Taaniyoo 6 - Ojibwe Kihcimasina'ikan

Taaniyoo Kiipiinciwepinikaniwitc Mihshipishiiwaashink

¹ Taraayahs (Darius) hsa okii ishi minwaapantaan ci⁠onakimaatc ninkotwaahk niishtana (120) niikaanikimaak ke⁠naanaakacihtoonitc ahkiink misiwe kaakiih tashi tipenciketc.

² Nihsin (3) tahsh ke⁠niikaaniihtamaakenitc okii onahsaa'. Taaniyoo (Daniel) hsa 'a peshik kaakii onenimintc. Iki tahsh ke⁠naanaakacihtoowaatc ahkiin kii⁠otookimaamiwak aanihkewikimaa', ekii ani wiintamawaawaatc aaniin kekoon eni ishihsenik. Kaawiin tahsh kihciokimaa kekoonini kii‑ishi wanihcikehsii.

³ Taaniyoo tahsh wawiinke kii⁠pehtenaakosi nawac wiin ekii nihtaawanohkiitc i'imaa mekweya'ii eshi'ayaanitc aanihkewikimaa', i'i kaye kaa⁠naanaakacihtoonitc ahkiin aaniihsh wiin ekiih kakiihtaawentank. Kihciokimaan tahsh kii‑inentamoon ewii inahsikotc ci⁠naanaakacihtootc kahkina kekoon misiwe kaakii ishi tipencikenitc.

⁴ Iki tahsh kaa⁠naanaakacihtoowaatc ahkiin, iki kaye aanihkewikimaak okiih kakwe mihkaanaawaa aaniin keshi anaamimaawaatc Taaniyoon i'i kaakii ishi okimaawanohkiinitc. Kaawiin itahsh kekoon okii ishi mihkawaahsiwaawaan noociko ci‑ishi'ayaanitc, aaniihsh Taaniyoon kiih⁠tepweyentaakosiwan, kaawiin kaye noociko kii‑ishihcikehsiiwan, pooshke kaye kekoon cikiih wanitootaminitc.

⁵ Miitahsh oko ininiwak o'o kaakii ihkitowaatc, “Kaawiin maawiin kehcinaac kekoon kika mihkamowaahsiimin keshi anaamimank wa'a inini Taaniyoo, mii ehta ko onci enaahkonikenitc oKishemanitooman.”

⁶ Miitahsh aanihkewikimaak, iki kaye kaa⁠naanaakacihtoowaatc ahkiin kaakii anta waapamaawaatc kihciokimaan ekii'inaawaatc, “Kiin kihciokimaa Taraayahs kika nehpici pimaatis!

⁷ Kahkina hsa aanihkewikimaak, pepahkaan kaye kaa⁠tashi okimaahkantaakewaatc, niikaanikimaak, kaa⁠wiintamaakewaatc kaye keni ishihsenik, pepahkaan kaakiih tashi tipentamowaatc, kahkina hsa ninkii onentaamin kiin kaa⁠kihciokimaawiyan ci⁠oshihtooyan inaahkonikewin. Ci‑ishihcikeyan tahsh kaye maano ci⁠toocikaatek i'i inaahkonikewin. Mii 'owe inaahkoniken, nihsimitana (30) tahso kiishik awiya ci⁠anami'ehtawaahsik manitoon, komaa kaye ininiwan, kiin ehta ci⁠anami'ehtaakooyan. Kiishpin tahsh i'i awiya ishihcikehsik, mii hsa 'i ci‑ishi wepinikaniwitc mihshipishiiwaashink.

⁸ Taka tahsh noonkom iko oshihtoon inaahkonikewin ci⁠oshipii'ikaatek ci⁠aancihcikaatehsinok, ci‑ishihsink kaa⁠ishihsininik otinaahkonikewiniwaa Miitiya (Medes) kaatinowiwaatc, Persha (Persians) kaatinowiwaatc kaa⁠kashkihcikaatehsininik ci⁠kisii'ikaatenik,” okii'inaawaan.

⁹ Miitahsh kihciokimaa Taraayahs kaakii anoohkiitc ci⁠oshipii'ikaatenik i'i inaahkonikewin.

