Taaniyoo 7 - Ojibwe Kihcimasina'ikan

Taaniyoo Kiihtashintank Otishinamowin

¹ Nihtam eh⁠pipooninik itahsh Pelshaasaran (Belshazzar) kii⁠kihciokimaawinitc Paapilan (Babylon) ahkiink, niin Taaniyoo (Daniel) ninkiih pawaacike e⁠nipaayaan, kekoon ekii ishinamaan nintinentamowinink. Miitahsh kaa⁠ishi oshipii'amaan i'i nintishinamowin ci⁠ani kihkencikaatek.

² Ninkii ishi pawaacike hsa eh⁠tipihkahk, ekii waapantamaan niiwink inahke kaa⁠ontaanimahk ekii ishi mikoshkaacihcikemakahkin i'imaa kihcikamiink.

³ Miitahsh niiwin kihci aya'aawihshak eh⁠pepahkaaninaakosiwaatc kii⁠onci akwaasiiwak kihcikamiink.

⁴ A'a hsa nihtam kaakii akwaasiitc mihshipishiink kii‑ishinaakosi, ekii ishi ninkwiikanetc mikisiink. Mekwaa tahsh eh⁠kanawaapamak kii⁠manipicikaateniwan oninkwiikanan, miihsh kaa⁠ishi mayaawinikaniwitc ci⁠niishoositekaapawitc taapishkoo inini. Ininiink cishi naakatawentank kii‑ishi miinikoowisi.

⁵ Miinawaa tahsh kotak aya'aawihsh ninkii waapamaa e⁠akwaasiitc, mahkonk ekii ishinaakositc, mii 'i niishin aya'aawihshak ekii waapamakwaa. Ininiink tahsh kii‑ishi ompikaapawi, nihsin ohpikayimaa' ekiih kihciwamaatc wiipitink. Awiyan tahsh okii'ikoon, “Haw, temiicin i'i wiiyaahs.”

⁶ Mekwaa hsa eh⁠kanawaapamakwaa, miinawaa hsa kotak aya'aawihsh ninkii waapamaa e⁠akwaasiitc, paahpaahte kihci pooshiinsink ekii ishinaakositc. Kii⁠niiwininiwan tahsh oninkwiikanan opihkwanink pinehshiinshink ekii ishi ninkwiikanetc, kii⁠niiwihtikwaane tahsh kaye. Kii‑ishi miinikoowisi tahsh ci⁠kashkihtootc ci⁠tipenciketc.

⁷ Mekwaa hsa eh⁠kanawaapamakwaa miinawaa ninkii waapamaa kotak aya'aawihsh e⁠akwaasiitc wiinke e⁠kohtaasinaakositc, ci⁠kohsintc ekii ishinaakositc, wiinke ekii mashkawentaakositc. Mii hsa 'i niiwin aya'aawihshak ekii waapamakwaa. A'a tahsh aya'aawihsh ekiih papiiwaapihkwaapitetc ekii mamaankaapitetc; ekiih shikwamaatc, ekiih kitaapani'aatc kaye kaa⁠miikaanaatc. Ekii shikoshkank kaye kaakii ishkwantank. Wiinke kii⁠kihci pahkaaninaakosi i'i kaakii ishinaakosinitc kotak kahkina aya'aawihsha'. Mitaahso (10) kaye kii⁠tahshiwa' oteshkana'.

⁸ Mekwaa tahsh eh⁠kanawaapamimak oteshkana', ninkii onci waapamaa hsa peshik eshkanenhs ehpi saakikitc mekweya'ii kaakii ishi'ayaanitc eshkana'. Nihsin tahsh eshkana' okii pahkwacishkawaa'. A'a tahsh eshkanenhs kii⁠oshkiinshiko ininiink ekii ishishkiinshikwetc, kii⁠otooni kaye kaakii onci maamiihkwaanitisotc.

Taaniyoo Kiihpawaanaatc Ini Nehpic Kaapipimaatisinitc

⁹ E⁠inaapiyan itahsh, ninkii waapanke hsa kihciokimaawapiwinan e⁠onahcikaatekin. A'a hsa tahsh kaakike kaapi pimaatisitc kii⁠onapi i'imaa kihciokimaawapiwinink. Okikishkikanan hsa koonink kii⁠ahpiihci waapishkaaniwan; wiinisihsan kaye wiinke kii⁠waapishkaaniwan taapishkoo maanahcaanihshiwayaan kaashi waapishkisitc. Miihsh kaa⁠ishinaakwaninik okihciokimaawapiwin taapishkoo e⁠piskanenik e⁠apiihtank, kaakii ishi tihtipihsehkantenik kaye ekiih kishipahkonehsenik.

