Aaiseya 45 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᑮᐅᓈᐸᒫᒡ ᓵᐃᕒᐊᓲᓐ 1 ᑳᑎᐯᒋᑫᒡ ᓴ ᐅᑮ ᐅᓈᐸᒫᓐ ᓵᐃᕒᐊᓲᓐ Cyrus ᒋᑭᒋᐅᑭᒫᐎᓂᒡ᙮ ᐁᑮ ᐃᔑ ᐅᓈᐸᒫᒡ ᒋᔖᑰᒋᐋᓂᒡ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ; ᐅᑮ ᐃᔑᓂᔕᐙᓐ ᑲᔦ ᒋᒪᑲᒫᓂᒡ ᐅᒪᔥᑲᐎᓰᐎᓂᓂ ᑯᑕᒃ ᑭᒋᐅᑭᒫᐞ᙮ ᑳᑎᐯᒋᑫᒡ ᓴ ᐅᑲ ᐹᑭᓇᒪᐙᓐ ᑳᔑ ᐊᔨᔥᒀᑌᒥᑳᓂᒃ ᑭᒋ ᐆᑌᓈᑳᕽ, ᑳᐐᓐ ᐊᐗᔑᒣ ᑲᓇᐌᒋᑳᑌᓯᓅᓐ᙮ ᒦᑕᔥ ᐅᐅ ᑳᑎᐯᒋᑫᒡ ᐁᓈᒡ ᓵᐃᕒᐊᓲᓐ, 2 ᓃᓐ ᓴ ᐱᑯ ᓂᑲ ᑾᔮᒋᑑᓐ ᑫᓂ ᐃᔖᔭᓐ, ᓂᑲ ᑕᑕᑯᓈᓇᓐ ᑭᒋ ᐗᒌᓐ᙮ ᓂᑲ ᐲᑯᓈᓇᓐ ᑲᔦ ᑭᒋ ᐃᔥᒀᑌᒪᓐ ᑳᐅᓵᐙᐱᑯᐗᑭᓐ, ᐃᓂ ᑲᔦ ᐲᐙᐱᑰᓐ ᑳᑭᐸᐃᑳᑳᓂᐗᑭᓐ ᓂᑲ ᐲᑯᐱᑑᓇᓐ᙮ 3 ᑭᑲ ᒦᓂᓐ ᑲᔦ ᐃᓂ ᐌᓅᑎᓯᐎᓇᓐ ᑳᐊᔮᑭᓐ ᑳᔑ ᑲᔥᑮᑎᐱᑳᒃ, ᑳᒐᔭᐄᕽ ᑲᔦ ᑳᐊᔮᑭᓐ᙮ ᒦᑕᔥ ᐃᐃ ᒋᑭᑫᑕᒪᓐ ᓃᓐ ᑳᑎᐯᒋᑫᔮᓐ ᑳᐅᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ Israel, ᑭᐐᓱᐎᓐ ᓴ ᓂᑮ ᐋᐸᒋᑑᓐ ᑮᐊᑐᒥᓈᓐ᙮ 4 ᑭᑮ ᐅᓇᑭᒥᓐ ᐅᔕ ᒋᐐᒋᐊᒡ ᓂᑕᓄᑮᐋᑲᓐ ᒉᑲᑉ Jacob, ᐃᔅᕒᐃᔭᓬᐊᒃ ᑳᑮ ᐅᓈᐸᒪᒀ᙮ ᑭᑎᔑᓂᑳᓱᐎᓂᕽ ᓴ ᑭᑮ ᐃᔑ ᐊᑐᒥᓐ᙮ ᑭᑮ ᐃᔑᐃᓐ ᑲᔦ ᒋᑭᑌᑖᑯᓯᔭᓐ ᐋᓇᐐᓐ ᒪᔑ ᐁᑭᑫᓂᒥᓯᐗᓐ᙮ 5 ᓃᓐ ᐅᔐᑕ ᑯ ᑳᑎᐯᒋᑫᒡ ᓂᑎᓄᐤ, ᑳᐐᓐ ᓴ ᑯᑕᒃ ᐸᑳᓐ ᑭᔐᒪᓂᑑ ᐊᔮᓰ᙮ ᓃᓐ ᓴ ᑭᑲ ᒪᔥᑲᐎᓰᐃᓐ, ᐋᓇᐐᓐ ᒪᔑ ᐁᑭᑫᓂᒥᓯᐗᓐ᙮ 6 ᒦ ᓴ ᐃ ᑳᐅᒋ ᐃᔑᒋᑫᔮᓐ ᐯᒫᑎᓯᐙᒡ ᐁᔮᐙᒡ ᔑᐹᑮᔑᒃ ᑳᐅᒋ ᒨᑲᐊᒥᓂᒡ ᑮᓯᓲᓐ ᐲᓂᔥ ᐌᑎ ᑳᔑ ᐸᑭᔑᒧᓂᒡ ᒋᑭᑫᑕᒧᐙᒡ ᑯᑕᒃ ᐁᐊᔮᓯᓂᒃ ᑭᔐᒪᓂᑑᓐ᙮ ᓃᓐ ᐅᔐᑕ ᑳᑎᐯᒋᑫᒡ, ᑳᐐᓐ ᐸᑳᓐ ᐊᐎᔭ ᐃᐃ ᑎᓄᐎᓰ᙮ 7 ᓃᓐ ᐅᔕ ᓂᑮ ᐅᔑᑑᓐ ᑳᐙᓭᔮᒃ, ᑳᑲᔥᑮᑎᐱᑲᒃ ᑲᔦ᙮ ᓃᓐ ᑲᔦ ᓂᑲᔥᑭᑑᓐ ᒋᔕᐌᓂᒥᐌᔮᓐ, ᒋᓂᔑᐗᓈᒋᒋᑫᔮᓐ ᑲᔦ᙮ ᓃᓐ ᑳᑎᐯᒋᑫᔮᓐ ᓂᑲᔥᑭᑑᓐ ᐅᓄ ᑲᑭᓇ ᒋᐃᔑᒋᑫᔮᓐ᙮ 8 ᑕᑲ ᓴ ᐃᔥᐱᒥᕽ ᑮᔑᑯᕽ ᑕᐅᒋ ᐸᐎᓂᑳᑌ, ᑕᑲ ᐗᑸᕽ ᑕᐅᒋ ᓰᑭᓂᑳᑌ ᑾᔭᒀᑎᓯᐎᓐ ᑖᐱᔥᑰ ᑳᑭᒥᐗᕽ᙮ ᑕᑲ ᐊᑭ ᑕᑕᐎᔥᑳ, ᒦᔥ ᐃᐃᒫ ᐱᒫᒋᐃᑯᐎᓐ ᑫᐅᒌᒃ, ᑾᔭᒃ ᐃᔑᒋᑫᐎᓐ ᒋᑕᑯ ᓂᑖᐎᑭᕽ᙮ ᓃᓐ ᑳᑎᐯᒋᑫᔮᓐ ᐅᔕ ᐃᐃ ᑳᐃᔑᒋᑫᔮᓐ᙮ ᑳᑎᐯᒋᑫᒡ ᐁᑮᐅᔑᑑᒡ ᐊᑮᓂ 9 ᐁᑕᑕᐌ ᓴ ᑕᑰᐹᓯᓈᑯᓯ ᐊᐊ ᑳᐋᓍᐸᒫᒡ ᑳᐅᔑᐃᑯᒡ, ᐋᓃᔥ ᑫᐐᓐ ᒦ ᐃ ᐁᔑᓈᑯᓯᒡ ᐙᐱᑲᓇᑭᑯᕽ ᑳᐊᐱᓂᒡ ᒥᑕᑲᒥᒃ᙮ ᐐᑳ ᓇ ᐙᐱᑲᓇᑭᒃ ᐅᑎᓈᓐ ᑳᐅᔑᐃᑯᒡ, ᐌᑯᓀᓐ ᐌᔑᑑᔭᓐ? ᐐᑳ ᓇ ᑳᐅᔑᑑᔭᓐ ᐃᑭᑑᒪᑲᓐ, ᑳᐐᓐ ᓴ ᐅᓂᒌᓰ ᐊᐊ ᑳᐅᔑᐃᒡ᙮ 10 ᑕᑰᐹᓯᓈᑯᓯ ᓴ ᐊᐎᔭ ᑳᐃᓈᒡ ᐅᑌᑌᓐ, ᐌᑯᓀᓐ ᐅᐅ ᑳᐅᒋ ᐃᔑ ᓂᑖᐎᑭᐃᔭᓐ? ᐊᐊ ᑕᔥ ᑲᔦ ᑫᐃᓈᒡ ᐅᒫᒫᓐ, ᐌᑯᓀᓐ ᑳᐅᒋ ᓂᑖᐎᑭᐃᔭᓐ? 