Taitahs 2 - Ojibwe Kihcimasina'ikan

Kaakwayahkohsink kihkino'ikewin

¹ Kiin itahsh wiin ishikihkino'amaaken peshikwan ci‑inentaakwahk i'i kaakwayahkohsink kihkino'ikewin.

² Kihkino'amaw ahkiwensiwak cikanawentamowaatc otishihcikewiniwaan, cinipwaahkaa⁠pimaatisiwaatc, kwayahk ci‑inentamowaatc, cimashkawitepwehtamowaatc kaye, cisaaki'iwewaatc, wiihkaa kaye cipakiciihsikwaa.

³ Iki kaye kaakihciaya'aawiwaatc ihkwewak cikii‑inaatisiwaahpan ihkwewak tino kaakohtaanenimaawaatc Kishemanitoon, kaawiin wiin cipapaa anoociko ihkitowaatc, citipenimikohsikwaa kaye shoominaapo, cikihkino'ikewaatc tahsh kaaonishihshininik,

⁴ cikihkino'amawaawaatc kaaoshkaatisinitc ihkwewa' cisaaki'aanitc onaapemini, cisaaki'aanitc kaye oniicaanihsini,

⁵ kwayahk kaye cikanawentaminitc opimaatisiwinini, cipehkaatisinitc kaye, kaaishitaanitc kaye citananohkiinitc, ciminwaatisinitc, cina'ihtawaanitc kaye onaapemini, Kishemanitoo otihkitowin hsa anoociko cionci‑icikaatehsininik.

⁶ Kakaansomihkwak itahsh kaye kaaoshkaatisiwaatc ininiwak kwayahk cikanawentamowaatc opimaatisiwiniwaan.

⁷ Kahkina tahsh kekoon kaaishihcikeyan, waapanta'iwen cikihkinawaapancikaatekin ini kiminohcikewinan, cikwayahkonaakwahkin ini kikihkino'ikewinan, cinipwaahkaa⁠pimaatisiyan.

⁸ Minokiishwewinan itahsh ehta aapacihtoon awiya anoociko ci‑inihsinohk, iki hsa kaashiinkenimihkwaa ta‑akaciwak, aaniihsh kikakwiinawi‑ikonaanik.

⁹ Iki kaye anohkii'aakanak cipatapiihtawaawaatc otookimaamiwaa', misiwe piko ci‑ishiminwaapamikowaatc, ciaayaashitemaahsikwaa kaye kiikanoonikowaatc.

¹⁰ Cikimootimaahsikwaa kaye otookimaamiwaa', i'i hsa ci‑ishihcikewaatc mooshak iko ciwaapanta'iwewaatc kwayahk e'ishipimaatisiwaatc, ehtepweyentaakosiwaatc kaye. Mii hsa tahsh misiwe i'imaa keoncikihci‑inencikaatek i'i kaaishikihkino'amaatinaaniwitc Kishemanitoo kitOopimaaci'iweminaan.

¹¹ Kishemanitoo aaniihsh okii'naakohtoon oshawencikewin kahkina pemaatisinitc keoncipimaaci'intwaa.

¹² Miitahsh i'imaa wencikihkentamank ciaanawentamank ini ishihcikewinan Kishemanitoo kaashiinkentank, ini kaye ahkiiwi‑⁠mihsawencikewinan. Miitahsh eshiantawenimikooyank weweni cikanawentamank kipimaatisiwininaan, cikwayahkwaatisiyank kaye, ci‑ishipimaatisiyank kaye Kishemanitoo kaaishipakohseniminank o'omaa ahkiink,

¹³ e'ahshawaapantamank itahsh i'i kaapiihtooyank kitahpenimowininaan keahpiihciminwentaakwahk, kaye ciwaapantamowank okihci‑inentaakowisin Christ Ciisahs kikihciKishemanitoominaan kaapimaaci'inank.

¹⁴ Wiin aaniihsh kiihpakitinitiso kiinawint onci, ekiihtipa'onank i'imaa kahkina macitootamowinink cioncitipentaakosihsiwank, kaye ekiihpehki'aatc pemaatisinitc wiin iko ewiihtipenimaatc, i'i mehsawentaminitc ewii'minohcikenitc.

¹⁵ Miiwan itahsh ono tashintan, kakaansom iki kaanoontawihkwaa kaye cionci'atwaa wanitootamowaatc. Aapacihtoon kaye kahkina kitahpiihtentaakosiwin kaaishiniikaanentaakosiyan. Keko pakitinaahken awiya ciaanawenimihk.