¹⁰ Miitahsh i'imaa kaa⁠onciciwaninik ishkote siipiini kaakii ishi'ayaatc. Niipiwa' kihcimitaahswaahk awiya' okiih pi anta anohkiihtaakoo'; kaa‑ahpiihci paahtiinonitc kaawiin takiih tepakimaahsiiwa' e⁠niipawinitc enaahsamiitc. Miitahsh kaa⁠ishi onapinaaniwank ewiih tipaahkonitink, masina'ikanan tahsh kii⁠paahkiikinikaatewan.

¹¹ Mekwaa tahsh eh⁠kanawaapiyaan, ninkii noontawaa hsa a'a eshkanenhs e⁠kihci maamiihkwaanitisotc, eh⁠kakihcimotc kaye. Ninkiih kanawaap itahsh e⁠nihcikaniwitc a'a aya'aawihsh kaa⁠kohtaasinaakositc. Owiiyaw tahsh kii⁠macohte wepinikaateni, miihsh kaa⁠ishi nihshiwanaacihcikaatenik.

¹² Iki tahsh wiin kotak aya'aawihshak kii⁠otaahpinamawaawak omashkawisiiwiniwaan; shaakooc tahsh kii⁠nankinamawaawak keyaapi acina ci⁠pimaatisiwaatc.

¹³ Miitahsh o'o kaa⁠ishinamaan eh⁠tipihkahk, ekii waapamak awiya ininiwan wekosihsimikotc e⁠ishinaakositc, ekiih pi naasihkawaatc mekwewahkwiink ehpi ayaatc. Iniweniwan tahsh kaakike kaapi pimaatisinitc okiih pi'anta waapamaan. Miihsh weti kaa⁠ishiwinintc eshi'ayaanitc.

¹⁴ Miitahsh kaakii miinintc kashki'ewisiwin, kihci inentaakosiwin, kihciokimaawi mashkawisiiwin kaye, kahkina tahsh pemaatisinitc, kaa⁠pepahkaanwewaanakisinitc kaye, aaniin hsa ko kaa⁠tahso ishikiishwenitc pemaatisinitc okii anami'ehtaakoo'. I'iweni tahsh kaashi tipenciketc ta⁠nehpici ayaani, kaawiin kaye wiihkaa ta⁠poonihsehsinini. Kaashi kihciokimaawitc hsa kaawiin wiihkaa ta⁠nihshiwanaacihcikaatehsinini.

Otishinamowin Ekiiwiintenik Eshihsininik

¹⁵ Wiinke tahsh ninkii wawaanentami'ikoon nintishinamowin, wiinke kaye ninkii onci mikoshkaatentam.

¹⁶ Miitahsh kaa⁠ishi anta waapamak a'a peshik pehsho kaakii niipawitc i'imaa, ekiih kakwecimak tepwe ci⁠wiintamawitc aaniin eshihsininik kahkina onoweniwan kaakii ishinamowak. Miitahsh kaa⁠ishi wiintamawitc aaniin eshihsininikin.

¹⁷ Miitahsh o'o kaa⁠ihkitotc, “Iki hsa niiwin kihci aya'aawihshak kaakii waapamatwaa, miiwan hsa iki niiwin kihciokimaawiwinan o'omaa ahkiink keni ayaakin.

¹⁸ Iki tahsh pemaatisiwaatc ke⁠tipenimikowaatc Maawac Eshpentaakosinitc oka tepinaanaawaa i'i tipencikewin, wiinawaa tahsh iko nehpic ta⁠tipinawewisiwak, tepwe hsa 'i nehpic ta⁠ishihsewak!”

¹⁹ Shaakooc tahsh tepwe ninkiiwiih kakwe kihkenimaa ecikaniwikwen a'a ishkwaac niiwin aya'aawihsh maawac iko kihci pahkaan kaakii ishinaakositc kahkina kotak aya'aawihsha'. Wiin hsa maawac ekiih kohtaasinaakositc, ekiih piiwaapihkwaapitetc, oshkashii' kaye osaawaapihkonk ekiih tinowinitc. A'a aya'aawihsh kaakii shikwamaatc, kaakiih kitaapani'aatc kaye kaa⁠miikaanaatc, kaakii shikoshkank kaye i'i kaakii ishkwantank.

²⁰ Ninkiiwiih kakwe kihkenimimaa' tahsh kaakii mitaahcinitc oteshkana' a'a aya'aawihsh, a'a tahsh kaye kotak eshkanenhs kaakii moohkiishkaatc i'imaa mekweya'ii, nihsin tahsh eshkana' ninkoci kaakii ishi wepishkawaatc. Mii iitok a'a eshkanenhs kaakii oshkiinshikotc, kaakii otoonitc kaye, wiinke kaakiih kihci kakihcimotc, wiinke kaye nawac kaakii kihci ishinaakositc ahpiihc wiin i'i kotak.

²¹ Miitahsh eh⁠kanawaapiyan a'a eshkanenhs kaakii miikaanaatc pemaatisinitc Kishemanitoon tepenimikonitc miihsh kaakiih shaakooci'aatc.

²² Paanimaa tahsh kiih⁠poonihcike kiihpi takohshininitc ini kaakike kaapi pimaatisinitc kii⁠onaahkonikenitc kii⁠wiici'aanitc Maawac Eshpentaakosinitc opimaatisiimini. Miitahsh i'i ahpii kaakii ocihcihsenik iki ke⁠tipenimikowaatc Maawac Eshpentaakosinitc ci⁠tipinawewisiwaatc i'i tipencikewin.

²³ Miitahsh o'o kaa⁠ishi wiintamawitc, “A'a hsa niiwi'aya'aawihsh, mii hsa 'iwe keni niiwank kihciokimaawiwinan keni ayaak o'omaa ahkiink. Pahkaan hsa i'iwe kihciokimaawiwin ta⁠inentaakwan ahpiihc wiin ini kotak kihciokimaawiwin. Ta⁠nihshiwanaacihcikemakan hsa o'omaa ahkiink, ta⁠shikoshkikemakan kaye.

²⁴ Iki hsa mitaahso eshkanak miiwak hsa iki ke⁠mitaahciwaatc kihciokimaak keni onciiwaatc o'omaa tipencikewinink. Kii‑ishkwaa ayaawaatc tahsh iki, pehkaanisitc hsa tani ayaa kihciokimaa ke⁠kihci pahkaan ishi'ayaatc, nihsin tahsh kihciokimaa' oka patapinaa'.

²⁵ Wiinke hsa oka kihci inaahpinemaan ini Maawac Eshpentaakosinitc, oka kakwaataki'imaa' kaye opimaatisiimini. Oka kakwe aancihtoon kaye pahkaan kekoonini ci‑ishihsenik, inaahkonikewinan kaye. Miitahsh ci⁠miinintc ci⁠tipenimaatc waah⁠tootawaatc i'i pemaatisinitc nihsopipoon aapihta minihk ci⁠tipenimaatc.

²⁶ Ta⁠onapinaaniwan tahsh ci⁠tipaahkonitink, miitahsh i'i kaashi mashkawisiitc ci⁠otaahpinikaatenik, mii kaye 'i wiinke ci⁠tetako nehpici nihshiwanaacihcikaniwitc.

²⁷ I'iweni tahsh kaashi okimaawentaakwaninikin, kaashi mashkawentaakwaninikin, kaashi kihci inentaakwaninikin kaye kahkina ini ahkiiwi tipencikewinan ta⁠miinaawak iki pemaatisiwaatc tepenimikowaatc Maawac Eshpentaakosinitc. I'iweni tahsh Kishemanitoo kaashi tipenciketc ta⁠nehpici ayaani, kaawiin kaye wiihkaa ta⁠poonihsehsinini. Kahkina tahsh ke⁠okimaawinitc oka anami'ehtaakoo', oka na'ihtaakoo' kaye,” mii 'owe kaa⁠ishi wiintamaakooyaan.

²⁸ Mii hsa 'i minihk kaa⁠ishinamaan. Wiinke tahsh ninkii mikoshkaatentami'ikon o'o nahke ekii ishi naakatawentamaan, miihsh kaakii onci waapinewisiyaan. Kahkina hsa ono kaakii ishinamaan ninkiih kanawentaanan ninte'ink.