Taaniyoo 4 - Ojibwe Kihcimasina'ikan

Nepakanaasar Miinawaa Kiipawaaciketc

¹ Miitahsh o'o kihciokimaa Nepakanaasar kaa⁠ishipii'amawaatc kahkina pemaatisinitc, kaa⁠pepahkaanwewaanakisinitc kaye, entahso pepahkaani kiishwenitc kaye: “Taka kika wenoocihsem pisaanisiwin!

² Etatawe hsa niminwentam ci⁠wiintamawinakook aaniin kaah⁠pi tootawitc Maawac Eshpentaakositc Kishemanitoo ekii naakohtamawitc omaamahkaasinaakohcikewinan, omamaantaawihcikewinan kaye.

³ Etatawe hsa maamahkaatentaakwaniniwan okihkinawaacihcikewinan, etatawe kaye mashkawentaakwaniniwan omamaantaawihcikewinan! Otookimaawiwin hsa ta⁠nehpici ayaani, eshi tipenciketc kaye tani ayaani minihk iko keni ayaanihke nihtaawiki'itink.”

⁴ “Niin hsa e⁠ayapiyaan nintaawinink nintookimaawikamikonk, e⁠na'entamaan wiinke e⁠minohseyaan.

⁵ Miitahsh e⁠nipaayaan kekoonan pewaatamaan kaakiih seki'ikoyaan. Miihsh kaye nintishinamowinan kaakii mikoshkaaci'ikoyaan.

⁶ Miitahsh kaakii anoohkiiyaan ci⁠piinintwaa eshi'ayaawak kahkina kekiihtaawakinsowaatc ininiwak eyaawaatc Paapilan (Babylon) ahkiink ci⁠kihkentamo'iwaatc eshihsininik kaakii ishi pawaacikewak.

⁷ Miihsh kaakiih piishaawaatc memaantaawisiwaatc, kaa⁠mamaantaawi kiishwewaatc, wanankohshink wenci kihkencikewaatc, kaa⁠mamaantaawi anta kihkencikewaatc kaye ekii wiintamawakwaa aaniin kaa⁠ishi pawaacikewak. Kaawiin itahsh okiih kashkihtoohsiinaawaa ci⁠wiintamawiwaatc eshihsininik nimpawaacikan.

⁸ Taaniyoo tahsh ishkwaac kiih⁠piintike eshi'ayaawak. Mii iitok a'a Peltihshaasar (Belteshazzar) kaa'inintc ehpinihkaasotc nimanitooman, kekishkawaatc kaye manitoowi ahcaahkwan; miihsh kaakii wiintamawak nimpawaacikan o'o ekii'inak,

⁹ Kiin Peltihshaasar, kaa⁠niikaanishkawatwaa memaantaawisiwaatc, ninkihkentaan hsa e⁠kikishkawatc manitoowi ahcaahk, eh⁠sanakentansiwan kaye kekoon kaa⁠kihkencikaatehsinok. Mii hsa 'owe kaa⁠ishi pawaacikeyaan, taka hsa wiintamawihshin aaniin eshihsink.”

¹⁰ “Miitahsh o'o kaa⁠ishi pawaacikeyaan e⁠nipaayaan, kaakii ishinamaan ninkii waapamaa kihci mihtik eh⁠kinwaahkositc eh⁠patahkisotc naawaya'ii o'omaa ahkiink.

¹¹ A'a hsa mihtik kii⁠ani mihcaahkosi, ekii ani mashkawikitc, piinihsh kiishikonk kii⁠ocihciki kaa‑ahpiihci kinwaahkositc. Misiwe hsa ehko kishipaanik ahki kii⁠onci tepinaakosi.

¹² Eshi aniipiishiwitc hsa wiinke kii⁠minonaakosi, niipiwa' kaye shiiwimiicim i'imaa kiih⁠tashi nihtaawikin. Miihsh i'imaa kahkina awiyak kaa⁠onci tepihsewaatc miicim. Aya'aawihshak pikwacaya'ii eyaawaatc mii 'imaa kaa⁠ishi mihkamowaatc keshi tapinawihshimoonowaatc. Pinehshiinshak kaye i'imaa eshi watihkwaniwinitc kii‑ishitaawak. Kahkina hsa ko awiyak pemaatisiwaatc i'imaa kii⁠onci wiihsiniwak.”

