Taaniyoo 10 - Ojibwe Kihcimasina'ikan

Taaniyoo Kii'ishinank Kii'ayaatc Taaikarihs Siipink

¹ Nihsopipoon (3) itahsh kii‑ishihsenik kii⁠kihciokimaawinitc Saairahs (Cyrus) eshinihkaasonitc Persha ahkiink (Persia) wenciinitc, mii hsa 'i ahpii Taaniyoo, Peltihshaasar enintc kaakii kihkentamoonintc. I'i hsa enaacimoomakaninik kiih⁠tepwemakanini wiinke tahsh i'iwe ahpii ci⁠sanakaninik. Miitahsh kaakii wiintamawintc aaniin eshihsininik ishinamowin.

² Miitahsh i'i ahpii niin Taaniyoo kaakii kihci piikwentamaan nihsotawahte minihk.

³ Kaawiin hsa ninkii onci miicihsiin wenishihshik miicim, komaa kaye wiiyaahs. Kaawiin kaye ninkii onci minihkwehsii shoominaapo, kaawiin cikiih pinaahkwe'oyaan piinihsh nihsotawahte ekii ishihsek.

⁴ Nihtam kiisihs itahsh eh⁠pimakinsotc, niishtanashiniiwin e⁠inakinsotc (24), ninkii niipaw ciiki siipi Taaikarihs (Tigris) ecikaatek.

⁵ Miihsh ishpimink e⁠inaapiyaan, kaakii waapamak inini eh⁠kikishkank waapishkisenipaawekin, e⁠waapishkihkonayetc, e⁠kihcipiswaaketc itahsh maawac wenishihshininik osaawi shooniyaa waapihki kihcihpison.

⁶ Miitahsh kaa⁠ishi wiiyawetc taapishkoo ahsin kaa⁠shaaponaakositc. Taapishkoo kaashi waapaahtehsek kii⁠waahtehsek kii‑ishiinkwe. Oshkiinshikoon itahsh kii‑ishinaakwaniniwan taapishkoo ewaahsahkone piskanenikin. Onihkan, ohkaatan kaye kii‑ishinaakwaniniwan taapishkoo kaa⁠waasihkwaapihka'ikaatek osaawaapihk. Miitahsh kaa⁠inihtaakositc taapishkoo awiyak kaa⁠paahtiinwewitamowaatc.

⁷ Niin hsa ehta Taaniyoo ninkii waapantaan i'i ishinamowin, iki tahsh wiin ininiwak kaakii wiiciiwiwaatc kaawiin cikii waapantamowaatc, shaakooc hsa kii⁠kihci sekisiwak. Miihsh kaa⁠ishi maaciipa'iwewaatc ekii awi kaasowaatc.

⁸ Niin itahsh ehta i'imaa ninkii ayaa ekiih kanawaapantamaan i'i meyaamahkaasinaakwahk ishinamowin. Wiinke hsa ninkiih caakii, wiinke kaye ekii waapi nipoowinaakosiyaan. Kaawiin kekoon ninkiih kashkihtoohsiin ci⁠kii‑ishihcikeyaampaan.

⁹ Miitahsh kaakiih kanooshitc. E⁠noontawak itahsh mii 'i kaakiih kawihseyaan ekii waniihkeyaan, ekii animihkohshinaan mihtahkamik.

¹⁰ Miitahsh kaakiih saaminitc ekii mayaawipihshitc. Wiinke tahsh ninkii nininkaanimis eh⁠pimitaacimowi kaapawiyaan.

¹¹ Miihsh o'o kaa'ishitc, “Taaniyoo wiinke kaa⁠kihci inenimikooyan, niipawin weweni ci⁠pisintaman o'o kaawii'ininaan. Niin iitok ninkiih piicinisha'okoo eshi'ayaayan,” ninkii'ik. O'o tahsh ekii'ishitc, mii 'i kaakiih pasikwiiyaan ekii nininkishkaayaan.

¹² Miihsh o'o kaa'ishitc, “Taaniyoo keko sekisihken. Kishemanitoo ohsha kikii noontaak aaniin kaa⁠ishi anami'ehtawatipan, nihtam iko eh⁠kiishikaninik kaakii mashkawi inentamampan ewiih tapahsenimoyan ci⁠tepinaman nihsitohtamowin. Miihsh wenci piishaayaan e⁠nahkwehcikaatek kitanami'aawin.

¹³ A'a ohsha tepentank Persha okimaawiwin ahki ninkii nakaashkaak niishtanashipeshikokiishik (21). Miitahsh kaa⁠niikaanisitc encal Maaikal (Michael) kaakiih pi wiici'itc, aaniihsh ninkiih kishaatinikoowaan i'imaa Persha ahkiink.

¹⁴ Miitahsh noonkom wenci piishaayaan ewii wiintamawinaan ci⁠kihkentaman aaniin keni ishihsewaatc kipimaatisiimak weti niikaanaya'ii nahke. Aaniin wa‑ani ishiwepahk weti piciinak i'imaa ohsha ishinamowinink ishi tashinte,” ninkii'ik.

¹⁵ Mekwaa tahsh o'onahke e⁠ishi kakanooshitc, mihtahkamik inahke ninkii ishi acitawihkwen ekiih kashkihtoohsiiwaan ci⁠kiikitoyaan.

¹⁶ Miitahsh a'a ininiink kaa⁠ishinaakositc kaakiih saaminank nintoon, miihsh kaa⁠ishi maacii kaakiikitoyaan. Miihsh o'o kaa'inak kaakii wiicikaapawihtawitc, “Tepenimiyan, i'i kaa⁠ishinamaan wiinke nincaakii'ikon, miihsh wenci kashkihtoohsiiwaan kekoon ci‑ishihcikeyaan.

¹⁷ Mii hsa 'i enenintisoyaan taapishkoo anohkii'aakan kaa⁠kakanoonaatc otookimaaman. Koonike naa nintaa kashkihtoon ci⁠kanooninaampaan, aasha kota eh⁠caakiiyaan, akaawaa kaye eh⁠pakitanaamoyaan?” ninkii'inaa.

¹⁸ Miinawaa tahsh ninkiih saaminik, miihsh kaa⁠ishi mashkawi manci'oyaan.

¹⁹ Miihsh o'o kaa'ishitc, “Inini keko sekisihken wiinke kaa⁠kihci inenimikooyan, Pisaanentan! Mashkawentan kaye ci⁠mashkawenimoyan!” ninkii'ik. Ahpii tahsh o'o kaa'ishitc, mii hsa 'i kaa⁠ishi mashkawi manci'oyaan o'o ekii'inak, “Tepenimiyan, taka kanooshihshin, kiin iitok kaa⁠mashkawisii'iyan,” ekii'inak.

²⁰ Miitahsh o'o kaa'ishitc, “Kikihkentaan ina kaah⁠pi'onci anta waapaminaan? Mii ohsha 'i aasha wiipa ci⁠ani kiiweyaan ci⁠ani miikaanak tepentank Persha ahki. Miihsh kaye 'i ahpii cipi naasihkawitc tepentank Kariihs (Greece) ahki.

²¹ Pinamaa tahsh kiwii wiintamawin aaniin eshipii'ikaatek masina'ikanink Tepwewin eshi oshipii'ikaatek. Kaawiin hsa awiya ninaatamaakohsii mii ehta ko Maaikal Isriyala' kaa⁠naakaci'aatc.”