Taitahs 1 - Ojibwe Kihcimasina'ikan

¹ Niin Pwaal (Paul) Kishemanitoo otanohkii'aakanan, kaye Ciisahs Christ otishinisha'waakanan. Niin hsa kaye ninkii'onenimikoo, ciwiicihtaawak otepwehtamowiniwaan iki pemaatisiwaatc Kishemanitoon kaatipenimikowaatc, cikihkentamowaatc kaye tepwewinini i'iwe peshikwan kaainentaakwahk kitanami'aawininaan,

² eshiahpenimonotamank kaye i'i wiihkaa keishkwaahsehsinok pimaatisiwin Kishemanitoo kaakii'ahshotamawinank mewisha cipwaa maacihsek kekoon. Kaawiin aaniihsh wiihkaa kiiwanimohsii.

³ Ahpii tahsh mayaa ekii'ocihcihsenik, okii'naakohtoon o'o pimaatisiwin otihkitowinink. Kaye niin tahsh ninkii'inakimikoo cipapaatashintamaan, aaniihsh Kishemanitoo kaapimaaci'inank kii'inaahkonike.

⁴ Kiin Taitahs (Titus) kitooshipii'amawin, kiin kaaokosihsiminaan i'imaa peshikwan e'ishitepwehtamank. Taka Kishemanitoo Kaaoyoohsimintc kaye Ciisahs Christ kitOopimaaci'iweminaan kikawaapanta'ik okishewaatisiwin kaye pisaanisiwin kikamiinik.

Taitahs keinanohkiitc Kariihtihkaank

⁵ Mii hsa tahsh i'i kaakii'oncinakaninaan weti Kariiht (Crete) minihsink, cikwayahkonaman ono kaakiihkiishionahtehsinokin kaye cionaapamatwaa keniikaanisiwaatc anami'aawinink i'imaa kaatahsinkin ootenawan, ci‑ishihcikeyan kaakii'ininaan.

⁶ Miitahsh a'a kaaniikaanisitc anami'aawinink eshinaakwaninik kekoon ci‑ishianaamentaakosihsik, cimihcipeshiko'aatc kaye owiitikemaakanan, oniicaanihsa' kaye ciotepwehtamowininitc, citinowihsinikipan kaanihtaainimintc ehkiiwashkwenitc, ehshashiipihtaminitc kaye.

⁷ A'a hsa kaa⁠niikaani⁠kanawaapantank anami'aawin, ishinaakwanini wiinke piko kekoonini ci‑ishianaamentaakosihsik. Aaniihsh Kishemanitoon okanawencikehtamawaan. Kaawiin kaye wiin ehta ko taishpenintisohsii, kaawiin kaye ciwahkewikitaasotc, kaawiin kaye cinihtaaminihkwetc. Kaawiin kaye ciaahkwaatisitc, kaawiin kaye cisaaki'aatc shooniyaan.

⁸ Mii hsa tahsh ciminwentank cipiintikanaatc awiya' otaawinink, cisaakihtootc kaye kaaonishihshininik, weweni cipimaatisitc, kwayahk kaye citootawaatc awiya', kaye Kishemanitoon kaaishiminwentaminitc ci‑ishipimaatisitc. Cikashkihtootc kaye wiinke piko cikanawenintisotc aaniin eshipimaatisitc.

⁹ Oniikaanisii kaye okakihciwinaan i'i kaatepweyentaakwaninik ihkitowinini kaaishiayaanik kwayahk kihkino'amaatiwinink. Miitahsh keishikashkihtootc cikakaansomaatc awiya' kwayahk kihkino'amaakewinink kaye cishaakoosomaatc i'i kaa‑aashitemiwenitc.

¹⁰ Aahpici tahsh paahtiinowak kaashashiipihtamowaatc anoociko kaye e'ihkitowaatc, e'waniwishiwewaatc kaye. Miiwak oko kaakii'ishitipentaakosiwaahpan kaapioncikwehkaatisiwaatc i'imaa nahke Coowa' kaaishianami'aanitc.

¹¹ Miitahsh eshinaakwaninik cikakwekipihtinintwaa, aaniihsh onihshiwanaacihtamawaawaa' awiya' otepwehtamowinini, ampooshke kaatatahshinitc i'imaa taawinan cipoonitepwehtaminitc, e'ishikihkino'ikewaatc aaniin kekii'ishikihkino'ikehsikwaapan. Kaawiin kwayahk tootansiiwak, shooniyaan itahsh ehta kaaonci‑ishihcikewaatc.

¹² Peshik itahsh ini Kariiht ininiwak kaainakimaawaatc ekiihkanoocikehtamawaanitc manitoon o'o kii'ihkitowan: “Iki hsa Kariihtink kaa‑ayaawaatc mooshak kakiinawishkiwak, maciaya'aawihshink kaye inentaakosiwak, wiinke kaye ehkihtimishkiwaatc e'nihtaakaashakewaatc.”

¹³ Tepwe tahsh i'i kaakii'ihkitotc. Mii hsa tahsh i'i keonciayaankwaamimatwaa kwayahk tepwehtamowinink ci‑ishipimaatisiwaatc,

¹⁴ cipapaapisiskentansikwaa kaye ini Coowi aatihsoohkewinan, cipisintawaahsikwaa kaye aaniin enaahkonikenitc i'i ininiwa' kaakii'nakataminitc tepwewinini.

¹⁵ Iki tahsh kaapehkaatisiwaatc, kahkina kekoon pehkanini, iki tahsh wiin kaawiinaatisiwaatc, kaatepwehtansikwaa kaye, kaawiin kekoonini pehkahsinini, aaniihsh onaanaakatawentamowiniwaan kaye okihkenintisowiniwaan wiinentaakwaniniwan.

¹⁶ Miitahsh ehkitowaatc ehkihkenimaawaatc Kishemanitoon, otanohkiiwiniwaan itahsh otishinaakohtoonaawaa ehkihkenimaahsikwaa e'ishihcikewaatc, ehshiinkentaakosiwaatc, ehshashiipihtamowaatc kaye. Kaawiin itahsh kekoon ahpiihtentaakosihsiiwak, mihsawaa piko kwayahk cikii‑ishihcikewaahpan.