2 Saamiyoo 9 - ᐅᒋᐺ ᑭᒋᒪᓯᓇᐃᑲᓐᑌᐱᑦ, ᐊᐊ ᑲᔦ ᒣᐱᐳᔐᑦ ᐁᑕᔑᓱᐙᒡ 1 ᑌᐱᑦ David ᐃᑕᔥ ᐅᐅ ᑮᐃᔑ ᑲᑴᑗ, ᑯᓂᑫ ᐊᐎᔭ ᑫᔮᐱ ᐊᔮᑐᒃ ᐁᔥᑯ ᐱᒫᑎᓯᒡ ᒋᐅᒌᒡ ᔂᓬᐊᓐ Saul ᐅᑖᐎᓂᓃᕽ, ᐁᐐ ᓈᑯᑖᐗᒃ ᒋᒥᓄᑑᑕᐗᒃ ᐅᒋ ᒞᓇᑕᓇᓐ Jonathan? ᑮᐃᑭᑐ᙮ 2 ᑮᐊᔮᐗᓐ ᐄᑐᒃ ᔂᓬ ᐅᑖᐎᓂᕽ ᐅᑕᓄᑮᐋᑲᓇᓐ ᓵᐃᐸ Ziba ᐁᐃᔑᓂᑳᓱᓂᒡ᙮ ᒦᐗᓐ ᓴ ᐃᓂ ᑳᑮᐃᓂᒥᓐᒡ ᒋᐊᑕ ᐙᐸᒥᑯᒡ ᑌᐱᑦ ᑭᒋᐅᑭᒫ ᐁᔑᐊᔮᒡ᙮ ᒦᑕᔥ ᐅᐅ ᑳᐃᓈᒡ, ᑮᓐ ᐃᓇ ᓵᐃᐸ? ᐅᐅᔥ ᐅᑮᐃᑰᓐ, ᓃᓐ ᐄᑐᒃ ᑭᑕᓄᑮᐋᑲᓐ, ᐅᑮᐃᑰᓐ᙮ 3 ᒦᑕᔥ ᐅᐅ ᑳᐃᔑ ᑲᑴᒋᒫᒡ, ᐊᐎᔭ ᓇ ᐊᔮ ᒋᐃᔥᑯ ᐱᒫᑎᓯᒡ ᒋᐅᒌᒡ ᔂᓬ ᐅᑖᐎᓂᕽ, ᑫᐙᐸᑕᐊᒃ ᐋᓃᓐ ᑭᔐᒪᓂᑑᓐ ᑳᔑ ᒥᓄᑑᑖᑫᓂᒡ? ᐅᑮᐃᓈᓐ᙮ ᐅᐅ ᑕᔥ ᓵᐃᐸᐗᓐ ᐅᑮᐃᑰᓐ, ᒞᓇᑕᓐ ᐅᑯᓯᓴᓐ ᓴ ᑫᔮᐱ ᐱᒫᑎᓯᐗᓐ, ᑳᒫᑭᓯᓂᒡ ᒥᒋᓃᔥ ᐅᓯᑎᓃᕽ, ᐅᑮᐃᑰᓐ᙮ 4 ᒦᑕᔥ ᐅᐅ ᑳᐃᓈᒡ, ᐋᑎ ᑕᔥ ᐁᔮᒡ? ᐅᐅ ᓴ ᐅᑮᐃᑰᓐ, ᐌᑎ ᓴ ᐊᔮ ᐊᔮᐎᓂᕽ ᓬᐆᑎᐹᕒ Lo-Debar, ᐅᐙᑳᐃᑲᓂᓃᕽ ᒣᑭᕒ Machir ᐁᔑᓂᑳᓱᓂᒡ ᐌᑌᑌᓂᒡ ᐊᒫᔦᓬᐊᓐ Ammiel, ᐅᑮᐃᑰᓐ᙮ 5 ᒦᑕᔥ ᑌᐱᑦ ᑳᐃᔑ ᐊᓅᑮᒡ ᒋᓈᓯᑲᐎᒥᓐᒡ᙮ 6 ᐊᐲ ᑕᔥ ᒣᐱᐳᔐᑕᓐ Mephibosheth ᑳᑮ ᐅᑌᑌᓂᒡ ᒞᓇᑕᓇᓐ, ᑳᑮ ᐅᒥᔔᒥᓯᓂᒡ ᔂᓬᐊᓐ, ᐁᐱ ᑕᑯᔑᓂᓂᒡ ᑌᐱᑦ ᐁᔑᐊᔮᒡ, ᒦ ᓴ ᑳᐃᔑ ᐊᓂᒥᑯᑖᓂᒡ ᐁᑮ ᑭᑌᓂᒥᑯᒡ᙮ ᒦᑕᔥ ᐅᐅ ᑳᐃᓈᒡ, ᒣᐱᐳᔐᑦ! ᐅᐅ ᑕᔥ ᐅᑮᐃᑰᓐ, ᓃᓐ ᓴ ᑭᑕᓄᑮᐋᑲᓐ ᓂᑎᓄᐤ! 7 ᒦᑕᔥ ᐅᐅ ᑳᐃᓈᒡ, ᑫᑯ ᓭᑭᓯᑫᓐ, ᑌᐺ ᓴ ᑯ ᑭᑲ ᒥᓄᑑᑕᐎᓐ ᐅᒋ ᒞᓇᑕᓐ ᑳᑮ ᐅᑌᑌᔭᓐ᙮ ᑭᑲ ᑮᐌ ᒦᓂᓐ ᓴ ᑲᑭᓇ ᐊᑮᓂ ᑭᒥᔔᒥᓯᐸᓐ ᑳᑮ ᑎᐱᓇᐌᐎᓯᒡ, ᓂᑕᑑᐳᐎᓈᑯᕽ ᓴ ᑲᔦ ᒨᔕᒃ ᑭᑲ ᑕᔑ ᐐᓯᓐ, ᐅᑮᐃᓈᓐ᙮ 8 ᒦᔥ ᒣᐱᐳᔐᑕᓐ ᑳᐃᔑ ᐊᓂᒥᑯᑖᓂᒡ ᐁᑮᐃᑯᒡ, ᑳᐐᓐ ᓴ ᓃᓐ ᓇᐗᒡ ᐸᐯᓇᒃ ᓂᑎᓀᑖᑯᓯᓰ ᐊᐲᒡ ᐐᓐ ᐊᐊ ᐊᓂᒧᔥ ᑳᓂᐳᒡ᙮ ᐌᑯᓀᓐ ᐃᑕᔥ ᐗᐅᒋ ᒥᓄᑑᑕᐎᔭᓐ, ᑭᑕᓄᑮᐋᑲᓂᕽ ᐁᓀᓂᒧᔮᓐ? ᐅᑮᐃᑰᓐ᙮ 9 ᒦᑕᔥ ᑭᒋᐅᑭᒫ ᑳᐃᔑ ᐊᑐᒫᒡ ᓵᐃᐸᐗᓐ, ᔂᓬᐊᓐ ᑳᑮ ᐊᓄᑮᑕᐙᓂᑯᐸᓀᓐ ᐅᐅ ᐁᑮᐃᓈᒡ, ᒣᐱᐳᔐᑦ ᓴ ᐌᒥᔔᒥᓯᒡ ᑳᑮ ᐅᑑᑭᒫᒥᐗᑎᐸᓐ, ᓂᒦᓈ ᑲᑭᓇ ᑫᑰᓐ ᑳᑮ ᑎᐱᓇᐌᐎᓯᓂᒡ ᔂᓬᐊᓐ, ᐃᓂ ᑲᔦ ᑳᑮ ᑎᐯᑕᒥᓂᒡ ᐅᓃᒑᓂᓯᓂ᙮ 10 ᑮᓐ ᐃᑕᔥ ᐐᓐ, ᐃᑭ ᑲᔦ ᑭᑯᓯᓴᒃ, ᑭᑕᓄᑮᐋᑲᓇᒃ ᑲᔦ ᑭᑲ ᐊᓄᑳᑕᒧᐙᒻ ᐃᐃ ᐊᑮᓂ ᒋᑭᑎᑳᑕᒧᐌᒃ, ᒋᓂᑖᐎᑭᒋᑫᒪᑲᓂᓂᒃ᙮ ᒦᔥ ᐃᐃᒫ ᑳᑮ ᐅᑑᑭᒫᒥᔭᐸᓐ ᐆᔑᓴᓐ ᑫᐅᑖᑎᓯᓂᒡ᙮ ᐊᐊ ᓴ ᐐᓐ ᒣᐱᐳᔐᑦ ᓂᑕᑑᐳᐎᓈᑯᕽ ᒨᔕᒃ ᐃᑯ ᑕᑕᔑ ᐐᓯᓂ, ᐅᑮᐃᓈᓐ᙮ ᓵᐃᐸ ᓴ ᑮᒥᑖᔑᓈᓇᓂᐗᐞ 15 ᐅᑯᓯᓴᐞ, ᐅᑕᓄᑮᐋᑲᓇᐞ ᐃᑕᔥ ᓃᔥᑕᓇ 20 ᑮᑕᔑᐗᐞ᙮ 11 ᒦᑕᔥ ᐅᐅ ᑳᐃᑯᒡ ᓵᐃᐸᐗᓐ, ᑲᑭᓇ ᓴ ᑯ ᐁᔑ ᐊᓅᔑᒡ ᓂᑑᑭᒫᒻ ᑭᒋᐅᑭᒫ ᓂᑲ ᐃᔑᒋᑫᐙᓐ, ᐁᑎᓄᐎᐗᒃ ᑯᑕ ᐅᑕᓄᑮᐋᑲᓇᓐ, ᐅᑮᐃᑰᓐ᙮ ᒣᐱᐳᔐᑦ ᐃᑕᔥ ᐐᓐ ᑮᑕᔑ ᐐᓯᓂ ᐅᑕᑑᐳᐎᓈᑯᓃᕽ ᑌᐱᑑᓐ, ᑖᐱᔥᑰ ᐯᔑᒃ ᑭᒋᐅᑭᒫ ᐅᑯᓯᓴᓐ ᐁᑮ ᐃᓀᓂᒥᓐᒡ᙮ 12 ᒣᐱᐳᔐᑦ ᓴ ᐅᑯᓯᓴᓐ ᒫᐃᑲ Mica ᑮᐃᔑᓂᑳᓱᐗᓐ᙮ ᑲᑭᓇ ᓴ ᑲᔦ ᓵᐃᐸᐗᓐ ᐅᑖᐎᓂᓃᕽ ᑳᑮ ᐅᒌᓂᒡ ᑮᐅᑕᓄᑮᐋᑲᓂᒥ᙮ 13 ᒦᑕᔥ ᑭᒋ ᐆᑌᓈᕽ ᒉᕒᐆᓴᓬᐊᒥᕽ Jerusalem ᑳᐃᔑᑖᒡ, ᐋᓃᔥ ᑮᑕᔑ ᐐᓯᓂ ᑭᒋᐅᑭᒫᓐ ᐅᑕᑑᐳᐎᓈᑯᓃᕽ᙮ ᒥᒋᓃᔥ ᓴ ᐅᓯᑎᕽ ᑮᒫᑭᓯ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society