Taaniyoo 9 - Ojibwe Kihcimasina'ikan

Taaniyoo Okii'anami'ehtamawaa' Owiicipimaatisiima'

¹ Taraayahs (Darius) tahsh kaakii onciitc Miitiya ahkiink (Media) oteten Ahaasahiirahs (Ahasuerus) kii‑ishinihkaasowan. Mii hsa awe kaa⁠inakimintc ci⁠tipentank eshi okimaawentaakwaninik Paapilan (Babylon) ahki.

² Peshikopipoon itahsh kaa⁠okimaawitc, mii hsa 'i niin Taaniyoo kaakiih kakwe kihkentamaan eshipii'ikaatek kihci masina'ikanan, kaakii naanaakatawentamaan kaye kaawii ishi nihshiwanaacihcikaatek Ceroosalam (Jerusalem), niishwaahsimitana (70) tahsopipoon minihk. Mii iitok Kishemanitoo kaa'inaakopanen Ceramaayawan (Jeremiah) kaa⁠kanootamaakotc.

³ Miitahsh kaakii inaahsamiihtawak kaaTipenciketc ninKishemanitoom ekii anami'ehtawak. Ninkiih kakwecimaa ekii mantawii'itisowak ekiih kikishkamaan ahsapatapiiwekin, pinkwiihkaank kaye ekii ishi namatapiyaan.

⁴ Miitahsh kaakii anami'ehtawak kaaTipenciketc ninKishemanitoom ekiih tipaatotamowak eshi macitootaminitc niicipimaatisii' o'o ekii'inak, “Kiin Tepencikeyan Kishemanitoo, kiin hsa kikihci inentaakos, kikohtaanentaakos kaye. Aahpici hsa kitepweyentaakos e⁠nihtaa kanawentaman kitahshotamaakewin, e⁠waapanta'atwaa aaniin eshi saaki'atwaa iki seyaaki'ihkwaa, ne'ihtawihkwaa kaye enaahkonikewatc.”

⁵ “Ninkii maci'ishihcikemin ihsa, noociko ekii ishihcikeyaank, ekii maci'ishiwepisiyaank kaye, tako tahsh ekiih shashiipihtamaank. Ninkii nakataamin kaakii inaahkoniyaankipan ci‑ishihcikeyaank, kitoonahshowewinan ekii wepinamaank.

⁶ Kaawiin iitok ninkiih pisintawaahsiwaanaanik kitanohkii'aakanak kaa⁠kanootamawihkwaa, kiwiinsowin kaakii aapacihtoowaatc eh⁠kanoonaawaatc ninkihciokimaaminaanii', tepenimiyamintc kaye, ninkehteya'aaminaapanii' kaye, kahkina kaye pemaatisinitc o'omaa nintahkiiminaanink.

⁷ Tepencikeyan, kiin hsa kikwayahkwaatis, niinawint itahsh wiin wiinke nintakacihcikemin noonkom kaa⁠kiishikahk. Niinawint eyaayaank Coota (Judah) ahkiink, pemaatisiwaatc kaye eyaawaatc Ceroosalamink, kahkina hsa ko Isriyalak. Ikiweniwak kaye waahsa, pehsho kaye kaakii ishi misihte wepiniyaank onsaam aaniihsh kaawiin tepwe kwayahk kikiih tootaakoohsii.

⁸ Kiin Tepencikeyan, niinawint hsa nintookimaaminaanik, tepenimiyamintwaa, ninkehteya'aaminaanik kaye ninkii kihci akacihcikemin ekii macitootaakooyan.

⁹ Tepencikeyan ninKishemanitoominaan, kiin itahsh wiin kikoohpaatenimiwe, kipoonentamaake kaye, aanawiin ekiih shashiipihtaakooyan.

¹⁰ Tepencikeyan weKishemanitoomikooyan, kaawiin iitok kina'ihtaakoohsii, e⁠ishihcikehsiwaank ci⁠kanawentamaank kitinaahkonikewinan kaakii'ishiyaank kii⁠aapaci'atwaa kitanohkii'aakanak kaa⁠kanootamawihkwaa.

¹¹ Kahkina hsa ko Isriyalak okiih piikonaanaawaan kitinaahkonikewinan e⁠inentansikwaa ci⁠na'ihtawihkwaa. Miitahsh wenci tootawiyaank ci⁠pakamishkaakoyaank ini macakimikoowinan kaa‑aayiicipii'ikaatekin i'imaa masina'ikanink kaashi oshipii'ikaatenik Moosihs (Moses) Otoonahshowewin, onsaam aaniihsh kikii macitootaakoo.

