Aaiseya 49 - ᐅᒋᐺ ᑭᒋᒪᓯᓇᐃᑲᓐᐃᔅᕒᐃᔭᓬᐊᒃ ᐁᐙᓭᔥᑲᐙᐙᒡ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ 1 ᐱᓯᑕᐎᔑᒃ, ᐯᐸᑳᓐ ᒥᓂᓯᕽ, ᐯᐸᑳᓐ ᐊᑮᕽ ᑳᐊᔮᔦᒃ, ᑮᓇᐙ ᐌᐙᓴ ᑳᐅᒌᔦᒃ᙮ ᑳᑎᐯᒋᑫᒡ ᐅᔕ ᓂᑮ ᐊᑐᒥᒃ, ᓂᑮ ᐐᓂᒃ ᑲᔦ ᒋᑆ ᓂᑖᐎᑭᐗᒃ᙮ 2 ᐅᑮ ᐃᔑᑑᓇᓐ ᓴ ᓂᑎᑭᑐᐎᓇᓐ ᒋᒪᔥᑲᐎ ᑮᔗᒪᑲᓂᓂᑭᓐ, ᐅᓂᒌᕽ ᑲᔦ ᓂᑑᒋ ᑲᓇᐌᓂᒥᒃ᙮ ᒦᑕᔥ ᑳᐃᔑᐃᒡ ᑖᐱᔥᑰ ᐱᑾᑯᓂ ᑳᑳᔖᓂᒃ, ᐁᑮ ᑾᔮᒋᐃᒡ ᐁᐐ ᐋᐸᒋᐃᒡ᙮ 3 ᒦᑕᔥ ᐅᐅ ᑳᐃᔑᒡ, ᐃᔅᕒᐃᔭᓬ Israel, ᑮᓐ ᐅᔕ ᓂᑕᓄᑮᐋᑲᓐ; ᐯᒫᑎᓯᐙᒡ ᐅᔕ ᓂᑲ ᐅᒋ ᑭᒋ ᐃᓀᓂᒥᑰᒃ ᑮᓐ ᐅᒋ᙮ 4 ᒦᑕᔥ ᐅᐅ ᑳᐃᑭᑐᔮᓐ, ᐊᓂᔖ ᐅᔕ ᓂᑭᒋ ᐊᓄᑮᐃᑎᔅ᙮ ᐐᑫ ᐄᑐᒃ ᐃᓈ ᐃᔑ ᐊᓂᔖ ᓂᑮ ᒑᑮ᙮ ᔖᑰᒡ ᐃᑕᔥ ᓂᑲ ᐊᐯᓂᒧᓄᑕᐙ ᑳᑎᐯᒋᑫᒡ ᒋᐐᒋᐃᒡ ᑾᔭᒃ ᒋᐃᓈᑯᓂᑰᐗᒃ; ᐐᓐ ᑲᔦ ᓂᑲ ᑎᐸᐊᒫᒃ ᐋᓃᓐ ᐁᑕᓱ ᐃᔑᒋᑫᐗᒃ᙮ 5 ᒦᑕᔥ ᐅᐅ ᑳᑎᐯᒋᑫᒡ ᐁᓂᐃᑭᑐᒡ, ᒋᑆ ᓂᑖᐎᑭᐗᒃ ᑳᑮ ᐅᓈᐸᒥᒡ ᒋᐅᑕᓄᑮᐋᑲᓂᒥᒡ ᒋᐱᑮᐌᐎᓂᒪᒃ ᐅᐱᒫᑎᓰᒪᐞ, ᒋᐱᑮᐌᐎᓂᒪᒃ ᐃᐃ ᒉᑲᐴᕽ Jacob ᑳᐅᑕᑳᓀᓯᓂᒡ ᒥᓯᐌ ᓅᒋ ᑳᐸᐹ ᐊᔮᓂᒡ᙮ ᑳᑎᐯᒋᑫᒡ ᐅᔕ ᓂᑭᔐᒪᓂᑑᒻ, ᐐᓐ ᑳᒦᔑᒡ ᑭᑌᑖᑯᓯᐎᓐ, ᐐᓐ ᑲᔦ ᑳᒦᔑᒡ ᑫᐅᒋ ᒪᔥᑲᐎᓰᐗᒃ᙮ 6 ᒦᑕᔥ ᑳᑎᐯᒋᑫᒡ ᑳᐃᔑᒡ, ᓂᑕᓄᑮᐋᑲᓐ, ᑫᔮᐱ ᓴ ᓂᑕᔮᓐ ᓇᐗᒡ ᑫᑭᒋ ᐃᓀᑕᑾᒃ ᑳᐐ ᐃᓇᓄᑮᐃᓈᓐ᙮ ᑳᐐᓐ ᐐᓐ ᐁᑕ ᑭᑲ ᑲᔥᑭᐋᓰᒃ ᒋᑮᐌ ᑭᒋ ᐃᓀᑖᑯᓯᐙᒡ ᐃᑭ ᐃᔅᕒᐃᔭᓬᐊᒃ ᐯᒫᑎᓯᐙᒡ ᑳᑮ ᔖᐾᐙᒡ, ᑮᓐ ᓴ ᑭᐐ ᐃᔑᐃᓐ ᒋᐙᓭᔥᑲᒪᐗᑣ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ, ᑲᑭᓇ ᓴ ᑕᔥ ᐯᒫᑎᓯᐙᒡ ᐅᐅᒫ ᐊᑮᕽ ᑳᐊᔮᐙᒡ ᒋᐱᒫᒋᐃᑰᐎᓯᐙᒡ᙮ 7 ᐃᔅᕒᐃᔭᓬᐊᒃ ᐄᑐᒃ ᐐᑫ ᑳᑮ ᐋᓇᐌᓂᒥᑣ, ᐁᑮ ᔒᑫᓂᒥᑯᐙᒡ ᑲᔦ ᑳᐸᑳᓉᐙᓇᑭᓯᓂᒡ ᐯᒫᑎᓯᓂᒡ᙮ ᐐᑫ ᑲᔦ ᐁᑮ ᐌᓵᓂ ᑎᐯᓂᒥᑯᐙᒡ᙮ ᒦᑕᔥ ᐅᐅ ᑳᑎᐯᒋᑫᒡ ᑳᑮ ᐅᒋᐃᓈᒡ ᑳᑮ ᐱᒫᒋᐋᒡ ᐃᔅᕒᐃᔭᓬᐊᐞ, ᑳᑭᑌᓂᒥᑯᒡ ᑲᔦ, ᑭᒋᐅᑭᒫᒃ ᓴ ᑭᑲ ᐙᐸᒥᑯᐙᒃ ᐸᑭᑎᓂᑯᐌᒃ, ᒦᑕᔥ ᑫᔑ ᐊᓂᒥᑯᑖᐙᒡ ᒋᑭᑌᓂᒥᓀᒀ᙮ ᐋᓂᑫᐎᑭᒫᒃ ᑲᔦ ᐙᐸᒥᓀᒀ ᑕᐊᓂᒥᑯᑖᐗᒃ ᒋᑭᑌᓂᒥᓀᒀ᙮ ᒦᑕᔥ ᐅᐅ ᑫᐅᒋ ᐃᔑᓭᒃ ᑳᑎᐯᒋᑫᒡ ᐋᓃᔥ ᐅᑮ ᐅᓈᐸᒫᓐ ᑫᐊᓄᑮᐋᒡ; ᑭᔐᒪᓂᑑ ᑳᑎᐯᓂᒫᒡ ᐃᔅᕒᐃᔭᓬᐊᐞ ᓴ ᐅᑲᓇᐌᑖᓇᓐ ᑳᔑ ᐊᔓᑕᒫᑫᒡ᙮ ᒉᕒᐆᓴᓬᐊᒻ ᒋᑮᐌᐅᔑᒋᑳᑌᒃ 8 ᒦ ᓴ ᐅᐅᐌᓂ ᑳᑎᐯᒋᑫᒡ ᐁᓈᒡ ᐅᐱᒫᑎᓰᒪᐞ, ᐊᐲ ᓴ ᒥᓍᐸᒥᓂᓇᑰᒃ ᑭᑲ ᓇᑴᑕᐎᓂᓂᒻ, ᑭᑲ ᐐᒋᐃᓂᓂᒻ ᑲᔦ ᐊᐲ ᐃᔑ ᑮᔑᑲᒃ ᐐᐱᒫᒋᐃᓂᓇᑰᒃ᙮ ᑭᑲ ᑲᓇᐌᓂᒥᓂᓂᒻ, ᑭᑲ ᓈᑕᒪᐎᓂᓂᒻ ᑲᔦ, ᑮᓇᐙ ᑲᔦ ᑭᐐ ᐃᔑᐃᓂᓂᒻ ᑫᐅᒋ ᐅᔑᑕᒪᐗᒀ ᐊᔓᑕᒫᑎᐎᓐ ᑲᑭᓇ ᐯᒫᑎᓯᐙᒡ᙮ ᑭᐐ ᐸᑭᑎᓂᓂᓂᒻ ᑲᔦ ᐱᓵᓐ ᒦᓇᐙ ᒋᑮᐌ ᑲᐯᔑᔦᒃ ᑭᑕᑮᒥᐙᕽ ᓅᑯᒻ ᐐᑫ ᑳᓂᔑᐗᓈᓯᓈᑾᒃ᙮ 9 ᒦᑕᔥ ᑲᔦ ᑫᐃᓇᒀ ᑳᑭᐸᐅᑣ, ᐊᐤ, ᒫᒑᒃ ᐋᔕ ᐅᔕ ᑭᑮ ᐸᑭᑎᓂᑰᒻ᙮ ᐃᑭ ᑳᔑ ᑲᔥᑮᑎᐱᑲᓂᓂᒃ ᑳᐊᔮᐙᒡ ᓂᑲᐃᓈᒃ, ᑳᔑ ᐙᓭᔮᒃ ᐃᔖᒃ᙮ ᒦᑕᔥ ᐃᐃ ᑖᐱᔥᑰ ᒫᓇᒑᓂᔕᒃ ᒋᐸᐹ ᐐᓯᓂᐙᒡ ᐊᔪᐱᒣᑲᓇ, ᐅᑲ ᒥᑳᓈᐙ ᑲᔦ ᒪᔥᑯᓰᓐ ᐃᐃᒫ ᑳᔑ ᐸᐲᑾᑎᓈᓂᒃ ᑫᑰᓂᓂ ᐊᐙᒡ ᑳᑮ ᐃᔑ ᓂᑖᐎᑭᓯᓂᓂᑭᐸᓐ᙮ 10 ᑳᐐᓐ ᓴ ᐐᑳ ᑕᓅᑌᔅᑲᑌᓰᐗᒃ, ᑳᐐᓐ ᑲᔦ ᑕᓅᑕᔮᐹᑴᓰᐗᒃ᙮ ᑳᐃᔑ ᑭᔑᑌᓂᒃ ᐱᑾᑕᑲᒥᒃ ᐊᔮᐙᒡ, ᑮᓯᓲᓐ ᑲᔦ ᑭᔖᓯᑫᓂᒡ ᑳᐐᓐ ᐃᐃᒫ ᑕᐅᒋ ᐐᓴᑫᑕᓰᐗᒃ᙮ ᐃᓂ ᓴ ᑳᑰᐹᑌᓂᒥᑯᐙᒡ ᐅᑲ ᑭᑭᓄᐎᓂᑯᐙᓐ, ᐅᑲ ᐃᔑᐎᓂᑯᐙᓐ ᑲᔦ ᑳᔑ ᒨᑭᒋᐗᓂᓂᒃ ᓂᐱ᙮ 11 ᓂᑲ ᐅᔑᑑᓐ ᓴ ᑭᒋ ᒦᑲᓇ ᒣᑴ ᑭᒋ ᐗᒌᑳᕽ ᒋᐃᓇᒧᒃ, ᓂᑲ ᑾᔮᒋᑖᐙᓐ ᑲᔦ ᒦᑲᓇ ᑫᔑ ᐱᒥ ᐊᔮᐙᒡ ᓂᐱᒫᑎᓰᒪᒃ᙮ 12 ᐙᓴ ᓴ ᑕᐱ ᐅᒌᐗᒃ ᒋᐱᑮᐌᐙᒡ, ᐋᓂᑕ ᑮᐌᑎᓄᕽ ᑕᐱ ᐅᒌᐗᒃ, ᐋᓂᑕ ᑲᔦ ᓂᑳᐲᐊᓄᕽ᙮ ᐋᓂᑕ ᑕᔥ ᑲᔦ ᓇᑫ ᓵᐃᓂᒻ Sinim ᐁᒋᑳᑌᓂᒃ ᐊᑮᕽ ᑕᐱ ᐅᒌᐗᒃ᙮ 13 ᑮᔑᒃ ᑕᑲ ᑕᔖᑯᐌᒪᑲᓐ ᑫᐊᐲᒋ ᒥᓉᑕᒨᒪᑲᒃ; ᑕᑲ ᑲᔦ ᐊᑭ ᑕᒌᑫᑕᒨᒪᑲᓐ᙮ ᑕᑲ ᑲᔦ ᐗᒌᓐ ᑕᒫᒌ ᓂᑲᒨᒪᑲᓅᓐ! ᑳᑎᐯᒋᑫᒡ ᐅᔕ ᐅᐐ ᒥᓉᑕᒧᐋᐞ ᐅᐱᒫᑎᓰᒪᐞ, ᐐᓐ ᑲᔦ ᑳᑰᐹᑌᓂᒫᒡ ᑳᑲᒀᑕᑭᑑᓂᒡ ᐊᐎᔭᐞ᙮ 14 ᒦᑕᔥ ᐅᐅ ᐁᑭᑐᐙᒡ ᒉᕒᐆᓴᓬᐊᒥᕽ Jerusalem ᐁᔮᐙᒡ, ᑳᑎᐯᒋᑫᒡ ᓴ ᓂᑮ ᐌᐱᓂᑯᓈᓐ, ᓂᑮ ᐗᓃᑫᓄᑖᑯᓈᓐ ᑲᔦ᙮ 15 ᒦᔥ ᐁᑭᑐᒡ ᑳᑎᐯᒋᑫᒡ, ᐃᑴ ᓇ ᐅᑖ ᐗᓃᑫᓄᑕᐙᓐ ᑳᓅᓂᐋᒡ, ᒋᑰᐹᑌᓂᒫᓯᑭᐸᓐ ᑳᑮ ᓂᑖᐎᑭᐋᒡ? ᒥᓴᐙ ᓴ ᐅᒫᒫᒫ ᐗᓃᑫᓄᑕᐙᒡ ᐅᓃᒑᓂᓴᓐ, ᑳᐐᓐ ᓃᓐ ᑭᑲ ᐗᓃᑫᓄᑕᐎᓯᓅᓂᓂᒻ᙮ 16 ᐆ ᒉᕒᐆᓴᓬᐊᒻ ᓂᓇᑳᑮᓂᒑᓂᕽ ᓴ ᑭᑎᔑ ᐅᔑᐲᐅᓐ, ᒨᔕᒃ ᓴ ᓂᐙᐸᑖᓐ ᑳᔑ ᐙᑳᔮᐱᑭᓂᑰᔭᓐ᙮ 17 ᐃᑭ ᓴ ᑕᐱ ᐌᔩᐱᔥᑳᐗᒃ ᑭᑯᓯᓴᒃ ᒋᑮᐌ ᐅᔑᐃᒀ, ᐃᑭ ᑕᔥ ᑳᑮ ᓂᔑᐗᓈᒋᐃᒀ ᑕᓂ ᒫᒑᐗᒃ ᒋᓇᑲᓂᒀ᙮ 18 ᐃᓇᔥᑫ ᐊᔨᓈᐱᓐ ᐙᑳᔭᐄ ᐁᔑᐊᔮᔭᓐ; ᑲᑭᓇ ᓴ ᐯᒫᑎᓯᐙᒡ ᐅᑸᓄᐃᑎᐗᒃ ᐁᐱ ᓈᓯᑲᐎᒀ! ᐅᐅ ᑫᒋᓈᒡ ᑳᐱᒫᑎᓯᔮᓐ ᐁᑭᔐᒪᓂᑑᐎᔮᓐ, ᒦ ᓴ ᐃ ᐯᔑᑾᓐ ᑫᔑ ᑭᒋ ᐃᓀᓂᒪᑣ ᑭᐱᒫᑎᓰᒪᒃ ᑖᐱᔥᑰ ᑳᑭᒋ ᐐᑎᑫᒡ ᐃᑴ ᑳᔑ ᑭᒋ ᐃᓀᑕᕽ ᐅᐗᐌᔑᐅᓇᓐ᙮ 19 ᐋᓇ ᑕᔥ ᐐᓐ ᐁᑮ ᓂᔑᐗᓈᓯᓈᑯᓯᔭᓐ, ᐊᑭ ᑲᔦ ᐁᔑᐊᔮᔭᓐ ᐱᑾᒐᔭᐄᕽ ᐁᑮ ᐃᓀᑖᑾᒃ, ᒣᔥᑾᒡ ᐃᑕᔥ ᐅᓵᒻ ᑕᐊᑳᓭᑖᑾᓐ ᑫᐃᔑᑖᐙᒡ ᑭᐱᒫᑎᓰᒪᒃ᙮ ᐃᑭ ᑕᔥ ᐐᓐ ᑳᑮ ᓂᔑᐗᓈᒋᐃᒀ ᐙᓴ ᑕᐊ52ᔮᐗᒃ᙮ 20 ᐃᑭ ᓴ ᑭᐱᒫᑎᓰᒪᒃ ᑳᑮ ᓂᑖᐎᑭᐙᒡ ᒣᒀ ᑮᐊᔮᔦᒃ ᐸᑳᓐ ᐊᑮᕽ, ᓂᑯᑎᕽ ᑮᔑᑲᓂᓂᒃ ᐅᐅ ᑭᑲᐃᑰᒃ, ᐅᓵᒻ ᐃᓴ ᓈ ᐊᑳᓯᓐ ᐅᐅ ᐊᑭ; ᑕᑲ ᓇᑭᓇᓐ ᐋᑎ ᑫᐃᔑᑖᔮᕽ᙮ 21 ᒦᑕᔥ ᐅᐅ ᑫᐃᑎᓱᔭᓐ, ᐊᐌᓀᓐ ᐃᑕᔥ ᐃᓈ ᑳᐊᔮᐙᒡ ᐅᐅ ᐊᐱᓅᒌᔕᐞ? ᓂᑮ ᐗᓂᐋᒃ ᐄᑐᒃ ᓃᓐ ᓂᓃᒑᓂᓴᒃ, ᐁᑮ ᑲᔥᑭᑑᓯᐙᓐ ᑲᔦ ᑫᔮᐱ ᒋᐊᔮᐗᒀᐸᓐ᙮ ᐊᐌᓀᔥ ᑳᓂᑖᐎᑭᐋᒡ ᐅᐅ ᐊᐱᓅᒌᔕᐞ? ᐸᑳᓐ ᓴ ᐊᑮᕽ ᓂᑮ ᐃᔑᐎᓂᑰᓈᐸᓐ᙮ ᓃᓐ ᐁᑕ ᐅᐅᒫ ᓂᑮ ᐁᔑᑲᓂᑰ᙮ ᐋᓃᑎ ᑕᔥ ᐃᓈ ᐅᑯ ᐊᐱᓅᒌᔕᒃ ᐌᒌᐙᒡ? 22 ᒦᑕᔥ ᐅᐅ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᑭᑐᒡ, ᐃᓇᔥᑫ ᓂᑲ ᐙᑕᐊᒪᐙᒃ ᑯᑕᒃ ᐯᒫᑎᓯᐙᒡ; ᒦᐗᒃ ᐃᑕᔥ ᐃᑭ ᑫᐱᑮᐌᐎᓈᐙᒡ ᑭᓃᒑᓂᓯᐙᐞ᙮ 23 ᑭᒋᐅᑭᒫᒃ ᓴ ᑭᑲ ᓈᓈᑲᒋᐃᑯᐙᒃ, ᑭᒋᐅᑭᒫᑴᒃ ᑲᔦ ᑕᐃᓀᑖᑾᓐ ᒋᓅᓂᐃᓀᒀ᙮ ᒥᑕᑲᒥᒃ ᓴ ᑕᔑ ᐊᓂᒥᑯᑖᐗᒃ ᐁᔑᐊᔮᐌᒃ, ᒋᑭᓰᔮᑕᐊᒧᐙᒡ ᑭᓯᑎᐙᓐ᙮ ᒦᑕᔥ ᒋᑭᑫᑕᒣᒃ ᓃᓐ ᐁᑎᐯᒋᑫᔮᓐ; ᐃᑭ ᓴ ᐁᐯᓂᒧᓄᑕᐎᐙᒡ ᑳᐐᓐ ᑕᐗᓯᑖᐌᑕᓰᐗᒃ᙮ 24 ᑕᒪᑲᒫᐗᒃ ᐃᓇ ᒦᑳᓱᐎᓂᓂᐗᒃ ᑳᑮ ᒪᑲᑗᐙᒡ? ᑕᓈᑕᒪᐙᐗᒃ ᐃᓇ ᑕᑯᓂᑲᓇᒃ ᐁᔑᐊᔮᓂᒡ ᑳᐋᑴᑖᑯᓯᓂᒡ? 25 ᒦᑕᔥ ᑳᑎᐯᒋᑫᒡ ᐁᑭᑐᒡ, ᑌᐺ ᓴ ᒦᑳᓱᐎᓂᓂᐗᒃ ᑕᒪᑲᒫᐙᒃ ᐅᑕᑯᓂᑲᓂᐙᐞ, ᑕᒪᑲᒫᐗᒃ ᑲᔦ ᐃᑭ ᐅᒪᑲᑗᐎᓂᐙᓐ ᑳᐋᑴᑖᑯᓯᐙᒡ᙮ ᓃᓐ ᓴ ᓂᑲ ᒦᑳᓈᒃ ᑳᒦᑳᓂᓀᒀ, ᓂᑲ ᐱᒫᒋᐋᒃ ᑲᔦ ᑭᓃᒑᓂᓯᐙᒃ᙮ 26 ᒦ ᓴ ᑫᑑᑕᐗᒀ ᑳᐌᓵᓂᐃᓀᒀ ᒋᐊᒧᑎᓱᐙᒡ, ᒋᑮᐗᔥᑴᐲᓄᑕᒧᐙᒡ ᑲᔦ ᐅᒥᔅᑸᒥᐙ ᑖᐱᔥᑰ ᔔᒥᓈᐳ᙮ ᒦᑕᔥ ᑲᑭᓇ ᐯᒫᑎᓯᐙᒡ ᒋᑭᑫᑕᒧᐙᒡ ᓃᓐ ᐁᑎᐯᒋᑫᐗᒃ, ᐁᑎᓄᐎᐗᒃ ᑲᔦ ᑭᐱᒫᒋᐃᐌᒥᐙ, ᑳᓈᑕᒪᐎᓀᒃ, ᐃᔅᕒᐃᔭᓬᐊᒃ ᒣᔥᑲᐌᑖᑯᓯᓂᒡ ᐅᑭᔐᒪᓂᑑᒥᐙᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society