¹³ “E⁠naanaakatawentamaan itahsh ini nintishinamowinan eh⁠pimihshinaan ninipewinink, mii hsa 'i kaakii waapamak encal kaa⁠naakaci'iwetc kaa⁠kihtentaakositc kihcikiishikonk ekiih pi onciitc.

¹⁴ Miitahsh o'o enikohk kaa⁠ihkitotc eh⁠kishiiwetc, ‘Kawa'ohk a'a mihtik ci⁠ciihshaantawe'wek kaye watihkwanan. Ciihshipitook kaye aniipiihshan, mihsihtewepinamok kaye i'i shiiwimiicim i'imaa kaa⁠onci nihtaawikink. Taka aya'aawihshak i'imaa eyaawaatc shiipaaya'ii ta⁠oshimowak, pinehshiinshak kaye watihkwanihkaank ta⁠onci oshimowak.

¹⁵ I'i tahsh wiin kiishkata'ikan kikiciipihk iko pisaan i'imaa ta‑ayaa mihtahkamik. Piiwaapihkweyaap, osaawaapihkweyaap hsa aapatan e⁠kihkintahpitek i'i kiishkata'ikan i'imaa mihshawahkamik eshi mashkohsiihkaak.’ ” “ ‘Taka hsa wa'a inini oka shiikwaapaawanikon kaa⁠shahki'ayaanik kiishikonk, taka kaye oka wiici'ayaamaa' aya'aawihsha' eyaanitc eshi mashkohsiihkaanik ahkiink.

¹⁶ Taka hsa otinentamowin ininiink eshi'ayaanik ta‑aanci ayaani aya'aawihshink ci‑ishi'ayaanik. Niishwaahso (7) pipoon hsa 'i minihk ta⁠ishi'ayaa.

¹⁷ Mii hsa 'oweni kaa⁠inaahkonikewaatc iki encalak kaa⁠naakaci'iwewaatc, kehtentaakosiwaatc, ci⁠kihkencikaniwitc a'a Maawac Eshpentaakositc eh⁠tipentank eshi tipencikenitc ininiwa', wiin kaye awenenan iko e⁠onaapamaatc entawenimaatc ci⁠okimaawinitc, i'i kaye maawac tepahsentaakosinitc ininiwa',’ kii‑ihkito a'a encal.”

¹⁸ “Mii hsa 'owe niin Nepakanaasar kehciokimaawiyaan kaa⁠ishi pawaacikeyaan. Noonkom itahsh kiin Peltihshaasar, taka wiintamawihshin aaniin eshihsink. Kaawiin ohsha kanake peshik kekiihtaawakinsowaatc ininiwak eyaawaatc nintookimaawiwinink okashkihtoohsiinaawaa ci⁠wiintamowaatc aaniin eshihsininik. Kiin itahsh wiin kika kashkihtoon aaniihsh kikikishkaak manitoowi ahcaahk,” okii'ikoon kihciokimaan.

Taaniyoo Kiiwiintank Aaniin Eshihsininik Pawaacikan

¹⁹ Miitahsh Taaniyoo, Peltihshaasar kaa'inintc kii⁠kihci koshkwaawaatentam ekii mikoshkaatentank. Miihsh kaa'ikotc kihciokimaan, “Peltihshaasar, taka keko nimpawaacikan, eshihsink kaye kika mikoshkaatentami'ikohsiin,” okii'ikoon. Miihsh o'o Peltihshaasar kaa⁠ishi nahkwehtawaatc, “Nintookimaam, ampehsh inaa iki inaapamatwaapan ishihsewaahpan iki kaa⁠shiinkenimihkwaa, i'i eshihsink kipawaacikan ampehsh inaa i'i ishihsewaahpan iki kaa⁠nakaashkawihkwaa.

²⁰ A'a hsa mihtik kaakii waapamatc kii⁠ani mihcaahkosi, kii⁠ani mashkawiki kaye ekii otihtahkisotc kiishikonk misiwe ahkiink kii⁠onci tepinaakosi.

