Aaiseya 60 - ᐅᒋᐺ ᑭᒋᒪᓯᓇᐃᑲᓐᒉᕒᐆᓴᓬᐊᒻ ᐱᒌᓇᒃ ᒋᑭᒋᐃᓀᑖᑾᒃ 1 ᑳᑎᐯᒋᑫᒡ ᓴ ᐃᑭᑐ, ᒉᕒᐆᓴᓬᐊᒻ Jerusalem, ᒪᔮᐐᓐ, ᑕᑲ ᓵᑳᓱᓐ ᒋᐃᔑᓈᑯᓯᔭᓐ ᑮᓯᓱᕽ; ᑳᑎᐯᒋᑫᒡ ᐅᔕ ᐅᑭᒋ ᐃᓀᑖᑯᓯᐎᓐ ᑭᑲ ᓵᑳᓱᑯᐙᓐ᙮ 2 ᒥᓯᐌ ᐅᔕ ᑕᑲᔥᑮᑎᐱᑲᓐ ᐅᐅᒫ ᐊᑮᕽ, ᑳᑲᔥᑮᑎᐱᑲᓂᓂᒃ ᓴ ᐅᑲ ᐋᑰᔥᑳᑯᓈᐙ ᐯᒫᑎᓯᐙᒡ᙮ ᑮᓇᐙ ᑕᔥ ᐐᓐ, ᑳᑎᐯᒋᑫᒡ ᓴ ᑭᑲ ᐙᓭᔥᑳᑯᐙ, ᐅᑭᒋ ᐃᓀᑖᑯᓯᐎᓐ ᑭᑲ ᐋᑰᔥᑳᑯᐙᒻ᙮ 3 ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᓴ ᑕᐲᔖᐗᒃ ᑳᔑ ᐙᓭᓈᑯᓯᔦᒃ, ᑭᒋᐅᑭᒫᒃ ᑲᔦ ᑕᐲᔖᐗᒃ ᐙᐸᑕᒧᐙᒡ ᑳᔑ ᐙᓭᔮᓂᒃ ᑳᐅᒋ ᐅᔥᑭ ᒫᒋᑖᔦᒃ᙮ 4 ᒉᕒᐆᓴᓬᐊᒻ, ᐃᓇᔥᑫ ᒥᓯᐌ ᐙᑳᔭᐄ ᐊᔨᓈᐱᓐ ᒋᐙᐸᑕᒪᓐ ᐋᓃᓐ ᐁᓇᑲᒥᑲᒃ; ᐯᒫᑎᓯᐙᒡ ᓴ ᐅᑸᓄᐗᒃ ᐁᐐ ᐱ ᓈᓯᑲᐎᒀ᙮ ᑭᑯᓯᓴᒃ ᓴ ᐙᓴ ᑕᐱ ᐅᒌᐗᒃ ᒋᐱᑮᐌᐙᒡ; ᑭᑖᓂᓴᒃ ᑲᔦ ᑕᐱᒥᐎᒋᑲᓂᐎᐗᒃ ᑖᐱᔥᑰ ᐊᐱᓅᒌᔕᒃ ᑳᑑᑕᐎᑣ᙮ 5 ᐅᐅ ᓴ ᑕᔥ ᐙᐸᑕᒪᓐ, ᐐᑫ ᓴ ᑭᑲ ᒨᔥᑭᓀᔥᑳᑯᓐ ᒌᑫᑕᒧᐎᓐ; ᑭᑲ ᓂᓂᑭᔥᑳ ᓴ ᑫᐊᐲᒋ ᒌᑫᑕᒪᓐ᙮ ᑳᔑ ᐌᓅᑎᓯᐙᒡ ᓴ ᑳᐯᐸᑳᓉᐙᓇᑭᓯᐙᒡ ᑭᑲ ᐅᑎᓯᑯᐙᓐ, ᐅᐌᓅᑎᓯᐎᓂᐙᓐ ᐊᑳᒥᕽ ᑭᒋᑲᒦᕽ ᑕᐱᐅᒋ ᐋᔕᐎᔥᑳᓂᐗᓐ᙮ 6 ᐋᐱᒋ ᓴ ᑕᑭᓍᐲᑲᒧᐗᒃ ᐱᒀᐎᑲᓀ ᒥᑕᑎᒧᒃ ᑫᐱ ᐅᑎᓯᒀ, ᐅᔥᑭ ᐱᒀᐎᑲᓀ ᒥᑕᑎᒧᒃ ᒋᐱ ᐅᒌᐙᒡ ᒥᑎᔭᓐ Midian ᐊᑮᕽ, ᐄᐸ Ephah ᐊᑮᕽ ᑲᔦ᙮ ᑲᑭᓇ ᓴ ᔒᐸ Sheba ᐆᑌᓈᕽ ᑲᔦ ᑕᐱ ᐅᒌᐗᒃ, ᒋᐲᓈᐙᒡ ᐅᓵᐎ ᔔᓂᔮᓐ, ᒋᐲᑑᐙᒡ ᑲᔦ ᒥᓈᓯᑲᓇᓐ᙮ ᐯᒫᑎᓯᐙᒡ ᓴ ᑕᐐᑕᒫᑫᐗᒃ ᑳᔑ ᒦᑴᒋᐌᑖᑯᓯᓂᒡ ᑳᑎᐯᒋᑫᓂᒡ᙮ 7 ᑲᑭᓇ ᓴ ᒫᓇᒑᓂᔕᒃ ᑫᑕᕒᐃᕽ Kedar ᑳᐅᒌᐙᒡ, ᐃᑭ ᑲᔦ ᐋᐯ ᒫᓇᒑᓂᔕᒃ ᓃᐯᔪᑎᕽ Nebaioth ᑭᑲ ᐲᑕᒫᑰ ᒋᐃᓍᓇᑣ ᐸᑭᑎᓈᓱᐎᓂᕽ᙮ ᒦ ᓴ ᐃᐃᐌᓂᐗᐞ ᑳᑎᐯᒋᑫᒡ ᐸᑭᑎᓇᒪᐎᓐᒡ ᑫᒥᓍᐸᒫᒡ᙮ ᑳᑎᐯᒋᑫᒡ ᓴ ᐅᑲ ᐃᔑᑑᓐ ᐊᐗᔑᒣ ᒋᑭᒋ ᐃᓀᑖᑾᓂᓂᒃ ᐅᑕᓇᒥᐁᐎᑲᒥᒃ, ᑮᐃᑭᑐ ᑳᑎᐯᒋᑫᒡ᙮ 8 ᐌᑯᓀᓐ ᐃᑕᔥ ᐃᓂ ᑎᓄ ᒌᒫᓇᓐ ᑳᐱᒥᐌᐹᓯᑭᓐ ᐗᑭᒋᐲᒃ ᐗᑸᕽ ᐁᓀᑖᑾᑭᓐ, ᑖᐱᔥᑰ ᐅᒦᒦᒃ ᑳᐱᑮᐌᓭᐙᒡ᙮ 9 ᒦᐗᓐ ᓴ ᐃᓂ ᑭᒋ ᒌᒫᓇᓐ ᐙᓴ ᑳᐅᒌᑭᓐ, ᐃᓂ ᓴ ᒌᒫᓇᓐ ᑖᕒᔑᔥ Tarshish ᐌᒌᑭᓐ ᑕᐱ ᓃᑳᓃ ᒥᔕᑳᒪᑲᓅᓐ᙮ ᒦᑕᔥ ᐃᐃᒫ ᑭᓃᒑᓂᓴᒃ ᑫᔑ ᑕᑯᔑᓄᐙᒡ ᒋᑕᑯ ᐲᓈᐙᒡ ᐙᐹᐱᑯ ᔔᓂᔮᓐ, ᐅᓵᐎ ᔔᓂᔮᓐ ᑲᔦ, ᒋᑭᑌᓂᒫᐙᒡ ᑳᑎᐯᒋᑫᓂᒡ ᑭᑭᔐᒪᓂᑑᒪᓐ, ᐃᔅᕒᐃᔭᓬᐊᒃ ᐅᑭᑌᑖᑯᓰᒥᐙᓐ᙮ ᒦᐗᓐ ᐄᑐᒃ ᐃᓂ ᐃᔅᕒᐃᔭᓬᐊᒃ ᑳᑑᑖᑯᐙᒡ ᒋᑭᒋ ᐃᓀᑖᑯᓯᐙᒡ᙮ 10 ᐲᐎᑌᒃ ᓴ ᐅᑲ ᑮᐌ ᓈᐱᑑᓈᐙ ᑭᐙᑳᔮᐱᑭᓂᑲᓐ, ᐅᑭᒋᐅᑭᒫᒥᐙᐞ ᓴ ᑕᔥ ᑭᑲ ᐸᒦᑖᑰᒃ᙮ ᐁᓂᔥᑳᑎᓯᔮᓐ ᓴ ᑭᑮ ᐃᔑ ᓇᓇᐊᓯᓐ, ᓅᑯᒻ ᑕᔥ ᐐᓐ ᑭᐐ ᐙᐸᑕᐃᓐ ᐁᒥᓍᐸᒥᓈᓐ, ᐁᑰᐹᑌᓂᒥᓈᓐ ᑲᔦ᙮ 11 ᒨᔕᒃ ᓴ ᐁᑕᓱ ᑮᔑᒃ, ᐁᑕᓱ ᑎᐱᒃ ᑲᔦ ᑕᐹᑭᑌᓯᓅᓐ ᑭᑭᒋ ᐃᔥᒀᑌᒪᓐ᙮ ᐯᒫᑎᓯᐙᒡ ᑕᔥ ᑳᐯᐸᑳᓉᐙᓇᑭᓯᐙᒡ ᒋᐲᑑᐙᒡ ᐅᐌᓅᑎᓯᐎᓂᐙᓐ ᔑᑾ ᐅᑭᒋᐅᑭᒫᒥᐙᐞ ᒋᐱ ᓃᑳᓃᑕᒫᑫᓂᒡ᙮ 12 ᐃᑭ ᑕᔥ ᐐᓐ ᐸᑳᓉᐙᓐ ᐯᒫᑎᓯᐙᒡ ᑫᐸᒥᐃᓯᓄᐎᒀ, ᐃᑭ ᑲᔦ ᐸᑳᓐ ᑳᑕᔑᑭᒫᐎᐙᒡ ᐐᑫ ᓴ ᐱᑯ ᑕᓂᔑᐗᓈᒋᒋᑲᓂᐎᐗᒃ᙮ 13 ᐌᑎ ᓴ ᓬᐁᐸᓇᓐ Lebanon ᐊᑮᕽ ᑳᔑ ᐌᓅᒋ ᒥᑎᑯᑳᒃ ᑕᐱᐅᒋ ᐲᓈᐗᒃ ᐅᑭᑲᒃ, ᒥᓇᐃᑰᒃ, ᐃᑭ ᑲᔦ ᓵᐃᐸᕒᐁᔅ Cypress ᑎᓄᐙᑎᑰᒃ ᒫᐗᒡ ᐃᑯ ᑳᐅᓂᔑᔑᐙᒡ᙮ ᓂᐐ ᐃᔑᑑᓐ ᓂᑕᓇᒥᐁᐎᑲᒥᒃ ᐐᑫ ᒋᒥᓄᓈᑾᒃ, ᐁᐐ ᐃᔑᐃᓈᓐ ᑮᓐ ᒉᕒᐆᓴᓬᐊᒻ ᐗᐐᑫ ᒋᐅᓂᔑᔑᔭᓐ ᑫᔑ ᐊᓉᓯᑌᐱᔮᓐ᙮ 14 ᐃᐃ ᓴ ᐅᑯᓯᓯᐙᐞ ᑳᑮ ᑲᒀᑕᑭᐃᒀ ᑕᐲᔖᐗᐞ ᒋᐊᓂᒥᑯᑖᓂᒡ ᒋᓈᑯᑑᓂᒡ ᐁᑭᑌᓂᒥᒥᒃ᙮ ᑲᑭᓇ ᓴ ᐊᐎᔭᒃ ᑳᔒᑫᓂᒥᒀ ᑕᐊᓂᒥᑯᑖᐗᒃ ᑳᐃᔑᓯᑌᑳᐸᐎᔭᓐ᙮ ᒦ ᓴ ᐃ ᑫᐃᔑᓂᑳᓂᒀ, ᑳᑎᐯᒋᑫᒡ ᓴ ᐃᐃᐌᓂ ᐅᑑᑌᓈᒻ, ᓵᔭᓐ Zion ᐅᑑᑌᓈᒻ ᐅᑭᑌᑖᑯᓰᒥᐙᓐ ᐃᔅᕒᐃᔭᓬᐊᒃ᙮ 15 ᐋᓇ ᓴ ᐐᓐ ᐁᑮ ᐌᐱᓂᑰᔭᓐ, ᐁᑮ ᔒᑫᓂᒥᑰᔭᓐ ᑲᔦ, ᑳᐐᓐ ᑲᔦ ᐊᐎᔭ ᑭᑲ ᒪᔮᔥᑳᑯᓰ, ᔖᑰᒡ ᐃᑕᔥ ᑭᐐ ᐃᔑᐃᓐ ᓀᐱᒡ ᐃᑯ ᒋᑭᒋ ᐃᓀᑖᑯᓯᔭᓐ, ᑫᐊᓂ ᐅᒋ ᒥᓉᑕᒧᐙᒡ ᑫᓂ ᐱᒫᑎᓯᐙᒡ᙮ 16 ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ, ᑭᒋᐅᑭᒫᒃ ᑲᔦ ᑭᑲ ᓈᓈᑲᒋᐃᑯᐙᒃ ᑖᐱᔥᑰ ᐅᒫᒫᒫ ᑳᔑ ᓅᓂᐋᒡ ᐅᓃᒑᓂᓴᓐ᙮ ᒦᑕᔥ ᐃᐃ ᒋᑭᑫᑕᒣᒃ ᓃᓐ ᑳᑎᐯᒋᑫᒡ ᐁᑎᓄᐎᔮᓐ ᑳᐱᒫᒋᐃᓀᒃ, ᑳᔖᐼᐃᓀᒃ, ᑳᒪᔥᑲᐎᓰᔮᓐ ᐃᔅᕒᐃᔭᓬᐊᒃ Israel ᐅᑭᔐᒪᓂᑑᒥᐙᓐ᙮ 17 ᑌᑾᒡ ᓴ ᐅᓵᐎ ᔔᓂᔮ ᐙᐱᒃ ᑭᑲ ᐲᑕᒪᐎᓐ ᐊᐲᒡ ᐐᓐ ᐃᐃ ᑳᐅᓵᐙᐱᑲᒃ, ᑌᑾᒡ ᓴ ᑲᔦ ᑭᑲ ᐲᑕᒪᐎᓐ ᐙᐹᐱᑯ ᔔᓂᔮ ᐙᐱᒃ ᐊᐲᒡ ᐐᓐ ᐲᐙᐱᒃ, ᐅᓵᐙᐱᒃ ᓴ ᑭᑲ ᐲᑕᒪᐎᓐ ᐊᐲᒡ ᐐᓐ ᒥᑎᒃ᙮ ᐲᐙᐱᒃ ᑭᑲ ᐲᑕᒪᐎᓐ ᐊᐲᒡ ᐐᓐ ᐊᓯᓐ᙮ ᑫᑎᐯᓂᒥᒀ ᓴ ᑳᐐᓐ ᐊᐗᔑᒣ ᑭᑲ ᐌᓵᓂᐃᑯᓰᐙᒃ; ᓂᑲ ᐃᔑᐋᒃ ᓴ ᐌᐌᓂ ᒋᐃᓈᑯᓂᑫᐙᒡ, ᒋᐱᓵᓀᑖᑾᓂᓂᒃ ᑲᔦ ᑫᔑ ᑎᐯᒋᑫᐙᒡ᙮ 18 ᑳᐐᓐ ᓴ ᒦᓇᐙ ᐐᑳ ᑕᓅᑖᑳᓂᐗᓯᓅᓐ ᐅᒻᐺᑲᒥᑭᓯᐎᓐ ᑭᑖᑮᒦᕽ, ᑳᐐᓐ ᑲᔦ ᒦᓇᐙ ᓂᔑᐗᓈᒋᒋᑫᐎᓐ, ᐲᑯᓂᑫᐎᓐ ᑕᑭᑫᑖᑾᓯᓅᓐ ᑳᔑ ᐊᔮᔭᓐ᙮ ᓃᓐ ᓴ ᑯ ᑭᑲ ᓈᑕᒪᐎᓐ, ᑭᑲ ᒦᑳᓱᑕᒪᐎᓐ ᑲᔦ ᑖᐱᔥᑰ ᐙᑳᔮᐱᑭᓂᑲᓐ ᑳᔑ ᓈᑕᒫᑫᒪᑲᒃ᙮ ᒦᑕᔥ ᐃᐃ ᒋᒦᑴᒋᐌᓂᒥᔭᓐ ᐋᓃᔥ ᑭᑲ ᐱᒫᒋᐃᓐ᙮ 19 ᑮᓯᓱᕽ ᓴ ᑳᐐᓐ ᐊᐗᔑᒣ ᑕᐅᒋ ᐙᓭᔮᓯᓅᓐ ᑮᔑᑲᒃ, ᑎᐱᑲᒃ ᑲᔦ ᑳᐐᓐ ᑎᐱᑭᑮᓯᓱᕽ ᑕᐅᒋ ᐙᓭᔮᓯᓅᓐ᙮ ᑳᑎᐯᒋᑫᒡ ᐅᔕ ᐐᓐ ᐃᑯ ᓀᐱᒡ ᑭᑲ ᐙᓭᔥᑲᒫᑯᐙ, ᑭᑭᔐᒪᓂᑑᒥᐙ ᐅᑭᒋ ᐃᓀᑖᑯᓯᐎᓐ ᑭᑲ ᐙᓭᔥᑲᒫᑯᐙᒻ᙮ 20 ᑳᐐᓐ ᓴ ᑮᓯᔅ ᒦᓇᐙ ᑕᐸᑭᔑᒧᓰ, ᑎᐱᑭᑮᓯᔅ ᑲᔦ ᑳᐐᓐ ᑕᓵᑳᓯᑫᓰ; ᑳᑎᐯᒋᑫᒡ ᐅᔕ ᓀᐱᒡ ᐃᑯ ᑮᐐ ᐙᓭᔥᑲᒫᑯᐙ, ᒦᑕᔥ ᐃᐃ ᑳᔑ ᒨᑯᓀᔦᒃ ᒋᐴᓂᓭᒃ᙮ 21 ᑭᐱᒫᑎᓰᒪᒃ ᓴ ᑕᔥ ᐃᐃᒫ ᒉᕒᐆᓴᓬᐊᒥᕽ ᑫᐊᔮᐙᒡ ᑕᑾᔭᒀᑎᓯᐗᒃ, ᐐᓇᐙ ᑲᔦ ᐅᑲ ᑎᐯᑖᓈᐙ ᐃᐃ ᐊᑮᓂ ᑳᑭᑫ᙮ ᒦᐗᒃ ᓴ ᐃᑭ ᑳᑮ ᑭᑎᑳᓇᒀ, ᓃᓐ ᐁᑮ ᐅᔑᐊᒀ, ᐁᐐ ᓈᑯᑑᔮᓐ ᓂᑭᒋ ᐃᓀᑖᑯᓯᐎᓐ᙮ 22 ᒫᐗᒡ ᓴ ᑳᐊᑳᓭᑖᑯᓯᔦᒃ, ᑫᑰᓐ ᑲᔦ ᐋᐲᓐᒡ ᑳᐃᓀᑖᑯᓯᓯᐌᒃ, ᒦ ᓴ ᐃᐃᒫ ᑫᓂ ᐅᒌᐙᒡ ᑫᓂ ᒪᔥᑲᐌᑖᑯᓯᐙᒡ ᐯᒫᑎᓯᐙᒡ᙮ ᐊᐲ ᓴ ᓇᐃᓭᒃ ᑎᐸᐃᑲᓐ ᒦ ᓴ ᐃ ᐌᐐᑉ ᑫᐃᔑᒋᑫᔮᓐ᙮ ᓃᓐ ᐄᑐᒃ ᑳᑎᐯᒋᑫᒡ, ᑮᐃᑭᑐ ᑭᔐᒪᓂᑑ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society