1 Saamiyoo 4 - ᐅᒋᐺ ᑭᒋᒪᓯᓇᐃᑲᓐ1 ᓵᒥᔫ Samuel ᑕᔥ ᑳᑮ ᐃᑭᑐᒡ ᐅᑮ ᓅᑕᒥᓂ ᑲᑭᓇ ᐃᔅᕒᐃᔭᓬᐊᐞ Israel᙮ ᐃᐃ ᓴ ᐊᐲ ᐃᔅᕒᐃᔭᓬᐊᒃ ᑮᐃᔖᐗᒃ ᐁᑮ ᐊᑕ ᒦᑳᓈᐙᒡ ᐱᓬᐃᔅᑏ Philistines ᑳᑎᓄᐎᓂᒡ᙮ ᐃᐃᒫ ᑕᔥ ᐁᐸᓃᓴᕒ Ebenezer ᐊᔮᐎᓂᕽ ᑮᐃᔑ ᑲᐯᔑᐗᒃ᙮ ᐱᓬᐃᔅᑏ ᑳᑎᓄᐎᓂᒡ ᐃᑕᔥ ᐐᓐ ᐌᑎ ᐆᑌᓈᕽ ᐁᐯᒃ Aphek ᐁᒋᑳᑌᓂᒃ ᑮᐃᔑ ᑲᐯᔑᐗᐞ᙮ ᐃᔅᕒᐃᔭᓬᐊᒃ ᑮᒪᑲᒥᑣ ᐊᔓᑕᒫᑫᒪᑲᑯᓂ 2 ᒦᔥ ᑳᑮ ᐲᔖᓂᒡ ᐁᐐ ᒦᑳᓂᑯᐙᒡ᙮ ᐊᐲ ᓴ ᑳᒦᑳᑎᓈᓂᐗᕽ, ᐃᔅᕒᐃᔭᓬᐊᒃ ᓴ ᑮᔖᑰᒋᒋᑲᓂᐎᐗᒃ᙮ ᐱᓬᐃᔅᑏ ᑳᑎᓄᐎᓂᒡ ᓴ ᓂᑯᒋ ᑯ ᓃᐎᕽ ᒥᑖᔂᒃ 4,000 ᐅᑮ ᓂᓯᑯᐙᐞ ᑳᑮ ᑕᔑ ᒦᑳᑎᐙᒡ ᒥᔕᐗᑲᒥᒃ᙮ 3 ᐊᐲ ᓴ ᔑᒫᑲᓂᔕᒃ ᑳᐲᑮᐌᐙᒡ ᐁᔑ ᑲᐯᔑᐙᒡ, ᒦ ᓴ ᐃ ᐃᔅᕒᐃᔭᓬᐊᒃ ᑳᓃᑳᓂᓯᐙᒡ ᑳᐃᑭᑐᐙᒡ, ᐌᑯᓀᓐ ᐃᓂ ᑕᔥ ᑳᑎᐯᒋᑫᒡ ᑳᐅᒋ ᐸᑭᑎᓈᒡ ᐱᓬᐃᔅᑏ ᑳᑎᓄᐎᓂᒡ ᒋᔖᑰᒋᐃᓇᒀ ᓅᑯᒻ ᑳᑮᔑᑲᓂᓂᒃ? ᑕᑲ ᓴ ᓈᓯᑲᑖ ᑳᑎᐯᒋᑫᒡ ᐅᑕᔓᑕᒫᑫᒪᑲᒃ ᐌᑎ ᔖᐃᓬᐆ Shiloh ᐆᑌᓈᕽ ᑳᐊᔮᓂᒃ, ᒋᐊᔮᓂᒃ ᐅᐅᒫ ᒣᑴᔭᐄ ᐁᔑᐊᔮᔭᕽ, ᒋᓈᑕᒫᑯᔭᕽ ᐁᔑ ᒪᔥᑲᐎᓰᐙᒡ ᑳᔒᑫᓂᒥᓇᒀ, ᑮᐃᑭᑐᐗᒃ᙮ 4 ᒦᑕᔥ ᑳᑮ ᐃᔑᓂᔕᐙᐙᒡ ᐃᓂᓂᐗᐞ ᔖᐃᓬᐆ ᐆᑌᓈᕽ ᒋᓈᓯᑲᒥᓂᒡ ᑳᑎᐯᒋᑫᓂᒡ ᑳᒫᐗᒋ ᒪᔥᑲᐎᓰᓂᒡ ᐅᑕᔓᑕᒫᑫᒪᑲᑯᓂ, ᑳᑮ ᐊᐱᓂᒡ ᐃᔥᐱᒥᕽ ᐃᓇᑫ ᐁᔑᐊᔮᓂᒡ ᒉᕒᐊᐲᐞ᙮ ᐄᓬᐋᐃ Eli ᓴ ᓃᔑᓐ ᐅᑯᓯᓴᐞ ᐋᑉᓈᐃ Hophni, ᐃᓂ ᑲᔦ ᐱᓀᔭᔅ Phinehas ᐁᔑᓂᑳᓱᓂᒡ ᑮᐱ ᑭᑮᐗᐞ ᐁᐲᒋᑳᑌᓂᒃ ᑭᔐᒪᓂᑑᓐ ᐅᑕᔓᑕᒫᑫᒪᑲᑯᓂ᙮ 5 ᐊᐲ ᑕᔥ ᐁᐸᑲᒥᐎᒋᑳᑌᓂᒃ ᐃᐃ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ ᐃᐃᒫ ᐁᔑ ᑲᐯᔑᐙᒡ, ᑲᑭᓇ ᓴ ᐃᔅᕒᐃᔭᓬᐊᒃ ᑮᑭᒋ ᔖᑯᐌᐗᒃ, ᒦ ᓴ ᐃ ᑳᐃᔑ ᑯᔥᑯᓭᓂᒃ ᐊᑭ᙮ 6 ᐊᐲ ᓴ ᐱᓬᐃᔅᑏ ᑳᑎᓄᐎᐙᒡ ᐁᓅᑕᒧᐙᒡ ᐁᔖᑯᐌᓈᓂᐗᓂᓂᒃ, ᒦ ᓴ ᐃ ᑳᐃᑭᑐᐙᒡ, ᐊᒪᓐᒡ ᐃᓈ ᐁᓍᑕᒧᐙᑴᓐ ᑳᒪᑗ ᑭᒋ ᔖᑯᐌᓈᓂᐗᕽ ᐌᑎ ᐄᐸᕒᐆᐗᒃ Hebrews ᑳᔑ ᑲᐯᔑᐙᒡ, ᑮᐃᑭᑐᐗᒃ᙮ ᐊᐲ ᓴ ᑳᑭᑫᑕᒧᐙᒡ ᐁᑮ ᐸᑲᒥᐎᒋᑳᑌᓂᒃ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ ᐁᔑ ᑲᐯᔑᓂᒡ, 7 ᒦ ᓴ ᐃ ᑳᐃᔑ ᓭᑭᓯᐙᒡ᙮ ᒦᔥ ᐅᐅ ᑳᐃᑭᑐᐙᒡ, ᒪᓂᑑᓐ ᓴ ᒪᑗ ᑕᑯᔑᓅᓐ ᐁᔑ ᑲᐯᔑᐙᒡ! ᒦ ᓴ ᐃ ᒋᑰᐹᒋᐃᑰᔭᕽ! ᑳᐐᓐ ᓴ ᐅᐅ ᑫᑰᓐ ᐐᑳ ᐅᑖᓈᕽ ᐱᐃᔑᓭᓯᓅᓐ! 