Aaiseya 6 - ᐅᒋᐺ ᑭᒋᒪᓯᓇᐃᑲᓐᐋᐃᓭᔭ ᑮᑲᓅᓂᓐᒡ ᒋᑲᓅᑕᒪᐙᒡ ᑭᔐᒪᓂᑑᓐ 1 ᐃᐃ ᐊᐲ ᐁᐱᐴᓂᓂᒃ ᓴ ᑳᑮ ᐃᔥᒀ ᐱᒫᑎᓯᒡ ᑭᒋᐅᑭᒫ ᔫᓵᔭ Uzziah, ᒦ ᓴ ᐃ ᐊᐲ ᑳᑮ ᐙᐸᒪᒃ ᑳᑎᐯᒋᑫᒡ ᐁᓇᒪᑕᐱᒡ ᑭᒋᐅᑭᒫᐗᐱᐎᓂᕽ, ᐁᐃᔥᐯᑖᑯᓯᒡ, ᐁᑭᒋ ᐃᓀᑖᑯᓯᒡ ᑲᔦ᙮ ᐃᐃᐌᓂ ᑕᔥ ᐅᑑᑭᒫᐗᔮᓐ ᑳᑮ ᑭᓍᐲᑲᓂᓂᒃ ᑮᒨᔥᑭᓀᓂ ᑭᒋ ᐊᓇᒥᐁᐎᑲᒥᑯᕽ᙮ 2 ᐌᑎ ᑕᔥ ᐃᔥᐱᒥᕽ ᑳᑮ ᐃᔑ ᐊᐱᒡ ᑮᐊᔮᐗᐞ ᓭᕒᐊᐲᐞ ᐁᑕᓱ ᐯᔑᑯᓂᒡ ᐁᑮ ᓀᓂᑯᑣᒋᓂᓂᑭᓐ ᐅᓂᑸᑲᓂᓂ᙮ ᓃᔑᓐ ᑕᔥ ᐅᓂᑸᑲᓂᓂ ᑮᐅᒋ ᐋᑲᐐᑴᓂᑎᓱᐗᓐ, ᐃᓂ ᑕᔥ ᑯᑕᒃ ᓃᔑᓐ ᐅᓂᑸᑲᓂᓂ ᑮᐅᒋ ᐋᑲᐎᓯᑌᓂᑎᓱᐗᓐ᙮ ᐃᓂᐌᓂᐗᓐ ᑕᔥ ᑯᑕᒃ ᓃᔑᓐ ᐅᓂᑸᑲᓂᓂ ᐅᑮ ᐱᒥᓭᐙᑫᓂ᙮ 3 ᒦᑕᔥ ᐅᐅ ᑳᐃᑭᑐᐙᒡ ᐁᔖᔖᑯᐙᓂᑎᐙᒡ, ᒫᐗᒡ ᐃᑯ ᑭᑌᑖᑯᓯ, ᒫᐗᒡ ᐃᑯ ᑭᑌᑖᑯᓯ, ᒫᐗᒡ ᐃᑯ ᑭᑌᑖᑯᓯ ᑳᑎᐯᒋᑫᒡ ᑳᒫᐗᒋ ᒪᔅᑲᐌᑖᑯᓯᒡ, ᐅᑭᒋ ᐃᓀᑖᑯᓯᐎᓐ ᓴ ᐐᑫ ᒨᔥᑭᓀᓂ ᒥᓯᐌ ᐊᑮᕽ᙮ 4 ᑳᐊᐲᒋ ᑭᔒᐌᐙᒡ ᑕᔥ ᐁᔖᑯᐙᓂᑎᐙᒡ ᑮᑯᔥᑯᓭᓂ ᑳᑮ ᐃᔑ ᐸᑕᑭᑌᓂᒃ ᑭᒋ ᐊᓇᒥᐁᐎᑲᒥᒃ, ᒦᑕᔥ ᑲᔦ ᐐᑫ ᑳᑮ ᒨᔥᑭᓀᔮᐸᑌᓂᒃ ᑭᒋ ᐊᓇᒥᐁᐎᑲᒥᒃ᙮ 5 ᒦᑕᔥ ᐅᐅ ᑳᐃᓇᑌᒧᔮᓐ, ᐐᑫ ᓂᑰᐹᓯᓈᑯᔅ! ᒦ ᒫᐐᓐ ᐃᐃ ᒋᓂᔑᐗᓈᑎᓯᔮᓐ ᐋᓃᔥ ᐁᑕᔂ ᑲᑮᑭᑐᔮᓐ ᒪᒋᐃᔑᑮᔗᐎᓐ ᓂᑑᓂᕽ ᐅᒋ ᓵᑲᐊᒨᒪᑲᓐ᙮ ᓂᐐᒋᑖᒫᑲᓇᒃ ᑲᔦ ᐐᓇᐙ ᐱᔑᔑᒃ ᒪᒋᐃᔑᑮᔗᐗᒃ᙮ ᔖᑰᒡ ᑕᔥ ᓃᓐ ᐃᑯ ᓂᔥᑮᔑᑯᕽ ᓂᑮ ᐅᒋ ᐙᐸᒫ ᑭᒋᐅᑭᒫ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ᙮ 6 ᒦᑕᔥ ᐯᔑᒃ ᑳᐃᔥᑯᑌᐎᒡ ᑮᐲᒋᓭ ᐁᔑᐊᔮᐗᒃ ᐁᑮ ᐱ ᑕᑯᓇᕽ ᐃᔥᒀᑭᔐᓂ ᑳᑮ ᐃᔥᑯᑌᐗᓂᓂᒃ᙮ ᐃᐃᒫ ᓴ ᐅᑮ ᐅᑎᓈᓐ ᑳᔑ ᐸᑭᑎᓈᓱᕽ ᐁᑮ ᐋᐸᒋᑑᒡ ᐲᐙᐱᑯᒫᑾᒋᑲᓇᓐ᙮ 7 ᒦ ᓴ ᐃᐃᐌᓂ ᑳᐱ ᓵᒥᓯᑑᒡ ᓂᑑᓂᕽ ᐅᐅ ᐁᑮᐃᔑᒡ, ᐃᓇᔥᑫ ᐅᐅ ᑭᑮ ᓵᒥᔥᑳᑯᓐ ᑭᑑᓂᕽ; ᐃᐃ ᓴ ᑭᒪᒋᐃᔑᐌᐱᓯᐎᓐ ᑭᑑᑖᐱᓇᒫᑯ, ᑭᒪᒋᑑᑕᒧᐎᓇᓐ ᑲᔦ ᐴᓀᒋᑳᑌᐗᓐ, ᓂᑮᐃᒃ᙮ 8 ᒦᑕᔥ ᐃᐃ ᑳᑮ ᓅᑕᐗᒃ ᑳᑎᐯᒋᑫᒡ ᐁᐃᑭᑐᒡ, ᐊᐌᓀᓐ ᑕᔥ ᑫᐃᔑᓂᔕᐗᒃ? ᐊᐌᓀᓐ ᑕᔥ ᐃᓈ ᑫᐃᔖᑕᒪᐎᓇᑭᐸᓐ? ᐅᐅ ᑕᔥ ᓂᑮ ᐃᔑ ᓇᑴᑕᒻ, ᓃᓐ ᓴ ᓂᑲ ᐃᔖ, ᓃᓐ ᐃᔑᓂᔕᐅᔑᓐ! 