1 ᑭᒋᐅᑭᒫᒃ 1 - ᐅᒋᐺ ᑭᒋᒪᓯᓇᐃᑲᓐᑭᒋᐅᑭᒫ ᑌᐱᑦ ᑮᐊᑭᐌᓰᐎᒡ 1 ᐐᑫ ᐋᔕ ᑌᐱᑦ ᑭᒋᐅᑭᒫ ᑮᐊᑭᐌᓰᐎ, ᐁᑮ ᑭᒋ ᑕᓱᐱᐴᓉᒡ᙮ ᑳᐐᓐ ᓴ ᐐᑳ ᑮᑮᔔᒀᒥᓰ, ᒥᓴᐙ ᑯ ᓃᐱᐗᐞ ᐊᑾᓃᐎᓇᓐ ᐋᓇ ᐊᑾᓇᐅᓐᒡ᙮ 2 ᐅᑕᓄᑮᐋᑲᓇᐞ ᐃᑕᔥ ᐅᑮᐃᑰᐞ, ᓂᑭᒋᐅᑭᒫᒥᓈᓐ, ᑕᑲ ᓴ ᓂᑲ ᓇᓈᑐᓀᐙᓈᓐ ᐯᑭ ᐅᔥᑭᓃᑭᑴ ᑫᐸᒥᐃᒃ, ᑫᓈᓈᑲᒋᐃᒃ ᑲᔦ᙮ ᒦᑕᔥ ᐊᐊ ᐯᔓ ᑫᐐᐯᒥᒃ ᒋᑮᔔᔥᑲᐎᒃ, ᐅᑮᐃᑰᐞ᙮ 3 ᒦᑕᔥ ᑳᐃᔑ ᓇᓈᑐᓀᐅᒥᓐᒡ ᒥᓯᐌ ᐃᔅᕒᐃᔭᓬᐊᑮᕽ Israel ᐌᓂᔑᔑᓂᒡ ᐃᑴᐗᓐ᙮ ᐋᐱᔕᒃ Abishag ᓴ ᑮᐃᔑᓂᑳᓱᐗᓐ ᑳᑮ ᒥᑲᐎᒥᓐᒡ ᔔᓀᒻ Shunem ᐊᔮᐎᓂᕽ ᐌᒌᓂᒡ, ᒦᔥ ᑳᐃᔑ ᐲᓂᒥᓐᒡ ᑭᒋᐅᑭᒫ ᐁᔑᐊᔮᒡ᙮ 4 ᐐᑫ ᓴ ᑮᒥᓄᓈᑯᓯᐗᓐ᙮ ᒦᐗᓐ ᓴ ᐃᓂ ᑳᓈᓈᑲᒋᐃᑯᒡ, ᑳᐸᒥᐃᑯᒡ ᑲᔦ᙮ ᑳᐐᓐ ᐃᑕᔥ ᑫᑰᓐ ᐅᑮ ᐅᒋ ᑑᑕᐙᓰᓐ ᐃᓂ ᐃᑴᐗᓐ᙮ ᐊᑐᓈᐃᒐ ᑮᐃᑭᑐᒡ ᐐᓐ ᐁᑭᒋᐅᑭᒫᐎᒡ 5 ᐊᐊ ᑕᔥ ᐊᑐᓈᐃᒐ Adonijah ᑳᑮ ᐅᑌᑌᒡ ᑌᐱᑑᓐ, ᑳᑮ ᐅᒫᒫᒡ ᐃᑕᔥ ᐊᑭᑕᓐ Haggith, ᒫᐗᒡ ᑮᓴᓰᑭᓯ ᑫᔮᐱ ᐁᐱᒫᑎᓯᒡ᙮ ᒦ ᓴ ᑳᐃᑭᑐᒡ ᐁᑭᒋ ᐃᓀᓂᑎᓱᒡ, ᓃᓐ ᓴ ᓂᑲ ᑭᒋᐅᑭᒫᐤ! ᒦᔥ ᑳᑮ ᐅᑎᓇᒫᓱᒡ ᒦᑳᓱᐎ ᐅᑖᐹᓈᑾᐞ, ᒥᑕᑎᒨᐞ ᑲᔦ ᐁᑮ ᑾᔮᒌᐋᒡ, ᓈᓂᒥᑕᓇ 50 ᑲᔦ ᐃᓂᓂᐗᐞ ᑫᐱᒥ ᐐᒌᐎᑯᒡ᙮ 6 ᑳᐐᓐ ᓴ ᐐᑳ ᐅᑮ ᐅᒋᐃᑯᓰᓐ ᐅᑌᑌᓐ ᑫᑰᓐ ᑮᐐᐃᔑᒋᑫᒡ, ᒋᑮᐃᑯᐸᓐ, ᐌᑯᓀᓐ ᐃᐃ ᐌᒋ ᐃᔑᒋᑫᔭᓐ! ᐐᑫ ᑲᔦ ᑮᒥᓄᓈᑯᓯ, ᐋᐸᓴᓬᐊᒨᓐ ᐅᓴᔦᓴᓐ ᐁᐊᑯᔥᑲᐙᒡ᙮ 7 ᐅᑮ ᑲᓅᓈᓐ ᓴ ᒎᐊᐴᓐ Joab ᐌᒫᒫᓂᒡ ᓭᕒᐅᐋᔭ Zeruiah, ᐃᓂ ᑲᔦ ᐊᐹᔭᑕᕒᐊᓐ Abiathar ᐊᓇᒥᐁᐎᑭᒫᓐ᙮ ᒦᔥ ᑳᐃᔑ ᐐᒋᐃᑯᒡ᙮ 8 ᐃᓂ ᑕᔥ ᐐᓐ ᓭᑕᑰᓐ Zadok ᐊᓇᒥᐁᐎᑭᒫᓐ, ᐲᓈᐃᐊᐗᓐ Benaiah ᐌᑌᑌᓂᒡ ᒉᐅᐃᐊᑖᐗᓐ Jehoiada, ᓀᑕᓇᓐ Nathan ᑲᔦ ᑳᑲᓅᑕᒪᐙᓂᒡ ᑭᔐᒪᓂᑑᓐ, ᔑᒥᐋᐃᐗᓐ Shimei, ᐅᕒᐁᐋᐃᐗᓐ Rei, ᐃᐃ ᑲᔦ ᔑᒫᑲᓂᔕᐞ ᑌᐱᑑᓐ ᑫᓇᐌᓂᒥᑯᓂᒡ ᐃᓂᓂᐗᐞ ᑳᐐᓐ ᐅᑮ ᐐᒌᐎᑯᓰᐞ ᐊᑐᓈᐃᒐ᙮ 9 ᒦᑕᔥ ᐊᑐᓈᐃᒐ ᑳᐃᔑ ᐸᑭᑎᓈᓲᐙᑫᒡ ᒫᓇᒑᓂᔕᐞ, ᐱᔑᑭᐗᐞ ᑲᔦ, ᑳᐋᒋᐴᓂᒥᓐᒡ ᑲᔦ ᐱᔑᑮᓴᐞ ᐌᑎ ᑭᓀᐱᑾᓯᓃᕽ ᐁᒋᑳᑌᓂᒃ ᒌᑲᔭᐄ ᐊᔮᐎᓂᕽ ᐁᓐᕒᐆᒉᔭᓬ En Rogel ᐁᒋᑳᑌᓂᒃ᙮ ᑲᑭᓇ ᓴ ᐅᑮ ᐊᑐᒫᐞ, ᑭᒋᐅᑭᒫᓐ ᐅᑯᓯᓯᓂ ᑳᑮ ᐅᐐᒋᑮᐌᒡ, ᐃᐃ ᑲᔦ ᑲᑭᓇ ᐃᓂᓂᐗᐞ ᒎᑕ Judah ᐊᑮᕽ ᐌᒌᓂᒡ ᑌᐱᑑᓐ ᑳᐊᓄᑮᐋᓂᒡ᙮ 10 ᑳᐐᓐ ᐃᑕᔥ ᐐᓐ ᐅᑮ ᐊᑐᒫᓰᓐ ᓀᑕᓇᓐ ᑫᓅᑕᒪᐙᓂᒡ ᑭᔐᒪᓂᑑᓐ, ᐲᓈᐃᐊᐗᓐ ᑲᔦ, ᐃᐃ ᑲᔦ ᔑᒫᑲᓂᔕᐞ ᑫᓇᐌᓂᒫᓂᒡ ᑌᐱᑑᓐ᙮ ᑳᐐᓐ ᑲᔦ ᐅᑮ ᐊᑐᒫᓰᓐ ᐐᒋᑭᐌᔭᓐ ᔂᓬᐊᒪᓐ Solomon ᐁᔑᓂᑳᓱᓂᒡ᙮ ᔂᓬᐊᒪᓐ ᑮᑭᒋᐅᑭᒫᐎᐃᓐᒡ 11 ᓀᑕᓐ Nathan ᐃᑕᔥ ᐅᑮᐃᓈᓐ ᐹᔒᐸᐗᓐ Bathsheba ᐌᑯᓯᓯᓂᒡ ᔂᓬᐊᒪᓇᓐ, ᑳᐐᓐ ᐃᓇ ᑭᓅᑕᓰ ᐊᑐᓈᐃᒐ ᐌᒫᒫᒡ ᐊᑭᑕᓐ Haggith ᐁᑮ ᑭᒋᐅᑭᒫᐎᐃᑎᓱᒡ? ᑭᑑᑭᒫᒥᓈᓐ ᑌᐱᑦ ᐃᑕᔥ ᐊᐙᒡ ᐁᑭᑫᑕᓯᒃ? 12 ᐃᓇᔥᑫ ᑭᑲ ᐐᑕᒪᐎᓐ ᐋᓃᓐ ᒪᔮ ᑫᐃᔑᒋᑫᔭᓐ ᑫᔑ ᐱᒫᒋᑑᔭᓐ ᑭᐱᒫᑎᓯᐎᓐ, ᐊᐊ ᑲᔦ ᑭᑯᓯᔅ ᑫᔑ ᐱᒫᒋᐊᒡ ᔂᓬᐊᒪᓐ᙮ 13 ᐊᑕ ᐙᐸᒫᑲᓐ ᑌᐱᑦ ᑭᒋᐅᑭᒫ, ᒦᑕᔥ ᐅᐅ ᑫᐃᓇᒡ, ᓂᑑᑭᒫᒻ ᑭᒋᐅᑭᒫ, ᑭᑮ ᐋᔩᒋ ᐊᔓᑕᒪᐎᔑᓈᐸᓐ ᐄᑐᒃ ᐅᐅ ᐁᑮᐃᔑᔭᐸᓐ, ᑫᒋᓈᒡ ᓴ ᑭᑯᓯᔅ ᔂᓬᐊᒪᓐ ᑕᑭᒋᐅᑭᒫᐎ ᑮᐃᔥᒀ ᑭᒋᐅᑭᒫᐎᐗᒃ, ᒋᓇᒪᑕᐱᒡ ᓂᑭᒋᐅᑭᒫᐗᐱᐎᓂᕽ? ᐌᑯᓀᓂᓂ ᑕᔥ ᐊᑐᓈᐃᒐ ᐐᓐ ᐌᒋ ᑭᒋᐅᑭᒫᐎᒡ? 14 ᒦᔥ ᐅᐅ ᑳᐊᓂᐃᓈᒡ, ᒣᒀ ᑕᔥ ᑫᔮᐱ ᐌᑎ ᐊᔮᔭᓐ ᑲᑲᓅᓇᒡ ᑭᒋᐅᑭᒫ, ᒦ ᓴ ᒋᐲᑎᑫᔮᓐ, ᑫᓃᓐ ᒋᐐᑕᒫᓐ ᒪᔮ ᐁᑭᑐᔭᓐ, ᐅᑮᐃᓈᓐ᙮ 15 ᒦᑕᔥ ᐹᔒᐸ ᑳᑮ ᐃᔖᒡ ᐁᔑ ᓂᐹᓂᒡ, ᐁᑮ ᐊᑕ ᐙᐸᒫᒡ ᑭᒋᐅᑭᒫᓐ ᐁᑭᐌᓰᐎᓂᒡ᙮ ᒦ ᓴ ᐃᐌ ᐃᓂ ᐃᑴᐗᓐ ᐋᐱᔕᑲᓐ ᔔᓀᒻ Shunem ᐌᒌᓂᒡ ᑳᑮ ᑕᔑ ᐸᒥᐋᓂᒡ ᑭᒋᐅᑭᒫᓐ᙮ 16 ᒦᑕᔥ ᐹᔒᐸ ᑳᐃᔑ ᐊᓂᒥᑯᑖᒡ ᐁᔑᐊᔮᓂᒡ ᐁᑭᑌᓂᒫᒡ ᑭᒋᐅᑭᒫᓐ᙮ ᒦᔥ ᐅᐅ ᑳᐃᑯᒡ, ᐌᑯᓀᓐ ᐁᑕᐌᑕᒪᓐ? ᐅᑮᐃᑰᓐ᙮ 17 ᒦᑕᔥ ᐅᐅ ᑳᐃᓈᒡ, ᓂᑑᑭᒫᒻ, ᑮᓐ ᐄᑐᒃ ᑭᑮ ᐊᔩᒋ ᐊᔓᑕᒪᐎᔑᓈᐸᓐ ᐁᑮ ᐊᐱᒧᔭᓐ ᑳᑎᐯᒋᑫᒡ ᑭᑭᔐᒪᓂᑑᒻ ᐅᐅ ᐁᑮᐃᔑᔭᐸᓐ, ᑭᑯᓯᔅ ᓴ ᔂᓬᐊᒪᓐ ᑕᑭᒋᐅᑭᒫᐎ ᑮᐃᔥᒀ ᐅᑭᒫᐎᔮᓐ, ᒋᓇᒪᑕᐱᒡ ᓂᑭᒋᐅᑭᒫᐗᐱᐎᓂᕽ᙮ 18 ᐃᓇᔥᑫ ᑕᔥ ᐋᔕ ᐊᑐᓈᐃᒐ ᑭᒋᐅᑭᒫᐎ, ᑳᐐᓐ ᐃᑕᔥ ᓂᑑᑭᒫᒻ ᑫᒋᐅᑭᒫᐎᔭᓐ ᑭᑭᑫᑕᓰᓐ ᐅᐅ᙮ 19 ᑮᐸᑭᑎᓈᓱ ᐅᔕ ᓃᐱᐗᐞ ᐱᔑᑭᐗᐞ, ᒫᓇᒑᓂᔕᐞ ᑲᔦ, ᑳᐋᒋᐴᓂᒥᓐᒡ ᑲᔦ ᐱᔑᑮᓴᐞ᙮ ᐅᑮ ᐊᑐᒫᐞ ᑲᔦ ᑲᑭᓇ ᑭᒋᐅᑭᒫᓐ ᐅᑯᓯᓯᓂ, ᐊᐹᐃᑕᕒᐊᓐ Abiathar ᐊᓇᒥᐁᐎᑭᒫᓐ, ᒎᐊᐴᓐ ᑲᔦ ᔑᒫᑲᓂᔒᐎᑭᒫᓐ, ᑳᐐᓐ ᐃᑕᔥ ᐐᓐ ᐅᑮ ᐅᒋ ᐊᑐᒫᓰᓐ ᔂᓬᐊᒪᓇᓐ ᑭᑕᓄᑮᐋᑲᓇᓐ᙮ 20 ᓂᑑᑭᒫᒻ ᑭᒋᐅᑭᒫ, ᑲᑭᓇ ᐅᔕ ᐃᔅᕒᐃᔭᓬᐊᒃ Israel ᑭᑲᓇᐙᐸᒥᑰᒃ ᐁᐐ ᑭᑫᑕᒧᐙᒡ ᒋᐐᑕᒪᐗᑣ ᐊᐌᓀᓐ ᑫᓈᐱᔥᑲᐎᒃ ᐅᐅ ᑳᔑ ᑭᒋᐅᑭᒫᐎᔭᓐ᙮ 21 ᑮᔥᐱᓐ ᐃᑕᔥ ᐃᐃ ᐃᔑᒋᑫᓯᐗᓐ, ᐊᐲ ᓴ ᑯ ᐃᔥᒀ ᐱᒫᑎᓯᔭᓐ, ᒦ ᓴ ᐃ ᑫᑑᑖᑰᔮᕽ ᓂᑯᓯᔅ ᔂᓬᐊᒪᓐ ᒋᐃᓇᑭᒥᑰᔮᕽ ᑎᓄ ᑳᒪᒫᔒᐙᒡ, ᐅᑮᐃᓈᓐ᙮ 22 ᒣᒀ ᑕᔥ ᐁᑲᑲᓅᓈᒡ ᑭᒋᐅᑭᒫᓐ, ᒦ ᓴ ᓀᑕᓇᓐ ᑫᓅᑕᒪᐙᓂᒡ ᑭᔐᒪᓂᑑᓐ ᑳᑮ ᐱᑕᑯᔑᓂᓂᒡ᙮ 23 ᒦᑕᔥ ᐅᐅ ᑳᑮᐃᓂᒥᓐᒡ ᑭᒋᐅᑭᒫᓐ, ᓀᑕᓐ ᑳᑲᓅᑕᒪᐙᒡ ᑭᔐᒪᓂᑑᓐ ᓴ ᐅᐅᒫ ᐊᔮ! ᒦᑕᔥ ᑳᑮ ᐱ ᐲᑎᑫᓂᒡ ᐁᔑᐊᔮᓂᒡ ᑭᒋᐅᑭᒫᓐ ᐁᑮ ᐃᔑ ᐊᓂᒥᑯᑖᓂᒡ᙮ 24 ᒦᑕᔥ ᐅᐅ ᓀᑕᓐ ᑳᐃᑭᑐᒡ, ᓂᑑᑭᒫᒻ ᑭᒋᐅᑭᒫ, ᑮᓐ ᐃᓇ ᑳᑮ ᐃᓇᒡ ᐊᑐᓈᐃᒐ ᒋᓈᐱᔥᑲᐎᒃ ᒋᑭᒋᐅᑭᒫᐎᒡ, ᒋᓇᒪᑕᐱᒡ ᑲᔦ ᑭᑭᒋᐅᑭᒫᐗᐱᐎᓂᕽ? 25 ᓅᑯᒻ ᐅᔕ ᑳᑮᔑᑲᓂᓂᒃ ᐅᐸᑭᑎᓈᓲᐙᑫᓇᐞ ᓃᐱᐗᐞ ᐱᔑᑭᐗᐞ, ᑳᐋᒋᐴᓂᒥᓐᒡ ᐱᔑᑮᓴᐞ, ᒫᓇᒑᓂᔕᐞ ᑲᔦ᙮ ᐅᑮ ᐊᑐᒫᐞ ᑲᔦ ᑲᑭᓇ ᑭᒋᐅᑭᒫᓐ ᐅᑯᓯᓯᓂ, ᔑᒫᑲᓂᔒᐎᑭᒫᐞ ᑲᔦ᙮ ᐅᑮ ᐊᑐᒫᓐ ᑲᔦ ᐊᐹᐃᑕᕒᐊᓐ ᐊᓇᒥᐁᐎᑭᒫᓐ᙮ ᓅᑯᒻ ᐃᑕᔥ ᒪᑗ ᐐᓯᓂᐗᒃ ᐁᐐᑑᐸᒫᐙᒡ ᐅᐅ ᐁᐃᑭᑐᐙᒡ, ᑕᑲ ᐊᑐᓈᐃᒐ ᑭᒋᐅᑭᒫ ᑭᓉᔥ ᑕᐱᒫᑎᓯ! 26 ᑳᐐᓐ ᐃᑕᔥ ᓃᓐ ᓂᑮ ᐊᑐᒥᑯᓰ᙮ ᑳᐐᓐ ᑲᔦ ᓭᑕᑰᓐ Zadok, ᐲᓈᐃᐊᐗᓐ Benaiah ᐌᑌᑌᓂᒡ ᒉᐅᐃᐊᑖᐗᓐ Jehoiada, ᐃᓂ ᑲᔦ ᔂᓬᐊᒪᓇᓐ ᐅᑮ ᐊᑐᒫᓰᐞ᙮ 27 ᒦᓇᐅᐌᓂ ᓂᑑᑭᒫᒻ ᑭᒋᐅᑭᒫ ᑳᐃᔑᒋᑫᒡ ᐁᑮ ᐐᑕᒪᐙᓯᒃ ᐃᑕᔥ ᐅᑕᓄᑮᐋᑲᓇᐞ ᒋᑭᑫᑕᒥᓂᒡ ᐊᐌᓀᓇᓐ ᑫᓈᐱᔥᑳᑯᒡ ᑫᐊᐱᓂᒡ ᐅᑭᒋᐅᑭᒫᐗᐱᐎᓂᕽ? ᐅᑮᐃᓈᓐ᙮ 28 ᑌᐱᑦ ᐃᑕᔥ ᐅᐅ ᑮᐃᑭᑐ, ᐊᑐᒥᒃ ᐹᔒᐸ Bathsheba ᒋᐲᔖᒡ, ᑮᐃᑭᑐ᙮ ᒦᑕᔥ ᑳᐃᔑ ᐲᔖᓂᒡ ᑌᐱᑦ ᐁᔑᐊᔮᒡ, ᐁᑮ ᐃᓈᓴᒥᑳᐸᐎᑖᑯᒡ᙮ 29 ᒦᑕᔥ ᑭᒋᐅᑭᒫ ᑳᐃᔑ ᐊᐱᒧᒡ ᐁᑮᐃᓈᒡ, ᑫᒋᓈᒡ ᐃᑯ ᑳᑎᐯᒋᑫᒡ ᐐᓐ ᒥᓯᐌ ᐁᑎᐯᒋᑫᒡ, ᐊᐊ ᑳᓈᑕᒪᐎᒡ ᑲᑭᓇ ᑫᑰᓐ ᐁᔑ ᒫᔑᓭᐗᒃ, 30 ᒦ ᐃ ᐁᐲᒋ ᑫᒋᓈᐁᑕᒫᓐ ᑫᓃᓐ ᑫᑑᑕᐎᓈᓐ ᑳᐃᔑ ᐊᐱᒧᓄᑕᐎᓈᐹᓐ ᐁᑮ ᐊᐱᒧᔮᐹᓐ ᑳᑎᐯᒋᑫᒡ ᐃᔅᕒᐃᔭᓬᐊᐞ ᐌᑭᔐᒪᓂᑑᒥᒥᑯᒡ᙮ ᐊᐊ ᓴ ᔂᓬᐊᒪᓐ ᑭᑯᓯᔅ ᓂᑲ ᓈᐱᔥᑳᒃ ᒋᑭᒋᐅᑭᒫᐎᒡ, ᐐᓐ ᒋᐊᐱᒡ ᓂᑭᒋᐅᑭᒫᐗᐱᐎᓂᕽ᙮ ᓅᑯᒻ ᓴ ᑳᑮᔑᑲᒃ ᐃᐃ ᑕᐃᔑᓭ, ᐅᑮᐃᓈᓐ᙮ 31 ᒦᑕᔥ ᐹᔒᐸᐗᓐ ᑳᐃᔑ ᐊᓂᒥᑯᑖᓂᒡ, ᐁᑮ ᐅᒋᒌᑾᓇᐲᑖᓂᒡ ᐅᐅ ᐁᑮ ᐃᑭᑐᓂᒡ, ᑕᑲ ᓂᑑᑭᒫᒻ ᑌᐱᑦ ᑭᒋᐅᑭᒫ ᓀᐱᒡ ᑕᐱᒫᑎᓯ! ᑮᐃᑭᑐᐗᓐ᙮ 32 ᒦᑕᔥ ᐅᐅ ᑌᐱᑦ ᑭᒋᐅᑭᒫ ᑳᐃᑭᑐᒡ, ᑕᑲ ᐊᑐᒥᒃ ᓭᑕᒃ ᐊᓇᒥᐁᐎᑭᒫ, ᓀᑕᓐ ᑲᔦ ᑳᑲᓅᑕᒪᐙᒡ ᑭᔐᒪᓂᑑᓐ, ᐊᐊ ᑲᔦ ᐲᓈᐃᐊ ᐌᑌᑌᒡ ᒉᐅᐃᐊᑖᐗᓐ, ᑮᐃᑭᑐ᙮ ᐊᐲ ᑕᔥ ᑌᑯᔑᓂᓂᒡ ᑭᒋᐅᑭᒫ ᐁᔑᐊᔮᒡ, 33 ᒦ ᐅᐌᓂ ᑳᐃᓈᒡ, ᐐᔖᒥᑾᒃ ᓂᑕᓄᑮᐋᑲᓇᒃ ᒋᐐᒋᐃᓀᒀ᙮ ᓂᔔᔔᒥᑕᑎᒨᒥᕽ ᓴ ᐃᔑ ᐊᐱᐃᒃ ᓂᑯᓯᔅ ᔂᓬᐊᒪᓐ, ᐌᑎ ᑕᔥ ᐃᔑᐎᓈᑫᒃ ᐊᔮᐎᓂᕽ ᑳᐃᐊᓐ Gihon ᐁᒋᑳᑌᓂᒃ᙮ 34 ᒦᑕᔥ ᐌᑎ ᓭᑕᒃ ᐊᓇᒥᐁᐎᑭᒫ, ᐊᐊ ᑲᔦ ᓀᑕᓐ ᑫᓅᑕᒪᐙᒡ ᑭᔐᒪᓂᑑᓐ ᑫᑕᔑ ᐅᓈᐸᒫᐙᒡ ᔂᓬᐊᒪᓇᓐ ᒋᑭᒋᐅᑭᒫᑲᑕᐙᓂᒡ ᐃᔅᕒᐃᔭᓬᐊᐞ᙮ ᐴᑖᑕᒨᑫᒃ ᑲᔦ ᐴᑖᒋᑲᓐ ᐅᐅ ᒋᐃᔑ ᔖᑯᐌᔦᒃ, ᑭᓉᔥ ᔂᓬᐊᒪᓐ ᑭᒋᐅᑭᒫ ᑕᐱᒫᑎᓯ! 35 ᐅᐅᒫ ᑕᔥ ᐃᓇᑫ ᐱᔑ ᑮᐌ ᐐᒌᐙᑫᒃ, ᒋᓇᒪᑕᐱᒡ ᓂᑭᒋᐅᑭᒫᐗᐱᐎᓂᕽ ᒋᓈᐱᔥᑲᐎᒡ ᐁᔑ ᑭᒋᐅᑭᒫᐎᐗᒃ᙮ ᓃᓐ ᓴ ᓂᑮ ᐅᓀᓂᒫ ᒋᐅᑭᒫᑲᑕᕽ ᒎᑕ Judah ᐊᑮᓂ, ᐃᔅᕒᐃᔭᓬᐊᑭ ᑲᔦ, ᑮᐃᑭᑐ᙮ 36 ᒦᑕᔥ ᐅᐅ ᐲᓈᐃᐊᐗᓐ ᐌᑌᑌᓂᒡ ᒉᐅᐃᐊᑖᐗᓐ ᑮᐃᑭᑐᐗᓐ, ᑕᑲ ᓴ ᒦ ᐃ ᑫᐃᔑᓭᒃ! ᑕᑲ ᓴ ᑳᑎᐯᒋᑫᓂᒡ ᐌᑭᔐᒪᓂᑑᒥᒡ ᓂᑑᑭᒫᒻ ᐃᐃ ᑕᐃᑭᑐᐗᓐ᙮ 37 ᐃᐃ ᓴ ᑳᑎᐯᒋᑫᒡ ᑳᑮ ᐱᔑ ᐐᒌᐎᒃ ᓂᑑᑭᒫᒻ ᑭᒋᐅᑭᒫ, ᑕᑲ ᒦᐃᓇᑫ ᑫᔑ ᐐᒌᐙᒡ ᔂᓬᐊᒪᓇᓐ ᐋᒌᑫ ᒋᐃᔑᑑᒡ ᐅᑑᑭᒫᐎᐎᓂᓂ ᒋᐊᓂ ᑭᒋ ᐃᓀᑖᑾᓂᓂᒃ ᐊᐲᒡ ᑮᓐ ᐁᓀᑖᑾᒃ ᑭᑑᑭᒫᐎᐎᓐ! ᑮᐃᑭᑐᐗᓐ᙮ 38 ᒦᑕᔥ ᓭᑕᒃ ᐊᓇᒥᐁᐎᑭᒫ, ᓀᑕᓐ ᑲᔦ ᑫᓅᑕᒪᐙᒡ ᑭᔐᒪᓂᑑᓐ, ᐲᓈᐃᐊ ᑲᔦ ᐌᑌᑌᒡ ᒉᐅᐃᐊᑖᐗᓐ, ᐃᑭ ᑲᔦ ᑳᑲᓇᐌᒋᑫᐙᒡ, ᑮᐃᔖᐗᒃ ᐁᐊᑕᐎ ᐅᓇᐱᐋᐙᒡ ᔂᓬᐊᒪᓇᓐ ᑌᐱᑑᓐ ᐅᔔᔔᒥᑕᑎᒨᒥᓃᕽ᙮ ᐅᑮ ᐃᔑ ᐐᒌᐙᐙᓐ ᐃᑕᔥ ᐌᑎ ᐊᔮᐎᓂᕽ ᑳᐃᐊᓐ ᐁᒋᑳᑌᓂᒃ᙮ 39 ᒦᑕᔥ ᓭᑕᒃ ᐊᓇᒥᐁᐎᑭᒫ ᑳᐃᔑ ᐅᑖᐱᓇᕽ ᐁᔥᑲᓂ ᐊᑑᐹᓐ ᐁᔑ ᐲᑌᓂᒃ ᐱᒥᑌ ᑭᒋ ᐊᓇᒥᐁ ᐸᒀᓀᑲᒥᑯᕽ ᑳᑮ ᐱᐅᒋ ᐲᑑᒡ᙮ ᒦᔥ ᑳᑮ ᓰᑭᓇᕽ ᔂᓬᐊᒪᓇᓐ ᐅᑎᒀᓂᓃᕽ ᐁᐃᓇᑭᒫᒡ ᒋᑭᒋᐅᑭᒫᐎᓂᒡ᙮ ᒦᔥ ᑳᐃᔑ ᓅᑖᑯᑑᐙᒡ ᐴᑖᒋᑲᓐ ᑲᑭᓇ ᐯᒫᑎᓯᐙᒡ ᐁᑮ ᐃᔑ ᔖᑯᐌᐙᒡ, ᑕᑲ ᑭᓉᔥ ᔂᓬᐊᒪᓐ ᑭᒋᐅᑭᒫ ᑕᐱᒫᑎᓯ! 40 ᒦᑕᔥ ᑲᑭᓇ ᐯᒫᑎᓯᐙᒡ ᑳᐃᔑ ᑮᐌ ᐐᒌᐙᐙᒡ ᐁᑮ ᑭᑐᒋᑳᑫᐙᒡ ᐴᑖᒋᑲᓀᓴᓐ, ᐐᑫ ᑲᔦ ᐁᑮ ᑭᒋ ᒌᑫᑕᒧᐙᒡ᙮ ᒦᔥ ᑳᑮ ᐅᒋ ᑯᔥᑯᓭᓂᒃ ᒥᑕᑲᒥᒃ ᐁᑮ ᑭᔒᐌᐙᒡ᙮ 41 ᐊᑐᓈᐃᒐ Adonijah ᑕᔥ, ᐃᐃ ᑲᔦ ᑲᑭᓇ ᑳᐐᒌᐎᑯᒡ ᐁᐊᓂ ᐃᔥᒀ ᐐᓯᓂᐙᒡ, ᐅᑮ ᓅᑖᓈᐙ ᐃᐃ ᐁᓂᑖᑾᓂᓂᒃ᙮ ᐁᓅᑕᒧᐙᒡ ᐃᑕᔥ ᐴᑖᒋᑲᓐ ᒦ ᐃ ᒎᐊᑉ Joab ᑳᐃᑭᑐᒡ, ᐊᒪᓐᒡ ᐃᓈ ᐁᓍᑌᑴᓐ ᐃᐃ ᑲᑭᓇ ᑳᓅᑕᒪᕽ ᐅᐅᒫ ᐆᑌᓈᕽ? ᑮᐃᑭᑐ᙮ 42 ᒣᒀ ᐁᑮᑭᑐᒡ, ᒞᓇᑕᓇᓐ Jonathan ᐌᑌᑌᓂᒡ ᐊᓇᒥᐁᐎᑭᒫᓐ ᐊᐹᐃᑕᕒᐊᓐ ᑮᐱ ᑕᑯᔑᓅᓐ᙮ ᐊᑐᓈᐃᒐ ᑕᔥ ᐅᑮᐃᓈᓐ, ᐲᑎᑫᓐ᙮ ᓭᓭᑳ ᐃᓂᓃᐎᔭᓐ, ᑫᒋᓈᒡ ᒫᐐᓐ ᓴᓭᑳ ᑎᐹᒋᒧᐎᓐ ᑭᐲᑑᓈᑐᒃ! ᐅᑮᐃᓈᓐ᙮ 43 ᒦᑕᔥ ᐅᐅ ᑳᐃᑯᒡ ᒞᓇᑕᓇᓐ, ᑳᐐᓐ ᑲᓇᑫ ᓴᓭᑳ ᑎᐹᒋᒧᐎᓐ ᓂᑕᔮᓰᓐ᙮ ᑭᑐᑭᒫᒥᓈᓐ ᑌᐱᑦ ᑭᒋᐅᑭᒫ ᓴ ᐅᑮ ᐃᔑᐋᓐ ᔂᓬᐊᒪᓇᓐ ᒋᑭᒋᐅᑭᒫᐎᓂᒡ᙮ 44 ᑭᒋᐅᑭᒫ ᐅᔕ ᐄᓴᓐ ᐅᑮ ᐃᔑᓂᔕᐙᓐ ᓭᑕᑰᓐ ᐊᓇᒥᐁᐎᑭᒫᓐ, ᓀᑕᓇᓐ ᑲᔦ ᑫᓅᑕᒪᐙᓂᒡ ᑭᔐᒪᓂᑑᓐ, ᐲᓈᐃᐊᐗᓐ ᑲᔦ ᐌᑌᑌᓂᒡ ᒉᐅᐃᐊᑖᐗᓐ, ᐃᐃ ᑲᔦ ᑳᑲᓇᐌᒋᑫᓂᒡ ᑲᔦ ᒋᐅᓇᐱᐋᓂᒡ ᔂᓬᐊᒪᓇᓐ ᑌᐱᑑᓐ ᐅᔔᔔᒥᑕᑎᒨᒥᓃᕽ᙮ 45 ᓭᑕᒃ ᐊᓇᒥᐁᐎᑭᒫ ᓴ, ᐊᐊ ᑲᔦ ᓀᑕᓐ ᑫᓅᑕᒪᐙᒡ ᑭᔐᒪᓂᑑᓐ ᐅᑮ ᑕᔑ ᐅᓇᑭᒫᐙᓐ ᒋᑭᒋᐅᑭᒫᐎᓂᒡ ᔂᓬᐊᒪᓇᓐ ᐌᑎ ᐊᔮᐎᓂᕽ ᑳᐃᐊᓐ᙮ ᒦᑕᔥ ᐌᑎ ᑳᐱ ᐅᒌᐙᒡ ᐅᐅ ᑳᒌᑫᑕᒧᐙᒡ, ᒦᔥ ᑳᐅᒋ ᐅᒻᐺᑲᒥᑲᒃ ᐅᐅᒫ ᐆᑌᓈᕽ᙮ ᒦ ᓴ ᐃᐌ ᑳᓅᑕᒣᒃ ᑳᑭᒋ ᐃᓂᑖᑾᒃ᙮ 46 ᔂᓬᐊᒪᓐ ᐃᑕᔥ ᓅᑯᒻ ᑭᒋᐅᑭᒫᐎ ᐁᐊᐱᒡ ᑭᒋᐅᑭᒫᐗᐱᐎᓂᕽ᙮ 47 ᑭᒋᐅᑭᒫ ᑕᔥ ᑲᔦ ᐅᑕᓄᑮᐋᑲᓇᐞ ᐅᑮ ᑭᑌᓂᒥᑯᐞ ᑌᐱᑦ ᑭᒋᐅᑭᒫ ᐅᐅ ᐁᑮᐃᑯᒡ, ᑕᑲ ᑭᑭᔐᒪᓂᑑᒻ ᑕᐃᔑᒋᑫ ᓇᐗᒡ ᔂᓬᐊᒪᓐ ᐅᐐᓱᐎᓐ ᒋᑭᒋ ᐃᓀᑖᑾᓂᓂᒃ ᐊᐲᒡ ᑮᓐ, ᐅᑑᑭᒫᐎᐎᓐ ᑲᔦ ᓇᐗᒡ ᒋᑭᒋ ᐃᓀᑖᑾᓂᓂᒃ! ᒦᑕᔥ ᑭᒋᐅᑭᒫ ᑳᐃᔑ ᐊᓂᒥᑯᑖᒡ ᐅᓂᐯᐎᓂᕽ ᐁᑮ ᐊᓇᒥᐋᒡ᙮ 