Aaiseya 61 - ᐅᒋᐺ ᑭᒋᒪᓯᓇᐃᑲᓐᐱᒫᒋᐃᑰᐎᓐ ᐁᑕᔑᑌᒃ 1 ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐅᑕᒑᑾᓐ ᓂᐐᒌᐎᒥᒃ᙮ ᓃᓐ ᐋᓃᔥ ᓂᑮ ᐅᓀᓂᒥᒃ ᒋᐲᑕᒪᐎᒪᒃ ᒥᓍᒋᒧᐎᓐ ᐃᐃ ᑳᑰᐹᑎᓯᓂᒡ᙮ ᓂᑮ ᐲᒋᓂᔕᐅᒃ ᒋᐊᑕᐎᐃᒪᒃ ᑳᐲᑯᑌᐁᓂᒡ, ᒋᐐᑕᒪᐎᒪᒃ ᑕᑯᓂᑲᓇᐞ ᒋᐸᑭᑎᓂᒥᓐᒡ, ᑲᔦ ᒋᐹᑭᓇᒪᐎᒥᓐᒡ ᒋᓵᑲᐊᒥᓂᒡ ᑭᐸᐙᑲᓇᐞ᙮ 2 ᓂᑮ ᐃᔑᓂᔕᐅᒃ ᐅᔕ ᒋᑎᐹᒋᒧᐗᒃ ᐋᔕ ᑎᐸᐃᑲᓐ ᐁᐅᒋᒋᓭᓂᒃ ᐊᐲ ᑳᑎᐯᒋᑫᒡ ᐁᐐ ᐱᒫᒋᐋᒡ ᐅᐱᒫᑎᓰᒪᐞ, ᐁᐐ ᔖᑰᒋᑕᒪᐙᒡ ᑲᔦ ᑳᔒᑫᓂᒥᑯᓂᒡ᙮ ᓂᑮ ᐲᒋᓂᔕᐅᒃ ᒋᒥᓄᑌᐁᐃᒪᒃ ᑳᐲᑴᑕᒥᓂᒡ, 3 ᒋᒥᓉᑕᒧᐃᒪᒃ ᑲᔦ ᑳᒫᓀᑕᒥᓂᒡ ᐃᐃᒫ ᓵᔭᓂᕽ Zion ᐁᔮᓂᒡ᙮ ᑳᐐᓐ ᐅᓇᑕᐌᓂᒫᓰᐞ ᒋᒫᓀᑕᒥᓂᒡ; ᒋᒌᑫᑕᒥᓂᒡ, ᒋᒨᒋᑫᑕᒥᓂᒡ ᐅᔕ ᐅᑎᔑ ᐊᑕᐌᓂᒫᐞ᙮ ᒥᑎᑯᕽ ᓴ ᐃᓀᑖᑯᓯᐗᐞ ᑳᑎᐯᒋᑫᒡ ᐐᓐ ᐃᑯ ᑳᑮ ᑭᑎᑳᓈᒡ᙮ ᑾᔭᒃ ᓴ ᑕᔥ ᑕᐃᔑᒋᑫᐗᐞ, ᒦᔥ ᐃᐃᒫ ᑭᔐᒪᓂᑑ ᑫᐅᒋ ᒦᑴᒋᐌᑖᑯᓯᒡ ᐋᓃᓐ ᑳᑮ ᐃᔑᒋᑫᒡ᙮ 4 ᒦᑕᔥ ᒋᑮᐌ ᐅᔑᑑᓂᒡ ᑭᒋ ᐆᑌᓇᐗᓐ ᒣᐎᔕ ᑳᐅᒋ ᐲᑯᔥᑳᓂᑭᓐ, ᐃᓂ ᑲᔦ ᑳᑮ ᓂᔑᐗᓈᒋᒋᑳᑌᓂᑯᐸᓀᓐ ᐆᑌᓇᐗᓐ ᒣᐎᔕ᙮ 5 ᐲᐎᑌᒃ ᐅᔕ ᑭᑲ ᓈᓈᑲᒋᑕᒫᑯᐙᒃ ᑭᒫᓇᒑᓂᔑᒥᐙᐞ᙮ ᒦᐗᒃ ᓴ ᑲᔦ ᐃᑭ ᑫᓈᓈᑲᒋᑑᐙᒡ ᑭᑭᑎᑫᐎᓂᐙᓐ, ᑳᔑ ᑭᑎᑳᓂᒣᒃ ᑲᔦ ᔔᒥᓇᐞ᙮ 6 ᒦᑕᔥ ᑫᐃᑰᔦᒃ ᐁᐊᓇᒥᐁᐎᑭᒫᐎᔦᒃ ᐃᓂ ᐅᒋ ᑳᑎᐯᒋᑫᒡ, ᑭᑲ ᐃᔑᓂᑳᓂᑰᒻ ᑲᔦ ᑳᐊᓄᑮᑕᐙᐙᒡ ᑭᑭᔐᒪᓂᑑᒥᓈᓂᓐ᙮ ᐐᑫ ᓴ ᑭᑲ ᐌᓅᒋᑑᒻ ᐅᐌᓅᑎᓯᐎᓂᐙᓐ ᑳᐸᑳᓉᐙᓇᑭᓯᐙᒡ ᐯᒫᑎᓯᐙᒡ, ᐐᑫ ᑲᔦ ᑭᑲ ᐅᒋ ᑭᒋ ᐃᓀᓂᑎᓱᒻ ᐁᐊᔮᐌᒃ ᐅᐌᓅᑎᓯᐎᓂᐙᓐ᙮ 7 ᒦᑕᔥ ᐃᐃ ᒋᐴᓂᓭᒃ ᑳᔑ ᓂᑖ ᐊᑲᒋᐃᑰᔦᒃ, ᑳᔑ ᑰᐹᓯᓈᑯᓯᔦᒃ ᑲᔦ᙮ ᑭᑕᑮᒥᐙᕽ ᓴ ᐱᑯ ᑭᑲ ᐃᔑᑖᒻ, ᑕᓇᐳᓂᑳᑌᐗᓐ ᑲᔦ ᑳᔑ ᐌᓅᑎᓯᔦᒃ᙮ ᒦᑕᔥ ᒋᓀᐱᒋ ᒥᓉᑕᒣᒃ᙮ 8 ᒦᔥ ᐁᑭᑐᒡ ᑳᑎᐯᒋᑫᒡ, ᓂᒥᓉᑖᓐ ᓴ ᐌᐌᓂ ᐃᓈᑯᓂᑫᐎᓐ, ᓂᔒᑫᑖᓐ ᐃᑕᔥ ᐐᓐ ᑮᒨᑎᐎᓐ, ᒪᒋᐃᔑᒋᑫᐎᓐ ᑲᔦ᙮ ᐁᑌᐺᔦᑖᑯᓯᔮᓐ ᓴ ᐱᑯ ᓂᑲ ᐅᒋ ᑎᐸᐊᒪᐙᒃ ᐋᓃᓐ ᑳᐃᔑᒋᑫᐙᒡ, ᒋᐅᔑᑕᒪᐗᒀ ᑲᔦ ᑫᓀᐱᒋ ᐊᔮᓂᒃ ᐊᔓᑕᒫᑎᐎᓐ᙮ 9 ᐅᐲᐌᓰᒥᐙᐞ ᓴ ᑕᔥ ᒥᓯᐌ ᑕᑭᑫᓂᒫᐗᐞ ᒣᑴᔭᐄ ᐁᔑᐊᔮᓂᒡ ᐸᑳᓉᐙᓐ ᐊᐎᔭᐞ᙮ ᑲᑭᓇ ᓴ ᑯ ᑳᐙᐸᒥᑯᐙᒡ ᐅᑲ ᑭᑫᓂᒥᑯᐙᐞ ᑕᐃᑭᑐᐗᐞ ᑳᑎᐯᒋᑫᓂᒡ ᐁᔕᐌᓂᒥᑯᐙᒡ᙮ 10 ᒉᕒᐆᓴᓬᐊᒻ ᑕᐅᒋ ᒥᓉᑕᒨᒪᑲᓐ ᐋᓃᓐ ᑳᐃᔑᒋᑫᓂᒡ ᑳᑎᐯᒋᑫᓂᒡ᙮ ᒦ ᓴ ᐃ ᐁᔑᑯᓇᔦᔮᓐ ᑖᐱᔥᑰ ᐃᓂᓂ ᑳᐃᔑᐅᒡ ᑮᐐ ᑭᒋ ᐐᑎᑫᒡ ᑲᔦ ᐃᑴ ᑳᔑ ᐙᐌᔑᐅᒡ ᑮᐐ ᑭᒋ ᐐᑎᑫᒡ᙮ ᑭᔐᒪᓂᑑ ᓂᑎᔑ ᑯᓇᔦᐃᒃ ᒋᑭᑭᔥᑲᒫᓐ ᐱᒫᒋᐃᑰᐎᓯᐎᓐ, ᔖᑰᒋᑣᐎᓐ ᑲᔦ᙮ 11 ᑫᒋᓈᒡ ᓴ ᑯ ᑖᐱᔥᑰ ᐊᑮᕽ ᑳᐅᒋ ᓂᑖᐎᑭᑭᓐ ᑭᑎᑳᓀᔅ, ᑭᑎᑳᓇᑲᒥᑯᕽ ᐁᐅᒋ ᒫᒌᑭᑭᓐ, ᒦ ᓴ ᐃ ᓇᑫ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᑫᔑ ᐱᒫᒋᐋᒡ ᐅᐱᒫᑎᓰᒪᐞ, ᑲᑭᓇ ᓴ ᑕᔥ ᐯᒫᑎᓯᓂᒡ ᐅᑲ ᒦᑴᒋᐌᓂᒥᑰᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society