Aaiseya 41 - ᐅᒋᐺ ᑭᒋᒪᓯᓇᐃᑲᓐᐃᔅᕒᐃᔭᓬᐊᒃ ᑫᒋᓈᐁᑕᒨᒃ ᑭᔐᒪᓂᑑᓐ ᒋᐐᒋᐃᑯᐙᒡ 1 ᒦ ᓴ ᐅ ᑭᔐᒪᓂᑑ ᐁᑭᑐᒡ, ᑮᓇᐙ ᐙᓴ ᐊᑮᕽ ᐁᔮᔦᒃ, ᑫᑯ ᓅᑖᑎᑫᒃ ᒋᐱᓯᑕᒣᒃ! ᑾᔮᒌᒃ ᒋᑮᑭᑑᑕᒫᓱᔦᒃ ᐁᔑ ᑎᐹᑯᓂᑎᕽ! ᑭᑲ ᑕᐎᓇᒫᑰᒻ ᓴ ᒋᑮᑭᑐᔦᒃ᙮ ᑕᑲ ᓇᑭᔥᑯᑖᑎᑖ ᒋᑭᑫᑖᑾᒃ ᐊᐌᓀᓐ ᑌᔦᐺᑴᓐ᙮ 2 ᐊᐌᓀᓐ ᓴ ᑳᑮ ᐅᒻᐺᒫᒡ ᐙᐸᓄᕽ ᐃᓇᑫ ᑳᐊᔮᓂᒡ ᐁᑑᑕᐙᒡ ᑲᔦ ᐁᔖᓂᒡ ᐃᑯ ᒋᔖᑰᒋᑣᓂᒡ? ᐊᐌᓀᓐ ᓴ ᑳᐃᔑᐋᓂᒡ ᒋᔖᑰᒋᐋᓂᒡ ᑭᒋᐅᑭᒫᐞ, ᑯᑕᒃ ᑲᔦ ᐯᒫᑎᓯᓂᒡ, ᐅᐸᔑᐸᐃᑫᐎᑯᒫᓂᓃᕽ ᑲᔦ ᐁᐅᒋ ᑑᑕᐙᓂᒡ ᑖᐱᔥᑰ ᑳᐹᔥᑭᓀᓭᒃ᙮ ᐅᐱᑾᑯᓃᕽ ᑲᔦ ᐁᐅᒋ ᐅᓶᔮᒶᐙᓂᒡ ᑖᐱᔥᑰ ᐹᑌ ᒪᔥᑯᓯ ᑳᒫᒌ ᐌᐹᓯᕽ! 3 ᐁᐱᒥᓂᔕᐃᑫᓂᒡ ᓴ ᑳᐐᓐ ᑫᑰᓐ ᐃᔑ ᓇᓃᓵᓂᓯᓰᐗᓐ, ᑳᐃᔖᓂᒡ ᒦᑲᓈᕽ ᐐᑳ ᐃᓇᑫ ᑳᑮ ᐃᔖᓯᓂᒃ᙮ 4 ᐊᐌᓀᓐ ᐃᑕᔥ ᑳᐃᔑᒋᑫᒡ ᐅᐅ ᒋᐃᔑᓭᓂᒃ? ᐊᐌᓀᓐ ᓴ ᑳᐅᓀᑕᕽ ᐋᓃᓐ ᑳᐱ ᐃᔑᓭᓂᒃ ᐅᑖᓈᕽ? ᓃᓐ ᑌᐯᒋᑫᔮᓐ ᓴ ᓂᑮ ᐊᔮ ᒫᐗᒡ ᓂᑕᒻ ᑫᑰᓐ ᑮᒫᒋᓭᒃ᙮ ᓃᓐ ᓴ ᑲᔦ ᑌᐯᒋᑫᔮᓐ ᑫᔐᒪᓂᑑᐎᔮᓐ ᓂᑲ ᐊᔮ ᑲᑭᓇ ᑫᑰᓐ ᐃᔥᒀᓭᒃ᙮ 5 ᐯᒫᑎᓯᐙᒡ ᓴ ᐙᓴ ᐁᔮᐙᒡ ᐅᑮ ᐙᐸᑖᓈᐙ ᐋᓃᓐ ᑳᐃᔑᒋᑫᐗᒃ; ᐁᓭᑭᓯᐙᒡ ᓴ ᒦ ᐃ ᐁᔑ ᓂᓂᑳᓂᒥᓯᐙᒡ, ᒦᔥ ᑲᔦ ᐁᔑ ᐅᑸᓄᐙᒡ ᐁᐲᔖᐙᒡ᙮ 6 ᐁᑕᓱ ᐯᐯᔑᑯᐙᒡ ᓴ ᐅᑖᐃᓈᐙᓐ ᐅᐐᒋᐱᒫᑎᓰᐙᓐ, ᑕᑲ ᓈ ᒪᔥᑲᐌᑕᓐ᙮ 7 