Taaniyoo 2 - Ojibwe Kihcimasina'ikan

Nepakanaasar Opawaacikan Ehtashintenik

¹ Niishoahki (2) hsa kaani ishihsenik Nepakanaasar (Nebuchadnezzar) kaa⁠kihciokimaawitc, kiih⁠pawaacike. Wiinke tahsh kii⁠onci kihci mikoshkaatentam, kaawiin okii kashkihtoohsiin ci⁠nipaatc.

² Mii hsa 'i kihciokimaa kaakii antomaatc memaantaawisinitc, kaa⁠mamaantaawi kiishwenitc, kaa⁠koohsaapancikenitc, i'i kaye wanankohshink kaa⁠onci kihkencikenitc, ci⁠wiintamaakotc aaniin eshihsininik opawaacikan.

³ Miitahsh o'o kihciokimaa kaa'inaatc, “Wiinke hsa nimikoshkaantentami'ikon i'i kaakiih pawaatamaan, niwiih kihkentaan tahsh aaniin eshihsink i'i kaakiih inaapantamaan,” okii inaa'.

⁴ Miihsh o'o kaa⁠ishi nahkwehtaakotc Eramewi kiishwewin (Aramaic) ekii aapacihtoonitc, “Kehciokimaawiyan, taka kika nehpici pimaatis! Wiintamaw kitanohkii'aakanak kaatinowiyank aaniin kaa⁠ishi pawaacikeyan, miihsh ci⁠wiintamaakooyan aaniin ehkitoomakahk,” okii'ikoo'.

⁵ Miitahsh o'o kihciokimaa kaa⁠ishi nahkwehtawaatc, “Aasha ohsha o'o ninkii onentaan, kiishpin kashkihtoohsiwek ci⁠wiintamawiyek aaniin kaa⁠ishi pawaacikeyaan, aaniin kaye ehkitoomakahk; ninka inaahkonike ci⁠piihsipinikooyek kitaawiniwaan kaye ci⁠piikopicikaatekin ci⁠ohkohsicikaatekin taapishkoo wepinikan.

⁶ Kiishpin tahsh wiin wiintamawiyek kaa⁠ishi pawaacikeyaan, aaniin kaye ehkitoomakahk, kika miinininim hsa miikiwewinan, kika ishi'ininim kaye ci⁠kihtentaakosiyek. Haw hsa tahsh wiintamawihshik aaniin kaa⁠ishi pawaacikeyaan, aaniin kaye ehkitoomakahk,” okii inaa'.

⁷ Miihsh o'o miinawaa kaa⁠ishi nahkwehtaakotc, “Taka hsa wiintamawihshinaam aaniin kaa⁠ishi pawaacikeyan, miitahsh ci⁠wiintamaakooyan aaniin eshihsink kipawaacikan,” kii‑ihkitowa'.

⁸ Miitahsh kihciokimaa o'o kaa'inaatc, “Tepwe hsa iinsan keyaapi kikakwe ontamii'im, aaniihsh aasha kikihkentaam i'i kaakii onentamaan ekii ayiitentamaan.

⁹ Kiishpin wiintamawihsiwek kaakii ishi pawaacikeyaan, peshikwayek ihsa ehta kahkina kiwii ishi nana'ahsininim. Kiinawaa hsa kaa⁠tahshiyek kikii onentaam ewiih kiiwanimohtawiyek e⁠mihci mihsawentamek kekoon cini aancihsek. Taka hsa tahsh noonkom wiintamawihshik kaakii ishi pawaacikeyaan, miitahsh ci⁠kihkentamaan taka ci⁠kashkihtoowekwen ci⁠nihsitohtamek eshihsink nimpawaacikan,” okii inaa'.

¹⁰ Miitahsh o'o kaa⁠ishi nahkwehtaakotc wanankohshink kaa⁠onci kihkencikenitc, “Kaawiin hsa awiya a'a tino inini ayaahsii o'omaa ahkiink ke⁠kashkihtoohpan i'i kaashi anoohkiiyan! Kaawiin hsa wiihkaa kihciokimaa mihsawaa ko maawac kehci inentaakositc, meshkawentaakositc kaye otishi anoonaahsii' ci‑ishihcikenitc i'i memaantaawisinitc, kaa⁠mamaantaawi kiishwenitc i'i kaye wanankohshink kaa⁠onci kihkencikenitc.

¹¹ I'iwe hsa kiin kihciokimaa kaashi antawentaman maawac iko sanakan. Kaawiin awiya otaa kashkihtoohsiin kiin kaa⁠kihciokimaawiyan ci⁠kihkentamo'ihkipan i'i kaa‑antawentamowatc, manitook ehta otaa kashkihtoonaawaa. Kaawiin tahsh iki manitook ayaahsiiwak mekwe ininiihkaank,” okii'ikoo'.

¹² Kihciokimaa tahsh e⁠noontank i'i e'icikaniwitc, wiinke kii⁠kihci aahkokitaaso, miihsh kaa⁠ishi anoohkiitc ci⁠nihsimintc kahkina kaakiih kakiihtaawakimimintc ininiwa' i'imaa Paapilan (Babylon) ahkiink.

¹³ Mii hsa tahsh kaa⁠inaahkonikenaaniwaninik ci⁠nihsimintc kaakiih kakiihtaawakimimintc ininiwa'. Miitahsh kaye kaakii antone'omintc Taaniyoon (Daniel), owiiciiwaakanini kaye ci⁠tako nihsimintc.

Kishemanitoon Kiikihkentamo'ikotc Taaniyoo Aaniin Eshihsininik Kihciokimaan Opawaacikanini

¹⁴ Miitahsh Taaniyoo kaakii anta waapamaatc Eriyaahkoon (Arioch) miiwan ini kaakii okimaahkantawaanitc kihciokimaan kenawenimikonitc. Miiwan iitok ini kaakii anoonimintc ci⁠nihsaanitc kekiihtaawentaminitc ininiwa' i'imaa Paapilan ahkiink. Miihsh weweni kaakii ayintitc Taaniyoo ci⁠kakiihtaawikiishwetc, ci⁠nihsitawentank kaye.

¹⁵ Miihsh o'o kaa'inaatc, “Wekonenini tahsh wenci ahpiihci kohtaanaahkoniketc a'a kihciokimaa?” Miihsh Eriyaahkoon kaakii wiintamaakotc mayaa wekonenini kaakii onci inaahkonikenitc kihciokimaan.

¹⁶ Miitahsh Taaniyoo shemaak kaakii ishaatc ekii anta waapamaatc kihciokimaan eh⁠kakwecimaatc, “Taka keyaapi acina tawinamawihshin, miihsh ci⁠wiintamawinaan aaniin kaa⁠ishi pawaacikeyan, miihsh kaye ci⁠wiintamawinaan ehkitoomakahk,” okii'inaan.

¹⁷ Miihsh kaa⁠ishi kiiwetc otaawinink ekii awi wiintamawaatc owiiciiwaakana' Henanaayawan (Hananiah), Mihsheyalan (Mishael), ini kaye Aasaraayawan (Azariah).

¹⁸ Miihsh kaashi anoonaatc ci⁠kakwecimaanitc ci⁠koohpaatenimikowaatc Kishemanitoon kihcikiishikonk eyaanitc i'i onci kaakiih kihkencikaatehsininik, ci⁠tako nihsaahsiwintwaa, ahpii nihsimintc kekiihtaawentaminitc ininiwa' i'imaa Paapilan ahkiink.

¹⁹ I'i tahsh eh⁠tipihkaninik Taaniyoo kiih⁠kihkentamo'aa i'i pawaacikan kehkencikaatehsininik. Miitahsh Taaniyoo kaakii nanaahkomaatc Kishemanitoon kihcikiishikonk eyaanitc.

²⁰ Miihsh o'o kaa⁠ihkitotc, “Taka nehpic iko ta⁠miikwehciwentaakosi Kishemanitoo, kehci inentaakwaninik owiinsowin. Wiin ohsha kekiihtaawentank, wiin kaye meshkawentaakositc.

²¹ Wiin kaye kaa⁠tipentank pepahkaan eshi aayaancihsenik, pepahkaan kaye ci⁠ani ayishiwepaninik; wiin kaye kaa⁠oshi pakitinaatc kihciokimaa', otootawaa' kaye ci⁠poonikimaawinitc; wiin kaye kaa⁠miinaatc kakiihtaawentamowin i'i kekiihtaawentaminitc, wiin kaye kaa⁠miinaatc kihkentamaawin i'i kaa⁠nihsitohtaminitc.

