1 Saamiyoo 15 - ᐅᒋᐺ ᑭᒋᒪᓯᓇᐃᑲᓐᐊᒪᓬᐁᒃ ᑳᑎᓄᐎᓂᒡ ᑮᒦᑳᓂᑯᐙᒡ ᐃᔅᕒᐃᔭᓬᐊᒃ 1 ᓵᒥᔫᓐ Samuel ᑕᔥ ᔂᓬ Saul ᐅᑮᐃᑰᓐ, ᓃᓐ ᓴ ᑳᑎᐯᒋᑫᒡ ᑳᑮ ᐲᒋᓂᔕᐅᐸᓐ ᒋᐅᓈᐸᒥᓈᓐ ᒋᐅᑭᒫᑲᑕᐗᑣ ᐯᒫᑎᓯᐙᒡ ᐃᔅᕒᐃᔭᓬᐊᒃ Israel; ᐱᓯᑕᒧᐤ ᐃᑕᔥ ᐅᐅ ᐁᑭᑐᒡ ᑳᑎᐯᒋᑫᒡ᙮ 2 ᒦ ᓴ ᐅᐌᓂ ᐁᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᓃᓐ ᓴ ᓂᐐ ᓇᓇᐊᓵᒃ ᐊᒪᓬᐁᒃ Amalekites ᑳᑎᓄᐎᐙᒡ ᐃᐃ ᑳᑮ ᑑᑕᐙᐙᒡ ᐃᔅᕒᐃᔭᓬᐊᐞ, ᐁᑮ ᓇᑳᔥᑲᐙᐙᒡ ᐄᒋᐸᑮᕽ ᑮᐱᐅᒋ ᑕᑯᔑᓂᓂᒡ᙮ 3 ᒫᒑᓐ ᓴ ᐊᐎ ᒦᑳᔥ ᐊᒪᓬᐁᒃ, ᑲᑭᓇ ᑲᔦ ᑫᑰᓐ ᑭᑲ ᓂᔑᐗᓈᒋᑖᐙᒻ ᑌᐯᑕᒧᐙᒡ, ᑫᑯ ᑲᔦ ᒪᓈᒋᐋᑫᒀᓂᒃ᙮ ᐃᓂᓂᐗᒃ, ᐃᑴᐗᒃ, ᐊᐱᓅᒌᔕᒃ, ᐊᐱᓅᒌᔐᓴᒃ ᑲᔦ ᑭᑲ ᓂᓵᐙᒃ᙮ ᐅᑕᐗᑳᓂᓂ ᑲᔦ, ᐱᔑᑭᐗᒃ, ᒫᓇᒑᓂᔕᒃ, ᐱᒀᐎᑲᓀ ᒥᑕᑎᒨᒃ, ᒫᔑᒥᑕᑎᒨᒃ ᑲᔦ, ᑮᐃᑭᑐ᙮ 4 ᒦᑕᔥ ᔂᓬ ᑳᐃᔑ ᐊᑐᒫᒡ ᐅᑎᓂᓃᒪᐞ ᐁᐐ ᐙᐸᒫᒡ ᐃᐃᒫ ᑌᓬᐊᐃᒻ Telaim ᐊᔮᐎᓂᕽ᙮ ᓃᔣᒃ ᑕᓯᕽ ᒥᑖᔂᒃ ᓴ ᑮᑕᔑᐗᐞ 200,000, ᑕᑯ ᑕᔥ ᒥᑖᒌᕽ ᒥᑖᔂᒃ 10,000 ᐌᒌᓂᒡ ᒎᑕ ᐊᑮᕽ Judah᙮ 