¹⁰ Ahpii tahsh Taaniyoo kaa⁠kihkentank ekii oshihcikaatenik i'i inaahkonikewin, mii hsa piko 'i kaa⁠ishi kiiwetc ishpimink ekii ishaatc kaakii ishi nipaatc. Owaahsehcikanan tahsh kii‑ishi nihtaa paahkaahkohsininiwan Ceroosalamink (Jerusalem) inahke. Entahso kiishik tahsh nihsink kii⁠ociciinkwanapiihtaa ekii anami'ehtawaatc kaakii nihtaa ishihcikehpan ekii miikwehciwenimaatc kaye Kishemanitoon.

¹¹ Oko tahsh ininiwak kii⁠ohkwiinowak ekii ishaawaatc, miihsh kaakii waapamaawaatc Taaniyoon e⁠anami'ehtawaanitc, eh⁠kakwecimaanitc kaye Kishemanitoon ci⁠wiici'ikonitc.

¹² Miitahsh kaa‑ani ishi anta waapamaawaatc kihciokimaan ekii tashintamowaatc inaahkonikewin kaakii oshihtoonihpan, “Kikii oshihtoon iitok inaahkonikewin nihsimitana (30) tahso kiishik cipwaa ishihsek awiya ci⁠anami'ehtawaahsik manitoon, komaa kaye ininiwan, kiin ehta ci⁠anami'ehtaakooyan. Kiishpin tahsh awiya i'i ishihcikehsik kaakii inaahkonikeyan, ci⁠piinci wepinikaniwitc mihshipishiiwaashink!” okii'inaawaan. Miihsh o'o kihciokimaan kaa⁠ishi nahkwehtaakowaatc, “Eya', inaahkonikewin hsa keyaapi inahte, e⁠ishi ahpihsink kaa⁠ishihsininik otinaahkonikewiniwaan Miitiya (Medes) kaatinowiwaatc, Persha (Persians) kaatinowiwaatc kaye kaa⁠kashkihcikaatehsinok ci⁠kisii'ikaatenik,” okii'ikowaan.

¹³ Miitahsh o'o kaa'inaawaatc kihciokimaan, “Taaniyoo Coota (Judah) ahkiink kaakii onci piicikaniwikopanen kaawiin kipisintaakohsii, kaawiin kaye opisintansiin inaahkonikewin kaakii oshipii'amowatc. Keyaapi ohsha nihsink anami'aa entahso kiishik, mii 'i ekooyan kehciokimaawiyan,” okii'inaawaan.

¹⁴ Ahpii tahsh kihciokimaa kaa⁠noontank o'o wiinke kii⁠wiiyakishkentam; miitahsh kaa⁠inentank ewiih kakwe pimaaci'aatc Taaniyoon, piinihsh e⁠ani onaakohshininik okiih kakwecihtoon aaniin keshi shaapwii'aatc.

¹⁵ I'i tahsh ininiwa' okii ohko naasihkaakoo' a'a kihciokimaa o'o ekii'ikotc, “Kehciokimaawiyan, maamihkawin kekoon kaashi ahpihsink otinaahkonikewiniwaan Miitiya (Medes) kaatinowiwaatc, Persha (Persians) kaatinowiwaatc kaye, kaawiin iitok inaahkonikewin, ihkitowin kihciokimaa kaa⁠oshihtootc ta‑aancihcikaatehsinini,” okii'ikoo'.

¹⁶ Miitahsh kihciokimaa kaa⁠ishi anoohkiitc ci‑ishiwicikaniwinitc mihshipishiiwaashink ci⁠piinci wepinimintc. Kihciokimaa hsa tahsh okii'inaan Taaniyoon, “Taka kiKishemanitoom ahpane ko kaa‑anohkiihtawatc kika shaapwii'ik,” okii'inaan.

¹⁷ Kihci ahsiniin hsa kiih⁠kipihshimaawan eshi ishkwaantemiwaninik i'i mihshipishiiwaash. Miitahsh kihciokimaa kaakii ayiici kipa'ank onaapininciipisonan ekii masinihshimaatc, i'i kaye onaapininciipisonini kaakiih kihci inenimaatc ininiwa', ci⁠shaapwii'imaahsiwintc Taaniyoon.

