Taaniyoo 3 - Ojibwe Kihcimasina'ikan

Nepakanaasar Kii'oshi'aatc Kihci'oshihcikanan Ke'anami'ehtawimintc

¹ Kihciokimaa Nepakanaasar (Nebuchadnezzar) hsa okii oshi'aan kihci oshihcikanan osaawi shooniyaa waapihkoon ekii aapaci'aatc. Shaankahsimitana 90 tahso misit ekii ahpiihci kaapawinitc, shaankahsomisit tahsh ekii inikohkwatesinitc. Weti tahsh eshi pashkwaanik Toora (Dura) ecikaatenik Paapilan (Babylon) ahkiink okii ishi onahsaan.

² Miitahsh kaakii antomaatc anihkewikimaa', pepahkaan kaakiih tashi okimaahkantaakenitc, kaakii wiintamaakenitc kaye ke⁠ishihcikenk, shooniyaan kaa⁠naanaakaci'aanitc, otipaahkoniwe', tipaahkonikewikimaa' kaye, kahkina kaye kaakii naanaakacihtoonitc pepahkaan Paapilan ahkiink. Miihsh kaakii antomaatc ci⁠piishaanitc ewi onwaanaatc kaakii niipawi'aatc ini otooshihcikanan.

³ Iki tahsh kahkina kehci inentaakosiwaatc kaakii antomintwaa kiih⁠piishaawak ekii maamawi'itiwaatc ewii pahkaanenimaawaatc ci⁠kihtenimimintc ini oshihcikanan kihciokimaan kaakii oshi'aanitc ekii inaahsamikaapawihtawaawaatc.

⁴ Aahpici tahsh kiih⁠kishiiwenaaniwan o'o ekii ihkitonk, “Kiinawaa hsa kitinaahkonikoom pemaatisiyek kaa⁠pepahkaanwewaanakisiyek, pepahkaan kaye kaa⁠ishikiishweyek,

⁵ shemaak hsa ko noontamek, pootaacikan, pootaacikanenhs, matweyaapiikiwepa'ikan, nihso kiihkeyaa matweyaapiikipicikan, ociinkwani matweyaapiikipicikan, kihci matweyaapiikipicikan, kahkina hsa ko kitohcikanan, mii hsa 'i eshinaakwahk ci⁠animihkohtaayek, ci⁠anami'ehtawimek osaawi shooniyaa waapihkowi oshihcikanan kihciokimaa Nepakanaasar kaakii oshikaapawi'aatc.

⁶ Awenen tahsh iko ke⁠animihkohtaahsik ci⁠anami'ehtawaahsik, shemaak hsa a'a ta⁠ishiwepinikaniwi kaashi piskanenik kihci pootawaanaapihkonk,” kii‑ihkitom.

⁷ Miitahsh kahkina pemaatisiwaatc kaa⁠pepahkaanwewaanakisiwaatc, pepahkaan kaye kaakiih tahso ishikiishwewaatc e⁠noontamowaatc ini kahkina kitohcikanan e⁠noontaakwaninikin, mii hsa 'i kaakii animihkohtaawaatc ekii anami'ehtawaawaatc osaawi shooniyaa waapihkowi oshihcikanan kihciokimaan Nepakanaasaran kaakii oshikaapawi'aanitc.

Taaniyoo Nihsin Owiiciiwaakana' Kii'anaamenimimintc

⁸ Miitahsh i'i ahpii kaakii mateyiiwaatc wanankohshink wenci kihkencikewaatc ekii mamishimaawaatc Coowa' (Jews).

⁹ O'o hsa okii'inaawaan kihciokimaan, “Taka kihciokimaa kika nehpici pimaatis!

¹⁰ Kiin kehciokimaawiyan iitok kikii inaahkonike kahkina awiya noontank kahkina kitohcikanan noontaakwaninikin ci⁠animihkohtaatc ci⁠anami'ehtawaatc ini osaawi shooniyaa waapihkowi oshihcikanan.

¹¹ Awenen tahsh iko ke⁠animihkohtaahsik ci⁠anami'ehtawaahsik, mii hsa 'i ke⁠toocikaniwitc ci‑ishi wepinikaniwitc kaashi piskanenik kihci pootawaanaapihkonk.