5 ᒦᑕᔥ ᑳᑮ ᐃᔖᐙᒡ, ᐃᐃ ᐅᑎᓂᓃᒪᐞ ᐁᔑ ᐅᑑᑌᓈᒥᓂᒡ ᐊᒪᓬᐁᒃ ᑳᑎᓄᐎᓂᒡ, ᐁᔑ ᐸᓴᑎᓈᓂᒃ ᐃᑕᔥ ᑮᐃᔑ ᐊᑲᑑᐗᒃ᙮ 6 ᒦᑕᔥ ᑳᐃᔑ ᑲᓅᓈᒡ ᑮᓃ Kenites ᑳᑎᓄᐎᓂᒡ ᑳᑮ ᒥᓄᑑᑕᐙᓂᒡ ᐃᔅᕒᐃᔭᓬᐊᐞ ᐄᒋᐸᑮᕽ Egypt ᑮᐱ ᐅᒌᓂᒡ, ᐅᐅ ᐁᑮᐃᓈᒡ, ᓇᑲᓂᑾᒃ ᐊᒪᓬᐁᒃ ᑳᑎᓄᐎᐙᒡ ᒋᑕᑯ ᓂᓯᑰᓯᐌᒃ ᓂᓴᑭᑣ, ᐅᑮ ᐃᓈᐞ᙮ ᒦᑕᔥ ᑳᐃᔑ ᓇᑲᓈᓂᒡ᙮ 7 ᒦᑕᔥ ᔂᓬ ᑳᑮ ᔖᑰᒋᐋᒡ ᐊᒪᓬᐁᒃ ᑳᑎᓄᐎᓂᒡ, ᐁᑮ ᒦᑳᓈᒡ ᐃᐃᒫ ᐊᐱᓬᐊ Havilah ᐊᔮᐎᓂᕽ ᐲᓂᔥ ᐌᑎ ᔐᕒ Shur ᐱᑾᑕᑲᒥᒃ, ᐙᐸᓄᕽ ᐃᓇᑫ ᐄᒋᐸᑮᕽ᙮ 8 ᐅᑮ ᑳᒋᑎᓈᓐ ᑲᔦ ᐊᒪᓬᐁᒃ ᐅᒋ ᑭᒋᐅᑭᒫᓐ ᐁᑲᒃ Agag ᐁᔑᓂᑳᓱᓂᒡ ᑭᑭᐱᒫᑎᔅ᙮ ᑲᑭᓇ ᑕᔥ ᐐᓐ ᐅᑮ ᓂᓵᐞ ᐯᒫᑎᓯᓂᒡ᙮ 9 ᑳᐐᓐ ᐃᑕᔥ ᐐᓐ ᔂᓬ, ᐃᐃ ᑲᔦ ᐅᑎᓂᓃᒪᐞ ᑳᐐᓐ ᐅᑮ ᓂᓵᓯᐙᐙᓐ ᐁᑲᑰᓐ, ᐃᐃ ᑲᔦ ᒫᐗᒡ ᐌᓂᔑᔑᓂᒡ ᒫᓇᒑᓂᔕᐞ, ᐱᔑᑭᐗᐞ ᑲᔦ, ᑳᐋᒋᐳᓂᒡ ᑲᔦ ᐱᔑᑮᓴᐞ, ᑲᑭᓇ ᓴ ᑯ ᑫᑰᓐ ᐌᓂᔑᔑᓂᓂᒃ᙮ ᑲᑭᓇ ᑕᔥ ᐐᓐ ᑫᑰᓐ ᑳᐋᓇᐌᒋᑳᑌᓂᑭᓐ, ᑫᑰᓐ ᑲᔦ ᐁᐲᑌᑖᑾᓯᓂᓂᑭᓐ ᐅᑮ ᓂᔑᐗᓈᒋᑑᓈᐙᓐ᙮ ᔂᓬ ᑮᐋᓇᐌᒋᑲᓂᐎᒡ ᐁᑭᒋᐅᑭᒫᐎᒡ 10 ᒦᑕᔥ ᐅᐅ ᓵᒥᔫ ᑳᐃᑯᒡ ᑳᑎᐯᒋᑫᓂᒡ, 11 ᐐᑫ ᓴ ᓂᒫᓀᑕᒻ ᐁᑮ ᑭᒋᐅᑭᒫᐎᐊᒃ ᐊᐊ ᔂᓬ, ᐋᓃᔥ ᑳᐐᓐ ᐋᔕ ᓂᐱᒥᓂᔕᐅᑯᓰ, ᑳᐐᓐ ᑲᔦ ᐃᔑᒋᑫᓰ ᑳᑮ ᐃᓈᑯᓇᑭᐸᓐ ᒋᐃᔑᒋᑫᒡ, ᐅᑮᐃᑰᓐ᙮ ᓵᒥᔫ ᑕᔥ ᑮᐅᒋ ᒥᑯᔥᑳᑌᑕᒻ, ᐁᑮ ᐊᓇᒥᐋᒡ ᐯᑭᔥ ᐁᑮ ᒪᐎᒡ ᐁᓈᓴᒦᓂᒡ ᑳᑎᐯᒋᑫᓂᒡ ᑲᐯᑎᐱᒃ᙮ 12 ᒦᑕᔥ ᐐᐸ ᑭᑭᔐᑉ ᓵᒥᔫ ᑳᑮ ᐗᓂᔥᑳᒡ ᐁᑮ ᐊᑕ ᓇᑭᔥᑲᐙᒡ ᔂᓬᐊᓐ ᐅᐅ ᐁᑮ ᐃᓈᐎᑎᐸᓀᓐ, ᔂᓬ ᐅᔕ ᐊᐸᓀ ᐃᔖ ᐌᑎ ᑳᕒᒪᓬ Carmel ᐗᒌᕽ᙮ ᒦ ᓴ ᐌᑎ ᑳᑮ ᐊᐎ ᐅᔑᑕᒫᓱᒡ ᑭᑭᓇᐙᒋᒋᑲᓐ ᑫᐅᒋ ᒫᒥᑲᐎᓄᑕᐙᑲᓂᐎᒡ᙮ ᐌᑎ ᑕᔥ ᐃᓇᑫ ᑭᓬᑲᓬ Gilgal ᐆᑌᓈᕽ ᑮᐊᓂ ᐃᔖ, ᑮᐃᓈᐎᑎᐸᓐ᙮ 13 ᒦᔥ ᓵᒥᔫ ᑳᑮ ᐅᑎᓵᒡ ᔂᓬᐊᓐ ᐁᔑᐊᔮᓂᒡ᙮ ᒦᑕᔥ ᐅᐅ ᑳᐃᑯᒡ, ᑭᔐᒪᓂᑑ ᓴ ᑭᑲ ᔕᐌᓂᒥᒃ, ᓂᑮ ᐃᔑᒋᑫᐙᓐ ᓴ ᑳᑮ ᐃᔑ ᐊᓅᔑᐸᓐ ᑳᑎᐯᒋᑫᒡ ᒋᐃᔑᒋᑫᐗᒃ! 14 ᒦᔥ ᓵᒥᔫ ᑳᐃᑭᑐᒡ, ᐋᓃᓐ ᑕᔥ ᐃᓈ ᐌᒋ ᓅᑕᐗᒀ ᒫᓇᒑᓂᔕᒃ ᐁᓅᑖᑯᓯᐙᒡ, ᐱᔑᑭᐗᒃ ᑕᔥ ᑲᔦ ᐁᓅᑖᑯᓯᐙᒡ? 15 ᐅᐅᔥ ᔂᓬᐊᓐ ᐅᑮᐃᑰᓐ, ᓂᔑᒫᑲᓂᔒᒪᒃ ᐅᔕ ᐅᑮ ᒪᑲᒫᐙᐞ ᐊᒪᓬᐁᒃ ᑳᑎᓄᐎᓂᒡ, ᐁᑮ ᐃᔥᑯᐋᐙᒡ ᐊᔭᐋᐎᔕᐞ ᒫᐗᒡ ᐌᓂᔑᔑᓂᒡ ᒫᓇᒑᓂᔕᐞ, ᐱᔑᑭᐗᐞ ᑲᔦ ᐁᐐ ᐸᑭᑎᓇᒪᐙᐙᒡ ᑳᑎᐯᒋᑫᓂᒡ ᑭᑭᔐᒪᓂᑑᒪᓐ, ᑯᑕᒃ ᑕᔥ ᐐᓐ ᑲᑭᓇ ᓂᑮ ᒑᑭᐋᓈᓂᒃ, ᐅᑮᐃᑰᓐ᙮ 16 ᒦᑕᔥ ᓵᒥᔫ ᑳᐃᓈᒡ ᔂᓬᐊᓐ Samuel, ᐯᑳ ᐱᓇᒫ, ᑭᐐ ᐐᑕᒪᐎᓐ ᐋᓃᓐ ᑳᑎᐯᒋᑫᒡ ᑳᐃᔑᒡ ᑎᐱᑯᕽ᙮ ᔂᓬ ᓴ ᑮᐃᑭᑐ, ᐊᐤ, ᐐᑕᒪᐎᔑᓐ᙮ 17 ᒦᔥ ᓵᒥᔫ ᑳᐃᑭᑐᒡ, ᐋᓇ ᓴ ᐐᓐ ᑮᓐ ᐃᑯ ᐋᐱᑎᕽ ᐁᑮ ᐊᑳᓭᓂᑎᓱᔭᓐ, ᑮᐊᓂ ᐃᔑᓭᓂ ᑮᓐ ᒋᐅᑭᒫᑲᑕᐗᑣ ᐃᔅᕒᐃᔭᓬᐊᒃ Israel; ᑳᑎᐯᒋᑫᒡ ᐅᔕ ᑳᑮ ᐅᓈᐸᒥᒃ ᒋᐅᑭᒫᑲᑕᐎᒪᒡ ᐃᔅᕒᐃᔭᓬᐊᐞ᙮ 18 ᑳᑎᐯᒋᑫᒡ ᐅᔕ ᑭᑮ ᐃᔑᓂᔕᐅᒃ ᑫᑰᓐ ᒋᐐ ᐃᔑᒋᑫᐗᒡ ᐁᑮ ᐃᓂᒃ, ᒫᒑᓐ ᐊᐎ ᒑᑭᐞ ᑳᒪᒑᑎᓯᐙᒡ ᐯᒫᑎᓯᐙᒡ ᐊᒪᓬᐁᒃ ᑳᑎᓄᐎᐙᒡ, ᒦᑳᔥ, ᐗᐐᑫ ᓴ ᐱᑯ ᒑᑭᐞ᙮ 19 ᐌᑯᓀᓐ ᐃᑕᔥ ᑳᐅᒋ ᓇᐃᑕᐙᓯᐗᒡ ᑳᑎᐯᒋᑫᒡ ᐃᐃ ᑳᑮ ᐃᓂᒃ; ᒦ ᓴ ᑳᐃᔑᒋᑫᔭᓐ ᐊᐗᔑᒣ ᐁᑮ ᐋᔅᑯᓀᑕᒧᐗᒡ ᐅᑕᔭᐄᒥᐙᓐ, ᐁᑮ ᐃᔑᒋᑫᔭᓐ ᓅᒋᑯ ᐁᓈᓴᒦᒡ ᑳᑎᐯᒋᑫᒡ, ᐅᑮᐃᓈᓐ᙮ 20 ᒦᔥ ᐅᐅ ᔂᓬᐊᓐ ᑳᐃᔑ ᓇᑴᑖᑯᒡ, ᓂᑮ ᓇᐃᑕᐙ ᐅᔕ ᑳᑎᐯᒋᑫᒡ, ᐁᑮ ᐃᔑᒋᑫᐗᒃ ᐋᓃᓐ ᑳᑮᐃᔑᒡ ᐊᐲ ᑮᒫᒋᓂᔕᐅᒡ, ᐁᑮ ᐲᓇᒃ ᐊᐊ ᑭᒋᐅᑭᒫ ᐁᑲᒃ Agag ᐁᔑᓂᑳᓱᒡ, ᐗᐐᑫ ᑲᔦ ᐁᑮ ᒑᑭᐊᒀ ᐊᒪᓬᐁᒃ ᑳᑎᓄᐎᐙᒡ᙮ 21 