¹⁸ Miitahsh kihciokimaa kaa⁠ishi kiiwetc otookimaawikamikonk. Kaawiin tahsh kapetipihk kii⁠onci wiihsinihsii, kaawiin kaye kii⁠otaminonaaniwansinini enaahsamiitc, kaawiin kaye kii⁠onci nipaahsii kapetipihk.

¹⁹ Maawac tahsh iko e⁠ani piitaapaninik, kihciokimaa kii‑ishi weyiipishkaa ekii ishaatc weti mihshipishiiwaashink.

²⁰ Ciikaya'ii tahsh e⁠ani ayaatc mihshipishiiwaashink, Taaniyoon okiih kanoonaan ekii maamaashawimotc, “Taaniyoo, ahpane ko kaa‑anohkiihtawatc pemaatisitc Kishemanitoo, kiKishemanitoom ina okiih kashkihtoon ci⁠naatamawihk mihshipishiwa' ci⁠papaamenimihsinoohkwaa?”

²¹ Miitahsh o'o Taaniyoon kaa⁠ishi nahkwehtaakotc, “Taka kehciokimaawiyan kika nehpici pimaatis!

²² NinKishemanitoom ohsha okiih piicinisha'waan otencaliman ekiih pi kakiipotoone'aanitc mihshipishiwa', kaawiin tahsh kekoon ninkii ishi wiihsakaahpinanikohsiik, aaniihsh kaawiin kekoon nintishi anaamentaakosiwaahsiin enaahsamiitc. Kaawiin iitok kekoon kikii ishi mamaashiihkantawihsinoon kehciokimaawiyan,” okii'ikoon.

²³ Kihciokimaa hsa tahsh wiinke kii⁠kihci minwentam, miihsh kaa⁠ishi anoohkiitc Taaniyoon ci⁠saakitaapihkepinimintc i'imaa mihshipishiiwaashink. Kaa⁠ishkwaa saakisi'imintc itahsh, kaawiin iinsan ninkoci cikii enaahpinanaakaniwinitc aaniihsh okiih tepweyenimaani oKishemanitoomini.

²⁴ Miitahsh kihciokimaa kaa⁠ishi anoohkiitc ci⁠kaahcitinimintc i'i ininiwa' anihshaa kaakii anaamimaanitc Taaniyoon ci⁠piinci wepinimintc mihshipishiiwaashink. Kikiwiw, oniicaanihsini kaye kiih⁠piinci wepinimaawa'. Cipwaa mishihshininitc aasha mihshipishiwa' okii onci piihsipinikoni, ohkaniwaan kaye ekiih shikwantaminitc.

²⁵ Kihciokimaa hsa tahsh okii oshipii'amawaa' kahkina kaa⁠tahswewaanakisinitc pemaatisinitc, pepahkaan kaye kaa⁠tahso ishikiishwenitc misiwe i'imaa ahkiink, ekii ishipii'iketc, “Taka pisaan pimaatisik!

²⁶ Nintinaahkonike hsa misiwe piko kaa⁠tashi kihciokimaawiyaan pemaatisiwaatc ci⁠kohtaanenimaawaatc Kishemanitoon, ci⁠anami'e kohtaanenimaawaatc kaye Taaniyoon oKishemanitoomini. Miiwan iitok ini kaa⁠pimaatisinitc Kishemanitoon, ta⁠nehpici ayaawan kaye; otookimaawiwinini kaawiin wiihkaa ta⁠nihshiwanaacihcikaatehsinini, otipencikewinini kaye kaawiin wiihkaa ta⁠poonihsehsinini.

²⁷ Naatamaakewan, pimaaci'iwewan kaye; kihkinawaacihcikewan, maamahkaacihcikewan kaye ishpimink kiishikonk, o'omaa kaye ahkiink. Taaniyoon hsa okii naatamawaan ci⁠nihsikohsinik meshkawentaakosinitc mihshipishiwa',” kii‑inaahkonike.

²⁸ Taaniyoo tahsh wiinke kii⁠minohse kii⁠kihciokimaawinitc Taraayahsan, ini kaye Saairahsoon (Cyrus) Persha (Persia) ahkiink kaakii onciinitc.