2 ᑭᒋᐅᑭᒫᒃ 5 - ᐅᒋᐺ ᑭᒋᒪᓯᓇᐃᑲᓐᓀᐊᒪᓐ ᑮᐊᑕᐎᐃᓐᒡ 1 ᐊᐊ ᑕᔥ ᐃᓂᓂ ᓀᐊᒪᓐ Naaman ᐁᔑᓂᑳᓱᒡ ᑮᔑᒫᑲᓂᔒᐎᑭᒫᐎ ᐁᑮ ᑎᐯᓂᒫᒡ ᐅᔑᒫᑲᓂᔒᒥᓂ ᐃᓂ ᑫᒋᐅᑭᒫᐎᓂᒡ ᐌᑎ ᓰᕒᐃᔭ ᐊᑮᕽ Syria᙮ ᐐᑫ ᑕᔥ ᐅᑮ ᑭᒋ ᐃᓀᓂᒥᑰᓐ ᑭᒋᐅᑭᒫᓐ ᐋᓃᔥ ᐐᓐ ᐅᑮ ᐋᐸᒋᐃᑰᓐ ᑳᑎᐯᒋᑫᓂᒡ ᑳᑮ ᐅᒋ ᓂᑖ ᔖᑰᒋᑣᓂᒡ ᓰᕒᐃᔭᐎᓂᓂᐗᐞ᙮ ᐐᑫ ᑲᔦ ᑮᓴᓇᑭᓯ ᑮᒦᑳᓱᒡ ᐊᐊ ᓀᐊᒪᓐ, ᔖᑰᒡ ᐃᑯ ᑮᓴᓇᑭ ᐅᒥᑮᐙᐱᓀ᙮ 2 ᓰᕒᐃᔭᐎ ᔑᒫᑲᓂᔕᒃ ᐃᑕᔥ ᐯᐸᑳᓐ ᑮᐊᔨᔖᐙᑯᐸᓐ ᐁᑮ ᐊᔪᑸᓄᐙᑯᐸᓀᓐ᙮ ᐯᔑᒃ ᑕᔥ ᐃᑴᓭᓴᓐ ᑮᐅᒋ ᒪᑲᑗᐙᑯᐸᓐ ᐃᔅᕒᐃᔭᓬ ᐊᑮᕽ᙮ ᒦᑕᔥ ᐗᐊ ᐃᑴᓭᔅ ᑳᑮ ᐸᒦᑕᐙᒡ ᓀᐊᒪᓇᓐ ᐐᐎᓂ᙮ 3 ᒦᑕᔥ ᐊᐊ ᐃᑴᓭᔅ ᑳᐃᓈᒡ ᐅᑑᑭᒫᑴᒪᓐ, ᐊᐯᔥ ᓂᑑᑭᒫᒻ ᐐᒌᐙᐸᓐ ᐃᓂ ᑫᓅᑕᒪᐙᓂᒡ ᑭᔐᒪᓂᑑᓐ ᐌᑎ ᓴᒣᕒᐃᔭ Samaria ᐊᑮᕽ ᐁᔮᓂᒡ᙮ ᐅᑖᑮ ᓇᓈᑕᐎᐃᑰᓐ ᐅᔕ ᐃ ᑳᐃᓈᐱᓀᒡ, ᐅᑮᐃᓈᓐ᙮ 4 ᐅᑮ ᐊᑕ ᐙᐸᒫᓐ ᑕᔥ ᐅᑑᑭᒫᒪᓐ ᐁᑮ ᐊᐎ ᐐᑕᒪᐙᒡ ᐋᓃᓐ ᑳᐃᑭᑐᓂᒡ ᐃᓂ ᐃᑴᓭᓴᓐ ᐃᔅᕒᐃᔭᓬ ᐊᑮᕽ ᑳᑮ ᐅᒌᓂᒡ᙮ 5 ᒦᑕᔥ ᑳᐃᑯᒡ ᐃᓂ ᑳᑮ ᑭᒋᐅᑭᒫᐎᓂᒡ ᓰᕒᐃᔭ ᐊᑮᕽ, ᐊᐤ ᔐᒫᒃ ᒫᒑᓐ, ᓂᑲ ᐅᔑᐲᐊᒪᐙ ᓴ ᑭᒋᐅᑭᒫ ᐌᑎ ᐃᔅᕒᐃᔭᓬ ᐊᑮᕽ ᑳᐊᔮᒡ, ᐅᑮᐃᑰᓐ᙮ ᒦᔥ ᓀᐊᒪᓐ ᑳᐃᔑ ᒫᒑᒡ, ᐁᑮ ᒫᒌᓈᒡ ᓂᑯᑣᒌᕽ ᒥᑖᔂᒃ 6,000 ᐅᓵᐙᐱᑯ ᔔᓂᔮᓐ, ᓃᔣᔂᒃ ᓈᓂᒥᑕᓇ 750 ᑕᓱ ᑯᓯᑾᓐ ᐙᐹᐱᑯ ᔔᓂᔮ ᐙᐱᑰᓐ ᑲᔦ, ᒥᑖᓶᐙᓐ ᑲᔦ ᑭᑭᔥᑭᑲᓇᓐ ᐅᑮ ᑕᑯ ᒫᒌᑑᓇᓐ᙮ 6 ᐃᐃᐌᓂ ᑕᔥ ᐅᔑᐲᐃᑲᓐ ᑳᑮ ᐲᑕᒪᐙᒡ ᐃᓂ ᐃᔅᕒᐃᔭᓬᐃ ᑭᒋᐅᑭᒫᓐ ᒦ ᐅᐌ ᑳᐃᔑᐲᐃᑳᑌᓂᒃ, ᒦ ᓴ ᐁᔑᐲᐊᒪᐎᓈᓐ, ᐁᐃᔑᓂᔕᐗᒃ ᓂᑕᓄᑮᐋᑲᓐ ᓀᐊᒪᓐ ᒋᓇᓈᑕᐎᐊᒡ ᐃᐃ ᑳᐃᓈᐱᓀᒡ᙮ 7 ᐊᐲ ᑕᔥ ᐃᔅᕒᐃᔭᓬᐃ ᑭᒋᐅᑭᒫ ᐁᐊᓇᒥᑑᒡ ᐃᐃ ᐅᔑᐲᐃᑲᓐ, ᒦ ᓴ ᑳᐃᔑ ᑖᔥᑮᑭᐱᑑᒡ ᐅᑭᑭᔥᑭᑲᓇᓐ ᐁᐲᒋ ᑯᔥᑴᑕᕽ ᐁᑮ ᐃᑭᑐᒡ ᐃᑕᔥ, ᓂᒪᓂᑑᐤ ᐃᓇ, ᐊᐎᔭ ᑮᓂᓴᒃ ᒋᑮᐌ ᐱᒫᑎᓰᐊᑭᐸᓐ? ᐌᑯᓀᓂᓂ ᑕᔥ ᐗᐊ ᐃᓂᓂ ᐌᒋ ᐲᒋᓂᔕᐙᒡ ᐊᐎᔭᓐ ᒋᒥᓄᐊᔮᐃᒪᒃ ᑳᓴᓇᑭ ᐅᒥᑮᐙᐱᓀᓂᒡ? ᒦ ᓴ ᐃ ᐁᔑᒋᑫᒡ ᐁᑲᑴ ᒥᑲᕽ ᐋᓃᓐ ᑫᔑ ᒫᔑ ᐐᒌᐎᒡ᙮ 8 ᐊᐲ ᑕᔥ ᐃᓬᐋᐃᔕ Elisha ᑭᔐᒪᓂᑑᓐ ᐌᑎᓂᓃᒥᑯᒡ ᐁᓅᑕᕽ ᐃᔅᕒᐃᔭᓬᐃ ᑭᒋᐅᑭᒫᓐ ᐁᑮ ᑖᔥᑮᑭᐱᑑᓂᒡ ᐅᑭᑭᔥᑭᑲᓂᓂ, ᒦᔥ ᑳᐃᔑ ᐊᓅᑮᒡ ᒋᐐᑕᒪᐎᒥᓐᒡ ᑭᒋᐅᑭᒫᓐ ᐅᐅ ᐁᑮ ᐃᑭᑐᒡ, ᐌᑯᓀᓐ ᑕᔥ ᐌᒋ ᑖᔥᑮᑭᐱᑑᔭᓐ ᑭᑭᑭᔥᑭᑲᓇᓐ? ᐃᓇᔥᑫ ᓃᓐ ᓂᑲ ᐱ ᐊᑕ ᐙᐸᒥᒃ, ᐅᑲ ᑭᑫᑖᓐ ᐃᑕᔥ ᐁᐊᔮᓂᒡ ᐅᑮᑭᑑᑕᒫᑫᓐ ᐅᐅᒫ ᐃᔅᕒᐃᔭᓬ ᐊᑮᕽ! ᑮᐃᑭᑐ᙮ 9 ᓀᐊᒪᓇᓐ ᑕᔥ ᑮᐲᔖᐗᓐ ᑳᑮ ᐃᔑᐊᔮᒡ ᐁᑮ ᐲᓈᓂᒡ ᐅᒥᑕᑎᒨᒥᓂ; ᐅᑑᑖᐹᓈᑯᓂ ᑲᔦ, ᐁᑮ ᐃᔑ ᑭᐱᒌᓂᒡ ᐁᔑ ᐃᔥᒀᑌᒥᐗᓂᓂᒃ ᐅᐙᑳᐃᑲᓐ᙮ 10 ᒦᑕᔥ ᐃᓬᐋᐃᔕ ᑳᐃᓈᒡ ᐅᑕᓄᑮᐋᑲᓇᓐ, ᒋᐃᓈᓂᒡ ᓀᐊᒪᓇᓐ, ᒫᒑᓐ ᐊᐎ ᑭᓰᓯᐸᓱᓐ ᓃᔣᒋᕽ 7 ᒞᕒᑕᓐ Jordan ᓰᐱᕽ, ᒦᑕᔥ ᐃᐃ ᑭᔕᑲᔾ ᒋᑮᐌ ᒥᓄᓈᑯᓯᒡ, ᒦᑕᔥ ᐃᐃ ᒋᐯᑭᓯᔭᓐ, ᐅᑮᐃᓈᓐ᙮ 11 ᓀᐊᒪᓐ ᑕᔥ ᐐᑫ ᑮᓂᔥᑳᑎᓯ, ᐁᑮ ᐊᓂ ᒫᒑᒡ ᐁᑮ ᐃᑭᑐᒡ, ᐃᓇᔥᑫ ᒦ ᐃ ᑳᐃᓀᑕᒫᓐ ᑫᒋᓈᒡ ᒫᐐᓐ ᒋᓵᑭᒋᑳᐸᐎᑕᐎᒡ, ᐁᑮ ᐃᓀᓂᒪᒃ ᒋᑲᓅᓈᒡ ᐁᔑᓂᑳᓱᓂᒡ ᑳᑎᐯᒋᑫᓂᒡ ᐅᒪᓂᑑᒪᓐ, ᒋᑮ ᐱ ᐊᔨᔑᓂᒌᐸᓂᐅᒡ ᑲᔦ ᐁᔑ ᐋᑯᓯᐗᒃ, ᒦᔥ ᐃᐃ ᒋᑮ ᒥᓄᐊᔮᐗᑭᐸᓐ᙮ 12 ᓇᐗᒡ ᐄᑐᒃ ᓰᐲᓐ ᐊᐹᓇ Abanah, ᐸᕒᐸᕒ Pharpar ᑳᐃᔑᓂᑳᑌᑭᓐ, ᐌᑎ ᑎᒫᔅᑲᓯᕽ Damascus ᓰᐱ ᑲᔦ ᐯᑳᑲᒥᓅᓐ ᐊᐲᒡ ᐐᓐ ᐃᐃ ᑲᑭᓇ ᓂᐱ ᑳᐊᔮᒃ ᐅᐅᒫ ᐃᔅᕒᐃᔭᓬ ᐊᑮᕽ᙮ ᑳᐐᓐ ᐃᓇ ᐌᑎ ᓂᑖᔑ ᑭᓰᓯᐸᓱᓰ ᒋᒥᓄᐊᔮᔮᐹᓐ ᐃᑕᔥ? ᒦᔥ ᑳᐊᓂᔑ ᒫᒑᒡ ᐁᐐ ᐊᓂ ᑮᐌᑭᑖᓱᒡ᙮ 13 ᐅᑕᓄᑮᐋᑲᓇᐞ ᑕᔥ ᐅᑮ ᓈᓯᑳᑰᐞ ᐁᑮᐃᑯᒡ, ᑳᐅᑌᑌᐗᑭᒥᑰᔭᓐ, ᑮᔥᐱᓐ ᓴ ᐅᑮᑭᑑᑕᒫᑫ ᐃᓂᑭᐸᓐ ᑭᒋ ᑫᑰᓂᓂ ᒋᐃᔑᒋᑫᐗᒡ, ᑭᑖ ᐃᔑᒋᑫᐙᓐ ᐄᑐᒃ᙮ ᓇᐗᒡ ᐄᑐᒃ ᑭᑖ ᐃᔑᒋᑫᐙᓐ ᐁᒥᒋᐃᓂᒃ, ᑭᓰᓯᐸᓱᓐ ᒦᑕᔥ ᐃᐃ ᒋᒥᓄᐊᔮᔭᓐ᙮ 14 ᒦᑕᔥ ᓀᐊᒪᓐ ᑳᐃᔑ ᓈᓯᐲᒡ ᐁᑮ ᑲᑭᑖᐲᑭᐸᓂᐅᒡ ᓃᔣᒋᕽ ᓂᐲᕽ, ᐁᑮ ᐃᔑᒋᑫᒡ ᑳᑮᐃᑯᒡ ᑭᔐᒪᓂᑑᓐ ᐅᑎᓂᓃᒥᓂ᙮ ᐅᔕᑲᔭᓐ ᑕᔥ ᑮᑮᐌ ᐃᔑᓈᑯᓯᐗᓐ ᑖᐱᔥᑰ ᐊᐱᓅᒌᔐᓴᓐ ᑳᐃᔑᔕᑲᔦᓂᒡ; ᒦᔥ ᑳᐃᔑ ᒥᓄᐊᔮᒡ᙮ 15 ᒦᔥ ᓀᐊᒪᓐ ᑳᐃᔑ ᑮᐌ ᐃᔖᒡ ᐁᔑᐊᔮᓂᒡ ᐃᓬᐋᐃᔕᐗᓐ, ᐁᑮ ᐐᒌᐙᒡ ᑲᑭᓇ ᑳᑮ ᐐᒌᐎᑯᒡ᙮ ᒦᔥ ᑳᐃᔑ ᐃᓈᓴᒥᑳᐸᐎᑕᐙᒡ ᐁᑮᐃᓈᒡ, ᒦ ᓴ ᐃ ᑮᑭᑫᑕᒫᓐ ᑳᐐᓐ ᐊᔮᓰ ᐸᑳᓐ ᒪᓂᑑ ᒥᓯᐌ ᐊᑮᕽ ᒦ ᐁᑕ ᑯ ᐅᑭᔐᒪᓂᑑᒥᐙᓐ ᐃᔅᕒᐃᔭᓬᐊᒃ᙮ ᑕᑲ ᓴ ᑕᔥ ᑲᓇᑫ ᐅᑖᐱᓇᓐ ᐅᓄ ᑳᒦᓂᓈᓐ, ᑭᑕᓄᑮᐋᑲᓂᕽ ᐁᐃᓀᓂᒧᔮᓐ, ᐅᑮᐃᓈᓐ᙮ 16 ᒦᑕᔥ ᐃᓬᐋᐃᔕ ᑳᐃᑭᑐᒡ, ᑫᒋᓈᒡ ᐃᑯ ᑳᑎᐯᒋᑫᒡ ᐁᐱᒫᑎᓯᒡ ᐁᐊᓄᑮᑕᐗᒃ, ᑳᐐᓐ ᑫᑰᓐ ᓂᐐ ᐅᑖᐱᓇᓰᓐ᙮ ᓀᐊᒪᓇᓐ ᐅᑮ ᑲᑳᓱᒥᑰᓐ, ᒦᔥ ᑳᐐᓐ ᐃᓬᐋᐃᔕ ᑮᐃᓀᑕᓰ᙮ 17 ᒦᑕᔥ ᐅᐅ ᑳᐃᑯᒡ ᓀᐊᒪᓇᓐ, ᑮᔥᐱᓐ ᑕᔥ ᐃᓀᑕᓯᐗᓐ, ᑕᑲ ᓴ ᑲᓇᑫ ᐸᑭᑎᓂᔑᓐ ᒋᑮᐌᐎᑑᔮᓐ ᐅᐅ ᐊᑲᒥᒃ ᒥᓂᑯ ᓃᔑᓐ ᔔᔔᒥᑕᑎᒨᒃ ᑫᑲᔥᑭᐗᓀᐙᒡ᙮ ᓃᓐ ᓴ ᑭᑕᓄᑮᐋᑲᓂᕽ ᐁᐃᓀᓂᑎᓱᔮᓐ᙮ ᑳᐐᓐ ᒦᓇᐙ ᓂᐐ ᐊᒀᑭᓴᒪᐙᓰᒃ ᐸᑭᑎᓂᑫᐎᓇᓐ, ᑳᐐᓐ ᑲᔦ ᓂᐐ ᐸᑭᑎᓈᓲᑕᒪᐙᓰᒃ ᑯᑕᒃ ᒪᓂᑑᒃ; ᒦ ᐁᑕ ᑯ ᑳᑎᐯᒋᑫᒡ! 18 ᑕᑲ ᓴ ᑳᑎᐯᒋᑫᒡ ᓂᑲ ᐴᓀᑕᒫᒃ ᐯᔑᑯᔦᒃ ᑫᑰᓂᓂ, ᓃᓐ ᑭᑕᓄᑮᐋᑲᓂᕽ ᑳᐃᓀᓂᑎᓱᔮᓐ; ᐊᐲ ᓂᑑᑭᒫᒻ ᐲᑎᑫᒡ ᐊᓇᒥᐁᐎᑲᒥᑯᕽ ᑳᔑ ᐊᓇᒥᐁᑕᐎᒥᓐᒡ ᐃᓂ ᐅᕒᐃᒪᓐ Rimmon ᐁᓂᒥᓐᒡ, ᐊᓂᒥᑯᑖᒡ ᐃᑕᔥ ᑮᐋᓱᔑᕽ ᓂᓂᑭᕽ, ᑫᓃᓐ ᑕᔥ ᐊᓂᒥᑯᑖᔮᓐ ᐁᔑ ᐊᓇᒥᐁᑕᐎᓐᒡ ᐅᕒᐃᒪᓐ ᐁᓂᓐᒡ, ᑕᑲ ᑳᑎᐯᒋᑫᒡ ᓂᑲ ᐴᓀᑕᒫᒃ ᐅᐅ ᐃᔑᒋᑫᐗᒃ, ᑮᐃᑭᑐᐗᓐ᙮ 19 ᒦᑕᔥ ᐃᓬᐋᐃᔕ ᑳᐃᓈᒡ, ᒦᐃ ᐱᓵᓂᓯᐎᓂᕽ ᐊᓂᔑ ᒫᒑᓐ᙮ ᒦᑕᔥ ᓀᐊᒪᓇᓐ ᑳᐊᓂ ᐃᔑ ᒫᒑᓂᒡ ᐁᑮ ᓇᑲᓂᑯᒡ᙮ ᐙᓴᔩᔥ ᐃᑕᔥ ᐃᑯ ᐁᑮ ᐊᓂ ᐱᒥ ᐊᔮᓂᒡ, 20 ᐊᐊ ᓴ ᑲᐁᓰ Gehazi ᑳᐅᑕᓄᑮᐋᑲᓂᒥᑯᒡ ᐃᓬᐋᐃᔕᐗᓐ ᑮᐃᓀᑕᒻ, ᐅᓵᒻ ᐃᓴ ᓈ ᓂᑑᑭᒫᒻ ᐃᓬᐋᐃᔕ ᐅᑰᐹᑌᓂᒫᓐ ᐃᓂ ᓀᐊᒪᓇᓐ ᓰᕒᐃᔭ ᐊᑮᕽ ᐌᒌᓂᒡ ᐁᐅᑖᐱᓇᒪᐙᓯᒃ ᑫᑰᓂᓂ ᑳᑮ ᐲᑑᓂᒡ᙮ ᑫᒋᓈᒡ ᐃᑯ ᑳᑎᐯᒋᑫᒡ ᒥᓯᐌ ᐁᑎᐯᒋᑫᒡ, ᓃᓐ ᓴ ᓂᑲ ᑲᑴ ᐊᑎᒫ ᑫᑰᓂᓂ ᒋᒦᔑᒡ, ᑮᐃᓀᑕᒻ᙮ 21 ᒦᑕᔥ ᑲᐁᓰ ᑳᑮ ᐱᒥᓂᔕᐙᒡ ᓀᐊᒪᓇᓐ᙮ ᐊᐲ ᑕᔥ ᓀᐊᒪᓐ ᐁᐙᐸᒫᒡ ᐊᐎᔭᓐ ᐁᐱᒥᓂᔕᐅᑯᒡ, ᑮᑲᐹ ᓴ ᐅᑑᑖᐹᓈᑯᕽ ᐁᑮ ᐊᑕ ᓇᑭᔥᑲᐙᒡ ᐁᑮᐃᓈᒡ, ᑲᑭᓇ ᓇ ᑫᑰᓐ ᒥᓄᓭ? 22 ᒦᔥ ᑲᐁᓰ ᑳᐃᑭᑐᒡ, ᑲᑭᓇ ᓴ ᑫᑰᓐ ᒥᓄᓭ᙮ ᓂᑑᑭᒫᒻ ᓴ ᓂᐲᒋᓂᔕᐅᒃ ᒋᐃᑭᑐᐗᒃ, ᓃᔑᓐ ᐅᔕ ᐅᔥᑭᓃᑭᐗᒃ ᑳᑲᓅᑕᒪᐙᐙᒡ ᑭᔐᒪᓂᑑᓐ ᓂᑮ ᐱᐊᑕ ᐙᐸᒥᑰᒃ ᐌᑎ ᐄᐸᕒᐃᔭᒻ Ephraim ᐊᑮᕽ ᑳᔑ ᐸᐲᑾᑎᓈᓂᒃ ᐁᐅᒌᐙᒡ᙮ ᑕᑲ ᓴ ᒦᓐᔥ ᓃᔣᓯᒥᑕᓇᔑᓈᓇᓐ ᑕᓱ ᑯᓯᑾᓐ ᐙᐹᐱᑯ ᔔᓂᔮ ᐙᐱᑰᐞ, ᒦᔥ ᑲᔦ ᑭᑭᔥᑭᑲᓇᓐ ᓃᔑᕽ ᒥᓂᒃ ᒋᒣᔥᑯᒋᑯᓇᔦᐙᒡ, ᑮᐃᑭᑐ᙮ 23 ᓀᐊᒪᓐ ᓴ ᑕᔥ ᑮᐃᑭᑐ, ᐊᐤ, ᐱᓵᓂᑯ ᐅᑖᐱᓐ ᓂᑯᑣᒃ ᓈᓂᒥᑕᓇ ᑕᓱ ᑯᓯᑾᓐ ᐙᐹᐱᑯ ᔔᓂᔮ ᐙᐱᑰᓐ᙮ ᐅᑮ ᑲᑳᓱᒫᓐ ᓴ ᑲᐁᓰᐗᓐ ᒋᐅᑖᐱᓈᓂᒡ ᓂᑯᑣᒃ ᓈᓂᒥᑕᓇ ᑕᓱ ᑯᓯᑾᓐ ᐙᐹᐱᑯ ᔔᓂᔮ ᐙᐱᑰᐞ᙮ ᐅᒪᔥᑭᒧᑎᓃᕽ ᑕᔥ ᐅᑮ ᐃᔑ ᐲᓇᐊᒪᐙᓐ, ᓃᔗᐙᓐ ᑲᔦ ᑭᑭᔥᑭᑲᓇᓐ᙮ ᒦᔥ ᑳᐃᔑ ᒦᓈᒡ ᐅᑕᓄᑮᐋᑲᓇᐞ, ᒋᐃᔑᐎᑕᐙᓂᒡ ᑲᐁᓰᐗᓐ ᑳᐃᔑᐊᔮᓂᒡ᙮ 24 ᐊᐲ ᑕᔥ ᑲᐁᓰ ᑳᑕᑯᔑᕽ ᐌᑎ ᑳᑮ ᐃᔑ ᐱᑾᑎᓈᓂᒃ, ᐅᑮ ᐅᑖᐱᓇᒪᐙᐞ ᓴ ᐃ ᑳᑮ ᐱᒥᐎᑑᓂᒡ, ᐅᐙᑳᐃᑲᓂᕽ ᐁᑮ ᐃᔑ ᐲᑎᑲᑑᒡ᙮ ᒦᑕᔥ ᑳᐃᔑ ᑲᓅᓈᒡ ᐃᐃ ᐃᓂᓂᐗᐞ ᒋᐊᓂ ᒫᒑᓂᒡ᙮ ᑮᐊᓂ ᒫᒑᐗᓐ ᑕᔥ᙮ 25 ᒦᑕᔥ ᑳᐊᓂ ᐃᔑ ᐲᑎᑫᒡ ᐁᑮ ᐊᑕ ᐙᐸᒫᒡ ᐁᔑᐊᔮᓂᒡ ᐃᓬᐋᐃᔕᐗᓐ᙮ ᒦᔥ ᑳᐃᑯᒡ, ᐋᓃᑎ ᑳᐊᔮᔭᓐ? ᒦᔥ ᑳᐃᔑ ᓇᑴᑕᐙᒡ, ᓃᓐ ᑭᑕᓄᑮᐋᑲᓐ ᑳᐐᓐ ᐃᑯᒋ ᓂᑑᒋ ᐃᔖᓰ, ᐅᑮᐃᓈᓐ᙮ 26 ᐅᐅ ᑕᔥ ᐃᓬᐋᐃᔕᐗᓐ ᐅᑮᐃᑰᓐ, ᑳᐐᓐ ᐃᓇ ᑭᑭᑫᑕᓰᓐ ᐃᐃᒫ ᓂᑕᒑᑯᕽ ᐁᑮ ᐐᒌᐎᓈᓐ ᐊᐲ ᑮᑲᐹᒡ ᐊᐊ ᐃᓂᓂ ᐅᑖᐹᓈᑯᕽ ᑮᐊᑕ ᓇᑭᔥᑲᐎᒃ? ᑳᐐᓐ ᐅᔕ ᐅᒋᒋᓭᓯᓅᓐ ᒋᐅᑖᐱᓂᑎᐸᓐ ᔔᓂᔮ, ᐃᓂ ᑲᔦ ᑭᑭᔥᑭᑲᓇᓐ, ᑳᔑ ᑭᑎᑳᑌᑭᓐ ᑲᔦ ᐊᓬᐃᑉ olive ᑎᓄᐎᒥᓇᓐ, ᑳᔑ ᑭᑎᑳᓱᐙᒡ ᑲᔦ ᔔᒥᓇᒃ, ᔑᑾ ᑲᔦ ᐃᑭ ᒫᓇᒑᓂᔕᒃ, ᐱᔑᑭᐗᒃ, ᐅᐸᒦᑖᑫᒃ ᑲᔦ ᑳᐃᓂᓃᐎᐙᒡ, ᑳᐃᑴᐎᐙᒡ ᑲᔦ᙮ 27 ᐃᐃᐌᓂ ᑕᔥ ᓀᐊᒪᓐ ᐅᑎᓈᐱᓀᐎᓐ ᑭᑲ ᐅᑎᓯᑰᓐ, ᐃᑭ ᑲᔦ ᑭᐲᐌᓰᒪᒃ ᓀᐱᒡ ᐃᑯ ᐃ ᑭᑲ ᐃᓈᐱᓀᒻ, ᐅᑮᐃᑰᓐ᙮ ᒦᑕᔥ ᑲᐁᓰ ᑳᐃᔑ ᓇᑲᓈᒡ ᐃᓬᐋᐃᔕᐗᓐ ᐅᓴᓇᑮ ᐅᒥᑮᐙᐱᓀᐎᓐ ᐁᑮ ᐊᐲᒋ ᐙᐱᔥᑳᓂᒃ ᑖᐱᔥᑰ ᑰᓐ ᑳᐃᔑᓈᑯᓯᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society