1 ᑭᒋᐅᑭᒫᒃ 18 - ᐅᒋᐺ ᑭᒋᒪᓯᓇᐃᑲᓐᐃᓬᐋᐃᒐ, ᐃᑭ ᑲᔦ ᑳᑲᓅᑕᒪᐙᐙᒡ ᒪᓂᑑᑳᓇᓐ ᐯᔭᓬ ᐁᑕᔑᒥᑣ 1 ᓈᓈᑫ ᑕᔥ ᓂᓱᐱᐴᓐ 3 ᐁᑮ ᐊᓂ ᐅᒋᒋᓭᓂᒃ, ᑳᑎᐯᒋᑫᓂᒡ ᐃᓬᐋᐃᒐ Elijah ᐅᑮᐃᑰᓐ, ᒫᒑᓐ ᓴ ᐊᑕ ᐙᐸᒻ ᑭᒋᐅᑭᒫ ᐁᐋᑉ Ahab᙮ ᒦᑕᔥ ᐃᐃ ᒋᐃᔑᒋᑫᔮᓐ ᒋᑭᒥᐗᒃ, ᐅᑮᐃᑰᓐ᙮ 2 ᒦᑕᔥ ᐃᓬᐋᐃᒐ ᑳᐃᔑ ᒫᒑᒡ ᐁᑮ ᐊᑕ ᐙᐸᒫᒡ ᐁᐋᐴᓐ᙮ ᐃᐃᒫ ᓴ ᐊᑮᕽ ᓴᒣᕒᐃᔭ Samaria ᐁᒋᑳᑌᒃ ᐊᐲ ᑮᐊᔮᓯᓄᒃ ᒦᒋᒻ, ᐐᑫ ᓴ ᑮᑲᒀᑕᑫᑖᑾᓐ᙮ 3 ᐁᐋᑉ ᓴ ᐅᑮ ᑲᓅᓈᓐ ᐃᓂᓂᐗᓐ ᐆᐸᑖᔭ Obadiah ᐁᔑᓂᑳᓱᓂᒡ ᑳᑮ ᓈᓈᑲᒋᑑᓂᒡ ᐅᑑᑭᒫᐎᑲᒥᒃ᙮ ᐆᐸᑖᔭ ᓴ ᐐᑫ ᐅᑮ ᑯᑖᓀᓂᒫᑯᐸᓐ ᑳᑎᐯᒋᑫᓂᒡ᙮ 4 ᒦ ᓴ ᑳᐃᔑᒋᑫᑯᐸᓀᓐ ᐊᐲ ᒉᓴᐯᓬᐊᓐ Jezebel ᑮᓂᓵᓂᒡ ᐃᓂᓂᐗᐞ ᑳᑮ ᑲᓅᑕᒪᐙᓂᒡ ᑭᔐᒪᓂᑑᓐ, ᓂᑯᑣᒃ 100 ᐄᑐᒃ ᐆᐸᑖᔭ ᑮᑳᓈᑯᐸᓐ ᐃᐃ ᐅᑲᓅᑕᒫᑫᐞ᙮ ᓀᓈᓂᒥᑕᓇ 50 ᓴ ᐅᑮ ᐃᔑ ᓀᓈᐎᓈᑯᐸᓐ ᑳᔑ ᐗᐐᐹᐱᑳᓂᒃ ᐁᑮ ᐃᔑ ᑳᓈᑯᐸᓀᓐ᙮ ᑮᐊᔕᒫᑯᐸᓐ ᑕᔥ ᑲᔦ ᐸᑴᔑᑲᓇᓐ, ᓂᐲᓂ ᑲᔦ ᑮᒥᓇᐋᑯᐸᓐ᙮ 5 ᐁᐋᑉ ᑕᔥ ᐅᑮᐃᓈᓐ ᐆᐸᑖᔭᐗᓐ, ᑕᑲ ᒫᒑᓐ, ᒥᓯᐌ ᐅᐅᒫ ᐊᑮᕽ ᐃᔖᓐ ᑳᔑ ᒪᒨᑭᒋᐗᕽ ᓂᐱ, ᑳᔑ ᐸᐸᓴᑎᓈᒃ ᑲᔦ᙮ ᒫᑭᔕ ᑭᑲ ᒥᑳᓐ ᑫᔑ ᒪᔥᑯᓰᑳᒃ ᑫᔑ ᑲᓇᐌᓂᒪᒀ ᒥᑕᑎᒨᒃ, ᔔᔔᒥᑕᑎᒨᒃ ᑲᔦ ᑫᐅᑖᑎᓯᐙᒡ, ᑫᒋᓈᒡ ᒋᓂᓵᓯᐗᒀ ᑭᑕᐗᑳᓂᓈᓂᒃ, ᐅᑮᐃᓈᓐ᙮ 6 ᒦᑕᔥ ᑳᐃᔑ ᓀᓈᐎᓇᒫᑎᐙᒡ ᐃᐃ ᐊᑮᓂ ᐋᓃᓐ ᐙᐃᓂᔥᑳᐙᒡ᙮ ᐁᐋᑉ ᓴ ᐸᑳᓐ ᑮᐃᔑ ᒫᒑ ᐁᑮ ᐯᔑᑯᒡ᙮ ᐆᐸᑖᔭ ᑕᔥ ᑫᐐᓐ ᐸᑳᓐ ᐃᓇᑫ ᑮᐃᔑ ᒫᒑ ᑫᐐᓐ ᐁᑮ ᐯᔑᑯᒡ᙮ 7 ᒦᔥ ᐆᐸᑖᔭ Obadiah ᐁᐊᓂ ᐱᒧᓭᒡ ᑳᑮ ᓇᑭᔥᑲᐙᒡ ᐃᓬᐋᐃᒐᐗᓐ᙮ ᔐᒫᒃ ᐃᑯ ᐅᑮ ᓂᓯᑕᐎᓇᐙᓐ᙮ ᒦᔥ ᑳᐃᔑ ᐊᓂᒥᑯᑖᒡ ᒥᑕᑲᒥᒃ ᐁᑮ ᐃᑭᑐᒡ, ᑮᓐ ᐃᓇ ᐃᓬᐋᐃᒐ ᓂᑑᑭᒫᒻ᙮ 8 ᒦᑕᔥ ᑳᐃᑯᒡ, ᐁᔭᐞ, ᓃᓐ ᐃᓬᐋᐃᒐ᙮ ᑕᑲ ᐊᐎ ᐐᑕᒪᐤ ᑭᑑᑭᒫᒻ ᒋᐃᓇᒡ, ᐃᓇᔥᑫ ᓴ ᓈ, ᐃᓬᐋᐃᒐ ᐅᔕ ᐅᒫ ᐊᔮ᙮ 9 ᐆᐸᑖᔭ Obadiah ᑕᔥ ᑮᐃᑭᑐ, ᐋᓃᓐ ᐃᑕᔥ ᑳᐃᔑ ᒪᒫᔒᔮᓐ ᐌᒋ ᐊᑕᐌᓂᒥᔭᓐ ᒋᓂᔑᒡ ᐊᐊ ᑭᒋᐅᑭᒫ ᐁᐋᑉ᙮ 10 ᑫᒋᓈᒡ ᐃᑯ ᐁᑫᒋᓈᐅᔮᓐ ᑳᑎᐯᒋᑫᒡ ᑭᑭᔐᒪᓂᑑᒻ ᐐᓐ ᒥᓯᐌ ᐁᑎᐯᒋᑫᒡ, ᒦ ᐃ ᐁᐲᒋ ᑫᒋᓈᐁᑕᒫᓐ ᑭᒋᐅᑭᒫ ᒥᓯᐌ ᐅᐅᒫ ᐊᑮᕽ ᐁᐃᔑ ᓇᓈᑐᓀᐅᒃ᙮ ᐃᓂ ᓴ ᑌᐯᑕᒥᓂᒡ ᐸᑳᓐ ᐊᑮᓂ ᑮᐃᑭᑐᐗᓐ ᐃᑯᒋ ᐁᐊᔮᐙᓯᐗᒡ; ᒦ ᓴ ᐁᐋᑉ ᐁᑑᑕᐙᒡ ᐃᐃ ᐯᒫᑎᓯᓂᒡ ᑌᐯᑕᒥᓂᒡ ᐊᑮᓂ, ᐁᑮ ᐊᐱᒧᐋᒡ ᑌᐺ ᐁᑮ ᒥᑳᑰᐙᓯᐗᒡ ᐅᑕᑮᒥᓃᕽ᙮ 11 ᒦᑕᔥ ᐅᐅ ᓅᑯᒻ ᐁᔑᔭᓐ, ᒫᒑᓐ ᐊᐎ ᐃᔑ ᑭᑑᑭᒫᒻ ᑭᒋᐅᑭᒫ, ᐃᓬᐋᐃᒐ ᓴ ᐅᒫ ᐊᔮ᙮ 12 ᐃᓇᔥᑫ ᓇᑲᓂᓈᓐ ᐅᐅᒫ, ᑫᒋᓈᒡ ᓴ ᑳᑎᐯᒋᑫᒡ ᐅᑕᒑᑾᓐ ᑭᑲ ᒫᒌᓂᒃ, ᑳᐐᓐ ᑕᔥ ᓂᑲ ᑭᑫᑕᓰᓐ ᐋᓃᑎ ᑫᐊᔮᔭᓐ᙮ ᐊᐲ ᑕᔥ ᐐᑕᒪᐗᒃ ᐁᐋᑉ ᐅᐅᒫ ᐁᐊᔮᐗᒡ, ᒥᑲᐎᓯᓄᒃ ᐃᑕᔥ, ᒦ ᓴ ᐃ ᒋᓂᔑᒡ᙮ ᓃᓐ ᐄᑐᒃ ᑭᑕᓄᑮᐋᑲᓐ ᐃᓀᑖᑾᓐ, ᐁᐅᔥᑳᑎᓯᔮᓐ ᐁᑮ ᐅᒋ ᒫᒌ ᑯᑖᓀᓂᒪᒃ ᑳᑎᐯᒋᑫᒡ᙮ 13 ᑳᐐᓐ ᐃᓇ ᑕᔥ ᒪᔑ ᑭᓅᑕᓰ ᐋᓃᓐ ᑳᐊᔩᔒᔮᓐ ᐊᐲ ᒉᓴᐯᓬ ᑮᓂᓵᒡ ᑳᑲᓅᑕᒪᐙᓂᒡ ᑭᔐᒪᓂᑑᓐ? ᓂᑮ ᑳᓈᒃ ᐅᔕ ᓂᑯᑣᒃ 100 ᐅᑲᓅᑕᒫᑫᒃ, ᓀᓈᓂᒥᑕᓇ 50 ᐁᑮ ᐃᔑ ᓀᓈᐎᓇᒀ, ᐁᔑ ᐐᐹᐱᑳᓂᒃ ᐁᑮ ᐃᔑ ᑳᓇᒀ᙮ ᒦᑕᔥ ᑳᐃᔑ ᐊᔕᒪᒀ ᐸᑴᔑᑲᓇᓐ, ᓂᐲᓂ ᑲᔦ ᓂᑮ ᒥᓇᐋᒃ᙮ 14 ᒦᑕᔥ ᓅᑯᒻ ᐁᔑᔭᓐ, ᒫᒑᓐ ᐊᐎ ᐐᑕᒪᐤ ᑭᑑᑭᒫᒻ ᑭᒋᐅᑭᒫ ᒋᐃᓇᒡ, ᐃᓬᐋᐃᒐ ᓴ ᐅᐅᒫ ᐊᔮ᙮ ᒦᑕᔥ ᐃᐃ ᑫᒋᓈᒡ ᒋᓂᔑᒡ, ᑮᐃᑭᑐ ᐅᐸᑖᔭ᙮ 15 ᒦᔥ ᐅᐅ ᐃᓬᐋᐃᒐ ᑳᐃᑭᑐᒡ, ᑫᒋᓈᒡ ᐃᑯ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᑳᐊᓄᑮᑕᐗᒃ, ᐐᓐ ᒥᓯᐌ ᐁᑎᐯᒋᑫᒡ, ᒦ ᐃ ᐁᐲᒋ ᑫᒋᓈᐁᑕᒫᓐ ᑌᐺ ᒋᐙᐸᒥᒡ ᑭᒋᐅᑭᒫ ᐁᐋᑉ ᓅᑯᒻ ᑳᑮᔑᑲᓂᓂᒃ, ᑮᐃᑭᑐ᙮ 16 ᒦᑕᔥ ᔐᒫᒃ ᐆᐸᑖᔭᐗᓐ ᑳᑮ ᐊᑕ ᐗᐐᑕᒪᐙᓂᒡ ᐁᐋᐴᓐ᙮ ᒦᑕᔥ ᐁᐋᐴᓐ ᑳᑮ ᐲᔖᓂᒡ ᐁᑮ ᐱᐊᑕ ᓇᑭᔥᑳᑯᒡ ᐃᓬᐋᐃᒐ᙮ 17 ᐊᐲ ᓴ ᐁᐋᐴᓐ ᐁᐙᐸᒥᑯᒡ ᒦ ᐃᐌ ᑳᐃᑭᑐᓂᒡ, ᑮᓐ ᐃᓇᐊ, ᑳᒪᒫᔒᑲᑕᐗᑣ ᐃᔅᕒᐃᔭᓬᐊᒃ Israel? 18 ᒦᔥ ᐅᐅ ᐃᓬᐋᐃᒐ ᑳᐃᔑ ᓇᑴᑕᐙᒡ, ᑳᐐᓐ ᐅᔕ ᓃᓐ ᑳᒪᒫᔒᑲᑕᐗᒀ ᐃᔅᕒᐃᔭᓬᐊᒃ! ᑮᓐ ᐅᔕ, ᐃᑭ ᑲᔦ ᑭᑌᑌᑳᕽ ᑳᐅᑕᑳᓀᓯᐙᒡ, ᐅᓵᒻ ᐋᓃᔥ ᑭᑮ ᓇᑲᑕᒧᐙᒻ ᑳᑎᐯᒋᑫᒡ ᐅᑎᓈᑯᓂᑫᐎᓇᓐ, ᑌᑾᒡ ᐃᑕᔥ ᐁᐊᓇᒥᐁᑕᐌᒃ ᐯᔭᓬ Baal ᑳᐃᓈᑯᓂᑫᒡ᙮ 19 ᑕᑲ ᓴ ᑲᓅᔥ ᑲᑭᓇ ᐃᔅᕒᐃᔭᓬᐊᒃ ᒋᓇᑭᔥᑲᐎᐙᒡ ᐌᑎ ᑭᒋ ᐗᒌᕽ ᑳᕒᒪᓬ Carmel ᐁᒋᑳᑌᓂᒃ᙮ ᐃᑭ ᑕᔥ ᑲᔦ ᑲᓅᓈᑲᓐ ᓃᐙᒃ ᓈᓂᒥᑕᓇ 450 ᑳᑲᓅᑕᒪᐙᐙᒡ ᒪᓂᑑᑳᓇᓐ ᐯᔭᓬ ᐁᓂᒥᓐᒡ᙮ ᐃᑭ ᑲᔦ ᐊᑐᒫᑲᓐ ᑯᑕᒃ ᓃᐙᒃ 400 ᐃᓂᓂᐗᒃ ᑳᑲᓅᑕᒪᐙᐙᒡ ᒪᓂᑑᑳᓇᓐ ᐋᔕᕒᐊ Asherah ᑳᐃᓂᒥᓐᒡ, ᑳᐐᒋ ᐐᓯᓃᒫᐙᒡ ᒉᓴᐯᓬᐊᓐ ᐅᑕᑑᐳᐎᓈᑯᓃᕽ, ᐅᑮᐃᓈᓐ᙮ 20 ᒦᑕᔥ ᐁᐋᐴᓐ ᑳᑮ ᐃᔑᒋᑫᓂᒡ, ᒥᓯᐌ ᐁᑮ ᐃᔑ ᑎᐹᒋᒧᓂᒡ ᐃᔅᕒᐃᔭᓬᐃᑳᕽ, ᐃᐃ ᑲᔦ ᐅᑲᓅᑕᒫᑫᐞ ᐁᑮ ᒫᐗᑑᓈᓂᒡ ᐃᐃᒫ ᑭᒋ ᐗᒌᕽ ᑳᕒᒪᓬ ᐁᒋᑳᑌᓂᒃ᙮ 21 ᒦᔥ ᐃᓬᐋᐃᒐ ᐯᔓ ᑳᑮ ᐱᓈᓯᑲᐙᒡ ᑲᑭᓇ ᐯᒫᑎᓯᓂᒡ ᐃᔅᕒᐃᔭᓬᐊᐞ ᐁᑮᐃᓈᒡ, ᐋᓃᓐ ᑕᔥ ᒥᓂᒃ ᓃᔑᓐ ᑫᑰᓇᓐ ᐗᐙᐙᓀᑕᒥᐃᑯᔦᒃ? ᑮᔥᐱᓐ ᓴ ᑳᑎᐯᒋᑫᒡ ᑭᔐᒪᓂᑑᐎᒡ ᒦ ᓴ ᐊᐌ ᐱᒥᓂᔕᐅᒃ! ᑮᔥᐱᓐ ᑕᔥ ᐐᓐ ᐯᔭᓬ ᒪᓂᑑᐎᑴᓐ, ᒦ ᓴ ᐊᐌ ᐱᒥᓂᔕᐅᒃ! ᐃᐃ ᓴ ᐯᒫᑎᓯᓂᒡ ᑳᐐᓐ ᐊᐙᒡ ᐸᑮ ᐅᑮ ᓇᑴᑖᑯᓰᐞ᙮ 22 ᒦᔥ ᐃᓬᐋᐃᒐ ᑳᐊᓂ ᐃᑭᑐᒡ, ᓃᓐ ᐅᔐᑕ ᑫᔮᐱ ᓂᒥᒋᐯᔑᒃ ᐁᐃᔥᑸᔮᓐ ᐁᑎᓄᐎᔮᓐ ᑳᑲᓅᑕᒪᐙᒡ ᑳᑎᐯᒋᑫᓂᒡ; ᐃᑭ ᑕᔥ ᐐᓐ ᑳᑲᓅᑕᒫᐙᐙᒡ ᐯᔭᓬᐗᓐ ᓃᐙᒃ ᓈᓂᒥᑕᓇ 450 ᑕᔑᐗᒃ᙮ 23 ᑕᑲ ᓴ ᐲᑕᒪᐎᔑᓈᒻ ᓃᔑᓐ ᐋᐯ ᐱᔑᑭᐗᒃ᙮ ᐯᔑᒃ ᓴ ᐅᑲ ᐅᑖᐱᓈᐙᓐ ᐱᔑᑭᐗᓐ, ᐅᑲ ᓇᓇᐎᔣᐙᓐ ᐃᑕᔥ, ᒦᑕᔥ ᐃᐃᒫ ᐗᑭᒋᒥᔑᕽ ᑫᔑ ᐊᓵᐙᒡ, ᑳᐐᓐ ᑕᔥ ᑕᐴᑕᐌᓰᐗᒃ ᐌᑎ ᔒᐹᔭᐄ᙮ ᑫᓃᓐ ᑕᔥ ᐊᐊ ᑯᑕᒃ ᐱᔑᑭ ᓂᑲ ᓇᓇᐎᔣ, ᐗᑭᒋ ᒥᔑᕽ ᓴ ᓂᑲ ᐃᔑ ᐊᓵ, ᑳᐐᓐ ᑫᓃᓐ ᓂᑲ ᐴᑕᐌᓰ ᔒᐹᔭᐄ᙮ 24 ᒦᑕᔥ ᒋᑲᓅᓈᐙᒡ ᐅᑎᔑᓂᑳᓱᐎᓂᓃᕽ ᐅᒪᓂᑑᒥᐙᓐ, ᒦᔥ ᑫᓃᓐ ᑫᔑ ᑲᓅᓇᒃ ᐅᑎᔑᓂᑳᓱᐎᓂᕽ ᑳᑎᐯᒋᑫᒡ᙮ ᐊᐊ ᑕᔥ ᑫᓇᑴᑕᕽ, ᒦ ᓴ ᐊᐌ ᑌᐺ ᑫᔐᒪᓂᑑᐎᒡ, ᑮᐃᑭᑐ᙮ ᑲᑭᓇ ᓴ ᐯᒫᑎᓯᓂᒡ ᑮᐃᑭᑐᐗᐞ, ᒦ ᓴ ᐃ ᐁᒥᓍᑯᓂᑫᔭᓐ᙮ 25 ᒦᑕᔥ ᐃᓬᐋᐃᒐ ᑳᐃᓈᒡ ᑳᑮ ᑲᓅᑕᒪᐙᓂᒡ ᐯᔭᓬᐗᓐ, ᐊᐎᔪᒃ ᐅᑖᐱᓇᒫᓱᒃ ᐯᔑᒃ ᐋᐯ ᐱᔑᑭ ᑮᓂᑕᒪᐙ ᐁᐹᑏᓄᔦᒃ᙮ ᓇᓈᐎᔓᒃ ᐃᑕᔥ, ᑫᑯ ᑕᔥ ᐐᓐ ᐴᑕᐌᑫᒃ ᔒᐹᔭᐄ᙮ ᒦᑕᔥ ᐃᐃ ᐃᔑ ᑲᓅᓈᑫᒃ ᑭᒪᓂᑑᒥᐙ, ᐅᑮ ᐃᓈᐞ᙮ 26 ᒦᑕᔥ ᑳᐃᔑ ᐅᑖᐱᓈᓂᒡ ᐯᔑᒃ ᐱᔑᑭᐗᓐ ᐁᑮ ᓇᓇᐎᔣᓂᒡ᙮ ᒦᔥ ᑲᔦ ᑳᐃᔑ ᑲᓅᓈᓂᒡ ᐅᑎᔑᓂᑳᓱᐎᓂᓃᕽ ᐯᔭᓬᐗᓐ᙮ ᐁᑭᔐᐹᐗᑲᓂᓂᒃ ᑕᔥ ᐁᑮ ᐅᒋ ᒫᒋᑖᓂᒡ ᐲᓂᔥ ᐁᑮ ᓈᐗᑴᓂᒃ ᐁᑮ ᐃᑭᑐᓂᒡ, ᑮᓐ ᐯᔭᓬ, ᑕᑲ ᓇᑴᑕᐎᔑᓈᒻ᙮ ᑳᐐᓐ ᑕᔥ ᐊᐎᔭᓐ ᑮᓅᑕᓰᐗᓐ, ᑳᐐᓐ ᑲᔦ ᐊᐎᔭᓐ ᐅᑮ ᓇᑴᑖᑯᓰᐙᓐ! ᒦᑕᔥ ᑳᔑ ᐊᔨᔥᐱᒀᔥᒀᓂᐙᒡ ᐃᐃᒫ ᐙᑳᔭᐄ ᐅᑑᓈᐱᑭᓂᑲᓂᐙᕽ᙮ 27 ᐁᐊᓂ ᐋᐱᑕ ᑮᔑᑲᓂᓂᒃ ᑕᔥ ᐃᓬᐋᐃᒐ ᐅᑮ ᒦᑭᓱᒫᐞ ᐁᑮᐃᓈᒡ, ᐁᓂᑯᒃ ᓴ ᑲᓅᓂᒃ, ᒪᓂᑑᐎ ᐄᑐᒃ᙮ ᒫᑭᔖ ᑲᔦ ᐅᑕᒦᑐᒃ, ᑯᒫᔥ ᑲᔦ ᐅᑕᒣᑎᐎᑐᒃ, ᑯᒫᔥ ᑲᔦ ᐙᓴ ᐃᔑ ᑭᒋ ᒫᒑᑐᒃ, ᑯᒫᔥ ᑲᔦ ᐅᑕᒥᒀᒥᐎᑐᒃ, ᐃᔑᓈᑾᓂᓂ ᑕᔥ ᒋᑮ ᐊᒪᒋᐃᑎᐸᓐ, ᐅᑮᐃᓈᐞ᙮ 28 ᒦᑕᔥ ᐁᓂᑯᒃ ᑳᐃᔑ ᔖᔖᑯᐌᓂᒡ ᐁᑮ ᐯᐯᔑᑎᓱᓂᒡ ᐁᑮ ᐋᐸᒋᑑᓂᒡ ᐸᔑᐸᐃᑫᐎᑯᒫᓇᓐ, ᒨᑯᒫᓀᓴᓐ ᑲᔦ᙮ ᒦ ᐃ ᐋᓃᔥ ᑳᓂᑖ ᐃᔑᒋᑫᓂᒡ ᐲᓂᔥ ᒥᔅᑸᓂ ᐁᑮ ᓵᑭᒋᒋᐗᓂᓂᒃ᙮ 29 ᐁᐊᓂ ᐃᔥᒀ ᐋᐱᑕ ᑮᔑᑲᓂᓂᕽ ᑕᔥ ᐋᒋᑯ ᑮᔖᔖᑯᐌᐗᐞ, ᑳᐐᓐ ᑮᐸᑭᒌᓰᐗᐞ ᐲᓂᔥ ᐁᑮ ᐊᓂ ᐅᓈᑯᔑᓂᓂᒃ ᑳᑮ ᓂᑖ ᐸᑭᑎᓈᓱᐎᓐᒡ ᐊᐲ ᑮᐅᓈᑯᔑᓂᓂᒃ᙮ ᑳᐐᓐ ᑕᔥ ᐊᐎᔭᓐ ᑮᑮᑭᑐᓰᐗᓐ, ᑳᐐᓐ ᑲᔦ ᐊᐎᔭᓐ ᐅᑮ ᓇᑴᑖᑯᓰᓂ, ᑳᐐᓐ ᑲᔦ ᐊᐎᔭᓐ ᐅᑮ ᐸᐹᐱᓯᔅᑭᑖᑯᓰᓂ᙮ 30 ᒦᑕᔥ ᐅᐅ ᐃᓬᐋᐃᒐ ᑳᐃᓈᒡ ᑲᑭᓇ ᐯᒫᑎᓯᓂᒡ, ᑕᑲ ᑲᑭᓇ ᐯᔓ ᐱᓈᓯᑲᐎᔑᒃ᙮ ᒦ ᓴ ᐃ ᑲᑭᓇ ᑳᐱᔑ ᓈᓯᑳᑯᒡ᙮ ᒦᑕᔥ ᑳᑮ ᐃᔑ ᑮᐌ ᐗᐌᔑᑑᒡ ᐃᐃ ᐁᔑ ᐸᑭᑎᓈᓲᑕᒪᐎᒥᓐᒡ ᑳᑎᐯᒋᑫᓂᒡ ᑳᑮ ᐲᑯᔥᑭᑳᑌᓂᒃ᙮ 31 ᒦᔥ ᐃᓬᐋᐃᒐ ᑳᐃᔑ ᐅᑖᐱᓈᒡ ᒥᑖᔑᓃᔑᓐ 12 ᐊᓯᓃᐞ ᑳᑮ ᑕᓶᐙᓇᑭᓯᓂᒡ ᐃᔅᕒᐃᔭᓬᐊᐞ ᑳᑮ ᐅᑯᓯᓯᒥᑯᓂᒡ ᒉᑲᐴᓐ Jacob᙮ ᑳᑎᐯᒋᑫᒡ ᐄᑐᒃ ᑳᑮᐃᓈᑯᐸᓀᓐ, ᐃᔅᕒᐃᔭᓬ ᓴ ᑭᑲ ᐃᔑᓂᑳᔅ᙮ 32 ᒦᐗᐞ ᑕᔥ ᐃᐃ ᐊᓯᓃᐞ ᑳᐋᐸᒋᐋᒡ ᑮᐅᔑᑑᒡ ᑳᑮ ᐃᔑ ᐸᑭᑎᓈᓱᐎᓐᒡ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ᙮ ᒦᔥ ᑲᔦ ᑳᐃᔑ ᐙᑲᔮᓂᑫᒡ ᐁᑮ ᐃᓂᑯᒀᓂᑫᒡ ᒋᑌᐱᐲᓂᒃ ᓃᐎᑎᐸᐅᐹᓐ᙮ 33 ᒦᑕᔥ ᑳᐃᔑ ᐅᓈᑯᓯᑑᒡ ᒥᓴᓐ, ᐁᑮ ᐲᓯᔣᒡ ᐃᓂ ᐱᔑᑭᐗᓐ᙮ ᐃᐃᒫ ᑕᔥ ᐗᑭᒋᒥᔑᕽ ᐅᑮ ᐃᔑ ᐊᓵᓐ᙮ ᒦᔥ ᑳᐃᑭᑐᒡ, ᒨᔥᑭᓀᐸᑑᒃ ᓴ ᐃᓂ ᓃᐎᓐ ᐊᑑᐹᓇᓐ᙮ ᐃᐃᒫ ᓴ ᑕᔥ ᐸᑭᑎᓈᓱᐎᓂᕽ, ᐗᑭᒋᒥᔑ ᑲᔦ ᐃᔑ ᓰᑭᓇᒧᒃ ᐃᐃ ᓂᐱ᙮ 34 ᒦᔥ ᑳᐊᓂ ᐃᑭᑐᒡ, ᓃᔑᕽ ᐃᐃ ᑑᑕᒧᒃ᙮ ᒦ ᓴ ᓃᔑᕽ ᑳᐃᔑᒋᑫᓂᒡ᙮ ᐋᒋᑯ ᑕᔥ ᑮᐊᓂ ᐃᑭᑐ, ᓂᓯᕽ ᐃᐃ ᑑᑕᒧᒃ᙮ ᒦᔥ ᐃᐃ ᑳᐃᔑᒋᑫᓂᒡ᙮ 35 ᐐᑫ ᑕᔥ ᑮᔖᐳᐲᓂ ᐃᐃ ᑳᑮ ᐃᔑ ᐸᑭᑎᓈᓱᐎᓐᒡ, ᐐᑫ ᑲᔦ ᑮᒨᔥᑭᓀᐲᓂ ᐃᐃ ᐙᑳᔮᓂᑳᓐ᙮ 36 ᐁᑮ ᐊᓂ ᐅᒋᒋᓭᓂᒃ ᑕᔥ ᐁᐊᓂ ᐅᓈᑯᔑᓂᓂᒃ ᐊᐲ ᑳᑮ ᓂᑖ ᐸᑭᑎᓈᓱᐎᓐᒡ, ᐃᓬᐋᐃᒐ Elijah ᐯᔓ ᑮᐲᔖ ᐁᑮ ᐃᑭᑐᒡ, ᑮᓐ ᑌᐯᒋᑫᔭᓐ, ᑳᐅᑭᔐᒪᓂᑑᒥᐙᒡ ᐁᐸᕒᐊᐋᒻ Abraham, ᐋᐃᓯᒃ Isaac, ᐊᐊ ᑲᔦ ᐃᔅᕒᐃᔭᓬ ᑳᑮᐃᓂᓐᒡ᙮ ᑕᑲ ᓴ ᓅᑯᒻ ᑳᑮᔑᑲᒃ ᑕᑭᑫᑖᑾᓐ ᑮᓐ ᐁᑭᔐᒪᓂᑑᐎᔭᓐ ᐅᐅᒫ ᐃᔅᕒᐃᔭᓬᐊᑮᕽ, ᓃᓐ ᑕᔥ ᑲᔦ ᐁᑎᓄᐎᔮᓐ ᑭᑕᓄᑮᐋᑲᓐ᙮ ᐁᐃᔑᒋᑫᔮᓐ ᑲᔦ ᑲᑭᓇ ᐅᓄ ᑳᔑ ᐊᓅᔑᔭᓐ᙮ 37 ᓇᑴᑕᐎᔑᓐ, ᑌᐯᒋᑫᔭᓐ, ᑕᑲ ᓇᑴᑕᐎᔑᓐ, ᐅᑯ ᓴ ᐯᒫᑎᓯᐙᒡ ᒋᑭᑫᑕᒧᐙᒡ ᑮᓐ ᑳᑎᐯᒋᑫᔭᓐ ᐁᑭᔐᒪᓂᑑᐎᔭᓐ; ᑮᓐ ᑲᔦ ᐁᐐ ᐃᔑᐊᑣ ᒋᑮᐌ ᓈᓯᑲᐎᒀ, ᑮᐃᑭᑐ᙮ 38 ᒦᑕᔥ ᑳᑎᐯᒋᑫᒡ ᐅᑎᔥᑯᑌᒻ ᑳᑮ ᐱᓈᔒᒪᑲᓂᓂᒃ, ᐁᑮ ᐊᒀᑭᑌᒃ ᐃᐃ ᐸᑭᑎᓈᓱᐎᓐ, ᐃᓂ ᑲᔦ ᒥᓴᓐ᙮ ᐊᐙᒡ ᑲᔦ ᐊᓯᓃᒃ ᑮᐊᒀᑭᓱᐗᒃ, ᐊᑭ ᑲᔦ ᑮᒣᑖᑭᑌ ᐃᐃ ᑲᔦ ᓂᐱ ᑳᑮ ᒨᔥᑭᓀᐲᒃ ᐙᑳᔮᓂᑳᓂᕽ ᐐᑫ ᑮᐃᔅᑳᐹᑴᔮᑭᑌ᙮ 39 ᐊᐲ ᑕᔥ ᐯᒫᑎᓯᐙᒡ ᑳᐙᐸᑕᒧᐙᒡ ᐅᐅ ᐁᐃᔑᓭᓂᒃ, ᒦ ᐃ ᑳᐃᔑ ᐊᓂᒥᑯᑖᐙᒡ ᒥᑕᑲᒥᒃ ᐁᑮ ᐃᑭᑐᐙᒡ, ᑳᑎᐯᒋᑫᒡ ᐅᔕ ᐄᓴᓐ ᑭᔐᒪᓂᑑᐎ, ᑳᑎᐯᒋᑫᒡ ᐅᔕ ᐄᓴᓐ ᑭᔐᒪᓂᑑᐎ᙮ 40 ᒦᑕᔥ ᐃᓬᐋᐃᒐ ᑳᑮᐃᓈᒡ ᐯᒫᑎᓯᓂᒡ, ᐅᑎᑎᓂᑾᒃ ᐃᑭ ᑳᑲᓅᑕᒪᐙᐙᒡ ᐯᔭᓬᐗᓐ; ᑫᑯ ᐊᐙᒡ ᐯᔑᒃ ᑕᔖᐾᓰ᙮ ᒦᑕᔥ ᑳᐃᔑᒋᑫᓂᒡ ᐯᒫᑎᓯᓂᒡ ᑳᑮᐃᓈᒡ᙮ ᒦᔥ ᐃᓬᐋᐃᒐ ᑳᑮ ᐃᔑᐎᓈᒡ ᐅᑲᓅᑕᒫᑫᐞ ᐌᑎ ᓰᐲᓯᕽ ᑳᐃᔕᓐ Kishon ᐁᒋᑳᑌᓂᒃ, ᒦ ᓴ ᐌᑎ ᑲᑭᓇ ᑳᑕᔑ ᓂᓵᒡ᙮ ᑮᐴᓂᓭᒃ ᑮᐊᔮᓯᓄᒃ ᒦᒋᒻ 41 ᒦᑕᔥ ᐃᓬᐋᐃᒐ ᑳᐃᓈᒡ ᐁᐋᐴᓐ, ᒫᒑᓐ ᐃᑕᔥ ᐊᐎ ᐐᓯᓂᓐ, ᒋᐊᐎ ᒥᓂᑴᔭᓐ ᑲᔦ, ᓂᓅᑖᓐ ᐅᔕ ᐁᑭᒋ ᐲᑗᐌ ᐲᓴᐊᕽ, ᐅᑮᐃᓈᓐ᙮ 42 ᐁᑮ ᐊᓂ ᒫᒑᓂᒡ ᓴ ᐁᐊᑕ ᐐᓯᓂᓂᒡ, ᐁᐊᑕ ᒥᓂᑴᓂᒡ ᑲᔦ, ᒦ ᓴ ᐃᓬᐋᐃᒐ ᑳᐃᔑ ᐃᓈᒪᒋᐌᒡ ᐌᑎ ᐗᑭᑕᑎᓐ ᐗᒌᕽ ᑳᕒᒪᓬ Carmel ᐁᒋᑳᑌᓂᒃ᙮ ᒦᔥ ᒥᑕᑲᒥᒃ ᑳᑮ ᐊᓂᒥᑯᑖᒡ ᓇᓴᐎᑭᑎᒃ ᐁᑮ ᐃᔑᑴᑖᒡ᙮ 43 ᒦᔥ ᐅᐅ ᑳᐃᓈᒡ ᐅᑕᓄᑮᐋᑲᓇᓐ, ᒫᒑᓐ ᑭᒋᑲᒦᕽ ᐃᓇᑫ ᐊᐎ ᐃᓈᐱᓐ! ᒦᔥ ᑳᐃᔑ ᐃᔖᓂᒡ ᐁᑮ ᐊᐎ ᐃᓈᐱᓂᒡ᙮ ᒦᔥ ᐅᐅ ᑳᐱᐃᑯᒡ, ᑳᐐᓐ ᑫᑰᓐ ᓂᑎᔑᓇᓰ! ᓃᔣᒋᕽ 7 ᐃᑕᔥ ᐃᐃ ᐅᑮᐃᓈᓐ ᒋᐊᐎ ᐃᓈᐱᓂᒡ᙮ 44 ᓃᔣᒋᕽ ᐃᑕᔥ ᑳᐃᔖᓂᒡ ᒦ ᐅᐌ ᑳᑮᐃᑯᒡ ᐅᑕᓄᑮᐋᑲᓇᓐ, ᓂᐙᐸᑖᓐ ᓴ ᐗᑶ ᓂᐲᕽ ᐃᓇᑫ ᐁᐱᐅᒋ ᐲᑖᓇᑾᒃ ᐁᐃᓂᑯᒀᒃ ᐃᓂᓂ ᑳᐃᓂᑯᑯᓂᒌᒡ! ᐅᑮᐃᑰᓐ᙮ ᒦᑕᔥ ᑳᐃᓈᒡ ᐅᑕᓄᑮᐋᑲᓇᓐ, ᒫᒑᓐ ᐊᐎ ᑲᓅᔥ ᐁᐋᑉ ᒋᐅᓇᐱᓈᒡ ᐅᑑᑖᐹᓈᑾᓐ ᒋᐊᓂ ᑮᐌᒡ ᒋᑆ ᐋᒋᑭᒥᐗᓂᔑᒡ! ᐅᑮᐃᓈᓐ᙮ 45 ᐐᑫ ᑮᐊᓂ ᒪᑲᑌᐙᓇᑾᓂᓂ, ᐁᑮ ᐊᓂ ᑭᒋ ᓅᑎᓂᓂᒃ, ᐁᑮ ᐊᓂ ᑭᒋ ᑭᒥᐗᓂᓂᒃ᙮ ᒦᔥ ᐁᐋᑉ ᑳᐃᔑ ᐴᓯᐸᑑᒡ ᐅᑑᑖᐹᓈᑯᕽ ᐁᑮ ᐊᓂ ᐃᔑ ᑮᐌᒡ ᐌᑎ ᒉᔅᕒᐄᔭᓬ Jezreel ᐆᑌᓈᕽ᙮ 46 ᒦᔥ ᐃᓬᐋᐃᒐ ᑳᑮ ᐅᑎᓯᑯᒡ ᐅᒪᔥᑲᐎᓰᐎᓂᓂ ᑳᑎᐯᒋᑫᓂᒡ, ᒦᔥ ᑳᐃᔑ ᐃᑾᐱᑑᒡ ᐅᑭᑭᔥᑭᑲᓇᓐ ᐅᔒᑲᓂᕽ᙮ ᐐᓐ ᐃᑕᔥ ᔖᑄᔭᐄ ᒥᓯᐌ ᑮᐃᔑ ᓃᑳᓂᐸᑑ ᐌᑎ ᒉᔅᕒᐄᔭᓬ ᐆᑌᓈᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society