1 Saamiyoo 3 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᑮᓈᑯᓰᑕᐙᒡ ᓵᒥᔫᓐ 1 ᐊᐊ ᓴ ᑸᐎᓭᔅ ᓵᒥᔫ Samuel ᐅᑮ ᐊᓄᑮᑕᐙᓐ ᑳᑎᐯᒋᑫᓂᒡ ᐄᓬᐋᐃᐗᓐ Eli ᐁᑮ ᐊᓂ ᐐᑕᒫᑯᒡ ᐋᓃᓐ ᑫᐃᔑᒋᑫᒡ᙮ ᐃᐃ ᓴ ᐊᐲ ᑳᐐᓐ ᐋᐱᒋ ᑳᑎᐯᒋᑫᒡ ᑮᓅᑕᐙᓰ ᒋᑳᓅᓈᒡ ᐊᐎᔭᓐ, ᑳᐐᓐ ᑲᔦ ᐋᐱᒋ ᐊᐎᔭ ᑮᐸᐙᒋᑫᓰ᙮ 2 ᐋᐱᑎᕽ ᑕᔥ ᐁᑎᐱᑲᓂᓂᒃ ᐄᓬᐋᐃ ᑮᐅᔑᔑᓐ ᐁᔑ ᓂᐹᒡ᙮ ᑳᐐᓐ ᐄᑐᒃ ᐋᐱᒋ ᐋᔕ ᑮᐙᐱᓰ᙮ 3 ᑳᐐᓐ ᑕᔥ ᒪᔑ ᑮᐋᑕᐌᓯᓂᓂ ᑭᔐᒪᓂᑑᓐ ᐅᐱᒥᑌ ᐙᓴᑯᓀᒋᑲᓂᓂ; ᓵᒥᔫ ᓴ ᑮᐱᒥᔑᓐ ᐲᒋ ᐊᓇᒥᐁᐎᑲᒥᑯᕽ ᑳᑮ ᐃᔑᐊᔮᓂᒃ ᑭᔐᒪᓂᑑᓐ ᐅᑕᔓᑕᒫᑫᒪᑲᑯᓂ᙮ 4 ᒦᑕᔥ ᑳᑎᐯᒋᑫᓂᒡ ᑳᑮ ᑲᓅᓂᑯᒡ, ᓵᒥᔫ, ᐁᑮᐃᑯᒡ᙮ ᒦᔥ ᑳᐃᔑ ᓇᑴᑕᕽ, ᐅᐅᒫ ᓂᑕᔮ, ᑮᐃᑭᑐ᙮ 5 ᒦᑕᔥ ᑳᑮ ᐊᐸᑑᒡ ᐁᔑᐊᔮᓂᒡ ᐄᓬᐋᐃᐗᓐ ᐁᑮᐃᓈᒡ, ᑭᓅᑕᐎᓐ ᐅᔕ ᑳᑲᓅᔑᔭᓐ᙮ ᒦᑕᔥ ᑳᐃᑯᒡ, ᑳᐐᓐ ᑭᑑᒋ ᑲᓅᓂᓯᓅᓐ, ᒫᒑᓐ ᐊᐎ ᑲᐎᔑᒧᓐ, ᐅᑮᐃᑰᓐ᙮ 6 ᒦᔥ ᒦᓇᐙ ᑳᑎᐯᒋᑫᓂᒡ ᑳᑮ ᑲᓅᓂᑯᒡ, ᓵᒥᔫ, ᐁᑮᐃᑯᒡ᙮ ᒦᑕᔥ ᓵᒥᔫ ᑳᐃᔑ ᐗᓂᔥᑳᒡ ᐁᑮ ᐃᔖᒡ ᐄᓬᐋᐃᐗᓐ ᐁᔑᐊᔮᓂᒡ ᐁᑮᐃᓈᒡ, ᑭᓅᑕᐎᓐ ᐅᔕ ᑳᑲᓅᔑᔭᓐ᙮ ᐅᐅᔥ ᐅᑮᐃᑰᓐ ᐄᓬᐋᐃᐗᓐ, ᑳᐐᓐ ᑭᑑᒋ ᑲᓅᓂᓯᓅᓐ, ᓂᑯᓯᔅ, ᒫᒑᓐ ᒦᓇᐙ ᐊᐎ ᑲᐎᔑᒧᓐ, ᐁᑮᐃᑯᒡ᙮ 7 ᑳᐐᓐ ᐄᑐᒃ ᒪᔑ ᐃᐃ ᐊᐲ ᓵᒥᔫ ᐅᑮ ᑭᑫᓂᒫᓰᓐ ᑳᑎᐯᒋᑫᓂᒡ, ᐋᓃᔥ ᑳᐐᓐ ᒪᔑ ᐐᑳ ᐅᑮ ᑲᓅᓂᑯᓰᓐ᙮ 8 ᒦᓇᐙ ᑕᔥ ᑳᑎᐯᒋᑫᓂᒡ ᓵᒥᔫ ᐅᑮ ᑲᓅᓂᑰᓐ, ᒦ ᐃ ᓂᓯᕽ ᐁᑮ ᑲᓅᓂᑯᒡ᙮ ᒦᔥ ᑳᐃᔑ ᐗᓂᔥᑳᒡ ᐁᑮ ᐊᑕ ᐙᐸᒫᒡ ᐄᓬᐋᐃᐗᓐ ᐁᑮᐃᓈᒡ, ᑭᓅᑕᐎᓐ ᐅᔕ ᑳᑲᓅᔑᔭᓐ᙮ ᒦᑕᔥ ᐄᓬᐋᐃᐗᓐ ᑳᑮ ᑭᑫᑕᒥᓂᒡ ᑳᑎᐯᒋᑫᓂᒡ ᐃᓇᑾᓇ ᑳᑲᓅᓂᑯᓂᒡ ᐊᐊ ᑶᐎᓭᔅ᙮ 9 ᒦᔥ ᐄᓬᐋᐃᐗᓐ ᑳᐃᑯᒡ, ᒫᒑᓐ ᐊᐎ ᐱᒥᔑᓂᓐ; ᑮᔥᐱᓐ ᓴ ᒦᓇᐙ ᑲᓅᓂᒃ, ᐅᐅ ᐃᑭᑑᑲᓐ, ᐊᐤ, ᑮᑭᑐᓐ ᑌᐯᒋᑫᔭᓐ, ᑭᑕᓄᑮᐋᑲᓐ ᐅᔕ ᑭᐱᓯᑖᒃ᙮ ᒦ ᓴ ᓵᒥᔫ ᑳᐃᔑ ᐊᑕ ᐅᔑᔑᕽ ᑳᑮ ᐃᔑ ᓂᑖ ᓂᐹᒡ᙮ 10 ᑳᑎᐯᒋᑫᓂᒡ ᓴ ᑕᔥ ᑮᐲᔖᐗᓐ, ᐁᑮ ᓃᐸᐎᓂᒡ ᐃᐃᒫ ᐁᑮ ᑲᓅᓂᑯᒡ ᐯᔑᑾᓐ ᐁᑮ ᐃᔑᒋᑫᓂᒡ ᐁᑮ ᐃᑭᑐᓂᒡ, ᓵᒥᔫ, ᓵᒥᔫ᙮ ᒦᔥ ᓵᒥᔫ ᑳᐃᑭᑐᒡ, ᐊᐤ, ᑮᑭᑐᓐ, ᑭᑕᓄᑮᐋᑲᓐ ᐅᔕ ᑭᐱᓯᑖᒃ᙮ 11 ᒦᑕᔥ ᐅᐅ ᑳᑎᐯᒋᑫᓂᒡ ᑳᐃᑯᒡ, ᐃᓇᔥᑫ, ᐅᐅ ᐋᔕ ᑫᑳ ᑳᐐ ᐃᔑᒋᑫᔮᓐ ᐅᐅᒫ ᐃᔅᕒᐃᔭᓬᐃᑳᕽ Israel, ᒥᓂᒃ ᓴ ᑫᓅᑕᒧᐙᒡ ᐋᐱᒋ ᑕᑭᒋ ᑯᔥᑯᑕᒨᒃ᙮ 12 ᐃᐃ ᑕᔥ ᐊᐲ ᑮᔑᑲᓂᓂᒃ ᑑᑕᐗᒃ ᐄᓬᐋᐃ ᑲᑭᓇ ᑳᐃᑭᑐᐗᒃ ᐁᐐ ᑑᑕᒧᐗᒃ ᐅᑖᐎᓐ, ᐊᐲ ᓴ ᒫᒋᑖᐗᒃ ᐋᓃᓐ ᐙᑑᑕᐗᒃ, ᐹᓂᒫ ᓴ ᑮᑮᔑᒋᑫᐗᒃ ᓂᑲ ᑭᐱᒌᐙᓐ᙮ 13 ᐋᔕ ᐅᔕ ᓂᑮ ᐐᑕᒪᐙ ᐁᐐ ᓇᓇᐊᓯᒪᒃ ᐅᑖᐎᓂᕽ ᑳᐊᔮᓂᒡ ᓀᐱᒡ ᐃᑯ᙮ ᐅᑯᓯᓴᐞ ᐅᔕ ᑮᐹᑖᐃᑎᓱᐗᐞ᙮ ᐅᑮ ᑭᑫᑖᓐ ᐅᔕ ᐄᓬᐋᐃ ᓅᒋᑯ ᐁᑮ ᐃᔑᒋᑫᓈᓂᐗᓂᓂᒃ, ᑳᐐᓐ ᐃᑕᔥ ᐅᑮ ᐅᒋᐋᓰᐞ᙮ 14 ᒦᑕᔥ ᑳᑮ ᐊᔩᒋᐃᓂᒪᒃ ᐄᓬᐋᐃ ᐅᑖᐎᓂᕽ ᐁᔮᓂᒡ ᐃᐃ ᓅᒋᑯ ᑳᔑ ᐃᔑᒋᑫᓂᒡ ᑳᐐᓐ ᐐᑳ ᒋᐴᓀᑕᒪᐙᓯᐎᒥᓐᒡ, ᒥᓴᐙ ᑯ ᐸᑭᑎᓈᓱᐎᓇᓐ, ᐸᑭᑎᓂᑫᐎᓇᓐ ᑲᔦ ᐋᐸᑕᓂᓂᑭᓐ, ᐅᑮᐃᑰᓐ᙮ 15 ᓵᒥᔫ ᑕᔥ ᑮᐸᐱᒥᔑᓐ ᐲᓂᔥ ᐁᑮ ᐙᐸᓂᓂᒃ, ᒦᑕᔥ ᑳᐃᔑ ᐹᑭᓯᑑᒡ ᐃᔥᒀᑌᒪᓐ ᑳᑎᐯᒋᑫᓂᒡ ᐅᐙᑳᐃᑲᓂᓃᕽ᙮ ᑮᓭᑭᓯ ᑕᔥ ᒋᐐᑕᒪᐙᒡ ᐄᓬᐋᐃᐗᓐ ᐋᓃᓐ ᑳᐃᔑᓇᕽ᙮ 16 ᒦᑕᔥ ᐄᓬᐋᐃᐗᓐ ᑳᑮ ᑲᓅᓂᑯᒡ, ᓵᒥᔫ ᓂᑯᓯᔅ᙮ ᒦᔥ ᑳᐃᑭᑐᒡ, ᐅᐅᒫ ᓂᑕᔮ᙮ 17 ᒦᔥ ᐅᐅ ᐄᓬᐋᐃᐗᓐ ᑳᐃᑯᒡ, ᐋᓃᓐ ᑕᔥ ᐃᓈ ᑳᐃᓂᒃ ᑳᑎᐯᒋᑫᒡ ᑮᑲᓅᓂᒃ? ᑕᑲ ᐱᓵᓐ ᐃᑯ ᐐᑕᒪᐎᔑᓐ, ᑫᑯ ᑫᑰᓐ ᑳᑕᒪᐎᔑᑫᓐ᙮ ᑭᔐᒪᓂᑑ ᐅᔕ ᑫᑰᓐ ᑭᑲ ᑑᑖᒃ, ᐴᔥᑫ ᑳᐐᓐ ᑭᑲ ᒪᓈᒋᐃᑯᓰ; ᑮᔥᐱᓐ ᑯᑕ ᒪᓈ ᐐᑕᒪᐎᔭᓐ ᑲᑭᓇ ᑫᑰᓐ ᑳᑮ ᐃᓂᒃ ᑮᑲᓅᓂᒃ, ᐅᑮᐃᑰᓐ᙮ 18 ᒦᑕᔥ ᓵᒥᔫ ᑳᐃᔑ ᐐᑕᒪᐙᒡ ᑲᑭᓇ ᑫᑰᓐ, ᑳᐐᓐ ᐋᐲᓐᒡ ᑫᑰᓐ ᐅᑮ ᑳᑑᓰᓐ᙮ ᒦᔥ ᐄᓬᐋᐃᐗᓐ ᑳᐃᑭᑐᓂᒡ, ᑳᑎᐯᒋᑫᒡ ᐅᔕ ᐄᓴᓐ ᐊᐊ; ᐱᓵᓐ ᐃᑯ ᑕᐃᔑᒋᑫ ᐋᓃᓐ ᐁᔑ ᒥᓄᓇᕽ᙮ 19 ᓵᒥᔫ ᓴ ᑮᐊᓂ ᐅᐱᑭ, ᑳᑎᐯᒋᑫᓂᒡ ᑲᔦ ᐁᑮ ᐐᒌᐎᑯᒡ᙮ ᑲᑭᓇ ᓴ ᑳᑮ ᐃᑭᑐᒡ ᑳᑎᐯᒋᑫᓂᒡ ᑮᐃᔑᒋᑫᐗᓐ ᑌᐺ ᒋᐃᔑᓭᓂᒃ᙮ 20 ᑲᑭᓇ ᓴ ᐃᔅᕒᐃᔭᓬᐊᐞ ᐌᑎ ᐌᒌᓂᒡ ᐆᑌᓈᕽ ᑌᓐ Dan ᐁᒋᑳᑌᓂᒃ, ᐲᓂᔥ ᐌᑎ ᐆᑌᓈᕽ ᐲᐊᕒᔒᐸ Beersheba ᐅᑮ ᑭᑫᑕᒥᓂ ᑌᐺ ᓵᒥᔫ ᐁᑮ ᐅᓇᑭᒥᑯᒡ ᑳᑎᐯᒋᑫᓂᒡ ᒋᑎᓄᐎᒡ ᑳᑲᓅᑕᒪᐙᒡ ᑭᔐᒪᓂᑑᓐ᙮ 21 ᒦᑕᔥ ᑳᑎᐯᒋᑫᒡ ᒦᓇᐙᑯ ᑳᑮ ᓈᑯᓯᒡ ᐃᐃᒫ ᐆᑌᓈᕽ ᔖᐃᓬᐆ Shiloh ᐁᒋᑳᑌᓂᒃ, ᐋᓃᔥ ᐅᑮ ᓈᑯᓰᑕᐙᓐ ᓵᒥᔫᓐ ᐃᐃᒫ ᐅᑎᑭᑐᐎᓂᕽ ᐅᒋ ᐃᐃᒫ ᔖᐃᓬᐆ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society