9 ᒦᑕᔥ ᐅᐅ ᑳᐃᔑᒡ, ᒫᒑᓐ, ᐅᐅᐌᓂ ᐐᑕᒪᐤ ᐅᑯ ᐯᒫᑎᓯᐙᒡ, ᐋᓃᓐ ᓴ ᒥᓂᒃ ᐋᓇ ᐱᓯᑕᒣᒃ, ᒪᔑ ᑕᔥ ᐁᓂᓯᑐᑕᓯᐌᒃ᙮ ᐋᓃᓐ ᐃᑯ ᒥᓂᒃ ᑲᔦ ᐋᓇ ᐃᓈᐱᔦᒃ, ᑳᐐᓐ ᓴ ᑲᓇᑫ ᑭᑭᑫᑕᓰᒻ ᑳᐙᐸᑕᒣᒃ᙮ 10 ᐃᔑᐞ ᐃᑭ ᐯᒫᑎᓯᐙᒡ ᒋᓂᓯᑕᐌᑕᓯᒀ ᐅᑌᐃᐙᕽ ᒋᑲᑮᐱᑌᐙᒡ, ᒋᑲᑮᑆᐱᐙᒡ ᑲᔦ᙮ ᑮᔥᐱᓐ ᐄᑐᒃ ᐅᔥᑮᔑᑯᐙᕽ ᐅᒋ ᐙᐱᐙᒡ, ᐅᑕᐗᑭᐙᕽ ᑲᔦ ᐅᒋ ᓅᑕᒧᐙᒡ, ᓂᓯᑐᑕᒧᐙᒡ ᑲᔦ ᐅᑌᐃᐙᕽ, ᒫᑭᔖ ᓴ ᑕᐱ ᑴᑮᐗᒃ ᒋᐊᑕᐎᐊᒀᐸᓐ᙮ 11 ᒦᑕᔥ ᐅᐅ ᑳᐃᓇᒃ, ᐋᓃᓐ ᑕᔥ ᒥᓂᒃ ᐅᐅ ᑫᐃᔑᓭᒃ? ᒦᔥ ᐅᐅ ᑳᐃᔑᒡ, ᐹᓂᒫ ᓴ ᐃᓂ ᐆᑌᓇᐗᓐ ᑕᑕᑯᓯᑭᓐ, ᐊᐎᔭ ᑲᔦ ᐃᐃᒫ ᑭᑫᑖᑯᓯᓯᒃ, ᐙᑳᐃᑲᓇᓐ ᑲᔦ ᐐᑫ ᐱᔑᔑᒀᑭᓐ, ᐹᓂᒫ ᐐᑫ ᓂᔑᐗᓈᓯᓈᑾᒃ ᑖᐱᔥᑰ ᐁᐱᑾᑕᑲᒥᑯᐗᕽ ᐃᐃ ᐊᑭ᙮ 12 ᐙᓴ ᓴ ᓂᑲ ᐃᔑᓂᔕᐙᒃ ᐯᒫᑎᓯᐙᒡ, ᐃᐃ ᑕᔥ ᐊᑭ ᐐᑫ ᑕᓂᔑᐗᓈᓯᓈᑾᓐ᙮ 13 ᒥᓴᐙ ᑯ ᓴ ᐯᔑᒃ ᐊᐎᔭ ᐃᔥᑯᓭᒡ ᐁᑕᓱ ᒥᑖᒋᐎᓐᒡ, ᑫᐐᓐ ᓴ ᑕᓂᔑᐗᓈᒋᐋ᙮ ᒦ ᓴ ᐃ ᑫᐃᔑᓈᑯᓯᒡ ᑖᐱᔥᑰ ᐅᒃ ᑎᓄᐙᑎᒃ ᑫᒫ ᑲᔦ ᑯᑕᒃ ᑭᒋ ᒥᑎᒃ ᑳᑲᐗᐅᓐᒡ᙮ ᒦ ᓴ ᐃᐌ ᑮᔥᑲᑕᐃᑲᓂᕽ ᑫᐅᒋ ᒫᒌ ᐊᔮᓂᒡ ᑭᔐᒪᓂᑑ ᐅᐱᒫᑎᓰᒪᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society