¹² Kikiih tipi tootawinaam hsa ko kaakii'ishiyaankipan, kaakii'inaawatwaawaapanen kaye ninkehteya'aaminaapaniik ewiih tootawiyaank ci⁠kihci ishiwepisiyaank. Wiinke hsa kikii kihci nana'ahtoon Ceroosalam, kaawiin wiihkaa kekoon i'inahke kipi tootansiin o'omaa ahkiink.

¹³ Mii iitok eshipii'ikaatek i'imaa masina'ikanink Moosihs eshi oshipii'ikaatenik Otoonahshowewin, kahkina ono maanshihsewinan kaa⁠onci otihsikoyaank onsaam kaawiin kikiiwenotaakoohsii ci⁠kakwe ishihcikewaankipan ke⁠onci minwaapamiyaank kaaTipencikeyan ninKishemanitoominaan. Kaawiin kanake ci⁠nakatamaank nimaci'ishihcikewininaanin cikii na'ihtamaankipan kitepwewin.

¹⁴ Tepencikeyan, kaawiin iitok kikiih pwaahtawiihsii ci⁠kihci maanshihse'iyaank, aaniihsh kiin kitinow kaaTipenciketc ninKishemanitoominaan kaa⁠kwayahkonaakwahk entahso ishihcikeyan; shaakooc itahsh kaawiin kina'ihtaakoohsii.”

¹⁵ “Tepencikeyan weKishemanitoomikooyan, kikii naakohtoon hsa kimashkawisiiwin ahpii kaakiih saakiciwinatwaapan kipimaatisiimak Iicipahkiink (Egypt). Keyaapi tahsh noonkom kaa⁠kiishikahk nimaamihkawimin kimashkawisiiwin. Ninkii macitootaamin ihsa, noociko ekii ishihcikeyaank.

¹⁶ Kiin Tepencikeyan, taka hsa tahsh i'i kaashi nihtaa kwayahkohcikeyan, mii hsa 'i ishi poonikitaason, awahshime ci⁠nishki'ikohsiwan Ceroosalam kitootenaam eyaak waciink tepinawewisiyan. I'i hsa kaashi macitootamaank, kaakii ishi macitootamowaatc kaye ninkehteya'aaminaapaniik kaa⁠onci maanencikaatek Ceroosalam, kipimaatisiimak kaye kaa⁠onci maanenimikowaatc pemaatisinitc waahkaaya'ii eyaanitc.

¹⁷ WeKishemanitoomikooyan, taka tahsh noonkom noontawihshin o'o kaashi anami'ehtawinaan, eh⁠kakweciminaan kaye, kitanohkii'aakanink eh⁠tinowiyaan. Kiwiinsowin onci kiiwe naapahtoon kaakii ishinaakwahkipan kitanami'ewikamik kaakii nihshiwanaacihcikaatekipan, entahshiwaatc awiyak ci⁠kihkentamowaatc kiin eh⁠Kishemanitoowiwatc kiin onci.

¹⁸ Kishemanitoo taka noontawihshin, kanawaapamihshinaam kaye ci⁠waapamiyaank o'o kaashi kakwaatakihtooyaank, eshi kakwaatakihtoomakahk kaye kitootenaam kaa⁠tanentaakwahk kiwiinsowin. E⁠nihtaa koohpaatenimiweyan ohsha o'o kaa⁠onci ishi anami'ehtaakooyan, kaawiin wiin niinawint eh⁠kwayahkwaatisiyaank.

¹⁹ Tepencikeyan, noontawihshinaam, Tepencikeyan, poonentamawihshinaam kaye. Tepencikeyan, ishihciken ekooyan! Keko pwaahtawiihken. Miitahsh entahshiwaatc awiyak ci⁠kihkentamowaatc eh⁠Kishemanitoowiwatc aaniihsh eshi'ayaawaatc kipimaatisiimak, kitootenaamink kaye tanentaakwan kiwiinsowin,” ninkii ishi anami'aa.

Kepariyal Kiiwiintank Eshihsininik I'i Ishinamowin

²⁰ Ninkiih kakit e⁠anami'aayaan, ekii waawiintamaan nimacitootamowinan, omacitootamowiniwaan kaye niicipimaatisiik Isriyalak, eh⁠kakwecimak kaaTipenciketc ci⁠kiiwe naapahtootc kaakii ishinaakwaninikipan tepinawewisitc otanami'ewikamik.

