2 ᑲᕒᐃᑎᔭᓇᒃ 4 - ᐅᒋᐺ ᑭᒋᒪᓯᓇᐃᑲᓐ

ᑆᓬ ᐅᑕᓄᑮᐎᓐ, ᐅᑖᓂᒥᓯᐎᓐ ᑲᔦ

¹ ᑭᔐᒪᓂᑑ ᓴ ᑳᔕᐌᒋᑫᒡ ᓂᑮᒦᓂᑯᓈᓐ ᐅᐅ ᐊᓇᒥᐁᐎᐊᓄᑮᐎᓐ ᒋᐊᓄᑳᑕᒫᕽ᙮ ᒦᑕᔥ ᑳᐅᒋᐸᑭᑌᑕᓯᐙᕽ᙮

² ᑲᑭᓇ ᓴ ᓂᑮᐌᐱᓈᒥᓐ ᑮᒨᒋᒋᑫᐎᓇᓐ, ᑳᐊᑲᓯᓈᑾᑭᓐ ᑲᔦ ᐃᔑᒋᑫᐎᓇᓐ, ᑳᐐᓐ ᐐᓐ ᑲᔦ ᓂᐗᔦᔑᒥᐌᓰᒥᓐ᙮ ᑳᐐᓐ ᐐᓐ ᑲᔦ ᐸᑳᓐ ᓂᑎᓉᑖᐙᓰᒥᓐ ᑭᔐᒪᓂᑑ ᐅᑎᑭᑐᐎᓐ᙮ ᐃᐃᒫ ᓴ ᑳᐃᔑᐸᔭᑌᑖᑾᓂᓂᒃ ᑭᔐᒪᓂᑑ ᐅᑌᐺᐎᓐ ᒦ ᓴ ᐃᒫ ᐁᔑᐱᒫᑎᓯᔮᕽ, ᑭᔐᒪᓂᑑ ᐁᓈᓴᒦᒡ, ᑾᔭᒃ ᓴ ᒋᐃᔑᓈᑯᓯᔮᕽ ᑲᑭᓇ ᐊᐎᔭ ᑳᐃᔑᒥᓍᐸᑕᕽ᙮

³ ᑮᔥᐱᓐ ᓴ ᒥᓍᒋᒧᐎᓐ ᑳᑲᑮᒀᑕᒫᕽ ᑳᒋᑳᑌᒃ, ᒦ ᓴ ᐁᑳᑕᒪᐎᑣ ᐃᑭ ᑳᐗᓂᔑᓄᐙᒡ᙮

⁴ ᐋᓃᔥ ᐊᐊ ᒪᒋᐊᔭᐋ ᑳᒪᓂᑑᐎᒡ ᐅᐅᒫ ᐊᑮᕽ ᐅᑮᐃᔑᐋᐞ ᒋᐙᐱᓯᓂᒃ ᐃᐃᒫ ᐅᑎᓀᑕᒧᐎᓂᓃᕽ, ᒦ ᓴ ᑕᔥ ᑳᐅᒋᑌᐺᑕᓯᓂᒃ᙮ ᑳᐐᓐ ᑕᔥ ᑲᔦ ᐅᓇᑕᐌᓂᒫᓰᐞ ᒋᐙᐸᑕᒥᓂᒡ ᐃᐃ ᑳᐃᔑᐙᓭᔮᓂᒃ ᐃᐃ ᒥᓍᒋᒧᐎᓂᓂ, ᐃᐃᒫ ᑳᐃᔑᑕᔑᑌᓂᒃ X ᐅᑭᒋ ᐃᓀᑖᑯᓯᐎᓐ᙮ ᐋᓃᔥ ᒪᔮ ᐱᑯ ᑭᔐᒪᓂᑑᕽ ᐃᔑᓈᑯᓯ ᐊᐊ X᙮

⁵ ᑳᐐᓐ ᑕᔥ ᐐᓐ ᓃᓇᐎᓐᑦ ᓂᑲᑮᒀᓂᑎᓱᓰᒥᓐ, ᒋᓴᔅ X ᓴ ᓂᑎᑭᑐᒥᓐ ᐁᑎᐯᒋᑫᒡ, ᓃᓇᐎᓐᑦ ᐃᑕᔥ ᓂᑎᑭᑐᒥᓐ ᐁᐸᒦᑖᑰᔦᒃ ᒋᓴᔅ ᐅᒋ᙮

⁶ ᑭᔐᒪᓂᑑ ᓴ ᑳᑮᐃᑭᑐᒡ: ᐃᐃᒫ ᓴ ᑳᐃᔑᑲᔥᑮᑎᐱᑲᒃ, ᑳᐙᓭᔮᒃ ᑕᓵᑳᑌ, ᒦ ᓴ ᐊᐊᐌ ᐯᔑᑾᓐ ᑭᔐᒪᓂᑑ ᑳᑮᐙᓭᔮᑑᒡ ᓂᑌᐃᓈᓂᓐ ᒋᑭᑫᑕᒧᐗᑭᒡ ᑭᔐᒪᓂᑑ ᐅᑭᒋ ᐃᓀᑖᑯᓯᐎᓐ, X ᐁᐙᓰᑴᔥᑳᑯᒡ᙮

⁷ ᓃᓇᐎᓐᑦ ᓴ ᑳᐊᔮᔮᕽ ᐅᐅ ᑳᑭᒋ ᐃᓀᑕᒫᕽ ᐌᓅᑎᓯᐎᓐ, ᒦ ᓴ ᐁᔑᓈᑯᓯᔮᕽ ᑖᐱᔥᑰ ᐙᐱᑲᓂᐗᑭᑯᕽ ᐁᔑᐲᓇᐊᒫᕽ, ᒋᓈᑾᓂᓂᒃ ᑭᔐᒪᓂᑑ ᒫᐗᒡ ᐁᒪᔥᑲᐎᓰᒡ, ᑳᐐᓐ ᓃᓇᐎᓐᑦ᙮

⁸ ᒥᓯᐌ ᓂᑑᒋ ᒥᑯᔥᑳᒌᑳᑰᒥᓐ, ᑳᐐᓐ ᑕᔥ ᓂᔖᑰᒋᔥᑳᑰᓰᒥᓐ; ᐁᐙᓀᑕᒫᕽ ᑲᔦ ᓂᑯᑎᕽ, ᑳᐐᓐ ᑕᔥ ᒪᔑ ᓂᐸᑭᒌᓰᒥᓐ᙮

⁹ ᒨᔕᒃ ᑲᔦ ᓂᑲᒀᑕᑭᐃᑰᒥᓐ, ᔖᑰᒡ ᑕᔥ ᑳᐐᓐ ᐐᑳ ᓂᓇᑲᓂᑰᓰᒥᓐ; ᐁᑲᐎᐌᐱᓂᑰᔮᕽ ᑲᔦ ᑳᐐᓐ ᑕᔥ ᒪᔑ ᓂᓂᔑᐗᓈᒋᐃᑰᓰᒥᓐ᙮

¹⁰ ᒦᑕᔥ ᐁᔑᓈᑾᒃ ᒨᔕᒃ ᐁᐱᒥᐎᑖᐗᑭᒡ ᒋᓴᔅ ᐅᓂᐳᐎᓐ ᐃᐃᒫ ᓂᐐᔭᐎᓈᓂᕽ, ᐃᐃ ᓴ ᑳᐅᒋ ᐃᔑᓈᑾᒃ ᐅᐱᒫᑎᓯᐎᓐ ᒋᐙᐸᒋᑳᑌᓂᒃ ᐃᐃᒫ ᓂᐐᔭᐎᓈᓂᕽ᙮

¹¹ ᐃᐃᒫ ᓴ ᓂᐱᒫᑎᓯᐎᓂᓈᓂᕽ, ᒦ ᓴ ᐁᔑᓈᑯᓯᔮᕽ ᑖᐱᔥᑰ ᒨᔕᒃ ᐁᓇᓃᓵᓂᓯᔮᕽ ᐁᐊᔓᓂᐳᔮᕽ ᒋᓴᔅ ᐅᒋ᙮ ᐃᐃ ᓴ ᐅᐱᒫᑎᓯᐎᓐ ᒋᐙᐸᒋᑳᑌᓂᒃ ᐃᐃᒫ ᓂᐐᔭᐎᓈᓂᕽ ᑳᐗᑫᓂᐴᒪᑲᑭᓐ᙮

¹² ᒦ ᓴ ᐅ ᑳᐃᒋᑳᑌᒃ, ᓂᐳᐎᓐ ᓃᓇᐎᓐᑦ ᓂᓅᒋᐃᑰᒥᓐ ᐃᐃᒫ ᓂᐱᒫᑎᓯᐎᓂᓈᓂᕽ, ᑮᓇᐙ ᑕᔥ ᐱᒫᑎᓯᐎᓐ ᐊᓄᑮᒪᑲᓐ ᑭᐱᒫᑎᓯᐎᓂᐙᕽ᙮

