Aaiseya 53 - ᐅᒋᐺ ᑭᒋᒪᓯᓇᐃᑲᓐ1 ᑳᓇᑲ ᐊᐌᑴᓐ ᑳᑌᐺᑕᒧᑴᓐ ᑭᑎᐹᒋᒧᐎᓂᓈᓐ? ᑳᓇᑲ ᑲᔦ ᐊᐌᓀᓇᓐ ᑳᑎᐯᒋᑫᒡ ᐅᐅᐌᓂ ᑳᐙᐸᑕᐋᑴᓐ? 2 ᐁᓈᓴᒦᓂᒡ ᓴ ᑮᐃᔑ ᐅᐱᑭ ᐁᑮ ᐃᔑᓈᑯᓯᒡ ᑖᐱᔥᑰ ᐅᔥᑭ ᒥᑎᒃ ᑳᐱᓵᑭᑭᒡ᙮ ᑮᐃᔑᓈᑯᓯ ᑲᔦ ᑖᐱᔥᑰ ᐗᑕᑉ ᑳᐱᓵᑭᑭᒡ ᑳᔑ ᐹᑌᑲᒥᑳᓂᒃ᙮ ᑳᐐᓐ ᓴ ᑮᒥᓄᓈᑯᓯᓰ, ᑳᐐᓐ ᑲᔦ ᑮᐅᑭᒫᐎᓈᑯᓯᓰ ᒋᐃᔑ ᐐᑯᔥᑳᐎᑭᑎᐸᓐ ᐁᔑᐊᔮᒡ ᑳᐐᓐ ᑲᔦ ᐊᐙᒡ ᐃᑯ ᑮᐃᔑᓈᑯᓯᓰ ᑫᑮ ᐅᒋ ᒥᓴᐌᓂᒥᑎᐸᓐ᙮ 3 ᑮᔒᑫᒋᑲᓂᐎ, ᐅᑮ ᐋᓇᐌᓂᒥᑯᐞ ᑲᔦ ᐃᓂᓂᐗᐞ᙮ ᐐᓐ ᓴ ᑳᑮ ᐐᓴᑫᑕᕽ, ᐐᑫ ᑲᔦ ᐅᑮ ᓇᑲᑌᑖᓐ ᑲᒀᑕᑭᑑᐎᓐ᙮ ᑳᐐᓐ ᓴ ᐊᐎᔭᓐ ᐅᑮ ᑲᔥᑭᑑᓰᓂ ᒋᑲᓇᐙᐸᒥᑯᒡ, ᐁᑮ ᐋᓇᐌᓂᒥᓐᒡ, ᑳᐐᓐ ᑲᔦ ᑭᑮ ᑭᒋ ᐃᓀᓂᒫᓯᐙᓈᓐ᙮ 4 ᑌᐺ ᓴ ᐐᓐ ᑭᑮ ᐱᒥᐎᑕᒫᑯᓈᓐ ᑫᑮ ᐃᔑ ᐐᓴᑫᑕᒧᐗᑭᐸᓐ, ᐐᓐ ᑲᔦ ᐅᑮ ᐱᒥᐎᑑᓇᓐ ᑭᑲ ᒀᑕᑭᑑᐎᓂᓈᓂᓐ᙮ ᒦᑕᔥ ᐁᓀᑕᒪᕽ ᑭᔐᒪᓂᑑᓐ ᐁᓇᓇᐊᓯᑯᒡ ᐃᐃ ᑳᐅᒋ ᑲᒀᑕᑭᑑᒡ, ᑳᐅᒋ ᐐᓴᑫᑕᕽ᙮ 5 ᑭᒪᒋᑑᑕᒧᐎᓂᓈᓂᓐ ᐅᔕ ᑳᑮ ᐅᒋ ᒫᑭᒋᑲᓂᐎᒡ, ᑮᐅᒋ ᐸᐸᑭᑌᐃᑲᓂᐎ ᑭᒪᒫᔒᐎᓂᓈᓂᓐ; ᐃᐃ ᓴ ᑳᑮ ᐃᔑ ᓇᓇᐊᓯᓐᒡ ᒦ ᐃᒫ ᐌᑎᓇᒪᕽ ᐱᓵᓂᓯᐎᓐ᙮ ᐃᐃ ᓴ ᑳᑮ ᐃᔑ ᐸᐸᔕᔐᐅᓐᒡ ᒦ ᓴ ᐃᐃᒫ ᐌᒋ ᐊᑕᐎᐃᑰᔭᕽ᙮ 6 ᑲᑭᓇ ᓴ ᑳᑕᔑᔭᕽ ᑭᑮ ᐃᔑᓈᑯᓯᒥᓐ ᑖᐱᔥᑰ ᒫᓇᒑᓂᔕᒃ ᑳᐗᓂᔑᓄᐙᒡ, ᑮᓇᐎᓐᑦ ᐃᑯ ᐁᐃᔖᔭᕽ ᐗᐃᔖᔭᕽ᙮ ᑳᑎᐯᒋᑫᓂᒡ ᐅᔕ ᐅᑮ ᐊᑕᒫᑰᓐ ᒋᐱᒥᐎᑑᒡ ᑲᑭᓇ ᑳᑕᔑᐗᑭᒡ ᑭᒪᒋᑑᑕᒧᐎᓂᓈᓂᓐ᙮ 7 ᐐᑫ ᓴ ᑮᐌᓵᓂᐋ, ᑮᑲᒀᑕᑭᐋ ᑲᔦ, ᔖᑰᒡ ᐃᑕᔥ ᑳᐐᓐ ᑫᑰᓐ ᑮᐃᑭᑐᓰ᙮ ᐁᑮ ᑑᒋᑲᓂᐎᒡ ᑖᐱᔥᑰ ᒫᓇᒑᓂᔐᔅ ᑳᐐ ᓂᓯᓐᒡ᙮ ᐁᑮ ᑑᒋᑲᓂᐎᒡ ᑖᐱᔥᑰ ᒫᓇᒑᓂᔥ ᑳᐐ ᐸᔥᑯᔓᓐᒡ, ᑳᐐᓐ ᐊᐙᒡ ᑫᑰᓂᓂ ᒋᑮ ᐃᑭᑐᒡ᙮ 8 ᑮᐌᓵᓂᐋ ᐁᑮ ᐅᓈᑯᓂᑲᓂᐎᒡ ᒦᔥ ᑳᐃᔑ ᒫᒌᓂᓐᒡ᙮ ᑳᐐᓐ ᐊᐎᔭᓐ ᐅᐸᐹᐱᓯᔅᑫᓂᒥᑯᓰᓐ ᐋᓃᓐ ᑫᐃᔑᓭᒡ᙮ ᑮᓂᒋᑲᓂᐎ ᒋᐱᒫᑎᓯᓯᒃ ᐅᐅᒫ ᐊᑮᕽ ᐁᔑᐊᔮᓂᒡ ᐯᒫᑎᓯᓂᒡ, ᐁᑮ ᓂᐴᑕᒪᐙᒡ ᓃᒋᐱᒫᑎᓰᒪᐞ ᐅᒪᒋᑑᑕᒧᐎᓂᓃᕽ ᐅᒋ᙮ 9 ᑮᐃᔑ ᐊᓵ ᓴ ᒋᐐᒋ ᓇᐃᓂᑰᒫᒡ ᐅᒪᒑᑎᓰᐞ, ᑳᐌᓅᑎᓯᓂᒡ ᑲᔦ ᑮᓂᐳᒡ ᐋᓇᐐᓐ ᐐᑳ ᑫᑰᓐ ᐁᑮ ᐃᔑ ᒪᒫᔒᓯᒃ, ᐐᑳ ᑲᔦ ᐅᑎᑭᑐᐎᓂᕽ ᐁᑮ ᐅᒋ ᐗᔦᔑᑖᑯᓯᓯᒃ᙮ 10 ᔖᑰᒡ ᑕᔥ ᑳᑎᐯᒋᑫᓂᒡ ᑮᐃᔑ ᒥᓍᐸᑕᒨᓐ ᒋᐌᓵᓂᐃᑯᒡ, ᐁᑮ ᐃᔑᐃᑯᒡ ᑲᔦ ᒋᑲᒀᑕᑭᑑᒡ᙮ ᐋᓇᐐᓐ ᐅᐱᒫᑎᓯᐎᓐ ᐁᑮ ᐃᓍᑌᓂᒃ ᐸᑭᑎᓈᓱᐎᓂᕽ ᑫᐅᒋ ᐴᓀᒋᑳᑌᓂᒃ ᒪᒋᑑᑕᒧᐎᓇᓐ᙮ ᔖᑰᒡ ᓴ ᐅᑲ ᐙᐸᒫᐞ ᐅᐲᐌᓰᒪᐞ, ᑭᓉᔥ ᑲᔦ ᑕᐱᒫᑎᓯ᙮ ᐅᐱᒫᑎᓯᐎᓂᕽ ᓴ ᑕᐃᔑ ᒥᓄᓭᓂ ᑳᑎᐯᒋᑫᓂᒡ ᐅᑎᓀᑕᒧᐎᓂᓂ᙮ 11 ᐊᐲ ᑕᔥ ᑮᐃᔥᒀ ᑲᒀᑕᑭᑑᒡ ᐅᐱᒫᑎᓯᐎᓂᕽ, ᒦᑕᔥ ᒦᓇᐙ ᒋᐊᔮᒡ ᒥᓉᑕᒧᐎᓐ, ᒋᑭᑫᑕᕽ ᐃᔑ ᐊᓂᔖ ᐁᑮ ᑲᒀᑕᑭᑑᓯᒃ᙮ ᐃᐃ ᑕᔥ ᐁᐃᔑ ᑭᑫᑕᕽ ᐊᐊ ᓂᑕᓄᑮᐋᑲᓐ ᑳᑾᔭᒀᑎᓯᒡ, ᓃᐱᐗᐞ ᓴ ᐊᐎᔭᐞ ᐅᑲ ᐊᔨᔑᐋᐞ ᒋᒥᓋᑭᓱᓂᒡ, ᐐᓐ ᐋᓃᔥ ᑳᐐ ᐱᒥᐎᑕᒪᐙᒡ ᐅᒪᒋᑑᑕᒧᐎᓂᓂ᙮ 12 ᒦᑕᔥ ᐃᐃ ᑳᐐ ᐅᒋ ᐃᔑᐊᒃ ᑫᐐᓐ ᐯᔑᑾᓐ ᒋᐃᓀᑖᑯᓯᒡ ᐁᔑᐊᔮᓂᒡ ᑳᑭᒋ ᐃᓀᑖᑯᓯᓂᒡ, ᑫᐐᓐ ᓴ ᑕᐅᒋ ᒦᓈ ᑎᐸᐊᒫᑎᐎᓇᓐ ᓀᓈᐗᐅᑳᓂᑎᓂᒡ ᐁᔑᐊᔮᓂᒡ ᑳᓲᑫᑖᑯᓯᓂᒡ᙮ ᐐᓐ ᐄᑐᒃ ᑳᑮ ᐸᑭᑎᓇᕽ ᐅᐱᒫᑎᓯᐎᓐ ᒋᓂᓯᓐᒡ, ᐁᑮ ᐃᓇᑭᑎᓱᒡ ᑫᐐᓐ ᐁᐐᒌᐙᒡ ᐅᒪᒋᑑᑕᒨᐞ᙮ ᐐᓐ ᐅᔕ ᐱᑯ ᐅᑮ ᐱᒥᐎᑕᒪᐙᐞ ᑳᑮ ᐃᔑ ᒪᒋᑑᑕᒥᓂᒡ ᑳᐹᑏᓄᓂᒡ ᐯᒫᑎᓯᓂᒡ, ᐐᓐ ᑲᔦ ᑳᑮ ᑮᑭᑐᑕᒪᐙᒡ ᐅᒪᒋᐃᔑᒋᑫᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society