ᒥᑎᑯᓈᐯ ᓴ ᐅᑎᓈᓐ ᑳᑕᔒᑲᐙᓂᒡ ᐅᓵᐎ ᔔᓂᔮ ᐙᐱᑰᓐ, ᐁᑕᑕᐌ ᑭᐗᐐᑫᔅ᙮ ᐊᐊ ᑕᔥ ᑲᔦ ᐃᓂᓂ ᑳᔔᔥᑾᑲᓈᒫᒡ ᒪᓂᑑᑳᓇᓐ ᐅᒥᓄ ᑲᓅᓈᓐ ᐃᓂ ᑳᑭᒋᐎ ᓴᑲᐃᑫᓂᒡ ᐁᐃᓈᒡ, ᐁᑕᑕᐌ ᐅᓂᔑᔑᓐ ᐃᐃ ᐊᒀᐱᑭᓯᑫᐎᓐ᙮ ᒦᔥ ᐁᔑ ᑭᒋᐎ ᓴᑲᐙᐙᒡ ᐃᓂ ᒪᓂᑑᑳᓇᓐ ᒋᑲᐎᓭᓯᓂᒃ᙮ 8 ᑮᓇᐙ ᑕᔥ ᐐᓐ ᐃᔅᕒᐃᔭᓬᐊᒃ Israel ᐁᓀᓂᒥᓇᑰᒃ ᑖᐱᔥᑰ ᑳᑮ ᐅᑕᓄᑮᐋᑲᓂᒥᔮᓐ, ᒉᑲᑉ Jacob ᑳᑮ ᐅᓈᐸᒪᑭᐸᓐ, ᑳᑮ ᐅᑕᑳᓀᓯᒡ ᐁᐸᕒᐊᐋᒥᕽ Abraham ᑳᑮ ᓵᑭ ᐐᒌᐎᒪᒃ᙮ 9 ᐌᑎ ᓴ ᐊᔨᔥᑴᑲᒥᒃ ᑭᑮ ᐱᐅᒋ ᐲᓂᓂᓂᒻ, ᒫᐗᒡ ᐁᔑ ᐙᓴᐗᕽ ᐁᔑ ᑲᑮᑫᔮᒃ ᐊᑭ ᑭᑮ ᐅᒋ ᐊᑐᒥᓂᓂᒻ ᐁᑮᐃᓂᓇᑰᒃ, ᑮᓇᐙ ᐅᔕ ᓂᑕᓄᑮᐋᑲᓇᒃ! ᑭᑮ ᐅᓈᐸᒥᓂᓂᒻ, ᑳᐐᓐ ᐃᑕᔥ ᑭᑖᓇᐌᓂᒥᓯᓅᓂᓂᒻ! 10 ᑫᑯ ᓴ ᓭᑭᓯᑫᒃ, ᓃᓐ ᐄᑐᒃ ᑭᐐᒌᐎᓂᓂᒻ, ᑫᑯ ᐸᑭᑌᑕᑫᒃ, ᓃᓐ ᐅᔕ ᑭᑭᔐᒪᓂᑑᒥᐙ᙮ ᑭᑲ ᒪᔥᑲᐎᓰᐃᓂᓂᒻ, ᑭᑲ ᐐᒋᐃᓂᓂᒻ ᑲᔦ᙮ ᑫᒋᓈᒡ ᓴ ᑳᑾᔭᑴᑖᑾᒃ ᓂᒪᔥᑲᐎᓰᐎᓐ ᓂᑲ ᐋᐸᒋᑑᓐ ᒋᒥᒋᒥᓂᓇᑰᒃ᙮ 11 ᐃᓇᔥᑫ ᑕᔥ ᐃᑭ ᑳᓂᔥᑫᓂᒥᓀᒀ ᒦ ᐃ ᒋᐊᑲᒋ ᔖᑰᒋᐃᑣ, ᐃᑭ ᓴ ᑳᓇᑳᔥᑲᐎᓀᒀ ᑳᐐᓐ ᑫᑰᓐ ᑕᐃᓈᐸᑌᑖᑯᓯᓰᐗᒃ, ᑕᓂᔑᐗᓈᑎᓯᐗᒃ ᑲᔦ᙮ 12 ᒥᓴᐙ ᑯ ᑲᑴ ᒥᑲᐌᒀ ᑳᔒᑫᓂᒥᓀᒀ ᑳᐐᓐ ᑭᑲ ᒥᑲᐙᓯᐙᐙᒃ᙮ ᐃᑭ ᑲᔦ ᑳᒦᑳᓂᓀᒀ ᑳᐐᓐ ᑫᑰᓐ ᑕᐃᓈᐸᑌᑖᑯᓯᓰᐗᒃ, ᑳᐐᓐ ᑲᔦ ᑕᐊᔮᓰᐗᒃ᙮ 13 