1 ᑭᒋᐅᑭᒫᒃ 21 - ᐅᒋᐺ ᑭᒋᒪᓯᓇᐃᑲᓐᓀᑄᑦ ᐁᔑᑭᑎᑳᓈᒡ ᔔᒥᓇᐞ ᐁᑕᔑᑌᓂᒃ 1 ᓈᓈᑫ ᑕᔥ ᐁᐊᓂ ᐊᔨᔑᓭᓂᒃ, ᓀᑄᑦ Naboth ᐃᓂᓂ ᐁᔑᓂᑳᓱᒡ ᑮᐅᒌ ᐆᑌᓈᕽ ᒉᔅᕒᐄᔭᓬ Jezreel ᐁᒋᑳᑌᓂᒃ᙮ ᐃᐃ ᓴ ᑳᑮ ᐃᔑ ᑭᑎᑳᓈᒡ ᔔᒥᓇᐞ ᑮᐃᔑᐊᔮᓂ ᐃᐃᒫ ᐆᑌᓈᕽ ᒉᔅᕒᐄᔭᓬᐃᕽ᙮ ᒦ ᓴ ᐃᒫ ᐃᔑ ᐅᐱᒣ ᑳᑮ ᐃᔑᐊᔮᓂᒃ ᐅᑑᑭᒫᐎᑲᒥᑯᓂ ᑭᒋᐅᑭᒫᓐ ᐁᐋᐴᓐ Ahab ᐌᒌᓂᒡ ᐆᑌᓈᕽ ᓴᒣᕒᐃᔭ Samaria᙮ 2 ᐁᐋᑉ ᑕᔥ ᐅᑮᐃᓈᓐ ᓀᑄᑑᓐ, ᑕᑲ ᒦᔑᔑᓐ ᐃᐃ ᑳᔑ ᑭᑎᑳᓇᑣ ᔔᒥᓇᒃ, ᐁᐐ ᐃᔑ ᑭᑎᑳᑕᒫᓐ ᒦᒋᒻ, ᐯᔓ ᐄᑐᒃ ᐃᐃᒫ ᐃᔑᐊᔮ ᓂᑑᑭᒫᐎᑲᒥᑯᕽ᙮ ᒣᔥᑾᒡ ᑕᔥ ᑭᑲ ᒦᓂᓐ ᓇᐗᒡ ᒋᐅᓂᔑᔑᒃ ᑫᔑ ᑭᑎᑳᓇᑣ ᔔᒥᓇᒃ᙮ ᑮᔥᐱᓐ ᓴ ᐃᔑᐊᑕᐌᑕᒪᓐ, ᑭᑲ ᒦᓂᓐ ᓴ ᔔᓂᔮ, ᒥᓂᒃ ᐃᑯ ᑫᐃᓇᑭᑕᒪᓐ, ᐅᑮᐃᓈᓐ᙮ 3 ᒦᑕᔥ ᐅᐅ ᓀᑄᑑᓐ ᑳᐃᔑ ᓇᑴᑖᑯᒡ, ᑳᐐᓐ ᐅᔕ ᑳᑎᐯᒋᑫᒡ ᑕᐃᓀᑕᓰ ᒋᒦᓂᓈᐹᓐ ᓂᑌᑌᕽ ᑳᑮ ᐅᒋ ᑎᐱᓇᐌᐎᓯᔮᓐ, ᐅᑮᐃᑰᓐ᙮ 4 ᒦᑕᔥ ᐁᐋᑉ ᑳᐃᔑ ᑮᐌᒡ ᐁᑮ ᓂᔥᑫᑕᕽ, ᐁᑮ ᓂᔥᑳᑎᓯᒡ ᑲᔦ ᐋᓃᔥ ᐅᑮᐃᑰᓐ ᓀᑄᑑᓐ ᒉᔅᕒᐄᔭᓬᐃᓂᓂᐗᓐ, ᑳᐐᓐ ᑭᑖ ᒦᓂᓯᓅᓐ ᓂᑌᑌᕽ ᑳᐅᒋ ᑎᐱᓇᐌᐎᓯᔮᓐ᙮ ᑮᐅᔑᔑᓐ ᑕᔥ ᐅᓂᐯᐎᓂᕽ ᐁᑮ ᓂᔥᑫᑕᕽ, ᑳᐐᓐ ᑲᔦ ᑮᐐᓯᓂᓰ᙮ 5 ᐐᐗᓐ ᑕᔥ ᒉᓴᐯᓬ Jezebel ᐁᔑᓂᑳᓱᓂᒡ ᑮᐱ ᐲᑎᑫᐗᓐ ᐁᑮᐃᑯᒡ, ᐌᑯᓀᓐ ᐃᑕᔥ ᐌᒋ ᓂᔥᑫᑕᒪᓐ, ᐌᑯᓀᓐ ᑲᔦ ᐌᒋ ᐐᓯᓂᓯᐗᓐ? ᐅᑮᐃᑰᓐ᙮ 6 ᒦᔥ ᑳᐃᔑ ᓇᑴᑕᐙᒡ, ᓂᑖᓇᑮᐃᓈ ᐅᔕ ᓀᑄᑦ ᒉᔅᕒᐄᔭᓬᐃᓂᓂ ᒋᑮ ᐊᑖᒪᑭᐸᓐ ᐃᐃ ᑳᔑ ᑭᑎᑳᓈᒡ ᔔᒥᓇᐞ, ᑯᒫ ᑲᔦ ᐃᓀᑕᑭᐸᓐ ᐯᑳᓇᑎᓂᓂᒃ ᐁᐐ ᒦᓇᑭᐸᓐ ᑫᔑ ᑭᑎᑫᒡ᙮ ᒦᑕᔥ ᐅᐅ ᑳᐃᔑᒡ, ᑳᐐᓐ ᑭᑖ ᒦᓂᓯᓅᓐ ᐃᐃ ᑳᑎᐯᑕᒫᓐ ᑳᔑ ᑭᑎᑳᓇᒀ ᔔᒥᓇᒃ᙮ 7 ᒦᔥ ᐅᐅ ᐐᐗᓐ ᒉᓴᐯᓬᐊᓐ ᑳᐃᑯᒡ, ᒦ ᓇ ᐃᐌ ᑫᐃᔑᒋᑫᐸᓐ ᑭᒋᐅᑭᒫ ᑳᑎᐯᓂᒫᒡ ᐃᔅᕒᐃᔭᓬᐊᐞ Israel᙮ ᐗᓂᔥᑳᓐ, ᐐᓯᓂᓐ ᑲᔦ᙮ ᐃᓇᔥᑫ ᓃᓐ ᑭᑲ ᐅᑎᓇᒪᐎᓐ ᐃᐃᐌᓂ ᑳᔑ ᑭᑎᑫᒡ ᐊᐊ ᓀᑄᑦ, ᐅᑮᐃᑰᓐ᙮ 8 ᒦᑕᔥ ᒉᓴᐯᓬ ᑳᐃᔑ ᒫᒌᐲᐃᑫᒡ ᐁᐋᐴᓐ ᐅᐐᓱᐎᓂᓂ ᐁᑮ ᐋᐸᒋᑑᒡ, ᐅᑭᑭᓇᐙᒋᐲᐃᑲᓂᓂ ᑲᔦ ᐁᑮ ᐋᐸᒋᑑᒡ᙮ ᐃᐃ ᓴ ᑳᓃᑳᓂᓯᓂᒡ, ᑫᒋ ᐃᓀᑖᑯᓯᓂᒡ ᐌᑎ ᐁᔮᓂᒡ ᐆᑌᓈᕽ ᒉᔅᕒᐄᔭᓬ ᐅᑮ ᐅᔑᐲᐊᒪᐙᐞ᙮ ᒦ ᓴ ᐅᐌ ᑳᐃᔑᐲᐊᒪᐙᒡ᙮ 9 ᒦᑕᔥ ᐅᐅ ᑳᐃᑭᑑᒪᑲᓂᓂᒃ ᐅᑑᔑᐲᐃᑲᓐ, ᑕᑲ ᐃᔑᑮᔑᑲᓄᑫᒃ ᒋᐐᓯᓂᓈᓂᐗᓯᓄᒃ ᒋᐊᓇᒥᐋᕽ᙮ ᓀᑄᑦ ᑕᔥ ᐃᔑ ᓇᒪᑕᐱᐋᑫᒃ ᑫᔑ ᐊᐱᓂᒡ ᑳᑭᑌᑖᑯᓯᓂᒡ ᐯᒫᑎᓯᓂᒡ᙮ 10 ᓃᔑᓐ ᑕᔥ ᑲᔦ ᓅᒋᑯ ᐃᓂᓂᐗᒃ ᐃᔑ ᓇᒪᑕᐱᐋᑫᒀᓂᒃ ᓇᐹᒋᓇᑫ ᑫᔑ ᐊᐱᒡ ᓀᑄᑦ᙮ ᒦᐗᒃ ᓴ ᐃᑭ ᑫᐃᓈᒋᒫᐙᒡ ᓀᑄᑑᓐ ᐁᑮ ᒪᒋᐃᓈᐱᓀᒫᓂᒡ ᑭᔐᒪᓂᑑᓐ, ᑭᒋᐅᑭᒫᓐ ᑲᔦ᙮ ᒦᑕᔥ ᑫᔑ ᓵᑭᓯᐁᒃ ᒋᐸᐲᒶᓯᓇᐃᓐᒡ ᒋᓃᐗᓇᐃᑲᓂᐎᒡ, ᒦ ᐃ ᑳᐃᔑᐲᐃᑫᒡ᙮ 11 ᒦᑕᔥ ᐃᑭ ᑳᓃᑳᓂᓯᐙᒡ, ᐃᑭ ᑲᔦ ᑳᑭᒋ ᐃᓀᑖᑯᓯᐙᒡ ᐃᐃᒫ ᐆᑌᓈᕽ ᒉᔅᕒᐄᔭᓬᐃᕽ ᓀᑄᑑᓐ ᐁᔑᐊᔮᒡ ᑳᐃᔑᒋᑫᐙᒡ ᑳᑮ ᐃᔑᐲᐊᒫᑯᐙᒡ ᒉᓴᐯᓬᐊᓐ᙮ 12 ᒦᑕᔥ ᑳᐃᔑᑮᔑᑲᓄᑫᓈᓂᐗᓂᓂᒃ ᒋᐐᓯᓂᓈᓂᐗᓯᓄᒃ ᒋᐊᓇᒥᐋᕽ᙮ ᓀᑄᑑᓐ ᓴ ᐅᑮ ᐃᔑ ᐅᓇᐱᐋᐙᓐ ᐁᔑ ᐊᐱᓂᒡ ᑫᒋ ᐃᓀᑖᑯᓯᓂᒡ ᐯᒫᑎᓯᓂᒡ᙮ 13 ᒦᔥ ᐃᐃ ᓃᔑᓐ ᓅᒋᑯ ᐃᓂᓂᐗᐞ ᑮᐲᑎᑫᐗᐞ ᓇᐹᒡ ᐁᑮ ᐃᔑ ᐊᐱᓂᒡ ᓀᑄᑑᓐ ᐁᔑ ᐊᐱᒡ᙮ ᒦᑕᔥ ᐃᐃ ᓃᔑᓐ ᐃᓂᓂᐗᐞ ᑳᑮ ᑎᐹᒋᒫᓂᒡ ᐃᓂ ᓀᑄᑑᓐ ᐃᐃᒫ ᑳᑮ ᐃᔑ ᐹᑏᓄᓈᓂᐗᓂᓂᒃ ᐅᐅ ᐁᑮ ᐃᑭᑐᓂᒡ, ᓀᑄᑦ ᐅᔕ ᐅᑮ ᒪᒋᐃᓈᐱᓀᒫᓐ ᑭᔐᒪᓂᑑᓐ, ᑭᒋᐅᑭᒫᓐ ᑲᔦ᙮ ᒦᔥ ᓀᑄᑑᓐ ᑳᐃᔑ ᓵᑭᒋᐎᓂᒥᓐᒡ ᐃᐃᒫ ᐆᑌᓈᕽ, ᐁᑮ ᐸᐲᒶᓯᓇᐃᒥᓐᒡ ᐁᑮ ᓃᐗᓇᐃᑲᓂᐎᓂᒡ᙮ 14 ᒦᑕᔥ ᑳᐃᔑ ᐅᔑᐲᐊᒪᐎᓐᒡ ᒉᓴᐯᓬ ᐁᑮᐃᓂᓐᒡ, ᓀᑄᑦ ᓴ ᑮᐸᐲᒶᓯᓇᐋ, ᒦᔥ ᑳᐃᔑ ᓂᐳᒡ᙮ 15 ᐊᐲ ᑕᔥ ᒉᓴᐯᓬ ᑳᓅᑕᕽ ᐁᑮ ᓃᐗᓇᐅᒥᓐᒡ ᓀᑄᑑᓐ ᐊᓯᓃᐞ ᐁᑮ ᐋᐸᑎᓯᓂᒡ; ᒦ ᓴ ᑳᐃᓈᒡ ᐅᓈᐯᒪᓐ ᐁᐋᐴᓐ, ᒫᒑᓐ ᐃᑕᔥ ᐊᐎᐅᑖᐱᓇᓐ ᐃᐃ ᓀᑄᑦ ᒉᔅᕒᐄᔭᓬᐃᓂᓂ ᑳᔑ ᑭᑎᑳᓈᒡ ᔔᒥᓇᐞ, ᑳᑮ ᐐ ᒦᓂᓯᓄᑭᐸᓐ ᐋᓇᐐᒦᓇᑎᐸᓐ ᔔᓂᔮᓐ᙮ ᓀᑄᑦ ᐅᔕ ᑳᐐᓐ ᐱᒫᑎᓯᓰ, ᑮᓂᐳ ᐄᑐᒃ, ᐅᑮᐃᓈᓐ᙮ 16 ᐊᐲ ᑕᔥ ᐁᐋᑉ ᑳᓅᑕᕽ ᐁᐱᒫᑎᓯᓯᓂᒃ ᓀᑄᑑᓐ, ᑮᐃᔖ ᓴ ᑳᑮ ᐃᔑ ᓂᑖ ᑭᑎᑫᓂᐸᓐ ᓀᑄᑑᓐ ᐁᑮ ᑎᐱᓇᐌᐎᓯᒡ ᐃᐃ ᑭᑎᑳᓇᑲᒥᒃ᙮ 17 ᐃᓬᐋᐃᒐ Elijah ᑕᔥ ᑎᔑᐲ Tishbite ᑳᑮ ᐅᒌᒡ, ᑳᑎᐯᒋᑫᓂᒡ ᐅᑮᐃᑰᓐ, 18 ᒫᒑᓐ ᐊᑕ ᓇᑭᔥᑲᐤ ᐁᐋᑉ ᑳᑭᒋᐅᑭᒫᐎᒡ ᐃᔅᕒᐃᔭᓬᐊᑮᕽ, ᑭᒋ ᐆᑌᓈᕽ ᓴᒣᕒᐃᔭ ᑳᐅᒌᒡ᙮ ᐃᓇᔥᑫ ᓴ ᐌᑎ ᐊᔮ ᑳᑮ ᐃᔑ ᓂᑖ ᑭᑎᑳᓈᓂᐸᓐ ᔔᒥᓇᐞ ᓀᑄᑑᓐ᙮ ᒦᔥ ᑳᐅᒋ ᐃᔖᒡ ᐐᓐ ᐃᑯ ᐁᐐ ᑎᐱᓇᐌᐎᓯᒡ᙮ 19 ᒦᑕᔥ ᐅᐅ ᑫᐃᓇᒡ, ᐅᐅ ᓴ ᑭᑎᒃ ᑳᑎᐯᒋᑫᒡ, ᑭᑮ ᓂᔑᐌ ᓇ, ᑭᑮ ᒪᑲᑗ ᓇ ᑲᔦ ᑮᓐ ᐃᑯ ᐁᐐ ᑎᐱᓇᐌᐎᓯᔭᓐ᙮ ᒦᔥ ᐅᐅ ᑫᓂᐃᓇᒡ, ᐃᐃᒫ ᓴ ᑳᑮ ᐃᔑ ᓅᔅᒀᑕᐊᒥᓂᒡ ᐊᓂᒨᐞ ᓀᑄᑦ ᐅᒥᔅᑸᒻ, ᒦ ᓴ ᐃᒫ ᑫᑮᓐ ᐊᓂᒨᒃ ᑫᔑ ᓅᔅᒀᑕᐊᒧᐙᒡ ᑭᒥᔅᑸᒻ, ᑮᓐ ᑯᑕ ᑳᐃᓂᒃ, ᐃᓈᑲᓐ, ᐅᑮᐃᑰᓐ᙮ 20 ᒦᔥ ᐃᓬᐋᐃᒐ ᑳᐃᑯᒡ ᐁᐋᐴᓐ, ᑫᑲᐲ ᓇ ᑭᒥᑲᐎᔥ, ᑳᔒᑫᓂᒥᓈᓐ! ᒦᔥ ᐅᐅ ᐃᓬᐋᐃᒐ ᑳᐃᓈᒡ, ᐁᔭᐞ, ᑭᒥᑲᐎᓐ, ᐅᓵᒻ ᐋᓃᔥ ᑭᑎᔑᐸᑭᑎᓂᑎᔅ ᐁᐐ ᒪᒋᑑᑕᒪᓐ ᐁᓈᓴᒦᒡ ᑳᑎᐯᒋᑫᒡ᙮ 21 ᒦᔥ ᐅᐅ ᐁᓂᒃ ᑳᑎᐯᒋᑫᒡ, ᐃᓇᔥᑫ ᓴ ᒫᓄ ᑭᐐ ᐃᔑᓭᐃᓐ ᒋᒫᔑᓭᔭᓐ, ᐗᐐᑫ ᑲᔦ ᓂᐐ ᓂᔑᐗᓈᒋᐋᒃ ᑭᐲᐌᓰᒪᒃ ᑳᐃᓂᓃᐎᐙᒡ ᒥᓴᐙ ᑯ ᑌᐯᓂᑎᓱᐙᑴᓐ, ᑯᒫ ᑲᔦ ᑌᐯᓂᒫᐎᑣᐌᓐ! 22 ᒦ ᓴ ᑲᔦ ᐙᑑᑕᒫᓐ ᑭᑖᐎᓐ ᑖᐱᔥᑰ ᑳᑮ ᐃᔑᓈᑾᓂᓂᒃ ᐆᑖᐎᓐ ᒉᕒᐆᐴᐊᒻ Jeroboam ᑳᑮ ᐅᑌᑌᒡ ᓃᐸᑕᓐ Nebat, ᑲᔦᔥ ᐯᔮᔕ Baasha ᑳᑮ ᐅᑌᑌᒡ ᐋᐊᐃᒐᐗᓐ Ahijah, ᐋᓃᔥ ᑭᑮ ᑲᑳᒋᐃᔥ ᒋᓂᔥᑳᑎᓯᔮᓐ, ᑮᓐ ᑲᔦ ᐅᒋ ᑳᐅᒋ ᒪᒋᑑᑕᒧᐙᒡ ᐃᔅᕒᐃᔭᓬᐊᒃ᙮ 23 ᐊᐊ ᑕᔥ ᐐᓐ ᒉᓴᐯᓬ ᑳᐃᓂᓐᒡ ᐃᑴ, ᐅᐅ ᓴ ᑳᑎᐯᒋᑫᓂᒡ ᐅᑎᑰᓐ, ᐊᓂᒨᒃ ᓴ ᐅᑲ ᑭᑕᒸᐙᓐ ᒉᓴᐯᓬᐊᓐ ᐃᐃᒫ ᐆᑌᓈᕽ ᒉᔅᕒᐄᔭᓬ Jezreel ᐁᒋᑳᑌᓂᒃ᙮ 24 ᐃᑭ ᓴ ᑭᑎᓇᐌᒫᑲᓇᒃ ᐆᑌᓈᕽ ᑫᑕᔑ ᓂᐳᐙᒡ, ᐊᓂᒨᐞ ᓴ ᐅᑲ ᑭᑕᒧᑯᐙᐞ᙮ ᐃᑭ ᑕᔥ ᐐᓐ ᓅᐱᒪᑲᒥᒃ ᑫᑕᔑ ᓂᐳᐙᒡ ᒥᑕᔅᑭᑎᒀᓀᓯᐗᐞ ᐅᑲ ᑭᑕᒧᑯᐙᐞ, ᐅᑮᐃᓈᓐ᙮ 25 ᑳᐐᓐ ᓴ ᐐᑳ ᐃᓂᓂ ᑮᐱ ᐃᔑᐊᔮᓰ ᑖᐱᔥᑰ ᐁᐋᑉ ᑳᑮ ᐸᑭᑎᓂᑎᓱᒡ ᒫᓄ ᐁᐐ ᒪᒋᑑᑕᕽ ᐁᓈᓴᒦᓂᒡ ᑳᑎᐯᒋᑫᓂᒡ᙮ ᐐᐗᓐ ᓴ ᒉᓴᐯᓬ ᐁᔑᓂᑳᓱᓂᒡ ᐅᑮ ᑲᑳᓱᒥᑰᓐ ᐃᐃ ᒋᑑᑕᕽ᙮ 26 ᒫᐗᒡ ᐃᑕᔥ ᐃᑯ ᐁᐋᑉ ᑮᑭᒋ ᒪᒋᑑᑕᒻ, ᐁᑮ ᐱᒥᓂᔕᐙᒡ ᒪᓂᑑᑳᓇᐞ ᐁᑮ ᐃᔑᒋᑫᒡ ᐁᔑᒋᑫᓂᒡ ᐁᒧᕒᐄ ᑳᑎᓄᐎᓂᒡ Amorites᙮ ᒦᐗᒃ ᐄᑐᒃ ᐃᐃ ᑳᑎᐯᒋᑫᒡ ᑳᑮ ᓵᑭᑖᒪᐙᒡ ᒣᒀ ᐃᔅᕒᐃᔭᓬᐊᐞ ᑮᐊᓂ ᐲᑎᑫᔥᑳᓂᒡ ᐃᐃᒫ ᐃᔅᕒᐃᔭᓬᐊᑮᕽ᙮ 27 ᐊᐲ ᑕᔥ ᐁᐋᑉ ᑳᓅᑕᕽ ᐋᓃᓐ ᑳᑮᐃᓂᓐᒡ, ᒦ ᓴ ᑳᐃᔑ ᑖᔥᑮᑭᐱᑑᒡ ᐅᑭᑭᔥᑭᑲᓇᓐ᙮ ᒦᔥ ᑳᐃᔑ ᐱᓯᑲᕽ ᐊᓴᐸᑕᐲᐌᑭᓄᐗᔮᓐ, ᐁᑮ ᐐᓯᓂᓯᒃ ᑲᔦ ᐁᑮ ᐊᓇᒥᐋᒡ᙮ ᒦᔥ ᑲᔦ ᐃᒫ ᑳᐃᔑ ᐱᒥᔑᕽ ᐊᓴᐸᑕᐲᐌᑭᓄᕽ, ᐁᑮ ᐸᐹᒧᓭᒡ ᑲᔦ ᐐᑫ ᑮᐗᓯᑖᐌᑕᒧᐎᓈᑯᓯ᙮ 28 ᒦᔥ ᐃᓬᐋᐃᒐ ᑎᔑᐲ ᑳᐅᒌᒡ ᑳᐃᑯᒡ ᑳᑎᐯᒋᑫᓂᒡ, 29 ᑭᐙᐸᒫ ᓇ ᐁᐋᑉ ᐋᓃᓐ ᐁᐲᒋ ᐗᓯᑖᐌᑕᒧᐎᓈᑯᓯᒡ ᐁᓈᓴᒦᐗᒃ? ᐁᑕᐸᓭᓂᒧᒡ ᐃᑕᔥ ᐁᓈᓴᒦᐗᒃ, ᑳᐐᓐ ᓴ ᐃᑕᐙ ᓂᐐ ᒪᒋᓭᐋᓰ ᒥᓂᒃ ᑫᐱᒫᑎᓯᒡ᙮ ᐹᓂᒫ ᓴ ᐅᑯᓯᓯᕽ ᓂᑳᔑ ᒫᔑᓭᑖᐙᓐ ᐃᐃ ᐅᑖᐎᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society