ᓂᑎᓂᓃᒪᒃ ᐃᑕᔥ ᑳᐐᓐ ᐅᑮ ᓂᓵᓯᐙᐙᐞ ᒫᓇᒑᓂᔕᐞ, ᐱᔑᑭᐗᐞ ᑲᔦ, ᑳᐐᓐ ᑲᔦ ᐅᑮ ᓂᔑᐗᓈᒋᑑᓰᓈᐙᓐ ᑫᑰᓇᓐ ᒫᐗᒡ ᐌᓂᔑᔑᓂᓂᑭᓐ᙮ ᒦᐗᓐ ᑕᔥ ᐃᓂ ᑳᒦᓂᓐᒡ ᑭᔐᒪᓂᑑ ᒋᐸᑭᑎᓈᓲᑕᒪᐎᓐᒡ ᑳᑎᐯᒋᑫᒡ ᑭᑭᔐᒪᓂᑑᒻ ᐅᐅᒫ ᐆᑌᓈᕽ ᑭᓬᑲᓬ Gilgal, ᐅᑮᐃᑰᓐ᙮ 22 ᒦᑕᔥ ᓵᒥᔫ ᑳᐃᑭᑐᒡ, ᓇᐗᒡ ᐃᓇ ᑳᑎᐯᒋᑫᒡ ᐅᒥᓉᑖᓇᓐ ᑳᐊᒀᑭᑌᓂᑭᓐ ᑳᐸᑭᑎᓇᒪᐎᓐᒡ, ᑳᐸᑭᑎᓈᓲᑕᒪᐎᓐᒡ ᑲᔦ, ᐊᐲᒡ ᐐᓐ ᒋᓇᐃᑕᐎᑎᐸᓐ ᐋᓃᓐ ᐁᑭᑐᒡ? ᐃᓇᔥᑫ ᓇᐗᒡ ᐅᔕ ᐅᓂᔑᔑᓐ ᐊᐎᔭ ᒋᓇᐃᑕᑭᐸᓐ ᐊᐲᒡ ᐐᓐ ᒋᐸᑭᑎᓈᓱᐸᓐ, ᓇᐗᒡ ᑲᔦ ᐅᓂᔑᔑᓐ ᐊᐎᔭ ᒋᐱᓯᑕᑭᐸᓐ ᐊᐲᒡ ᐐᓐ ᒋᐸᑭᑎᓂᑳᑌᓂᑭᐸᓐ ᐅᐱᒥᑌᐎᓂᐙ ᐋᐯ ᒫᓇᒑᓂᔕᒃ᙮ 23 ᐃᐃ ᓴ ᔕᔒᐱᑕᒧᐎᓐ ᒦ ᐃ ᐁᓀᑖᑾᒃ ᐃᐃ ᒪᒋᐃᔑᒋᑫᐎᓐ ᑳᑲᑲᓅᓂᑣ ᒪᓂᑑᑳᓇᒃ᙮ ᑭᒋ ᐃᓀᓂᑎᓱᐎᓐ ᓴ ᐃᓀᑖᑾᓐ ᑖᐱᔥᑰ ᐊᐎᔭ ᑳᒪᓂᑑᑫᒡ᙮ ᐁᐋᓇᐌᑕᒧᐗᒡ ᐃᑕᔥ ᑳᑎᐯᒋᑫᒡ ᑳᑮ ᐃᓂᒃ, ᑫᐐᓐ ᓴ ᑭᑖᓇᐌᓂᒥᒃ ᐅᐅ ᑳᔑ ᑭᒋᐅᑭᒫᐎᐗᒡ, ᐅᑮᐃᓈᓐ᙮ 24 ᒦᔥ ᔂᓬᐊᓐ ᑳᐃᑯᒡ, ᓂᑮ ᒪᒋᑑᑕᒻ; ᑌᐺ ᐄᓴᓐ ᓂᑮ ᒪᒫᔒᑲᑕᒧᐙᓇᓐ ᑳᑎᐯᒋᑫᒡ ᐅᑎᓈᑯᓂᑫᐎᓇᓐ, ᐃᓂ ᓴ ᑲᔦ ᑳᑮᐃᔑᔭᓐ; ᐅᓵᒻ ᐋᓃᔥ ᓂᑮ ᑯᓵᒃ ᐯᒫᑎᓯᐙᒡ, ᓂᑮ ᐱᓯᑕᐙᒃ ᑲᔦ ᐋᓃᓐ ᑳᑮᐃᔑᐙᒡ᙮ 25 ᑕᑲ ᑕᔥ ᓅᑯᒻ ᐴᓀᑕᒪᐎᔑᓐ ᐅᐅ ᑳᔑ ᒪᒋᑑᑕᒫᓐ, ᑕᑲ ᑲᔦ ᑭᑲ ᑮᐌ ᐐᒌᐎᓐ, ᒋᐊᓇᒥᐁᑕᐗᒃ ᑳᑎᐯᒋᑫᒡ, ᐅᑮᐃᑰᓐ᙮ 26 ᒦᔥ ᓵᒥᔫ ᑳᐃᓈᒡ ᔂᓬᐊᓐ, ᑳᐐᓐ ᑭᐐ ᑮᐌ ᐐᒌᐎᓯᓅᓐ; ᐅᓵᒻ ᐋᓃᔥ ᑭᑮ ᐋᓇᐌᑕᒧᐙᓐ ᑳᑮ ᐃᓂᒃ ᑳᑎᐯᒋᑫᒡ; ᑫᐐᓐ ᐄᑐᒃ ᑭᑖᓇᐌᓂᒥᒃ ᐅᐅ ᑳᔑ ᑭᒋᐅᑭᒫᑲᑕᐎᒪᒡ ᐃᔅᕒᐃᔭᓬᐊᐞ, ᐅᑮᐃᓈᓐ᙮ 27 ᐊᐲ ᑕᔥ ᓵᒥᔫ ᐁᐊᓂ ᑴᑭᑳᐸᐎᒡ ᐁᐐ ᐊᓂ ᒫᒑᒡ, ᔂᓬᐊᓐ ᐅᑮ ᑌᐱᐱᑑᓂ ᐅᑲᔥᑮᑮᐎᓐ ᐁᑮ ᐲᑯᐱᑑᓂᒡ᙮ 28 ᒦᔥ ᑳᐃᓈᒡ ᔂᓬᐊᓐ, ᑳᑎᐯᒋᑫᒡ ᐅᔕ ᑭᐲᑯᐱᑕᒫᒃ ᐃᐃ ᑭᑑᑭᒫᐎᐎᓐ ᐅᐅᒫ ᐃᔅᕒᐃᔭᓬᐃᑳᕽ ᓅᑯᒻ ᑳᑮᔑᑲᓂᓂᒃ; ᐅᒦᓈᓐ ᐅᔕ ᑮᒋᐱᒫᑎᓰᓐ ᓇᐗᒡ ᓭᓭᑳ ᐃᓂᓃᐎᓂᒡ ᐊᐲᒡ ᑮᓐ᙮ 29 ᐊᐊ ᓴ ᑫᒋ ᐃᓀᑖᑯᓯᒡ ᐃᐃᒫ ᐃᔅᕒᐃᔭᓬᐃᑳᕽ ᑳᐐᓐ ᑕᑮᐗᓂᒧᓰ, ᑳᐐᓐ ᑲᔦ ᑕᐋᑌᑕᓰ, ᑳᐐᓐ ᐄᑐᒃ ᑎᓄ ᐃᓂᓃᐎᓰ ᒋᐋᑌᑕᑭᐸᓐ, ᑮᐃᑭᑐ᙮ 30 ᒦᔥ ᔂᓬᐊᓐ ᑳᐃᑭᑐᓂᒡ, ᓃᓐ ᓴ ᓂᑮ ᒪᒋᑑᑕᒻ; ᑕᑲ ᓴ ᓅᑯᒻ ᑭᑌᓂᒥᔑᓐ ᐁᓈᓴᒦᐙᒡ ᐅᑯ ᑳᓃᑳᓂᓯᐙᒡ ᐃᔅᕒᐃᔭᓬᐊᒃ, ᐃᑭ ᑲᔦ ᐃᔅᕒᐃᔭᓬᐊᒃ᙮ ᑕᑲ ᑕᔥ ᑮᐌ ᐐᒌᐎᔑᓐ ᒋᐊᑕ ᐊᓇᒥᐁᑕᐗᒃ ᑳᑎᐯᒋᑫᒡ ᑭᑭᔐᒪᓂᑑᒻ, ᐅᑮᐃᑰᓐ᙮ 