¹³ ᑫᓃᓇᐎᓐᑦ ᑕᔥ ᐯᔑᑾᓐ ᐁᔑᑌᐺᔦᑕᒫᕽ ᑭᒋᒪᓯᓇᐃᑲᓐ ᐁᔑᐲᐃᑳᑌᒃ: ᓂᑮᑮᑭᑦ ᐋᓃᔥ ᐁᑌᐺᑕᒫᓐ᙮ ᒦᑕᔥ ᐯᔑᑾᓐ ᑫᓃᓇᐎᓐᑦ ᐁᐃᔑᑌᐺᑕᒫᕽ ᑳᐅᒋᑮᑭᑐᔮᕽ᙮

¹⁴ ᐊᐊ ᓴ ᑭᔐᒪᓂᑑ ᑳᑮᑮᐌᐱᒫᑎᓯᐋᒡ ᐃᓂ ᑳᑎᐯᒋᑫᓂᒡ ᒋᓴᓲᓐ, ᓂᑭᑫᓂᒫᓈᓐ ᓴ ᒋᑮᐌᐱᒫᑎᓯᐃᔭᒥᓐᒡ ᐋᓃᔥ ᓂᐐᒌᐙᓈᓐ ᒋᓴᔅ᙮ ᑭᑲᐃᔑᐎᓂᑯᓈᓐ ᑕᔥ ᒫᒪᐤ ᒋᐃᔑᐊᔮᐗᕽ ᐌᑎ ᑳᔑᐊᔮᒡ᙮

¹⁵ ᑮᓇᐙ ᐅᐅ ᑲᑭᓇ ᑳᐅᒋ ᐃᔑᓭᒃ; ᐃᑭ ᓴ ᑳᐹᑏᓄᐙᒡ ᐯᒫᑎᓯᐙᒡ ᐁᐊᓂᑌᐱᓂᑯᐙᒡ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ ᐋᐱᒋ ᑕᔥ ᑕᐹᑏᓇᑎᓅᓐ ᐃᓂ ᐊᓇᒥᐋᐎᓇᓐ ᒋᓇᓈᑯᒥᓐᒡ ᑭᔐᒪᓂᑑ ᑳᑭᒋ ᐃᓀᑖᑯᓯᒡ᙮

ᐁᐃᔑᐱᒫᑎᓯᕽ ᐃᐃᒫ ᑌᐺᑕᒧᐎᓂᕽ

¹⁶ ᒦᑕᔥ ᐅᐅ ᐐᑳ ᑳᐅᒋᐸᑭᑌᑕᓯᐙᕽ᙮ ᐋᓇᐐᓐ ᓂᐐᔭᐎᓈᓂᓐ ᐁᐊᓂᓂᐴᒪᑲᑭᓐ, ᔖᑰᒡ ᑕᔥ ᓂᑕᒑᑯᓈᓂᒃ ᓂᐱᒫᑎᓯᐎᓂᓈᓂᕽ ᐊᓂᐅᔥᑭᐅᔑᒋᑲᓂᐎᐗᒃ ᐁᑕᓱᑮᔑᒃ᙮

¹⁷ ᐅᐅ ᓴ ᑳᐃᔑᐋᓂᒥᓯᔮᕽ ᓂᓈᑫᑖᒥᓐ, ᐋᓃᔥ ᐊᒋᓇ ᐁᑕ ᓂᓅᒋᐃᑯᒥᓐ᙮ ᒦᑕᔥ ᑫᐅᒋᐅᑎᓯᑯᔮᕽ ᒫᐗᒡ ᑳᑭᒋ ᐃᓀᑖᑾᒃ ᑭᒋ ᐃᓀᑖᑯᓯᐎᓐ ᐐᑳ ᑫᐴᓂᓭᓯᓄᒃ᙮

¹⁸ ᑳᐐᓐ ᑕᔥ ᐐᓐ ᐃᓂ ᑳᓈᑾᑭᓐ ᓂᑲᓇᐙᐸᑕᓰᒥᓐ, ᐃᓂ ᓴ ᑳᓈᑾᓯᓄᑭᓐ; ᐃᓂ ᓴ ᑳᓈᑾᑭᓐ ᐊᒋᓇ ᐁᑕ ᐊᔮᐗᓐ, ᐃᓂ ᑕᔥ ᐐᓐ ᑳᓈᑾᓯᓄᑭᓐ ᐱᔑᔑᒃ ᐊᔮᐗᓐ᙮