ᓃᓐ ᐅᔕ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑭᑭᒋᓂᑭᐙᕽ ᐃᓇᑫ ᑭᑲ ᐃᔑ ᑭᒋᐎᓂᓂᓂᒻ ᐁᐃᓂᓇᑰᒃ, ᑫᑯ ᓭᑭᓯᑫᒃ, ᑭᑲ ᐐᒋᐃᓂᓂᒻ᙮ 14 ᑫᑯ ᓭᑭᓯᑫᒃ ᒣᒉᑖᑯᓯᔦᒃ ᒉᑲᐴᕽ ᐌᑕᑳᓀᓯᔦᒃ, ᐁᑳᓭᑖᑯᓯᔦᒃ ᐃᔅᕒᐃᔭᓬᐊᒃ, ᓃᓐ ᓴ ᐱᑯ ᑭᑲ ᐐᒌᐎᓂᓂᒻ, ᐃᑭᑐ ᑳᑎᐯᒋᑫᒡ ᑭᐱᒫᒋᐃᐌᒥᐙ, ᑳᑭᑌᑖᑯᓯᓂᒡ ᐃᔅᕒᐃᔭᓬᐊᒃ ᐅᑭᔐᒪᓂᑑᒥᐙᓐ᙮ 15 ᒦ ᓴ ᐙᐃᔑᐃᓇᑰᒃ ᑖᐱᔥᑰ ᓇᐸᑭᓴᒃ ᑳᓵᓵᑳᐱᑭᓯᑭᓐ ᐅᔥᑭ ᓴᑲᐃᑲᓇᓐ ᑳᑳᔖᑭᓐ ᑳᐋᐸᑕᒃ ᐁᔑ ᐊᑌᑭᓐ ᑭᑎᑳᓇᓐ᙮ ᒦᔥ ᒋᔑᑯᐱᑑᔦᒃ ᑭᒋ ᐗᒌᓐ ᒋᐱᑭᔥᑭᓯᑭᓐ, ᑳᐱᑾᑎᓈᑭᓐ ᑲᔦ ᒋᑑᑕᒣᒃ ᒋᐃᓀᑖᑾᑭᓐ ᑭᑎᑳᓀᓯ ᐅᑯᓇᔮᓂᕽ᙮ 16 ᒦᔥ ᒋᑮᓰᐋᓯᒋᑫᔦᒃ, ᒋᒫᒌ ᐌᐹᓯᑭᓐ ᐅᑯᓇᔮᓇᓐ ᒥᓯᐌ ᒋᐃᔑ ᐌᐹᓯᑭᓐ ᑮᑭᒋᓅᑎᕽ᙮ ᑮᓇᐙ ᑕᔥ ᐐᓐ ᑭᑲ ᒥᓉᑖᒻ ᐁᐐᒌᐎᓀᒃ ᑳᑎᐯᒋᑫᒡ, ᑭᑲ ᒦᑴᒋᐌᓂᒥᒫᐙᓐ ᑲᔦ ᑳᑭᑌᑖᑯᓯᓂᒡ ᐃᔅᕒᐃᔭᓬᐊᒃ ᐅᑭᔐᒪᓂᑑᒥᐙᓐ᙮ 17 ᑫᑎᒫᑭᓯᐙᒡ ᓴ ᓇᓈᑐᓀᐊᒧᐙᒡ ᓂᐲᓂ, ᑳᐐᓐ ᐅᑲ ᒥᑲᓰᓈᐙ; ᐅᑌᓇᓂᐎᐙᓐ ᐐᑫ ᐹᑌᓂᐗᓐ ᐁᓅᑕᔮᐹᑴᐙᒡ᙮ ᓃᓐ ᓴ ᑌᐯᒋᑫᔮᓐ ᓂᑲ ᓇᑴᑕᐙᒃ, ᓃᓐ ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ ᑳᐐᓐ ᓂᑲ ᐌᐱᓈᓰᒃ᙮ 18 ᓂᑲ ᐃᔑᒋᑫᐙᓐ ᓴ ᓰᐲᓐ ᒋᐱᒥᒋᐗᓂᓂᑭᓐ ᐁᔑ ᐊᔨᔥᐹᐗᑳᓂᒃ, ᒋᒪᒨᑭᒋᐗᓂᓂᒃ ᑲᔦ ᐁᔑ ᐸᐸᓴᑎᓈᓂᒃ᙮ ᓂᑲ ᐃᔑᒋᑫ ᓴ ᐱᑾᑕᑲᒥᒃ ᒋᐗᐙᔑᐲᔮᒃ, ᐹᑌᑲᒥᒃ ᑲᔦ ᒋᒪᒨᑭᒋᐗᕽ ᓂᐱ᙮ 19 ᐁᔑ ᐱᑾᑕᑲᒥᑳᒃ ᓴ ᓂᑲ ᓂᑖᐎᑭᐋᒃ ᑮᔥᑳᑎᑰᒃ ᐅᑯ ᑲᔦ ᑎᓄ ᒥᑎᑰᒃ, ᐊᑫᔕ Acacia, ᒬᑕᓬ Myrtle, ᐋᓬᐃᑉ Olive ᑲᔦ᙮ ᐁᔑ ᐸᔥᒀᒃ ᓴ ᑕᓂ ᓅᐱᒦᐗᓐ ᒋᓂ ᐊᔮᐙᒡ ᐅᑭᑲᒃ, ᒥᓇᐃᑰᒃ, ᒎᓂᐸᕒ Juniper, ᑲᔦ ᓵᐃᐸᕒᐁᔅ Cypress ᑎᓄᐙᑎᑰᒃ᙮ 20 ᒦᑕᔥ ᐯᒫᑎᓯᐙᒡ ᒋᐙᐸᑕᒧᐙᒡ, ᒋᑭᑫᑕᒧᐙᒡ, ᒋᓈᑲᑕᐌᑕᒧᐙᒡ, ᒋᓂᓯᑐᑕᒧᐙᒡ ᑲᔦ ᓃᓐ ᑳᑎᐯᒋᑫᐗᒃ ᐅᐅ ᐁᑮ ᐃᔑᒋᑫᐗᒃ, ᐃᔅᕒᐃᔭᓬᐊᒃ ᑫᑌᑖᑯᓯᓂᒡ ᐅᑭᔐᒪᓂᑑᒥᐙᓐ ᐅᐅ ᐁᑮ ᐃᔑᒋᑫᓂᒡ ᒋᐃᔑᓭᓂᒃ᙮ ᑳᑎᐯᒋᑫᒡ ᑮᑲᑳᓱᒫᒡ ᒪᓂᑑᑳᓇᐞ 21 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ ᐃᔅᕒᐃᔭᓬᐊᒃ ᐌᑑᑭᒫᒥᐙᒡ, ᐲᑑᒃ ᐋᓃᓐ ᐗᐃᑭᑐᔦᒃ ᑮᓇᐙ ᑳᐅᒪᓂᑑᒥᒥᓀᒀ ᑯᑕᒃ ᐯᒫᑎᓯᐙᒡ, ᐲᑑᒃ ᐋᓃᓐ ᐗᐃᔑ ᑲᑴ ᔖᑰᓱᑖᑯᓯᔦᒃ᙮ 22 ᐊᐯᔪᒃ ᒋᑎᐹᒋᒧᔦᒃ ᐋᓃᓐ ᑫᐃᔑᐌᐸᒃ, ᐐᑕᒪᐎᔑᓈᒻ ᐋᓃᓐ ᑳᐃᔑᐌᐸᒃ ᐅᑖᓈᕽ ᒋᑭᑫᑖᑾᒃ ᐋᓃᓐ ᒫᐗᒡ ᐃᔥᒀᒡ ᑫᐃᔑᐌᐸᒃ, ᑯᒫ ᑲᔦ ᒋᑎᐹᒋᒧᔦᒃ ᐋᓃᓐ ᐱᒌᓇᒃ ᑫᐊᓂ ᐃᔑᐌᐸᒃ᙮ 23 ᑎᐹᒋᒧᒃ ᑲᔦ ᐋᓃᓐ ᓃᑳᓇᔭᐄ ᐃᓇᑫ ᐁᔑᓈᑾᒃ ᒋᑭᑫᑕᒫᕽ ᐁᒪᓂᑑᐎᔦᒃ! ᑫᑰᓐ ᓴ ᓈ ᐃᔑᒋᑫᒃ ᐌᓂᔑᔑᕽ, ᑯᒫ ᑲᔦ ᑳᒫᔑᓈᑾᒃ ᑫᐅᒋ ᐸᑭᑌᑕᒫᕽ ᒋᒨᔥᑭᓀ ᑯᑖᒋᔮᕽ᙮ 24 ᑳᐐᓐ ᓴ ᐊᐙᒡ ᑫᑰᓐ ᑭᑎᓈᐸᑌᑖᑯᓯᓰᒻ, ᐁᓇᓄᑮᔦᒃ ᑲᔦ ᑳᐐᓐ ᑫᑰᓐ ᐃᓈᐸᑌᑖᑾᓯᓅᓐ᙮ ᐃᑭ ᓴ ᐁᓇᒥᐁᑕᐎᓀᒀ ᑲᒀᓂᓴᑫᑖᑯᓯᐗᒃ᙮ 25 ᓂᑮ ᐅᓈᐸᒫ ᓴ ᐃᓂᓂ ᐙᐸᓄᕽ ᐃᓇᑫ ᐌᒌᒡ ᓂᐐᓱᐎᓂᕽ ᑳᔑ ᑲᓅᔑᒡ, ᑮᐌᑎᓄᕽ ᓴ ᓇᑫ ᑕᐱᐅᒋ ᒦᑳᓱ᙮ ᐅᑲ ᑕᑕᑯᑳᓈᐞ ᓴ ᐌᑭᒫᐎᓂᒡ ᒋᑑᑕᐙᒡ ᑖᐱᔥᑰ ᑳᑑᑕᐎᓐᒡ ᐅᔑᒌᔥᑭᐗᑭᓂᑲᓐ, ᐊᐲ ᐙᐱᑲᓐ ᐊᑭᑾᐞ ᑳᐅᔑᐋᒡ ᑮᔑᑯᔥᑲᐙᒡ ᐙᐱᑲᓇᓐ᙮ 26 ᐊᐌᓀᓐ ᐃᑕᔥ ᑳᑕᔑᔦᒃ ᑳᐐᑕᒪᐎᓀᒃ ᐅᐅ ᓃᔮᒃ ᒋᐃᔑᓭᓂᒃ, ᒋᑮᐃᑰᔦᑭᐸᓐ ᐃᑕᔥ ᐁᑌᐺᔦᒃ? ᑳᐐᓐ ᓴ ᐊᐎᔭ ᐁᑕᔑᔦᒃ ᐅᐅ ᒋᑮ ᐃᑭᑐᔦᒃ! ᑳᐐᓐ ᐊᐎᔭ ᑭᑮ ᓅᑖᑯᓰᐙ ᑫᑰᓐ ᒋᐃᑭᑐᔦᒃ! 27 ᓃᓐ ᓴ ᓂᑕᒻ ᑳᑮ ᐐᑕᒪᐗᒀ ᓵᔭᓂᕽ Zion ᐁᔮᐙᒡ ᐁᑮ ᐃᑭᑐᔮᓐ, ᐃᓇᔥᑫ ᐯᒫᑎᓯᐙᒡ ᓴ ᐱᑮᐌᐗᒃ᙮ ᓂᑮ ᐃᔑᓂᔕᐙ ᐊᐎᔭ ᒉᕒᐆᓴᓬᐊᒥᕽ ᒋᐊᐎ ᒥᓍᒋᒧᒡ᙮ 28 ᐁᑮ ᐊᔨᓈᐱᔮᓐ ᐃᑕᔥ ᐁᔑᐊᔮᐙᒡ ᒪᓂᑑᑳᓇᒃ ᑳᐐᓐ ᐊᐎᔭ ᑮᐊᔮᓰ ᑫᐐᑕᒫᑫᒡ ᑫᐃᔑᒋᑫᐎᓐᒡ, ᑳᐐᓐ ᑲᔦ ᐊᐎᔭ ᒋᑮ ᓇᑴᑕᕽ ᑳᐃᔑ ᑲᑴᑗᐗᒃ! 29 ᐃᓇᔥᑫ ᑕᔥ ᐅᑯ ᑲᑭᓇ ᒪᓂᑑᒃ ᑳᐐᓐ ᑫᑰᓐ ᐃᓈᐸᑎᓯᓰᐗᒃ, ᑳᐐᓐ ᑲᔦ ᑫᑰᓐ ᐃᔑᒋᑫᓰᐗᒃ, ᓅᑎᓄᕽ ᓴ ᐃᓀᑖᑯᓯᐗᒃ, ᐁᒥᒋ ᐗᐙᓀᑕᒧᐃᐌᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society