Aaiseya 5 - ᐅᒋᐺ ᑭᒋᒪᓯᓇᐃᑲᓐᓂᑲᒧᓐ ᑳᐃᔑᓯᕽ ᐁᑕᔑᑌᒃ ᑳᔑᑭᑎᑳᓱᐙᒡ ᔔᒥᓇᒃ 1 ᓂᐐ ᓇᑲᒧᑕᐙ ᓴ ᐯᔑᒃ ᑳᓵᑭᐊᒃ ᐁᐐ ᐃᓄᑕᒧᐗᒃ ᑳᔑ ᑭᑎᑳᓈᒡ ᔔᒥᓇᐞ᙮ ᑳᓵᑭᐊᒃ ᓴ ᐅᑮ ᐊᔮᓐ ᐯᔑᒃ ᐃᐃ ᑎᓄ ᑭᑎᑫᐗᑲᒥᒃ ᐃᐃᒫ ᐋᓴᒪᑎᓐ ᑳᔑ ᒥᓄᑭᓂᓂᒃ ᑫᑰᓐ᙮ 2 ᑮᐱᑭᔥᑲᑲᒥᑭᐱᒋᑫ ᓴ ᐁᑮ ᒫᒨᔕᑭᓈᒡ ᐊᓯᓃᐞ, ᒦᑕᔥ ᑳᐃᔑ ᑭᑎᑳᓈᒡ ᒫᐗᒡ ᐃᑯ ᐌᓂᔑᔑᓂᒡ ᔔᒥᓈᑎᑰᐞ᙮ ᐅᑮ ᐅᔑᑑᓐ ᑲᔦ ᐅᓵᐱᐎᓐ ᐙᐅᒋ ᑲᓇᐌᑕᕽ ᑳᑮ ᑭᑎᑳᑕᕽ, ᑮᐙᓂᑫ ᑲᔦ ᐋᓃᑎ ᑫᐃᔑ ᔑᑯᔥᑭᑳᓱᓂᒡ ᑳᑮ ᑭᑎᑳᓈᒡ᙮ ᒦᑕᔥ ᑳᐃᔑ ᐲᐋᒡ ᐐᑫ ᒋᒥᓄ ᓂᑖᐎᑭᓂᒡ, ᐐᑫ ᓴ ᑕᔥ ᑮᐐᓴᑭᐳᑯᓯᐗᐞ᙮ 3 ᒦᑕᔥ ᐅᐅ ᐁᑭᑐᒡ ᑳᓵᑭᐊᒃ, ᑮᓇᐙ ᑳᐃᔑᑖᔦᒃ ᐃᐃᒫ ᒉᕒᐆᓴᓬᐊᒥᕽ Jerusalem, ᐃᐃᒫ ᑲᔦ ᒎᑕ Judah ᐊᑮᕽ, ᑕᑲ ᐊᑕ ᑭᑫᓂᒥᔑᒃ, ᐊᑕ ᑭᑫᑕᒧᒃ ᑲᔦ ᐃᐃ ᑳᔑ ᑭᑎᑳᓱᐙᒡ ᔔᒥᓇᒃ᙮ 4 ᐋᓃᓐ ᑕᔥ ᐊᐗᔑᒣ ᑫᑮ ᑑᑕᒫᐹᓐ ᐃᐃ ᓂᑭᑎᑫᐗᑲᒥᒃ? ᐌᑯᓀᓐ ᑕᔥ ᑳᐅᒋ ᓂᑖᐎᑭᐙᒡ ᑳᐐᓴᑭᓯᐙᒡ ᔔᒥᓇᒃ, ᑳᐅᓂᔑᔑᐙᒡ ᔔᒥᓇᒃ ᑕᔥ ᐋᓇᑮᐲᐊᒀ? 5 ᑭᐐ ᐐᑕᒪᐎᓂᓂᒻ ᓴ ᑕᔥ ᐋᓃᓐ ᐙᑑᑕᒫᓐ ᐃᐃ ᑳᔑ ᑭᑎᑳᓇᒀ ᔔᒥᓇᒃ᙮ ᓂᐐ ᓂᓂᔅᑯᐱᑑᓐ ᓴ ᐃ ᑳᐙᑳᓯᕽ ᐁᐐ ᐲᑯᓇᒫᓐ ᑳᐅᒋ ᐋᒋᔑᓄᓈᓂᐗᕽ᙮ ᒦᑕᔥ ᐃᐃ ᐱᓵᓐ ᐃᑯ ᒋᑕᑕᑯᑳᑌᒃ ᐐᑫ ᒋᐲᑯᔥᑭᑳᑌᒃ᙮ 6 ᐱᓵᓐ ᐃᓴ ᑯ ᓂᐐ ᐸᑭᑎᓈᓐ ᐃᐃ ᑭᑎᑫᐗᑲᒥᒃ ᒋᓂᔑᐗᓈᑕᒃ᙮ ᑳᐐᓐ ᓴ ᓂᐐ ᒫᒦᓄᔣᓰᒃ ᔔᒥᓈᑎᑰᒃ, ᑳᐐᓐ ᑲᔦ ᓂᐐ ᐸᒥᑑᓰᓐ ᐃᐃ ᒥᑕᑲᒥᒃ᙮ ᐱᓵᓐ ᓴ ᑲᔦ ᐊᓅᒋᑯᐙᑎᑰᓐ, ᑳᐎᒥᓇᑲᔒᒃ ᑲᔦ ᑕᓂᑖᐎᑭᐗᒃ᙮ ᓂᐐ ᑲᓅᑖᓇᓐ ᑲᔦ ᐊᐙᒡ ᐗᑸᓐ ᐃᐃᒫ ᒋᔑ ᑭᒥᐗᓯᓄᒃ᙮ 7 ᐃᔅᕒᐃᔭᓬᐊᒃ ᓴ ᒦ ᐃ ᐁᔑᓈᑯᓯᐙᒡ ᐃᐃ ᑭᑎᑫᐗᑲᒥᒃ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᑳᑎᐯᑕᕽ, ᐃᑭ ᑕᔥ ᐐᓐ ᔔᒥᓈᑎᑰᒃ ᑳᑮ ᑭᑎᑳᓱᐙᒡ ᒦᐗᒃ ᓴ ᐃᑭ ᐯᒫᑎᓯᐙᒡ ᒎᑕ ᐊᑮᕽ ᑳᐅᒌᐙᒡ᙮ ᐅᑮ ᐸᑯᓭᓂᒫᐞ ᓴ ᒋᒥᓄᑑᑕᒥᓂᒡ, ᑌᑾᒡ ᐃᑕᔥ ᑮᓂᓯᑎᐗᐞ᙮ ᑾᔭᑯ ᐃᔑᐌᐱᓯᐎᓐ ᑕᔥ ᐁᑮ ᐸᑯᓭᑕᕽ, ᑌᑾᒡ ᐃᑕᔥ ᐅᑮ ᓅᑕᐙᐞ ᐊᐎᔭᐞ ᐁᐃᓇᑌᒧᓂᒡ ᐁᐊᑕᐌᑕᒥᓂᒡ ᐌᐌᓂ ᒋᑑᑕᐎᒥᓐᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society