²¹ Eshi aniipiishiwitc hsa wiinke kii⁠minonaakosi, niipiwa' kaye shiiwimiicim i'imaa kiih⁠tashi nihtaawikin. Miihsh i'imaa kahkina awiyak kaa⁠onci tepihsewaatc miicim. Aya'aawihshak pikwacaya'ii eyaawaatc mii 'imaa kaa⁠ishi mihkamowaatc keshi tapinawihshimoonowaatc. Pinehshiinshak kaye i'imaa eshi watihkwaniwinitc kii‑ishitaawak.”

²² “Kiin kehciokimaawiyan, kiin hsa 'a mihtik; ekii ani ishpentaakosiyan, wiinke kaye ekii ani soonkentaakosiyan. Ehpiihci kihci inentaakosiyan taapishkoo ekii ocihci'ayaak kiishikonk, kitookimaawiwin kaye misiwe ahkiink e⁠ishi misihteshkaak.

²³ Miitahsh kiin kehciokimaawiyan kaakii waapamatc kehtentaakositc kaa⁠naakaci'iwetc encal kihcikiishikonk eh⁠pionci naanshiitc o'o e⁠ihkitotc, ‘Kawa'ohk a'a mihtik wiinke ci⁠nihshiwanaaci'intc. I'i tahsh wiin kiishkata'ikan kikiciipihk iko pisaan i'imaa ta‑ayaa mihtahkamik. Piiwaapihkweyaap, osaawaapihkweyaap kaye hsa ta‑aapatan ci⁠kihkintahpitek i'i kiishkata'ikan i'imaa mihshawahkamik eshi mashkohsiihkaak. Pisaan hsa wa'a inini oka shiikwaapaawanikon kaa⁠shahki'ayaanik, ci⁠wiici'ayaamaatc aya'aawihsha' eyaanitc eshi mashkohsiihkaanik ahkiink niishwaahso pipoon hsa 'i minihk ta⁠ishi'ayaa.’ ”

²⁴ “Kiin kehciokimaawiyan, mii hsa 'owe eshihsink o'o kipawaacikan. Mii hsa o'oweni enaahkonihk Maawac Eshpentaakositc ci‑ishihsewatc.

²⁵ Ninkoci hsa kika onci inaamwa'okoo eshi'ayaawaatc pemaatisiwaatc, aya'aawihshak hsa tahsh mihshawahkamik eyaawaatc kika wiici'ayaamaak. Mashkohsiwan ci⁠miiciyan taapishkoo kaa⁠inancikewaatc pishihkiwak, wiinke kaye kika shiikwaapaawanikon kiishikonk kaa⁠onci shahki'ayaak. Niishwaahso (7) pipoon hsa 'i minihk kika ishi'ayaa, paanimaa tahsh o'o kii⁠kihkentaman Maawac Eshpentaakositc Kishemanitoo eh⁠tipentank eshi tipencikenitc ininiwan, awenenan entawenimaatc iko kaye o'o e⁠ishi miinaatc, mii hsa 'i payesh ci⁠pooni ishi'ayaayan.

²⁶ I'i hsa tahsh kaakii anoohkiinaaniwank kiishkata'ikan kikiciipihk i'imaa ci⁠ayaak, mii hsa 'i e⁠kihkinawaacihcikaatek kitookimaawiwin kehcinaac ci⁠kiiwe miinikooyan ahpii kihkentaman Kishemanitoo kihcikiishikonk kaa‑ayaatc eh⁠tipenciketc.

²⁷ Kehciokimaawiyan, taka hsa weweni pisintan o'o kaa'ininaan, Poonihtoon kimacitootamowinan, kwayahk itahsh ci‑ishihcikeyan, nakatan kaye kimaci'ishiwepisiwinan ci⁠minotootawatwaa ketimaakisiwaatc. Miihsh i'i cii⁠anishi minohseyan,” okii'inaan kihciokimaan.

²⁸ Miitahsh o'o kahkina kaa⁠ishihsetc kihciokimaa Nepakanaasar.

²⁹ Mitaahshiniishokiisihsoon itahsh eh⁠pimakinsonitc kihciokimaa kiih⁠papaamohse wakitapahk otookimaawikamikonk i'imaa Paapilan ahkiink.