31 ᒦᑕᔥ ᓵᒥᔫ ᑳᐃᔑ ᑮᐌ ᐐᒌᐙᒡ ᔂᓬᐊᓐ, ᒦᔥ ᑲᔦ ᑳᐃᔑ ᐊᓇᒥᐁᑕᐙᓂᒡ ᑳᑎᐯᒋᑫᓂᒡ᙮ 32 ᒦᑕᔥ ᐅᐅ ᓵᒥᔫ ᑳᐃᑭᑐᒡ, ᐲᑕᒪᐎᔑᒃ ᐊᐊ ᐁᑲᒃ ᑳᑭᒋᐅᑭᒫᑲᑕᐙᒡ ᐊᒪᓬᐁᒃ ᑳᑎᓄᐎᓂᒡ᙮ ᐁᑲᑰᓐ ᐃᑕᔥ ᑮᒥᓉᑕᒨᓐ ᐁᐱ ᓈᓯᑳᑯᒡ ᐁᑮ ᐃᓀᑕᒥᓂᒡ, ᑌᐺ ᒫᐐᓐ ᑳᐐᓐ ᓂᑲ ᐐᓴᑳᐱᓇᓂᑰᓰ᙮ 33 ᒦᔥ ᐅᐅ ᓵᒥᔫ ᑳᐃᓈᒡ, ᑭᐸᔑᐸᐃᑫᐎᑯᒫᓂᕽ ᓴ ᓃᐱᐗᐞ ᐃᑴᐗᒃ ᑳᐅᒋ ᐊᔮᐙᓯᒀ ᐅᓃᒑᓂᓯᐙᐞ, ᒦ ᓴ ᐯᔑᑾᓐ ᑭᒫᒫ ᑫᐐᓐ ᑫᔑᐊᔮᐙᓯᒃ ᐅᓃᒑᓂᓴᐞ᙮ ᒦᑕᔥ ᓵᒥᔫ ᑳᐃᔑ ᐲᓯᔣᒡ ᐁᑲᑰᓐ ᐁᓈᓴᒦᓂᒡ ᑳᑎᐯᒋᑫᓂᒡ ᐃᐃᒫ ᑭᓬᑲᓬᑳᕽ᙮ 34 ᒦᑕᔥ ᐃᐃ ᓵᒥᔫ ᑳᐃᔑ ᑮᐌᒡ ᐆᑌᓈᕽ ᐅᕒᐁᒫ Ramah ᐁᒋᑳᑌᓂᒃ᙮ ᑫᐐᓐ ᐃᑕᔥ ᔂᓬ ᐅᐙᑳᐃᑲᓂᕽ ᑮᐃᔑ ᑮᐌ ᐌᑎ ᐆᑌᓈᕽ ᑮᐱᔭ Gibeah ᐁᒋᑳᑌᓂᒃ᙮ 35 ᑳᐐᓐ ᐃᑕᔥ ᓵᒥᔫ ᒦᓇᐙ ᐅᑮ ᐅᒋ ᐙᐸᒫᓰᓐ ᔂᓬᐊᓐ ᐲᓂᔥ ᐁᑮ ᐅᑎᓵᐸᑕᕽ ᐁᑮᔑᑲᓂᓂᒃ ᑮᐃᔥᒀ ᐱᒫᑎᓯᒡ; ᐋᓇ ᓴ ᐁᑮ ᒪᒪᐎᒫᒡ ᔂᓬᐊᓐ᙮ ᑳᑎᐯᒋᑫᒡ ᓴ ᑫᐐᓐ ᑮᒫᓀᑕᒻ ᐁᑮ ᑭᒋᐅᑭᒫᐎᐋᒡ ᔂᓬᐊᓐ ᒋᑎᐯᓂᒫᓂᒡ ᐃᔅᕒᐃᔭᓬᐊᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society