²² Wiin kaa⁠naakohtootc kekoonan kaa⁠kihkencikaatehsininikin, kaacaya'iink kaye kaa‑ayaanikin; okihkentaanan kaye kashkiitipihkanonk kaa‑ayaanikin, wiin kaye waahseyaasiwin misiwe ayaani eshi'ayaatc.

²³ Kinanaahkomin, miikwehc kaye kitinin, kaa⁠oKishemanitoomimihkwaa ninkehteya'aamipaniik, kiin kaa⁠miishiyan kakiihtaawentamowin, mashkawisiiwin kaye. Kiin kaye kaa⁠kihkentamooshiyan kaa⁠ishi kakwecimikooyan, kiin kaye kaa⁠kihkentamooshiyaank i'i kihciokimaa opawaacikan,” Taaniyoo kii‑ihkito.

Taaniyoo Kiiwiintamawaatc Kihciokimaan Aaniin Kaa'ishipawaacikenitc, Aaniin Kaye Ehkitoomakaninik

²⁴ Taaniyoo tahsh okii anta waapamaan Eriyaahkoon (Arioch) kaakii anoonimintipan ci⁠nihsaanitc kekiihtaawentaminitc ininiwa' i'imaa Paapilan (Babylon) ahkiink. Miihsh kaa'inaatc, “Keko nihsaahken iki kekiihtaawentamowaatc ininiwak o'omaa Paapilan ahkiink eyaawaatc. Taka niin ishiwishihshin eshi'ayaatc kihciokimaa, niin ninka wiintamawaa ehkitoomakahk kaakii ishi pawaaciketc,” okii'inaan.

²⁵ Miitahsh shemaak Eriyaahkoon (Arioch) kaakii ishiwinikotc eshi'ayaanitc kihciokimaan, o'o ekii'inaanitc, “Ninkii mihkawaa hsa wa'a inini e⁠ayaatc mekweya'ii eshi'ayaanitc Coota (Judah) ahkiink kaakii onci piinimintc, ke⁠kashkihtootc ci⁠wiintamawihk ehkitoomakaninik kipawaacikan,” ekii'inaanitc.

²⁶ Miitahsh Taaniyoo kaa'ikotc kihciokimaan, “Kika kashkihtoon ina ci⁠wiintamawiyan aaniin kaa⁠ishi pawaacikeyaan, aaniin kaye ehkitoomakahk?” okii'ikoon. Taaniyoo iitok Peltihshaasar kiih⁠tako ishinihkaaso.

²⁷ Miihsh o'o Taaniyoo kaa⁠ishi nahkwehtawaatc, “Kaawiin ohsha kaa⁠kakiihtaawakimintwaa, kaa⁠mamaantaawi kiishwewaatc kaye, memaantaawisiwaatc kaye, kaa⁠mamaantaawi kihkencikewaatc kaye otaa kashkihtoohsiinaawaa ci⁠wiintamawihkwaapan kaa⁠kihkencikaatehsininik kaa⁠kakwetweyan.

²⁸ Ayaa ohsha Kishemanitoo kihcikiishikonk kaa⁠kihkentamo'iwetc kekoon kehkencikaatehsininikin. Kiin kaa⁠kihciokimaawiyan Nepakanaasar (Nebuchadnezzar), Kishemanitoo kikii waapanta'ik aaniin waa‑ani ishiwepaninik weti niikaanaya'ii nahke. Mii hsa o'owe kaa⁠ishi pawaacikeyan, kaa⁠ishinaman kaye kinaanaakatawentamowinink eh⁠pimihshinan kinipewinink.”

²⁹ “Kehciokimaawiyan, e⁠nipaayan hsa kikii ishi pawaacike aaniin keni ishiwepahk weti niikaanaya'ii. Kishemanitoo ohsha kaa⁠kihkentamooshiwetc kehkencikaatehsininikin kikii waapanta'ik aaniin keni ishiwepaninik.

³⁰ Niin tahsh noonkom o'o kaa⁠kihkencikaatehsinok ninkii waapanta'ikoowis ci⁠nihsitohtamaan. Kaawiin niin awahshime ninkakiihtaawentansii ahpiihc wiin iki kotak ininiwak kaa⁠pimaatisiwaatc. Kiin ohsha kihciokimaa ci⁠kihkentaman kaakii ishi pawaacikeyan, ci⁠nihsitohtaman kaye i'i kaakii ishi naanaakatawentaman kaakii onci kihkentamo'ikooyan.”

³¹ “Kehciokimaawiyan, mii hsa kaa⁠ishinaman e⁠inaapiyan. Kikii waapamaa hsa oshihcikan e⁠niipawitc, aahpici ekii mintitotc, eh⁠pakahkiwaahsenaakositc, wiinke kaye e⁠kohtaasinaakositc.

³² A'a tahsh oshihcikan kaakii waapamatc wiinke hsa piko osaawi shooniyaa waapihkonk kii‑ishihtikwaane, waapaapihko shooniyaa waapihkonk kii‑inaahkikane, mii kaye kaa⁠ishinihketc. Osaawaapihkonk tahsh kii‑ishimihsate, mii kaye 'i kaa⁠ishipwaametc.

³³ Piiwaapihkonk tahsh kii‑ishikaate, waapikan kaa⁠kinikawihsink piiwaapihkonk hsa kii‑ishisite.

³⁴ Mekwaa tahsh eh⁠kanawaapamatc, ahsin kaakii pahkwe'ontc pemaatisitc ekiih tootansik. Mayaa i'imaa ositiniink ini oshihcikanan ekii ishi pankihshink a'a ahsin kaakii ishi waapikani piiwaapihkositenitc. Miitahsh kaakiih shikositeshkoosotc a'a oshihcikan.

³⁵ Miitahsh a'a waapikan, piiwaapihk, osaawaapihk, waapaapihko shooniyaa waapihk, kaa⁠ishi piihsihsekin. A'a kaye osaawi shooniyaa waapihk i'imaa kii‑ishi tako piihsihse, maamaw ini kaakiih piikohsekin ekii ani ishinaakwahkin taapishkoo kaa⁠paashkinehsek kaa‑ayaak kaa⁠tashi pawikanaancikenk kii⁠niipink. Kii⁠piitaanimahk tahsh kaawiin kekoon ishko wepaahsinsinoon. A'a tahsh wiin ahsin kaakiih shikoshkiketc kii⁠ani kihci waciiwi, ekii ani mooshkineshkank misiwe ahkiini.”

³⁶ “Kihciokimaa, mii hsa owe kaa⁠ishi pawaacikeyan, noonkom tahsh kika wiintamawin aaniin ehkitoomakahk i'i kipawaacikan.

³⁷ Kiin kaa⁠kihciokimaawiyan ihsa kitookimaahkantawaak kihciokimaak. Kishemanitoo kihcikiishikonk eyaatc ohsha kimiinik ci⁠tipencikewatc, ci⁠mashkawisiiwatc, ci⁠mashkawentaakosiwatc, ci⁠kihci inentaakosiwatc kaye.

³⁸ Kikiih pakitinamaak kaye ci⁠tipenimimatc pemaatisinitc, aya'aawihsha' mooshehkamik eyaanitc, pinehshiinsha' kaye kaa⁠papaamihsenitc ishpimink. Aanti hsa piko entashiihkenitc kikii ishi miinik kahkina ci⁠tipenimimatc. A'a hsa oshihcikan kaashi osaawi shooniyaa waapihkohtikwaanetc, mii hsa 'iwe kiin.

³⁹ Kii‑ishkwaa ayaayan tahsh, kotak hsa kihciokimaa tipencikewin tani ayaa, noonta' ke⁠inentaakwahk. Miinawaa tahsh kotak kihciokimaawiwin tani ayaa osaawaapihkonk ke⁠tinowentaakwahk, mii hsa 'i misiwe ke⁠tipentamoomakahk ahki. Mii 'owe nihsin (3) kihciokimaawiwin kaapi ayaamakahk.

⁴⁰ I'iwe tahsh ke⁠niiwink kihciokimaawiwin ishkwaac ke⁠ayaak, piiwaapihkonk ta‑ahpiihci soonkentaakwan. Inashke piiwaapihk opiikoshkaan, oshamakishkaan kaye kahkina kekoonini. Piiwaapihk tahsh i'i e⁠ishihcikemakahk, mii hsa i'imaa kahkina kekoonan keshi piikoshkaamakahkin, keshi shikoshkaakin kaye ini otaanaank okimaawiwinan kaakiih pi ayaakin.