8 ᒦ ᓴ ᒋᑰᐹᒋᓭᔭᕽ! ᐊᐌᓀᓐ ᐃᑕᔥ ᐃᓈ ᑫᓈᑕᒪᐎᓇᕽ ᐃᐃ ᑳᔑ ᒪᔥᑲᐎᓰᓂᒡ ᐃᐃ ᒪᓂᑑᐞ! ᒦᐗᒃ ᐄᑐᒃ ᐃᑭ ᒪᓂᑑᒃ ᑳᑮ ᑑᑕᐙᐙᒡ ᐄᒋᑉ ᑳᑎᓄᐎᓂᒡ ᑲᑭᓇ ᒫᔑᓭᐎᓇᓐ ᒋᐅᑎᓯᑯᓂᒡ ᐌᑎ ᐱᑾᑕᑲᒥᒃ᙮ 9 ᐱᓬᐃᔅᑏ ᑳᑎᓄᐎᔦᒃ, ᑕᑲ ᒪᔥᑲᐌᑕᒧᒃ, ᐃᓂᓃᕽ ᑲᔦ ᐃᓀᑖᑯᓯᒃ, ᒋᐃᔑᐌᐱᓯᓯᐗᕽ ᒋᑲᒀᑕᑭ ᒥᑕᓄᑮᐃᓇᑭᑣ ᐄᐸᕒᐆᐗᒃ ᑖᐱᔥᑰ ᑳᔑ ᑲᒀᑕᑲᓄᑮᐊᒀ; ᑕᑲ ᓴ ᐃᓂᓃᕽ ᐃᓀᑖᑯᓯᑖ ᒋᒦᑳᓱᔭᕽ, ᑮᐃᑭᑐᐗᒃ᙮ 10 ᒦᑕᔥ ᐱᓬᐃᔅᑏ ᑳᑎᓄᐎᐙᒡ ᑳᐃᔑ ᒦᑳᓈᐙᒡ ᐃᔅᕒᐃᔭᓬᐊᐞ ᐁᑮ ᔖᑰᒋᐋᐙᒡ ᐃᑕᔥ᙮ ᑲᑭᓇ ᓴ ᐁᑕᔑᓂᒡ ᑮᑮᐌᐸᐃᐌᐗᐞ᙮ ᐐᑫ ᐃᔅᕒᐃᔭᓬᐊᒃ ᑮᑭᒋ ᔖᑰᒋᐋᐗᒃ, ᓂᓯᒥᑕᓇ ᑕᓯᕽ ᒥᑖᔂᒃ 30,000 ᐁᑮ ᓂᓯᒥᓐᒡ ᐅᔑᒫᑲᓂᔒᒥᐙᐞ᙮ 11 ᒦᑕᔥ ᑲᔦ ᑭᔐᒪᓂᑑ ᐅᑕᔓᑕᒫᑫᒪᑲᒃ ᑳᑮ ᐅᑖᐱᓂᑳᑌᓂᒃ᙮ ᒦᑕᔥ ᑲᔦᐃᒫ ᒥᒋᓃᔥ ᐄᓬᐋᐃ ᐅᑯᓯᓴᐞ ᑳᐃᔑ ᓂᓯᒥᓐᒡ ᐋᑉᓈᐃ, ᐱᓀᔭᔅ ᐁᔑᓂᑳᓱᓂᒡ᙮ ᐄᓬᐋᐃ ᑮᐃᔥᒀᐱᒫᑎᓯᒡ 12 ᐃᐃ ᑕᔥ ᐁᑮᔑᑲᓂᓂᒃ ᐯᔑᒃ ᐯᒋᒪᓂᕽ Benjamin ᐌᑕᑳᓀᓯᒡ ᑮᐅᒋ ᒫᒌᐸᑑ ᐁᑕᔑ ᒦᑳᑎᐎᓐᒡ ᐁᑮ ᐊᐸᑑᒡ ᔖᐃᓬᐆ Shiloh ᐆᑌᓈᕽ ᐁᑮ ᐲᑯᑯᓇᔦᒡ, ᐁᑮ ᒥᑖᐗᑯᐗᓂᓂᒃ ᑲᔦ ᐅᑎᒀᓐ ᑳᐊᐲᒋ ᒥᒋᓇᐌᓯᒡ᙮ 13 ᐄᓬᐋᐃ Eli ᓴ ᑕᔥ ᑮᓇᓇᒪᑕᐱ ᒌᑭᑲᓇ ᐁᑮ ᐊᔕᐙᐱᒡ ᑮᐸᑲᒥᐸᑑᓂᒡ, ᐁᑮ ᐅᒑᓂᒣᑕᒧᐃᑯᒡ ᑭᔐᒪᓂᑑᓐ ᐅᑕᔓᑕᒫᑫᒪᑲᑯᓂ᙮ ᒦᑕᔥ ᑳᑮ ᐸᑲᒥᐸᑑᓂᒡ ᐃᓂ ᑳᑮ ᐲᑖᒋᒧᓂᒡ, ᒥᓯᐌ ᐆᑌᓈᕽ ᐁᑮ ᑎᐹᒋᒧᓂᒡ᙮ ᒦᔥ ᑲᑭᓇ ᐆᑌᓈᕽ ᐁᔮᓂᒡ ᑳᑮ ᔖᑯᐌᓂᒡ ᐁᑮ ᑯᔥᑯᑕᒥᓂᒡ᙮ 14 ᐊᐲ ᑕᔥ ᐄᓬᐋᐃ ᑳᓅᑕᕽ ᐁᑭᔒᐌᓈᓂᐗᓂᓂᒃ, ᒦ ᓴ ᐃ ᑳᐃᑭᑐᒡ, ᐋᓃᓐ ᐃᑕᔥ ᐁᓍᑌᒃ ᐃᐃ ᑳᑭᔒᐌᓈᓂᐗᕽ? ᑮᐃᑭᑐ᙮ ᐃᓂ ᑕᔥ ᑳᑮ ᐲᑖᒋᒧᓂᒡ ᐌᔩᑉ ᐅᑮ ᐱ ᐐᑕᒫᑰᓐ ᐋᓃᓐ ᑳᐃᓇᑲᒥᑲᓂᓂᒃ᙮ 15 ᐄᓬᐋᐃ ᔖᑲᓯᒥᑕᓇᔑᓂᔣᓱ 98 ᑮᑕᓱ ᐱᐴᓉ, ᑳᐐᓐ ᑲᔦ ᐋᐱᒋ ᑮᐙᐱᓰ᙮ 16 ᒦᔥ ᑳᐃᑯᒡ ᑳᑮ ᐲᑖᒋᒧᓂᒡ, ᓃᓐ ᐅᔕ ᑳᑕᔑ ᒦᑳᑎᕽ ᑳᑮ ᐱᐅᒋ ᐸᑲᒥᐸᑑᔮᓐ, ᑌᐺᓴ ᓃᓐ ᑳᑕᔑ ᒦᑳᑎᕽ ᓂᑮ ᐱᐅᒋ ᑕᐸᓰ ᓅᑯᒻ ᐅᐅᐌ ᑳᑮᔑᑲᒃ, ᐅᑮᐃᑰᓐ᙮ ᒦᑕᔥ ᑳᐃᓈᒡ, ᐋᓃᓐ ᑳᐃᓇᑲᒥᑲᒃ ᓂᑯᓯᔅ? ᐅᑮᐃᓈᓐ᙮ 17 ᒦᔥ ᐅᐅ ᑳᐃᔑ ᓇᑴᑖᑯᒡ, ᐃᔅᕒᐃᔭᓬᐊᒃ Israel ᐅᑮ ᒫᒌᐸᐃᐙᓈᐙᐞ ᐱᓬᐃᔅᑏ Philistines ᑳᑎᓄᐎᓂᒡ, ᓃᐱᐗᐞ ᐃᑕᔥ ᑲᔦ ᑮᓂᓵᐗᒃ᙮ ᑭᑯᓯᓴᒃ ᐃᑕᔥ ᑲᔦ ᒥᒋᓃᔥ ᑮᓂᓵᐗᒃ, ᐋᑉᓈᐃ Hophni, ᐊᐊ ᑲᔦ ᐱᓀᔭᔅ Phinehas᙮ ᑭᔐᒪᓂᑑ ᐅᑕᔓᑕᒫᑫᒪᑲᑯᓂ ᑲᔦ ᑮᐅᑖᐱᓂᑳᑌᓂ, ᐅᑮᐃᑰᓐ᙮ 18 ᐊᐲ ᑕᔥ ᐄᓬᐋᐃ ᐁᓅᑕᕽ ᐁᒥᑰᑌᓂᒃ ᑭᔐᒪᓂᑑᓐ ᐅᑕᔓᑕᒫᑫᒪᑲᑯᓂ, ᒦ ᓴ ᑳᐃᔑ ᐋᔐᑭᒋᓭᒡ ᐁᔑ ᓇᒪᑕᐱᐸᓐ ᒌᑭ ᑭᒋ ᐃᔥᒀᑌᕽ᙮ ᒦᔥ ᑳᐃᔑ ᐴᑯᑴᔑᕽ ᐁᑮ ᐋᐱᒋᔑᕽ, ᐋᓃᔥ ᐃᓈ ᐐᑫ ᑮᐊᑭᐌᓰᐎ, ᐐᑫ ᑲᔦ ᑮᐋᒋᐳ᙮ ᓃᒥᑕᓇ ᑕᓱ ᐱᐴᓐ ᓴ ᐅᑮ ᐅᓈᑯᓈᐞ ᐃᔅᕒᐃᔭᓬᐊᐞ᙮ ᐱᓀᔭᔅ ᐐᐗᓐ ᑮᐃᔥᒀᐱᒫᑎᓯᓂᒡ 19 ᐊᐊ ᑕᔥ ᐃᑴ ᑳᑮ ᐅᔒᒥᓯᒥᑯᒡ ᐄᓬᐋᐃᐗᓐ Eli, ᑳᑮ ᐅᓈᐯᒥᒡ ᐱᓀᔭᓴᓐ Phinehas, ᑮᑭᑭᔥᑲᐙᐗᓱ, ᐋᔕ ᑯ ᑫᑳ ᒋᐅᓃᒑᓂᓯᒡ᙮ ᐊᐲ ᓴ ᐁᓅᑕᕽ ᐁᑮ ᐅᑖᐱᓂᑳᑌᓂᒃ ᑭᔐᒪᓂᑑᓐ ᐅᑕᔓᑕᒫᑫᒪᑲᑯᓂ, ᐅᔑᔐᔕᓐ ᑲᔦ ᐁᑮ ᐃᔥᒀ ᐱᒫᑎᓯᓂᒡ, ᐅᓈᐯᒪᓐ ᑲᔦ, ᒦ ᓴ ᐃ ᑳᐃᔑ ᒫᒌ ᐋᑯᓯᒡ᙮ ᒦᑕᔥ ᑳᑮ ᓂᑖᐎᑭᓈᐗᓱᒡ᙮ 20 ᐁᐱᒥᔑᕽ ᐃᑕᔥ ᐁᐐ ᐊᓂ ᐃᔥᒀ ᐱᒫᑎᓯᒡ, ᐃᓂᔥ ᐃᑴᐗᓐ ᑳᑮ ᐐᒋᐃᑯᒡ ᐅᑮᐃᑰᓐ, ᑫᑯ ᓭᑭᓯᑫᓐ, ᑸᐎᓭᔅ ᐅᔕ ᑭᓂᑖᐎᑭᐋ, ᐅᑮᐃᑰᓐ᙮ ᑳᐐᓐ ᐃᑕᔥ ᐅᑮ ᓇᑴᑕᐙᓰᓐ, ᑳᐐᓐ ᐅᑮ ᐸᐹᒥᑕᐙᓰᓐ᙮ 21 ᐃᑲᐹᑦ Ichabod ᐃᑕᔥ ᐅᑮ ᐃᔑᓂᑳᓈᓐ ᐃᓂ ᑸᐎᓭᓴᓐ ᐁᑮ ᐃᑭᑐᒡ, ᒦ ᓴ ᐃ ᑭᒋ ᐃᓀᑖᑯᓯᐎᓐ ᐅᓇᑲᓂᑯᓈᐙ ᐃᔅᕒᐃᔭᓬᐊᒃ Israel᙮ ᐃᐃ ᑕᔥ ᑳᐃᑕᕽ ᑭᔐᒪᓂᑑᓐ ᐅᑕᔓᑕᒫᑫᒪᑲᑯᓂ ᐁᑮ ᐅᑖᐱᓂᑳᑌᓂᒃ, ᐅᔑᔐᔕᓐ, ᐅᓈᐯᒪᓐ ᑲᔦ ᐁᑮ ᓂᐳᓂᒡ᙮ 22 ᒦᑕᔥ ᑳᐃᑭᑐᒡ, ᒦ ᓴ ᐃ ᐃᔅᕒᐃᔭᓬᐊᒃ ᐅᑭᒋ ᐃᓀᑖᑯᓯᐎᓂᐙ ᐁᓇᑲᓂᑯᐙᒡ, ᐋᓃᔥ ᑭᔐᒪᓂᑑ ᐅᑕᔓᑕᒫᑫᒪᑲᒃ ᑮᐅᑖᐱᓂᑳᑌᓂ, ᑮᐃᑭᑐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society