Aaiseya 42 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐅᑕᓄᑮᐋᑲᓇᓐ ᐁᑕᔑᓱᓂᒡ 1 ᑳᑎᐯᒋᑫᒡ ᓴ ᐅᐅ ᐃᑭᑐ, ᐃᓇᔥᑫ, ᒦ ᓴ ᐗᐊ ᓂᑕᓄᑮᐋᑲᓐ ᑳᒪᔥᑲᐎᓰᐊᒃ᙮ ᒦ ᓴ ᐊᐌ ᑳᑮ ᐅᓈᐸᒪᒃ, ᒦ ᑲᔦ ᐊᐌ ᑳᒥᓍᐸᒪᒃ᙮ ᓂᑮᐃᔑᐋ ᓴ ᓂᑕᒑᑾᓐ ᒋᒨᔥᑭᓀᔥᑳᑯᒡ, ᐐᓐ ᑲᔦ ᑕᐃᔑᒋᑫ ᐌᐌᓂ ᒋᐃᓈᑯᓂᑫᓈᓂᐗᓂᓂᒃ ᑳᔑ ᐊᔮᓂᒡ ᐯᒫᑎᓯᓂᒡ᙮ 2 ᑳᐐᓐ ᓴ ᑕᔖᑯᐌᓰ, ᑳᐐᓐ ᑲᔦ ᐁᓂᑯᒃ ᑕᓅᑖᑯᓯᓰ᙮ ᒦᑲᓈᑲᕽ ᑲᔦ ᑳᐐᓐ ᐁᓂᑯᒃ ᑕᑕᔑ ᑳᑮᑭᑐᓰ᙮ 3 ᐃᐃ ᑲᔦ ᑳᐴᑯᔥᑳᓂᒃ ᒪᔥᑯᓰᐙᑎᒃ ᑳᐐᓐ ᐊᐗᔑᒣ ᐅᑲ ᐲᑯᓇᓰᓐ, ᐙᓴᑯᓀᒋᑲᓀᔮᐲᓂ ᑲᔦ ᑳᓂ ᐋᑕᐌᓂᒃ ᑳᐐᓐ ᐅᑲ ᐋᑕᐌᐊᓰᓐ᙮ ᐅᑲ ᐲᑑᓐ ᑌᐺ ᑾᔭᒃ ᐅᓈᑯᓂᑫᐎᓐ᙮ 4 ᑳᐐᓐ ᑕᐴᓂᒋᑫᓰ, ᑳᐐᓐ ᑲᔦ ᑕᐸᑭᒋᓰ ᐲᓂᔥ ᒋᐅᓇᑑᒡ ᑾᔭᒃ ᐅᓈᑯᓂᑫᐎᓐ ᐅᐅᒫ ᐊᑮᕽ᙮ ᐙᓴ ᑳᐊᔮᓂᒡ ᐯᐸᑳᓐ ᐊᑮᕽ ᐃᐃᒫ ᒋᔑ ᐸᑯᓭᑕᒥᓂᒡ ᐅᑎᓈᑯᓂᑫᐎᓂᕽ᙮ 5 ᑭᔐᒪᓂᑑ ᓴ ᐅᑮ ᐅᔑᑑᓇᓐ ᑮᔑᑰᓐ, ᐁᑮ ᑕᔗᑭᐱᑑᒡ ᐃᔥᐱᒥᕽ, ᐐᓐ ᑲᔦ ᑳᑮ ᐅᔑᑑᒡ ᐊᑮᓂ, ᑲᑭᓇ ᑲᔦ ᐃᐃᒫ ᐁᔮᓂᑭᓐ᙮ ᐐᓐ ᑲᔦ ᑳᐅᒋ ᐸᑭᑕᓈᒧᓂᒡ ᐯᒫᑎᓯᓂᒡ, ᐁᒦᓈᒡ ᐱᒫᑎᓯᐎᓐ ᐅᐅᒫ ᐊᑮᕽ ᐁᔮᓂᒡ᙮ ᒦᑕᔥ ᐅᐅ ᑳᑎᐯᒋᑫᒡ ᑭᔐᒪᓂᑑ ᐁᓈᒡ ᐃᓂ ᐅᑕᓄᑮᐋᑲᓇᓐ, 6 ᓃᓐ ᑳᑎᐯᒋᑫᔮᓐ, ᑭᑮ ᐊᑐᒥᓐ ᐁᒦᓂᓈᓐ ᒪᔥᑲᐎᓰᐎᓐ ᑫᒋᓈᒡ ᐃᑯ ᐌᐌᓂ, ᑾᔭᒃ ᑲᔦ ᒋᐃᓈᑯᓂᑫᓈᓂᐗᕽ ᐃᐃᒫ ᐊᑮᕽ᙮ ᑮᓐ ᓴ ᑭᐐ ᐋᐸᒋᐃᓐ ᐊᔓᑕᒫᑎᐎᓐ ᐁᐐ ᐅᔑᑕᒪᐗᒀ ᑲᑭᓇ ᐯᒫᑎᓯᐙᒡ᙮ ᑮᓐ ᑲᔦ ᑭᐐ ᐋᐸᒋᐃᓐ ᐁᐐ ᐲᑕᒪᐗᒀ ᑳᐙᓭᔮᓂᒃ ᑯᑕᒃ ᐯᒫᑎᓯᐙᒡ, 7 ᒋᐙᐱᐃᑣ ᑲᔦ ᐃᑭ ᑳᐙᐱᓯᒀ, ᒋᐋᐸᐅᑣ ᑲᔦ ᐃᑭ ᑳᑕᑯᓂᑣ, ᒋᐸᑭᑎᓂᑣ ᑲᔦ ᐃᑭ ᑳᔑ ᑲᔥᑮᑎᐱᑲᓂᓂᒃ ᑭᐸᐅᑏᐎᑲᒥᑯᕽ ᐁᔮᐙᒡ᙮ 8 ᓃᓐ ᐅᔕ ᑳᑎᐯᒋᑫᒡ, ᒦ ᓴ ᐃ ᐁᔑᓂᑳᓱᔮᓐ! ᑳᐐᓐ ᓴ ᓂᐐ ᒦᓈᓰᒃ ᑳᔑ ᑭᒋ ᐃᓀᑖᑯᓯᐗᒃ, ᑳᔑ ᒦᑴᒋᐌᑖᑯᓯᐗᒃ ᑲᔦ ᐃᑭ ᑳᒥᒋ ᐅᔑᐃᑣ ᒪᓂᑑᑳᓇᒃ᙮ 9 ᐃᓂ ᓴ ᑫᑰᓇᓐ ᑳᑮ ᐃᑭᑐᔮᐹᓐ ᒋᐃᔑᓭᑭᓐ ᐋᔕ ᑌᐺ ᑮᐃᔑᓭᐗᓐ᙮ ᑭᐐ ᐐᑕᒪᐎᓂᓂᒻ ᑲᔦ ᐅᔥᑭ ᑫᑰᓇᓐ ᒋᑆ ᒫᒋᓭᑭᓐ᙮ ᒦᑴᒋᓂᑲᒧᐎᓐ 10 ᐅᔥᑭ ᓂᑲᒧᓐ ᓴ ᓂᑲᒨᑕᐎᒃ ᑳᑎᐯᒋᑫᒡ, ᒥᓯᐌ ᓴ ᐱᑯ ᐊᑮᕽ ᐅᒋ ᒦᑴᒋᐌᓂᒥᒃ! ᑲᑭᓇ ᓴ ᐊᐎᔭᒃ ᐁᔮᐙᒡ ᐊᓈᒦᑎᒻ! ᑕᑲ ᒥᓂᓴᓐ ᐅᑲ ᒦᑴᒋᐌᓂᒥᑯᓇᓐ, ᐃᓂ ᑲᔦ ᐃᐃᒫ ᑲᑭᓇ ᐁᔮᓂᒡ᙮ 11 ᑕᑲ ᐱᑾᑕᑲᒥᑰᓐ, ᐃᓂ ᑲᔦ ᐆᑌᓇᐗᓐ ᑕᑭᔒᐌᒪᑲᓅᓐ ᒋᒦᑴᒋᐌᓂᒥᑯᒡ, ᑕᑲ ᐯᒫᑎᓯᓂᒡ ᑮᑕᕒ Kedar ᐌᒌᓂᒡ ᐅᑲ ᒦᑴᒋᐌᓂᒥᑰᐞ! ᐃᐃ ᑲᔦ ᐯᒫᑎᓯᓂᒡ ᓰᓬᐊ Sela ᐌᒌᓂᒡ ᑕᓂᑲᒧᐗᐞ ᑫᐊᐲᒋ ᒌᑫᑕᒥᓂᒡ, ᑕᑲ ᐗᑭᑕᑎᓐ ᑕᐅᒋ ᔖᑯᐌᐗᐞ᙮ 12 ᑕᑲ ᓴ ᐃᑭ ᐙᓴ ᒥᓂᓯᑳᕽ ᑳᐃᔑᑖᐙᒡ ᐅᑲ ᑭᒋ ᐃᓀᓂᒫᐙᓐ ᑳᑎᐯᒋᑫᓂᒡ ᑲᔦ ᒋᒦᑴᒋᐌᓂᒫᐙᒡ᙮ 13 ᑳᑎᐯᒋᑫᒡ ᓴ ᑮᐊᑕ ᒦᑳᓱᒡ ᒦ ᓴ ᐁᓀᑖᑯᓯᒡ ᑖᐱᔥᑰ ᑳᐋᑸᑳᓱᒡ ᒦᑳᓱᐎᓂᓂ, ᐁᑮᔒᒡ ᐁᒥᓴᐌᑕᕽ ᒋᒦᑳᓱᒡ ᐁᓂᑯᒃ ᓴ ᑕᔖᑯᐌ ᒦᑳᓱᐎ ᔖᑯᐌᐎᓐ, ᐅᑲ ᔖᑰᒋᐋᐞ ᑲᔦ ᑳᔒᑫᓂᒥᑯᒡ᙮ ᑭᔐᒪᓂᑑ ᑮᐊᔓᑕᒪᐙᒡ ᐁᐐᐐᒋᐋᒡ ᐅᐱᒫᑎᓰᒪᐞ 14 ᑭᔐᒪᓂᑑ ᐅᐅ ᐃᑭᑐ, ᑭᓉᔥ ᐃᓴ ᑳᐐᓐ ᓂᑮ ᓅᑖᑎᓰ, ᓂᑮ ᒪᓈ ᓅᑖᑦ ᐁᑮ ᓇᑴᑕᓯᐙᓐ᙮ ᒦᑕᔥ ᐋᔕ ᐁᐅᒋᒋᓭᒃ ᑫᑰᓐ ᒋᐃᔑᒋᑫᔮᓐ; ᒋᔖᑯᐌᔮᓐ ᑖᐱᔥᑰ ᐃᑴ ᑳᐐᓴᑫᑕᕽ ᐁᐐ ᓂᑖᐎᑭᓈᐗᓱᒡ᙮ 15 ᓂᑲ ᓂᔑᐗᓈᒋᑑᓇᓐ ᓴ ᐗᒌᓐ, ᑳᐱᑾᑎᓈᑭᓐ ᑲᔦ, ᓂᑲ ᐃᔑᒋᑫ ᑲᔦ ᒋᐹᓱᐙᒡ ᒥᑎᑰᒃ, ᒪᔥᑯᓰᓐ ᑲᔦ, ᓰᐲᓐ ᑲᔦ ᑕᓂ ᐱᑾᑕᑮᐗᓅᓐ, ᑳᐗᐙᔑᐲᔮᑭᓐ ᑲᔦ ᑕᓂ ᐹᑌᐗᓐ᙮ 16 ᓂᑲ ᐃᔑ ᓃᑳᓃᑕᒪᐙᒃ ᓴ ᓇᑫ ᐌᔮᐱᓯᒀ ᐐᑳ ᐁᔑ ᐃᔖᓯᒀ, ᑳᑲᔥᑮᑎᐱᑲᓂᓂᒃ ᓴ ᓂᑲ ᐙᓭᔮᑖᐙᓐ ᑫᓂ ᐃᔖᐙᒡ, ᐁᔑ ᐸᐲᑯ ᐊᔮᓂᒃ ᓴ ᑲᔦ ᓂᑲ ᔔᔥᑯᑖᐙᓐ᙮ ᒦ ᓴ ᐃᐌ ᑫᐃᔑᒋᑫᑕᒪᐗᒀ; ᑳᐐᓐ ᓂᑲ ᓇᑲᓈᓰᒃ᙮ 17 ᐃᑭ ᑕᔥ ᐐᓐ ᑳᑌᐺᔦᓂᒫᐙᒡ ᒪᓂᑑᑳᓇᐞ ᐁᓈᐙᒡ ᐃᓴ ᑲᔦ ᐃᐃ ᐅᔑᒋᑲᓇᐞ, ᑮᓇᐙ ᓴ ᓂᒪᓂᑑᒥᓈᓂᒃ, ᒦᐗᒃ ᓴ ᐃᑭ ᑫᓂ ᑮᐌᔥᑳᐙᒡ ᑫᐊᑲᒋᐃᑣ ᑲᔦ᙮ ᐃᔅᕒᐃᔭᓬᐊᒃ ᑮᑆᓇᐎᑭᑫᒋᑫᐙᒡ 18 ᑳᑎᐯᒋᑫᒡ ᓴ ᐃᑭᑐ, ᐱᓯᑕᒧᒃ ᑮᓇᐙ ᑳᐅᓯᑌᓯᐌᒃ; ᐃᓈᐱᒃ ᐌᔮᐱᓯᐌᒃ ᒋᐙᐱᔦᒃ! 19 ᐊᐌᓀᓐ ᐃᑕᔥ ᑳᐙᐱᓯᒃ? ᒦ ᓴ ᐊᐌ ᓂᑕᓄᑮᐋᑲᓐ, ᑳᐅᓯᑌᓯᒃ ᑖᐱᔥᑰ ᑳᒫᒋᓂᔕᐗᒃ ᒋᑎᐹᒋᒧᒡ᙮ 20 ᓃᐱᐗᐞ ᓴ ᑫᑰᓐ ᑭᐱ ᐙᐸᑖᒻ, ᑳᐐᓐ ᐃᑕᔥ ᑭᐸᐹᒥᑕᓰᒻ᙮ ᐋᓇ ᐁᔐᑕᐗᑫᔦᒃ, ᑳᐐᓐ ᐃᑕᔥ ᑫᑰᓐ ᑭᓅᑕᓰᒻ᙮ 21 ᑳᑎᐯᒋᑫᒡ ᐅᔕ ᐁᑾᔭᒀᑎᓯᒡ ᑳᐅᒋ ᒥᓍᐸᑕᕽ ᐁᑮ ᑭᒋ ᐃᓀᑖᑯᑑᒡ ᐅᑑᓇᔓᐌᐎᓇᓐ, ᐅᑭᑭᓄᐃᑫᐎᓇᓐ ᑲᔦ, ᐁᐊᑕᐌᓂᒫᒡ ᐅᐱᒫᑎᓰᒪᐞ ᒋᑭᑌᑕᒥᓂᒡ᙮ 22 ᐃᓇᔥᑫ ᑕᔥ ᐅᐱᒫᑎᓰᒪᐞ ᑮᒪᑲᒫᐗᐞ, ᐊᓈᒪᑲᒥᒃ ᐁᐃᔑ ᑭᐸᐅᒥᓐᒡ, ᐯᑭᔥ ᐁᑳᓂᒥᓐᒡ ᐁᑭᐸᐅᒥᓐᒡ᙮ ᑮᑮᒨᑎᒫᐗᐞ, ᐁᑮ ᒪᑲᒥᒥᓐᒡ ᐅᑕᔭᐄᒥᓂ, ᑳᐐᓐ ᑲᓇᑫ ᐊᐎᔭᓐ ᒋᑮ ᓈᑕᒫᑯᓂᒡ ᒪᑲᑗᐎᓂᕽ ᐁᔑᓈᑯᓯᐙᒡ, ᑳᐐᓐ ᐊᐎᔭ ᒋᐃᑭᑐᒡ ᒋᑮᐌᐎᒋᑲᓂᐎᐙᒡ᙮ 23 ᐊᐌᓀᓐ ᐃᑕᔥ ᑮᓇᐙ ᑫᐱᓯᑕᒣᒃ ᐅᐅ, ᑯᓂᑫᔥ ᐊᐎᔭ ᐱᒌᓇᒃ ᐅᐅ ᐅᑲ ᐸᐹᒥᑖᓐ᙮ 24 ᐊᐌᓀᓐ ᐃᑕᔥ ᐃᐃ ᐅᑎᔑᒋᑫᐎᓐ ᐃᔅᕒᐃᔭᓬᐊᒃ ᑳᑮ ᐅᒋ ᑮᒨᑎᒫᐎᑣᐸᓀᓐ, ᑳᑮ ᐅᒋ ᒪᑲᒫᐎᑣᐸᓀᓐ ᑲᔦ? ᑳᑎᐯᒋᑫᒡ ᐄᑐᒃ ᑳᑮ ᐃᔑᒋᑫᑯᐸᓀᓐ, ᑮᓇᐎᓐᑦ ᑳᑮ ᒪᒋᑑᑕᐗᕽ᙮ ᑳᐐᓐ ᐋᓃᔥ ᑭᑮ ᐱᒥᓂᔕᐊᒧᐙᓰᒥᓐ ᐅᑎᔑᑣᐎᓐ, ᑳᐐᓐ ᑲᔦ ᑭᑮ ᓇᐃᑕᒧᐙᓰᒥᓐ ᐁᓇᔓᐌᒡ᙮ 25 ᒦᑕᔥ ᑳᑮ ᓰᑭᓇᕽ ᐅᓂᔥᑳᑎᓯᐎᓐ ᐁᔥᑯᑌ ᐌᑖᑾᓂᓂᒃ, ᐁᓀᑖᑾᓂᓂᒃ ᒦᑳᓱᐎᓂᕽ ᑳᔑ ᑭᒋ ᐃᓇᑲᒥᑲᒃ᙮ ᒥᓯᐌ ᑮᐃᓇᑯᓀᓂ ᐃᔥᑯᑌ ᐁᔑᐊᔮᓂᒡ, ᔖᑰᒡ ᐃᑕᔥ ᑳᐐᓐ ᒋᑮ ᓂᓯᑐᑕᒥᓂᒡ; ᐁᑮ ᐊᒀᑭᓲᑯᓂᒡ ᑳᐐᓐ ᑲᓇᑫ ᒋᑮ ᐸᐹᒥᑕᒥᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society