³⁰ Miitahsh o'o kaa⁠ihkitotc, “Mii'iitok o'o kihci Paapilan kaakii oshihtooyaan keshi'ayaak nintookimaawikamik. Nimashkawisiiwinink ekii onci oshihtooyaan ke⁠tashi kihci inentaakwahk nintookimaawentaakosiwin.”

³¹ Mekwaa tahsh o'o e⁠ihkitotc, mii 'i awiyan kaakii onci kiikitonitc kihcikiishikonk o'o ekii ihkitonitc, “Nepakanaasar kehciokimaawiyan, mii hsa 'owe enaahkonikooyan, kitookimaa kashki'ewisiwin hsa kitootaahpinamaakoo.

³² Ninkoci hsa kika onci inaamwa'okoo eshi'ayaawaatc pemaatisiwaatc, aya'aawihshak hsa tahsh mihshawahkamik eyaawaatc kika wiici'ayaamaak. Mashkohsiwan hsa kika miicinan taapishkoo kaa⁠inancikewaatc pishihkiwak. Niishwaahso (7) pipoon hsa 'i minihk kika ishi'ayaa. Paanimaa hsa tahsh o'o kii⁠kihkentaman Maawac Eshpentaakositc eh⁠tipentank eshi tipencikenitc ininiwan, awenenan entawenimaatc iko kaye o'o e⁠ishi miinaatc, mii hsa 'i payesh ci⁠pooni ishi'ayaayan,” ekii'inintc.

³³ Miitahsh shemaak kaakii ishihsetc, kaakii icikaniwitc Nepakanaasar, ninkoci kii‑inaamwa'waa eshi'ayaanitc pemaatisinitc, mashkohsiwan ekii miicitc taapishkoo pishihki. Wiinke kaye kaa⁠shahki'ayaanik okii shiikwaapaawanikon piinihsh kaa⁠ishi miinkwanenitc mikisiwan ekii inaanihkwetc, pinehshiinshink kaye piinihsh ekii ani ishikashiitc.

³⁴ Niishwaahso (7) pipoon itahsh kaa⁠ishkwaahsek, mii 'i niin Nepakanaasar ishpimink kihcikiishikonk inahke kaakii inaapiyaan, miihsh ninaanaakatawentamowin kaakiih kiiwe otihsikoyaan. Miitahsh kaakii nanaahkomak Maawac Eshpentaakositc, ekii miikwehciwenimak kaye, ekiih kihtenimak kaye kaa⁠nehpici pimaatisitc. Miihsh o'o kaa⁠ihkitoyaan, “Wiin hsa ta⁠nehpici tipencike, otookimaawiwin kaye ta⁠nehpici ayaani minihk iko keni ayaanihke nihtaawiki'itink.

³⁵ Kaawiin hsa kekoon otinenimaahsii' kahkina pemaatisinitc o'omaa ahkiink. Waah⁠tootawaatc hsa ko otootawaa' eyaanitc kihcikiishikonk, pemaatisinitc kaye o'omaa ahkiink eyaanitc. Kaawiin hsa awiyan otaa kashkihtoohsiini ci⁠nakaaskaminitc enentank, kaawiin kaye awiyan otaa'ikohsiin, ‘Aaniin itahsh inaa kaa⁠ishihcikeyan?’

³⁶ Miitahsh i'i ahpii ninaanaakatawentamowin kaakiih kiiwe naapahcikaatek. Ninkihciokimaawentaakosiwin, ninkihtentaakosiwin kaye ninkiih kiiwe miinikoowis ci⁠kihci inentaakwahk nintookimaawiwin. Kaakii maamiinomiwaahpan hsa, kaa⁠niikaanentaakosiwaatc kaye ninkii nanaantone'okook. Miitahsh kaakiih kiiwe naapahsikooyaan nintookimaawapiwinink, nawac noonkom ekiih kihci inentaakosiyaan ahpiihc wiin otaanaank.

³⁷ Noonkom itahsh niin Nepakanaasar nimiikwehciwenimaa, ninkihci inenimaa kaye, ninkihtenimaa kaye Kihciokimaa eyaatc Kihcikiishikonk, aaniihsh kahkina onishihshinini eshihciketc, kwayahkwentaakwanini kaye. Wiin kaye okashkihtoon ci⁠tapahsentaakosi'aatc i'i eshpenintisonitc.”