Aaiseya 43 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑ ᑮᐊᔓᑕᒪᐙᒡ ᐁᐐᓈᑕᒪᐙᒡ ᐅᐱᒫᑎᓰᒪᐞ 1 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᑳᑮ ᐅᔑᐋᒡ ᒉᑲᐴᓐ, ᐃᔅᕒᐃᔭᓬᐊᐞ ᑲᔦ, ᑫᑯ ᓭᑭᓯᑫᒃ, ᓃᓐ ᐅᔕ ᑳᑮ ᐱᒫᒋᐃᓇᑰᒃ; ᑭᑎᔑᓂᑳᓱᐎᓂᐙᕽ ᓴ ᑭᑮ ᐃᔑᐊᑐᒥᓂᓂᒻ, ᓃᓐ ᐅᔕ ᑳᑎᐯᓂᒥᓇᑰᒃ! 2 ᐊᐲ ᓴ ᔖᐳᔥᑳᔦᒃ ᓂᐲᑳᕽ, ᓃᓐ ᓴ ᐱᑯ ᑭᑲ ᐐᒌᐎᓂᓂᒻ, ᐊᐲ ᑲᔦ ᓰᐲᓐ ᐋᔕᐎᔥᑳᔦᒃ, ᑳᐐᓐ ᑭᑲ ᒫᒌᔮᐳᑯᓰᒻ, ᐊᐲ ᓴ ᑲᔦ ᔖᐳᔥᑳᔦᒃ ᐃᔥᑯᑌᕽ, ᑳᐐᓐ ᑭᑲ ᒑᑭᓱᓰᒻ, ᑳᐐᓐ ᑭᑲ ᓇᐗᑎᓱᓰᒻ᙮ 3 ᓃᓐ ᐅᔕ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᑳᑭᑌᑖᑯᓯᒡ ᑭᔐᒪᓂᑑ ᐃᐃᒫ ᐃᔅᕒᐃᔭᓬᐃᑳᕽ, ᑭᐱᒫᒋᐃᐌᒥᐙ; ᓂᑮ ᐸᑭᑎᓈᓐ ᐅᔕ ᐄᒋᐸᑭ Egypt ᐁᑮ ᑎᐸᐅᓇᑰᒃ, ᑰᔥ Cush ᑲᔦ, ᓰᐸ Seba ᑲᔦ ᑮᓇᐙ ᐅᒋ᙮ 4 ᐁᐅᓂᔑᔑᓇᐎᓇᑰᒃ ᓴ ᑕᔥ, ᐁᑭᑌᓂᒥᓇᑰᒃ ᑲᔦ, ᑕᑯ ᑕᔥ ᐁᓵᑭᐃᓇᑰᒃ, ᒦ ᓴ ᐃ ᒣᔥᑾᒡ ᑫᐅᒋ ᐸᑭᑌᓂᒪᒀᐸᓐ ᑲᑭᓇ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᑮᓇᐙ ᒋᐱᒫᑎᓯᔦᑭᐸᓐ᙮ 5 ᑫᑯ ᑕᔥ ᓭᑭᓯᑫᒃ, ᑭᐐᒌᐎᓂᓂᒻ ᐄᑐᒃ! ᐌᑎ ᓴ ᐙᐸᓄᕽ ᐃᓇᑫ ᓂᑲ ᐅᒋ ᐲᓈᒃ ᑭᓃᒑᓂᓯᐙᒃ, ᓂᑳᐲᐊᓄᕽ ᑲᔦ ᐃᓇᑫ ᑭᑲ ᐅᒋ ᒫᐗᑑᓂᓂᓂᒻ᙮ 6 ᓂᑲ ᑲᓅᓈᒃ ᓴ ᑮᐌᑎᓄᕽ ᐁᔮᐙᒡ ᒋᐸᑭᑎᓈᐙᒡ ᓂᐱᒫᑎᓰᒪᐞ, ᓂᑲ ᑲᓅᓈᒃ ᑲᔦ ᔖᐗᓄᕽ ᐁᔮᐙᒡ ᒋᑭᒋᐎᓈᓯᒀ ᓂᐱᒫᑎᓰᒪᐞ᙮ ᐸᑭᑎᓂᑾᒃ ᓂᐱᒫᑎᓰᒪᒃ ᒥᓯᐌ ᐊᑮᕽ ᒋᐱᐅᒋ ᑮᐌᐙᒡ᙮ 7 ᓃᓐ ᐅᔕ ᐃᑭ ᓂᐱᒫᑎᓰᒪᒃ, ᐁᑮ ᐅᔑᐊᒀ ᑫᐅᒋ ᑭᒋ ᐃᓀᑖᑯᓯᐗᒃ ᑳᐊᐱᐐᓱᐙᒡ ᐁᔑᓂᑳᓱᐗᒃ᙮ ᑳᑎᐯᒋᑫᒡ ᒋᐅᒋᑭᑫᓂᒥᓐᒡ ᐃᔅᕒᐃᔭᓬᐊᐞ ᐅᒋ 8 ᐲᓂᑾᒃ ᐃᑭ ᑳᐙᐱᓯᒀ ᐋᓇᐐᓐ ᐁᐅᔥᑮᔑᑯᐙᒡ, ᑳᐅᓯᑌᓯᒀ ᑲᔦ ᐋᓇᐐᓐ ᐁᐅᑕᐗᑳᐙᒡ᙮ 9 ᑲᑭᓇ ᓴ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᐅᑸᓄᐃᑎᐗᒃ ᒋᒫᐗᒋᐃᑎᐙᒡ᙮ ᐋᓃᓐ ᐃᑕᔥ ᐃᓂ ᐅᒪᓂᑑᒥᐙᓐ ᑫᐐᑕᒥᓂᒡ ᐋᓃᓐ ᑫᓂ ᐃᔑᓭᓂᒃ? ᐋᓃᓐ ᑲᔦ ᐃᓂ ᑳᑮ ᐐᑕᒥᓂᒡ ᐋᓃᓐ ᑫᓂ ᐃᔑᓭᓂᒃ? ᑕᑲ ᓴ ᐅᑯ ᒪᓂᑑᒃ ᐅᑲ ᐲᓈᐙᐞ ᑫᐐᑕᒥᓂᒡ ᐐᓇᐙ ᐁᑌᐺᐙᒡ, ᑯᑕᒃ ᐃᑕᔥ ᑳᓅᑕᒥᓂᒡ ᒋᐃᑭᑐᓂᒡ, ᑌᐺᐗᓐ ᓴ ᐃᐃᐌ! 10 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᑮᓇᐙ ᓴ ᓂᐐᑕᒫᑫᐎᓂᓃᒪᒃ, ᓂᑕᓄᑮᐋᑲᓇᒃ ᑳᑮ ᐅᓈᐸᒥᓇᑰᒃ, ᒋᑭᑫᑕᒣᒃ, ᒋᑭᑫᓂᒥᔦᒃ ᑲᔦ ᒋᓂᓯᑐᑕᒣᒃ ᑲᔦ ᓃᓐ ᐁᔮᐎᔮᓐ᙮ ᐅᐅ ᓴ ᑳᐊᔮᔮᓐ, ᑳᐐᓐ ᑯᑕᒃ ᒪᓂᑑ ᑮᐱ ᐊᔮᓰ᙮ ᑳᐐᓐ ᑲᔦ ᐐᑳ ᑯᑕᒃ ᒪᓂᑑ ᑕᓂ ᐊᔮᓰ᙮ 11 ᓃᓐ ᓴ ᐁᑕ ᑳᑎᐯᒋᑫᔮᓐ, ᑳᐐᓐ ᓴ ᑯᑕᒃ ᐅᐱᒫᒋᐃᐌ ᐊᔮᓰ, ᓃᓐ ᐁᑕ ᑯ᙮ 12 ᓃᓐ ᓴ ᑳᑮ ᐐᑕᒫᓐ ᐋᓃᓐ ᑫᓂ ᐃᔑᐌᐸᒃ, ᒦᑕᔥ ᑳᑮ ᐱ ᓈᑕᒪᐎᓇᑰᒃ᙮ ᑳᐐᓐ ᓴ ᑯᑕᒃ ᒪᔭᑭ ᒪᓂᑑ ᐅᐅ ᐐᑳ ᐱᒥ ᐃᔑᒋᑫᓰ; ᑮᓇᐙ ᓴ ᑳᑎᐹᒋᒥᔦᒃ ᓃᓐ ᐁᑭᔐᒪᓂᑑᐎᔮᓐ᙮ 13 ᑌᐺ ᓴ ᓀᐱᒋ ᐅᑖᓈᕽ ᐅᐅ ᑳᑎᓄᐎᔮᓐ ᓂᑑᒋ ᑎᓄᐤ᙮ ᑳᐐᓐ ᓴ ᐊᐎᔭ ᓂᑲ ᑲᒋᔥᑭᓂᒌᐱᓂᑰᓰ᙮ ᑫᑰᓐ ᐃᑕᔥ ᐃᔑᒋᑫᔮᓐ, ᐊᐌᓀᓐ ᓴ ᑕᔥ ᑫᐋᒋᑑᐸᓐ? ᐹᐱᓬᐊᓐ ᐊᑮᕽ ᑮᐅᒋᔖᐾᐙᒡ 14 ᒦ ᓴ ᐅᐌᓂ ᑳᑎᐯᒋᑫᒡ ᑭᐱᒫᒋᐃᐌᒥᐙ ᐃᔅᕒᐃᔭᓬᐊᒃ ᐅᑭᑌᑖᑯᓰᒥᐙᓐ ᐁᑭᑐᒡ, ᒋᓈᑕᒪᐎᓇᑰᒃ, ᔑᒫᑲᓂᔕᒃ ᓴ ᓂᑲ ᐃᔑᓂᔕᐙᒃ ᐹᐱᓬᐊᓐ ᐊᑮᕽ; ᓂᑲ ᐲᑯᐱᑑᓇᓐ ᐆᑌᓈᐎ ᐃᔥᒀᑌᒪᓐ᙮ ᑳᔑ ᓂᑖ ᔖᑯᐌᐙᒡ ᓴ ᐯᒫᑎᓯᐙᒡ ᐃᐃᒫ ᐁᔮᐙᒡ ᑕᓂ ᒪᐎᐗᒃ! 15 ᓃᓐ ᐅᔕ ᑳᑎᐯᒋᑫᔮᓐ, ᑭᑭᑌᑖᑯᓰᒥᐙ, ᑳᑮ ᐅᔑᐃᓇᑰᒃ ᐃᔅᕒᐃᔭᓬᐊᒃ, ᓃᓐ ᑭᑭᒋᐅᑭᒫᒥᐙ! 