11 ᑳᑎᐯᒋᑫᒡ ᑕᔥ ᑳᑭᑌᑖᑯᓯᒡ ᐃᔅᕒᐃᔭᓬᐊᐞ ᐌᑭᔐᒪᓂᑑᒥᒥᑯᒡ ᑳᑮ ᐅᔑ ᐊᓵᒡ ᐅᐅ ᐃᑭᑐ, ᑳᐐᓐ ᓴ ᐊᐙᒡ ᐸᑮ ᑫᑰᓐ ᐸᐹᒥᓯᐎᓐ ᑭᑕᔮᓰᓐ ᒋᑲᑴᒋᒥᔭᐸᓐ ᑫᑰᓐ ᓂᓃᒑᓂᓴᒃ ᐅᒋ, ᐋᓃᓐ ᑲᔦ ᑳᐃᔑᒋᑫᔮᓐ! 12 ᓃᓐ ᐅᔕ ᑳᑮ ᐅᔑᑑᔮᓐ ᐊᑭ, ᓃᓐ ᑲᔦ ᑳᑮ ᐅᔑᐊᒀ ᐯᒫᑎᓯᐙᒡ ᐃᐃᒫ ᒋᐊᔮᐙᒡ᙮ ᓃᓐ ᓴ ᑳᑮ ᑕᔗᑭᐱᑑᔮᓐ ᑮᔑᒃ, ᓂᓈᑲᒋᐋᒃ ᑲᔦ ᑮᓯᔅ, ᑎᐱᑭᑮᓯᔅ, ᐗᓇᑯᔕᒃ ᑲᔦ᙮ 13 ᓃᓐ ᓴ ᑳᑮ ᐅᒻᐺᐊᒃ ᓵᐃᕒᐊᔅ Cyrus ᑫᑰᓂᓂ ᒋᐃᔑᒋᑫᒡ, ᑾᔭᒃ ᒋᐃᔑᓭᒃ ᑳᔑ ᐊᑕᐌᑕᒫᓐ᙮ ᓂᑲ ᒥᓄᒧᑖᐗᓐ ᓴ ᒦᑲᓈᕽ ᑫᓂ ᐃᔖᒡ᙮ ᐐᓐ ᐅᔕ ᐅᑲ ᑮᐌ ᐅᔑᑑᓐ ᓂᑑᑌᓈᒥᓂ ᒉᕒᐆᓴᓬᐊᒻ Jerusalem, ᐅᑲ ᑲᔥᑭᐋᐞ ᒋᐸᑭᑎᓂᒥᓐᒡ ᐐᓐ ᐅᑕᑮᒥᕽ ᑳᑕᔑ ᑕᑯᓂᒥᓐᒡ᙮ ᑳᐐᓐ ᓴ ᐊᐎᔭᓐ ᐅᑕᓄᑮᐃᑯᓰᓐ, ᐅᐐ ᑎᐸᐊᒫᑯᓰᓐ ᑲᔦ ᐃᐃ ᒋᐃᔑᒋᑫᒡ᙮ ᒦ ᓴ ᐃ ᐁᑭᑐᒡ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ᙮ 14 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᐃᓂ ᑳᔑ ᐌᓅᑕᑭᓐ ᐊᑮᓐ ᐄᒋᐸᑭ Egypt, ᐄᑎᔫᐱᔭ ᑲᔦ ᑮᓐ ᑭᑲ ᑎᐱᓇᐌᐎᔅ᙮ ᐃᑭ ᑕᔥ ᑲᔦ ᑳᑲᑳᓅᓯᐙᒡ ᐃᓂᓂᐗᒃ ᓭᐸ Seba ᐌᒌᐙᒡ ᑭᑲ ᐅᑕᓄᑮᐋᑲᓂᒻ; ᑭᑑᑖᓈᒥᕽ ᒋᐱᒥ ᐊᔮᐙᒡ ᒋᑕᑯᐱᓱᐙᒡ ᐲᐙᐱᑯ ᓴᑳᐹᓀᔮᐲᓐ᙮ ᑕᐊᓂᒥᑯᑖᐗᒃ ᓴ ᐁᔑᐊᔮᐗᒡ ᐅᐅ ᒋᐃᓂᒀ, ᑌᐺ ᓴ ᐄᓴᓐ ᑭᔐᒪᓂᑑ ᑭᐐᒌᐎᒃ, ᐐᓐ ᓴ ᐁᑕ ᑭᔐᒪᓂᑑᐎ; ᑳᐐᓐ ᑯᑕᒃ ᐊᔮᓰᑐᒃ᙮ 15 ᑌᐺ ᑮᓐ ᑎᓄ ᑭᔐᒪᓂᑑ ᑳᑳᓱᒡ, ᑳᐱᒫᒋᐋᒡ ᐃᔅᕒᐃᔭᓬᐊᐞ ᐁᐅᑭᔐᒪᓂᑑᒥᒥᑯᒡ᙮ 16 ᑲᑭᓇ ᓴ ᑕᔥ ᐃᑭ ᐌᔑᐋᐙᒡ ᒪᓂᑑᑳᓇᐞ ᑕᐊᑲᒋᐋᐗᒃ, ᑲᑭᓇ ᓴ ᑯ ᑕᐊᑲᑌᑕᒨᒃ, ᑕᓃᓭᑖᑯᓯᐋᐗᒃ᙮ 17 ᑳᑎᐯᒋᑫᓂᒡ ᓴ ᐃᔅᕒᐃᔭᓬᐊᒃ ᑳᐱᒫᒋᐃᑯᐙᒡ, ᐃᐃ ᓴ ᐁᔑ ᐱᒫᒋᑯᐙᒡ ᓀᐱᒡ ᐃᑯ ᑕᐃᔑᓭᓂ, ᑳᐐᓐ ᐃᑕᔥ ᐐᑳ ᑕᐊᑲᒋᐋᓰᐗᒃ ᑳᐐᓐ ᑲᔦ ᐐᑳ ᑕᐊᑲᑌᑕᓰᐗᒃ, ᒦ ᓴ ᐱᑯ ᐃ ᑳᐐᓐ ᐐᑳ ᑕᐴᓂᓭᓯᓂᓂ, ᑭᑲᐃᑰᒃ᙮ 18 ᑳᑎᐯᒋᑫᒡ ᐅᑮ ᐅᔑᑑᓐ ᑮᔑᑯᓂ, ᐐᓐ ᐅᔕ ᑳᑭᔐᒪᓂᑑᐎᒡ᙮ ᐐᓐ ᑳᑮ ᐅᓂᓇᕽ ᐁᑮ ᐅᔑᑑᒡ, ᐁᑮ ᐅᓇᑑᒡ ᑲᔦ ᐊᑮᓂ᙮ ᐅᑮ ᐃᔑᑑᓐ ᓴ ᒋᑖᓄᑌᓂᒃ ᒋᐃᓀᑖᑾᓂᓂᒃ ᓅᒋᑯ ᐱᑾᒐᔭᐄ, ᑳᐐᓐ ᓃᓐ ᒋᑖᓄᑌᓯᓂᓂᒃ ᒦ ᓴ ᐊᐌ ᑳᐃᑭᑐᒡ, ᓃᓐ ᐅᔕ ᑳᑎᐯᒋᑫᒡ, ᑳᐐᓐ ᑯᑕᒃ ᒪᓂᑑ ᐊᔮᓰ᙮ 19 ᑳᐐᓐ ᓴ ᓂᑮᒨᒋ ᑮᑭᑐᓰ ᐅᐅ ᑳᐃᑭᑐᔮᓐ, ᑳᐐᓐ ᑲᔦ ᓂᑳᑑᓰᓐ ᐋᓃᓐ ᐗᐃᔑᒋᑫᔮᓐ᙮ ᑳᐐᓐ ᓴ ᓂᑮ ᐃᓈᓰᒃ ᒉᑲᐴᕽ Jacob ᐌᑕᑳᓀᓯᐙᒡ ᐊᓂᔖ ᒋᔑ ᓇᓈᑐᓀᐅᐙᒡ᙮ ᓃᓐ ᓴ ᑳᑎᐯᒋᑫᒡ, ᓂᑌᐺ ᐅᐅ ᑳᐃᑭᑐᔮᓐ; ᓂᑭᑫᑖᑯᑑᓐ ᑲᔦ ᑳᑾᔭᑴᑖᑾᒃ᙮ 20 ᑳᑎᐯᒋᑫᒡ ᐁᑭᑐᒡ, ᑕᑲ ᒫᒪᐎ ᐲᔖᒃ ᒋᐅᑯ ᐊᔮᔦᒃ, ᑮᓇᐙ ᑳᑮ ᒫᒋᐸᐃᐌᔦᒃ ᑮᔖᑰᒋᒋᑳᑌᑭᓐ ᑭᑕᑮᒥᐙᓐ; ᑳᐐᓐ ᓴ ᐊᔦᔖᐙᑎᓯᓰᐗᒃ ᐃᑭ ᑳᐱᒥᐎᓈᐙᒡ ᒥᑎᑯᐎ ᒪᓂᑑᑳᓇᐞ, ᐁᓇᒥᐁᑕᐙᐙᒡ ᒪᓂᑑᐞ ᑫᔥᑭᑑᓯᓂᒃ ᒋᐱᒫᒋᐃᐌᓂᒡ᙮ 21 ᐊᐯᔪᒃ, ᐲᑑᒃ ᐋᓃᓐ ᐙᐃᑭᑐᔦᒃ ᐁᔑ ᑎᐹᑯᓂᑎᕽ, ᐱᓵᓐ ᑲᑲᓅᓂᑎᒃ ᒋᒫᒦᓄᒥᑎᔦᒃ ᐋᓃᓐ ᑫᔑ ᓈᑕᒫᓱᔦᒃ᙮ ᐊᐌᓀᓐ ᐃᑕᔥ ᑳᐐᑕᒪᐎᓀᒃ ᑭᒋ ᒣᐎᔕ ᐅᐅ ᒋᐃᔑᓭᓂᑭᐸᓐ? ᑳᐐᓐ ᐃᓇ ᓃᓐ ᑳᑎᐯᒋᑫᔮᓐ ᐅᐅ ᑳᑮ ᐃᔑᒋᑫᔮᓐ? ᑳᐐᓐ ᓴ ᑯᑕᒃ ᑭᔐᒪᓂᑑ ᐊᔮᓰ ᐅᐅ ᑳᐊᔮᔮᓐ ᑳᑾᔭᒀᑎᓯᔮᓐ, ᑳᐱᒫᒋᐃᐌᔮᓐ ᑲᔦ᙮ ᓃᓐ ᐅᔕ ᑭᔐᒪᓂᑑ, ᑳᐐᓐ ᑯᑕᒃ ᐊᔮᓰ᙮ 22 ᑴᑮᓄᑕᐎᔑᒃ ᒋᐱᒫᒋᐃᑰᐎᓯᔦᒃ ᒥᓯᐌ ᐊᑮᕽ ᑭᔑᐹᑲᒥᒃ; ᓃᓐ ᐅᔕ ᑭᔐᒪᓂᑑ, ᑳᐐᓐ ᑯᑕᒃ ᐊᔮᓰ᙮ 23 ᓃᓐ ᓴ ᐱᑯ ᓂᑮ ᐊᐱᒻ ᓂᑑᓂᕽ ᐁᑮ ᐅᒋ ᐐᑕᒫᓐ ᑾᔭᒃ ᐁᐃᓈᑎᓯᔮᓐ᙮ ᑳᐐᓐ ᐃᑕᔥ ᐃᐃ ᑳᑮ ᐃᑭᑐᔮᓐ ᑕᓇᓇᐗᓯᓅᓐ, ᑲᑭᓇ ᓴ ᐊᐎᔭᒃ ᑕᐅᒋᒌᑾᓇᐲᑖᐗᒃ, ᑲᑭᓇ ᑲᔦ ᐅᐅ ᑕᐃᑭᑐᐗᒃ ᐁᑫᒋᓈᐁᓂᒫᐙᒡ᙮ 24 ᒦ ᓴ ᐅᐌ ᑫᐃᔑᐙᒡ, ᑳᑎᐯᒋᑫᒡ ᓴ ᐁᑕ ᐅᑕᔮᓈᑐᒃ ᑾᔭᒀᑎᓯᐎᓐ, ᒪᔥᑲᐎᓰᐎᓐ ᑲᔦ᙮ ᑲᑭᓇ ᐅᑲ ᐱ ᓈᓯᑳᑰ ᓴ ᐃ ᑳᑮ ᓂᔥᑫᓂᒥᑯᒡ ᒋᐊᑲᒋᐃᒥᓐᒡ᙮ 25 ᓃᓐ ᓴ ᑳᑎᐯᒋᑫᔮᓐ ᓂᑲ ᑑᑕᐙᒃ ᓴ ᒉᑲᐴᕽ ᐌᑕᑳᓀᓯᐙᒡ ᒋᑾᔭᒀᑎᓯᐙᒡ ᒦ ᑫᐅᒋ ᒦᑴᒋᐌᓂᒥᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society