Taaniyoo 1 - Ojibwe Kihcimasina'ikan

Taaniyoo, I'i Kaye Owiiciiwaakana' Ehtashinsowaatc

¹ Nihsoahki tahsh Cihooyahkiman (Jehoiakim) kaa⁠kihciokimaawinitc i'imaa Coota (Judah) ahkiink, Nepakanaasar (Nebuchadnezzar) Paapilan (Babylon) ahkiink kaakii kihciokimaawitc kiih⁠pitakohshin wiinke ekii waahkaashkamowaatc Ceroosalam kihci ootena.

² KaaTipencikenitc hsa pisaan okiih pakitinikoon ci⁠kaahcitinaatc ini kihciokimaan Cihooyahkiman Coota kihciokimaan. Okii otaahpinaanan tahsh kaye aapacihcikanan Kishemanitoon oKihci anami'ewikamikoniink kaakii onci tipentaakwaninikin, ekii ishiwitootc weti Paapilan ahkiink. Miiwan hsa ini kaa⁠ishi ahtootc kaakii ishi ahtenikin wenootisiwinan i'imaa okihci anami'ewikamikoniink omanitooma' eshi'ayaanitc.

³ Kihciokimaa tahsh okii anoonaan Aashpinaasan (Ashpenaz) kaakii ayaanihke tipentaminitc otookimaawikamik, ci⁠piinaanitc aaninta oshkiniikiwa' Isriyala' (Israel) kaakiih kaahcitinimintc kaakii onci tipentaakosinitc kihciokimaank, kaakiih kihtentaakosinitc kaye.

⁴ Oshkiniikiwa' kaa⁠maahkisihsinik, kaa⁠minonaakosinitc, kaa⁠nihsitawinaakosinitc eh⁠kihkentaahsonitc, kaa⁠nihsitohtaminitc, ke⁠kitaahtapi kihkentaahsonitc, ke⁠teahpiihtentaakosinitc ci⁠tashi pamiihtaakenitc i'imaa kihciokimaawikamikonk. Miiwa' ihsa onoweniwa' Aashpinaas kaakii anoonintc ci⁠kihkino'amawaatc Paapilan ishikiishwewin, ci⁠nihtaa anamihtoonitc, ci⁠nihtaawipii'aminitc kaye.

⁵ Kihciokimaa tahsh kaye kii‑ishi anoohkii ci⁠oshi ahshamimintc miicim entahso kiishik, peshikwan ci‑inancikenitc kaakii nihtaa inancikenitc i'i kaakii wiitoohpamikotc kihciokimaa, ci⁠mina'imintc kaye oshoominaapoom. Nihsoahki tahsh minihk ci⁠kihkino'amawimintc i'i oshkiniikiwa', kii‑ishkwaa kihkino'amawimintc tahsh mii 'i payesh ci⁠anohkiihtaakotc.

⁶ Miiwak hsa oko mekweya'ii Coota ahkiink kaakii ontinintwaa: Taaniyoo (Daniel), Henanaaya (Hananiah), Mihsheyal (Mishael), a'ahsh kaye Aasaraaya (Azariah).

⁷ Miihsh a'a kaa‑aanihke tipentank okimaawikamik kaakii aancinihkaanaatc. Mii hsa 'o kaa⁠ishinihkaanaatc. Taaniyoon okii ishinihkaanaan Peltihshaasar (Belteshazzar), Henanaayawan tahsh Shetaraahk (Shadrach), Mihsheyalan tahsh Miihshaahk (Meshach) okii ishinihkaanaan, ini Aasaraayawan Apetihnikoo (Abednego) okii ishinihkaanaan.

⁸ Taaniyoo tahsh kii‑inentam ewii miicihsik miicim ke⁠onci wiinentaakosihpan kihciokimaan kaakii onentaminitc ci⁠miiciwaatc, kaawiin kaye kii‑inentansii ci⁠minihkwetc shoominaapooni ke⁠onci inakinsohpan ci⁠wiinentaakositc. Miihsh kaakiih kakwecimaatc ci⁠wiici'ikotc kaa‑aanihke tipentaminitc okimaawikamik o'o nahke cishi wiini'itisohsik.

⁹ Kishemanitoon hsa okii ishi'aani Aashpinaasan ci⁠minwaapamikotc, ci⁠koohpaatenimikotc kaye a'a Taaniyoo.

¹⁰ Miitahsh o'o kaa'ikotc kaa‑aanihke tipentaminitc okimaawikamik, “Ninkohsaa ohsha nintookimaam, kihciokimaa, kaakii oninank ke⁠miiciwek, ke⁠minihkwewek kaye. Kiishpin hsa noonta' ishinaawinek eshinaakosinitc kotak oshkiniikiwa', kehcinaac maawiin niin ninka kiishkikweka'ok,” okii'ikoon.

¹¹ Aashpinaas hsa kii⁠anoonaakopan okanawenciken ci⁠kanawenimaanitc Taaniyoon, Henanaayawan, Mihsheyalan, ini kaye Aasaraayawan. Miiwan tahsh ini kenawenimikowaatc Taaniyoo kaakii'inaatc,

¹² “Taka anta kihkenimihshinaam mitaahsokiishik minihk, kaa⁠kihtikaatek tinowi miicim ehta taka ahshamihshinaam. Nipi kaye ehta mina'ihshinaam ci⁠minihkweyaank.

¹³ Naanaakasaapamihshinaahkaank itahsh taka ke⁠ishinaakosiwaankwen iki oshkiniikiwak kaa⁠miiciwaatc miicim kihciokimaank kaa⁠onciinik. Waah⁠tootawiyaank itahsh iko pisaan tootawihshinaahkaank kii‑ishkwaa waapamiyaank,” okii'inaan.

¹⁴ Miitahsh kaakii inentaminitc ini kenawenimikowaatc o'o ci‑ishihcikewaatc, ekii anta kihkenimikowaatc mitaahsokiishik.

¹⁵ Mitaahsokiishik hsa tahsh kaa⁠ishkwaa ishihsenik, nawac hsa wiinawaa kii⁠mino'ayaawinaakosiwak, nawac kaye wiinawaa kii⁠mashkawinaakosiwak ahpiihc wiin i'i kotak oshkiniikiwa' kaakii miicinitc miicim kihciokimaank wenciinik.

¹⁶ Miitahsh ini kenawenimikowaatc kaawiin awahshime okii inancike'ikohsiiwaan, kaawiin kaye okii ishi mina'ikohsiiwaan aaniin kaakii ishi antawenimintwaapan. Kaa⁠kihtikaatenik miicim ehta okii ahshamikowaan.

¹⁷ Kishemanitoo hsa tahsh okii ishi shawenimaa' o'o niiwin oshkiniikiwa' ci⁠okihkentamaawininitc, ci⁠nakaci nihsitohtaminitc kaye kahkina kekoon, ci⁠kakiihtaawentaminitc kaye. Okii ishi shawenimaan tahsh Taaniyoon ci⁠nihsitohtaminitc kahkina ishinamowinan, kahkina kaye pawaacikanan.

¹⁸ Nihsoahki tahsh kaah⁠tipihsenik kaakii ishi onahtoonihpan kihciokimaan, Aashpinaasan okii ishiwinikowaan eshi'ayaanitc kihciokimaan Nepakanaasaran (Nebuchadnezzar).

¹⁹ Kihciokimaan itahsh okiih kakanoonikowaan, kaawiin tahsh awiyan aapiinc kii⁠mihkikaniwihsiiwan i'i ci⁠ahpiihci kihkentaahsonitc kaakii ishi kihkentaahsowaatc wiinawaa iki Taaniyoo, Henanaaya, Mihsheyal, a'ahsh kaye Aasaraaya. Miitahsh kaakii maatanohkiihtawaawaatc kihciokimaan eshi'ayaanitc.

²⁰ Aaniin hsa ko kaa⁠ishi kakwecimikowaatc kihciokimaan, aaniin iko kaye kaa⁠ishi anta kihkencikenitc, nawac hsa wiinawaa kii⁠kihkentaahsowak. Mitaahciink minihk ekii ahpiihci kihkentaahsowaatc kaakii ahpiihci kihkentaahsonitc i'i kaa⁠mamaantaawi kiishwenitc, i'i kaye memaantaawisinitc i'imaa eyaanitc Nepakanaasaran kaakii ahko tipencikenitc.

²¹ Miitahsh wiin Taaniyoo i'imaa kaa‑ayaatc piinihsh kii⁠ani kihciokimaawinitc Saairahsoon (Cyrus).