Aaiseya 52 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑ ᐅᑲᓈᑕᒪᐙᑖᓐ ᒉᕒᐆᓴᓬᐊᒻ 1 ᐆ ᒉᕒᐆᓴᓬᐊᒻ Jerusalem ᑫᑌᑖᑾᒃ ᑭᒋ ᐆᑌᓇ, ᑕᑲ ᑯᔥᑴᑕᓐ, ᐱᓯᑲᓐ ᑭᒪᔥᑲᐎᓰᐎᓐ ᓵᔭᓐ Zion ᐁᑰᔭᓐ, ᐱᓯᑲᓐ ᑲᔦ ᐌᓂᔑᔑᑭᓐ ᑭᑭᑭᔥᑭᑲᓇᓐ᙮ ᑳᐐᓐ ᓴ ᒦᓇᐙ ᑫᑭᓇᐙᑕᔕᑫᔣᓯᐎᑣ, ᑳᐯᑫᑖᑯᓯᓯᒀ ᑲᔦ ᑭᑲ ᐲᑎᑳᑯᓰᒃ᙮ 2 ᒉᕒᐆᓴᓬᐊᒻ ᐁᔮᔦᒃ ᐗᑲᐎᐸᓂᐅᒃ ᒋᐋᐱᔅᑯᓭᔦᒃ! ᑕᑲ ᐅᒋ ᐸᓯᑸᒃ ᒥᑕᑲᒥᒃ, ᒋᓇᒪᑕᐱᔦᒃ ᐅᑭᒫᐗᐱᐎᓂᕽ! ᐋᐸᐊᒧᒃ ᐃᓂ ᓴᑳᐹᓀᔮᐲᓐ ᑳᑕᑯᐱᓂᑯᔦᒃ, ᑳᑕᑯᓂᑰᔦᒃ ᐯᒫᑎᓯᔦᒃ ᓵᔭᓂᕽ ᐌᒌᔦᒃ᙮ 3 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᑳᐐᓐ ᓴ ᑫᑰᓐ ᑭᑮ ᐃᓇᑭᓱᓰᒻ ᑮᒫᒌᓂᑰᔦᑭᐸᓐ, ᑳᐐᓐ ᐃᑕᔥ ᑲᔦ ᔔᓂᔮ ᑕᐋᐸᑎᓯᓰ ᐊᐲ ᓈᑕᒫᑰᔦᒃ᙮ 4 ᒦᔥ ᐅᐌ ᐁᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᓂᐱᒫᑎᓰᒪᒃ ᓴ ᓂᑕᒻ ᑮᐃᔖᐙᒡ ᐄᒋᐸᑮᕽ Egypt, ᑮᐊᐎ ᐃᔑᑖᐗᒃ ᐌᑎ᙮ ᒦᑕᔥ ᓈᓈᑫ ᐊᓰᕒᐃᔭ Assyria ᐌᒌᓂᒡ ᐃᔑ ᐊᓂᔖ ᑳᑮ ᐌᓵᓂᐃᑯᐙᒡ᙮ 5 ᐃᓇᔥᑫ ᑕᔥ ᓅᑯᒻ ᐌᑎ ᐹᐱᓬᐊᓐ Babylon ᐊᑮᕽ ᒦ ᐃ ᐯᔑᑾᓐ ᐁᔑᓭᐙᒡ ᐃᔑ ᐊᓂᔖ ᐱᑯ ᐁᑮ ᒫᒌᓂᑣ᙮ ᐃᐃ ᑕᔥ ᑲᔦ ᑌᐯᓂᒥᑯᐙᒡ ᑲᑭᒋᑮᔗᐗᐞ᙮ ᑫᑲᐯᑮᔑᒃ ᓴ ᑳᐐᓐ ᐴᓂ ᒫᓀᒋᑳᑌᓯᓅᓐ ᓂᐐᓱᐎᓐ! 6 ᒦᑕᔥ ᓂᐱᒫᑎᓰᒪᒃ ᒋᑭᑫᑕᒧᐙᒡ ᓂᐐᓱᐎᓐ; ᒦᔥ ᐃᐃ ᐊᐲ ᑮᔑᑲᓂᓂᒃ ᒋᑭᑫᑕᒧᐙᒡ ᓃᓐ ᐄᑐᒃ ᐅᐅ ᑳᑮ ᓃᑳᓂ ᐐᑕᒧᐗᒃ᙮ ᑌᐺ ᓴ ᓃᓐ ᑭᔐᒪᓂᑑ᙮ 7 ᐁᑕᑕᐌ ᓴ ᒥᓄᓈᑯᓯ ᐊᐊ ᑳᐱ ᑎᐹᒋᒧᒡ, ᑭᒋ ᐗᒌᕽ ᑳᐱ ᐃᔖᒡ ᐁᐱ ᒥᓍᒋᒧᒡ᙮ ᑳᐱ ᑕᔑᑕᕽ ᐱᓵᓂᓯᐎᓐ, ᑫᑰᓇᓐ ᑲᔦ ᑳᐅᓂᔑᔑᓂᓂᑭᓐ, ᑳᑎᐹᑐᑕᕽ ᐱᒫᒋᐃᑰᐎᓐ, ᐅᐅ ᑳᐃᓈᒡ ᐁᔮᓂᒡ ᓵᔭᓂᕽ, ᑭᑭᔐᒪᓂᑑᒥᐙ ᐅᔕ ᑎᐯᒋᑫ᙮ 8 ᐊᑐᑕᐎᑯᒃ, ᑭᑕᔕᐙᐲᐎᓂᓃᒥᐙᒃ ᐃᐃᒫ ᐆᑌᓈᕽ ᐁᔮᐙᒡ, ᒫᒪᐎ ᔖᑯᐌᐗᒃ ᐅᔕ ᐁᐲᒋ ᒌᑫᑕᒧᐙᒡ᙮ ᐐᓇᐙ ᐱᑯ ᐅᑲ ᐙᐸᒫᐙᓐ ᑳᑎᐯᒋᑫᓂᒡ ᐱᑮᐌ ᑕᑯᔑᓂᓂᒡ ᐃᐃᒫ ᓵᔭᓂᕽ᙮ 9 ᑮᓐ ᑕᔥ ᐆᑌᓇ ᒉᕒᐆᓴᓬᐊᒻ ᐐᑫ ᑳᓂᔑᐙᓯᓈᑯᓯᔭᓐ ᓂᑲᒧᓐ ᑫᐊᐲᒋ ᒌᑫᑕᒪᓐ, ᑳᑎᐯᒋᑫᒡ ᐄᑐᒃ ᑭᐐ ᓈᑕᒫᒃ, ᐅᐐ ᒥᓉᑕᒧᐋᐞ ᑲᔦ ᐅᐱᒫᑎᓰᒪᐞ᙮ 10 ᑳᑎᐯᒋᑫᒡ ᐅᔕ ᑳᑎᐱᓇᐌᐎᓯᒡ ᑳᑭᑌᑖᑾᓂᓂᒃ ᐅᒪᔥᑲᐎᓰᐎᓐ ᐅᑲ ᐋᐸᒋᑑᓐ ᒋᐱᒫᒋᐋᒡ ᐅᐱᒫᑎᓰᒪᐞ, ᑲᑭᓇ ᐅᐅᒫ ᒥᓯᐌ ᐊᑮᕽ ᐁᔮᓂᒡ ᒋᐙᐸᑕᒥᓂᒡ ᐃᐃ ᐅᑎᔑᒋᑫᐎᓐ᙮ 11 ᐌᑎ ᑕᔥ ᐹᐱᓬᐊᓐ ᐊᑮᕽ ᐅᒋ ᒫᒑᒃ, ᑫᑯ ᐸᐹᒣᑕᑫᒃ ᑫᑰᓐ ᑳᐐᓇᑕᒃ! ᐐᑫ ᐯᑫᑖᑯᓰᒃ ᐌᑎ ᐅᒋ ᒫᒑᔦᒃ, ᑮᓇᐙ ᑳᐱᒥᐎᑑᔦᒃ ᐋᐸᒋᒋᑲᓇᓐ ᑭᒋ ᐊᓇᒥᐁᐎᑲᒥᑯᕽ ᑳᐅᒋ ᑎᐯᑖᑾᑭᓐ᙮ 12 ᑳᐐᓐ ᓴ ᐃ ᐊᐲ ᑭᑲ ᐊᔪᒑᓂᒥᐸᐃᐌᓰᒻ ᐐᒫᒑᔦᒃ; ᑳᑎᐯᒋᑫᒡ ᐅᔕ ᑭᑲ ᓃᑳᓃᑕᒫᑯᐙ, ᐃᔅᕒᐃᔭᓬᐊᒃ ᐅᑭᔐᒪᓂᑑᒥᐙᓐ ᐅᑖᓈᕽ ᑲᔦ ᑕᐱᒥᐊᔮ ᒋᐱ ᑲᓇᐌᓂᒥᓀᒃ᙮ ᐊᓄᑮᐋᑲᓐ ᑳᐐᑲᒀᑕᑭᑑᒡ ᐁᑕᔑᓱᒡ 13 ᒦ ᐅᐌ ᐁᑭᑐᒡ ᑳᑎᐯᒋᑫᒡ, ᐃᓇᔥᑫ, ᐙᐸᒥᒃ ᓂᑕᓄᑮᐋᑲᓐ ᐁᐐ ᒥᓄᓭᒡ, ᐋᐱᒋ ᓴ ᑕᓂ ᐃᔥᐸᑭᒫ ᒋᐊᓂ ᐃᔥᐯᑖᑯᓯᒡ, ᐐᑫ ᑲᔦ ᑕᓂ ᑭᒋ ᐃᓀᑖᑯᓯ᙮ 14 ᑮᐹᑏᓄᐗᒃ ᓴ ᐯᒫᑎᓯᐙᒡ ᑳᑮ ᑭᒋ ᒫᒪᑳᓯᓇᐙᐙᒡ; ᐋᓃᔥ ᑳᐐᓐ ᓭᓯᒃ ᑮᐃᔑᓈᑯᓯᓰᐗᓐ ᐅᐐᔭᐎᓂᕽ᙮ ᐐᑫ ᓴ ᑮᑭᒋ ᐃᓈᐱᓇᓈᑲᓂᐎᐗᓐ, ᒦᔥ ᐊᐎᔭᐎᕽ ᑳᑮ ᐅᒋ ᐃᔑᓈᑯᓯᓯᓂᒃ᙮ 15 ᐋᐱᒋ ᓴ ᑕᐹᑏᓉᐙᓇᑭᓯᐗᐞ ᐯᒫᑎᓯᓂᒡ ᑫᒫᒪᑳᑌᓂᒥᑯᒡ, ᑭᒋᐅᑭᒫᐞ ᑕᔥ ᑳᐐᓐ ᐅᑲ ᑲᔥᑭᑑᓰᓂ ᒋᑮᑭᑐᓂᒡ ᑫᐊᐲᒋ ᒫᒪᑳᑌᑕᒥᓂᒡ᙮ ᐃᐃᐌᓂ ᑕᔥ ᑳᑮ ᐐᑕᒪᐙᓯᐎᒥᑎᐸᓐ ᒦ ᐃ ᐸᔦᔥ ᒋᐙᐸᑕᒥᓂᒡ; ᐃᐃᐌᓂ ᑲᔦ ᑳᑮ ᓅᑕᓯᓂᒃ, ᒦ ᐃ ᐸᔦᔥ ᒋᓂᓯᑐᑕᒥᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society