1 Saamiyoo 7 - ᐅᒋᐺ ᑭᒋᒪᓯᓇᐃᑲᓐ1 ᐃᓂᓂᐗᒃ ᐃᑕᔥ ᑭᕒᐃᐊᑦ ᒌᐊᕒᐃᒻ Kiriath-jearim ᐌᒌᐙᒡ ᑮᐲᔖᐗᒃ ᐁᑮ ᐱᓈᓯᑲᒧᐙᒡ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ᙮ ᐌᑎ ᑕᔥ ᐅᑮ ᐃᔑᐎᑑᓈᐙ ᐗᑭᑕᑎᓐ ᐊᐱᓇᑖᐴᓐ Abinadab ᐅᐙᑳᐃᑲᓂᓂ ᐁᔑᐊᔮᓂᒃ᙮ ᐅᑯᓯᓯᓂ ᑕᔥ ᐁᓬᐃᐁᓴᕒ Eleazar ᐁᔑᓂᑳᓱᓂᒡ ᐅᑮ ᐯᑲᑭᒫᐙᓐ ᒋᓈᓈᑲᒋᑑᓂᒡ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ᙮ ᓵᒥᔫ ᑮᑎᐯᑕᕽ ᐃᔅᕒᐃᔭᓬᐊᑭ 2 ᐋᐱᒋ ᑕᔥ ᑭᓉᔥ, ᓃᔥᑕᓇ 20 ᑕᓱ ᐱᐴᓐ ᒥᓂᒃ ᑮᐊᑌ ᐃᐃ ᐊᔓᑕᒫᑫᒪᑲᒃ ᐃᐃᒫ ᑭᕒᐃᐊᑦ ᒌᐊᕒᐃᒻ ᐆᑌᓈᕽ᙮ ᑲᑭᓇ ᑕᔥ ᐃᔅᕒᐃᔭᓬᐊᒃ Israel ᑮᒫᓀᑕᒨᒃ, ᐁᑮ ᐊᑐᓀᐙᐙᒡ ᑳᑎᐯᒋᑫᓂᒡ ᒋᓈᑕᒫᑯᐙᒡ᙮ 3 ᒦᑕᔥ ᓵᒥᔫ ᑳᐃᓈᒡ ᑲᑭᓇ ᐯᒫᑎᓯᓂᒡ, ᑮᔥᐱᓐ ᓴ ᑮᐌ ᓈᓯᑲᐌᒃ ᑳᑎᐯᒋᑫᒡ ᐁᓂᑯᑯᑌᐁᔦᒃ, ᐌᐱᓀᒀ ᑲᔦ ᒪᔭᑭ ᒪᓂᑑᒃ, ᐋᔅᑕᑎ Astarte ᑲᔦ ᐁᔑᓂᑳᓱᒡ ᐁᔑᐊᔮᔦᒃ, ᐃᔑ ᐸᑭᑎᓂᑎᓱᔦᒃ ᐃᑕᔥ ᐁᔑᐊᔮᒡ ᑳᑎᐯᒋᑫᒡ, ᐐᓐ ᐁᑕᑯ ᒋᐊᓄᑮᑕᐌᒃ; ᒦ ᓴ ᐃ ᒋᓈᑕᒪᐎᓀᒃ ᐁᔑ ᒪᔥᑲᐎᓰᓂᒡ ᐱᓬᐃᔅᑏ ᑳᑎᓄᐎᓂᒡ, ᐅᑮ ᐃᓈᐞ᙮ 4 ᒦᑕᔥ ᐃᔅᕒᐃᔭᓬᐊᐞ ᑳᐃᔑᒋᑫᓂᒡ ᐁᑮ ᐌᐱᓈᓂᒡ ᒪᓂᑑᐞ ᐯᔭᓬ Baal ᐁᓂᒥᓐᒡ, ᐃᓂ ᑲᔦ ᐋᔅᑕᑎ ᐁᔑᓂᑳᓂᒥᓐᒡ᙮ ᑳᑎᐯᒋᑫᓂᒡ ᐃᑕᔥ ᐁᑕ ᐅᑮ ᐊᓇᒥᐁᑕᐙᓂ᙮ 5 ᒦᑕᔥ ᓵᒥᔫ ᑳᐃᑭᑐᒡ, ᑲᑭᓇ ᐲᓂᑾᒃ ᐃᔅᕒᐃᔭᓬᐊᒃ ᐌᑎ ᒥᔅᐸ Mizpah ᐆᑌᓈᕽ, ᒦᑕᔥ ᑫᔑ ᐊᓇᒥᐁᑕᐗᒃ ᑳᑎᐯᒋᑫᒡ ᑮᓇᐙ ᐅᒋ, ᐅᑮ ᐃᓈᐞ᙮ 6 ᒦᑕᔥ ᑳᐃᔑ ᒫᐗᒋᐃᑎᓂᒡ ᐌᑎ ᒥᔅᐸ, ᐁᑮ ᓈᑕᐃᐲᓂᒡ, ᐁᑮ ᓰᑭᓇᒥᓂᒡ ᐃᐃ ᓂᐱ ᐁᓈᓴᒦᓂᒡ ᑳᑎᐯᒋᑫᓂᒡ᙮ ᒦᔥ ᑳᑮ ᒪᑕᐐᐃᑎᓱᓂᒡ ᐃᐃ ᐁᑮᔑᑲᓂᓂᒃ ᐁᑮ ᐃᑭᑐᓂᒡ, ᓂᑮ ᒪᒋᑑᑕᐙᓈᓐ ᓴ ᑳᑎᐯᒋᑫᒡ᙮ ᒦᑕᔥ ᐐᓐ ᓵᒥᔫ ᑳᑮ ᓇᓇᐊᒋᑫᐋᒡ ᐃᔅᕒᐃᔭᓬᐊᐞ ᐌᑎ ᒥᔅᐸ ᐆᑌᓈᕽ᙮ 7 ᐊᐲ ᑕᔥ ᐱᓬᐃᔅᑏ Philistines ᑳᑎᓄᐎᓂᒡ ᐁᓅᑕᒥᓂᒡ ᐃᔅᕒᐃᔭᓬᐊᒃ ᐁᑮ ᒫᐗᒋᐃᑎᐙᒡ ᐃᐃᒫ ᒥᔅᐸ, ᒦ ᓴ ᐃᐃ ᐌᑭᒫᐎᓂᒡ ᐱᓬᐃᔅᑏ ᑳᑎᓄᐎᓂᒡ ᑳᐃᔑ ᐲᔖᓂᒡ ᐁᑮ ᐐ ᒦᑳᓂᑯᐙᒡ᙮ ᐊᐲ ᑕᔥ ᐃᔅᕒᐃᔭᓬᐊᒃ ᐁᓅᑕᒧᐙᒡ, ᐐᑫ ᓴ ᐅᑮ ᑯᓵᐙᐞ᙮ 8 ᒦᔥ ᐃᔅᕒᐃᔭᓬᐊᒃ ᑳᐃᓈᐙᒡ ᓵᒥᔫᓐ Samuel, ᑫᑯ ᐸᑭᒌᑫᓐ ᐁᐊᓇᒥᐁᑕᐗᒡ ᑳᑎᐯᒋᑫᒡ ᑭᑭᔐᒪᓂᑑᒥᓈᓐ, ᓃᓇᐎᓐᑦ ᐅᒋ, ᒋᓈᑕᒪᐎᔭᒥᓐᒡ ᐁᔑ ᒪᔥᑲᐎᓰᓂᒡ ᐃᐃ ᐱᓬᐃᔅᑏ ᑳᑎᓄᐎᓂᒡ, ᐅᑮᐃᓈᐙᓐ᙮ 9 ᒦᑕᔥ ᓵᒥᔫ ᑳᑮ ᐅᑖᐱᓈᒡ ᑳᓅᓂᓂᒡ ᒫᓇᒑᓂᔐᓴᓐ ᐁᑮ ᒥᓯᐌ ᐊᒀᑭᔂᒡ ᐁᑮ ᐸᑭᑎᓇᒪᐙᒡ ᑳᑎᐯᒋᑫᓂᒡ᙮ ᒦᔥ ᑳᑮ ᔖᑯᐙᓈᒡ ᑳᑎᐯᒋᑫᓂᒡ ᒋᓈᑕᒪᐙᓂᒡ ᐃᔅᕒᐃᔭᓬᐊᐞ, ᒦᔥ ᑳᐃᔑ ᓅᑖᑯᒡ᙮ 10 ᒣᒀ ᑕᔥ ᓵᒥᔫ ᐁᐸᑭᑎᓇᕽ ᐅᐸᑭᑎᓈᓱᐎᓐ ᑳᒥᓯᐌ ᐊᒀᑭᑌᓂᒃ, ᒦ ᓴ ᐃ ᐱᓬᐃᔅᑏ ᑳᑎᓄᐎᓂᒡ ᐯᔓ ᑳᑮ ᐲᔖᓂᒡ ᐁᐐ ᒦᑳᓂᑯᐙᒡ᙮ ᑳᑎᐯᒋᑫᓂᒡ ᐃᑕᔥ ᑮᐃᔑᒋᑫᐗᓐ ᒋᑭᒋ ᐱᓀᓰᐗᓂᓂᒃ ᐃᐃ ᐁᑮᔑᑲᓂᓂᒃ ᐁᑮ ᒦᑳᓈᓂᒡ ᐱᓬᐃᔅᑏ ᑳᑎᓄᐎᓂᒡ, ᒦᔥ ᑳᐃᔑ ᐗᐙᓀᑕᒥᓂᒡ᙮ ᒦᑕᔥ ᐃᔅᕒᐃᔭᓬᐊᒃ ᑳᐃᔑ ᔖᑰᒋᐋᐙᒡ ᐱᓬᐃᔅᑏ ᑳᑎᓄᐎᓂᒡ᙮ 11 ᒦᑕᔥ ᐃᔅᕒᐃᔭᓬᐊᒃ ᐃᐃᒫ ᒥᔅᐸ Mizpah ᑳᐅᒋ ᒫᒋᓂᔕᐙᐙᒡ, ᐁᑮ ᓂᓵᐙᒡ ᐲᓂᔥ ᐌᑎ ᐊᐗᓯᓇᑫ ᐯᑦᑲᕒ Bethcar ᐁᒋᑳᑌᓂᒃ᙮ 12 ᒦᑕᔥ ᓵᒥᔫ ᑳᑮ ᐅᑖᐱᓈᒡ ᐊᓯᓃᓐ ᐁᑮ ᐅᓇᓵᒡ ᐃᐃᒫ ᓇᓴᐗᔭᐄ ᒥᔅᐸ ᐆᑌᓈᕽ, ᐃᐃᒫ ᑕᔥ ᔐᓐ Shen ᐁᒋᑳᑌᓂᒃ᙮ ᒦᑕᔥ ᑳᐃᔑᓂᑳᓈᒡ ᐃᓂ ᐊᓯᓃᓐ ᐁᐸᓃᓴᕒ Ebenezer, ᐁᐃᑭᑑᒪᑲᓂᓂᒃ, ᒦ ᓴ ᐅᒫ ᑳᑎᐯᒋᑫᒡ ᐯᒥ ᐊᑯ ᐐᒋᐃᓇᕽ᙮ 13 ᐁᑮ ᔖᑰᒋᐋᐙᒡ ᐃᑕᔥ ᐱᓬᐃᔅᑏ ᑳᑎᓄᐎᓂᒡ, ᑳᐐᓐ ᐃᑕᔥ ᒦᓇᐙ ᐐᑳ ᑮᐲᔖᓰᐗᐞ ᐁᑯᓭᓂᒃ ᐃᔅᕒᐃᔭᓬᐊᒃ ᐅᑕᑮᒥᐙ᙮ ᒥᓂᒃ ᐃᑕᔥ ᐃᑯ ᓵᒥᔫ ᑳᐱᒫᑎᓯᒡ, ᑳᑎᐯᒋᑫᓂᒡ ᓴ ᐅᑮ ᓇᑳᔥᑲᐙᓂ ᐱᓬᐃᔅᑏ ᑳᑎᓄᐎᓂᒡ᙮ 14 ᐃᓂ ᑕᔥ ᐆᑌᓇᐗᓐ ᐁᔮᓂᑭᓐ ᐃᐃᒫ ᐃᔑ ᓇᓴᐗᔭᐄ ᐆᑌᓈᕽ ᐁᑲᕒᐊᓐ Ekron ᐁᒋᑳᑌᓂᒃ, ᐲᓂᔥ ᐌᑎ ᑳᑦ Gath ᑳᑮ ᒪᑲᒥᑯᐙᐸᓐ ᐱᓬᐃᔅᑏ ᑳᑎᓄᐎᓂᒡ, ᐃᔅᕒᐃᔭᓬᐊᒃ ᓴ ᑮᑮᐌ ᒪᑲᑗᐗᒃ᙮ ᒦ ᓴ ᐃ ᐃᔅᕒᐃᔭᓬᐊᒃ ᑳᑮ ᑮᐌ ᐅᑖᐱᓇᒧᐙᒡ ᑲᑭᓇ ᐅᑕᑮᒥᐙ᙮ ᐃᔅᕒᐃᔭᓬᐊᒃ ᐃᑕᔥ ᐃᑭ ᑲᔦ ᐁᒧᕒᐄ Amorites ᑳᑎᓄᐎᐙᒡ ᐱᓵᓐ ᑮᐐᒋᑖᑎᐗᒃ᙮ 15 ᒥᓂᒃ ᐃᓴ ᓵᒥᔫ ᑳᑮ ᐱᒫᑎᓯᒡ ᐅᑮ ᐅᓈᑯᓈᐞ ᐃᔅᕒᐃᔭᓬᐊᐞ᙮ 16 ᐁᑕᓱ ᐱᐴᓐ ᐃᑕᔥ ᐌᑎ ᓇᑫ ᐯᑕᓬ Bethel, ᐌᑎ ᑲᔦ ᐃᓇᑫ ᐊᔮᐎᓂᕽ ᑭᓬᑲᓬ Gilgal, ᐌᑎ ᑲᔦ ᒥᔅᐸ Mizpah ᑮᐃᔑ ᓂᑖ ᑭᔑᐹᔥᑳ, ᐁᑮ ᐅᓈᑯᓈᒡ ᐌᑎ ᒥᓯᐌ ᐃᔅᕒᐃᔭᓬᐊᐞ ᐁᔮᓂᒡ᙮ 17 ᐌᑎ ᑕᔥ ᐆᑌᓈᕽ ᐅᕒᐁᒫ Ramah ᐁᔑᑖᒡ, ᑮᐃᔑ ᓂᑖ ᑮᐌ᙮ ᒦᑕᔥ ᐃᐃᒫ ᑲᔦ ᑳᑕᔑ ᐅᓈᑯᓈᒡ ᐃᔅᕒᐃᔭᓬᐊᐞ Israel, ᒦᔥ ᑲᔦ ᐌᑎ ᑳᐃᔑ ᐅᓈᐱᑭᓇᕽ ᑫᔑ ᐸᑭᑎᓈᓲᑕᒪᐎᒥᓐᒡ ᑳᑎᐯᒋᑫᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society