16 ᒦ ᓴ ᐅᐌᓂ ᑳᑎᐯᒋᑫᒡ ᐁᑭᑐᒡ ᑳᑮ ᐅᔑᑕᒪᐎᓀᒃ ᑫᐊᓂ ᐃᔖᐌᒃ ᑭᒋᑲᒦᕽ, ᒦᑲᓇ ᑳᑮ ᐃᓇᒧᑑᒡ ᐁᔑ ᒪᔥᑲᐌᑖᑾᓂᓂᒃ ᓂᐲᕽ! 17 ᐐᓐ ᐄᑐᒃ ᑳᑮ ᐃᔑᐎᓈᒡ ᒣᔥᑲᐌᑖᑯᓯᓂᒡ ᔑᒫᑲᓂᔕᐞ, ᒦᑳᓱᐎ ᐅᑖᐹᓈᑾᐞ, ᒥᑕᑎᒨᐞ ᑲᔦ, ᒦᔥ ᑳᑮ ᑲᐎᓭᓂᒡ ᐐᑳ ᒦᓇᐙ ᒋᐗᓂᔥᑳᓯᓂᒃ, ᐁᑮ ᑑᑕᐙᒡ ᑖᐱᔥᑰ ᐙᓴᑯᓀᒋᑲᓀᔮᑉ ᑳᐊᑕᐌᐃᑳᑌᒃ᙮ 18 ᐗᓃᑫᓄᑕᒧᒃ ᐅᑖᓈᕽ ᑳᑮ ᐱ ᐃᓇᑲᒥᑲᒃ, ᑫᑯ ᐐᓐ ᐅᑖᓈᕽ ᑳᑮ ᐱ ᐃᓇᑲᒥᑲᒃ ᐅᒋ ᑲᑴ ᐱᒫᑎᓯᑫᒃ᙮ 19 ᐃᓇᔥᑫ ᐅᔥᑭ ᑫᑰᓐ ᐅᔕ ᓂᐐ ᐃᔑᒋᑫ; ᐋᔕ ᐅᔕ ᐃᔑᓭ, ᑳᐐᓐ ᐃᓇ ᑭᐙᐸᑕᓰᒻ? ᓂᑲ ᐃᓇᒧᒋᑫ ᓴ ᐁᔑ ᐱᑾᑕᑲᒥᑳᒃ, ᓂᑲ ᓴᓰᐲᑫ ᑲᔦ ᐁᔑ ᐸᐹᑌᑲᒥᑳᒃ᙮ 20 ᐊᔭᐋᐎᔕᒃ ᓴ ᐱᑾᒐᔭᐄ ᐁᔮᐙᒡ ᓂᑲ ᑭᒋ ᐃᓀᓂᒥᑰᒃ, ᒪᔭᑭ ᐙᑯᔕᒃ, ᑯᑯᑯᐆᒃ ᑲᔦ, ᐋᓃᔥ ᓂᑑᑎᓇᒪᐙᒃ ᓂᐲᓂ ᑫᒥᓂᑴᐙᒡ ᐱᑾᑕᑲᒥᑯᕽ᙮ ᓂᑲ ᐃᔑᒋᑫᐙᓐ ᓴ ᒋᓴᓰᐲᑳᓂᕽ ᐁᔑ ᐱᑾᑕᑲᒥᑳᓂᒃ ᐁᐐ ᒥᓇᐊᒀ ᓂᐲᓂ ᓂᐱᒫᑎᓰᒪᒃ ᓂᑑᓈᐸᒋᑲᓇᒃ᙮ 21 ᒦᐗᒃ ᐄᑐᒃ ᐃᑭ ᐯᒫᑎᓯᐙᒡ ᑳᑮ ᐅᔑᑕᒫᓱᔮᓐ, ᐐᓇᐙ ᒋᐙᐐᑕᒧᐙᒡ ᐁᔑ ᒦᑴᒋᐌᑖᑯᓯᐗᒃ᙮ ᐃᔅᕒᐃᔭᓬᐊᒃ ᑳᑮᐃᔑᒪᒋᑑᑕᒧᐙᒡ 22 ᑮᓇᐙ ᓴ ᑕᔥ ᒉᑲᐴᕽ ᐌᑕᑳᓀᓯᔦᒃ ᑳᐐᓐ ᔖᑰᒡ ᑭᑮ ᑲᓅᔑᓰᒻ, ᐁᑮ ᓅᑌ ᐸᑭᑌᓂᒥᔦᒃ ᐁᑮ ᐊᓂ ᐋᓇᐌᓂᒥᔦᒃ, ᑮᓇᐙ ᐃᔅᕒᐃᔭᓬᐊᒃ Israel᙮ 23 ᑳᐐᓐ ᑲᔦ ᑭᑮ ᐲᑕᒪᐎᓰᒻ ᒫᓇᒑᓂᔕᒃ ᑫᐸᑭᑎᓀᒀ ᑳᐊᒀᑭᓱᑣ ᑎᓄ᙮ ᑳᐐᓐ ᑲᔦ ᑭᐸᑭᑎᓈᓱᐎᓂᐙᕽ ᑭᑑᒋ ᑭᑌᓂᒥᓰᒻ᙮ ᑳᐐᓐ ᐄᑐᒃ ᑭᒥᑯᔥᑳᒋᐃᓯᓅᓂᓂᒻ ᒋᐊᑐᑕᒪᐎᓇᑰᒃ ᐸᑴᔑᑲᓂᒥᓂᐎ ᐸᑭᑎᓈᓱᐎᓇᓐ, ᑳᐐᓐ ᑲᔦ ᑭᑕᑐᑕᒪᐎᓯᓅᓂᓂᒻ ᒋᒥᓈᓴᒪᐎᔦᒃ ᑫᐅᒋ ᐊᑴᑕᒣᒃ᙮ 24 ᑳᐐᓐ ᓴ ᒋᑮ ᐊᑖᐌᑕᒪᐎᔦᒃ ᒣᓄᒫᑾᒃ ᒥᓈᓯᑲᓐ, ᑳᐐᓐ ᑲᔦ ᒋᑮ ᑌᐱᐃᔦᒃ ᐁᔑ ᐸᐱᒥᑌᐗᑭᓐ ᑭᐸᑭᑎᓈᓱᐎᓂᐙᓐ᙮ ᑭᒪᒋᑑᑕᒧᐎᓂᐙᓐ ᐅᔕ ᑳᒥᑯᔥᑳᑌᑕᒥᐃᑯᔮᓐ, ᑭᒪᒫᔒᐎᓂᐙᓐ ᑲᔦ ᑳᓅᑌᔑᒥᑯᔮᓐ᙮ 25 ᓃᓐ ᐅᔕ ᐱᑯ ᐁᑎᓄᐎᔮᓐ ᑳᐅᒋ ᑳᓰᐊᒪᐎᓇᑰᒃ ᑭᒪᒋᑑᑕᒧᐎᓂᐙᓐ, ᑳᐗᓃᑫᓄᑕᒫᓐ ᑲᔦ ᑭᒪᒋᐃᔑᐌᐱᓯᐎᓂᐙᓐ᙮ 26 ᑕᑲ ᓴ ᑕᔥ ᐃᔖᑖ ᐁᔑ ᑎᐹᑯᓂᑎᕽ ᒋᐲᑑᔦᒃ ᐁᔑ ᐊᓈᒥᑖᑯᓯᔦᒃ᙮ ᐐᑕᒧᒃ ᐋᓃᓐ ᐙᐃᑭᑐᔦᒃ ᒋᑭᑫᑖᑾᒃ ᑕᑲ ᒋᑌᐺᐌᑴᓐ᙮ 27 ᓂᑕᒻ ᓴ ᑕᔥ ᑳᑮ ᐊᔮᐙᒡ ᑭᑫᑌᔭᐋᒥᐙᐸᓃᒃ ᑮᒪᒋᑑᑕᒨᒃ; ᑭᑮᑭᑑᐎᓂᓃᒥᐙᒃ ᓂᑮ ᔕᔒᐱᑖᑰᒃ᙮ 28 ᒦᑕᔥ ᑫᐅᒋ ᒪᒋᐃᓀᑖᑯᐊᒀ ᑳᑭᑌᑖᑯᓯᐙᒡ ᐊᓇᒥᐁᐎᑭᒫᒃ ᑭᑕᓇᒥᐁᐎᑲᒥᑯᐙᕽ᙮ ᒦᑕᔥ ᑳᐐ ᐃᓀᓂᒪᒀ ᐃᔅᕒᐃᔭᓬᐊᒃ ᒋᓂᔑᐗᓈᑎᓯᐙᒡ; ᓂᐸᑭᑎᓈᒃ ᓴ ᐱᓵᓐ ᓂᐱᒫᑎᓰᒪᒃ ᒋᒫᓀᓂᒥᑣ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society