¹² Ayaawak ohsha aaninta Coowak kaakii inakimatwaa ci⁠naanaakacihtoowaatc eshihsenik Paapilan (Babylon) ahki. Shetaraahk (Shadrach), Miihshaahk (Meshach), a'a kaye Apetihnikoo (Abednego) hsa kaawiin kipapaamihtaakohsiik. Kaawiin kaye otanohkiihtawaahsiwaawaa' kimanitooma', ini kaye osaawi shooniyaa waapihkowi oshihcikanan kaakii oshikaapawi'imatc,” okii'inaawaan.

¹³ Wiinke tahsh kihciokimaa kii⁠kihci aahkokitaaso ekii anoohkiitc ci⁠piinimintc Shetaraahkoon, Miihshaahkoon ini kaye Apetihnikoon i'imaa eshi'ayaatc.

¹⁴ Miitahsh Nepakanaasar (Nebuchadnezzar) kihciokimaa kaa⁠ihkitotc, “Shetaraahk, Miihshaahk, Apetihnikoo tepwe na 'i kaa'ikooyek, e⁠anohkiihtawaahsiwekwaa nimanitoomak, e⁠anami'ehtawaahsiwek kaye a'a osaawi shooniyaa waapihkowi oshihcikan kaakii oshikaapawi'ak?

¹⁵ Taka noonkom ahpii noontamek ini kahkina kitohcikanan noontaakwahkin, ahshwiihkek ci⁠animihkohtaayek ci⁠anami'ehtawek kaakii oshi'ak, miitahsh i'i ci⁠minohcikeyek. Kiishpin itahsh wiin anami'ehtawaahsiwek, mii hsa 'i shemaak ci‑ishi wepinikooyek i'imaa kaashi piskanek kihci pootawaanaapihkonk. Awenen tahsh tino manitoo eyaakwen ke⁠shaapwii'inekipan aaniin kaawiih tootawinakook?” kii‑ihkito.

¹⁶ Miitahsh o'o Shetaraahk, Miihshaahk Apetihnikoo kaye kaa⁠ishi nahkwehtawaawaatc kihciokimaan, “Kaawiin hsa memwehc niwiih kakwe naatamaatisohsiimin o'o kaa'ishiyaank.

¹⁷ Kiishpin hsa inentank ninKishemanitoominaan kaa‑anohkiihtawankitc, wiin ihsa oka kashkihtoon ci⁠onci shaapwii'inankitc i'imaa kaashi piskanenik kihci pootawaanaapihkonk, ninka naatamaakonaan kaye kiin onci.

¹⁸ Kiishpin tahsh i'i wii‑ishihcikehsik, kinantawenimikoo ci⁠kihkentaman, kaawiin shaakooc niwii anohkiihtawaahsiwaanaanik kimanitoomak, kaawiin kaye niwii anami'ehtawaahsiwaanaan a'a osaawi shooniyaa waapihkowi oshihcikan kaakii oshikaapawi'atc, mii 'iwe ekooyan kaa⁠kihciokimaawiyan,” okii'inaawaan.

Taaniyoo Owiiciiwaakana' Kiimacohtewepinimintc

¹⁹ Wiinke tahsh Nepakanaasar kii⁠kihci aahkokitaaso pahkaan ekii inenimaatc Shetaraahkoon (Shadrach), Miihshaahkoon (Meshach), ini kaye Apetihnikoon (Abednego). Miihsh kaa⁠ishi anoohkiitc niishwaahcink (7) ci⁠ahpiihci kishahkonehcikaatenik, ahpiihc wiin kaakii nihtaa ahpiihci kishahkonenik.

²⁰ Maawac tahsh meshkawentaakosinitc shimaakanihsha' okii anoonaa' ci⁠mamaancikwahpinaanitc Shetaraahkoon Miihshaahkoon ini kaye Apetihnikoon, ci⁠macohte wepinaanitc itahsh i'imaa kihci pootawaanaapihkonk.

²¹ Miitahsh iko kikihkonay, kikitaahs, kikipiinsihkawaakan, kiki'aanohkwaan kaye kahkina ko kaakiih kikishkaminitc kaa⁠ishi mamaancikwahpinaanitc, ekii macohte wepinaanitc.

