Taitahs 3 - Ojibwe Kihcimasina'ikan

Aaniin keshipimaatisihpan otanami'aa

¹ Wiintamawihkwak itahsh cipatapiihtawaawaatc kaatipenimiwenitc, i'i kaye kaaokimaawentaakosinitc, cinana'ihtawaawaatc mooshak iko ciwawehpemiiwaatc citootamowaatc kaaonishihshininik.

² Wiintamaw kaye cimaci‑inaahsikwaa awiyan, mooshak itahsh iko ciwaapanta'aawaatc kahkina awiya' e'noohkenimaawaatc, pisaan iko kaye awiya' e'minowiiciiwaawaatc.

³ Aaniihsh kekiinawint aapitink kikiihkakiipaatisimin, ekiihshashiipihtamank, ekii'wanihshimikooyank kaye, ekiihtipenimikoyank wekonen iko mihsawencikanan, ekii'antawentamank mooshak ciminomanci'oyank. Kekiinawint iitok kikii'macitashinkemin, kikii'mihsawentamaakemin kaye, ekiihshiinkenimikooyank, ekii'nishkenintiyank kaye kahkina.

⁴ Ahpii tahsh Kishemanitoo kitOopimaaci'iweminaan okishewaatisiwin kiinaakohtootc, 'iwe nahke kaye kaaishishawenimaatc i'i pemaatisinitc,

⁵ kikiihpimaaci'ikonaan. Kaawiin tahsh wiin kiminoanohkiiwininaanink kaakii'ishihcikeyank, i'imaa hsa wiin iko okoohpaasinaakewin kikii'oncipimaaci'ikonaan. A'a hsa Kishemanitoo otAhcaahkwan kikii'ishihcike'ikonaan, kikiihkisiiyaapaawanikonaan ekii'oshkinihtaawiki'inank, oshkipimaatisiwin kaye ekii'miininank.

⁶ Miihsh ono otAhcaahkwan Kishemanitoo kaakii'wenooci⁠siikinamawinank Ciisahs Christ kaapimaaci'inank onci.

⁷ Mii hsa tahsh okishewaatisiwinink cionci‑inakiminank kwayahk ciminowiiciiwank, kaye citepinamank i'i pimaatisiwin wiihkaa keishkwaahsehsinok kaa‑ahpenimonotamank.

⁸ Tepweyentaakwan itahsh o'o ihkitowin. Kinantawenimin itahsh weweni ciwiintamaakeyan ono kihcikekoonan, iki hsa kaatepwehtawaawaatc Kishemanitoon ciayaankwaamisiwaatc aahpici ciminotootamowaatc mooshak. Aahpici aaniihsh minonaakwan i'i cikii‑ishihcikenaaniwankipan, kahkina kaye awiya taonciminohse.

⁹ Keko tahsh wiin wiici'aahken awiyak anihshaa piko kaakiihkaantiwaatc kaye kaamihkootamowaatc aanti kaapiontahkaanesiwaatc, kaye maashikanoonitiwaatc. Keko kaye wiicihtoohken ehkakweshaakoosontink i'i onahshowewin kaaihkitoomakahk, aaniihsh kaawiin kekoon tainaapatahsinoon i'i ishihcikenk. Kaawiin kaye kekoon ahpiihtentaakwahsinoonan.

¹⁰ Kiishpin itahsh awiya kaawanishkwe'iwetc, ayaankwaamim aapitink, piinihsh itahsh niishwaa (2), mii hsa ishiaanawenim pisintawihsinohk.

¹¹ Kikihkentaan aaniihsh a'a inini e'maci‑ishiwepisitc, i'imaa hsa otishihcikewinink oncinaakwanini e'wanitootank.

Ishkwaac kaakii‑ishianoonaatc Taitahsan

¹² Ahpii tahsh piicinisha'wak Aartimahs (Artemas) komaa kaye Tihkihkahs (Tychicus) weti kaaishiayaayan cinaapishkawihk, wiinke kakwekashkihtoohkan cipiantawaapamiyan weti Nihkaahpalihs (Nicopolis) ootenaank, aaniihsh aasha ninkii'inentam ewiihtashipipoonihshiyaan weti.

¹³ Wiinke tahsh kakwewiici' 'awe Siinahs (Zenas) onaatamaake, Ahpwaalahs (Apollos) kaye, cimaacaawaatc i'i kaawiihpapaami/⁠ayaawaatc, kehcinaac kaye ciwiici'atwaa kekoonini cinoontehsehsikwaa.

¹⁴ Mii hsa eshinaakwaninik kiwiicitepwehtamoominaanik cikihkentamowaahpan mooshak iko cikakweminotootamowaatc, cikashkihtamaasowaatc kekoonini cinoontehsehsikwaa. Kaawiin wiin anihshaa piko cimihcipimaatisiwaahpan.

¹⁵ Oko tahsh kahkina kaawiiciiwiwaatc kipooshoo'ikowaak. Pooshoohtamawihshinaam itahsh cipooshoo'atwaa kaye oko kaasaaki'iyamintwaa onci 'iwe kitepwehtamowininaanink. Kishemanitoo okishewaatisiwin kikawiiciiwikom kahkina kaatahshiyek.