48 ᒦᔥ ᐅᐅ ᑭᒋᐅᑭᒫ ᑳᐃᑭᑐᒡ, ᑕᒦᑴᒋᐌᑖᑯᓯ ᑳᑎᐯᒋᑫᒡ, ᐃᔅᕒᐃᔭᓬᐊᒃ ᐌᑭᔐᒪᓂᑑᒥᐙᒡ ᐁᐙᐸᒥᒪᒃ ᐯᔑᒃ ᓂᐲᐌᓰᒪᓐ ᓅᑯᒻ ᑳᑮᔑᑲᓂᓂᒃ ᐁᓈᐱᔥᑲᐎᒥᒡ ᒋᑭᒋᐅᑭᒫᐎᓂᒡ, ᐅᑮᐃᑰᓐ ᒞᓇᑕᓇᓐ᙮ 49 ᑲᑭᓇ ᑕᔥ ᐊᑐᓈᐃᒐ ᑳᑮ ᐐᒌᐎᑯᒡ ᑮᓭᑭᓯᐗᐞ, ᒦᔥ ᑳᐊᓂ ᐃᔑ ᒫᒑᓂᒡ ᐁᑕᔑᓂᒡ ᐁᑮ ᒥᓯᑌᔥᑳᓂᒡ᙮ 50 ᐊᑐᓈᐃᒐ ᓴ ᑳᐊᐲᒋ ᑯᓵᒡ ᔂᓬᐊᒪᓇᓐ, ᑮᐃᔖ ᑭᒋ ᐊᓇᒥᐁ ᐸᒀᓀᑲᒥᑯᕽ ᐁᑮ ᐊᐎ ᓴᑭᓇᕽ ᑮᑫᔮᕽ ᐁᔑ ᑲᑳᔑᒋᑳᑌᓂᒃ ᐁᔑ ᐸᑭᑎᓈᓱᐎᓐᒡ᙮ 51 ᒦᑕᔥ ᔂᓬᐊᒪᓐ ᑳᑮᐃᓂᓐᒡ, ᐊᑐᓈᐃᒐ ᓴ ᐅᑯᓵᓐ ᔂᓬᐊᒪᓇᓐ ᑭᒋᐅᑭᒫᓐ, ᒦᔥ ᑳᐅᒋ ᓴᑭᓇᕽ ᑮᑫᔮᕽ ᐁᔑ ᑲᑳᔑᒋᑳᑌᓂᒃ ᐁᔑ ᐸᑭᑎᓈᓱᐎᓐᒡ᙮ ᐅᐅ ᐄᓴᓐ ᑲᔦ ᑮᐃᑭᑐ, ᑕᑲ ᓴ ᔂᓬᐊᒪᓐ ᑭᒋᐅᑭᒫ ᑕᐊᐱᒧ ᓅᑯᒻ ᑳᑮᔑᑲᓂᓂᒃ ᐸᔑᐸᐃᑫᐎᑯᒫᓂᕽ ᒋᐅᒋ ᓂᓯᑰᐙᓯᐗᒃ, ᐅᑕᓄᑮᐋᑲᓂᕽ ᐁᐃᓀᑖᑯᓯᐗᒃ, ᑮᐃᓈ ᔂᓬᐊᒪᓐ᙮ 52 ᔂᓬᐊᒪᓐ ᐃᑕᔥ ᐅᐅ ᑮᐃᑭᑐ, ᑮᔥᐱᓐ ᓴ ᐁᓀᑕᒧᑴᓐ ᑾᔭᒃ ᒋᐐᒋᑣᒡ ᐁᔑ ᐅᑭᒫᐎᐗᒃ, ᑳᐐᓐ ᑲᓇᑫ ᐯᔑᒃ ᐐᓂᓯᔅ ᒥᑕᑲᒥᒃ ᑕᐃᔑ ᐸᑭᓯᓰᓂᓂ; ᑮᔥᐱᓐ ᐃᑕᔥ ᐐᓐ ᑫᑰᓐ ᑳᐃᔑ ᒪᒫᔒᑴᓐ, ᒦ ᓴ ᐃ ᒋᓂᐳᒡ, ᑮᐃᑭᑐ᙮ 53 ᒦᑕᔥ ᔂᓬᐊᒪᓐ ᑳᐃᔑ ᐊᓅᓈᒡ ᐅᑎᓂᓃᒪᐞ ᒋᓈᓯᑲᐙᓂᒡ ᐊᑐᓈᐃᒐᐗᓐ ᑳᑮ ᐃᔑ ᓴᑭᓇᒥᓂᒡ ᐁᔑ ᐸᑭᑎᓈᓱᐎᓐᒡ᙮ ᐊᐲ ᑕᔥ ᑳᐲᔖᓂᒡ ᐁᔑᐊᔮᒡ ᔂᓬᐊᒪᓐ ᑭᒋᐅᑭᒫ, ᒦ ᓴ ᑳᐃᔑ ᐊᓂᒥᑯᑖᓂᒡ ᒥᑕᑲᒥᒃ᙮ ᒦᔥ ᐅᐅ ᑳᐃᓈᒡ, ᒫᒑᓐ ᐊᓂ ᑮᐌᓐ, ᐁᑮᐃᓈᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society