²² Kaa‑ahpiihci aahkwentaakwaninik itahsh kihciokimaa otinaahkonikewin, wiinke kaye kaa‑ahpiihci kishahkonenik kihci pootawaanaapihk, mii hsa 'iwe i'i shimaakanihsha' kaa⁠onci kipwanaamosonitc kaakii ishiwinaanitc Shetaraahkoon, Miihshaahkoon, Apetihnikoon kaye.

²³ Okoweniwak tahsh wiin nihsin ininiwak kii⁠ayiitahpinaawak kii⁠macohte wepinintwaa.

²⁴ Kihciokimaa Nepakanaasar (Nebuchadnezzar) tahsh kiih⁠pasikwincihse ekiih kihci maamahkaatentank ekii ishi kakwecimaatc otaanihkewikimaama', “Nihsin (3) ina ininiwak kikii mamaancikwahpinaanaanik kikii macohte wepinaanaanik?” Miihsh kaa'ikotc, “Eya', tepwe kehciokimaawiyan,” okii'ikoo'.

²⁵ Miihsh o'o kaa⁠ihkitotc, “Inashke inaapik! Niiwin ohsha ininiwak niwaapamaak piniskwe eh⁠papaamohsewaatc ishkotenk, kaawiin ci⁠wiihsakentamowaatc! A'a tahsh kotak inini ishinaakosi taapishkoo Kishemanitoo okosihsan!” kii‑ihkito.

Nihsin Ininiwak Kii'okimaawi'intwaa

²⁶ Miitahsh Nepakanaasar kaakii ishaatc eshi ishkwaantemiwaninik kihci pootawaanaapihk ekii ishi shaakowetc, “Shetaraahk (Shadrach), Miihshaahk (Meshach), Apetihnikoo (Abednego), kaa‑anohkiihtawek Maawac Eshpentaakositc Kishemanitoo! Pisaaka'amok, ampeyohk o'omaa,” okii inaa'. Miitahsh shemaak kaah⁠pi ishi saaka'aminitc i'imaa ishkotenk.

²⁷ Iki tahsh aanihkewikimaak, pepahkaan kaa⁠tashi okimaahkantaakewaatc, kaa⁠wiitanohkiimaawaatc kihciokimaan, iki kaye kahkina kaakii okimaawiwaatc, okii waahkaashkawaawaa' ekii anta kihkenimaawaatc. Kaawiin tahsh ishkoteni awaac okii wiihsakaahkisokohsiini, wiinisihsini kaye kaawiin awaac cikii otaahpitenikin. Okikishkikanini kaye kaawiin kiih⁠caakitehsininiwan, kaawiin kaye awaac cikii ishkotewimaakosinitc.

²⁸ Miitahsh Nepakanaasar kaa⁠ihkitotc, “Taka ta⁠miikwehciwentaakosiwan oKishemanitoomiwaan Shetaraahk, Miihshaahk, Apetihnikoo. Okiih piicinisha'waani iitok otencalimini (angels) ci⁠pimaaci'ikowaatc enohkiihtawaawaatc! Wiinawaa hsa okiih tepweyenimaawaan, kaawiin tahsh wiin kii‑ishihcikehsiiwak kihciokimaan kaakii inaahkonikenitc. Kii‑inentamook pisaan ewiih pakitinamowaatc opimaatisiwiniwaan ahpiihc wiin ci⁠anami'ehtawaawaahpan pahkaan manitoo'. Mii hsa ehta ko oKishemanitoomiwaan enami'ehtawaawaatc.”

²⁹ “Miitahsh enaahkonikeyaan, awenenak hsa kaa⁠tahswewaanakisiwaatc pemaatisiwaatc, aaniin iko kaye eshikiishwewaakwen kiishpin tahsh maci'inaawaatc ini oKishemanitoomini Shetaraahkoon, Miihshaahkoon, Apetihnikoon kaye miiwak hsa iki ke⁠piihsipinintwaa. Owaahkaa'ikaniwaan kaye ta⁠piikopicikaateniwan wepinikaniink cishi ohkohsicikaatenikin. Kaawiin aaniihsh pahkaan manitoo taashi pimaaci'iwehsii o'owe nahke,” kii‑ihkito.

³⁰ Miitahsh kihciokimaa kaakii ishpakimaatc Shetaraahkoon, Miihshaahkoon, Apetihnikoon kaye i'imaa Paapilan (Babylon) ahkiink.