᑎᓯᐎᓐ, ᓂᑮ ᓰᑭᓇᒧᐙᓐ ᐅᒥᔅᑸᒥᐙ ᒥᑕᑲᒥᑯᕽ᙮ ᑳᑎᐯᒋᑫᒡ ᐁᔑᒥᓄᑑᑕᐙᒡ ᐃᔅᕒᐃᔭᓬᐊᐞ 7 ᓂᑲ ᑕᔑᑕᒧᐙᓐ ᓴ ᑳᑎᐯᒋᑫᒡ ᐁᔑ ᒥᓄᑑᑖᑫᒡ; ᓂᑲ ᒦᑴᒋᐌᓂᒫ ᓴ ᐃᐃ ᑲᑭᓇ ᑳᑮ ᐃᔑᒋᑫᑕᒪᐎᓇᑭᒡ᙮ ᑌᐺ ᓴ ᐹᑏᓇᑎᓂᓂᐗᓐ ᐅᒥᓄᒋᑫᐎᓇᓐ ᐁᑑᑕᐙᒡ ᐃᔅᕒᐃᔭᓬᐊᐞ, ᐋᓃᔥ ᑰᐹᑌᓂᒥᐌ, ᓂᑖ ᒥᓄᑑᑖᑫ ᑲᔦ᙮ 8 ᒦᑕᔥ ᑳᑎᐯᒋᑫᒡ ᐁᑭᑐᒡ, ᑌᐺ ᓴ ᐐᓇᐙ ᓂᐱᒫᑎᓰᒪᒃ, ᑳᐐᓐ ᓴ ᓂᑲ ᑲᔦᔑᐃᑯᓰᒃ᙮ ᒦᐗᓐ ᓴ ᐃᓂ ᐃᑭ ᐯᒫᑎᓯᐙᒡ ᑳᐅᐱᒫᒋᐃᐌᒥᐙᒡ᙮ 9 ᑲᑭᓇ ᓴ ᑯ ᐁᔑ ᑲᒀᑕᑭᑑᓂᒡ, ᒦ ᓴ ᑯ ᑫᐐᓐ ᐁᔑ ᑲᒀᑕᑭᑑᒡ᙮ ᐅᑌᒐᓬᐃᒪᓐ ᓴ ᐁᔮᓂᒡ ᑳᔑ ᐊᔮᒡ, ᒦᐗᓐ ᓴ ᐃᓂ ᑳᓈᑕᒫᑯᓂᒡ᙮ ᐁᓵᑭᐋᒡ, ᐁᑰᐹᑌᓂᒫᒡ ᑲᔦ ᐅᔕ ᑳᐅᒋ ᐱᒫᒋᐋᒡ᙮ ᒨᔕᒃ ᐃᓴ ᑯ ᐅᑖᓈᕽ ᐅᐱᐅᒋ ᑲᓇᐌᓂᒫᐞ᙮ 10 ᒦᑕᔥ ᑳᑮ ᔕᔒᐱᑖᑯᒡ, ᐁᑮ ᒫᓀᑕᒧᐃᑯᒡ ᑲᔦ ᑭᔐᒪᓂᑑ ᐅᑕᒑᑯᕽ; ᒦᑕᔥ ᑳᑮ ᐊᓂ ᑎᓄᐎᒡ ᑳᔒᑫᓂᒫᒡ, ᐁᑮ ᐊᓂ ᒦᑳᓈᒡ ᑲᔦ᙮ 11 ᒦᑕᔥ ᐅᐱᒫᑎᓰᒪᐞ ᐅᑖᓈᕽ ᑳᑮ ᐃᔑ ᒫᒥᑲᐎᓂᒡ ᐊᐲ ᒨᓯᔅ Moses ᑮᐱᒫᑎᓯᑯᐸᓀᓐ, ᐅᐱᒫᑎᓰᒪᐞ ᑲᔦ, ᐁᑮ ᐃᑭᑐᓂᒡ, ᐋᓃᑎ ᑕᔥ ᐁᔮᒡ ᐊᐊ ᑭᒋᑲᒦᕽ ᑳᑮ ᔖᐳᐎᓈᒡ, ᐃᐃ ᑲᔦ ᑳᑮ ᓃᑳᓃᑕᒪᐙᓂᒡ ᐅᐱᒫᑎᓰᒥᓂ? ᐋᓃᑎ ᑕᔥ ᐃᓈ ᐁᔮᒡ ᐊᐊ ᑳᑮ ᒦᓈᒡ ᒨᓯᓲᓐ ᑎᐱᓇᐌ ᐅᑕᒑᑾᓐ᙮ 12 ᐋᓃᑎ ᑕᔥ ᐁᔮᒡ ᐊᐊ ᑳᑮ ᑭᒋ ᒪᔥᑲᐎᒋᑫᒡ ᑮᐋᐸᒋᐋᒡ ᒨᓯᓲᓐ, ᑳᑮ ᑑᑕᕽ ᓂᐲᓂ ᒋᑕᐎᐲᔥᑳᓂᒃ, ᑳᑮ ᐅᑎᓇᒫᓱᒡ ᑫᐅᒋ ᓀᐱᒋ ᑭᒋ ᐃᓀᑖᑯᓯᒡ᙮ 13 ᐊᐌᓀᓐ ᐃᑕᔥ ᑳᔖᐳᐎᓈᒡ ᐁᔑ ᑮᔥᑳᔭᐙᓂᒃ? ᑖᐱᔥᑰ ᓴ ᑳᓇᐄᒡ ᒥᑕᑎᒻ ᑳᐱᒧᓭᒡ ᒥᔕᐗᑲᒥᒃ, ᑳᐐᓐ ᒋᑮ ᐱᓱᑫᔑᓄᐙᒡ? 14 ᑖᐱᔥᑰ ᓴ ᐱᔑᑭᐗᒃ ᑳᐃᔖᐙᒡ ᐸᓴᑎᓈᕽ, ᒦ ᓴ ᐃ ᐁᔑ ᐊᓉᐱᐃᑯᐙᒡ ᑳᑎᐯᒋᑫᓂᒡ ᐅᑕᒑᑯᓂ᙮ ᒦ ᓴ ᐃᐌ ᓇᑫ ᐁᔑ ᑭᑭᓄᐎᓇᑣ ᑭᐱᒫᑎᓰᒪᒃ ᑫᐅᒋ ᐊᔮᔭᓐ ᑳᑭᒋ ᐃᓀᑖᑾᒃ ᐐᓱᐎᓐ᙮ ᐁᑲᑴᑗᕽ ᐐᒋᐃᑰᐎᓯᐎᓐ 15 ᑳᑎᐯᒋᑫᒡ, ᑭᒋᑮᔑᑯᕽ ᐅᓵᐸᒥᔑᓈᒻ ᑳᔑ ᑯᑖᓀᑖᑾᒃ, ᑳᔑ ᑭᒋ ᐃᓀᑖᑾᒃ ᑲᔦ ᑭᑖᐎᓐ᙮ ᐌᑯᓀᓐ ᑫᔮᐱ ᐌᒋ ᓈᓈᑲᑕᐌᓂᒥᓯᐙᕽ? ᐋᓃᑎ ᑕᔥ ᐃᐃ ᑭᒪᔥᑲᐎᓰᐎᓐ? ᐌᑯᓀᓐ ᐃᑕᔥ ᑫᔮᐱ ᐌᒋ ᓵᑭᐃᓯᐙᕽ, ᑲᔦ ᐌᒋ ᑰᐹᑌᓂᒥᓯᐙᕽ? ᑫᑯ ᓴ ᐋᓍᐸᒥᔑᓈᑳᕽ᙮ 16 ᑮᓐ ᐄᑐᒃ ᑭᑑᑌᑌᒥᑰ, ᐋᓇᐐᓐ ᐁᐸᕒᐊᐋᒻ Abraham ᐁᑭᑫᓂᒥᓯᔭᒥᓐᒡ, ᐃᔅᕒᐃᔭᓬ ᑲᔦ ᐁᓂᓯᑕᐎᓇᐎᓯᓄᐗᑭᒡ᙮ ᑌᐯᒋᑫᔭᓐ, ᑮᓐ ᐄᑐᒃ ᑳᐆᑌᑌᒥᑰᔭᓐ, ᒣᐎᔕ ᓴ ᐱᑯ ᓂᒻᐱᒫᒋᐃᐌᒥᓈᓐ ᑭᐱᐅᒋ ᐃᔑᓂᑳᓂᑰ᙮ 17 ᑌᐯᒋᑫᔭᓐ, ᐌᑯᓀᓐ ᐃᑕᔥ ᐌᒋ ᐸᑭᑎᓂᔮᕽ ᒋᓇᑲᑕᒫᕽ ᑭᑎᔑᑣᐎᓇᓐ? ᐌᑯᓀᓐ ᑲᔦ ᐌᒋ ᑑᑕᐎᔮᕽ ᒋᔕᔒᐱᑕᒫᕽ ᒦᔥ ᐁᔑ ᑭᑌᓂᒥᑰᓯᐗᓐ? ᐱᑮᐌᓄᑕᐎᔑᓈᒻ, ᓃᓇᐎᓐᑦ ᐄᑐᒃ ᑭᑕᓄᑮᐋᑲᓇᒃ, ᑳᑎᐱᓇᐌᐎᓯᔭᓐ ᐁᑕᓶᐙᓇᑭᓯᔮᕽ᙮ 18 ᐊᒋᓇ ᓴ ᐁᑕ ᑫᑌᓂᒪᑣ ᑭᐱᒫᑎᓰᒪᒃ ᐅᑮ ᑎᐯᑖᓈᐙ ᐁᑕᔑ ᐊᓇᒥᐁᑖᑰᔭᓐ, ᐃᑭ ᑕᔥ ᑳᔒᑫᓂᒥᔭᒥᑣ ᐅᑮ ᐲᑯᔥᑳᓈᐙ ᐃᐃ ᑭᑕᓇᒥᐁᐎᑲᒥᒃ᙮ 19 ᒦ ᓴ ᐃ ᐁᑑᑕᐎᔮᕽ ᑖᐱᔥᑰ ᐐᑳ ᐁᑎᐯᓂᒥᓯᓄᐎᔮᕽ, ᐁᐃᓀᑖᑯᓯᔮᕽ ᐃᑭ ᑎᓄ ᐐᑳ ᑳᓈᐱᓂᑳᓱᓯᒀ ᐃᐃ ᑭᐐᓱᐎᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society