²¹ Mekwaa keyaapi e⁠anami'aayaan, mii 'i kaakii waapamak Kepariyal otaanaank kaakii waapamakipan kii‑ishinamaampaan, ehpi kishiihsetc ehpi naasihkawitc eshi'ayaawak, ahpii kii⁠onaakohshi pakitinaahsowintc.

²² Ninkiih pi naasihkaak itahsh o'o ekii'ishitc, “Taaniyoo, mii hsa wenci piishaayaan ewiih kihkentamooninaan, ci⁠nihsitohtaman kaye o'o eshihsink.

²³ Ahpii ohsha ko kii⁠maacii anami'aayan kikii nahkwehtaakoo, miihsh i'i kaapi wiintamawinaan. Wiinke iitok kikihci inenimikoo. Pisintawihshin itahsh ewii wiintamawinaan ci⁠nihsitohtaman i'i ishinamowin.”

²⁴ “Niishwaahcink (7) niishwaahsimitana (70) tahsopipoon hsa Kishemanitoo okii ishi onahtoon ci‑ishihsenik ahpii ke⁠pakitinaatc kipimaatisiima', ci⁠pakitinikaatek kaye kehtentaakwaninik kitootenaamiwaa ci⁠papaamenimikohsiwek awahshime maci'ishiwepisiwin, macikekoon kaye. Miihsh macitootamowin ci⁠poonencikaatek, weweni inaahkonikewin kaye ci⁠nehpici ayaak. Miihsh kaye 'i niikaani tipaacimowin tepwe ci‑ishihsek, i'i kaye kihci anami'ewikamik ci⁠kiiwe kihtentaakohcikaatek.

²⁵ O'o tahsh kihkentan ci⁠kakwe nihsitohtaman, ahpii inaahkonikaaniwank ci⁠kiiwe onahcikaatek kaakii ishinaakwahkipan ootena Ceroosalam, mii hsa i'imaa ke⁠onci maacii akincikaatek piinihsh itahsh ci⁠takohshininitc Kishemanitoo ke⁠onaapamaatc ke⁠niikaaniinitc. Mii hsa 'i niishwaahcink (7) niishwaahso (7) tahsopipoon aasha ci‑ishkwaahsek. Miitahsh miihkanawan ci⁠kiiwe oshihcikaatekin i'imaa Ceroosalamink, ci⁠soonkihcikaatek kaye waahkaayaapihkinikan. Niishwaahcink (7) ninkotwaahsimitanashiniishin (62) tahsopipoon hsa ehta ta‑ayaamakan, miitahsh wiin i'i ke⁠kihci ocaanimi kiishikahk kaa'icikaatek.

²⁶ Ahpii hsa tahsh niishwaahcink (7) ninkotwaahsimitanashiniishin (62) tahsopipoon ishkwaahsek, mii hsa 'i ahpii Kishemanitoon kaa⁠onaapamikotc ci⁠niikaaniitc eshkwaahtiko ke⁠nihsintc. Ke⁠mashkawentaakositc hsa kihciokimaa oshimaakanihshiima' ta⁠piishaawa' cipi nihshiwanaacihtoonitc ootena, kihci anami'ewikamikoni kaye. Taapishkoo kaapi⁠nihkipiik hsa ta⁠inentaakwan ahpii kekoon ishkwaahsek. Miitahsh ci⁠miikaatinaaniwank, ishiwepahk kaye kekoon ci⁠nihshiwanaacihcikemakahk ci‑ishihsenik Kishemanitoo kaakii ishi kwayaantentank.

²⁷ A'a hsa tahsh ke⁠tipenimiwetc oka aayiici ahshotamawaa' niipiwa' pemaatisinitc niishwaahso (7) pipoon minihk. Aapihta niishwaahso pipoon itahsh ishihsenik, mii 'i ci⁠kiishkinank pakitinaahsowinan, miikiwewinan kaye. I'i hsa tahsh Kekwaanihsakinaakwaninik kaa⁠Nihshiwanaacihcikemakaninik ta‑ahcikaate i'imaa maawac eshi ishpaak kihci anami'ewikamik. Miitahsh i'imaa ke⁠ayaanik piinihsh a'a i'imaa kaakii ahtoohpan ci⁠nakishkank keshi nihshiwanaatisitc Kishemanitoon kaakii ishi onentaminitc.”