Taaniyoo 12 - Ojibwe Kihcimasina'ikan

Aaniin Keni'ishiwepahk Ahpii Kekoonan Wii'anipoonihsekin

¹ “Miitahsh i'i ahpii a'a kaa⁠niikaanentaakositc encal Maaikal (Michael) enintc kaa⁠kanawenimaatc kipimaatisiima' ke⁠naakositc. Wiinke hsa ko ta⁠kihci maanshihsenaaniwan i'i ahpii, wiihkaa otaanaank pemi ishiwepahsinok. Miitahsh noonkom payesh i'i ci‑ishiwepahk. I'i hsa ahpii ishihsek kipimaatisiimak, entahshiwaatc kaye weshipii'ikaatenikin owiinsowiniwaan i'imaa masina'ikanink, ta⁠pimaaci'aawak.

² Niipiwa' hsa tahsh pemaatisiwaatc kaakii nipowaahpan ta⁠kiiwe pimaatisiwak; aaninta hsa oka tepinaanaawaa nehpici pimaatisiwin, aaninta tahsh wiin oka tepinaanaawaa nehpici akatentaakosiwin.

³ Iki hsa kekiihtaawentamowaatc tashi waahsenaakosiwak kaashi waahsenaakwaninik kiishik, iki kaye niipiwa' pemaatisinitc keshi kihkinowinaawaatc inahke kwayahkwaatisiwinink taapishkoo wanankohshink tashi nehpici waahsenaakosiwak,” ninkii'ik.

⁴ Miihsh o'o kaa‑ani'ishitc, “Taaniyoo, mii hsa 'i ishi sihpweyiikinan i'i masina'ikan, ci⁠kipwaskiwahsaman ci⁠paahkiikinikaatehsinok piinihsh ci⁠ocihcihsek ke⁠ishkwaahsek kahkina kekoon. Ta⁠paahtiinowak hsa misiwe ke⁠papaa ishaawaatc ci⁠kakwe nanki kihkentaahsowaatc,” ninkii'ik.

⁵ Miitahsh niin Taaniyoo e⁠inaapiyaan kaakii waapamakwaa niishin ininiwak e⁠niipawiwaatc. Peshik hsa o'omaa nahkekaam siipink kii‑ishi niipawi, a'a tahsh peshik aakami siipi kii‑ishi niipawi.

⁶ Miihsh a'a peshik kaakiih kakwecimaatc ini encalan kaa⁠waapishki'onitc kaakii niipawinitc wakitaaciwan siipink o'o ekii'inaatc, “Aaniin itahsh minihk ke⁠ishihsek cipwaa tipihsekin ono ke⁠maamahkaacihsekin kaa⁠tashintaman ewii ishiwepahk weti ishkwaac?” okii'inaan.

⁷ Miitahsh ini encalan kaa⁠waapishki'onitc minci niishoonihk kiishikonk inahke kaakii ishi ishpinihkeninitc, ekii noontawimak e⁠ahpiwiinaanitc Nehpic Kaa⁠pimaatisinitc Kishemanitoon. Miihsh o'o kaa⁠ishi nahkwehtaminitc, “Nihsopipoon aapihta hsa ehta o'o ta⁠ishihse. Ahpii awahshime keyaapi ci⁠sihswenaahsiwimintc Kishemanitoo opimaatisiima', mii hsa 'i aasha ono ci‑ishkwaa ishiwepahkin,” kii‑ihkitowan.

⁸ Kaawiin itahsh ninkii nihsitohtamowaahsiin aanakii noontawak aaniin kaa⁠ihkitotc. Miihsh kaa⁠ishi kakwecimak, “Tepenimiyan, aaniin itahsh ke⁠ishiwepahk i'i ahpii ocihcihsek?” ninkii inaa.

⁹ Miitahsh o'o kaa'ishitc, “Taaniyoo, mii 'i anishi maacaan aaniihsh ono ihkitowinan ta⁠manaa kihkencikaatewan, ci⁠kipishkiwahsikaatekin kaye piinihsh ci⁠ocihcihsek weti ishkwaac kekoonan kaawii ishkwaahsekin.

¹⁰ Ta⁠paahtiinowak pemaatisiwaatc ke⁠pehki'intwaa, ci⁠pehkinaakosiwaatc, ke⁠minonaakosi'intwaa kaye. Meci'ishiwepisiwaatc hsa kaawiin ta⁠nihsitohtansiiwak, kaawiin kaye oka poonihtoohsiinaawaan omaci'ishiwepisiwiniwaan. Iki tahsh wiin kekiihtaawentamowaatc oka nihsitohtaanaawaa.”

¹¹ “Ahpii ocihcihsek ci⁠kiishkinikaatekin kaa⁠nihtaa pakitinaahsonk entahso kiishik, piinihsh itahsh ci⁠ani ocihcihsek kaawii onahcikaatek Kekwaanihsakinaakwahk Ke⁠nihshiwanaacihcikemakahk, mii hsa 'i mitaahshiniishwaahk shikwa shaankahsimitana (1,290) tahso kiishik ci‑ishihsek.

¹² Ta⁠shawentaakosiwak hsa iki keni pii'owaatc ke⁠tepweyentaakosiwaatc piinihsh mitaahshinihswaahk shikwa nihsimitanashinaanan (1,335) tahsokiishik ci⁠ani ocihcihsenik.”

¹³ “Taaniyoo, kiin itahsh wiin tepweyentaakosin piinihsh weti ci‑ishkwaahsek kekoon. Miihsh keshi nipoyan, kika kiiwe wanishkaa tahsh ci⁠tepinaman aaniin keshi tipa'amaakooyan ishkwaac ani kakiishikahk.”