1 ᑭᒋᐅᑭᒫᒃ 8 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐅᑕᔓᑕᒫᑫᒪᑲᒃ ᑮᐲᒋᑳᑌᓂᒃ ᐃᐃᒫ ᑭᒋ ᐊᓇᒥᐁᐎᑲᒥᑯᕽ 1 ᑭᒋᐅᑭᒫ ᔂᓬᐊᒪᓐ Solomon ᓴ ᐅᑮ ᐅᑯᓈᐞ ᑳᓃᑳᓂᓯᓂᒡ ᐃᔅᕒᐃᔭᓬᐊᐞ Israel, ᐃᐃ ᑲᔦ ᑲᑭᓇ ᑳᑮ ᓃᑳᓂᔥᑲᐙᓂᒡ ᑳᐯᐸᑳᓉᐙᓇᑭᓯᓂᒡ ᐃᔅᕒᐃᔭᓬᐊᐞ, ᐃᐃ ᓴ ᑲᔦ ᑳᑮ ᓃᑳᓂᔥᑲᒥᓂᒡ ᑖᐎᓇᓐ᙮ ᐃᐃᒫ ᑕᔥ ᒉᕒᐆᓴᓬᐊᒥᕽ Jerusalem ᐅᑮ ᐃᔑ ᐊᑐᒫᐞ ᒋᐲᑑᓂᒡ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ᙮ ᐌᑎ ᓴ ᑌᐱᑑᓐ David ᐅᑑᑌᓈᒥᓃᕽ ᑮᐃᔑᐊᔮᓂ, ᓵᔭᓐ Zion ᑳᑮ ᐃᔑᓂᑳᑌᓂᒃ᙮ 2 ᑲᑭᓇ ᓴ ᐃᔅᕒᐃᔭᓬᐊᒃ ᐅᑮ ᐅᑯ ᓈᓯᑲᐙᐙᓐ ᑭᒋᐅᑭᒫᓐ ᔂᓬᐊᒪᓇᓐ ᐊᐲ ᑮᐊᑲᐙᑌᐃᑲᓂᑭᐙᒥ ᐐᑾᑎᕽ ᑮᐱᒪᑭᓱᓂᒡ ᓃᔣᓱᑮᓯᓲᓐ 7 ᐁᑕᓂᒻ Ethanim ᐁᓂᒥᓐᒡ᙮ 3 ᐊᐲ ᑕᔥ ᑲᑭᓇ ᑳᓃᑳᓂᓯᓂᒡ ᐃᔅᕒᐃᔭᓬᐊᐞ ᑳᐱ ᑕᑯᔑᓂᓂᒡ, ᒦᔥ ᐊᓇᒥᐁᐎᑭᒫᒃ ᑳᑮ ᐅᑖᐱᓇᒧᐙᒡ ᐃᐃ ᒪᑲᑯᓂ᙮ 4 ᒦᔥ ᑳᑮ ᐱᐃᔑᐎᑑᐙᒡ ᐃᐃ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ ᐃᐃᒫ ᑭᒋ ᐊᓇᒥᐁᐎᑲᒥᑯᕽ᙮ ᐃᐃᐌ ᑲᔦ ᒫᐗᒋᐃᑎᐎ ᐸᒀᓀᑲᒥᒃ, ᐃᓂ ᑲᔦ ᑕᑯ ᐋᐸᒋᒋᑲᓇᓐ, ᓬᐄᐹᐃ Levites ᑳᐅᑕᑳᓀᓯᐙᒡ ᓴ, ᐊᓇᒥᐁᐎᑭᒫᒃ ᑲᔦ ᐅᑮ ᐲᑎᑲᑑᓇᐙᓐ᙮ 5 ᑭᒋᐅᑭᒫ ᔂᓬᐊᒪᓐ ᑕᔥ, ᐃᑭ ᑲᔦ ᐃᔅᕒᐃᔭᓬᐊᒃ ᑲᑭᓇ ᑯ ᐃᐃᒫ ᑳᑮ ᑕᔑᐙᒡ, ᑮᐃᓈᓴᒥᑳᐸᐎᐗᒃ ᐁᔑᐊᔮᓂᒃ ᒪᑲᑯᓂ᙮ ᐋᐱᒋ ᑕᔥ ᓃᐱᐗᐞ ᐅᑮ ᐸᑭᑎᓈᓱᐙᓈᐙᐞ ᒫᓇᒑᓂᔕᐞ, ᐱᔑᑭᐗᐞ ᑲᔦ, ᑳᐐᓐ ᓴ ᑮᑌᑕᑾᑭᒫᓰᐗᐞ ᑳᐊᐲᒋ ᐹᑏᓄᓂᒡ᙮ 6 ᒦᔥ ᐊᓇᒥᐁᐎᑭᒫᒃ ᑳᑮ ᐃᔑᐎᑑᐙᒡ ᐃᐃ ᐊᔓᑕᒫᑫᒪᑲᑯᓂ ᐃᐃᒫ ᑭᒋ ᐊᓇᒥᐁᐎᑲᒥᑯᕽ ᐁᑮ ᐃᔑ ᐲᑎᑲᑑᐙᒡ ᒫᐗᒡ ᐃᑯ ᐁᔑ ᑯᑖᓀᑖᑾᓂᓂᒃ ᐲᑎᒃ᙮ ᐃᐃᒫ ᔒᐹᔭᐄ ᑳᑮ ᐃᔑ ᑌᓯᓂᑸᑲᓀᓂᓂᒡ ᒉᕒᐊᐲᐞ cherub ᐅᑮ ᐃᔑ ᐊᑑᓈᐙ᙮ 7 ᐃᑭ ᓴ ᒉᕒᐊᐲᒃ ᑳᑮ ᐃᔑ ᑌᓯᓂᑸᑲᓀᓂᐙᒡ ᐅᑮ ᐊᑲᐙᑌᔥᑳᓈᐙ ᐃᐃᒫ ᑳᔑ ᐊᑌᒃ ᐃᐃ ᒪᑲᑯᓂ, ᐅᑮ ᐋᑲᐎᔥᑳᓈᐙ ᑲᔦ᙮ ᐃᓂ ᑲᔦ ᒥᑎᑰᓐ ᑳᑮ ᐃᔑ ᐱᒥᐎᒋᑳᑌᓂᒃ ᐅᑮ ᐋᑲᐎᔥᑳᓈᐙ᙮ 8 ᐊᐎᔭ ᓴ ᑮᓃᐸᐎᒡ ᐁᓈᓴᒥᐊᔮᓂᒃ ᒫᐗᒡ ᐁᔑ ᑯᑖᓀᑖᑾᓂᓂᒃ ᐲᑎᒃ, ᐅᑮ ᐙᐸᑖᓇᓐ ᐄᑐᒃ ᐁᑳᔑᐴᔮᑾᑰᑌᓂᑭᓐ ᒥᑎᑰᓐ ᑳᑮ ᑕᓂᓂᑳᑌᓂᒃ ᐊᔓᑕᒫᑫᒪᑲᑯᓂ᙮ ᑳᐐᓐ ᓴ ᒦᓇᐙ ᐸᑳᓐ ᐃᑯᒋ ᑮᐅᒋ ᓈᑾᓯᓂᓂᐗᓐ᙮ ᐃᓂ ᓴ ᒥᑎᑰᓐ ᑫᔮᐱ ᐃᐃᒫ ᐊᔮᐗᓐ ᓅᑯᒻ ᑳᑮᔑᑲᒃ᙮ 9 ᑳᐐᓐ ᑕᔥ ᑫᑰᓐ ᐃᐃᒫ ᒪᑲᑯᕽ ᑮᐲᑌᓯᓅᓐ ᒦᐁᑕᑯ ᐃᐃ ᓃᔑᓐ ᓇᐸᑳᐱᑲᓯᓃᐞ ᒨᓯᔅ Moses ᑳᑮ ᐲᓇᐙᑯᐸᓀᓐ ᐌᑎ ᑭᒋ ᐗᒌᕽ ᐆᕒᐁᑉ Horeb ᐁᒋᑳᑌᓂᒃ᙮ ᒦ ᓴ ᐃᐌᓂ ᑳᑎᐯᒋᑫᒡ, ᐃᑭ ᑲᔦ ᐃᔅᕒᐃᔭᓬᐊᒃ ᑳᑮ ᐊᔓᑕᒪᐙᑯᐸᓀᓐ ᐊᐲ ᐃᔅᕒᐃᔭᓬᐊᒃ ᑮᐃᔥᒀ ᓵᑭᒋᐎᓂᑣ ᐌᑎ ᐄᒋᐸᑮᕽ Egypt᙮ 10 ᐃᑭ ᑕᔥ ᐊᓇᒥᐁᐎᑭᒫᒃ ᐁᑮ ᐊᓂ ᓵᑲᐊᒧᐙᒡ ᐃᐃᒫ ᐁᔑ ᑯᑖᓀᑖᑾᓂᓂᒃ ᐲᑎᒃ, ᒦ ᓴ ᐃ ᐗᑸᓂ ᑳᐃᔑ ᒨᔥᑭᓀᔮᓇᑾᓂᓂᒃ ᐃᐃᒫ ᑳᑎᐯᒋᑫᒡ ᐅᑭᒋ ᐊᓇᒥᐁᐎᑲᒥᑯᕽ᙮ 11 ᑳᐊᐲᒋ ᐙᓭᔦᑖᑾᓂᓂᒃ ᐃᑕᔥ ᑳᑎᐯᒋᑫᒡ ᐅᑕᓀᑖᑯᓯᐎᓐ ᐃᐃᒫ, ᐊᓇᒥᐁᐎᑭᒫᒃ ᓴ ᑳᐐᓐ ᐅᑮ ᑲᔥᑭᑑᓰᓈᐙ ᒋᑮᐌ ᐲᑎᑫᐙᒡ ᒋᑮ ᑑᑕᒧᐙᐸᓐ ᐅᑕᓄᑮᐎᓂᐙᓐ᙮ 12 ᒦᑕᔥ ᔂᓬᐊᒪᓐ ᑳᐃᑭᑐᒡ, ᑳᑎᐯᒋᑫᒡ ᓴ ᑮᐃᑭᑐ ᐁᐐ ᐃᔑᐊᔮᒡ ᐃᐃᒫ ᑳᔑ ᑭᐸᑳᓇᑾᓂᓂᒃ᙮ 13 ᑌᐺ ᓴ ᑭᑮ ᐅᔑᑕᒪᐎᓐ ᑫᑌᑖᑾᒃ ᑭᒋ ᐊᓇᒥᐁᐎᑲᒥᒃ, ᑖᐎᓐ ᓀᐱᒡ ᐃᑯ ᑫᑖᓄᑕᒪᓐ, ᑮᐃᑭᑐ᙮ ᔂᓬᐊᒪᓐ ᑮᑲᓅᓈᒡ ᐯᒫᑎᓯᓂᒡ ( 2 Chronicles 6.3-11 ) 14 ᒣᒀ ᑕᔥ ᐁᐊᔮᓂᒡ ᑲᑭᓇ ᐯᒫᑎᓯᓂᒡ ᐃᔅᕒᐃᔭᓬᐊᐞ Israel ᐃᐃᒫ, ᒦ ᓴ ᐃ ᔂᓬᐊᒪᓐ ᑳᑮ ᑴᑭᑳᐸᐎᒡ ᐁᑮ ᐃᓈᓴᒥᑳᐸᐎᑕᐙᒡ᙮ ᒦᑕᔥ ᑳᐃᔑ ᑲᑴᒋᒫᒡ ᑭᔐᒪᓂᑑᓐ ᒋᒥᓄᓭᐋᓂᒡ᙮ 15 ᒦᔥ ᐅᐅ ᑳᐃᑭᑐᒡ, ᑕᑲ ᓴ ᑕᒦᑴᒋᐌᓂᒫ ᑳᑎᐯᒋᑫᒡ, ᐃᔅᕒᐃᔭᓬᐊᒃ ᑳᐅᑭᔐᒪᓂᑑᒥᐙᒡ, ᐐᓐ ᐃᑕᔥ ᐃᑯ ᑳᑮ ᐃᔑᒋᑫᒡ ᐁᑮ ᒑᑭ ᑑᑕᕽ ᐃᐃ ᑳᑮ ᐃᔑ ᐊᔓᑕᒪᐙᒡ ᑌᐱᑑᓐ David ᑳᑮ ᐅᑌᑌᐗᒃ, ᐅᐅ ᑮᐃᑭᑐᑯᐸᓀᓐ᙮ 16 ᐊᐲ ᓴ ᐌᑎ ᐅᑖᓈᕽ ᑮᑮᔑᑲᓂᓂᑭᐸᓐ ᑮᓵᑭᒋᐎᓇᒀᐸᓐ ᓂᐱᒫᑎᓰᒪᒃ ᐄᒋᐸᑮᕽ Egypt, ᑳᐐᓐ ᓴ ᐊᐙᒡ ᐯᔑᒃ ᐆᑌᓇ ᓂᑮᐱ ᐅᓈᐸᑕᓰᓐ ᐲᓂᔥ ᓅᑯᒻ ᐅᐅ ᐊᐲ, ᐃᐃᒫ ᑳᑮ ᐊᔮᑭᓐ ᒥᓯᐌ ᐃᔅᕒᐃᔭᓬᐊᑮᕽ ᒋᑮ ᐃᔑ ᐅᔑᒋᑳᑌᑭᐸᓐ ᓂᑭᒋ ᐊᓇᒥᐁᐎᑲᒥᒃ ᓂᐐᓱᐎᓐ ᑫᑮ ᑕᓀᑖᑾᑭᐸᓐ᙮ ᔑᑾ ᓴ ᑕᔥ ᑌᐱᑦ ᓂᑮ ᐅᓈᐸᒫ ᒋᑎᐯᓂᒫᒡ ᓂᐱᒫᑎᓰᒪᐞ ᐃᔅᕒᐃᔭᓬᐊᐞ᙮ 17 ᒦᑕᔥ ᐅᐅ ᑳᐊᓂ ᐃᑭᑐᒡ, ᐃᓇᔥᑫ ᑕᔥ ᑌᐱᑦ ᑳᑮ ᐅᑌᑌᔮᓐ ᐅᔕ ᑮᐃᓀᑕᒨᐸᓐ ᒋᑮ ᐅᔑᑑᐸᓐ ᐙᑳᐃᑲᓂᓂ ᑫᑮ ᑕᓀᑖᑾᓂᓂᑭᐸᓐ ᑳᑎᐯᒋᑫᓂᒡ ᐅᐐᓱᐎᓂᓂ, ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ᙮ 18 ᒦᔥ ᐅᐅ ᑳᑎᐯᒋᑫᓂᒡ ᑳᐃᑯᒡ ᑌᐱᑦ ᑳᑮ ᐅᑌᑌᔮᓐ, ᐃᐃ ᓴ ᑳᔑ ᒥᓴᐌᑕᒪᓐ ᐁᐐ ᐅᔑᑑᔭᓐ ᑫᐅᑭᒋ ᐊᓇᒥᐁᐎᑲᒥᑯᔮᓐ ᑫᑕᓀᑖᑾᒃ ᓂᐐᓱᐎᓐ, ᐋᓃᔥ ᒦ ᐃ ᑾᔭᒃ ᐁᐃᓀᑕᒪᓐ ᐃᐃᒫ ᑭᑌᐃᕽ᙮ 19 ᔖᑰᒡ ᐃᑕᔥ ᑮᓐ ᑳᐐᓐ ᑭᑲ ᐅᔑᑑᓰᓐ ᓂᐙᑳᐃᑲᓐ, ᐊᐊ ᓴ ᑎᐱᓇᐌ ᑭᑯᓯᔅ ᑫᓂᑖᐎᑭᒡ, ᒦ ᓴ ᐊᐌ ᑫᐅᔑᑑᒡ ᓂᐙᑳᐃᑲᓐ ᑫᑕᓀᑖᑾᓂᓂᒃ ᓂᐐᓱᐎᓐ, ᑮᐃᑯᑯᐸᓐ᙮ 20 ᐃᓇᔥᑫ ᑕᔥ ᑳᑎᐯᒋᑫᒡ ᐋᔕ ᑲᑭᓇ ᑮᐃᔑᒋᑫ ᑳᑮ ᐃᑭᑐᒡ᙮ ᓃᓐ ᐄᑐᒃ ᑳᓈᐱᔥᑲᐗᒃ ᑌᐱᑦ David ᑳᑮ ᐅᑌᑌᔮᓐ, ᒦᑕᔥ ᐃᐃ ᑳᐅᒋ ᓇᒪᑕᐱᔮᓐ ᐅᐅᒫ ᐅᑭᒫᐗᐱᐎᓂᕽ ᐃᔅᕒᐃᔭᓬᐊᑮᕽ, ᐁᐃᔑᓭᓂᒃ ᑳᑎᐯᒋᑫᒡ ᑳᑮ ᐃᔑ ᐊᔓᑕᒫᑫᒡ᙮ ᒦ ᑲᔦ ᓃᓐ ᑳᑮ ᐅᒋ ᐅᔑᑕᒪᐗᒃ ᑳᑎᐯᒋᑫᒡ ᐅᐙᑳᐃᑲᓐ ᐅᐐᓱᐎᓐ ᑫᑕᓀᑖᑾᓂᓂᒃ, ᑳᐅᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ᙮ 21 ᓂᑮ ᐅᑎᓇᒧᐙᓐ ᑕᔥ ᑲᔦ ᑫᔑ ᐊᑌᓂᒃ ᐃᐃ ᐊᔓᑕᒫᑫᒪᑲᒃ ᑳᔑ ᐲᑌᓂᑭᓐ ᑳᑎᐯᒋᑫᒡ ᑳᑮ ᐃᔑ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᓈᐸᓃᐞ ᐊᐲ ᑮᓵᑭᒋᐎᓈᑯᐸᓀᓐ ᐌᑎ ᐄᒋᐸᑮᕽ, ᑮᐃᑭᑐ ᔂᓬᐊᒪᓐ᙮ ᔂᓬᐊᒪᓐ ᑳᑮᐃᔑᐊᓇᒥᐁᑕᐙᒡ ᑭᔐᒪᓂᑑᓐ ( 2 Chronicles 6.12-42 ) 22 ᔂᓬᐊᒪᓐ ᐃᑕᔥ ᑮᓃᐸᐎ ᐃᐃᒫ ᐁᑕᔑ ᐸᑭᑎᓈᓱᓈᓂᐗᓂᓂᒃ, ᐃᔥᐱᒥᕽ ᐃᓇᑫ ᐁᑮ ᐃᔥᐱᓂᑫᓂᒡ ᐁᑮ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ ᑲᑭᓇ ᑕᔥ ᑲᔦ ᐃᐃᒫ ᑮᐊᔮᐗᐞ ᐯᒫᑎᓯᓂᒡ᙮ 23 ᒦᑕᔥ ᐅᐅ ᑳᐃᑭᑐᒡ, ᑮᓐ ᑌᐯᒋᑫᔭᓐ ᐌᑭᔐᒪᓂᑑᒥᒥᒀ ᐃᔅᕒᐃᔭᓬᐊᒃ Israel᙮ ᑳᐐᓐ ᑯᑕᒃ ᒪᓂᑑ ᐊᔮᓰ ᒋᐃᓀᑖᑯᓯᐸᓐ ᐁᓀᑖᑯᓯᐗᒡ ᐌᑎ ᐃᔥᐱᒥᕽ ᑭᒋᑮᔑᑯᕽ, ᑲᔦ ᐅᐅᒫ ᓃᓴᔭᐄ ᐊᑮᕽ᙮ ᑭᑲᓇᐌᑖᓐ ᓴ ᐁᑑᑕᒪᓐ ᑳᑮ ᐅᔑᑕᒪᐗᑣᐸᓐ ᐊᔓᑕᒫᑫᐎᓐ ᐃᑭ ᑳᓵᑭᐊᑣ ᑭᐱᒫᑎᓰᒪᒃ ᐐᑫ ᐱᑯ ᐁᓂᑯᑯᑌᐁᐙᒡ ᑳᐃᔑᒋᑫᐙᒡ ᐁᔑ ᐊᑕᐌᑕᒧᐗᒡ᙮ 24 ᑭᑮ ᑲᓇᐌᑕᒧᐙᓐ ᑲᔦ ᑳᑮ ᐃᔑ ᐊᔓᑕᒪᐗᑎᐸᓐ ᑭᑕᓄᑮᐋᑲᓐ ᑌᐱᑦ David ᑳᑮ ᐅᑌᑌᔮᓐ᙮ ᓅᑯᒻ ᓴ ᑳᑮᔑᑲᒃ ᑭᑎᔑᒋᑫ ᑲᑭᓇ ᑫᑰᓐ ᑳᑮ ᐃᑭᑐᔭᐸᓐ᙮ 25 ᑕᑲ ᑕᔥ ᓅᑯᒻ ᑌᐯᒋᑫᔭᓐ ᐌᑭᔐᒪᓂᑑᒥᒥᒀ ᐃᔅᕒᐃᔭᓬᐊᒃ, ᑲᓇᐌᑕᓐ ᑳᑮ ᐃᔑ ᐊᔓᑕᒪᐗᑎᐸᓐ ᑳᑮ ᐅᑌᑌᔮᓐ ᑌᐱᑦ ᐅᐅ ᑮᐃᓈᐗᑎᐸᓀᓐ, ᑳᐐᓐ ᓴ ᐐᑳ ᑕᐸᓂᓭᓯᓅᓐ ᐯᔑᒃ ᑭᐲᐌᓰᒻ ᒋᐊᓂ ᓇᒪᑕᐱᒡ ᑭᑑᑭᒫᐗᐱᐎᓂᕽ ᑫᑎᐯᓂᒫᒡ ᐃᔅᕒᐃᔭᓬᐊᐞ, ᑮᔥᐱᓐ ᑯᑕ ᑭᑯᓯᓴᒃ ᐌᐌᓂ ᐃᔑᒋᑫᐙᒡ ᑾᔭᒃ ᒋᔑ ᐱᒧᓭᐙᒡ ᐁᓈᓴᒦᐗᒃ ᑖᐱᔥᑰ ᑮᓐ ᑳᐱ ᐃᔑ ᐱᒧᓭᐗᒡ᙮ 26 ᐌᑭᔐᒪᓂᑑᒥᒥᒀ ᐃᔅᕒᐃᔭᓬᐊᒃ, ᑕᑲ ᓴ ᑕᔥ ᓅᑯᒻ ᑕᐃᔑᓈᑾᓐ ᒋᒨᔥᑭᓀᓭᒃ ᑳᑮ ᐃᔑ ᐊᔓᑕᒪᐗᑎᐸᓐ ᑭᑕᓄᑮᐋᑲᓐ ᑌᐱᑦ ᓂᑌᑌᐸᓐ᙮ 27 ᑯᓂᑫ ᑕᔥ ᑫᔐᒪᓂᑑᐎᔭᓐ ᑌᐺ ᐅᐅᒫ ᐊᑮᕽ ᑭᑖ ᐃᔑᑖ? ᐃᓇᔥᑫ ᐃᐃ ᑮᔑᒃ ᐋᓇ ᑭᒋ ᐃᔥᐹᒃ, ᑳᐐᓐ ᑌᐃᓂᑯᒀᓯᓅᓐ ᐃᐃᒫ ᒋᐊᔮᔭᓐ! ᐋᓃᓐ ᐃᑕᔥ ᐃᓈ ᐅᐅ ᐙᑳᐃᑲᓐ ᑳᐅᔑᑑᔮᓐ ᑫᔑ ᑌᐃᓂᑯᒀᑭᐸᓐ ᒋᑌᐸᔥᑭᓀᔭᓐ? 28 ᑌᐯᒋᑫᔭᓐ ᓂᑭᔐᒪᓂᑑᒻ, ᓃᓐ ᐄᑐᒃ ᑭᑕᓄᑮᐋᑲᓐ᙮ ᐱᓯᑕᐎᔑᓐ ᐋᓃᓐ ᐁᔑ ᑲᑴᒋᒥᓈᓐ, ᐃᔑᒋᑫᑕᒪᐎᔑᓐ ᑲᔦ ᐋᓃᓐ ᑳᔑ ᑲᑴᒋᒥᓈᓐ ᓅᑯᒻ ᑳᑮᔑᑲᒃ᙮ 29 ᑲᓇᐙᐸᑕᓐ ᓴ ᒋᑲᓇᐌᑕᒪᓐ ᐅᐅ ᑭᒋ ᐊᓇᒥᐁᐎᑲᒥᒃ ᑮᔑᑲᒃ, ᑎᐱᑲᒃ ᑲᔦ᙮ ᒦ ᐄᑐᒃ ᐃᐃ ᑳᑮᐃᑕᒪᓐ, ᒦ ᓴ ᐃᐌ ᑫᑕᓀᑖᑾᒃ ᓂᐐᓱᐎᓐ᙮ ᓅᑕᐎᔑᓐ ᐃᑕᔥ ᑮᐊᓇᒥᐋᔮᓐ ᐊᐲ ᑮᐃᓈᓴᒥᑖᔮᓐ ᐁᔑᐊᔮᒃ ᐅᐅ ᑭᒋ ᐊᓇᒥᐁᐎᑲᒥᒃ᙮ 30 ᓅᑕᐎᔑᓐ ᐁᔑ ᐊᓇᒥᐁᑕᐎᓈᓐ, ᐃᑭ ᑲᔦ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ ᐅᐅᒫ ᓇᑫ ᑮᐃᓈᓴᒥᑖᐙᒡ ᐁᔑᐊᔮᓂᒃ ᑭᒋ ᐊᓇᒥᐁᐎᑲᒥᑯᓂ᙮ ᐌᑎ ᓴ ᑭᒋᑮᔑᑯᕽ ᐁᔑᑖᔭᓐ ᐅᒋ ᓅᑕᓐ, ᐊᐲ ᑕᔥ ᓅᑕᒪᓐ, ᒦᔥ ᐃᔑ ᐴᓀᑕᒫᑫᑲᓐ᙮ 31 ᐊᐲ ᓴ ᐃᓂᓂ ᑮᒫᔑ ᑑᑕᐙᒡ ᐐᒋᐱᒫᑎᓰᓐ, ᐲᒋᑲᓂᐎᒡ ᐃᑕᔥ ᐁᔑᐊᔮᓂᒃ ᑭᐸᑭᑎᓈᓱᐎᓈᐱᒃ ᒋᐊᐱᒧᒡ ᐁᐐ ᐃᑭᑐᒡ ᑫᑰᓐ ᐁᔑ ᐊᓈᒣᑖᑯᓯᓯᒃ, 32 ᑮᓐ ᑌᐯᒋᑫᔭᓐ ᑭᒋᑮᔑᑯᕽ ᐅᒋ ᓅᑕᓐ ᐌᐌᓂ ᑫᒋᓈᒡ ᒋᐃᓈᑯᓇᑣ ᑭᑕᓄᑮᐋᑲᓇᒃ᙮ ᓇᓇᐊᔑ ᓴ ᐊᐊ ᑳᑌᐱᒥᓐᒡ ᐅᒪᒫᔑ ᐐᓐ ᐃᑯ ᑳᑮ ᑲᔥᑭᑕᒫᓱᒡ, ᐸᑭᑎᓐ ᐃᑕᔥ ᐐᓐ ᐊᐊ ᑳᑌᐱᒫᓯᐎᓐᒡ ᐁᑮ ᒪᒫᔒᓯᒃ᙮ 33 ᐊᐲ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ ᑮᔖᑰᒋᐃᑯᐙᒡ ᑳᔒᑫᓂᒥᑯᐙᒡ, ᐅᓵᒻ ᐋᓃᔥ ᐁᑮ ᒪᒋᑑᑕᐎᒀ; ᐊᐲ ᑕᔥ ᑮᐌᓄᑕᐎᒀ ᐅᐅᒫ ᑕᔥ ᐲᔖᐙᒡ ᑭᒋ ᐊᓇᒥᐁᐎᑲᒥᑯᕽ, ᑭᐐᓱᐎᓂᕽ ᐃᑕᔥ ᐃᓇᑫ ᐃᔑ ᐐᑕᒧᐙᒡ ᐁᑮ ᒪᒋᐃᔑᒋᑫᐙᒡ, ᐊᓇᒥᐁᑕᐎᒀ ᑲᑴᒋᒥᒀ ᒋᐴᓀᑕᒪᐗᑣ, 34 ᑭᒋᑮᔑᑯᕽ ᓴ ᐅᒋ ᓅᑕᐤ ᒋᐴᓀᑕᒪᐗᑣ ᐅᒪᒋᐃᔑᒋᑫᐎᓂᐙᓐ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ, ᒋᐱᑮᐌᐎᓇᑣ ᑲᔦ ᐊᑮᓂ ᑳᑮ ᒦᓂᒪᑎᐸᓐ ᐅᑫᑌᔭᐋᒥᐙᐞ᙮ 35 ᐊᐲ ᑲᔦ ᑮᐃᔑᒋᑫᔭᓐ ᒋᑭᒥᐗᓯᓄᒃ ᐅᓵᒻ ᐋᓃᔥ ᐁᒪᒋᑑᑕᐎᒀ ᑭᐱᒫᑎᓰᒪᒃ, ᐊᐲ ᑕᔥ ᐅᐅᒫ ᐃᓈᓴᒥᑖᐙᒡ ᑭᒋ ᐊᓇᒥᐁᐎᑲᒥᑯᕽ ᑭᐐᓱᐎᓂᕽ ᐃᑕᔥ ᐃᔑ ᐐᑕᒧᐙᒡ ᐅᒪᒋᑑᑕᒧᐎᓂᐙᓐ ᐌᐌᓂ ᑕᔥ ᐁᑲᑴᒋᒥᒀ ᒋᐴᓀᑕᒪᐗᑣ, 36 ᒦ ᓴ ᐃ ᑭᒋᑮᔑᑯᕽ ᐅᒋ ᓅᑕᐤ, ᒋᐴᓀᑕᒪᐗᑣ ᑭᑕᓄᑮᐋᑲᓇᒃ, ᑭᐱᒫᑎᓰᒪᒃ ᐃᔅᕒᐃᔭᓬᐊᒃ᙮ ᑭᑭᓄᐊᒪᐤ ᑾᔭᒃ ᒋᐱᒫᑎᓯᐙᒡ᙮ ᐃᔑᒋᑫᓐ ᒋᑭᒥᐗᕽ ᐅᐅᒫ ᐊᑮᕽ ᑳᑮ ᒦᓇᑣ ᑭᐱᒫᑎᓰᒪᒃ ᒋᑎᐱᓇᐌᐎᓯᐙᒡ᙮ 37 ᐊᐲ ᑕᔥ ᑲᔦ ᒦᒋᒥᑳᓯᓄᒃ ᐅᐅᒫ ᐊᑮᕽ, ᑯᒫ ᑲᔦ ᑭᒋ ᐗᓯᑖᐎᓭᒃ, ᑯᒫ ᑲᔦ ᑭᑎᑳᓇᓐ ᐅᒋ ᓂᔑᐗᓈᑕᑭᓐ ᐅᓵᒻ ᐁᑭᔑᓅᐌᒃ, ᑯᒫ ᑲᔦ ᐅᓵᒻ ᐹᑏᓄᐙᒡ ᐸᐸᑭᓀᒃ, ᑯᒫ ᑲᔦ ᑳᔒᑫᓂᒥᑯᐙᒡ ᐙᑳᔥᑲᒥᓂᒡ ᐅᑑᑌᓈᒥᐙᓐ, ᑯᒫ ᑲᔦ ᑭᒋ ᐃᔑᐌᐸᒃ ᑯᒫ ᑲᔦ ᐋᑯᓯᐎᓐ ᐊᔮᒪᑲᒃ, 38 ᓅᑕᐤ ᓴ ᐁᔑ ᐊᓇᒥᐁᑕᐎᒀ, ᐁᔑ ᑲᑴᒋᒥᒀ ᑲᔦ ᑭᐱᒫᑎᓰᒪᒃ᙮ ᑮᔥᐱᓐ ᐊᐌᓀᓐ ᐃᑯ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ ᐅᑌᐃᕽ ᐅᒋ ᒨᔑᐅᒡ ᐁᒫᓀᑕᕽ, ᐃᔑ ᑌᓯᓂᑫᓂᒡ ᑲᔦ ᐊᓇᒥᐋᒡ ᐅᐅᒫ ᓇᑫ ᐁᔑᐊᔮᓂᒃ ᑭᒋ ᐊᓇᒥᐁᐎᑲᒥᒃ, 39 ᑭᒋᑮᔑᑯᕽ ᓴ ᐅᒋ ᓅᑕᐤ ᐁᔑᑖᐗᒡ᙮ ᐴᓀᑕᒪᐤ, ᐐᒋᐞ ᑲᔦ᙮ ᑮᓐ ᐄᑐᒃ ᐁᑕ ᑭᑭᑫᓂᒫ ᐊᐎᔭ ᐁᓀᑕᕽ ᐅᑌᐃᕽ᙮ ᑑᑕᐤ ᓴ ᑯ ᐊᐎᔭ ᐋᓃᓐ ᐁᔑ ᑲᔥᑭᑕᒫᓱᒡ᙮ 40 ᒦᑕᔥ ᐃᐃ ᒋᑯᑖᓀᓂᒥᒀ ᑭᐱᒫᑎᓰᒪᒃ ᒥᓂᒃ ᐃᑯ ᑫᑖᐙᒡ ᐃᐃᒫ ᐊᑮᕽ ᑳᑮ ᒦᓂᒪᑎᐸᓐ ᐅᑫᑌᔭᐋᒥᐙᐸᓃᐞ᙮ 41-42 ᐊᐲ ᓴ ᐊᐊ ᐲᐎᑌ ᐙᓴ ᐊᑮᕽ ᐁᔮᒡ ᓅᑕᕽ ᐁᑕᔑᑌᓂᒃ ᑭᐐᓱᐎᓐ, ᐋᓃᓐ ᑲᔦ ᑳᐃᔑ ᑭᒋ ᐃᔑᒋᑫᑕᒪᐎᒪᒡ ᑭᐱᒫᑎᓰᒪᐞ, ᐲᔖᒡ ᐃᑕᔥ ᐅᐅᒫ ᑭᒋ ᐊᓇᒥᐁᐎᑲᒥᑯᕽ ᐁᐐ ᐊᓇᒥᐁᑕᐎᒃ, 43 ᑭᒋᑮᔑᑯᕽ ᐁᔑᑖᐗᒡ ᐅᒋ ᓅᑕᐤ᙮ ᐃᔑᒋᑫᐤ ᐋᓃᓐ ᐃᑯ ᐁᔑ ᑲᑴᒋᒥᒃ ᐊᐊ ᑳᐲᐎᑌᐎᒡ, ᒦᔥ ᑲᑭᓇ ᐯᒫᑎᓯᐙᒡ ᐅᐅᒫ ᐊᑮᕽ ᒋᑭᑫᑕᒧᐙᒡ ᑭᐐᓱᐎᓐ, ᒋᑯᑖᓀᓂᒥᒀ ᑲᔦ ᑖᐱᔥᑰ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ ᑳᐃᔑᒋᑫᐙᒡ᙮ ᒦᑕᔥ ᒋᑭᑫᑕᒧᐙᒡ ᐅᐅ ᑭᒋ ᐊᓇᒥᐁᐎᑲᒥᒃ ᑳᑮ ᐅᔑᑑᔮᓐ, ᒦ ᐃᒫ ᐁᑕᓀᑖᑾᒃ ᑭᐐᓱᐎᓐ᙮ 44 ᐊᐲ ᓴ ᑭᐱᒫᑎᓰᒪᒃ ᑮᐊᑕ ᒦᑳᓈᐙᒡ ᑳᔒᑫᓂᒥᑯᐙᒡ, ᐋᑎ ᐱᑯ ᐁᔑᓂᔕᐗᑣ, ᐊᓇᒥᐁᑕᐎᒀ ᑕᔥ, ᑯᒫ ᓴ ᐁᓈᓴᒥᑖᐙᑴᓐ ᐃᓇᑫ ᐁᔑᐊᔮᓂᒃ ᐅᐅ ᑭᒋ ᐆᑌᓈᓂ ᑳᑮ ᐅᓈᐸᑕᒧᐗᒡ, ᐅᐅ ᑲᔦ ᑭᒋ ᐊᓇᒥᐁᐎᑲᒥᒃ ᑳᑮ ᐅᔑᑕᒪᐎᓈᓐ, 45 ᑭᒋᑮᔑᑯᕽ ᓴ ᐅᒋ ᓅᑕᐤ ᐁᔑ ᐊᓇᒥᐋᐙᒡ ᐁᔑ ᑲᑴᒋᒥᒀ ᑲᔦ᙮ ᒦᓈᑲᓐ ᐃᑕᔥ ᒋᔖᑰᒋᑣᐙᒡ᙮ 46 ᐊᐲ ᓴ ᑲᔦ ᑭᐱᒫᑎᓰᒪᒃ ᒪᒋᑑᑕᐎᒀ, ᑳᐐᓐ ᐄᑐᒃ ᐊᐎᔭ ᐊᔮᓰ ᐐᑳ ᒣᒋ ᑑᑕᓯᒃ, ᐁᑮ ᓂᔥᑭᐃᒀ ᑕᔥ ᐃᔑ ᐸᑭᑎᓇᑣ ᒋᔖᑰᒋᐃᑯᐙᒡ ᑳᔒᑫᓂᒥᑯᐙᒡ, ᐃᔑᐎᓂᑣ ᑕᔥ ᒥᓴᐙ ᑯ ᐙᓴ ᐊᑮᕽ ᐁᑕᑯᓂᑲᓂᐎᐙᒡ, 47 ᓅᑕᐤ ᓴ ᐁᔑ ᐊᓇᒥᐁᑕᐎᒀ᙮ ᑮᔥᐱᓐ ᓴ ᐌᑎ ᐙᓴ ᐊᑮᕽ ᑕᔑ ᑴᑳᑎᓯᐙᒡ, ᐊᓇᒥᐁᑕᐎᒀ, ᐐᑕᒪᐎᒀ ᐋᓃᓐ ᐁᔑ ᒪᒋᑑᑕᒧᐙᒡ, ᐋᓃᓐ ᑲᔦ ᐁᔑ ᒪᒋᐃᔑᐌᐱᓯᐙᒡ, ᑮᓐ ᑌᐯᒋᑫᔭᓐ ᓅᑕᐤ ᐁᔑ ᐊᓇᒥᐁᑕᐎᒀ᙮ 48 ᑮᔥᐱᓐ ᓴ ᑯ ᐁᓂᑯᑯᑌᐁᐙᒡ, ᐅᑕᒑᑯᐙᕽ ᑲᔦ ᐃᔑ ᑮᐌ ᓈᓯᑲᐎᒀ ᐌᑎ ᐅᑕᑮᒥᓃᕽ ᑳᔒᑫᓂᒥᑯᐙᒡ ᐁᑕᔑ ᑕᑯᓂᑲᓂᐎᐙᒡ, ᒦᑕᔥ ᐃᔑ ᐊᓇᒥᐁᑕᐎᒀ ᐃᓈᓴᒥᑖᐙᒡ ᐃᓇᑫ ᐁᔑᐊᔮᓂᒃ ᐊᑮᓂ ᑳᑮ ᒦᓂᒪᒡ ᐅᑫᑌᔭᐋᒥᐙᐸᓃᐞ, ᐅᐅᒫ ᑲᔦ ᓇᑫ ᐁᔑᐊᔮᓂᒃ ᑭᒋ ᐆᑌᓇ ᑳᑮ ᐅᓈᐸᑕᒧᐗᒡ, ᐅᐅᒫ ᑲᔦ ᓇᑫ ᐁᔑᐊᔮᓂᒃ ᑭᒋ ᐊᓇᒥᐁᐎᑲᒥᒃ ᑳᑮ ᐅᔑᑕᒪᐎᓈᓐ᙮ 49 ᑭᒋᑮᔑᑯᕽ ᐁᔑᑖᔭᓐ ᓴ ᐅᒋ ᓅᑕᐤ ᐁᐊᓇᒥᐁᑕᐎᒀ᙮ ᐃᔑᒋᑫᐤ ᓴ ᐁᔑ ᑲᑴᒋᒥᒀ᙮ 50 ᐴᓀᑕᒪᐤ ᑭᐱᒫᑎᓰᒪᒃ ᑳᑮ ᒪᒋᑑᑕᐎᒀ᙮ ᐴᓀᑕᒪᐤ ᑲᑭᓇ ᑳᑮ ᐃᔑ ᒪᒫᔒᑲᑕᐎᒀ, ᑑᑕᐎᒻ ᑲᔦ ᑳᑮ ᔖᑰᒋᐃᑯᐙᒡ ᒋᑰᐹᑌᓂᒥᑯᐙᒡ᙮ 51 ᑮᓐ ᐄᑐᒃ ᐃᑭ ᑭᐱᒫᑎᓰᒪᒃ ᑳᑎᐱᓇᐌᐎᓰᒪᑣ, ᐄᒋᐸᑮᕽ Egypt ᑳᑮ ᐅᒋ ᓵᑭᒋᐎᓇᑣ, ᐁᓀᑖᑾᓂᓂᒃ ᑭᒋ ᐴᑕᐙᓈᐱᑯᕽ ᑳᔑ ᓂᑭᓯᑳᑌᒃ ᐲᐙᐱᒃ᙮ 52 ᑮᓐ ᑳᒫᐗᒋ ᑎᐯᒋᑫᔭᓐ, ᑕᑲ ᓴ ᒨᔕᒃ ᓅᑕᐤ ᑭᑕᓄᑮᐋᑲᓐ ᐁᔑ ᑲᑴᒋᒥᒃ, ᐃᑭ ᑲᔦ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ, ᒋᐱᓯᑕᐗᑣ ᐋᓃᓐ ᐃᑯ ᐊᐲ ᑮᔖᑯᐙᓂᒀ᙮ 53 ᑮᓐ ᐄᑐᒃ ᑭᑮ ᐅᒋ ᐅᓈᐸᒫᒃ ᒋᐸᑳᓀᑖᑯᓯᐙᒡ ᑫᐅᐱᒫᑎᓰᒥᔭᓐ ᑫᑎᐱᓇᐌᐎᓯᔭᓐ ᐁᔑᐊᔮᓂᒡ ᑲᑭᓇ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ᙮ ᒦ ᐄᑐᒃ ᑳᑮ ᐃᓇᑎᐸᓐ ᒨᓯᔅ Moses ᑭᑕᓄᑮᐋᑲᓐ ᒋᐃᑭᑐᑯᐸᓀᓐ ᐊᐲ ᐄᒋᐸᑮᕽ ᑮᐅᒋ ᓵᑭᒋᐎᓇᑣ ᓂᑫᑌᔭᐋᒥᓈᐸᓃᒃ, ᑮᐃᔑ ᐊᓇᒥᐋ ᔂᓬᐊᒪᓐ᙮ ᔂᓬᐊᒪᓐ ᐃᔥᒀᒡ ᑳᑮᐃᔑᐊᓇᒥᐋᒡ 54 ᐊᐲ ᑕᔥ ᔂᓬᐊᒪᓐ Solomon ᐅᐅ ᐁᑮ ᐃᔑ ᐃᔥᒀ ᐊᓇᒥᐁᑕᐙᒡ ᐁᑮ ᑲᑴᒋᒫᒡ, ᒦ ᓴ ᑳᐃᔑ ᐸᓯᑸᒡ ᐁᔑᐊᔮᓂᒃ ᐁᔑ ᐸᑭᑎᓈᓲᑕᒪᐎᒥᓐᒡ ᑳᑎᐯᒋᑫᓂᒡ᙮ ᒦ ᐄᑐᒃ ᐃᐃᒫ ᑳᑮ ᐃᔑ ᐅᒋᒌᑾᓇᐱᒡ ᐃᔥᐱᒥᕽ ᐃᓇᑫ ᐁᑮ ᐃᔑ ᑌᓯᓂᑫᓂᒡ᙮ 55 ᒦᑕᔥ ᑳᐃᔑ ᓃᐸᐎᒡ ᐁᑮᐃᓈᒡ ᒋᔕᐌᑖᑯᓯᓂᒡ ᑲᑭᓇ ᐌᑸᓄᓂᒡ ᐃᔅᕒᐃᔭᓬᐊᐞ Israel ᐅᐅ ᐁᑮᐃᓈᒡ ᐁᓂᑯᒃ, 56 ᑕᑲ ᑕᒦᑴᒋᐌᑖᑯᓯ ᑳᑎᐯᒋᑫᒡ ᑳᑮ ᐊᓉᐱᐋᒡ ᐅᐱᒫᑎᓰᒪᐞ ᐃᔅᕒᐃᔭᓬᐊᐞ ᑳᑮ ᐃᔑ ᐊᔓᑕᒫᑫᒡ᙮ ᑳᐐᓐ ᓴ ᑲᓇᑫ ᐯᔑᒃ ᐅᑎᑭᑐᐎᓐ ᒋᑆᓇᐎᒋᑫᒪᑲᓂᓂᒃ ᑲᑭᓇ ᑳᑮ ᐃᔑ ᒥᓄ ᐊᔓᑕᒫᑫᑯᐸᓀᓐ ᑮᐊᓅᓈᑯᐸᓀᓐ ᐅᑕᓄᑮᐋᑲᓇᓐ ᒨᓯᓲᓐ Moses ᐅᐅ ᒋᐃᑭᑐᓂᒡ᙮ 57 ᑕᑲ ᑳᑎᐯᒋᑫᒡ ᑭᑭᔐᒪᓂᑑᒥᓈᓐ ᑭᑲ ᐐᒌᐎᑯᓈᓐ ᑳᑮ ᐃᔑ ᐐᒌᐙᒡ ᑭᑫᑌᔭᐋᒥᓈᐸᓃᐞ᙮ ᑕᑲ ᑳᐐᓐ ᑭᑲ ᓇᑲᓂᑯᓰᓈᓐ, ᑳᐐᓐ ᑲᔦ ᑭᑲ ᐌᐱᓂᑯᓰᓈᓐ᙮ 58 ᐅᑲ ᐃᔑᑑᓐ ᑭᑌᐃᓈᓂᓐ ᒋᑴᑮᓄᑖᑯᒡ, ᒋᔑ ᐱᒧᓵᑕᒧᐗᕽ ᒥᓯᐌ ᐁᔑᑣᒡ᙮ ᒋᑲᓇᐌᑕᒧᐗᕽ ᑲᔦ ᐅᑑᓇᔓᐌᐎᓇᓐ, ᐅᑎᑭᑐᐎᓇᓐ ᑲᔦ, ᐊᓇᒥᐁᐎ ᐃᓈᑯᓂᑫᐎᓇᓐ ᑲᔦ ᑳᑮ ᒦᓈᒡ ᑭᑫᑌᔭᐋᒥᓈᐸᓃᐞ᙮ 59 ᑕᑲ ᑲᔦ ᐅᓄ ᐁᑭᑐᐗᒃ ᑳᑮ ᐃᔑ ᐊᓇᒥᐁᑕᐗᒃ ᑳᑎᐯᒋᑫᒡ, ᒨᔕᒃ ᒋᒫᒥᑲᐎᒡ ᑳᑎᐯᒋᑫᒡ ᑭᑭᔐᒪᓂᑑᒥᓈᓐ ᐁᑕᓱ ᑮᔑᒃ, ᐁᑕᓱ ᑎᐱᒃ ᑲᔦ᙮ ᐐᓐ ᓴ ᒋᑰᐹᓯᓇᐙᒡ ᐁᔑ ᓅᑌᓭᓂᒡ ᐁᑕᓱ ᑮᔑᒃ ᐅᑕᓄᑮᐋᑲᓇᓐ, ᐃᐃ ᑲᔦ ᑲᑭᓇ ᐃᔅᕒᐃᔭᓬᐊᐞ᙮ 60 ᒦᑕᔥ ᑲᑭᓇ ᐯᒫᑎᓯᐙᒡ ᐅᐅᒫ ᐊᑮᕽ ᒋᑭᑫᑕᒧᐙᒡ ᑳᑎᐯᒋᑫᓂᒡ ᐁᑭᔐᒪᓂᑑᐎᓂᒡ, ᑯᑕᒃ ᑲᔦ ᐸᑳᓐ ᐁᐊᔮᓯᓂᒃ᙮ 61 ᑕᑲ ᓴ ᑕᔥ ᐐᑫ ᐱᑯ ᑭᑌᐃᐙᕽ ᐃᔑ ᑌᐸᑫᓂᒥᒃ ᑳᑎᐯᒋᑫᒡ ᑭᑭᔐᒪᓂᑑᒥᓈᓐ ᒋᔑ ᐱᒧᓭᐌᒃ ᐁᑭᑐᒡ, ᒋᓇᐃᑕᒧᐌᒃ ᑲᔦ ᐁᓈᑯᓂᑫᒡ, ᓅᑯᒻ ᑳᑮᔑᑲᒃ ᑳᐱᔑ ᐱᒧᓭᔦᒃ ᐲᓂᔥ, ᐅᑮᐃᓈᓐ᙮ ᔂᓬᐊᒪᓐ ᑮᑭᑌᑖᑯᑑᒡ ᑭᒋ ᐊᓇᒥᐁᐎᑲᒥᒃ ( 2 Chronicles 7.4-10 ) 62 ᒦᑕᔥ ᔂᓬᐊᒪᓐ Solomon ᐃᐃ ᑲᔦ ᑲᑭᓇ ᐃᔅᕒᐃᔭᓬᐊᐞ Israel ᑳᑮ ᐐᒌᐎᑯᒡ ᑳᐃᔑ ᐸᑭᑎᓈᓲᑕᒪᐙᐙᒡ ᑳᑎᐯᒋᑫᓂᒡ᙮ 63 ᓃᔥᑕᓇᔑᓃᔑᓐ ᒥᑖᔂᒃ 22,000 ᓴ ᐱᔑᑭᐗᐞ, ᓂᑯᑣᒃ ᓃᔥᑕᓇ ᑕᓯᕽ ᒥᑖᔂᒃ 120,000 ᒫᓇᒑᓂᔕᐞ ᑲᔦ ᐅᑮ ᐸᑭᑎᓈᓱᐙᑫᓈᐞ, ᐁᑮ ᐸᑭᑎᓇᕽ ᑎᓄ ᐌᒋ ᒥᓄ ᐐᒌᑎᕽ᙮ ᒦᔥ ᑲᔦ ᑭᒋᐅᑭᒫ, ᐃᐃ ᑲᔦ ᑳᑮ ᐐᒌᐎᑯᒡ ᐃᔅᕒᐃᔭᓬᐊᐞ ᑳᑮ ᐃᔑᒋᑫᐙᒡ ᐁᑮ ᑭᑌᑖᑯᑑᐙᒡ ᐁᒦᓈᐙᒡ ᑳᑎᐯᒋᑫᓂᒡ ᐃᐃ ᑭᒋ ᐊᓇᒥᐁᐎᑲᒥᑯᓂ᙮ 64 ᒦᔥ ᑲᔦ ᐃᐃ ᐁᑮᔑᑲᓂᓂᒃ ᔂᓬᐊᒪᓐ ᑳᐃᔑ ᑭᑌᑖᑯᑑᒡ ᓈᐗᔭᐄ ᐁᔑ ᐙᑳᔮᐱᑭᓂᑳᑌᓂᒃ ᐁᓈᓴᒪᑭᑌᓂᒃ ᐅᑭᒋ ᐊᓇᒥᐁᐎᑲᒥᑯᓂ ᑳᑎᐯᒋᑫᓂᒡ᙮ ᒦᔥ ᑳᑮ ᐸᑭᑎᓇᕽ ᐸᑭᑎᓈᓱᐎᓇᓐ ᑎᓄ ᐌᒋ ᒥᓄ ᐐᒌᑎᕽ ᑳᐊᒀᑭᓯᑳᑌᒃ ᐸᑴᔑᑲᓂᒥᓂᐎ ᐸᑭᑎᓈᓱᐎᓐ ᑲᔦ, ᑲᔦᔥ ᐊᔭᐋᐎᔑᐱᒥᑌ ᐸᑭᑎᓈᓱᐎᓐ᙮ ᒦᑕᔥ ᐅᐅ ᑳᑮ ᐅᒋ ᐃᔑᒋᑫᒡ ᐅᓵᒻ ᐋᓃᔥ ᑮᐊᑳᓯᓂᓂ ᐃᐃ ᐌᓵᐙᐱᑲᓂᓂᒃ ᐁᔑ ᐸᑭᑎᓈᓱᐎᓐᒡ, ᐁᑮ ᑌᐱᓯᓯᓂᓂᑭᓐ ᐅᓄ ᑲᑭᓇ ᐸᑭᑎᓈᓱᐎᓇᓐ᙮ 65 ᒦᑕᔥ ᐅᐅ ᓇᑫ ᔂᓬᐊᒪᓐ ᑳᐃᔑ ᐐᑾᑏᐗᑲᒥᑭᓯᒡ ᐃᐃ ᐊᐲ, ᐃᐃ ᑲᔦ ᑲᑭᓇ ᐃᔅᕒᐃᔭᓬᐊᐞ᙮ ᐐᑫ ᓴ ᑮᐹᑏᓄᐗᐞ ᐯᒫᑎᓯᓂᒡ ᐃᐃᒫ ᑳᑮ ᐊᔮᓂᒡ ᐁᑮ ᐅᒌᓂᒡ ᑮᐌᑎᓄᕽ ᐁᒪᑦ Hamath ᐆᑌᓈᕽ ᐲᓂᔥ ᐌᑎ ᐁᔑ ᔖᐗᓄ ᓰᐲᐗᓂᓂᒃ ᐄᒋᐸᑮᓂ ᑳᐅᒋ ᒫᒋᓭᓂᒃ᙮ ᑮᐐᑾᑏᐗᑲᒥᑭᓯᐗᒃ ᓴ ᐁᓈᓴᒦᓂᒡ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ ᓃᔣᓱᑮᔑᒃ, ᐲᓂᔥ ᒥᑖᔑᓃᐎᑮᔑᒃ ᐁᑮ ᐊᓂ ᐃᔑᓭᓂᒃ᙮ 66 ᐁᐊᓂ ᐙᐸᓂᓂᒃ ᐃᑕᔥ ᒦ ᐃ ᑳᐃᔑ ᑮᐌᓂᔕᐙᒡ᙮ ᒦᔥ ᑲᑭᓇ ᑳᐃᔑ ᒦᑴᒋᐌᓂᒥᑯᒡ, ᐁᑮ ᐊᓂ ᑮᐌᓂᒡ ᐐᑫ ᐁᑮ ᒌᑫᑕᒥᓂᒡ, ᐋᓃᔥ ᑮᒫᒥᑲᐎᐗᐞ ᐋᓃᓐ ᑳᑎᐯᒋᑫᓂᒡ ᑳᐃᔑ ᒥᓄᑑᑕᐙᓂᒡ ᑌᐱᑑᓐ David, ᐃᐃ ᑲᔦ ᐅᐱᒫᑎᓰᒥᓂ ᐃᔅᕒᐃᔭᓬᐊᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society