⁴¹ Kikii waapamaa tahsh kaye a'a oshihcikan e⁠ishisitetc, oniihsiikisitaanan kaye ekii waapikaniwaninikin eh⁠kinikawihsininik piiwaapihk. Mii hsa 'i ke⁠inentaakwahk i'i kihciokimaawiwin ci⁠niishwentaakwahk. Piiwaapihk iitok aahpici mashkawentaakwan aana kaa⁠kinikawihsink i'imaa waapikanink. I'i tahsh kihciokimaawiwin eniwehk keyaapi pankii ta⁠mashkawentaakwan.

⁴² Ini tahsh niihsiikisitaanan e⁠waapikaniwankin eh⁠kinikawipiiwaapihkowankin itahsh, mii hsa 'i kihciokimaawiwin ke⁠onci mashkawentaakwahk, shaakooc itahsh kaye ta⁠wahkewan.

⁴³ I'i tahsh kaakii ishi waapantaman waapikan eh⁠kinikawihsink piiwaapihkonk, mii hsa 'i pemaatisiwaatc eshi kakwe wiiciintiwaatc eh⁠kinikawi wiitikenti'ikowaatc tepenimikowaatc. Kaawiin tahsh oka kashkihtoohsiinaawaa weweni cikii wiiciintiwaahpan taapishkoo waapikan, piiwaapihk kaye weweni kaa⁠kashkihcikaatehsinok ci⁠kinikawinikaatekin.

⁴⁴ Ahpii tahsh i'i okimaa' ayaanitc, Kishemanitoo hsa kihcikiishikonk eyaatc oka oshihsitoon kotak kihciokimaawiwin wiihkaa ke⁠nihshiwanaacihcikaatehsininik, wiihkaa kaye ke⁠shaakoocihcikaatehsininik. Miitahsh wiin i'imaa ini kotak kihciokimaawiwinan ke⁠onci shikoociishkikaatekin. I'i tahsh wiin kihciokimaawiwin Kishemanitoo ke⁠oshihsitootc kaawiin wiihkaa ta⁠poonihsehsinini.

⁴⁵ Mii hsa tahsh eshihsink kipawaacikan, kaakii waapamatc ahsin kaakii onci pahkwe'ontc waciink pemaatisitc ekiih tootansik. A'a ahsin ekiih piikoshkank piiwaapihkoni, osaawaapihkoni, waapikani waapaapihko shooniyaa waapihkoni, osaawi shooniyaa waapihkoni kaye wiinke ekiih piihsishkawaatc. Kehciokimaawiyan, Kishemanitoo kehci inentaakositc hsa kikii waapanta'ik aaniin keni ishiwepaninik weti niikaanaya'ii. Tepwe hsa 'i kaakii ishi pawaacikeyan, i'i kaye ehkitoomakahk kipawaacikan kehcinaac iko tepwe ta⁠ishiwepan,” okii'inaan Taaniyoo kihciokimaan.

Taaniyoo Kii'ishpakimintc

⁴⁶ Miitahsh kihciokimaan Nepakanaasaran kaakii animihkohtaanitc eshi'ayaatc Taaniyoo ekii kihtenimikotc. Miihsh kaakii anoohkiinitc ci⁠piitamawintc miikiwaanan, minaako'onan kaye, ci⁠pakitinaahsoohtamawintc.

⁴⁷ Miihsh o'o kihciokimaan kaa'ikotc, “Tepwe iinsan kiKishemanitoom, maawac otipenimaa' kotak manitoo', otipenimaa' kaye kihciokimaa'. Wiin kaye kaa⁠kihkentamo'iwetc kekoonan kehkencikaatehsininikin, kiin aaniihsh kikiih kashkihtoon ci⁠wiintaman o'o kaakiih kihkencikaatehsinokipan,” okii'ikoon.

⁴⁸ Miihsh kaye kaakii ishpakimikotc, ekii miinikotc kaye niipiwa' wenishihshininikin miikiwewinan. Okii ishi'ikoon kaye ci⁠tipentank kaakii inikohko tipa'ahkaatenik Paapilan (Babylon) ahki, ekii inakimikotc kaye ci⁠tipenimaatc kahkina kekiihtaawakimimintc ininiwa'.

⁴⁹ Taaniyoo hsa tahsh okii ishi kakwecimaan kihciokimaan ci‑inakimaanitc Shetaraahkoon (Shadrach), Miihshaahkoon (Meshach), Apetihnikoon (Abednego) kaye ci⁠naanaakacihtoonitc aaniin enahkamikaninik i'imaa Paapilan ahkiink. Taaniyoo hsa wiin kihciokimaawikamikonk kii‑ishi'ayaa.