1 Saamiyoo 2 - ᐅᒋᐺ ᑭᒋᒪᓯᓇᐃᑲᓐᐁᓇ ᐅᓂᑲᒧᐎᓐ ᐁᑕᔑᑌᓂᒃ 1 ᐁᓇ ᑕᔥ ᑮᐊᓇᒥᐋ ᐁᑮ ᐃᑭᑐᒡ: ᑳᑎᐯᒋᑫᒡ ᓴ ᓂᒨᔥᑭᓀ ᑌᐱᓇᐌᐃᒃ ᓂᑌᐃᕽ, ᓂᑑᒋ ᒥᓉᑕᒧᐙᓐ ᓴ ᐃ ᐋᓃᓐ ᑳᑮ ᐱᐃᔑᒋᑫᒡ! ᓂᐹᐱᐋᒃ ᓴ ᐃᑭ ᑳᔒᑫᓂᒥᐙᒡ, ᐋᐱᒋ ᓴ ᓂᒥᓉᑕᒻ ᐋᓃᔥ ᑭᔐᒪᓂᑑ ᓂᐐᒋᐃᒃ᙮ 2 ᑳᐐᓐ ᓴ ᐊᐎᔭ ᑯᑕᒃ ᐃᔑ ᑭᑌᑖᑯᓯᓰ ᑖᐱᔥᑰ ᑳᑎᐯᒋᑫᒡ; ᑳᐐᓐ ᑯᑕᒃ ᐊᐎᔭ ᐸᑳᓐ ᐊᔮᓰ ᑮᓐ ᐁᑕ, ᑳᐐᓐ ᓴ ᑲᔦ ᐊᐎᔭ ᐸᑳᓐ ᐃᓀᑖᑯᓯᓰ ᐁᓈᑕᒫᑫᒡ ᑖᐱᔥᑰ ᑭᑭᔐᒪᓂᑑᒥᓈᓐ᙮ 3 ᐴᓂᑑᒃ ᓴ ᐃᐃ ᑳᔑ ᓂᑖ ᒫᒦᒀᓂᑎᓱᔦᒃ, ᑫᑯ ᑲᔦ ᐸᑭᑎᓂᑎᓱᑫᒃ ᒋᑲᑮᐹᒋᑮᔗᔦᒃ᙮ ᑳᑎᐯᒋᑫᒡ ᐅᔕ ᑎᓄᐎ ᑭᔐᒪᓂᑑ ᑳᑭᑫᑖᓱᒡ, ᐐᓐ ᑲᔦ ᑲᑭᓇ ᑳᐅᓈᑯᓈᒡ ᐯᒫᑎᓯᓂᒡ ᐋᓃᓐ ᐁᔑᒋᑫᓂᒡ᙮ 4 ᑳᒪᔥᑲᐎᓰᐙᒡ ᔑᒫᑲᓂᔕᒃ ᓴ ᐅᒥᑎᒀᐲᒥᐙᐞ ᑕᐸᑭᓭᓂᐗᐞ ᒣᔥᑾᒡ ᓴ ᑳᒪᒉᑖᑯᓯᐙᒡ ᑕᓲᑫᑖᑯᓯᐗᒃ᙮ 5 ᐃᑭ ᓴ ᐯᒫᑎᓯᐙᒡ ᑳᑮ ᓂᑖ ᐌᐌᓂ ᐐᓯᓂᐙᐸᓐ; ᒦᔥ ᓅᑯᒻ ᐁᔑᒋᑫᐙᒡ ᐁᐃᓇᓄᑮᑕᒫᓱᐙᒡ ᑫᐅᒋ ᐐᓯᓂᐙᒡ᙮ ᒣᔥᑾᒡ ᑕᔥ ᐃᑭ ᑳᐐ ᐐᓯᓂᐙᐸᓐ ᑳᐐᓐ ᓅᑯᒻ ᐐᑳ ᓅᑌᓭᓰᐗᒃ ᒦᒋᒻ᙮ ᐊᐊ ᓴ ᐐᐎᒫ ᑫᔥᑭᑑᓯᑭᐸᓐ ᒋᐅᑕᐱᓅᒌᔑᒥᒡ ᓃᔣᓱ ᐅᓂᑖᐎᑭᐋᐞ ᐊᐱᓅᒌᔕᐞ, ᐊᐊ ᑕᔥ ᓃᐱᐗᐞ ᑳᑮ ᐊᔮᐙᒡ ᑳᐐᓐ ᐊᐙᒡ ᐯᔑᒃ ᐅᑲ ᐊᓂ ᐊᔮᐙᓰᓐ᙮ 6 ᑳᑎᐯᒋᑫᒡ ᐅᔕ ᓂᔑᐌ, ᑮᐌ ᐱᒫᑎᓰᐃᐌ ᑲᔦ, ᐃᔑ ᐸᑭᑎᓂᐌ ᓂᑾᐊᑳᓂᕽ, ᐐᓐ ᑲᔦ ᐗᓂᔥᑲᐃᐌ᙮ 7 ᐐᓐ ᓴ ᑳᐃᔑᐋᒡ ᐋᓂᑕ ᐊᐎᔭᐞ ᒋᑭᑎᒫᑭᓯᓂᒡ, ᐋᓂᑕ ᑲᔦ ᒋᐌᓅᑎᓯᓂᒡ᙮ ᐐᓐ ᑲᔦ ᑳᑑᑕᐙᒡ ᐋᓂᑕ ᐊᐎᔭᐞ ᒋᑕᐸᓭᑖᑯᓯᓂᒡ, ᐋᓂᑕ ᑲᔦ ᒋᑭᒋ ᐃᓀᑖᑯᓯᓂᒡ᙮ 8 ᐐᓐ ᑲᔦ ᑳᐅᒋ ᐅᐱᓈᒡ ᑫᑎᒫᑭᓯᓂᒡ ᐃᐃᒫ ᑳᔑ ᐹᔥᑭᓀᓭᓂᒃ, ᐐᓐ ᑲᔦ ᑳᐅᐱᓈᒡ ᐅᓅᑌᓭᐞ ᐃᐃᒫ ᐁᔑᐊᔮᓂᒡ ᐃᔥᒀᑭᔐᕽ᙮ ᒦᔥ ᑲᔦ ᐁᑑᑕᐙᒡ ᒋᐐᑕᐱᒫᓂᒡ ᑫᓂ ᐅᑭᒫᐎᓂᒡ, ᐅᑎᔑ ᓇᒪᑕᐱᐋ ᑲᔦ ᑫᔑ ᑭᑌᑖᑯᓯᓂᒡ᙮ ᐃᐃ ᓴ ᑳᔑ ᐊᑌᓂᒃ ᐊᑮᓂ ᑳᑎᐯᒋᑫᒡ ᐅᑎᐯᑖᓐ; ᒦ ᓴ ᐃᐃᒫ ᑳᐃᔑ ᐊᑑᒡ ᐅᐅ ᐊᑮᓂ᙮ 9 ᐅᓈᑲᒋᑕᒪᐙᐞ ᓴ ᐅᐱᒫᑎᓯᐎᓂᓂ ᐃᐃ ᐅᐱᒫᑎᓰᒪᐞ ᑌᐺ ᑳᐱᒥᓂᔕᐅᑯᒡ, ᐃᑭ ᑕᔥ ᐐᓐ ᓅᒋᑯ ᑳᐃᔑᒋᑫᐙᒡ ᑕᐊᑯᓈᑯᓯᐗᒃ ᑳᔑ ᑲᔥᑮᑎᐱᑲᓂᓂᒃ; ᑳᐐᓐ ᐃᓴ ᐊᐎᔭ ᐐᑳ ᐅᑕᐲᒌᐎᓂᕽ ᐅᒋ ᔖᑰᒋᑣᓰ᙮ 10 ᐃᐃ ᓴ ᑲᔦ ᑳᔒᑫᓂᒥᑯᒡ ᑳᑎᐯᒋᑫᒡ ᑕᓂᔑᐗᓈᒋᒋᑲᓂᐎᐗᐞ, ᑭᒋᑮᔑᑯᕽ ᐃᓇᑫ ᐅᑲ ᐅᒋ ᐹᑭᓈᓈᐞ᙮ ᑳᑎᐯᒋᑫᒡ ᐅᔕ ᐅᐐ ᑎᐹᑯᓈᐞ ᒥᓯᐌ ᐁᔮᓂᒡ ᐅᐅᒫ ᐊᑮᕽ, ᒦᔥ ᒋᒦᓈᒡ ᒋᒪᔥᑲᐎᓰᓂᒡ ᐅᑭᒋᐅᑭᒫᒪᓐ, ᐅᑲ ᐃᔑᐋᓐ ᑲᔦ ᐃᓂ ᑳᑮ ᐅᓈᐸᒫᒡ ᐅᑭᒋᐅᑭᒫᒪᓐ ᒋᔖᑰᒋᑣᓂᒡ, ᑮᐃᔑ ᐊᓇᒥᐋ᙮ 11 ᒦᑕᔥ ᐃᐃ ᐁᓬᑫᓇ ᑳᐃᔑ ᑮᐌᒡ ᐅᕒᐁᒫ Ramah ᐆᑌᓈᕽ ᑳᑮ ᐅᒌᒡ; ᐊᐊ ᑕᔥ ᐐᓐ ᑸᐎᓭᔅ ᐅᑮ ᐊᓄᑮᑕᐙᓐ ᑳᑎᐯᒋᑫᓂᒡ, ᐄᓬᐋᐃᐗᓐ ᐁᑮ ᐅᑑᑭᒫᒥᒡ᙮ ᐄᓬᐋᐃ ᐅᑯᓯᓴᐞ ᐁᑕᔑᒥᒥᓐᒡ 12 ᐄᓬᐋᐃ Eli ᐃᑕᔥ ᐅᑯᓯᓴᐞ ᑮᒪᒋᐃᔑᐌᐱᓯᐗᐞ, ᑳᐐᓐ ᐅᑮ ᑭᒋ ᐃᓀᓂᒫᓰᓂ ᑳᑎᐯᒋᑫᓂᒡ᙮ 13 ᑳᐐᓐ ᑲᔦ ᐅᑮ ᐱᓯᔅᑫᑕᓰᓂ ᑳᑮ ᓂᑖ ᐃᔑᒋᑫᐃᑎᓂᒡ ᐊᓇᒥᐁᐎᑭᒫᐞ, ᐯᒫᑎᓯᓂᒡ ᑲᔦ᙮ ᐊᐎᔭ ᓴ ᐱᑯ ᑮᐸᑭᑎᓇᕽ ᐅᐸᑭᑎᓈᓱᐎᓐ, ᐊᓇᒥᐁᐎᑭᒫ ᓴ ᐅᑕᓄᑮᐋᑲᓇᓐ ᐅᑮ ᑕᑯᓇᒥᓂ ᓀᔂᐱᑌᔮᓂᒃ ᒌᑕᐃᐳᓐ ᒣᒀ ᐐᔮᔅ ᐁᐅᑌᓂᒃ᙮ 14 ᒦᑕᔥ ᑳᐃᔑ ᐊᑣᑲᒥᐃᑫᓂᒡ ᐃᐃᒫ ᑭᒋ ᐅᓈᑲᓂᕽ, ᑯᒫ ᑲᔦ ᐊᑭᑯᕽ, ᒥᓂᒃ ᐃᑕᔥ ᐃᑯ ᑳᐊᒀᐊᒥᓂᒡ ᐐᔮᔅ, ᒦ ᓴ ᐃ ᐌᓂ ᑳᑎᐯᑕᒥᓂᒡ ᐊᓇᒥᐁᐎᑭᒫᓐ᙮ ᒦᑕᔥ ᑲᑭᓇ ᐃᔅᕒᐃᔭᓬᐊᒃ Israel ᑳᑑᑕᐎᑣ ᑳᑮ ᐲᔖᐙᒡ ᐃᐃᒫ ᔖᐃᓬᐆ Shiloh ᐆᑌᓈᕽ᙮ 15 ᒦᑕᔥ ᑲᔦ ᑳᐃᔑᒋᑫᓂᒡ, ᒥᓴᐙ ᓴ ᑯ ᒋᑆ ᐊᒀᑭᑌᓂᒃ ᐱᒥᑌ, ᐊᓇᒥᐁᐎᑭᒫ ᓴ ᐅᑕᓄᑮᐋᑲᓇᐞ ᐅᑮ ᐱ ᓈᓯᑲᐙᓂ ᐃᓂ ᐃᓂᓂᐗᓐ ᐯᑭᑎᓈᓱᓂᒡ ᐅᐅ ᐁᑮᐃᓈᓂᒡ, ᑕᑲ ᒦᔑᔑᓐ ᐃᐃ ᐐᔮᔅ ᑫᑮᔑᓴᕽ ᐊᓇᒥᐁᐎᑭᒫ; ᑳᐐᓐ ᑭᑲ ᐅᑖᐱᓇᒫᑯᓰ ᑮᔥᐱᓐ ᐅᑌᓂᒃ, ᑭᑲᔥᑭᓂᓂᒃ ᐁᑕ ᐅᑲ ᐅᑖᐱᓈᓐ, ᐅᑮᐃᓈᓂ᙮ 16 ᑮᔥᐱᓐ ᐃᑕᔥ ᐃᓂ ᐯᑭᑎᓈᓱᓂᒡ ᐅᐅ ᐃᑭᑐᓂᒡ, ᑕᑲ ᐌᐌᓂ ᐃᔑᒋᑫᑖ, ᐱᓇᒫ ᒋᐊᒀᑭᑌᒃ ᐱᒥᑌ, ᒦᑕᔥ ᒋᐅᑖᐱᓇᒪᓐ ᒥᓂᒃ ᐃᑯ ᐁᑕᐌᑕᒪᓐ᙮ ᒦᔥ ᐅᐅ ᑳᐃᓈᓂᒡ, ᑳᐐᓐ, ᔐᒫᒃ ᐃᑯ ᓅᑯᒻ ᒦᔑᔑᓐ ᐃᐃ ᐐᔮᔅ, ᑮᔥᐱᓐ ᒦᔑᓯᐗᓐ, ᑭᑲ ᒪᑲᒥᓐ, ᐅᑮᐃᓈᓂ᙮ 17 ᒦᑕᔥ ᐅᐅ ᑳᐃᔑ ᒪᒋᐃᔑᒋᑫᐙᒡ ᐃᑭ ᐅᔥᑭᓃᑭᐗᒃ᙮ ᐐᑫ ᐅᑮ ᑭᒋ ᐋᓍᐸᑕᒥᓂ ᑳᑎᐯᒋᑫᓂᒡ, ᐋᓃᔥ ᐅᓵᒻ ᑳᐐᓐ ᐅᑮ ᑭᑌᑕᓰᓈᐙ ᐁᔑ ᐸᑭᑎᓇᒪᐎᒥᓐᒡ ᑳᑎᐯᒋᑫᓂᒡ᙮ ᓵᒥᔫ ᑮᐊᔮᒡ ᔖᐃᓬᐆ ᐆᑌᓈᕽ 18 ᐊᐊ ᑕᔥ ᐐᓐ ᑸᐎᓭᔅ ᓵᒥᔫ Samuel ᑮᑕᔑ ᐊᓇᒥᐁᐗᓄᑮ ᐁᓈᓴᒦᓂᒡ ᑳᑎᐯᒋᑫᓂᒡ, ᐁᑮ ᑭᑭᔥᑲᕽ ᐅᑳᑭᑲᓂ ᓈᐱᔥᑭᑲᓀᔅ᙮ 19 ᒦᑕᔥ ᐁᑕᓱ ᐱᐴᓐ ᑳᑮ ᐲᔖᓂᒡ ᐅᒫᒫᓐ ᐁᑮ ᓂᑖ ᐅᔑᑕᒫᑯᒡ ᑭᓍᐲᑭᐎ ᑲᔥᑮᑮᐎᓀᔅ᙮ ᐅᑮ ᓂᑖ ᐲᑑᓂ ᓴ ᐊᐲ ᑮᐲᔖᓂᒡ, ᑮᐱ ᐐᒌᐙᓂᒡ ᐅᓈᐯᒥᓂ ᑮᐱ ᐊᑕ ᐸᑭᑎᓈᓱᓂᒡ ᐁᑕᓱ ᐱᐴᓐ᙮ 20 ᒦ ᓴ ᐃ ᐄᓬᐋᐃ Eli ᑳᑮᐃᓈᒡ ᒋᒥᓄᓭᓂᒡ ᐁᓬᑫᓇᐗᓐ, ᐐᐎᓂ ᑲᔦ ᐁᓇᐗᓐ Hannah, ᐅᐅ ᐁᑮ ᐃᑭᑐᒡ, ᑕᑲ ᓴ ᑳᑎᐯᒋᑫᒡ ᑭᑲ ᒦᓂᒃ ᐊᐱᓅᒌᔕᐞ ᐅᓄ ᐅᒋ ᐃᑴᐗᓐ ᒋᒣᔥᑯᒋᓭᓂᒡ ᐃᓂ ᑳᑮ ᐅᒋ ᐊᓇᒥᐋᐸᓐ ᐁᑮ ᑲᑴᑗᒡ, ᑳᑮ ᒦᓈᒡ ᐃᑕᔥ ᑳᑎᐯᒋᑫᓂᒡ, ᑮᐃᑭᑐ᙮ ᒦᑕᔥ ᑳᐊᓂ ᐃᔑ ᑮᐌᓂᒡ᙮ 21 ᒦᑕᔥ ᐁᓇ ᑳᑮ ᔕᐌᓂᒥᑯᒡ ᑳᑎᐯᒋᑫᓂᒡ, ᓂᓯᓐ ᑸᐎᓭᓴᐞ ᐁᑮ ᓂᑖᐎᑭᐋᒡ, ᓃᔑᓐ ᑲᔦ ᐃᑴᓭᓴᐞ ᐁᑮ ᐊᔮᐙᒡ᙮ ᐊᐊ ᑕᔥ ᐐᓐ ᑸᐎᓭᔅ ᓵᒥᔫ ᑮᐅᐱᑭ ᐁᓈᓴᒦᓂᒡ ᑳᑎᐯᒋᑫᓂᒡ᙮ ᐄᓬᐋᐃ, ᐃᐃ ᑲᔦ ᐅᑯᓯᓴᐞ ᐁᑕᔑᓱᐙᒡ 22 ᐅᐅ ᑕᔥ ᐊᐲ ᐄᓬᐋᐃ ᐋᔕ ᑮᐊᑭᐌᓰᐎ᙮ ᑮᓅᑕᒻ ᓴ ᑲᑭᓇ ᐋᓃᓐ ᑳᐃᔑᒋᑫᓂᒡ ᐅᑯᓯᓴᐞ ᐃᐃᒫ ᐃᔅᕒᐃᔭᓬᐃᑳᕽ; ᐁᑮ ᐙᐐᐯᒫᓂᒡ ᑲᔦ ᐃᐃ ᐃᑴᐗᐞ ᑳᑮ ᑕᔑ ᐸᒦᑖᑫᓂᒡ ᐃᐃᒫ ᐁᔑ ᐃᔥᒀᑌᒥᐗᓂᓂᒃ ᒫᐗᒋᐃᑎᐎ ᐸᒀᓀᑲᒥᑯᕽ᙮ 23 ᒦᑕᔥ ᑳᐃᓈᒡ, ᐌᑯᓀᓐ ᐃᑕᔥ ᐅᐅ ᐌᒋ ᐃᔑᒋᑫᔦᒃ? ᑲᑭᓇ ᓴ ᐊᐎᔭᒃ ᓂᐐᑕᒫᑰᒃ ᒪᒋᑫᑰᓐ ᐄᓴᓐ ᐁᐃᔑᒋᑫᔦᒃ᙮ 24 ᓂᑯᓯᓴᒃ, ᑳᐐᓐ ᓴ ᐃ ᑭᑖ ᐃᔑᒋᑫᓰᒻ; ᐃᐃ ᓴ ᑳᓅᑕᒫᓐ ᐁᐃᓈᒋᒥᑰᔦᒃ ᐁᔑᐊᔮᓂᒡ ᑳᑎᐯᒋᑫᒡ ᐅᐱᒫᑎᓰᒪᐞ, ᑳᐐᓐ ᑭᒥᓍᒋᒥᑰᓰᒻ᙮ 25 ᐃᓇᔥᑫ ᑮᔥᐱᓐ ᐊᐎᔭ ᑮᒫᔑ ᑑᑕᐙᒡ ᐐᒋᓂᓂᐗᓐ, ᑭᔐᒪᓂᑑᓐ ᓴ ᐅᑲ ᓈᑕᒪᐙᓂ᙮ ᑮᔥᐱᓐ ᐃᑕᔥ ᐃᓂᓂ ᑮᒫᔑ ᑑᑕᐙᒡ ᑳᑎᐯᒋᑫᓂᒡ, ᐊᐌᓀᓇᓐ ᐃᑕᔥ ᐃᓈ ᑫᓈᑕᒫᑯᐸᓐ? ᐅᑮ ᐃᓈᐞ᙮ ᑳᐐᓐ ᐃᑕᔥ ᐅᑮ ᐸᐹᒥᑖᑯᓰᐞ ᐃᐃ ᐅᑯᓯᓴᐞ ᐋᓃᔥ ᐋᔕ ᑳᑎᐯᒋᑫᓂᒡ ᑮᐃᓀᑕᒨᓐ ᐁᐐ ᓂᓯᑯᓂᒡ᙮ 26 ᐊᐊ ᑕᔥ ᑸᐎᓭᔅ ᓵᒥᔫ ᑮᐊᓂ ᒫᒌᑭ, ᐁᑮ ᐊᓂ ᒥᓍᐸᒥᑯᒡ ᑳᑎᐯᒋᑫᓂᒡ, ᐃᓂᓂᐗᓐ ᑲᔦ᙮ ᐄᓬᐋᐃ ᓃᔮᒃ ᑮᐐᑌᓂᒃ ᐋᓃᓐ ᑫᓂᐃᔑᓭᓂᒃ ᐅᑖᐎᓐ 27 ᑫᓅᑕᒪᐙᓂᒡ ᑭᔐᒪᓂᑑᓐ ᐃᑕᔥ ᐄᓬᐋᐃ Eli ᐅᑮ ᐅᑎᓯᑰᓐ ᐁᑮ ᐱ ᐐᑕᒫᑯᒡ ᐋᓃᓐ ᐁᑭᑐᓂᒡ ᑳᑎᐯᒋᑫᓂᒡ᙮ ᒦᔥ ᐅᐅ ᑳᐃᑯᒡ, ᐅᐅ ᓴ ᐃᑭᑐ ᑳᑎᐯᒋᑫᒡ, ᓃᓐ ᐄᑐᒃ ᑳᑮ ᓈᑯᓰᑕᐗᑭᐸᓐ ᑳᑮ ᐅᑫᑌᔭᐋᒥᔭᐸᓐ ᐁᕒᐊᓐ Aaron ᐅᑖᐎᓂᕽ ᐌᑎ ᒣᒀ ᐄᒋᐸᑮᕽ Egypt ᑮᐊᔮᐙᐸᓐ ᐯᕒᐆᓐ Pharaoh ᑮᑎᐯᓂᒥᑯᐙᐸᓐ? 28 ᑲᑭᓇ ᑕᔥ ᑳᑮ ᑕᓶᐙᓇᑭᓯᓂᒡ ᐃᔅᕒᐃᔭᓬᐊᐞ Israel, ᑭᑫᑌᔭᐋᒻ ᓴ ᐅᑖᐎᓂᕽ ᓂᑮ ᐅᒋ ᐅᓈᐸᒥᒫᐞ ᑫᐊᓇᒥᐁᐎᑭᒫᐎᓂᒡ᙮ ᑕᑕᔑ ᐸᒦᑖᑫᐗᓐ ᑳᔑ ᐸᑭᑎᓈᓱᕽ, ᒋᒥᓈᓯᑫᓂᒡ ᑲᔦ, ᒋᑭᑭᔥᑲᒥᓂᒡ ᑲᔦ ᐅᑳᑭᑲᓂ ᓈᐱᔥᑭᑲᓐ ᐁᓈᓴᒦᐗᒃ᙮ ᓃᓐ ᑲᔦ ᑳᑮ ᒦᓂᒪᒃ ᐱᓵᓐ ᐃᐃᒫ ᒋᔑ ᐐᑑᑳᓱᓂᒡ ᑲᑭᓇ ᑫᑰᓐ ᑳᑮ ᐸᑭᑎᓂᑳᑌᓂᒃ ᐃᐃᒫ ᐃᔥᑯᑌᕽ᙮ 29 ᐌᑯᓀᓐ ᐃᑕᔥ ᐌᒋ ᒫᓀᑕᒪᓐ ᐃᓂ ᓂᐸᑭᑎᓈᓲᑕᒫᑰᐎᓇᓐ, ᓂᒦᓂᑰᐎᓇᓐ ᑲᔦ ᓃᓐ ᑳᐊᑕᐌᑕᒫᓐ ᓂᑖᐎᓂᕽ? ᐌᑯᓀᓐ ᐃᑕᔥ ᓇᐗᒡ ᐌᒋ ᑭᑌᓂᒪᑣ ᑭᑯᓯᓴᒃ ᐊᐲᒡ ᓃᓐ, ᐁᐊᓂ ᐅᒋ ᐋᒋᐴᓂᑎᓱᐙᒡ ᐁᐱᒥ ᐅᑖᐱᓇᒧᐙᒡ ᒫᐗᒡ ᐌᓂᔑᔑᕽ ᐐᔮᔅ ᐯᑭᑎᓇᒥᓂᒡ ᓂᐱᑖᑎᓰᒪᐞ ᐃᔅᕒᐃᔭᓬᐊᐞ? 30 ᓃᓐ ᐅᔕ ᑳᑎᐯᒋᑫᔮᓐ ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ, ᒦᔥ ᐅᐅ ᐁᑭᑐᔮᓐ, ᒦ ᓴ ᐃ ᑳᐃᔑ ᐊᔓᑕᒫᐹᓐ ᑭᑖᐎᓂᕽ, ᑭᑫᑌᔭᐋᒻ ᑲᔦ ᐅᑖᐎᓂᕽ ᒋᐅᒌᐙᐸᓐ ᑫᓀᐱᒋ ᐊᓄᑮᑕᒪᐎᐙᐸᓐ ᐁᓈᓴᒦᐗᒃ᙮ ᐅᐅᔥ ᓅᑯᒻ ᓂᑎᑭᑦ, ᑳᐐᓐ ᐃᐃ ᐃᓴᓐ ᐃᑕᐙ ᑕᐃᔑᓭᓯᓅᓐ! ᐃᑭ ᓴ ᑳᑭᑌᓂᒥᐙᒡ ᓂᑲ ᑭᑌᓂᒫᒃ, ᐃᑭ ᑕᔥ ᐐᓐ ᑫᐋᓇᐌᓂᒥᐙᒡ ᑫᓃᓐ ᓂᑲ ᐋᓇᐌᓂᒫᒃ᙮ 31 ᑕᐅᒋᒋᓭ ᐅᔕ ᒋᑮᔑᑲᒃ ᐊᐲ ᑫᓂᓴᒀ ᑲᑭᓇ ᐌᔥᑳᑎᓯᐙᒡ ᐃᐃᒫ ᑭᑖᐎᓂᕽ ᐌᒌᐙᒡ, ᐃᐃᒫ ᑲᔦ ᐌᒌᐙᒡ ᑭᑫᑌᔭᐋᒻ ᐅᑖᐎᓂᕽ᙮ ᑳᐐᓐ ᐃᑕᔥ ᐊᐎᔭ ᑕᐊᔮᓰ ᑫᐊᑭᐌᓰᐎᒡ ᐌᑕᑳᓀᓯᔭᓐ᙮ 32 ᐐᑫ ᓴ ᑭᑲ ᐅᒋ ᐅᒑᓂᒥᓭ ᑭᑖᐎᓂᕽ, ᑭᑲ ᐋᔮᔐᑕᒻ ᓴ ᐊᐲ ᐙᐸᑫᔭᓐ ᑫᔑ ᒥᓄᑑᑕᐗᒀ ᐃᔅᕒᐃᔭᓬᐊᒃ᙮ ᑳᐐᓐ ᐃᑕᔥ ᐐᑳ ᒦᓇᐙ ᐊᐎᔭ ᑭᑖᐎᓂᕽ ᑕᐅᒌᓰ ᒋᐊᑭᐌᓰᐎᒡ᙮ 33 ᔖᑰᒡ ᐃᑕᔥ ᐯᔑᒃ ᑭᐲᐌᓰᒻ ᓂᑲ ᐸᑭᑎᓈ ᒋᐱᒫᑎᓯᒡ, ᒦᑕᔥ ᐊᐊ ᑫᐃᓇᓄᑮᒡ ᒋᐊᓇᒥᐁᐎᑭᒫᐎᒡ᙮ ᑳᐐᓐ ᐃᑕᔥ ᑕᓂ ᐙᐱᓰ, ᒦᔥ ᑫᐊᓂ ᐃᔑ ᐸᑭᑌᑕᕽ᙮ ᑲᑭᓇ ᑕᔥ ᑯᑕᒃ ᑭᐲᐌᓰᒪᒃ ᒣᒀ ᐁᒪᔥᑲᐙᑎᓯᐙᒡ ᑕᓂᐳᐗᒃ᙮ 34 ᐋᓃᓐ ᐃᑕᔥ ᑫᐃᔑᓭᐙᒡ ᐃᑭ ᓃᔑᓐ ᑭᑯᓯᓴᒃ, ᐋᑉᓈᐃ Hophni, ᐱᓀᔭᔅ Phinehas ᑲᔦ, ᒦ ᓴ ᐃᐌ ᑫᑭᑭᓇᐙᓵᐸᑕᒪᓐ᙮ ᒥᒋᓃᔥ ᐃᓴ ᑕᓂᐳᐗᒃ ᐯᔑᑾᓐ ᑮᔑᑲᓂᓂᒃ᙮ 35 ᓃᓐ ᓴ ᑕᔥ ᐃᑯ ᓂᑲ ᐅᑎᓇᒫᔅ ᑫᑌᐺᔦᑖᑯᓯᒡ ᐊᓇᒥᐁᐎᑭᒫ ᑫᐃᔑᒋᑫᒡ ᐋᓃᓐ ᐁᔑ ᐊᑕᐌᑕᒧᐗᒃ ᓂᑌᐃᕽ᙮ ᓂᑲ ᒦᓈ ᓴ ᑫᐅᐲᐌᓰᒥᒡ, ᒦᑕᔥ ᐃᐃ ᑫᓀᐱᒋ ᐃᓇᓄᑮᓂᒡ ᐁᓈᓴᒦᓂᒡ ᑫᐅᓈᐸᒥᒪᒃ ᑭᒋᐅᑭᒫᓐ᙮ 36 ᑕᓂ ᐃᔑᓭ ᑕᔥ ᐁᑕᓱ ᐯᔑᑯᐙᒡ ᑫᐃᔥᑯᓀᐙᒡ ᑭᑖᐎᓂᕽ ᐌᒌᐙᒡ, ᒋᐱ ᓈᓯᑲᐙᐙᒡ ᐃᓂ ᐊᓇᒥᐁᐎᑭᒫᓐ ᒋᐊᓂᒥᑯᑖᐙᒡ ᐁᔑᐊᔮᓂᒡ ᒋᐊᑐᑕᒪᐙᐙᒡ ᐯᔑᒃ ᐙᐹᐱᑯ ᔔᓂᔮᓐ, ᐸᑴᔑᑲᓇᓐ ᑲᔦ ᐅᐅ ᒋᐃᑭᑐᐙᒡ, ᑕᑲ ᐃᓇᑭᒥᔑᓈᒻ ᒋᐐᒋᑣᔮᕽ ᐊᓇᒥᐁᐗᓄᑮᐎᓂᕽ, ᑫᐅᒋ ᐊᔮᔮᕽ ᑫᒦᒋᔮᕽ, ᐅᑮᐃᑰᓐ ᑳᑎᐯᒋᑫᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society