Aaiseya 54 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐁᔑᓵᑭᐋᒡ ᐃᔅᕒᐃᔭᓬᐊᐞ 1 ᐆ ᒉᕒᐆᓴᓬᐊᒻ, ᒦ ᓴ ᐃ ᐁᓀᑖᑯᓯᔭᓐ ᑖᐱᔥᑰ ᐃᑴ ᑳᑲᔥᑭᑑᓯᒃ ᒋᐅᓃᒑᓂᓯᒡ᙮ ᓅᑯᒻ ᐃᑕᔥ ᒦ ᐃ ᐁᓂᑯᒃ ᐃᔑ ᔖᑯᐌᓐ ᒋᓂᑲᒧᔭᓐ, ᐐᑳ ᑳᐐᓴᑳᐱᓀᓯᐗᓐ ᒋᐅᑕᐱᓅᒌᔑᒥᔭᓐ! ᓇᐗᒡ ᓴ ᑮᓐ ᑭᑲ ᐹᑏᓄᐋᒃ ᐊᐱᓅᒌᔕᒃ ᐊᐲᒡ ᐐᓐ ᐊᐊ ᐃᑴ ᑳᐅᒋ ᓇᑲᓂᑯᓯᒃ ᐅᓈᐯᒪᓐ᙮ 2 ᒥᒑᑑᓐ ᑭᐸᒀᓀᑲᒥᒃ, ᑫᑯ ᒪᓈᒋ ᑕᔗᑮᑭᐱᑑᑫᓐ᙮ ᓇᑳᐲᑭᓇᓐ ᑭᒋᐗᐱᒋᑲᓇᓐ, ᐊᔩᑕᑭᑑᓐ ᑲᔦ ᑭᒋᐙᑾᐃᑲᓇᓐ᙮ 3 ᑭᑭᒋᓂᑭᕽ, ᑭᓇᒪᑎᓂᑭᕽ ᓴ ᓇᑫ ᐃᔑ ᒪᑲᑌᔥᑳᓐ; ᑭᐲᐌᓰᒪᒃ ᐃᑕᔥ ᐅᑲ ᒪᑲᒫᐙᐞ ᑯᑕᒃ ᐊᐎᔭᐞ ᑳᑖᓄᑕᒥᓂᒡ ᐅᐅ ᐊᑭ᙮ ᒦᑕᔥ ᒋᔑ ᑲᐯᔑᐙᒡ ᐆᑌᓇᐗᓐ ᑳᐸᐱᔑᔑᒀᓂᑭᓐ᙮ 4 ᑫᑯ ᓭᑭᓯᑫᓐ, ᑳᐐᓐ ᒦᓇᐙ ᑭᑲ ᐊᑲᒋ ᔖᑰᒋᐃᑰᓰ; ᑳᐐᓐ ᑭᑲ ᓃᓭᓂᒥᑰᓰ᙮ ᒦᑕᔥ ᒋᐗᓃᑫᔭᓐ ᑳᑮ ᐃᔑ ᒪᒫᔒᔭᓐ ᑮᐅᔥᑳᑎᓯᔭᓐ, ᒦᔥ ᑲᔦ ᒋᐗᓃᑫᓄᑕᒪᓐ ᑳᑮ ᐃᔑ ᑰᐹᑌᑕᒪᓐ ᑮᑮᐙᒋᑴᐎᔭᓐ᙮ 5 ᑳᑮ ᐅᔑᐃᒃ ᐄᑐᒃ ᒦ ᐊᐌ ᑭᓈᐯᒻ, ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᑳᐃᔑᓂᑳᓱᒡ, ᐃᔅᕒᐃᔭᓬᐊᒃ ᐅᑭᑌᑖᑯᓰᒥᐙᓐ ᐅᔕ ᑭᐱᒫᒋᐃᐌᒻ, ᒦ ᓴ ᐊᐌ ᑳᐃᒋᑲᓂᐎᒡ ᑳᑭᔐᒪᓂᑑᐎᒡ ᒥᓯᐌ ᐅᐅᒫ ᐊᑮᕽ᙮ 6 ᐃᔅᕒᐃᔭᓬᐊᒃ Israel, ᒦ ᓴ ᐃ ᐁᓀᑖᑯᓯᔭᓐ ᑖᐱᔥᑰ ᐅᔥᑭᑴᐙᓐ ᑳᑮ ᓇᑲᓂᑯᒡ ᐅᓈᐯᒪᓐ ᑳᒫᓀᑕᕽ᙮ ᑳᑎᐯᒋᑫᒡ ᑭᑭᔐᒪᓂᑑᒻ ᐅᔕ ᑭᓇᑐᒥᒃ, ᐅᐅ ᐁᐃᑭᑐᒡ, 7 ᐊᒋᓇ ᓴ ᐁᑕ ᑭᑮ ᓇᑲᓂᓐ; ᐐᑫ ᑕᔥ ᐁᑰᐹᑌᓂᒥᓈᓐ ᑳᐐ ᐅᒋ ᑮᐌ ᐅᑖᐱᓂᓈᓐ᙮ 8 ᐊᒋᓇ ᓴ ᑭᑮ ᓇᑲᓂᓐ ᐁᑮ ᓂᔥᑳᑎᓯᔮᓐ, ᐁᐊᔮᔮᓐ ᐃᑕᔥ ᓀᐱᒋ ᒥᓄᑑᑖᑫᐎᓐ, ᒦ ᓴ ᐃ ᑳᐅᒋ ᑰᐹᑌᓂᒥᓈᓐ᙮ ᒦ ᓴ ᐃ ᐁᓂᒃ ᑳᑎᐯᒋᑫᒡ ᑳᐱᒫᒋᐃᒃ᙮ 9 ᒦ ᓴ ᐃ ᓃᓐ ᐁᓀᑕᒫᓐ ᑖᐱᔥᑰ ᐊᐲ ᓅᐗ Noah ᐅᐅᒫ ᑮᐊᔮᐸᓐ, ᐁᑮ ᐃᔑ ᐊᔓᑕᒫᐹᓐ ᒦᓇᐙ ᐐᑳ ᒋᓂᑭᐲᓯᓄᒃ ᐅᐅ ᐊᑭ᙮ ᒦᑕᔥ ᐁᔑ ᐊᔓᑕᒪᐎᓈᓐ ᐐᑳ ᒦᓇᐙ ᒋᓂᔥᑳᑎᓰᑲᑕᐎᓯᓄᐎᓈᓐ, ᐐᑳ ᑲᔦ ᒦᓇᐙ ᒋᑭᒋ ᓅᒋᐃᓯᓄᐎᓈᓐ᙮ 10 ᒥᓴᐙ ᓴ ᑯ ᐗᒌᓐ ᑳᐱᑾᑎᓈᑭᓐ ᑲᔦ ᔔᔥᑯᓭᑭᓐ, ᐃᐃ ᓴ ᑳᔑ ᒥᓄᑑᑕᐎᓈᓐ ᑳᐐᓐ ᑭᑲ ᒪᑲᒥᑰᓰ, ᐃᐃ ᑲᔦ ᑳᑮ ᐅᔑᑕᒪᐎᓈᐸᓐ ᐱᓵᓐ ᑫᔑ ᐐᒌᑎᔭᕽ ᑳᐐᓐ ᑕᐗᑲᐎᓭᓯᓅᓐ, ᐃᑭᑐ ᑳᑎᐯᒋᑫᒡ ᑳᑰᐹᑌᓂᒥᒃ᙮ ᐋᓃᓐ ᑫᓂᐃᔑᓭᒃ ᒉᕒᐆᓴᓬᐊᒻ 11 ᒦᔥ ᐁᑭᑐᒡ ᑳᑎᐯᒋᑫᒡ, ᐆ ᒉᕒᐆᓴᓬᐊᒻ ᑫᒀᑕᑭᑑᔭᓐ, ᐁᓀᑖᑯᓯᔭᓐ ᐁᔑᐊᔮᔭᓐ ᑳᔑ ᐋᓴᒪᐊᕽ᙮ ᑳᐐᓐ ᑲᔦ ᐊᐎᔭ ᐊᔮᓰ ᒋᓇᐁᑕᒧᐃᒃ᙮ ᐊᐲ ᓴ ᑮᐌ ᐅᔑᑑᔮᓐ ᑲᔑ ᐸᑕᑭᓱᔭᓐ, ᐊᓯᓃᒃ ᑳᐊᑭᓱᐙᒡ ᓴ ᓂᑲ ᐋᐸᒋᐋᒃ᙮ 12 ᑭᑑᓵᐱᐎᓇᓐ ᓴ ᐅᕒᐆᐱ ᑎᓄ ᐊᓯᓃᒃ ᑕᐋᐸᑎᓯᐗᒃ ᐅᔑᒋᑳᑌᒃ, ᑭᑎᔥᒀᑌᒥᕽ ᓴ ᐐᓐ ᑳᓴᓵᑳᑌᔮᐱᑭᔥᑳᒡ ᐊᓯᓐ ᑕᐋᐸᑎᓯ, ᐁᓂᑯᒀᒃ ᐃᑕᔥ ᐃᐃ ᐙᑳᔮᐱᑭᓂᑲᓐ ᑳᐊᑭᓱᐙᒡ ᐊᓯᓃᒃ ᑕᐋᐸᑎᓯᐗᒃ᙮ 13 ᓃᓐ ᓴ ᐱᑯ ᓂᑲ ᑭᑭᓄᐊᒪᐙᒃ ᑭᓃᒑᓂᓯᐙᒃ, ᐐᑫ ᓴ ᑕᔥ ᑕᑭᒋ ᒥᓄᓭᐗᒃ᙮ 14 ᐃᐃ ᓴ ᐌᐌᓂ ᐃᓈᑯᓂᑫᐎᓐ, ᑾᔭᑯᒋᑫᐎᓐ ᑲᔦ ᑭᑲ ᒪᔥᑲᐎᓰᐃᑰᒻ, ᑳᐐᓐ ᐃᑕᔥ ᑫᑰᓐ ᑭᑲ ᑯᑕᓰᒻ᙮ ᑳᐐᓐ ᑲᔦ ᐊᐗᔑᒣ ᐌᓵᓂᐃᑰᐎᓐ, ᑯᑖᒋᐎᓐ ᑲᔦ ᑭᑲ ᐅᑎᓯᑯᓰᒻ᙮ 15 ᑮᔥᐱᓐ ᐃᑕᔥ ᐊᐎᔭ ᒦᑳᓂᓀᒃ, ᑳᐐᓐ ᓃᓐ ᐃᐃ ᓂᑎᔑᒋᑫᐎᓐ; ᐊᐌᓀᓐ ᓴ ᐱᑯ ᑫᒦᑳᓂᓀᒃ ᑕᐸᑭᒌ ᐁᔑᐊᔮᐌᒃ᙮ 16 ᓃᓐ ᐅᔕ ᑳᐅᔑᐊᒃ ᐲᐙᐱᑯᑫᐎᓂᓂ, ᑳᐱᔅᑲᓀᔮᔑᒫᒡ ᐃᔥᑯᑌᐗᓯᓃᓐ ᑳᐅᔑᑑᒡ ᒦᑳᓱᐎ ᐋᐸᒋᒋᑲᓐ ᐋᓃᓐ ᑫᐃᓍᑌᓂᒃ᙮ ᓃᓐ ᑲᔦ ᑳᐅᔑᐊᒃ ᔑᒫᑲᓂᔥ ᒋᓂᔑᐗᓈᒋᒋᑫᒡ᙮ 17 ᑳᐐᓐ ᓴ ᒦᑳᓱᐎ ᐋᐸᒋᒋᑲᓐ ᑳᐃᓈᐸᑕᒃ ᒋᒦᑳᓂᑰᔦᒃ ᑭᑲ ᔖᑰᒋᐃᑯᓰᒻ; ᑭᑲ ᔖᑰᓱᒫᐙ ᑲᔦ ᐊᐎᔭ ᑳᐊᓈᒥᒥᓀᒃ᙮ ᒦ ᓴ ᐃ ᓇᑫ ᓂᑕᓄᑮᐋᑲᓇᒃ ᐁᔑ ᑎᐱᓇᐌᐎᓯᐙᒡ ᓃᓐ ᑲᔦ ᑳᐅᒋ ᔖᑰᒋᑣᐙᒡ, ᒦ ᓴ ᐃ ᐁᑭᑐᒡ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society