1 Timahti 1 - ᐅᒋᐺ ᑭᒋᒪᓯᓇᐃᑲᓐ1 ᓃᓐ ᑆᓬ Paul ᐅᑎᔑᓂᔕᐙᑲᓇᓐ ᐊᐊ ᒋᓴᔅ X, ᒋᐃᔑᐊᓄᑮᔮᓐ ᒪᔮ ᐁᔑ ᐃᓈᑯᓂᑫᒡ ᐊᐊᐌ ᑭᔐᒪᓂᑑ ᑳᐱᒫᒋᐃᓇᕽ, ᒋᓴᔅ X ᑲᔦ, ᒦ ᐊᐌ ᑭᑕᐯᓂᒧᐎᓂᓈᓐ᙮ 2 ᑭᑑᔑᐲᐊᒪᐎᓐ ᑮᓐ ᑎᒪᑎ Timothy, ᑌᐺ ᐱᑯ ᑌᐺᔦᑕᒧᐎᓂᕽ ᐁᐅᒋᐅᑯᓯᓯᒥᓈᓐ᙮ ᔕᐌᑖᑯᓯᐎᓐ, ᑭᑎᒫᑭᓈᑰᐎᓐ, ᑯᔥᒀᐙᑌᑕᒧᐎᓐ ᑭᑲᐐᐅᒌᑕᒫᒃ ᑭᔐᒪᓂᑑ ᑳᐅᔫᓯᒥᓐᒡ, X ᒋᓴᔅ ᑲᔦ ᐁᑎᐯᓂᒥᓇᕽ᙮ ᓇᐹᒡ ᑳᑭᑭᓄᐊᒫᑫᐙᒡ ᑕᐅᒋᐋᐗᒃ 3 ᑭᑎᔑᓇᑕᐌᓂᒥᓐ ᑫᔮᐱ ᒋᐃᔑᑲᐯᔑᔭᓐ ᐃᐃᒫ ᐁᐱᓴᔅ Ephesus ᐆᑌᓈᕽ, ᑳᑮᐃᓂᓈᐹᓐ ᐊᐸᓐ ᑳᑮᒫᒑᔮᓐ ᐌᑎ ᒫᓯᑑᓂᔭ Macedonia ᐊᑮᕽ᙮ ᐋᓂᑕ ᐊᐎᔭᒃ ᐃᐃᒫ ᐸᑳᓐ ᐃᔑᑭᑭᓄᐊᒫᑫᐗᒃ᙮ ᑭᑕᓅᓂᓐ ᒋᐃᔑᐐᑕᒪᐗᑣ ᒋᐴᓂᑑᐙᒡ ᐃᐌ ᓇᐹᒡ ᑭᑭᓄᐊᒫᑫᐎᓐ ᐁᑳ ᒋᑭᑭᓄᐊᒫᑫᓯᒀ ᒦᓇᐙ, 4 ᐁᑳ ᑲᔦ ᒋᐱᓯᑕᓯᒀ ᐸᑳᓐ ᑎᐹᒋᒧᐎᓇᓐ ᐃᓂ ᑲᔦ ᑳᐴᓂᓭᓯᓄᑭᓐ ᐋᔮᓂᑫᑎᐹᒋᒧᐎᓇᓐ᙮ ᒦ ᐅᐌ ᑳᐅᒋᑲᑴᐸᓯᑸᒪᑲᑭᓐ ᑲᑴᒋᑎᐎᓇᓐ, ᑳᐐᓐ ᐐᓐ ᐃᐃᐌ ᑳᐃᔑᐊᑕᐌᑕᕽ ᑭᔐᒪᓂᑑ ᐃᐌ ᑌᐺᔦᑕᒧᐎᓂᕽ ᑳᐊᔮᒃ᙮ 5 ᒦ ᐅᐌ ᑳᑲᑴᐅᑎᓂᑫᒪᑲᒃ ᐅᐅ ᓂᑭᑭᓄᐊᒫᑫᐎᓐ, ᒋᐹᑏᓇᒃ ᓵᑭᐃᑎᐎᓐ, ᒋᐅᒋᐊᔮᒪᑲᒃ ᒥᓄᑌᐁᐎᓂᕽ, ᒥᓄᑭᑫᓂᑎᓱᐎᓂᕽ ᑲᔦ, ᑳᑌᐺᒪᑲᒃ ᑌᐺᑕᒧᐎᓂᕽ ᑲᔦ᙮ 6 ᐋᓂᓐᑦ ᐃᐃᒫ ᐊᐎᔭᒃ ᑮᐅᒋᐸᑫᐗᒃ ᐁᑮᐃᔑᐗᓂᔑᓄᐙᒡ, ᐊᓂᔖ ᐁᑲᑴᔖᑰᓱᑎᐙᒡ᙮ 7 ᐐᓅᑌ ᑭᑭᓄᐊᒫᑫᐗᒃ ᑭᔐᒪᓂᑑᓐ ᐅᑎᓈᑯᓂᑫᐎᓂᓂ, ᐋᓇᐐᓐ ᐁᑕᔑᑭᑫᑕᓯᒀ ᐐᓇᐙ ᑯ ᐅᑎᑭᑐᐎᓂᐙᓐ ᑲᔦ ᐌᑯᓀᓐ ᐃᐃ ᑳᑕᔑᑕᒧᐙᒡ ᐁᑾᔭᑴᓂᒧᐙᒡ᙮ 8 ᑮᓇᐎᓐᑦ ᐃᑕᔥ ᑭᑭᑫᑖᒥᓐ ᐁᐅᓂᔑᔑᒃ ᐃᓈᑯᓂᑫᐎᓐ, ᐊᐌᓀᓐ ᐃᑯ ᑾᔭᒃ ᑫᐋᐸᒋᑑᒡ᙮ 9 ᑭᑭᑫᑖᒥᓐ ᑳᐐᓐ ᐐᓐ ᐅᒋ ᑳᒥᓄᐃᔑᐌᐱᓯᐙᒡ ᑮᐅᒋᐅᔑᐲᐃᑳᑌᓯᓅᓐ ᐃᓈᑯᓂᑫᐎᓐ, ᐃᑭ ᓴ ᐐᓐ ᑳᓂᑖᒪᒫᔒᐙᒡ, ᑳᑲᑴᑎᐯᓂᑎᓱᐙᒡ ᑲᔦ, ᐃᑭ ᑲᔦ ᑳᑭᑌᓂᒫᓯᒀ ᑭᔐᒪᓂᑑᓐ, ᐅᒪᒋᑑᑕᒨᒃ ᑲᔦ, ᑳᐯᑭᐱᒫᑎᓯᓯᒀ, ᑳᒫᓀᑕᒧᐙᒡ ᑲᔦ ᐊᓇᒥᐋᐎᓐ, ᐃᑭ ᑲᔦ ᑳᓂᓵᐙᒡ ᐅᓃᑭᐃᑯᐙᐞ, ᐊᐌᓀᓐ ᓴ ᐱᑯ ᑳᓂᔑᐌᒡ, 10 ᔑᑾ ᑳᐱᔑᒀᑎᓯᐙᒡ, ᑳᒪᒋᒥᓴᐌᓂᒫᐙᒡ ᑲᔦ ᐐᒋᓂᓃᒥᐙᐞ, ᐃᑭ ᑲᔦ ᑳᑮᒨᒋᑭᒨᑎᐙᒡ ᐊᐎᔭᐞ ᒋᐊᑖᐙᑫᐙᒡ, ᐃᑭ ᑳᓂᑖ ᑲᑮᓇᐎᔥᑭᐙᒡ, ᑳᑲᑮᓇᐎᔥᑳᒋᒧᐙᒡ ᑲᔦ, ᐊᐎᔭ ᑯ ᑲᔦ ᑳᑲᑴᓇᑳᔥᑲᕽ ᒥᓄᑭᑭᓄᐊᒫᑫᐎᓐ᙮ 11 ᒦ ᐅᐅ ᑭᑭᓄᐊᒫᑫᐎᓐ ᑳᐃᓇᑌᓂᒃ ᐅᒥᓍᒋᒧᐎᓐ ᑳᑭᒋ ᐃᓀᑖᑯᓯᒡ ᑲᔦ ᑳᓇᓈᑯᒥᓐᒡ ᑭᔐᒪᓂᑑ; ᒦ ᐅᐌ ᒥᓍᒋᒧᐎᓐ ᓃᓐ ᐃᑯ ᑳᐸᒥᓇᒧᐃᑰᔮᓐ ᒋᐐᑕᒫᑫᔮᓐ᙮ ᐁᒦᑴᒋᐌᑕᕽ ᑭᔐᒪᓂᑑ ᐅᔕᐌᒋᑫᐎᓂᓂ 12 ᓂᒦᑴᒋᐌᓂᒫ ᑕᔥ X ᒋᓴᔅ ᑌᐯᓂᒥᓇᕽ ᑳᒦᔑᒡ ᒪᔥᑲᐎᓰᐎᓐ, ᐅᑕᔮᒀᒥᓰ ᑳᑮᐃᓇᑭᒥᒡ, ᑳᐊᓅᔑᒡ ᒋᐊᓄᑲᐗᒃ, 13 ᓃᓐ ᑲᔭᑌ ᑳᑮᒪᒋ ᐃᓇᒃ᙮ ᓂᑮᑲᒀᑕᑭᐋ, ᓂᑮᐹᐱᓄᑕᐙ ᑲᔦ᙮ ᓂᑮᑰᐹᑌᓂᒥᒃ ᐃᑕᔥ ᐃᐌ ᐅᒋ ᐁᑮᑭᑫᑕᓯᐙᓐ ᑳᐃᔑᒋᑫᔮᓐ ᒣᒀ ᐁᑌᐺᑕᓯᐙᐹᓐ᙮ 14 ᑲᔦᔥ ᑮᐹᑏᓇᑎᓂᓂ ᐅᔕᐌᒋᑫᐎᓐ ᑳᒦᔑᒡ ᑳᑎᐯᓂᒥᓇᕽ, ᐊᔑᒡ ᐃᐃᐌᓂ ᑌᐺᔦᑕᒧᐎᓐ, ᓵᑭᐃᐌᐎᓐ ᑲᔦ, ᑳᐅᒌᑕᒫᑯᔭᕽ X ᒋᓴᔅ ᐁᐐᒌᐗᕽ᙮ 15 ᑌᐺᒪᑲᓐ ᐃᓴ ᐃ ᐃᑭᑐᐎᓐ, ᑌᐊᐲᑌᑖᑾᓐ ᑲᔦ ᑲᑭᓇ ᐊᐎᔭ ᒋᐅᑖᐱᓇᒧᐙᒡ: ᐊᐊ ᓴ X ᒋᓴᔅ ᐁᑮᐲᔖᒡ ᐅᐅᒫ ᐊᑮᕽ ᐅᒪᒋᑑᑕᒨᐞ ᒋᐱᒫᒋᐋᒡ, ᐁᑕᔑᐙᒡ ᓃᓐ ᐃᑕᔥ ᓂᒫᒪᐌᑖᑯᔅ ᐁᑎᓄᐎᔮᓐ᙮ 16 ᒦ ᒪᔮ ᐅᐌ ᑳᑮᐅᒋᔕᐌᓂᒥᒡ ᑭᔐᒪᓂᑑ, ᐁᑮᐃᓀᑕᕽ X ᒋᓴᔅ ᐗᐐᑫ ᒋᐙᐸᑕᐃᐌᒡ ᐁᔑᔕᔒᐯᓂᒥᒡ, ᓃᓐ ᐋᓇ ᒫᒪᐌᑖᑯᓯᔮᓐ ᒪᒋ ᐃᔑᐌᐱᓯᐎᓂᕽ᙮ ᒦ ᐃᐌ ᑫᐅᒋᑭᑭᓇᐙᐸᑕᒧᐙᒡ ᑲᑭᓇ ᐃᑭ ᓈᑫ ᑫᑌᐺᔦᓂᒫᐙᒡ ᒋᒦᓂᑣ ᐱᒫᑎᓯᐎᓐ ᐐᑳ ᑫᐃᔥᒀᓭᓯᓄᒃ᙮ 17 ᒫᓄ ᑕᔥ ᐱᔑᔑᒃ ᐊᐸᓀ ᑕᑭᒋ ᐃᓀᓂᒫ, ᑕᓇᓈᑯᒫ ᐊᐊ ᑭᒋᐅᑭᒫ ᐱᔑᔑᒃ ᑳᐱᒫᑎᓯᒡ, ᐐᑳ ᑫᓂᐳᓯᒃ, ᐎᔮᐸᒫᓯᐎᓐᒡ, ᒦ ᐁᑕ ᐊᐌ ᑳᑭᔐᒪᓂᑑᐎᒡ᙮ ᐁᒣᓐ᙮ 18 ᑎᒪᑎ Timothy ᓂᑯᓯᔅ, ᐅᐅ ᑲᑮᑴᐎᓐ ᑭᑲᓇᐌᑕᐃᓐ: ᑖᐱᔥᑰ ᑮᔖ ᑯ ᑳᑮᐃᓈᒋᒥᑰᔭᓐ, ᒦᐗᓐ ᐃᑭᑐᐎᓇᓐ ᒋᐊᔛᐙᑫᔭᓐ ᒥᓄ ᒦᑳᓱᐎᓂᕽ᙮ 19 ᒥᒋᒥᓇᓐ ᐃᐃ ᑭᑌᐺᔦᑕᒧᐎᓐ, ᐃᐃ ᑲᔦ ᒥᓄᐃᓀᓂᑎᓱᐎᓐ᙮ ᐃᑭ ᐋᓂᓐᑦ ᐁᐌᐱᓇᒧᐙᒡ ᐅᑮᓂᔑᐗᓈᒋᑑᓈᐙ ᐅᑌᐺᔦᑕᒧᐎᓂᐙᓐ, 20 ᐅᐅ ᐁᔑᐌᐱᓯᐙᒡ ᐋᐃᒥᓃᔭᔅ Hymenaeus, ᐊᐊ ᑲᔦ ᐋᓬᐃᑭᓵᑕᕒ Alexander᙮ ᓂᑮᐸᑭᑎᓇᒪᐙᒃ ᒋᑭᑭᓄᐊᒫᑯᐙᒡ ᐃᓂ ᓭᑕᓇᓐ Satan, ᒋᑭᑫᑕᒧᐙᒡ ᒋᐹᐱᓄᑖᑫᓯᒀ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society